Chapter 3

janamejaya uvāca |
devānāṃ dānavānāṃ ca gandharvoragarakṣasām |
utpattiṃ vistareṇaiva vaiśaṃpāyana kīrtaya || 1 ||
[Analyze grammar]

vaiśaṃpāyana uvāca |
prajāḥ sṛjeti vyādiṣṭaḥ pūrvaṃ dakṣaḥ svayaṃbhuvā |
yathā sasarja bhūtāni tathā śṛṇu mahīpate || 2 ||
[Analyze grammar]

manasā tveva bhūtāni pūrvamevāsṛjatprabhuḥ |
ṛṣīndevān sagandharvānasurānatha rākṣasān || 3 ||
[Analyze grammar]

yakṣabhūtapiśācāṃśca vayaḥpaśumṛgāṃstathā || 3 ||
[Analyze grammar]

yadāsya yatamānasya na vyavardhanta vai prajāḥ |
apadhyātā bhagavatā mahādevena dhīmatā |
tataḥ saṃcintya tu punaḥ prajāhetoḥ prajāpatiḥ || 4 ||
[Analyze grammar]

sa maithunena dharmeṇa sisṛkṣurvividhā prajāḥ |
asiknīmāvahatpatnīṃ vīraṇasya prajāpateḥ |
sutāṃ sutapasā yuktāṃ mahatīṃ lokadhāraṇīm || 5 ||
[Analyze grammar]

atha putrasahasrāṇi vairaṇyāṃ pañca vīryavān |
asiknyāṃ janayāmāsa dakṣa eva prajāpatiḥ || 6 ||
[Analyze grammar]

tāṃstu dṛṣṭvā mahābhāgān saṃvivardhayiṣūnprajāḥ |
devarṣiḥ priyasaṃvādo nāradaḥ prābravīdidam |
nāśāya vacanaṃ teṣāṃ śāpāyaivātmanastathā || 7 ||
[Analyze grammar]

yaṃ kaśyapaḥ sutavaraṃ parameṣṭhī vyajījanat |
dakṣasya vai duhitari dakṣaśāpabhayānmuniḥ || 8 ||
[Analyze grammar]

pūrvaṃ sa hi samutpanno nāradaḥ parameṣṭhinaḥ |
asiknyāmatha vairaṇyāṃ bhūyo devarṣisattamaḥ |
taṃ bhūyo janayāmāsa piteva munipuṃgavam || 9 ||
[Analyze grammar]

tena dakṣaya putrā vai haryaśvā iti viśrutāḥ |
nirmathya nāśitāḥ sarve vidhinā ca na saṃśayaḥ || 10 ||
[Analyze grammar]

tasyodyatastadā dakṣo nāśāyāmitavikramaḥ |
brahmarṣīnpurataḥ kṛtvā yācitaḥ parameṣṭhinā || 11 ||
[Analyze grammar]

tato'bhnisaṃdhiṃ cakre vai dakṣastu parameṣṭhinā |
kanyāyāṃ nārado mahyaṃ tava putro bhavediti || 12 ||
[Analyze grammar]

tato dakṣaḥ sutāṃ prādātpriyāṃ vai parameṣṭhine |
sa tasyāṃ nārado jajñe bhūyaḥ śāpabhayādṛṣiḥ || 13 ||
[Analyze grammar]

janamejaya uvāca |
kathaṃ praṇāśitāḥ putrā nāradena maharṣinā |
prajāpaterdvijaśreṣṭha śrotumicchāmi tattvataḥ || 14 ||
[Analyze grammar]

vaiśaṃpāyana uvāca |
dakṣasya putrā haryaśvā vivardhayiṣavaḥ prajāḥ |
samāgatā mahāvīryā nāradastānuvāca ha || 15 ||
[Analyze grammar]

bāliśā bata yūyaṃ ye nāsyā jānīta vai bhuvaḥ |
pramāṇaṃ sraṣṭukāmā vai prajā prācetasātmajāḥ |
antarūrdhvamadhaścaiva kathaṃ srakṣyatha vai prajāḥ || 16 ||
[Analyze grammar]

vāyoranaśanaṃ prāpya gatāste vai parābhavam || 16 ||
[Analyze grammar]

