Kārikā 2

āha- yadyekāntātyantato'bhāvāddṛṣṭe hetāvaparitoṣastena tarhyastyayamanyo heturubhayadoṣavarjitaḥ sa kasmānna parigṛhyate ? ko'sāviti cet ucyate, śāstroktaḥ karmavidhiḥ / sa hyaikāntikaḥ / katham ? evaṃ hyāha - paśubandhena sarvāṃllokān jayati / na tūktaṃ kadācijjayati, kadācinneti / phalasya pratyakṣānupalabdheranaikāntikatvamiti cet, syānmatam pratyakṣata evedaṃ vihitasya karmaṇaḥ phalaṃ nopalabhyate / tathā hi putrakāma iṣṭiṃ nirūpya duhitaramapi na prāpnoti / arthakāmaśca karma kṛtvā māṣakamapi na labhate / tasmānnāyamanaikāntika iti / etacca naivam / kasmāt ? sādhanavaikalyāttadanupapatteḥ / anekasādhanasādhyo hi karmavidhiḥ / yatra phalaṃ nopalabhyate tatra sādhanavaikalyamanumātavyam / kasmāt ? na hyetadiṣṭaṃ, sati kāraṇe kāryaṃ na bhavati / kiṃ cānyat, saṃsārābhāvaprasaṅgāt / yadi khalvapi karmaṇaḥ phalavattvaṃ neṣyate tena tannimittasya saṃsāsarasyābhāvaprasaṅgaḥ / aniṣṭaṃ caitat / tasmātsiddhamasyaikāntikatvam /
ātyantikatvamapi siddhameva / yasmādāha apāma somamamṛtā abhūmeti / atra somapānādamṛtatvāvāptiḥ śrūyate / tasmāttadevānuṣṭhātavyam / kimanyena hetunā parikalpiteneti jijñāsāpārthaiveti /
ucyate

dṛṣṭavadānuśravikaḥ

anuśrūyate ityanuśravaḥ / anuśrave bhava ānuśravikaḥ / dṛṣṭena tulyaṃ vartate dṛṣṭavat / kimasāvanabhipreta iti vākyaśeṣaḥ /
āha kaḥ punarayamanuśravaḥ ?
ucyate- mantrabrāhmaṇaṃ yāvadvā purātanamanuśrūyamāṇaṃ prāmāṇyenābhyupagamyate tatrabhavadbhiḥ / yathāśrutinibandhanāḥ smṛtayaḥ / aṅgāni vedāstarkā vā / yathāha
vedavedāṅgatarkeṣu vedasaṃjñā nirucyate / iti /
āha, kiṃ pūrvasmādeva hetorayamānuśraviko heturanabhipreta iti ?
netyucyate / kintarhi

sa hyaviśuddhikṣayātiśayayuktaḥ /

iti / sa ityānuśravikasya hetoḥ pratinirdeśaḥ / hiśabdo yasmādarthe / aviśuddhiśca kṣayaścātiśayaśca tairyuktaḥ / etaduktaṃ bhavati / yasmādayamānuśraviko heturaviśuddho'nityastāratamyavāṃścāto dṛṣṭa ivānabhipretaḥ /
tatrāviśuddhiyuktastāvat hiṃsāvidhānāt / yadāha brāhmaṇe- brāhmaṇamālabhetetyādi / tathā-

ṣaṭśatāni niyujyante paśūnāṃ madhyame'hani /
aśvamedhasya vacanādūnāni paśubhistribhiḥ //

