Chapter 4

atha nalasya guṇaṃ guṇamātmabhūḥ surabhi tasya yaśaḥkusumaṃ dhanuḥ |
śrutipathoparataṃ sumanastayā tamiṣumāśu vidhāya jigāya tān || 1 ||
[Analyze grammar]

yadatanujvarabhāktanute sma sā priyakathāsarasīrasamañjanam |
sapadi tasya cirāntaratāpinī pariṇatirviṣamā samapadyata || 2 ||
[Analyze grammar]

dhruvamadhītavatīyamadhīratāṃ dayitadūtapatadgatavegataḥ |
sthitivirodhakarīṃ dvyaṇukodarī taduditaḥ sa hi yo yadanantaraḥ || 3 ||
[Analyze grammar]

atitamāṃ samapādi jaḍāśayaṃ smitalavasmaraṇe'pi tadānanam |
ajani paṅgurapāṅganijāṅgaṇabhramikaṇe'pi tadīkṣaṇakhañjanaḥ || 4 ||
[Analyze grammar]

kimu tadantarubhau bhiṣajau divaḥ smaranalau viśataḥ sma vigāhitum |
tadabhikena cikitsatumāśu tāṃ makhabhujāmadhipena niyojitau || 5 ||
[Analyze grammar]

kusumacāpajatāpasamākulaṃ kamalakomalamaikṣyata tanmukham |
aharaharvahadabhyadhikādhikā raviruciglapitasya vidhorvidhām || 6 ||
[Analyze grammar]

taruṇatātaraṇidyutinirmitadraḍhima tatkucakumbhayugaṃ tadā |
analasaṃgatitāpamupaitu no kusumacāpakulāalavilāsajam || 7 ||
[Analyze grammar]

adhṛta thadvirahoṣmaṇi majjitaṃ manasijena tadūruyugaṃ tadā |
spṛśati tatkadaṃ kadalītaruryadi marujvaladūṣaradūṣitaḥ || 8 ||
[Analyze grammar]

smaraśarāhatinirmitasaṃjvaraṃ karayugaṃ hasati sma damasvasuḥ |
anapidhānapatattapanātapaṃ tapanipītasaraḥ sarasīruham || 9 ||
[Analyze grammar]

madanatāpabhareṇa vidīrya no yadudapāti hṛdā damanasvasuḥ |
nibiḍapīnakucadvayayantraṇā tamaparādhamadhātpratibadhnatī || 10 ||
[Analyze grammar]

niviśate yadi śūkaśikhā pade sṛjati sā kiyatīmiva na vyathām |
mṛdutanorvitanotu kathaṃ na tāmavanibhṛttu niviśya hṛdi sthitaḥ || 11 ||
[Analyze grammar]

manasi santamiva priyamīkṣituṃ nayanayoḥ spṛhayāntarupetayoḥ |
grahaṇaśaktirabhūdidamīyayorapi na saṃmukhavāstuni vastuni || 12 ||
[Analyze grammar]

hṛdi damasvasuraśrujharaplute pratiphaladvirahāttamukhānateḥ |
hṛdayabhājamarājata cumbituṃ nalamupetya kilāgami tanmukham || 13 ||
[Analyze grammar]

suhṛdamagnimudañcayituṃ smaraṃ manasi gandhavahena mṛgīdṛśaḥ |
akali niḥśvasitena vinirgamānumitanihnutaveśanamāyitā || 14 ||
[Analyze grammar]

virahapāṇḍimarāgatamomaṣīśitimatannijapītimavarṇakaiḥ |
daśa diśaḥ khalu tadṛgakalpayallipikarī nalarūpakacitritāḥ || 15 ||
[Analyze grammar]

smarakṛtāṃ hṛdayasya muhurdaśāṃ bahu vayanniva niḥśvasitānilaḥ |
vyadhita vāsasi kampamadaḥ śrite trasati kaḥ sati nāśrayabādhane || 16 ||
[Analyze grammar]

