Chapter 21

taṃ vidarbharamaṇīmaṇisaudhādujjihānamanudarśitasevaiḥ |
aparṇānnijakarasya narendrairātmanaḥ karadatā punarūce || 1 ||
[Analyze grammar]

tasya cīnasicayairapi baddhā paddhatiḥ padayugātkaṭhineti |
tāṃ pyadhatta śirasāṃ khalu mālyairājarājirabhitaḥ praṇamantī || 2 ||
[Analyze grammar]

drāgupāhriyata tasya nṛpaitaddṛṣṭidānabahumānakṛtārthaiḥ |
svasya diśyamatha ratnamapūrvaṃ yatnakalpitaguṇādhikacitram || 3 ||
[Analyze grammar]

aṅgulīcalanalocanabhaṅgibhrūtaraṅgaviniveditadānam |
ratnamanyanṛpaḍhaukitamanye tatprasādamalabhanta nṛpāstat || 4 ||
[Analyze grammar]

tānasau kuśalasūnṛtasekaistarpitānatha piteva visṛjya |
astraśastrakhuralīṣu vininye śaiṣyakopanamitānamitaujāḥ || 5 ||
[Analyze grammar]

martyaduṣpracaramastravicāraṃ cāruśiṣyajanatāmanuśiṣya |
svedabindukitagodhiradhīraṃ sa śvasannabhavadāplavanecchuḥ || 6 ||
[Analyze grammar]

yakṣakardamamṛdūnmṛditāṅgaṃ prākkuraṅgamadamīlitamaulim |
gandhavārbhiranubandhitabhṛṅgairaṅganā siṣicuruccakucāstam || 7 ||
[Analyze grammar]

bhṛbhṛtaṃ pṛthutapoghanamāptastaṃ śuciḥ snapayati sma purodhāḥ |
saṃdadhajjaladharaskhaladoghastīrthavārilaharīrupariṣṭāt || 8 ||
[Analyze grammar]

preyasīkucaviyogahavirbhugjanmadhūmavitatīriva bibhrat |
snāyinaḥ karasaroruhayugmaṃ tasya garbhadhṛtadarbhamarājat || 9 ||
[Analyze grammar]

kalpyamānamamunācamanāarthaṃ gāṅgamambu culukodaracumbi |
nirmalatvamilitapratibimbadyāmayacchadupanīya kare nu || 10 ||
[Analyze grammar]

muktamāpya damanasya bhaginyā bhūmirātmadayitaṃ dhṛtarāgā |
aṅgamaṅgamanukaṃ parirebhe taṃ mṛdo jalamṛdūrgṛhayālum || 11 ||
[Analyze grammar]

mūlamadhyaśikharasthitavedhaḥśauriśaṃbhukarakāṅghriśiraḥsthaiḥ |
tasya mūrdhni cakare śuci darbhairvāri vāntamiva gāṅgataraṅgaiḥ || 12 ||
[Analyze grammar]

prāṇamāyatavato jalamadhye mañjimānamabhajanmukhamasya |
āpagāparivṛḍhodarapūre pūrvakālamuṣitasya sitāṃśoḥ || 13 ||
[Analyze grammar]

martyalokamadanaḥ sadaśatvaṃ bibhradabhraviśadadyutitāram |
ambaraṃ paridadhe vidhumauleḥ spardhayeva daśadigvasanasya || 14 ||
[Analyze grammar]

bhīmajāmanu calatprativelaṃ saṃyiyaṃsuriva rājaṛṣīndraḥ |
āvavāra hṛdayaṃ na samantāduttarīyapariveṣamiṣeṇa || 15 ||
[Analyze grammar]

snānavārighaṭarājadurojā gauramṛttilakabindumukhenduḥ |
keśaśeṣajalamauktikadantā taṃ babhāja subhagāplavanaśrīḥ || 16 ||
[Analyze grammar]

śvaityaśaityajaladaivatamantrasvādutāpramuditāṃ caturakṣīm |
vīkṣya moghadhṛtasaurabhalobhaṃ ghrāṇamasya salilaghramivāsīt || 17 ||
[Analyze grammar]

rājñi bhānumadupasthitaye'sminnāttamambu kirati svakareṇa |
bhrāntayaḥ sphurati tejasi cakrustvaṣṭṛtarkucaladarkavitarkam || 18 ||
[Analyze grammar]

samyagasya japataḥ śrutimantrāḥ saṃnidhānamabhajanta karābje |
śuddhabījaviśadasphuṭavarṇāḥ sphāṭikākṣavalayacchalabhājaḥ || 19 ||
[Analyze grammar]

pāṇiparvaṇi yavaḥ punarākhyaddevatarpaṇayavārpaṇamasya |
nyupyamānajalayogitilaughaiḥ sa dviruktakarakālatilo'bhūt || 20 ||
[Analyze grammar]

pūtapāṇicaraṇaḥ śucinoccairadhvanānitarapādahatena |
brahmacāriparicāri surārcā veśma rājaṛṣireṣa viveśa || 21 ||
[Analyze grammar]

kvāpi yannabhasi dhūpajadhūmairmecakāgurubhavairbhramarāṇām |
bhūyate sma sumanaḥsumanaḥsragdāmadhāmapaṭale paṭalena || 22 ||
[Analyze grammar]

sāṅkureva rucipītatamā yairyaiḥ purāsti rajanī rajanīva |
te dhṛā vitarituṃ tridaśebhyo yatra hematilakā iva dīpāḥ || 23 ||
[Analyze grammar]