iti hiṃsā cāviśuddhiḥ / prāṇināmiṣṭaśarīravyāpādanāt /
āha, tadanupapattiḥ / śāstracoditatvāt / yadi śāstreṇa coditeyaṃ hiṃsā na syāt muktasaṃśayamaviśuddhitvamasyāḥ pratipadyāmahe, śāsracoditā tu / tasmānneyamaviśuddhiḥ /
tatprāmāṇyānabhyupagamādaviśuddhiriti cet syānmatam, vedaprāmāṇyamabhyupagacchatāmasaṃśayametadevaṃ syāt / hetuvādakuśalāstu vayam / tasmādadhīyatāṃ yadi kaścidastyubhayapakṣaprasiddho hetuḥ yato nissaṃśayaḥ pratyayaḥ syāditi / etaccāyuktam / kasmāt ? abhyupagamavirodhāt / dṛṣṭamanumānamāptavacanaṃ ceti prāmāṇyatrayamabhyupagataṃ bhavadbhiḥ / idānīṃ vedasyāptavacanatve satyaprāmāṇyaṃ bruvataḥ svamatavyāghātaḥ / tasmādayuktametat /
vedasyāptavacanatvānupapatteradoṣa iti cetsyānmatam / āptavacanatvaṃ prākprasādhyāsya vedasya paścāt ayamupālambho yuktamabhidhātuṃ syāt / tattvasiddham / tasmādanupālambho'yamiti / etadapyuktam / kasmāt ? puruṣabuddhipūrvakatve sati rāgādiyogācchabdo vicārārhaḥ syāt kimāptavacanaṃ na veti / apuruṣabuddhipūrvakastvāmnāyaḥ svatantraḥ puruṣaniśśreyasārthaṃ pravartate / tasmānnaivaṃvidhamaniṣṭaṃ vicāramarhati / kiṃ cānyat aviśuddhitvānupapattiprasaṅgāt / yadi caitasminnarthe bhavānapi paryanupayujyeta - kathamidaṃ niścīyate yaduta prāṇināmiṣṭaśarīravyāpādanādaviśuddhihiṃseti ? avaśyamabhidhānīyaṃ śāstrata iti / tadeva ca śāstraṃ kratau hiṃsāmāha / tasmāt ko'tra hetuḥ anyatra pramāṇamihaivaitadapramāṇaṃ bhavitumarhati hiṃsāto dharma iti ?
anugrahopaghātalakṣaṇatvādahiṃsāhiṃsayoḥ pratyakṣasiddhiriti cet - athāpi syāt ahiṃsātaścānugraho bhavatīṣṭaśarīravyāpādanalakṣaṇaḥ, hiṃsātaścopaghāto bhavati abhipretaśarīravyāpādanalakṣaṇaḥ / kriyānurūpaṃ ca phalamanumātuṃ yuktamiti pratyakṣasiddhamanayoriṣṭāniṣṭaphalahetutvam / tasmāt ko'tra śāstravyāpāra iti ? etaccānupapannam / kasmāt ? aniṣṭaprasaṃgāt / evaṃ hi parikalpyamāne gurubhāryāgamane'pi sattvāntarānugrahasāmarthādiṣṭaphalasambandhaḥ syāt / māṇavakaṃ copanīya vratādeśaśaucabrahmacaryyasvādhyāyābhyāsabhaikṣāgniparicaraṇaguruśuśrūṣādiṣu pravartayato'niṣṭaphalasambandhaḥ syāt / tasmāllokaśāstraviruddho'sattarko neṣṭa iti /
ubhayābhidhānācchāstravirodhaprasaṅga iti cet syānmatam tadeva śāstramahiṃsāmāha, tadeva hiṃsām / evaṃ sati parasparaviruddhayorarthayoścoditatvādubhayānugrahāsambhave śāstravirodhaprasaṅga iti / tacca naivam / kasmāt ? utsargāpavādayorviṣayabhedāt / sāmānye hi śāstramahiṃsāmutsṛjya viśeṣe kratulakṣaṇe'pavādaṃ śāsti / sāmānyavihitaṃ ca viśeṣavihitena bādhyate / tadyathā - dadhi brāhmaṇebho dīyatāṃ takraṃ kauṇḍinyāyeti / tasmādutsargāpavādayorviṣayabhedānnāsti śāstravirodha iti / kiṃ cānyat / kanyāgamanavat punarvidhāne doṣābhāvāt / yathā khalvapi śāsre pratiṣiddhaṃ kanyāgamanamiti nedānīmabhirūpaḥ pratigṛhya, tāmabhigamyādharmabhāgbhavati /
gṛhasthaḥ sadṛśīṃ bhāryāṃ vindetānanyapūrvikām /
iti śāstrāntarasadbhāvāt / evaṃ śāstre pratiṣiddhā hiṃsā / nedānīṃ kratau hiṃsāyāṃ pravartamāno'niṣṭaphalabhāk syāt / pūrvoktādeva śāstrāntarasadbhāvāt / tara yaduktaṃ prāṇināmiṣṭaśarīravyāpādanādaviśuddhirhiṃsetyetadayuktam /
ucyate - na, abhiprāyānavabodhāt / citramapi bahvetadabhidhīyamāno nābhiprāyaṃ veda bhavān / kiṃ kāraṇam ? yasmānna vayaṃ vedasya prāmāṇyaṃ pratyācakṣmahe / no khalvapi brūmaḥ śāstracoditāyāṃ hiṃsāyāṃ pravartamānasyāniṣṭaphalasambandho bhavati / kintarhi sati svargaprāptinimittatve vedavihitasya karmaṇaḥ samanuṣṭhānaṃ prāṇijamupaghātamantareṇa na sambhavati iti hitakāmairabhyupekṣyate / yasmāt na hyetaduktaṃ yadanyeṣāmupaghātenātmānugrahaḥ kārya iti / āha -

na tatparasya sandadhyātpratikūlaṃ yadātmanaḥ /
eṣa saṅkṣepato dharmaḥ kāmādanyaḥ pravartate //