karapadānanalocananāmabhiḥ śatadalaiḥ sutanorvirahajvare |
ravimaho bahupītacaraṃ cirādaniśatāpamiṣādudasṛjyata || 17 ||
[Analyze grammar]

udayati sma tadadbhutamālibhirdharaṇibhṛdbhuvi tatra vimṛśya yat |
anumito'pi ca bāṣpanirīkṣaṇādvyabhicacāra na tāpakaro nalaḥ || 18 ||
[Analyze grammar]

hṛdi vidarbhabhuvaḥ praharañśarai ratipatirniṣadhādhipateḥ kṛte |
kṛtatadantaragasvadṛḍhavyadhaḥ phaladanīritamūrcchadalaṃ khalu || 19 ||
[Analyze grammar]

vidhuramāni tayā yadi bhānumānkathamaho sa tu taddhṛdayaṃ tathā |
api viyogabharāsphuṭanasphuṭīkṛtadṛṣattvamajijvaladaṃśubhiḥ || 20 ||
[Analyze grammar]

hṛdayadattasaroruhayā tayā kva sadṛgastu viyoganimagnayā |
priyadhanuḥ parirabhya hṛdā ratiḥ kimanumartumaśeta citārciṣi || 21 ||
[Analyze grammar]

analabhāvamiyaṃ svanivāsino na virahasya rahasyamabudhyata |
praśamanāya vidhāya tṛṇānyamūñjvalati tatra yadujjhitumaihata || 22 ||
[Analyze grammar]

prakṛtiretu guṇaḥ sa na yoṣitāṃ kathamimāṃ hṛdayaṃ mṛdu nāma yat |
tadiṣubhiḥ kusumairapi dunvatā suvivṛtaṃ vibudhena manobhuvā || 23 ||
[Analyze grammar]

riputarā bhavanādaviniryatīṃ vidhurucirgṛhajālabilairnutām |
itarathātmanivāraṇaśaṅkayā jvarayituṃ biśaveśadharāviśat || 24 ||
[Analyze grammar]

hṛdi vidarbhabhuvo'śrubhṛti sphuṭaṃ vinamadāsyatayā pratibimbitam |
mukhadṛgoṣṭhamaropi manobhuvā tadupamākusumānyakhilāḥ śarāḥ || 25 ||
[Analyze grammar]

virahapāṇḍukapolatale vidhurvyadhita bhīmabhuvaḥ pratibimbitaḥ |
anupalakṣyasitāṃśutayā mukhaṃ nijasakhaṃ sukhamaṅkamṛgārpaṇāt || 26 ||
[Analyze grammar]

virahatāpini candanapāṃśubhirvapuṣi sārpitapāṇḍimamaṇḍanā |
viṣadharābhabisābharaṇā dadhe ratipatiṃ prati śaṃbhuvibhīṣikām || 27 ||
[Analyze grammar]

vinihitaṃ paritāpini candanaṃ hṛdi tayā dhṛtabudbudamābabhau |
upanamansuhṛdaṃ hṛdayeśayaṃ vidhurivāṅkagatoḍuparigrahaḥ || 28 ||
[Analyze grammar]

smarahutāśanadīpitayā tayā bahu muhuḥ sarasaṃ sarasīruham |
śrayitumardhapathe kṛtamantarā śvasitanirmitamarmaramujjhitam || 29 ||
[Analyze grammar]

priyakaragrahamevamavāpsyati stanayugaṃ tava tāmyati kiṃ nviti |
jagadaturnihite hṛdi nīraje davathukuḍmalanena pṛthustanīm || 30 ||
[Analyze grammar]

tvaditaro'pi hṛdā na mayā dhṛtaḥ patiritīva nalaṃ hṛdayeśayam |
smarahavirbhuji bodhayati sma sā virahapāṇḍutayā nijaśuddhatām || 31 ||
[Analyze grammar]