yatra mauktikamaṇerviraheṇa prītikāmadhṛtavahnipadena |
kaṅkumena paripūritamantaḥ śuktayaḥ śuśubhire'nubhavantyaḥ || 24 ||
[Analyze grammar]

aṅkacumbidhanacandanapaṅkaṃ yatra gāruḍaśilājamamatram |
prāpa kelikavalībhavadindoḥ siṃhikāsutamukhasya sukhāni || 25 ||
[Analyze grammar]

garbhamaiṇamadakardamasāndraṃ bhājanāni rajatasya bhajanti |
yatra sāmyamagamannamṛtāṃśoraṅkaraṅkukaluṣīkṛtakukṣeḥ || 26 ||
[Analyze grammar]

ujjihānasukṛtāṅkuraśaṅkā yatra dharmagahane khalu tene |
bhūriśarkarakarambhabalīnāmālibhiḥ sugatasaudhasakhānām || 27 ||
[Analyze grammar]

skharvamākhyadamaraughanivāsaṃ parvataṃ kvacana campakasaṃpat |
mallikākusumarāśirakāṛṣīdyatra ca sphaṭikasānumanuccam || 28 ||
[Analyze grammar]

svātmanaḥ priyamapi prati guptiṃ kurvatī kulavadhūmavajajñau |
hṛdyadaivatanivedyaniveśādyatra bhūmiravakāśadaridrā || 29 ||
[Analyze grammar]

yatra kāntakarapīḍitanīlagrāvaraśmicikurāsu virejuḥ |
gātṛmūrdhavidhuteranubimbātkuṭṭimakṣitiṣu kuṭṭimitāni || 30 ||
[Analyze grammar]

naikavarṇamaṇibhūṣaṇapūrṇe sa kṣitīnduranavadyanivedye |
adhyatiṣṭhadamalaṃ maṇipīṭhaṃ tatra citrasicayoccayacārau || 31 ||
[Analyze grammar]

samyagarcati nale'rkamatūrṇaṃ bhaktigandhiramunākali karṇaḥ |
śraddadhānahṛdayaprati cātaḥ sāmbamambaramaṇirniracaiṣīt || 32 ||
[Analyze grammar]

tattadaryamarahasyajapeṣu sraṅnayaḥ śayamamuṣya babhāja |
raktimānamiva śikṣitumuccai raktacandanajabījasamājaḥ || 33 ||
[Analyze grammar]

hemanāmakataruprasavena tryambakastadupakalpitapūjaḥ |
āttayā yudhi vijitya ratīśaṃ rājitaḥ kusumakāhalayeva || 34 ||
[Analyze grammar]

arcayanharakaraṃ smitabhājā nāgakesarataroḥ prasavena |
soyamāpayadatiryagavāgdikpālapāṇḍurakapālavibhūṣām || 35 ||
[Analyze grammar]

nīlanīraruhamālyamayīṃ sa nyasya tasya galanālavibhūṣām |
sphāṭikīmapi tanuṃ niramāsīnnīlakaṇṭhapadasānvayatāyai || 36 ||
[Analyze grammar]

prītimeṣyati kṛtena mamedṛkkarmaṇā puraripurmadanāriḥ |
tatpuraḥ puramatoyamadhākṣīddhūparūpamatha kāmaśaraṃ ca || 37 ||
[Analyze grammar]

tanmuhūrtamapi bhīmatanūjāviprayogamasahiṣṇurivāyam |
śūlimauliśaśibhītatayā'bhūddhyānamūrcchananimīlitanetraḥ || 38 ||
[Analyze grammar]

daṇḍavadbhuvi luṭhansa nanāma tryambakaṃ śaraṇabhāgiva kāmaḥ |
ātmaśastraviśikhāsanabāṇānnyasya tatpadayuge kusumāni || 39 ||
[Analyze grammar]

tryambakasya padayoḥ kusumāni nyasya saiṣa nijaśastranibhāni |
daṇḍavadbhuvi luṭhankimu kāmastaṃ śaraṇyamupagamya nanāma || 40 ||
[Analyze grammar]

vyāpṛtasya śatarudriyajaptau pāṇimasya navapallavalīlam |
bhṛṅgabhaṅgiriva rudraparākṣaśreṇiraśrayata rudraparasya || 41 ||
[Analyze grammar]

uttamaṃ sa mahati sma mahībhṛtpūruṣaṃ puruṣasūktavidhānaiḥ |
dvādaśāpi ca sa keśavamūrtīrdvādaśākṣaramudīrya vavande || 42 ||
[Analyze grammar]

mallikākusumaduṇḍubhakena sa bhrāmīvalayitena kṛte tam |
āsane nihitamaikṣata sākṣātkuṇḍalīndratanukuṇḍalabhājam || 43 ||
[Analyze grammar]

mecakotpalamayī balibanddhustadvalisragurasi sphurati sma |
kaustubhākhyamaṇikuṭṭimavāstuśrīkaṭākṣavikaṭāyitakoṭiḥ || 44 ||
[Analyze grammar]

svarṇaketakaśatāni sa hemnaḥ puṇḍarīkaghaṭanāṃ rajatasya |
mālayāruṇamaṇeḥ karavīraṃ tasya mūrdhni punaruktamakārṣīt || 45 ||
[Analyze grammar]