te tu tadvacanaṃ śrutvā prayātā sarvatodiśam |
adyāpi na nivartante samudrebhya ivāpagāḥ || 17 ||
[Analyze grammar]

haryaśveṣvatha naṣṭeṣu dakṣaḥ prācetasaḥ punaḥ |
vairaṇyāmeva putrāṇāṃ sahasramasṛjatprabhuḥ || 18 ||
[Analyze grammar]

vivardhayiṣavaste tu śabalāśvāḥ prajāstadā |
pūrvoktaṃ vacanaṃ tāta nāradenaiva coditāḥ || 19 ||
[Analyze grammar]

anyonyamūcuste sarve samyagāha mahānṛṣiḥ |
bhrātṝṇāṃ padavī caiva gantavyā nātra saṃśayaḥ |
jñātvā pramāṇaṃ pṛthvyāśca sukhaṃ srakṣyāmahe prajāḥ || 20 ||
[Analyze grammar]

ekāgrā svasthamanaso yathāvadanupūrvaśaḥ || 20 ||
[Analyze grammar]

te'pi tenaiva mārgeṇa prayātāḥ sarvatodiśam |
adyāpi na nivartante samudrebhya ivāpagāḥ || 21 ||
[Analyze grammar]

naṣṭeṣu śabalāśveṣu dakṣa kruddho'bravīdvacaḥ || 21 ||
[Analyze grammar]

nāradaṃ nāśamehīti garbhavāsaṃ vaseti ca || 21 ||
[Analyze grammar]

tadāprabhṛti vai bhrātā bhrāturanveṣaṇe nṛpa |
prayāto naśyati vibho tanna kāryaṃ vipaśyatā || 22 ||
[Analyze grammar]

tāṃścāpi naṣṭānvijñāya putrāndakṣaḥ prajāpatiḥ |
tadbhītyā nāradaṃ śaptvā kanyā evāsṛjatprabhuḥ |
ṣaṣṭiṃ dakṣo'sṛjatkanyā vairaṇyāmiti na śrutam || 23 ||
[Analyze grammar]

tāstadā pratijagrāha bhāryārthe kaśyapaḥ prabhuḥ || 23 ||
[Analyze grammar]

somo dharmaśca kauravya tathaivānye maharṣayaḥ || 23 ||
[Analyze grammar]

dadau sa daśa dharmāya kaśyapāya trayodaśa |
saptaviṃśati somāya catasro'riṣṭanemaye || 24 ||
[Analyze grammar]

dve caiva bahuputrāya dve caivāṅgirase tathā |
dve bhṛśāśvāya viduṣe tāsāṃ nāmāni me śṛṇu || 25 ||
[Analyze grammar]

arundhatī vasurjāmī lambā bhānurmarutvatī |
saṃkalpā ca muhūrtā ca sādhyā viśvā ca bhārata |
dharmapatnyo daśa tvetāstāsvapatyāni me śṛṇu || 26 ||
[Analyze grammar]

viśvedevāstu viśvāyāḥ sādhyā sādhyānvyajāyata |
marutvatyāṃ marutvanto vasostu vasavaḥ smṛtāḥ || 27 ||
[Analyze grammar]

bhānostu bhānavastāta muhūrtāstu mūhūrtajāḥ |
lambāyāścaiva ghoṣo'tha nāgavīthī ca jāmijā || 28 ||
[Analyze grammar]

pṛthivīviṣayaṃ sarvamarundhatyāṃ vyajāyata |
saṃkalpāyāstu sarvātmā jajñe saṃkalpa eva ca || 29 ||
[Analyze grammar]

nāgavīthyāśca jāminyā vṛṣalambā vyajāyata || 29 ||
[Analyze grammar]

yā rājan somapatnyastu dakṣaḥ prācetaso dadau |
sarvā nakṣatranāmnyastu jyotiṣe parikīrtitāḥ || 30 ||
[Analyze grammar]

ye tvaneke suragaṇā devā jyotiḥpurogamāḥ |
vasavo'ṣṭau samākhyātāsteṣāṃ vakṣyāmi vistaram || 31 ||
[Analyze grammar]