āha yadyetannābhyupagamyate kathaṃ pūrvamuktaṃ prāṇināmiṣṭaśarīravyāpādanādaviśuddhirhiṃseti ?
ucyate kārye kāraṇopacārāt / yo'sau hiṃsānimittakaḥ kāruṇyān manasi naḥ paritāpa utpadyate sā khalvaviśuddhirabhipretā / tasyāṃ kāraṇamupacaryoktamaviśuddhirhiṃseti / yathā mudgaistṛptāḥ gobhiḥ sukhina iti /
āha kathametadavagamyate hiṃsākāryaṃ paritāpamātramaviśuddhirācāryasyābhipretā, na punarhiṃsaiveti ?
ucyate, prakarṣapratyayopalabdheḥ / vakṣyatyupadiṣṭāt tadviparītaḥ śreyāniti (ISk 2) / samānajātīyaṃ ca pratiyoginamapekṣya prakarṣapratyaya utpadyate / yadi cānuśravikasya praśasyatā nābhipretā syāt prakarṣapratyayānupapattiprasaṅgaḥ / tasmānnotsūtrametat /
āha, sannyāsānupapattiḥ / aviyogaśravaṇāt / na hi karmaṇo'tyāgasannyāsayostvamīśiṣe / kintarhi śāstraṃ yadāha tadavaśyaṃ kartavyam / taccāmaraṇāt karmabhiraviyogaṃ śāsti / kasmāt ? evaṃ hyāha- "jarāmaryametat satraṃ yadagnihotradārśapaurṇamāsau, jarayā ha etasmāt satrādvimucyate, mṛtyunā ca /" punarapyāha "kurvanneveha karmāṇi jijīviṣecchataṃ samāḥ /" tasmādāmaraṇāt karmaṇāmatyāgaḥ / tasmin sati hetvantarakarmaṇāmānarthakyam /
ucyate, na, sādhanānāmasvabhāvikatvāt / patnīsaṃyogādibhiranekaiḥ sādhanairayaṃ karmavidhiḥ prasādhyate / teṣāṃ cāsvābhāvikatvāt aśakyamarjanaṃ prayogataḥ pūrvaṃ kartumiti pratipāditam / tasmādanityāni karmāṇi /
hetuśāstravipratipattau śāstrabalīyastvamiti cet syānmatam / yatra hetuśāstrayorvipratipattirbhavati tatra vipralambhabhūyiṣṭhatvādanumānasya balīyaḥ śāstramityavaśayamabhyupagantavyamiti / taccānupapannam / kasmāt ? śaktito viniyogāt / śaktimapekṣya śāstramagnihotrādīni karmāṇi vidadhatteṣāmanityatāṃ jñāpayati / katham ? evaṃ hyāha, "yo'laṃ sannagnihotrāyāgnihotraṃ na juhoti tameṣā devatāparuṇaddhyasmāllokādamuṣmāccobhābhyām /" tasmādanityāni karmāṇi / kiṃ cānyat / jarāgrahaṇasāmarthyāt / tvadīya eva jñāpake jarāgrahaṇamasti / ato'numīyate śaktyapekṣamanityaṃ ca karma / kiṃ cānyat śāstrahāneḥ / ubhayaṃ hi śāstre nirdiṣṭam / karmāṇi sannyāsaśca / yadi punaḥ karmāṇi nityakartavyatayeṣyante tena sannyāsaśāstraṃ hīyate / tasmādviṣayarāgāviṣkaraṇametadvaḥ /
āha, na, śrutibalīyastvāt / tulyabalayorhi śāstrayorekaviṣayasannipāte dvayoryugapadanugrahāsambhave vikalpaparyāyau bhavataḥ / śrutismṛtisannipāte ca śrutirbalīyasī, smṛtivihitaśca sannyāsaḥ / tasmānnānayorvikalpaḥ / na khalvapi paryāyo nyāyyaḥ /
ucyate- taditaratra tulyam / yathaiva karmaṇāṃ samanuṣṭhānaṃ śāsti śāstraṃ tathā sannyāsamapi / katham ? evaṃ hyāha-

na karmaṇā na prajayā dhanena tyāgenaikenāmṛtatvamānaśuḥ /
pareṇa nākaṃ nihitaṃ guhāyāṃ vibhrājate yadyatayo viśanti //

tathā-

na karmaṇā mṛtyumṛṣayo niṣeddhuḥ prajāvanto draviṇamicchamāṇāḥ /
athāpare ṛṣayo manīṣiṇaḥ paraṃ karmabhyo'mṛtatvamānaśuḥ //