nālpabhaktabalirannanivedyaistasya hāriṇamadena sa kṛṣṇaḥ |
śaṅkhacakrajalajātavadarcaḥ śaṅkhacakrajalapūjanayābhūt || 46 ||
[Analyze grammar]

rājñi kṛṣṇalaghudhūpanadhūmāḥ pūjayatyahiripudhvajamasmin |
niryayurbhavadhṛtā bhujagā bhīduryaśomalinitā iva jālaiḥ || 47 ||
[Analyze grammar]

arghaniḥsvamaṇimālyavimiśraiḥ smerajātimayadāmasahasraiḥ |
taṃ pidhāya vidadhe bahuratnakṣīranīranidhimagnamivaiṣaḥ || 48 ||
[Analyze grammar]

akṣasūtragatapuṣkarabījaśreṇirasya karasaṃkarametya |
śaurimuktajapituḥ punarāpatpadmasadmaciravāsavilāsam || 49 ||
[Analyze grammar]

kaiṭabhāripadayornitamūrdhnā sañjitā vicakilasraganena |
jahnujeva bhuvanaprabhuṇā'bhātsevitānunayatāyatamānā || 50 ||
[Analyze grammar]

svānurāgamanaghaḥ kamalāyāṃ sūcayannapi hṛdi nyasanena |
gauravaṃ vyadhita vāgadhidevyāḥ śrīgṛhordhvanijakaṇṭhaniveśāt || 51 ||
[Analyze grammar]

ityavetya vasunā bahunāpi prāpnuvanna mudamarcanayā saḥ |
sūktimauktikamayairatha hārairbhaktimaihata harerupahāraiḥ || 52 ||
[Analyze grammar]

dūrataḥ stutiravāgviṣayaste rūpamasmadabhidhā tava nindā |
tatkṣamasva yadahaṃ pralapāmītyuktipūrvamayametadavocat || 53 ||
[Analyze grammar]

svaprakāśa jaḍa eṣa janaste varṇanaṃ yadabhilaṣyati kartum |
nanvaharpatimahaḥ prati sa syānna prakāśanarasastamasaḥ kim || 54 ||
[Analyze grammar]

maiva vāṅmanasayorviṣayo bhūstvāṃ punarna kathamuddiśatāṃ te |
utkacātakayugasya ghanaḥ syāttṛptaye ghanamanāpnuvato'pi || 55 ||
[Analyze grammar]

chadmamatsyavapuṣastava pucchāsphālanājjalamivoddhatamabdheḥ |
zvaityametya gaganāṅgaṇasaṅgādāvirasti vibudhālayagaṅgā || 56 ||
[Analyze grammar]

bhūrisṛṣṭidhṛtabhūvalayānāṃ pṛṣṭhasīmani kiṇairiva cakraiḥ |
cumbitāvatu jagatsitirakṣākarmaṭhasya kamaṭhastava mūrtiḥ || 57 ||
[Analyze grammar]

dikṣu yatkhuracatuṣṭayamudrāmabhyavaimi caturo'pi samudrān |
tasya potrivapuṣāstava daṃṣṭrā tuṣṭaye'stu mama vā'stu jagatyāḥ || 58 ||
[Analyze grammar]

uddhṛtiskhaladilāparirambhāllomabhirbahiritairbahuhṛṣṭaiḥ |
brāhmamaṇḍamabhavadvalinīpaṃ kelikola tava tatra na mātaḥ || 59 ||
[Analyze grammar]

dānavādyagahanaprabhavastvaṃ siṃha māmava ravairghanaghoraiḥ |
vairidāridiviṣatsukṛtāstragrāmasaṃbhavabhavanmanujārdhaḥ || 60 ||
[Analyze grammar]

daityabharturudarāndhuniviṣṭāṃ śakrasaṃpadamivoddharataste |
pātu pāṇiśṛṇipañcakamasmāñchinnarajjunibhalagnatadantram || 61 ||
[Analyze grammar]

svena pūryata iyaṃ sakalāśā bho bale na mama kiṃ bhavateti |
tvaṃ baṭuḥ kapaṭavāci paṭīyāndehi vāmana manaḥpramadaṃ naḥ || 62 ||
[Analyze grammar]

dānavārirasikāyavibhūtervaśmi te'smi sutarāṃ pratipattim |
ityudagrapulakaṃ balinoktaṃ tvāṃ namāmi kṛtavāmanamāyam || 63 ||
[Analyze grammar]

bhogibhiḥ kṣititale divi vāsaṃ bandhameṣyasi ciraṃ dhriyamāṇaḥ |
pāṇireṣa bhuvanaṃ vitareti chadmavāgbhirava vāmana viśvam || 64 ||
[Analyze grammar]