āpo dhruvaśca somaśca dharaścaivānilo'nalaḥ |
pratyūṣaśca prabhasaśca vasavo nāmabhiḥ śrutāḥ || 32 ||
[Analyze grammar]

āpasya putro vaitaṇḍyaḥ śramaḥ śānto munistathā |
dhruvasya putro bhagavān kālo lokaprakālanaḥ || 33 ||
[Analyze grammar]

somasya bhagavānvarcā varcasvī yena jāyate |
dharasya putro draviṇo hutahavyavahastathā |
manoharāyāḥ śiśiraḥ prāṇo'tha ramaṇastathā || 34 ||
[Analyze grammar]

anilasya śivā bhāryā yasyāḥ putraḥ purojavaḥ |
avijñātagatiścaiva dvau putrāvanilasya tu || 35 ||
[Analyze grammar]

agniputraḥ kumārastu śarastambe śriyā vṛtaḥ |
tasya śākho viśākhaśca naigameṣaśca pṛṣṭhajaḥ |
apatyaṃ kṛttikānāṃ sa kārttikeya iti smṛtaḥ || 36 ||
[Analyze grammar]

skandaḥ sanatkumāraśca sṛṣṭaḥ pādena tejasaḥ || 36 ||
[Analyze grammar]

pratyūṣasya viduḥ putramṛṣiṃ nāmnātha devalam |
dvau putrau devalasyāpi kṣamāvantau manīṣiṇau || 37 ||
[Analyze grammar]

bṛhaspatestu bhaginī varastrī brahmacāriṇī |
yogasiddhā jagatkṛtsnamasaktā vicacāra ha || 38 ||
[Analyze grammar]

prabhāsasya tu bhāryā sā vasūnāmaṣṭamasya tu |
visvakarmā mahābhāgastasyāṃ jajñe prajāpatiḥ || 39 ||
[Analyze grammar]

kartā śilpasahasrāṇāṃ tridaśānāṃ ca vardhakiḥ |
bhūṣaṇānāṃ ca sarveṣāṃ kartā śilpavatāṃ varaḥ || 40 ||
[Analyze grammar]

yaḥ sarveṣāṃ vimānānī daivatānāṃ cakāra ha |
mānuṣāścopajīvanti yasya śilpaṃ mahātmanaḥ || 41 ||
[Analyze grammar]

surabhiḥ kaśyapād rudrānekādaśa vinirmame || 41 ||
[Analyze grammar]

mahādevaprasādena tapasā bhāvitā satī || 41 ||
[Analyze grammar]

ajaikapādahirbudhnyastvaṣṭā rudraśca vīryavān |
tvaṣṭuścaivātmajaḥ śrīmānviśvarūpo mahāyaśāḥ || 42 ||
[Analyze grammar]

haraśca bahurūpaśca tryambakaścāparājitaḥ |
vṛṣākapiśca śaṃbhuśca kapardī raivatastathā || 43 ||
[Analyze grammar]

mṛgavyādhaśca sarpaśca kapālī ca viśāṃ pate || 43 ||
[Analyze grammar]

ekādaśaite kathitā rudrāstribhuvaneśvarāḥ |
śataṃ caivaṃ samākhyātaṃ rudrāṇāmamitaujasām || 44 ||
[Analyze grammar]

purāṇe bharataśreṣṭha yairvyāptāḥ sacarācarāḥ || 44 ||
[Analyze grammar]

lokā bharataśārdūla kaśyapasya nibodha me || 44 ||
[Analyze grammar]

anyaiḥ satyavratā rājanyābhirlokatrayaṃ dhṛtam || 44 ||
[Analyze grammar]

aditirditirdanuścaiva ariṣṭā surasā tathā |
surabhirvinatā caiva tāmrā krodhavaśā irā |
kadrūrmuniśca lokeśa tāsvapatyāni me śṛṇu || 45 ||
[Analyze grammar]

khaṣā caiva trayodaśa || 45 ||
[Analyze grammar]

kaśyapasya tu bhāryā vai || 45 ||
[Analyze grammar]

pūrvamanvantare śreṣṭhā dvādaśāsan surottamāḥ |
tuṣitā nāma te'nyonyamūcurvaivasvate'ntare || 46 ||
[Analyze grammar]

upasthite'tiyaśasyaścākṣuṣasyāntre manoḥ |
hitārthaṃ sarvalokānāṃ samāgamya parasparam || 47 ||
[Analyze grammar]