brāhmaṇaṃ cātra bhavati- "tadya idaṃ viduḥ, ye ceme'raṇyāḥ śraddhātapa ityupāsate te'rciṣamabhisambhavanti / arciṣo harahna āpūryamāṇapakṣamāpūryamāṇapakṣādyānṣaḍudaṅḍeti māsāṃstānmāsebhyaḥ saṃvatsaraṃ saṃvatsarādādityamādityāccandramasaṃ candramaso vidyutaṃ tatpuruṣo'māṇavaḥ sa etān brahma gamayati /" punarapyāha- "etameva viditvā munirbhavati, etameva pravrājino lokamicchantaḥ pravrajanti / etaddha sma vai pūrve vidvāṃsaḥ prajāṃ nākāmayanta, prajayā kiṃ kariṣyāmo yeṣāṃ nāyamātmā nāyaṃ loka iti te ha sma putraiṣaṇāyāśca vittaiṣaṇāyāśca lokaiṣaṇāyāśca vyutthāyātha bhikṣācaryaṃ carantīti /" tasmādete tyāgasannyāsayorubhayorliṅgam /
āha - yadyapyevaṃ śāstraṃ tathāpi samanuṣṭhāne vidhirasti / vihitaṃ cāvaśyaṃ kartavyam / sannyāse tvarthavādamātramityanayorayaṃ viśeṣaḥ / tasmin sati samanuṣṭhānaṃ jyāyo na tyāgaḥ /
ucyate- ko'yaṃ vidhiḥ, ko'yamarthavādaḥ ?
āha- vidhistadarthatvenāpūrvopadeśaḥ / yo hi vidhyarthena liṅā loṭā kṛtyairvāpūrvopadeśaḥ kriyate sa vidhiḥ / yathā- agnihotraṃ juhuyāt svargakāmaḥ / vāyavyaṃ śvetamajamālabheta bhūtikāma iti / stutirarthavādaḥ / tasya tu vihitasya prarocanārthaṃ yā stutiḥ so'rthavādaḥ / tadyathā- "vāyurvai kṣepiṣṭhā devatā vāyumeva tena bhāgadheyenopadhāvati, sa evainaṃ bhūtiṃ gamayati" iti / evaṃvidhāṃ hi stutimupaśrutya phalārthine hi yajamānāya vidhiḥ prarocate / etasmin hitakāmaḥ pravartate iti /
ucyate- na, ata eva sannyāsasiddhiḥ / evaṃ cenmanyase yamāmnāyaḥ śreyāṃsamarthaṃ manyate, taṃ prarocanāya stauti tathā sannyāsasiddhiḥ / kasmāt ? stutatvāt / bahulārthināṃ sannyāsamāmnāyaḥ stauti / sa kasmānna prarocate ? itarathā hyānarthakyam / yadi khalvapyarthavādaḥ stuvannapi na prarocayet yaduktaṃ prarocanārtho'rthavāda iti tadbhavadbhirhāpitavyaṃ syāt / anarthako hyevaṃ satyarthavādo na prarocanārthaḥ / arthāntaravacanaṃ vā / yadi prarocanārthatvamasya neṣyate tena tarhyarthāntaraṃ vaktavyam / mā bhūdanarthakatvaṃ vedaikadeśasyeti / tasmānnānayā vibhīṣikayā vayaṃ śakyāḥ sanmārgādapanetum / kiṃcānyat / ubhayathā vikalpe'niṣṭaprasaṅgāt / ihāyamāmnāyo vidheyatvena vā sannyāsaṃ stūyāt avidheyatvena vā / kiṃcātaḥ ? tadyadi tāvadvidheyatvena stauti kimanyadvicāryate ? siddhaḥ sannyāsaḥ / atha vidheyatvena, stutāvasya prayojanaṃ kartavyam / yaddhi kartavyatayā neṣṭaṃ tadapuruṣabuddhipūrvakaḥ svatantraḥ puruṣaniśśreyasārthaṃ pravartamāna āmnāyaḥ kimiti prarocayeta ? tasmādetāmapi kalpanāṃ kṛtvā kṛśamevaitat / athavobhathā vikalpa ityasyāyamanyo'rthaḥ / ihāyamāmnāyo bhūtārthena vā sannyāsaṃ prarocayet / abhūtārthena vā ? kiṃ cātaḥ ? tadyadi tāvadbhūtārthena prarocayati tathā satyamṛtatvaprāpakasya sannyāsasyāparigrahe viṣayārāgādanyo heturvaktavyaḥ / athābhūtārthena, puruṣo niḥśreyasāddhīyate / kasmāt ? na hyetadyuktaṃ yadaśreyasi mārge pramāṇabhūta āmnāyo mātṛmodakanyāyenehitārthinaḥ prāṇinaḥ pratārayet / tasmādayuktametat / kiñcānyat anekāntāt / nacāyamekānto yadvihitameva kartavyam / tathā ca śābarāḥ paṭhanti grāmagamanaṃ bhavataḥ śobhanamityatrāntareṇa vidhiṃ stutireva devadattaṃ grāmagamanāya prarocayatīti / kiñcānyat, āśaṅkāprasaṅgāt / yadi khalvapi kiñcit satyaṃ kiñcidanṛtaṃ brūyādvedaḥ tathā sati pauruṣeyavākyavadvedavākye'pi āśaṃkā prasajyeta / tathā ca sati yaduktameva prasaṃgaḥ / aniṣṭaṃ caitat / kiṃ ca vidhyanumānaṃ vā tat, evamekadeśabhūtatvāt / athavā vidhyekadeśo'rthavāda ityatisṛṣṭaṃ bhavatā / tatra sannyāse'rthavādamupalabhya vidhirapyastīti anumātavyam / anupalambhādadoṣa iti cet syāccaivaṃ yadyasau vidhirupalabhyate / tasmādanupalambhādayaṃ doṣānnivartiṣyata iti / etaccānupapannam / kasmāt ? anekabhedatvāt / upalabdhau yatnaḥ kriyatām / anekabhedo hi prativedamāmnāyaḥ / tatra yaduktaṃ vidhisadbhāvāt kriyāprādhānyamityetadapyayuktam / itikartavyatānupadeśāt sannyāsānupapattiriti cet- athāpi syādyadi sannyāsamapyāmnāyo vidheyaṃ manyeta / tena yathā gārhasthyasyetikartavyatāṃ bhāryodvahanādikāṃ mantravadupadiśati tathā sannyāsamapyupadiśet / na tūpadiṣṭavān / tasmānnāsti sannyāsa iti / etadapyayuktam / kasmāt ? abhāvāt / itikartavyatānāṃ hi sarvāsāmabhāvaḥ sannyāsaḥ / tatra kiṃ śāstramupadekṣyati ? yāvatī khalvitikartavyatā sannyāsāṅgaṃ tāmupadiśati śāstram / katham ? evaṃ hyāha- "tapaḥśraddhe ye hyupavasanti araṇye śāntā vidvāṃso bhaikṣacaryā carantaḥ sūryadvāreṇa te virajasaḥ prayānti yatrāmṛtaḥ sa puruṣo'vyayātmā /" tatra tapaḥśraddhe ye hyapavasantītyenaṃ śraddhayopetaṃ yamaniyamalakṣaṇaṃ dharmamāha / araṇya iti gṛhebhyo vinissṛtim / śāntā itīndriyāṇāmantaḥkaraṇasya ca viṣayābhilāṣādvinivartanam / vidvāṃsa iti pūrvarātrāpararātrādiṣu kāleṣvanirviṇṇasya yogino jñānābhyāsam / bhaikṣacaryāṃ caranta iti śarīrasthitinimittaṃ parimitamabhyavahāraniyogam / uttarārdhena ca phalamācaṣṭe / tannibandhanaśca vistaraḥ sanyāsetikartavyatāyāṃ manvādibhirabhihitaḥ / śrutinirvacanāśca smṛtayo bhavatāṃ pramāṇamiti pakṣaḥ / tatra yaduktamitikartavyatānupadeśānnāsti sannyāsa ityedayuktam / evaṃ ca nityāni karmāṇi / yattvanenaitaduktamānuśraviko heturanaikāntika iti satyametat / avaśyaṃ hi karmaṇaḥ phalamabhyupagantavyam / itarathā hi tannimittasya saṃsārasyābhāvādaniṣṭaprasaṅgaḥ / tasmādaniṣṭāmevaitadācāryasya /