āśayasya vivṛtiḥ kriyate kiṃ ditsurasmi hi bhavaccaraṇebhyaḥ |
viśvamityabhihito balināsmānvāmana praṇatapāvana pāyāḥ || 65 ||
[Analyze grammar]

kṣattrajātirudiyāya bhujābhyāṃ yā tavaiva bhuvanaṃ sṛjataḥ prāk |
jāmadagnyavapuṣastava tasyāstau layārthamucitau vijayetām || 66 ||
[Analyze grammar]

pāṃsulā bahupatirniyataṃ yā vedhasāraci ruṣā navakhaṇḍā |
tāṃ bhuvaṃ kṛtavato dvijabhuktāṃ yuktakāritaratā tava jīyāt || 67 ||
[Analyze grammar]

kārtavīryabhidureṇa daśāsye raiṇukeya bhavatā sukhanāśye |
kālabhedavirahādasamādhiṃ naumi rāmapunaruktimahaṃ te || 68 ||
[Analyze grammar]

hastalekhamasṛjatkhalu janmasthānareṇukamasau bhavadartham |
rāma rāmamadharīkṛtatattallekhakaḥ prathamameva vidhātā || 69 ||
[Analyze grammar]

udbhavājatanujādaja kāmaṃ viśvabhūṣaṇa na dūṣaṇamatra |
dūṣaṇapraśamanāya samarthaṃ yena deva tava vaibhavameva || 70 ||
[Analyze grammar]

no dadāsi yadi tattvadhiyaṃ me yaccha mohamapi taṃ raghuvīra |
yena rāvaṇacamūryudhi mūḍhā tvanmayaṃ jagadapaśyadaśeṣam || 71 ||
[Analyze grammar]

ājñayā ca piturajñabhiyā ca śrīrahīyata mahīprabhavā dviḥ |
laṅghitaśca bhavatā kimu nadvirvārirāśirudakāṅkagalaṅkaḥ || 72 ||
[Analyze grammar]

kāmadevaviśikhaiḥ khalu neśaṃ māṛpayajjanakajāmiti rakṣaḥ |
daivatādamaraṇe varavākyaṃ tathyayatsvamapunādbhavadastraiḥ || 73 ||
[Analyze grammar]

tadyaśo hasati kambukadambaṃ śambukasya na kimambudhicumbi |
nāmaśeṣitasasainyadaśāsyādastamāpa yadasau tava hastāt || 74 ||
[Analyze grammar]

mṛtyubhītikarapuṇyajanendratrāsadānajamupāṛjya yaśastat |
hrīṇavānasi kathaṃ na vihāya kṣudradurjanabhiyā nijadārān || 75 ||
[Analyze grammar]

iṣṭadāravirahaurvapayodhistvaṃ śaraṇya zaraṇaṃ sa mamaidhi |
lakṣmaṇakṣāṇaviyogakṛśānau yaḥ svajīvitatṛṇāhutiyajvā || 76 ||
[Analyze grammar]

krauñcaduḥkhamapi vīkṣya śucā yaḥ ślokamekamasṛjatkavirādyaḥ |
sa tvadutthakaruṇaḥ khalu kāvyaṃ ślokasindhumucitaṃ prababandha || 77 ||
[Analyze grammar]

viśravaḥpitṛkayāptumanarhaṃ saśravastvamanayetyucitajñaḥ |
kiṃ cakartitha na śūrpaṇakhāyā lakṣmaṇena vapuṣā śravasī vā || 78 ||
[Analyze grammar]

te harantu duritavratatiṃ me yaiḥ sa kalpaviṭapī tava dorbhiḥ |
chadmayādavatanorudapāṭi spardhamāna iva dānamadena || 79 ||
[Analyze grammar]

bālakeliṣu tadā yadalāvīḥ karparībhirabhihatya taraṅgān |
bhāvibāṇabhujabhedanalīlāsūtrapātra iva pātu tadasmān || 80 ||
[Analyze grammar]

karṇaśaktimaphalāṃ khalu kartuṃ sajjitārjunarathāya namaste |
ketanena kapinorasi śaktiṃ lakṣmaṇaṃ kṛtavatā hṛtaśalyam || 81 ||
[Analyze grammar]

nāpageyamanayaḥ saśarīraṃ dyāṃ vareṇa nitarāmapi bhaktam |
mā sa bhūtsuravadhūsuratajño divyapi vratavilopabhiyeti || 82 ||
[Analyze grammar]

ghātitārkasutakarṇadayālurjaitritendukulapārthakṛtārthaḥ |
ardhaduḥkhasukhamabhyanayastvaṃ sāsrubhānuvihasadvidhunetraḥ || 83 ||
[Analyze grammar]

prāṇavatpraṇayirādha na rādhā putraśatrusakhitā sadṛśī te |
śrīpriyasya sadṛgeva tavaśrīvatsamātmahṛdi dhartumajasram || 84 ||
[Analyze grammar]

tāvakāparatanoḥ sitakeśastvaṃ halī kila sa eva ca śeṣaḥ |
sādhvasāvavatarastava dhatte tajjaraccikuranālavilāsaḥ || 85 ||
[Analyze grammar]

hṛdyagandhavahabhogavatīśaḥ śeṣarūpamapi bibhradaśeṣaḥ |
bhogabhūtimadirāruciraśrīrullasatkumudabandhurucistvam || 86 ||
[Analyze grammar]

revatīśasuṣamā kila nīlasyāmbarasya rucirā tanubhāsā |
kāmapāla bhavataḥ kumudāvirbhāvabhāvitarucerucitaiva || 87 ||
[Analyze grammar]

ekacittatatiradvayavādinnatrayīparicito'tha budhastvam |
pāhi māṃ vidhutakoṭicatuṣkaḥ pañcabāṇavijayī ṣaḍabhijñaḥ || 88 ||
[Analyze grammar]

tatra mārajayini tvayi sākṣātkurvati kṣaṇikatātmaniṣedhau |
puṣpavṛṣṭirapatatsurahastātpuṣpaśastraśarasaṃtatireva || 89 ||
[Analyze grammar]