āgacchata drutaṃ devā aditiṃ saṃpraviśya vai |
manvantare prasūyāmastannaḥ śreyo bhaviṣyati || 48 ||
[Analyze grammar]

evamuktvā tu te sarve cākṣuṣasyāntare manoḥ |
mārīcātkaśyapājjātāste'dityā dakṣakanyayā || 49 ||
[Analyze grammar]

pūrvajanmani sutapaḥ pṛśnirūpe babhūvatuḥ || 49 ||
[Analyze grammar]

tatra viṣṇuśca śakraśca jajñāte punareva hi |
aryamā caiva dhātā ca tvaṣṭā pūṣā tathaiva ca || 50 ||
[Analyze grammar]

vivasvān savitā caiva mitro varuṇa eva ca |
aṃśo bhagaścātitejā ādityā dvādaśa smṛtāḥ || 51 ||
[Analyze grammar]

cākṣuṣasyāntare pūrvamāsanye tuṣitāḥ surāḥ |
vaivasvate'ntare te vai ādityā dvādaśa smṛtāḥ || 52 ||
[Analyze grammar]

saptaviṃśattu yāḥ proktāḥ somapatnyo'tha suvratāḥ |
tāsāmapatyānyabhavandīptānyamitatejasām || 53 ||
[Analyze grammar]

tārāgaṇāḥ samastā ye gagane ye cakāsati || 53 ||
[Analyze grammar]

ariṣṭanemeḥ patnīnāmapatyānīha ṣoḍaśa |
bahuputrasya viduṣaścatasro vidyutaḥ smṛtāḥ |
pratyaṅgirasajāḥ śreṣṭhā ṛco brahmarṣisatkṛtāḥ || 54 ||
[Analyze grammar]

bhṛśāśvasya tu devarṣerdevapraharaṇāḥ sutāḥ |
ete yugasahasrānte jāyante punareva ha || 55 ||
[Analyze grammar]

sarve devagaṇāstāta trayastriṃśattu kāmajāḥ |
teṣāmapi ca rājendra nirodhotpattirucyate || 56 ||
[Analyze grammar]

yathā sūryasya kauravya udayāstamayāviha |
tathā yugāni rājendra praḷayā manavastathā |
evaṃ devanikāyāste saṃbhavanti yuge yuge || 57 ||
[Analyze grammar]

dityāḥ putradvayaṃ jajñe kaśyapāditi naḥ śrutam |
kaśyapasyātmajāvetau sarvebhyaḥ pūrvajau matau |
hiraṇyakaśipuścaiva hiraṇyākṣaśca bhārata |
siṃhikā cābhavatkanyā vipracitteḥ parigrahaḥ || 58 ||
[Analyze grammar]

saiṃhikeyā iti khyātāstasyāḥ putrā mahābalāḥ || 58 ||
[Analyze grammar]

gaṇasteṣāṃ tu rājendra daśasāhasra ucyate || 58 ||
[Analyze grammar]

teṣāṃ putrāśca pautrāśca śataśo'tha sahasraśaḥ || 58 ||
[Analyze grammar]

asaṃkhyātā mahābāho hiraṇyakaśipoḥ śṛṇu || 58 ||
[Analyze grammar]

hiraṇyakaśipoḥ putrāścatvāraḥ prathitaujasaḥ |
anuhrādaśca hrādaśca prahrādaścaiva vīryavān || 59 ||
[Analyze grammar]

saṃhrādas ca caturtho'bhūddhrādaputro hradastathā |
saṃhrādaputrau sundaśca nisundastāv ubhau smṛtau |
hradasya putro'pyāyurvai śivaḥ kālastathaiva ca |
saṃhrādaputra āyuṣmāñchibirbāṣkala eva ca |
teṣāṃ madhye mahābhāga sarvatra samadṛgvaśī |
prahrādaḥ paramāṃ bhaktiṃ ya uvāca janārdane |
virocanaśca prāhrādirbalirjajñe virocanāt || 60 ||
[Analyze grammar]