virahataptatadaṅganiveśitā kamalinī nimiṣaddalamuṣṭibhiḥ |
kimapanetumaceṣṭata kiṃ parābhavitumaihata taddavathuṃ pṛthum || 32 ||
[Analyze grammar]

iyamanaṅgaśarāvalipannagakṣatavisāriviyogaviṣāvaśā |
śaśikaleva kharāṃśukarārditā karuṇanīranidhau nidadhau na kam || 33 ||
[Analyze grammar]

jvalati manmathavedanayā nije hṛdi tayārdramṛṇālalatārpitā |
svajayinostrapayā savidhasthayormalinatāmabhajadbhujayorbhṛśam || 34 ||
[Analyze grammar]

pikarutiśrutikampini śaivalaṃ hṛdi tayā nihitaṃ vicaladbabhau |
satatadgatahṛcchayaketunā hṛtamiva svatanūdhanagharṣiṇā || 35 ||
[Analyze grammar]

na khalu mohabaśena tadānanaṃ nalamanaḥ śaśikāntamabodhi tat |
itarathā śaśinobhyudaye tataḥ kathamasusruvadasrumayaṃ payaḥ || 36 ||
[Analyze grammar]

ratipatervijayāstramiṣuryathā jayati bhīmasutāpi tathaiva sā |
svaviśikhāniva pañcatayā tato niyatamaihata yojayituṃ sa tām || 37 ||
[Analyze grammar]

śaśimayaṃ dahanāsramuditvaraṃ manasijasya vimṛśya viyoginī |
jhaṭiti vāruṇamaśrumiṣādasau taducitaṃ pratiśastramupādade || 38 ||
[Analyze grammar]

atanunā navamambudamāmbudaṃ sutanurastramudastamavekṣya sā |
ucitamāyataniḥśvasitacchalācchvasanaśastramamuñcadamuṃ prati || 39 ||
[Analyze grammar]

ratipatiprahitānilahetitāṃ pratiyatī sudatī malayānile |
tadurutāpabhayāttamṛṇālikāmayamiyaṃ bhujagāstramivādita || 40 ||
[Analyze grammar]

nyadhita taddhṛdi śalyamiva dvayaṃ virahitāṃ ca tathāpi ca jīvitam |
kimatha tatra nihatya nikhātavānratipatiḥ stanabilvayugenaṃ tat || 41 ||
[Analyze grammar]

atiśaravyayatā madanena tāṃ nikhilapuṣpamayasvaśaravyayāt |
sphuṭamakāri phalānyapi muñcatā tadurasi stanatālayugārpaṇam || 42 ||
[Analyze grammar]

atha muhurbahuninditacandrayā stutavidhuṃ tudayā ca tayā muhuḥ |
patitayā smaratāpamaye gade nijagade'śruvimiśramukhī sakhī || 43 ||
[Analyze grammar]

narasurābjabhuvāmiva yāvatā bhavati yasya yugaṃ yadanehasā |
virahiṇāmapi tadratavadyuvakṣaṇamitaṃ na kathaṃ gaṇitāgame || 44 ||
[Analyze grammar]

januradhatta satī smaratāpitā himavato na tu tanmahimādṛtā |
jvalati bhālatale likhitaḥ satīviraha eva harasya na locanam || 45 ||
[Analyze grammar]

dahanajā na pṛthurdavathuvyathā virahajaiva pṛthuryadi nedṛśam |
dahanamāśu viśanti kathaṃ striyaḥ priyamapāsumupāsitumuddhurāḥ || 46 ||
[Analyze grammar]

hṛdi luṭhanti kalā nitarāmamūrvirahiṇīvadhapaṅkakalaṅkitā |
kumudasakhyakṛtastu bahiṣkṛtāḥ sakhi vilokaya durvinayaṃ vidhoḥ || 47 ||
[Analyze grammar]

ayi vidhuṃ paripṛccha guroḥ kutaḥ sphuṭamaśikṣyata dāhavadānyatā |
glapitaśaṃbhugalādgaralāttvayā kimudadhau jaḍa vā vaḍavānalāt || 48 ||
[Analyze grammar]