āha, kathametadanumātavyamiti ?
ucyate, kṣayagrahaṇasāmarthyāt / yadi pūrvasūtroktamihānuvartate kṣayagrahaṇamanarthakaṃ syāt / kasmāt ? atyantābhāvaparyāyo hi kṣaya iti kṛtvā / evaṃ siddho'viśuddhiyogaḥ /
āha, kṣayayoga idānīṃ kathamanumātavya iti ?
ucyate - kṣayayogo'ṅgaparimāṇāt / kṣayayogaḥ punarasya hetoraṅgaparimāṇādveditavyaḥ / yāni hi yajeraṅgāni paśupuroḍāśādīni tāni parimitāni / parimitānāṃ sādhanānāṃ tantvādīnāṃ parimitaṃ kāryaṃ paṭādi dṛṣṭam / parimitaṃ kṣayadharmi dṛṣṭam / tadvadeva / kiñcānyat / saṃsāropalambhāt / dṛśyate cāyaṃ vāgbuddhisvabhāvāhāravihārabhedabhinnakarmavihāravaicitryanimittaḥ saṃsāraḥ / yadi punaḥ sākṣāt kṛtaṃ karmākṣayaphalaṃ syāt sa punarāvṛttyabhāvāt prāṇināṃ nopalabhyeta /
śabdasāmarthyānnityatvamiti cet syādetat / "śabdapramāṇakā vayaṃ,yacchabda āha tadasmākaṃ pramāṇam /" sa cāsya hetoramṛtatvamāha "tarati mṛtyuṃ, tarati pāpmānamityādi" / tasmādanicchatāpyetadavaśyamabhyupagantavyam / anabhyupagame vā pratijñāhānirvedaḥ pramāṇamiti / etacca naivam / kasmāt ? śabdāntareṇa virodhāt / anityatvamasya hetoḥ śabdo'numanyate / tasyaivaṃ sati virodhaḥ prāpnoti / katham ? evaṃ hyāha- "atha ye ime grāme iṣṭāpūrte dattamityupāsate, athaitamevādhvānaṃ punarnivartante / yathaitamākāśaṃ ākāśādvāyum / te dhūmamabhisambhavanti / dhūmo bhūtvābhraṃ bhavati / megho bhūtvā pravarṣati / ta iha vrīhiyavā oṣadhivanaspatayastilā māṣā iti jāyante / tato vai yo'nnamati yo retaḥ siñcati sa bhūya eva bhavatīti /" tatra yaduktaṃ śabdasāmarthyānnityatvamityedayuktam /
ubhayathābhidhānācchāstravirodhaprasaṅga iti cet syānmatam / tadeva śāstraṃ nityatvamāha tadevānityatvam / evaṃ sati parasparavirodhinorarthayoścoditatvāt ubhayānugrahāsambhave sati śāstravirodhaprasaṅga iti / tacca naivam / kasmāt ? asambhave satyarthāntaraklṛpteḥ / yatra hi pramāṇabhūtā śrutirasambhavinamarthaṃ codayati, tatrārthāntaraṃ kalpayati / tadyathā- "sa ātmano vapāmudakhidat" "stenaṃ manaḥ" "anṛtavādino vāg" ityevamādiṣu / evamihāpi nāsti sambhavaḥ yadeko'rtho nityaśca syādanityaśceti / tasmānnityatvavācakasya śāstrāntarasya bhaktyārthāntaraṃ parikalpayiṣyāmaḥ / tadvaditaratrāpīti cet syānmatam- yathaiva bhavatā nityānityayorekatrāsambhavānnityatvasya bhaktyā kalpanā kṛtā tathaivānityatvasyāpi kariṣyata iti / etaccāyuktam / kasmāt ? sarvapramāṇavirodhaprasaṅgāt / vināśe hi bhaktyā kalpyamāne sarvapramāṇavirodhaḥ prasajyeta / katham ? pratyakṣavirodhastāvat saṃsāropalambhāt / anumānavirodhaḥ aṅgaparimāṇe satyaṅgino nityatvānupapatteḥ / śabdavirodhaḥ te dhūmamabhisambhavantīti vacanāt / na tu nityatve bhaktyā kalpyamāne doṣo'yamupadyate / tasmādviṣametat /
āha, kathamidānīṃ bhaktyā kalpayitavyaṃ śāstramiti ?
ucyate, prakṛṣṭārthatayā / yathā khalvapyamṛtaṃ vā mṛtamatijīvo mā te hāsiṣurasavaḥ śarīramityabhidhīyate / na ca prāṇināmatyantāyāsavo jahati, kintarhi prakṛṣṭaṃ kālam / evamihāpyucyate tarati mṛtyumiti / nātyantāya mṛtyuṃ tarati, kintarhi prakṛṣṭaṃ kālam / upacaryate hi loke prakṛṣṭe nityaśabdaḥ / tadyathā nityaprahasito nityaprajalpita iti / evaṃ siddhaḥ kṣayayogaḥ /
āha, atiśayayoga idānīmasya hetoḥ kathamanumātavya iti /
ucyate- atiśayayogaḥ kriyābhyāsāt / yatra hi kriyā sakṛt pravartate yatra cāsakṛdāvartate tatrātiśayo dṛṣṭaḥ / tadyathā kṛṣyādiṣu / yajñe ca dravyopādānaśaktyapekṣā / kvacit sakṛdeva pravṛttiḥ, kvacit punaḥpunarāvṛttiḥ / tasmādatiśayena bhavitavyam / kiṃ cānyat aṅgātiśayāt / ihāṅgānāmatiśayādaṅgino'pi ghaṭāderatiśayo dṛṣṭaḥ / asti cāyaṃ pratiyajñamaṅgānāṃ dakṣiṇādīnāmatiśayaḥ /
tasmādatrāpyatiśayena bhavitavyam /
devatāṅgabhāvagamanāt kṣayātiśayānupapattiriti cet- athāpi syāt yo hi yajñe dravyamātrasya sādhanabhāvamanumanyate taṃ prati kṣayātiśayadoṣāvaparihāryau syātām / vayantu dravyasamavāyinīṃ devatāṃ kratāvaṅgabhāvamupagacchantīṃ vidmaḥ / tasmādadoṣo'yamiti / taccānupapannam / kasmāt ? sādhyatvāt / devatānāmaparimitatvaṃ sādhyam / tadaṅgabhāvagamanācca doṣābhāvaḥ / na cātmakriyāṅgatvamudāsīnatvāt iti naḥ siddhāntaḥ / tasmādayuktametat / upetya vā / kratusamanuṣṭhānānarthakyaprasaṅgāt / yadi dravyasamavāyinīṃ devatāmupalabhya tadaṅgabhāvagamanādakṣayo niratiśayaśca heturavāpyate itīṣṭaṃ vaḥ, tena tarhi yadvā tadvā vedoktaṃ karma kṛtvā śakyo'vāptumarthaḥ / kiṃ prāṇivināśahetubhiḥ kratubhiḥ ? katham ? na hi kiṃcitkarma vidyate yatra śarīrasyāṅgabhāvo na syāt / sarvadevatāmayaṃ ca śarīraṃ yasmādāha tasmādvai vidvānpuruṣamidaṃ brahmeti manyate / sarvā hyasmin devatāḥ śarīre'dhi samāhitāḥ / tatra yaduktaṃ devatāṅgabhāvagamanāt kṣayātiśayānupapattirityetadayuktam / evamayaṃ hetustridoṣaḥ / tena yaḥ phalaviśeṣo'bhinirvartyate so'pi tathājātīyaka iti śakyamanumātum / tasmānnāsya jijñāsoratra samādhiḥ /
āha, yadi nāyaṃ śreyāniti kṛtvāsya jijñāsornātra samādhiḥ tena tarhi yaḥ śreyān phalaviśeṣaḥ sa upadeṣṭavaya iti /
ucyate-