baleḥ putraśataṃ tvāsīdbāṇajyeṣṭhaṃ narādhipa |
dhṛtarāṣṭraśca sūryaśca candramāścendratāpanaḥ || 61 ||
[Analyze grammar]

kumbhanābho gardabhākṣaḥ kukṣirityedvamādayaḥ |
bāṇasteṣāmatibalo jyeṣṭhaḥ paśupateḥ priyaḥ || 62 ||
[Analyze grammar]

purākalpe hi bāṇena prasādyomāpatiṃ prabhum |
pārśvato me vihāraḥ syādityevaṃ yācito varaḥ || 63 ||
[Analyze grammar]

bāṇasya cendradamano lohityāmudapadyata || 63 ||
[Analyze grammar]

gaṇasteṣāṃ tu rājendra śatasāhasrasaṃmitaḥ || 63 ||
[Analyze grammar]

hiraṇāksasutāḥ pañca vidvāṃsaḥ sumahābalāḥ |
jharjharaḥ śakuniścaiva bhūtasaṃtāpanastathā |
mahānābhaśca vikrāntaḥ kālanābhastathaiva ca || 64 ||
[Analyze grammar]

abhavandanuputrāstu śataṃ tīvraparākramāḥ |
tapasvino mahāvīryāḥ prādhānyena nibodha tān || 65 ||
[Analyze grammar]

dvimūrdhā śakuniścaiva tathā śaṅkuśirā vibhuḥ |
śaṅkukarṇo vivādaśca gaveṣṭhī duṃdubhistathā |
ayomukhaḥ śambaraśca kapilo vāmanastathā || 66 ||
[Analyze grammar]

marīcirmaghavāṃścaiva iḍā gargaśirāstathā |
vikṣobhaṇaśca ketuśca ketuvīryaśatahradau || 67 ||
[Analyze grammar]

indrajitsasrvajiccaiva vajranābhastathaiva ca |
mahānābhaśca vikrāntaḥ kālanābhastathaiva ca |
ekacakro mahābāhustārakaśca mahābalaḥ || 68 ||
[Analyze grammar]

vaiśvānaraḥ pulomā ca vidrāvaṇamahāśirau |
svarbhānurvṛṣaparvā ca vipracittiśca vīryavān || 69 ||
[Analyze grammar]

sūkṣmaścaiva nicandraśca ūrṇanabho mahāhiriḥ || 69 ||
[Analyze grammar]

asilomā sukeśī ca śaṭhaśca balako madaḥ || 69 ||
[Analyze grammar]

tathā gaganamūrdhā ca kumbhanābho mahāsuraḥ || 69 ||
[Analyze grammar]

pramado mayaḥ kupatho hayagrīvaśca vīryavān || 69 ||
[Analyze grammar]

vaisṛpaḥ savirūpākṣaḥ supatho'tha harāharau || 69 ||
[Analyze grammar]

hiraṇyakaśipuścaiva śatamāyaśca śambaraḥ || 69 ||
[Analyze grammar]

śarabhaḥ śalabhaścaiva vipracittiśca vīryavān || 69 ||
[Analyze grammar]

sarva ete danoḥ putrāḥ kaśyapādabhijajñire |
vipracittipradhānāste dānavāḥ sumahābalāḥ || 70 ||
[Analyze grammar]

eteṣāṃ yadapatyaṃ tu tanna śakyaṃ narādhipa || 70 ||
[Analyze grammar]

prasaṃkhyātuṃ mahīpāla putrapautramanantakam || 70 ||
[Analyze grammar]

svarbhānostu prabhā kanyā pulomnastu śacī sutā |
upadānavī hayaśirāḥ śarmiṣṭhā vārṣaparvaṇī || 71 ||
[Analyze grammar]

pulomā kālakā caiva vaiśvānarasute ubhe |
bahvapatye mahāsattve mārīcestu parigrahaḥ || 72 ||
[Analyze grammar]

tayoḥ putrasahasrāṇi ṣaṣṭiṃ dānavasattamān |
caturdaśaśatānanyān hiraṇyapuravāsinaḥ |
mārīcirjanayāmāsa mahatā tapasānvitaḥ || 73 ||
[Analyze grammar]