tāvake hṛdi nipātya kṛteyaṃ manmathena dṛḍhadhairyatanutre |
kuṇṭhanādatitamāṃ kusumānāṃ chattramittramukhataiva śarāṇām || 90 ||
[Analyze grammar]

yattava stavavidhau vidhirāsye cāturīṃ carati taccaturāsyaḥ |
tvayyaśeṣavidi jāgrati śarvaḥ sarvavidbruvatayā śitikaṇṭhaḥ || 91 ||
[Analyze grammar]

bhūmavatkalayatā yudhi kālaṃ mlecchakalpaśikhināṃ karavālam |
kalkinā daśatayaṃ mama kalkaṃ tvaṃ vyudasya daśamāvatareṇa || 92 ||
[Analyze grammar]

dehineva yaśasā bhramatorvyāṃ pāṇḍureṇa raṇareṇubhiruccaiḥ |
viṣṇunā janayiturbhavatābhūnnāma viṣṇuyaśasaśca sadartham || 93 ||
[Analyze grammar]

santamadvayamaye'dhvani dattātreyamarjunayaśorjanabījam |
naumi yogajayitānaghasaṃjñaṃ tvāmalarkabhavamohatamorkam || 94 ||
[Analyze grammar]

bhānusunumanugṛhya jaya tvaṃ rāmamūrtihatavṛtrahaputraḥ |
indranandanasapakṣamapi tvāṃ naumi kṛṣna nihatārkatanūjam || 95 ||
[Analyze grammar]

vāmanādaṇutamādanujīyāstvaṃ trivikramatanūbhṛtadikkaḥ |
vītahiṃsanakathādatha buddhātkalkinā hatasamasta namaste || 96 ||
[Analyze grammar]

māṃ trivikrama punīhi pade te kiṃ lagannajani rāhurupānat |
kiṃ pradakṣiṇanakṛdbhramipāśaṃ jāmbavānadita te balibandhe || 97 ||
[Analyze grammar]

ardhacakravapuṣārjunabāhūnyo'lunātparaśunātha sahasram |
tena kiṃ sakalacakravilūne bāṇabāhunicaye'ñcati cikram || 98 ||
[Analyze grammar]

pāñcajanyamadhigatya kareṇāpāñcajanyamasurāniti vakṣi |
cetanāḥ stha kila paśyata kiṃ nācetano'pi mayi muktavirodhaḥ || 99 ||
[Analyze grammar]

tāvakorasi lasadvanamāle śrīphaladviphalaśākhikayeva |
sthīyate kamalayā tvadajasrasparśakaṇṭakitayotkucayā ca || 10 ||
[Analyze grammar]

tyajyate na jalajena karaste śikṣituṃ subhagabhūyamivoccaiḥ |
ānanaṃ ca nayanāyitabimbaḥ sevate kumudahāsakarāṃśuḥ || 101 ||
[Analyze grammar]

ye hiraṇyakaśipuṃ ripumuccai rāvaṇaṃ ca kuruvīracayaṃ ca |
hanta hantumabhavaṃstava yogāste narasya ca hareśca jayanti || 102 ||
[Analyze grammar]

keyamardhabhavatā bhavatohe māyinā nanu bhavaḥ sakalastvam |
śeṣatāmapi bhajantamaśeṣaṃ veda vedanayano hi janastvām || 103 ||
[Analyze grammar]

prāgbhavairudagudagbhavagumphānmuktiyuktivihatāviha tāvat |
nāparaḥ sphurati kasyacanāpi tvatsamādhimavadhūya samādhiḥ || 104 ||
[Analyze grammar]

ūrdhvadikkadalanāṃ dvirakārṣīḥ kiṃ tanuṃ hariharībhavanāya |
kiṃ ca tiryagabhino nṛharitve kaḥ svatantramanu nanvanuyogaḥ || 105 ||
[Analyze grammar]

āptakāma sṛjasi trijagatkiṃ kiṃ bhinatsi yadi nirmitameva |
pāsi cedamavatīrya muhuḥ kiṃ svātmanāpi yadavaśyavināśyam || 106 ||
[Analyze grammar]

jāhnavījalajakaustubhacandrānpādapāṇihṛdayekṣaṇavṛttīn |
utthitābdhisalilāttvayi lolā śrīḥsthitā paricitānparicintya || 107 ||
[Analyze grammar]

vastu vāstu ghaṭate na bhidānāṃ yauktanaikavidhabādhavirodhaiḥ |
tattvadīhitavijṛmbhitatattadbhedametaditi tatvaniruktiḥ || 108 ||
[Analyze grammar]

vastu viśvamudare tava dṛṣṭvā bāhyavatkila mṛkaṇḍutanūjaḥ |
svaṃ vimiśramubhayaṃ na viviñcanniryayau sa katamastvamavaiṣi || 109 ||
[Analyze grammar]

brahmaṇo'stu tava śaktilatāyāṃ mūrdhni viśvamatha patyurahīnām |
bālatāṃ kalayato jaṭhare vā sarvathāsi jagatāmavalambaḥ || 110 ||
[Analyze grammar]

dharmabījasalilā saridaṅghrāvarthamūlamurasi sphurati śrīḥ |
kāmadaivatamapi prasavaste brahma muktidamasi svayameva || 111 ||
[Analyze grammar]

līlayāpi tava nāma janā ye gṛhṇate narakanāśakarasya |
tebhya eva narakairucitā bhīste tu bibhyatu kathaṃ narakebhyaḥ || 112 ||
[Analyze grammar]