ayamayogivadhūvadhapātabairbhramimavāpya divaḥ khalu pātyate |
śitiniśādṛṣadi sphuṭadutpatatkaṇagaṇādhikatārakitāmbaraḥ || 49 ||
[Analyze grammar]

tvamabhidhehi vidhuṃ sakhi madgirā kimidamīdṛgadhikriyate tvayā |
na gaṇitaṃ yadi janma payonidhau haraśiraḥ sthitibhūrapi vismṛtā || 50 ||
[Analyze grammar]

nipatatāpi na mandarabhūbhṛtā tvamudadhau śaśalāñchana cūrṇitaḥ |
api munerjaṭharārciṣi jīrṇatāṃ bata gato'si na pītapayonidheḥ || 51 ||
[Analyze grammar]

kimasubhirglapitairjaḍa manyase mayi nimajjatu bhīmasutāmanaḥ |
mama kila śrutimāha tadarthikāṃ nalamukhenduparāṃ vibudhaḥ smaraḥ || 52 ||
[Analyze grammar]

mukharaya svayaśonavaḍiṇḍimaṃ jalanidheḥ kulamujjvalayādhunā |
api gṛhāṇa vadhūvadhapauruṣaṃ hariṇalāñchana muñca kadarthanām || 53 ||
[Analyze grammar]

niśi śaśinbhaja kaitavabhānutāmasati bhāsvati tāpaya pāpa mām |
mahamahanyavalokayitāsmi te punaraharpatinihnutadarpatām || 54 ||
[Analyze grammar]

śaśakalaṅka bhayaṃkara mādṛśāṃ jvalasi yanniśi bhūtapatiṃ śritaḥ |
tadamṛtasya tavedṛśabhūtatādbhutakarī paramūrdhavidhūnanī || 55 ||
[Analyze grammar]

śravaṇapūratamāladalāṅkuraṃ śaśikuraṅgamukhe sakhi nikṣipa |
kimapi tundilitaḥ sthagayatyamuṃ sapadi tena taducchvasimi kṣaṇam || 56 ||
[Analyze grammar]

asamaye matirunmiṣati dhruvaṃ karagataiva gatā yadiyaṃ kuhūḥ |
punarupaiti nirudhya nivāsyate sakhi mukhaṃ na vidhoḥ punarīkṣyate || 57 ||
[Analyze grammar]

ayi mamaiṣa cakoraśiśurmunervrajati sindhupibasya na śiṣyatām |
aśitumabdhimadhītavato'sya ca śaśikarāḥ pibataḥ kati śīkarāḥ || 58 ||
[Analyze grammar]

kuru kare gurumekamayoghanaṃ bahirato mukuraṃ ca kuruṣva me |
viśati tatra yadaiva vidhustadā sakhi sukhādahitaṃ jahi taṃ drutam || 59 ||
[Analyze grammar]

udara eva dhṛtaḥ kimudanvatā na viṣamo vaḍavānalavadvidhuḥ |
viṣavadujjhitamapyamunā na sa smaraharaḥ kimamuṃ bubhuje vibhuḥ || 60 ||
[Analyze grammar]

asitamekasurāśitamapyabhūnna punareṣa vidhurviśadaṃ viṣam |
api nipīya surairjanitakṣayaṃ svayamudeti punarnavamārṇavam || 61 ||
[Analyze grammar]

virahivargavadhavyasanākulaṃ kalaya pāpamaśeṣakalaṃ vidhum |
suranipītasudhākamapāpakaṃ grahavido viparītakathāḥ katham || 62 ||
[Analyze grammar]

virahibhirbahu mānamavāpi yaḥ sa bahulaḥ khalu pakṣa ihājani |
tadamitiḥ sakalairapi yatra tairvyaraci sā ca tithiḥ kimamīkṛtā || 63 ||
[Analyze grammar]

svariputīkṣṇasudarśanavibhramātkimu vidhuṃ grasate sa vidhuṃtudaḥ |
nipatitaṃ vadane kathamanyathā balikarambhanibhaṃ nijamujjhati || 64 ||
[Analyze grammar]

vadanagarbhagataṃ na nijecchayā śaśinamujjhati rāhurasaṃśayam |
aśita eva galatyayamatyayaṃ sakhi vinā galanālabilādhvanā || 65 ||
[Analyze grammar]