paulomāḥ kālakeyāśca dānavāste mahābalāḥ |
avadhyā devatānāṃ hi hiraṇyapuravāsinaḥ |
pitāmahaprasādena ye hatāḥ savyasācinā || 74 ||
[Analyze grammar]

prabhāyā nahuṣaḥ putro jayantaśca sacīsutaḥ || 74 ||
[Analyze grammar]

pūruṃ jajñe'tha śarmiṣṭhā duḥṣantamupadānavī || 74 ||
[Analyze grammar]

tato'pare mahāvīryā dānavā atidāruṇāḥ |
siṃhikāyāmathotpannā vipracitteḥ sutāstathā || 75 ||
[Analyze grammar]

daityadānavasaṃyogājjātāstīvraparākramāḥ |
siṃhikeyā iti khyātāstrayodaśa mahābalāḥ || 76 ||
[Analyze grammar]

vyaṅgaḥ śalyaśca balinau balaścaiva mahābalaḥ |
vātāpirnamuciścaiva ilvalaḥ khasṛmastathā || 77 ||
[Analyze grammar]

ājjiko narakaścaiva kālanābhastathaiva ca |
rāhurjyeṣṭhastu teṣāṃ vai candrasūryapramardanaḥ |
śaraḥ potaraṇaścaiva vajranābhaśca vīryavān || mūkaścaiva tuhuṇḍaśca hradaputrau babhūvatuḥ |
mārīcaḥ sundaputraśca tāḍakāyāṃ vyajāyata |
svarbhānuśca mahāvīryo vaktrayodhī mahāsuraḥ |
saramāṇastathā caiva śarakalpaśca vīryavān || 78 ||
[Analyze grammar]

ete vai dānavāḥ śreṣṭhā danuvaṃśavivardhanāḥ |
teṣāṃ putrāśca pautrāśca śataśo'tha sahasraśaḥ || 79 ||
[Analyze grammar]

saṃhrādasya tu daityasya nivātakavacāḥ kule |
samutpannāḥ sumahatā tapasā bhāvitātmanaḥ || 80 ||
[Analyze grammar]

catasraḥ koṭayastāśca maṇimatyāṃ nivāsinaḥ || 80 ||
[Analyze grammar]

te'pyavadhyāstu devānāmarjunena vipātitāḥ || 80 ||
[Analyze grammar]

anekamāyākuśalā dhanurvedasya pāragāḥ || 80 ||
[Analyze grammar]

ṣaṭ sutāḥ sumahāsattvāstāmrāyāḥ parikīrtitāḥ |
kākī śyenī ca bhāsī ca sugrīvī śucigṛdhrike || 81 ||
[Analyze grammar]

kākī tu janayāmāsa ulūkī pratyulūkakān |
śyenī śyenāṃstathā bhāsī bhāsān gṛdhrāṃśca gṛdhrikā || 82 ||
[Analyze grammar]

śuciraudakānpakṣigaṇān sugrīvī tu paraṃtapa |
aśvānuṣṭrān gardabhāṃśca tāmrāvaṃśaḥ prakīrtitaḥ || 83 ||
[Analyze grammar]

vinatāyāstu putrau dvāvaruṇo garuḍastathā |
suparṇaḥ patatāṃ śreṣṭho dāruṇaḥ svena karmaṇā || 84 ||
[Analyze grammar]

surasāyāḥ sahasraṃ tu sarpāṇāmamitaujasām |
anekaśirasāṃ tāta khecarāṇāṃ mahātmanām || 85 ||
[Analyze grammar]

kādraveyāstu balilnaḥ sahasramamitaujasaḥ |
suparṇavaśagā nāgā jajñire'nekamastakāḥ || 86 ||
[Analyze grammar]

teṣāṃ pradhānāḥ satataṃ śeṣavāsukitakṣakāḥ |
airāvato mahāpadmaḥ kambalāśvatarāv ubhau || 87 ||
[Analyze grammar]

ailāpatraśca śaṅkhaśca karkoṭakadhanaṃjayau |
mahānīlamahākarṇau dhṛtarāṣṭrabalāhakau || 88 ||
[Analyze grammar]

kuharaḥ puṣpadaṃṣṭraśca durmukhaḥ sumukhastathā |
śaṅkhaśca śaṅkhapālaśca kapilo vāmanastathā || 89 ||
[Analyze grammar]