mṛtyuhetuṣu na vajranipātādbhītimarhati janastvayi bhaktaḥ |
yattadoccarati vaiṣṇavakaṇṭhānniṣprayatnamapi nāma tava drāk || 113 ||
[Analyze grammar]

sarvathāpi śucini kriyamāṇe mandirodara ivāvakarā ye |
udbhavanti bhavināṃ hṛdi teṣāṃ śodhanī bhavadanusmṛtidhārā || 114 ||
[Analyze grammar]

asmadādyaviṣaye'pi viśeṣe rāmanāma tava dhāma guṇānām |
anvabandhi bhavataiva tu kasmādanyathā nanu janustritaye'pi || 115 ||
[Analyze grammar]

bhaktibhājamanugṛhya dṛśā māṃ bhāṣkareṇa kuru vītatamaskam |
arpitena mama nātha na tāpaṃ locanena vidhunā vidhunāsi || 116 ||
[Analyze grammar]

laṅghayannaharaharbhavadājñāmasmi hā vidhiniṣedhamayīṃ yaḥ |
durlabhaṃ sa tapasāpi giraiva tvatprasādamahamicchuralajjaḥ || 117 ||
[Analyze grammar]

viśvarūpa kṛtaviśva kiyatte vaibhavādbhutamaṇau hṛdi kurve |
hema nahyati kiyannijacīre kāñcanādrimadhigatya daridraḥ || 118 ||
[Analyze grammar]

ityudīrya sa hariṃ prati saṃprajñātavāsitatamaḥ samapādi |
bhāvanābalavilokitaviṣṇau prītibhaktisadṛśāni cariṣṇuḥ || 119 ||
[Analyze grammar]

viprapāṇiṣu bhṛśaṃ vasuvarṣī pātrasātkṛtapitṛkratukavyaḥ |
śreyasā hariharaṃ paripūjya prahva eṣa śaraṇaṃ praviveśa || 120 ||
[Analyze grammar]

mādhyaṃdinādanu vidhervasudhāṣudhāṃśurāsvāditāmṛtamayaudanamodamānaḥ |
prāñcaṃ sa citramavidūritavaijayantaṃ veśmācalaṃ nijarucībhiralaṃcakāra || 121 ||
[Analyze grammar]

bhīmātmajāpi kṛtadaivatabhaktipūjā patyau ca bhuktavati bhuktavatī tato'nu |
tasyāṅkamaṅkuritatatpariripsamadhyamadhyāsta bhūṣaṇabharātibharālasāṅgī || 122 ||
[Analyze grammar]

tāmanvagādaśitabimbavipākacañcoḥ spaṣṭaṃ śalāṭupariṇatyucitacchadasya |
kīrasya kāpi karavāriruhe vahantī saundaryapuñjamiva pañjaramekamālī || 123 ||
[Analyze grammar]

kūjāyujā bahulapakṣaśitimni sīmnā spaṣṭaṃ kuhūpadapadārthamitho'nvayena |
tiryagdhṛtasphaṭikadaṇḍakavartinaikā tāmanvavartata pikena madādhikena || 124 ||
[Analyze grammar]

śiṣyāḥ kalāvidhiṣu bhīmabhuvo vayasyā vīṇāmṛdukvaṇanakarmaṇi yāḥ pravīṇāḥ |
āsīnamenamupavīṇayituṃ yayustā gandharvarājatanujā manujādhirājam || 125 ||
[Analyze grammar]

tāsāmabhāsata kuraṅgadṛśāṃ vipañcī kiṃcitpuraḥ kalitaniṣkalakākalīkā |
bhaimītathāmadhurakaṇṭhalatopakaṇṭhe śabdāyituṃ prathamamapratibhāvatīva || 126 ||
[Analyze grammar]

sā yaddhṛtākhilakalāguṇabhūmabhūmībhaimītulādhigataye svarasaṃgatāsīt |
taṃ prāgasāvavinayaṃ parivādametya loke'dhunāpi viditā parivādinīti || 127 ||
[Analyze grammar]

nādaṃ niṣādamadhuraṃ tatamujjagāra sābhyāsabhāgavanibhṛtkulakuñjarasya |
stamberamīva kṛtasaśrutimūrdhakampā vīṇā vicitrakaracāpalamābhajantī || 128 ||
[Analyze grammar]

ākṛṣya sāramakhilaṃ kimu vallakīnāṃ tasyā mṛdusvaramasarji na kaṇṭhanālam |
tenāntaraṃ taralabhāvamavāpya vīṇā hrīṇā na koṇamamucatkimu vālayeṣu || 129 ||
[Analyze grammar]

taddampatiśrutimadhūnyatha cāṭugāthā vīṇāstathā jaguratisphuṭavarṇabandham |
itthaṃ yathā vasumatīratigṛhyakastāḥ kīraḥ kiranmudamudīrayati sma viśvāḥ || 130 ||
[Analyze grammar]

asmākamuktibhiravaiṣyatha eva buddhergādhaṃ yuvāmatimatī stumahe tathāpi |
jñānaṃ hi vāgavasarāvacanādbhavadbhyāmetāvadapyanavadhāritameva na syāt || 131 ||
[Analyze grammar]