ṛjudṛśaḥ kathayanti purāvido madhubhidaṃ khalu rāhuśiraśchidam |
virahimūrdhabhidaṃ nigadanti na kva na śaśī yadi tajjaṭharānalaḥ || 66 ||
[Analyze grammar]

smarasakhau rucibhiḥ smaravairiṇā makhamṛgasya yathā dalitaṃ śiraḥ |
sapadi saṃdadhaturbhiṣajau divaḥ sakhi tathā tamaso'pi karotu kaḥ || 67 ||
[Analyze grammar]

nalavimastakitasya raṇe ripurmilati kiṃ na kabandhagalena vā |
mṛtibhiyā bhṛśamutpatatastamograhaśirastadasṛgdṛḍhabandhanam || 68 ||
[Analyze grammar]

sakhi jarāṃ paripṛccha tamaḥ śiraḥ samamasau dadhatāpi kabandhatām |
magadharājavapurdalayugmavatkimiti na vyatisīvyati ketunā || 69 ||
[Analyze grammar]

vada vidhuṃtudamāli madīritaistyajasi kiṃ dvijarājadhiyā ripum |
kimu divaṃ punareti yadīdṛśaḥ patita eṣa niṣevya hi vāruṇīm || 70 ||
[Analyze grammar]

dahati kaṇṭhamayaṃ khalu tena kiṃ garuḍavaddvijavāsanayojjhitaḥ |
prakṛtirasya vidhuṃtuda dāhikā mayi nirāgasi kā vada vipratā || 71 ||
[Analyze grammar]

sakalayā kalayā kila daṃṣṭrayā samavadhāya yamāya vinirmitaḥ |
virahiṇīgaṇacarvaṇasādhanaṃ vidhurato dvijarāja iti śrutiḥ || 72 ||
[Analyze grammar]

smaramukhaṃ haranetrahutāśanājjvaladidaṃ cakṛṣe vidhinā vidhuḥ |
bahuvidhena viyogivadhainasā śaśamiṣādatha kālikayāṅkitaḥ || 73 ||
[Analyze grammar]

dvijapatigrasanāhitapātakaprabhavakuṣṭhasitīkṛtavigrahaḥ |
virahiṇīvadanendujighatsayā sphurati rāhurayaṃ na niśākaraḥ || 74 ||
[Analyze grammar]

iti vidhorvividhoktivigarhaṇaṃ vyavahitasya vṛtheti vimṛśya sā |
atitarāṃ dadhatī virahajvaraṃ hṛdayabhājamupālabhata smaram || 75 ||
[Analyze grammar]

hṛdayamāśrayase yadi māmakaṃ jvalayasītthamanaṅga tadaiva kim |
svayamapi kṣaṇadagdhanijendhanaḥ kva bhavitāsi hatāśa hutāśavat || 76 ||
[Analyze grammar]

purabhidā gamitastvamadṛśyatāṃ trinayanatvapariplutiśaṅkayā |
smara niraiṣyata kasyacanāpi na tvayi kimakṣigate nayanaistribhiḥ || 77 ||
[Analyze grammar]

sahacaro'si rate riti viśrutistvayi vasatyapi me na ratiḥ kutaḥ |
atha na saṃprati saṃgatirasti vāmanumṛtā na bhavantamiyaṃ kila || 78 ||
[Analyze grammar]