nahuṣaḥ śaṅkharomā ca maṇirityevamādayaḥ |
ete cānye ca bahavo daṃdaśūkā viṣolbaṇāḥ |
teṣāṃ putrāśca pautrāśca garuḍena nipātitāḥ |
caturdaśasahasrāṇi krūrāṇāmuragāśinā |
gaṇaṃ krodhavaśaṃ viddhi tatra sarve ca daṃṣṭriṇaḥ || 90 ||
[Analyze grammar]

sthalajāḥ pakṣiṇo'bjās ca dharāyāḥ prasavaḥ smṛtaḥ |
anāyuṣāyāḥ putrāstu pañcāśatsumahābalāḥ |
surato guṇavṛttaśca vikṣaro'tha nṛpastathā |
gāstu vai janayāmāsa surabhī mahiṣī tathā || 91 ||
[Analyze grammar]

irā vṛkṣalatāvallīstṛṇajātīśca sarvaśaḥ |
khasā tu yakṣaraksāṃsi munirapsarasastathā || 92 ||
[Analyze grammar]

ariṣṭā tu mahāsattvān gandharvānamitaujasaḥ |
ete kaśyapadāyādāḥ kīrtitāḥ sthāṇujaṃgamāḥ || 93 ||
[Analyze grammar]

teṣāṃ putrāśca pautrāśca śataśo'tha sahasraśaḥ |
eṣa manvantare tāta sargaḥ svārociṣe smṛtaḥ || 94 ||
[Analyze grammar]

vaivasvate tu mahati vāruṇe vitate kratau |
juhvānasya brahmaṇo vai prajāsarga ihocyate || 95 ||
[Analyze grammar]

pūrvaṃ yatra tu brahmarṣīnutpannān sapta mānasān |
putratve kalpayāmāsa svayameva pitāmahaḥ || 96 ||
[Analyze grammar]

tato virodhe devānāṃ dānavānāṃ ca bhārata |
ditirvinaṣṭaputrā vai toṣayāmāsa kaśyapam || 97 ||
[Analyze grammar]

tāṃ kaśyapaḥ prasannātmā samyagārādhitastayā |
vareṇa cchandayāmāsa sā ca vavre varaṃ tadā || 98 ||
[Analyze grammar]

putramindravadhārthāya samarthamamitaujasam |
sa ca tasyai varaṃ prādātprārthitaṃ sumahātapāḥ || 99 ||
[Analyze grammar]

dattvā ca varamavyagro mārīcastāmabhāṣata |
indraṃ putro nihantā te garbhe ceccharadāṃ śatam || 100 ||
[Analyze grammar]

yadi dhārayase śaucaṃ tatparā vratamāsthitā |
bhaviṣyati sutaste'yaṃ yadyenaṃ dhārayiṣyasi || 101 ||
[Analyze grammar]

tathetyabhihito bhartā tayā devyā mahātapāḥ |
dhārayāmāsa garbhaṃ tu śuciḥ sā vasudhādhipa || 102 ||
[Analyze grammar]

nityaṃ triṣavaṇaṃ snātā kṛcchracāndrāyaṇe ratā || 102 ||
[Analyze grammar]

tato'bhyupagamāddityāṃ garbhamādhāya kaśyapaḥ |
rocayanvai gaṇaśreṣṭhaṃ devānāmamitaujasām || 103 ||
[Analyze grammar]

tejaḥ saṃbhṛtya durdharṣamavadhyamamaraiḥ sadā |
jagāma partavāyaiva tapase saṃśitavrataḥ || 104 ||
[Analyze grammar]

dadhāra sā ca taṃ garbhaṃ samyaksā ca samanvitā || 104 ||
[Analyze grammar]

garbhamātmavadhārthāya jñātvā taṃ maghavānapi || 104 ||
[Analyze grammar]

gate tu kāśyape tāta varadaḥ pākaśāsanaḥ || 104 ||
[Analyze grammar]

tasyāścaivāntaraprepsurvavande caraṇau diteḥ || 104 ||
[Analyze grammar]