bhūbhṛdbhavāṅkabhuvi rājaśikhāmaṇeḥ sā tvaṃ cāsya bhogasubhagasya samaḥ kramo'yam |
yannākapālakalanākalitasya bharturatrāpi janmani satī bhavatī sa bhedaḥ || 132 ||
[Analyze grammar]

eṣā ratiḥ sphurati cetasi kasya yasyāḥ sūte ratiṃ dyutiratha tvayi vā tanoti |
traiyakṣavīkṣaṇakhilīkṛtanirjaratvasiddhāyuradhvamakaradhvajasaṃśayaṃ kaḥ || 133 ||
[Analyze grammar]

etāṃ dharāmiva saricchavihārihārāmullāsitasvamidamānanacandrabhāsā |
bibhradvibhāsi payasāmiva rāśirantarvediśriyaṃ janamanaḥ priyamadhyadeśām || 134 ||
[Analyze grammar]

datte jayaṃ janitapattraniveśaneyaṃ sākṣīkṛtenduvadanā madanāya tanvī |
madhyasthadurbalatamatvaphalaṃ kimetadbhuktiryadatra tava bhartsitamatsyaketoḥ || 135 ||
[Analyze grammar]

cetobhavasya bhavatī kucapattrarājadhānīyaketumakarā nanu rājadhānī |
asyāṃ mahodayamahaspṛśimīnaketo ke toraṇaṃ taruṇi na bruvate bhruvau te || 136 ||
[Analyze grammar]

asyā bhavantamaniśaṃ bhavatastathaināṃ kāmaḥ śramaṃ na kathamṛcchati nāma gacchan |
chāyaiva vāmatha gatāgatamācariṣṇostasyādhvajaśramaharā makaradhvajasya || 137 ||
[Analyze grammar]

svedāplavapraṇayinī navaromarājī ratyai yadācarati jāgaritavratāni |
ābhāsitena naranātha madhūtthasāndramagnāsameṣuśarakeśaradanturāṅgaḥ || 138 ||
[Analyze grammar]

prāptā tavāpi nṛpa jīvitadevateyaṃ gharmāmbuśīkarakarambanamambujākṣī |
te te yathā ratipateḥ kusumāni bāṇāḥ svedastathaiva kimu tasya śarakṣatāsram || 139 ||
[Analyze grammar]

rāgaṃ pratītya yuvayostamimaṃ pratīcī bhānuzca kiṃ dvayamajāyata raktametat |
tadvīkṣya vāṃ kimiha kelisaritsarojaiḥkāmeṣutocitamukhatvamadhīyamānam || 140 ||
[Analyze grammar]

anyonyarāgavaśayoryuvayorvilāsasvacchandatācchidapayātu tadālivargaḥ |
atyājayansicayamājimakārayanvā dantairnakhaiśca madano madanaḥ kathaṃ syāt || 141 ||
[Analyze grammar]

iti paṭhati śuke mṛṣā yayustā bahu nṛpakṛtyamavetya sāṃdhivelam |
kupitanijasakhīdṛśārdhadṛṣṭāḥ kamalatayeva tadā nikocavatyaḥ || 142 ||
[Analyze grammar]

akṛta parabhṛtaḥ stuhistuhīti śrutavacanasraganūkticuñcucañcuḥ |
paṭhitanalanutiṃ pratīva kīraṃ tamiva nṛpaṃ prati jātanetrarāgaḥ || 143 ||
[Analyze grammar]

tuṅgaprāsādavāsādatha bhṛśakṛśatāmāyatīṃ kelikulyāmadrākṣodarkabimbapratikṛtimaṇinā bhīmajā rājamānām |
vakraṃ vakraṃ vrajantīṃ phaṇiyuvatiriti trasnubhirvyaktamuktānyonyaṃ vidrutya tīre rathapadamithunaiḥ sūcitāmartirutyā || 144 ||
[Analyze grammar]

atha rathacaraṇau vilokya raktāvativirahāsahatāhatāvivāsraiḥ |
api tamakṛta padmasuptikālaṃ śvasanavikīrṇasarojasaurabhaṃ sā || 145 ||
[Analyze grammar]

abhilapati patiṃ prati sma bhaimī sadaya vilokaya kokayoravasthām |
mama hṛdayamimau ca bhindatīṃ hā ka iva vilokya naro na roditīmām || 146 ||
[Analyze grammar]

kumudamudamudeṣyatīmasoḍhā raviravilambitukāmatāmatānīt |
pratitaru viruvanti kiṃ śakuntāḥ svahṛdi niveśitakokakākukuntāḥ || 147 ||
[Analyze grammar]

api virahamaniṣṭamācarantāvadhigamapūrvakapūrvasarvaceṣṭau |
idamahaha nidarśanaṃ vihaṃgau vidhivaśacetanaceṣṭanānumāne || 148 ||
[Analyze grammar]

aṅghristhāruṇimeṣṭakāvisaraṇaiḥ śoṇe kṛpāṇaḥ sphuṭaṃ kālo'yaṃ vidhinā rathāṅgamithunaṃ vicchettumanvicchatā |
raśmigrāhigarutmadagrajasamārabdhāvirāmabhramau daṇḍabhrājini bhānuśāṇavalaye saṃsajya kiṃ nijyate || 149 ||
[Analyze grammar]

iti sa vidhumukhīmukhena mugdhālapitasudhāsavamarpitaṃ nipīya |
smitaśabalavalanmukho'vadattāṃ sphuṭamidamīdṛśamīdṛśaṃ yathāttha || 150 ||
[Analyze grammar]