rativiyuktamanātmaparajña kiṃ svamiva māmapi tāpitavānasi |
kathamatāpabhṛtastava saṃgamāditarathā hṛdayaṃ mama dahyate || 79 ||
[Analyze grammar]

anumamāra na māra kathaṃ nu sā ratiratiprathitāpi pativratā |
iyadanāthavadhūvadhapātakī dayitayāpi tayāsi kimujjhitaḥ || 80 ||
[Analyze grammar]

sugata eva vijitya jitendriyastvadurukīrtitanuṃ yadanāśayat |
tava tanūmavaśiṣṭavatīṃ tataḥ samiti bhūtamayīmaharaddharaḥ || 81 ||
[Analyze grammar]

phalamalabhyata yatkusumaistvayā viṣamanetramanaṅga vigṛhṇatā |
ahaha nītiravāptabhayā tato na kusumairapi vigrahamicchati || 82 ||
[Analyze grammar]

api dhayannitarāmaravatsudhāṃ trinayanātkathamāpitha tāṃ daśām |
bhaṇa rateradharasya rasādarādamṛtamāptaghṛṇaḥ khalu nāpibaḥ || 83 ||
[Analyze grammar]

bhuvanamohanajena kimenasā tava babhūva pareta piśācatā |
yadadhunā virahādhimalīmasāmabhibhavanbhramasi smara madvidhām || 84 ||
[Analyze grammar]

vata dadāsi na mṛtyumapi smara skhalati te kṛpayā na dhanuḥ karāt |
atha mṛto'si mṛtena ca mucyate na khalu muṣṭirurīkṛtabandhanaḥ || 85 ||
[Analyze grammar]

dṛgupahatyapamṛtyuvirūpatāḥ śamayate'paranirjarasevitā |
atiśayāndhyavapuḥ kṣatipāṇḍutāḥ smara bhavanti bhavantamupāsituḥ || 86 ||
[Analyze grammar]

smara nṛśaṃsatamastvamato vidhiḥ sumanasaḥ kṛtavānbhavadāyudham |
yadi dhanurdṛḍhamāśugamāyasaṃ tava sṛjettrijagatpralayaṃ vrajet || 87 ||
[Analyze grammar]

smarariporiva ropaśikhī purāṃ dahatu te jagatāmapi mā trayam |
iti vidhistvadiṣūnkusumāni kiṃ madhubhirantarasiñcadanirvṛtaḥ || 88 ||
[Analyze grammar]

nidhiranaṃśamabhedyamavekṣya te janamanaḥ khalu lakṣamakalpayat |
api sa vajramadāsyata cettadā tvadiṣubhirvyadaliṣyadasāvapi || 89 ||
[Analyze grammar]

api vidhiḥ kusumāni tavāśugān smara vidhāya na nirvṛtimāptavān |
adita pañca hi te sa niyamya tāṃstadapi tairbata jarjaritaṃ jagat || 90 ||
[Analyze grammar]

upaharanti na kasya suparvaṇaḥ sunamasaḥ kati pañca suradrumāḥ |
tava tu hīnatayā pṛthagekikāṃ dhigiyatāpi na te'ṅga vigarhaṇā || 91 ||
[Analyze grammar]

kusumamapyatidurṇayakāri te kimu vitīrya dhanurvidhiragrahīt |
kimakṛtaiṣa tavaikatadāspade dvayamabhūdadhunā hi nalabhuvau || 92 ||
[Analyze grammar]