śuśrūṣayāmyahaṃ devi pādau te niyatavrate || 104 ||
[Analyze grammar]

evamuktā tu sā devī śakreṇāmitatejasā || 104 ||
[Analyze grammar]

uvāca vacanaṃ devī śakraṃ śatrunibarhaṇam || 104 ||
[Analyze grammar]

śuśrūṣaya mahābhāga niyatātmā mahādyute || 104 ||
[Analyze grammar]

tataḥ paśyasi saṃjātaṃ bhrātaraṃdīptatejasam || 104 ||
[Analyze grammar]

tacchrutvā vacanaṃ devyāḥ śuśrūṣanaparāyaṇaḥ || 104 ||
[Analyze grammar]

tasyāścaivāntaraprepsurabhavatpākaśāsanaḥ |
ūne varṣaśate cāsyā dadarśāntaramacyutaḥ || 105 ||
[Analyze grammar]

akṛtvā pādayoḥ śaucaṃ ditiḥ śayanamāviśat |
nidrāmāhārayāmāsa tasyāḥ kukṣiṃ praviśya ha |
vajrapāṇistato garbhaṃ saptadhā taṃ nyakṛntata || 106 ||
[Analyze grammar]

sa pāṭyamāno garbho'tha vajreṇa praruroda ha |
mā rodīriti taṃ śakraḥ punaḥ punarabhābravīt || 107 ||
[Analyze grammar]

so'bhavatsaptadhā garbhastamindro ruṣitaḥ punaḥ |
ekaikaṃ saptadhā cakre vajreṇaivārikarśanaḥ |
tena rodanaśabdena ditiḥ sā pratyabudhyata |
uvāca śakramārtā sā kiṃ tvetatkṛpaṇaṃ kṛtam || sa bhīto niścarattasmād yonidvārātpuraṃdaraḥ |
tataḥ pārśvagato devyāḥ pādayornipapāta ha || indraḥ aśucirdevi suptāsi pādayoḥ kṛtamūrdhajā |
mayātmavadhabhītena kṛtaṃ tatkṣantumarhasi || evamuktā tu sā devī āha śakramidaṃ vacaḥ |
sukṛtaṃ sādhu te putra na te bhavati duṣkṛtam || kiṃ tu vakṣyāmyahaṃ kiṃcittatkuruṣvārimardana |
mamaiva putrastvaṃ deva rakṣa caitānyadīcchasi |
bāḍhamityabravīdindra evametanna saṃśayaḥ |
maruto nāma devāste babhūvurbharatarṣabha || 108 ||
[Analyze grammar]

yathoktaṃ vai maghavatā tathaiva maruto'bhavan |
mā rodīriti yacchabdastvayoktaḥ pākaśāsana |
maruto nāma teneme bhavantu yadi manyase |
devāsureṣu yuddheṣu bhṛtyāstava kṛte vibho |
pṛṣṭhato'nugamiṣyanti vaśagāste puraṃdara || evaṃ bruvāṇāṃ tāṃ devīṃ prāha śakrastvidaṃ vacaḥ |
devā ekonapañcāśatsahāyā vajrapāṇinaḥ || 109 ||
[Analyze grammar]

teṣāmevaṃ pravṛddhānāṃ bhūtānāṃ janamejaya |
nikāyeṣu nikāyeṣu hariḥ prādātprajāpatīn |
kramaśastāni rājyāni pṛthoḥ pūrvaṃ tu bhārata || 110 ||
[Analyze grammar]

sa hariḥ puruṣo vīraḥ kṛṣṇo jiṣṇuḥ prajāpatiḥ |
parjanyastapano vyaktastasya sarvamidaṃ jagat || 111 ||
[Analyze grammar]

prayato bhava rājendra śṛṇuṣvaikamanāstataḥ |
nāśuddhe nāśucau vāpi nāśiṣyāya kathaṃcana || varṇayeyamahaṃ rājan kṛtajñāya hitāya ca |
svargyaṃ yaśasyamāyuṣyaṃ puṇyaṃ vedena saṃmitam |
bhūtasargamimaṃ samyagjānato bharatarṣabha |
marutāṃ ca śubhaṃ janma śṛṇvataḥ paṭhato'pi vā |
nāvṛttibhayamastīha paralokabhayaṃ kutaḥ || 112 ||
[Analyze grammar]