tadviparītaḥ śreyān

tadityanena karmavidhiniṣpāditasya svargaprāptilakṣaṇasya phalasyābhisambandhaḥ / tasmādviparītaḥ śuddho'kṣayo niratiśaya ityarthaḥ / ko'sāvityucyate mokṣaḥ śreyān / etaduktaṃ bhavati / ubhāvapyetau praśasyau svargāpavargau, āmnāyavihitatvāt / mokṣastu praśasyataraḥ / kasmāt ? yathoktadoṣānupapatteḥ / sa hyavaśyaṃbhāvitvādaikāntikaḥ / atīndriyatvādasaṃvedyaḥ / svātmanyavasthitvāllaghuḥ sarvatra sannihitaśca / āmnāyastutatvātpraśastaḥ / sadbhirāsevitatvādaninditaḥ / yamaniyamavairāgyajñānābhyupāyaśuddherviśuddhaḥ / adravyatvādakṣayo niratiśayaśca /
āha, kathaṃ punarayamapavargaḥ prāpyata iti ?
ucyate, saṃyogābhāvāt / duḥkhaṃ ca pradhānam / tathā ca tantrāntareṣvapyuktam- duḥkhahetuḥ kāryakaraṇaśaktiriti / tena yadā puruṣasya saṃyogastadāviśuddhitvamasya / svaśaktiviśeṣayogātteṣu teṣu jātyantaraparivarteṣu dharmādinimittasāmarthyādāyāsamanubhavati / yadā tu pradhānasaṃyogo vinivartate tadā nimittābhāve naimittikasyāpyabhāva iti kṛtvā na punardvandvānyanubhavati /
āha, kimarthaḥ punarayaṃ pradhānasya puruṣeṇa saha saṃyogaḥ ?
ucyate, naitadihābhidhānīyam / vakṣyatyayamupariṣṭādācāryaḥ "puruṣasya darśanārthaḥ, kaivalyārthastathā pradhānasya / paṅgvandhavadubhayorapi saṃyoga iti" (ISk 21) /
āha, viyogastarhi kasmānnimittād bhavatīti ?
ucyate -