ṣaḍṭatavaḥ kṛpayā svakamekakaṃ kusumamakramananditanandanāḥ |
dadati yadbhavate kurute bhavāndhanurivaikamiṣūniva pañca taiḥ || 93 ||
[Analyze grammar]

yadatanustvamidaṃ jagate hitaṃ kva sa munistava yaḥ sahate hatīḥ |
viśikhamāśravaṇaṃ paripūrya cedavicaladbhujamujjhitumīśiṣe || 94 ||
[Analyze grammar]

saha tayā smara bhasma jhaṭityabhūḥ paśupatiṃ prati yāmiṣumagrahīḥ |
dhruvamabhūdadhunā vitanoḥ śarastava pikasvara eva sa pañcamaḥ || 95 ||
[Analyze grammar]

smara sa madduritairaphalīkṛto bhagavato'pi bhavaddahanaśramaḥ |
surahitāya hutātmatanuḥ punarnanu janurdivi tatkṣaṇamāpitha || 96 ||
[Analyze grammar]

virahiṇo vimukhasya vidhūdaye śamanadikpavanaḥ sa na dakṣiṇaḥ |
sumanaso namayannaṭanau dhanustava tu bāhurasau yadi dakṣiṇaḥ || 97 ||
[Analyze grammar]

kimu bhavantamumāpatirekakaṃ madamudāndhamayogijanāntakam |
yadajayattata eva na gīyate sa bhagavānmadanāndhakamṛtyujit || 98 ||
[Analyze grammar]

tvamiva ko'pi parāpakṛtau kṛtī na dadṛśe na ca manmatha śuśruve |
svamadaho dahanājjvalatātmanā jvalayituṃ parirabhya jaganti yaḥ || 99 ||
[Analyze grammar]

tvamucitaṃ nayanārciṣi śaṃbhunā bhuvanaśāntikahomahaviḥ kṛtaḥ |
tava vayasyamapāsya madhuṃ madhuṃ hatavatā hariṇā bata kiṃ kṛtam || 10 ||
[Analyze grammar]

iti kiyadvacasaiva bhṛśaṃ priyādharapipāsu tadānanamāśu tat |
ajani pāṃśulamapriyavāgjvalanmadanaśoṣaṇabāṇahateriva || 101 ||
[Analyze grammar]

priyasakhīnivahena sahātha sā vyaracayadgiramardhasamasyayā |
hṛdayamarmaṇi manmathasāyakaiḥ kṣatatamā bahu bhāṣitumakṣamā || 102 ||
[Analyze grammar]

akaruṇādava sūnaśarādasūnsahajayāpadi dhīratayātmanaḥ |
asava eva mamādya virodhinaḥ kathamarīnsakhi rakṣitumāttha mām || 103 ||
[Analyze grammar]

hitagiraṃ na śṛṇoṣi kimāśrave prasabhamapyava jīvitamātmanaḥ |
sakhi hitā yadi me bhavasīdṛśī madarimicchasi yā mama jīvitam || 104 ||
[Analyze grammar]

amṛtadīdhitireṣa vidarbhaje bhajasi tāpamamuṣya kimaṃśubhiḥ |
yadi bhavanti mṛtāḥ sakhi candrikāḥ śaśabhṛtaḥ kva tadā || 105 ||
[Analyze grammar]

paritapyate vraja dhṛtiṃ tyaja bhītimahetukāmayamacaṇḍamarīcirudañcati |
jvalayati sphuṭamātapamurmurairanubhavaṃ vacasā sakhi lumpasi || 106 ||
[Analyze grammar]

ayi śape hṛdayāya avaiva tadyadi vidhorna rucerasi gocaraḥ |
ruciphalaṃ sakhi dṛśyata eva tajjvalayati tvacamullalayatyasūn || 107 ||
[Analyze grammar]

vidhuvirodhititherabhidhāyinīṃ nanu na kiṃ punaricchasi kokilām |
sakhi kimarthagaveṣaṇayā giraṃ kirati seyamanarthamayīṃ mayi || 108 ||
[Analyze grammar]

hṛdaya eva tavāsti sa vallabhastadapi kiṃ damayanti viṣīdasi |
hṛdi paraṃ na bahiḥ khalu vartate sakhi yatastata eva viṣadyate || 109 ||
[Analyze grammar]

sphuṭati hāramaṇau madanoṣmaṇā hṛdayamapyanalaṃkṛtamadya te |
sakhi hatāsmi tadā yadi hṛdyapi priyatamaḥ sa mama vyavadhāpitaḥ || 110 ||
[Analyze grammar]