strīpuṃsau pravibhajya jetumakhilāvālocitaucityayornamrāṃ vedmi ratiprasūnaśarayoścāpadvayīṃ tvadbhruvau |
tvannāsācchalanihnutāṃ dvinalikīṃ nālīkamuktyeṣiṇostvanniśvāsalate madhuzvasanajaṃ vāyavyamastraṃ tayoḥ || 151 ||
[Analyze grammar]

pīto varṇaguṇaḥ sa cātimadhuraḥ kāye'pi te'yaṃ yathā yaṃ bibhratkanakaṃ suvarṇamiti kairādṛtya notkīrtyate |
kā varṇāntaravarṇanā dhavalimā rājaiva rūpeṣu yastadyogādapi yāvadeti rajataṃ durvarṇatāduryaśaḥ || 152 ||
[Analyze grammar]

khaṇḍakṣodamṛdi sthale madhupayaḥkādambinītarpaṇātkṛṣṭe rohati dohadena payasāṃ piṇḍena cetpuṇḍrakaḥ |
sa drākṣādravasecanairyadi phalaṃ dhatte tadā tvadgirāmuddeśāya tato'pyudeti madhurādhārastamappratyayaḥ || 153 ||
[Analyze grammar]

unmīladguḍapākatantulatayā rajjvā bhramīrarjayandānāntaḥśrutazaṛkarācalamathaḥ svenāmṛtāndhāḥ smaraḥ |
navyāmikṣurasodadheryadi sudhāmutthāpayetsā bhavajjihvāyāḥ kṛtimāhvayeta paramāṃ matkarṇayoḥ pāraṇām || 154 ||
[Analyze grammar]

āsye yā tava bhāratī vasati tallīlāravindollasadvāse tatkalavaiṇanikvaṇamiladvāṇīvilāsāmṛte |
tatkelibhramaṇārhagairikasudhānirmāṇaharmyādhare tanmuktāmaṇihāra eva kimayaṃ dantasrajau rājataḥ || 155 ||
[Analyze grammar]

vāṇī manmathatīrthamujjvalarasasrotasvatī kāpi te khaṇḍaḥ khaṇḍa itīdamīyapulinasyālapyate vālukā |
etattīramṛdaiva kiṃ viracitāḥ pūtāḥ sitāścakrikāḥ kiṃ pīyūṣamidaṃpayāṃsi kimidaṃ tīre tavaivādharau || 156 ||
[Analyze grammar]

parabhṛtayuvatīnāṃ samyagāyāti gātuṃ na tava taruṇi vāṇī yaṃ sudhāsindhuveṇī |
kati na rasikakaṇṭhe kartumabhyasyate'sau bhavadupavipināmre tābhirāmreḍitena || 157 ||
[Analyze grammar]

ūrdhvaste radanacchadaḥ smaradhanurbandhūkamālāmayaṃ maurvī tatra tavādharādharataṭādhaḥsīmalekhālatā |
eṣā vāgapi tāvakī nanu dhanurvedaḥ priye mānmathaḥ so'yaṃ koṇadhanuṣmatībhirucitaṃ vīṇābhirabhyasyate || 158 ||
[Analyze grammar]

sa grāmyaḥ sa vidagdhasaṃsadi sadā gacchatyapāṅkteyatāṃ taṃ ca sprasṣṭumapi smarasya viśikhā mugdhe vigānonmukhāḥ |
yaḥ kiṃ madhviti nādharaṃ tava kathaṃ hemeti na tvadvapuḥ kīdṛṅnāma sudheti pṛcchati na te datte giraṃ cottaram || 159 ||
[Analyze grammar]

madhye baddhāṇimā yatsagarimamahimaśroṇivakṣojayugmā jāgraccetovaśitvā smitadhṛtalighimā māṃ pratīśitvameṣi |
sūktau prākāmyaramyā diśi vidiśi yaśolabdhakāmāvasāyā bhūtīraṣṭāvapīśastadadita muditaḥ svasya śilpāya tubhyam || 160 ||
[Analyze grammar]

tvadvācaḥ stutaye vayaṃ na paṭavaḥ pīyūṣameva stumastasyārthe garuḍāmarendrasamaraḥ sthāne sa jāne'jani |
drākṣāpānakamānamardanasṛjā kṣīre dṛḍhāvajñayā yasminnāma dhṛto'nayā nijapadaprakṣālanānugrahaḥ || 161 ||
[Analyze grammar]

śokaścetkokayostvāṃ sudati tudati tadvyāharājñākaraste gatvā kulyāmanastaṃ vrajitumanunaye bhānumetajjalastham |
baddhe mayyañjalāvapyanunayavimukhaḥ syānmamaikagraho'yaṃ dattvaivābhyāṃ tadambhoñjalimiha bhavatīṃ paśya māmeṣyamāṇam || 162 ||
[Analyze grammar]

tadānandāya tvatparihasitakandāya bhavatī nijālīnāṃ līnāṃ sthitimiha muhūrtaṃ mṛgayatām |
itivyājātkṛtvāliṣu calitacittāṃ sahacarīṃ svayaṃ soyaṃ sāyaṃtanavidhividhitsurbahirabhūt || 163 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
tasyāgādayamekaviṃśagaṇanākāvye'tinavye kṛtau bhaimībhartṛcaritravarṇanamaye sargo nisargojjvalaḥ || 164 ||
[Analyze grammar]