vyaktāvyaktajñavijñānāt // ISk_2 //

vyaktaṃ cāvyaktaṃ ca jñaśca vyaktāvyaktajñāḥ / teṣāṃ vijñānaṃ vyaktāvyaktajñavijñānaṃ tasmāt / bahuṣvaniyamādalpāco'pi jñaśabdasya na pūrvanipātaḥ / athavā jñānasya sādhakatamaṃ vyaktam / tatpūrvakatvādavyaktasamadhigamasyetyabhihitam / yadvā vyaktaṃ ca avyaktaṃ ca te vyaktāvyakte, te vijānāti iti vyaktāvyaktajñaḥ, tadvijñānāt saṃyogo nivartate / vakṣyati caitat, "dṛṣṭā mayetyupekṣata eko dṛṣṭāhamityuparamatyanyā" iti (ISk 66) /
tatra rūpapravṛttiphalalakṣaṇaṃ vyaktam / rūpaṃ punaḥ mahānahaṃkāraḥ pañca tanmātrāṇi ekādaśendriyāṇi pañca mahābhūtāni / sāmānyataḥ pravṛttirdvividhā / hitakāmaprayojanā ca, ahitapratiṣedhaprayojanā ca / viśeṣataḥ paṃca karmayonayo vṛttyādyāḥ prāṇādyāśca pañca vāyavaḥ / phalaṃ dvividham / dṛṣṭamadṛṣṭaṃ ca / tatra dṛṣṭaṃ siddhituṣṭyaśaktiviparyayalakṣaṇam / adṛṣṭaṃ brahmādau stambaparyante saṃsāre śarīrapratilambha ityetad vyaktam / eṣāṃ guṇānāṃ sattvarajastamasāmaṅgāṅgibhāvagamanādviśeṣagṛhītiḥ / yadā tvaṅgabhāvamagacchanto nirlikhitaviśeṣā vyavatiṣṭhante tadāvyaktamityucyante / cetanāśaktirūpatvāccitraṃ guṇavṛttaṃ jānātīti jñaḥ /
eṣāṃ trayāṇāṃ bhedamabhedaṃ ca vijñāya saṃyoganivṛttiṃ labhate / kasmāt ? saṃyoganimittapratidvandvibhūtatvādyoganimittasya / iha yadādarśananimittaḥ pradhānapuruṣayoḥ saṃyogaḥ tasmādasya pratidvandvibhūtena jñānena viyogahetunā bhavitavyam / ko dṛṣṭāntaḥ ? tamaḥprakāśavat / yathā tamasā tirohitāni dravyāṇi ghaṭādīni nopalabhyante, tatpratidvandvibhūtena tu pradīpena prakaśitānāmeṣāmupalabdhirbhavati / tadvadihāpi draṣṭavyamiti siddhaṃ jñānānmokṣaḥ / uktaṃ ca-

vṛkṣāgrāccyutapādo yadvadanicchannaraḥ patatyeva /
tadvad guṇapuruṣajño'nicchannapi kevalī bhavati //

kiṃ cānyat / āmnāyābhihitatvāt / āmnāyanibandhano hyayamartho jñānānmokṣa iti, na yādṛcchikaḥ / katham ? evaṃ hyāha- "satyaṃ jñānamanantaṃ brahma yo veda nihitaṃ guhāyāṃ parame vyoman so'śnute sarvān kāmān saha brahmaṇā vipaścitā /"

"yato vāco nivartante aprāpya manasā saha /
ānandaṃ brahmaṇo vidvān na bibheti kutaścana //"

"tameva viditvāmṛtatvameti nānyaḥ panthā ayanāya vidyate /" tathā brāhmaṇe'pyuktam / "tarati śokamātmavit /" "brahmavid brahmaiva bhavatīti /" tasmādāmnāyaprāmāṇyādapi manyāmahe jñānānmokṣa iti /
āha, jñānavācino'mṛtatvanimittābhyupagamānmahata āmnāyāntarasyānarthakyam / yadi jñānavācina āmnāyakhaṇḍakādamṛtatvamavāpyata ityetadabhyupagamyate, tena kriyāvācino mahata āmnāyāntarasyānarthakyaṃ prāptam / kiṃ kāraṇam ? na hyanāyāseneṣṭāvāptau satyām āyāsabhūyiṣṭhe karmaṇi pravartamānaḥ kṛtī bhavatīti / āha ca -

akke cenmadhu vindeta kimarthaṃ parvataṃ vrajet /
iṣṭasyārthasya saṃprāptau ko vidvān yatnamācaret //