idamudīrya tadaiva mumūrccha sā manasi mūrcchitamanmathapāvakā |
kva sahatāmavalambalavacchidāmanupapattimatīmatiduḥkhitā || 111 ||
[Analyze grammar]

adhita kāpi mukhe salilaṃ sakhī pyadhita kāpi sarojadalaiḥ stanau |
vyadhita kāpi hṛdi vyajanānilaṃ vyadhita kāpi himaṃ sutanostanau || 112 ||
[Analyze grammar]

upacacāra ciraṃ mṛduśītalairjalajanālamṛṇālajalādibhiḥ |
priyasakhīnivahaḥ sa tathā kramādiyamavāpa yathā laghu cetanam || 113 ||
[Analyze grammar]

atha kale kalaya śvasiti sphuṭaṃ calati pakṣma cale paribhāvaya |
adharakampanamunnaya menake kimayi jalpati kalpalate śṛṇu || 114 ||
[Analyze grammar]

racaya cārumate stanayorvṛtiṃ kalaya keśini kaiśyamasaṃyatam |
avagṛhāṇa taraṅgiṇi netrayorjalajharāviti śuśruvire giraḥ || 115 ||
[Analyze grammar]

kalakalaḥ sa tadālijanānanādudalasadvipulastvariteritaiḥ |
yamadhigamya sutālayamīyvāndhṛtadaraḥ sa vidarbhapuraṃdaraḥ || 116 ||
[Analyze grammar]

kanyāntaḥ purabādhanāya yadadhīkārānna doṣā nṛpaṃ dvau mantripravaraśca tulyamagadaṃkāraśca tāvūcatuḥ |
devākarṇaya suśrutena carakasyoktena jāne'khilaṃ syādasyā naladaṃ vinā na dalane tāpasya ko'pi kṣamaḥ || 117 ||
[Analyze grammar]

tābhyāmabhūdyugapadapyabhidhīyamānaṃ bhedavyapākṛti mithaḥ pratighātameva |
śrotre tu tasya pavaturnṛpaterna kiṃcidbhaimyāmaniṣṭaśataśaṅkitayākulasya || 118 ||
[Analyze grammar]

drutavigamitaviprayogacihnāmapi tanayāṃ nṛpatiḥ padapraṇamrām |
akalayadasamāśugādhimagnāṃ jhaṭiti parāśayavedino hi vijñāḥ || 119 ||
[Analyze grammar]

vyataradatha pitāśiṣaṃ sutāyai nataśirase sahasonnamayya maulim |
dayitamabhimataṃ svayaṃvare tvaṃ guṇamayamāpnuhi vāsaraiḥ kiyadbhiḥ || 120 ||
[Analyze grammar]

tadanu sa tanujāsakhīravādīttuhinaṛtau gata eva hīdṛśīnām |
kusumamapi śarāyate śarīre taducitamācaratopacāramasyāḥ || 121 ||
[Analyze grammar]

katipayadivasairvayasyayā vaḥ svayamabhilaṣya variṣyate varīyān |
ṛśimaśamanayānayā tadāptuṃ rucirucitātha bhavidvidhāvidhābhiḥ || 122 ||
[Analyze grammar]

evaṃ yadvadatā nṛpeṇa tanayā nāpṛcchi lajjāspadaṃ yanmohaḥ smarabhūrakalpi vapuṣaḥ pāṇḍutvatāpādibhiḥ |
yaccāśīḥ kapaṭādavādi sadṛśī syāttatra yā sāntvanā tanmatvālijano manobdhimatanodānandamandākṣayoḥ || 123 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣube jitendriyacayaṃ māmalladevī ca yam |
turyaḥ sthairyavicāraṇaprakaraṇabhrātaryayaṃ tanmahākāvye'tra vyagalannalasya carite sargo nisargojjvalaḥ || 124 ||
[Analyze grammar]