ucyate- yadi punaḥ karmāṇyatyantakartavyatayeṣyante, jñānavācina āmnāyasya kathamarthavattā siddhā bhavati ?
āha, samuccaye tūbhayārthavattvam / jñānakarmaṇostu samuccaye'bhyupagamyamāne dvayorapyāmnāyārthavattā siddhā bhavati / vidvān yajeta vidvān yājayediti vacanāt, tathā sarvapuruṣāṇāṃ kratāvadhikāraḥ aśrotriyaṣaṇḍhaśūdravarjamitinyāyāt / tasmājjñānakarmaṇoḥ samuccayādiṣṭaprasiddhiḥ /
ucyate- na, pūrvadoṣāparihārāt / yadi niyamato viduṣaiva karmāṇi kartavyānītyabhyupagamyate tena yaḥ pūrvokto doṣaḥ saṃsārābhāvaprasaṅgaḥ, tasyāparihāraḥ / kiṃ ca śāstrahāneśca / yaśca śāstramiṣṭāpūrte samupāsyate te dhūmamabhisaṃbhavantīti tadetasyāṃ kalpanāyāṃ hīyate / kiṃ cānyat- bhinnaphalatvāt / ihābhinnaphalāni dravyāṇi samuccīyante / tadyathā bhujyaṅgāni sūpādīni / abhinnaṃ teṣāṃ tṛptilakṣaṇaṃ phalamiti / na caitajjñānakarmaṇorabhinnaṃ phalam / svargāpavargahetutvāt / jñānasāmarthātkaivalyamabhinnaṃ phalamiti cet pūrveṇāviśeṣaḥ / yaduktaṃ saṃsārābhāvaprasaṃga iti tadanapahṛtameva bhavati / kiṃcānyat- śrūyamāṇaphalavirodhaśca / yacca kriyāyāḥ phalaṃ śrūyate agnihotraṃ juhuyāt svargakāmo, rāṣṭramagniṣṭomena jayatīti tadvirudhyate / karmaṇaśca śeṣabhāvaḥ / svārthopasarjanatve satyarthāntaraniṣpādakatvāt / yathāvahantītyevamādyāḥ kriyāḥ svaṃ phalamupasarjanīkṛtya taddvāreṇa yajerupakurvantyastaccheṣabhūtā bhavanti evaṃ kriyāpi jñānaphalabhūtatvāttaccheṣabhūtā syāt /
vidhisadbhāvāt kriyāprādhānyamiti cenna- uktatvāt / kathametat ? nāsti vidhikṛto viśeṣaḥ / upetya vā / tatrāpi tadutpatteḥ / asti hi jñānasyāpi vidhāyakaṃ śāstram / katham ? evaṃ hyāha- "ya ātmāpahatapāpmā vijighatso vipipāso vijaro vimṛtyurviśokaḥ sannyastasaṃkalpaḥ so'nveṣṭavyaḥ sa jijñāsitavyaḥ / sarvāṃśca kāmānavāpnoti ya ātmānamanuvidya vijānātīti" prajāpatervacanaṃ śrūyate / punarapyāha- "dve vidye veditavye parā caivāparā ca" yā / tasmādvidhisadbhāvātkriyāprādhānyamiti svapakṣānurāgamātrametat / dṛṣṭārthatvādityeke /
eke punarācāryā manyante dṛṣṭameva jñānasyājñānanivṛttilakṣaṇaṃ phalaṃ tasmānna śāstreṇa vidhīyate / kiṃ kāraṇam ? dṛṣṭārthasya hi karmaṇo na śāstraṃ prayojakam / svayamevārthitatvāttatra pravṛtterbhujyādivat / teṣāṃ jñānavidhāyakāni vākyāni tānyupāyaguṇavidhānārthamanuvādabhūtānyāśrīyante / tadyathā dadhnā juhoti, payasā juhotīti /
yattu khalvidamucyate vidvānyajeta, vidvān yājayet, śrotriyasya ca karmaṇyadhikāra iti tasyāmayamarthaḥ- adhītya vedaṃ kriyānupūrvo ca jñātvā karmaṇi pravartitavyam / evaṃ ca sati na kaściddoṣaḥ / yadi punarniyamata evātmavidhāṃ karmaṇyadhikārastena saṃsārābhāvaprasaṃgaḥ / svābhāvikatvāt / vijñānasya śāsrasya sarvādhikāravirodhaḥ / tasmānnāsti samuccayo jñānakarmaṇoḥ /
apara āha- satyam / nāstyanayoḥ samuccayaḥ kintarhi sarvārthā kriyā jñānaṃ pratiṣiddhārtham / ye hi ṣaṇḍhāndhavabadhirādayaḥ karmaṇo'tyantaṃ nirākṛtāsteṣāṃ jñānādāśramāntare'mṛtatvāvāptiḥ / itareṣāṃ tū mūlāśrame karmaṇa eveti tasya nāyaṃ vādinaḥ parihāra iti /
ucyate- na, svasamayavirodhāt / evaṃ bruvāṇasyāsya vādinaḥ svasamaya eva virudhyate / yaduktam- vidvāṃsaḥ prajāṃ nākāmayanta, kiṃ prajayā kariṣyāmaḥ ? atha yaduktaṃ putraiṣaṇāyāśca vittaiṣaṇāyāśca vyutthāya bhaikṣacaryāṃ carantīti / na ca ṣaṇḍānāṃ putraiṣaṇāvyutthānamathavad bhavati, devakṛtatvāt / kiṃ cānyat - rahasyabhūtatvāt / rahasyabhūtaṃ hi vedānāṃ jñānam / yasmādāha- taddha smaitadāruṇirauddālakirjyeṣṭhāya putrāya provāca / idaṃ jyeṣṭhaputrāya pitā brahma prabrūyāt / praṇāyyāntevāsine nānyasmai yasmai kasmaicana / ya imāmadbhiḥ parigṛhītāṃ vasunā vasumatīṃ pūrṇāṃ dadyādetadeva tato bhūya iti /

bhavati cātra -

paraṃ rahasyaṃ vedānāmavasāneṣu paṭhyate /
ṣaṇḍādyarthaṃ tadiṣṭaṃ ceddhiṣṭyā saphalatā śrute //
vidvān karmāṇi kurvītetyetaduktaṃ kila śrutau /
sa ca paṇḍādirevasyādyo'tyantaṃ karmaṇaścyutaḥ //
sa eva vartyatāṃ prājñaiḥ kiṃ nyāyyo'tha matibhramaḥ ?
indriyārthānurāgo vā dveṣo vā mokṣavartmani //
kaivalyaprāptihetutvādyā vedavihitā stutiḥ /
praśastā yājñavalkyādyairviśiṣṭaistattvaniścayāt //
seyaṃ viṣayarāgāndhairviparītārthavādibhiḥ /
vidyā kanyeva ṣaṇḍāya dīyamānā na śobhate //
tasmādrāgānugairuktāṃ kuhetupṛtanāmimām /
apohya matimānyuvatyā hyāśramādāśramaṃ vrajet //

iti śrīmadācāryeśvarakṛṣṇaviracitāyāṃ sāṃkhyasaptatau yuktidīpikānāmni vivaraṇe prathamamāhnikam //