Chapter 10 - Hiraṇyapāṇi-avadāna

athāśoko mahīpāla upaguptaṃ jināṃśajaṃ |
kṛtāṃjalipuṭo natvā punarevamabhāṣata || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
yathā te guruṇā khyātaṃ tathā vaktuṃ samarhasi || 2 || {2}
[Analyze grammar]

evaṃ tena nṛpendreṇa prārthite sa jinātmajaḥ |
upagupto mahābhijñastaṃ nṛpaṃ caivamabravīt || 3 || {3}
[Analyze grammar]

śṛṇu rājaṃstathā vakṣye yathā me guruṇoditaṃ |
śrutvā caivaṃ sadā bodhicaryāṃ cara samāhitaḥ || 4 || {4}
[Analyze grammar]

puraikasamaye 'sau ca śākyamunistathāgataḥ |
sarvajñaḥ sugato nāthaḥ śāstā traidhātukādhipaḥ || 5 || {5}
[Analyze grammar]

sarvavidyādhipastāyī ṣaḍabhijño munīśvaraḥ |
jino 'rhaṃ bhagavānbuddho dharmarājo vināyakaḥ || 6 || {6}
[Analyze grammar]

śrāvastyāṃ vahirudyāne jetavane jināśrame |
anāthapiṇḍadārāme vihāre maṇimaṇḍite || 7 || {7}
[Analyze grammar]

bhikṣubhiḥ śrāvakaiḥ sārddhaṃ bhikṣuṇībhirupāsakaiḥ |
triratnopāsikābhiśca cailakaiśca śubhāśayaiḥ || 8 || {8}
[Analyze grammar]

bodhisatvagaṇaiścāpi sahānyaiśca maharṣibhiḥ |
osaddharmadeśanāṃ datvā tasthau lokahitārthataḥ || 9 || {9}
[Analyze grammar]

tatsaddharmāmṛtaṃ pātuṃ prājagmuḥ sadguṇārthinaḥ |
devā daityāśca nāgāśca yakṣagaṃdharvakinnarāḥ || 10 || {10}
[Analyze grammar]

siddhavidyādharādyāśca lokapālagaṇādayaḥ |
brāhmaṇāḥ kṣatriyāścāpi vaiśyāḥ śūdrāśca maṃtriṇaḥ || 11 || {11}
[Analyze grammar]

amātyāḥ śreṣṭhinaścāpi dhaninaśca mahājanāḥ |
vaṇijaḥ sārthavāhāśca tadanye 'pi ca sajjanāḥ || 12 || {12}
[Analyze grammar]

paurā jānapadāścāpi sarve te samupāgatāḥ |
taṃ buddhaṃ sugataṃ natvā pūjayitvā samaṃtataḥ || 13 || {13}
[Analyze grammar]

parivṛtya paraskṛtya tasthuḥ sāṃjalayo mudā |
athāsau bhagavāndṛṣṭvā tān sarvān samupāsthitān |
ādimadhyāntakalyāṇaṃ dideśa dharmamuttamaṃ || 14 || {14}
[Analyze grammar]

tatsaddharmāmṛtaṃ pītvā sarve satvāḥ surādayaḥ |
harṣitā anumodanto vabhūvurbodhicāriṇaḥ || 15 || {15}
[Analyze grammar]

evaṃ nityaṃ ca te satvāḥ pītvā dharmāmṛtaṃ muneḥ |
triratnaśaraṇaṃ gatvā bhejire samupāśritāḥ || 16 || {16}
[Analyze grammar]

tadaiva samaye tasyāṃ śrāvastyāṃ puri saṃsthitaḥ |
āsīdgṛhapatiḥ prāḍhyo mahābhogyasamṛddhimān || 17 || {17}
[Analyze grammar]

kuvelavanmahāśrīmān suvistīrṇaparigrahaḥ || 18 || {18}
[Analyze grammar]

śrāddho dātā mahābhogī sarvalokahitārthabhṛt |
evaṃ maharddhikasyāpi tasya gṛhapateściraṃ |
na putro na ca putrī vā samudapādi daivataḥ || 19 || {19}
[Analyze grammar]

tato 'putro gṛhastho 'sau vaṃśavichinnakheṭitaḥ |
kapolaṃ svakare sthāpya viṣādyaivaṃ vyacintayat || 20 || {20}
[Analyze grammar]

anekadhanaratnādyāḥ saṃpado me maharddhikāḥ |
viśālaparivārāśca vidyante suparigrahāḥ || 21 || {21}
[Analyze grammar]

putro me duhitā vāpi vidyate na kathaṃ cana |
saṃpado 'pi nirarthāḥ syuryato bhoktā na vidyate || 22 || {22}
[Analyze grammar]

hā hā sarvaṃ vinaṣṭaṃ syād yato me santatirna hi |
kiṃ me 'nayā samṛddhyāpi yatra vaṃśo na vidyate || 23 || {23}
[Analyze grammar]

vyarthameva mayā dravyaṃ kaṣṭena samupārjitaṃ |
kiṃ kariṣyāmi taddravyaṃ sarvathā maraṇe sati || 24 || {24}
[Analyze grammar]

ke hi grastā na saṃsāre mṛtyusarppeṇa jaṃtavaḥ |
mayi mṛtyuprayāte 'tra saṃskāraṃ kaḥ kariṣyati || 25 || {25}
[Analyze grammar]

durgatiśodhanaṃ kaśca piṇḍamekaṃ pradāsyati |
nūnaṃ madatyayād rājā sarvasvamāhariṣyati || 26 || {26}
[Analyze grammar]

tadā nāmāpi me loke na kaścana grahīṣyati |
yadarthameva saṃpattīḥ sādhayāmi prayatnataḥ || 27 || {27}
[Analyze grammar]

tadeva yadi nāstyevaṃ tatkiṃ me syātsujīvite || 28 || {28!}
[Analyze grammar]

varamevādya mṛtyurna mithyācirajīvanaṃ |
yasmācciramapi sthitvā mṛtyuduḥkhaṃ tadaiva hi || 29 || {29}
[Analyze grammar]

tanme bhogye 'pi vāṃchā na bhuktvāpi kiṃ sukhaṃ vinā |
aputrasya sukhaṃ naiva paratreha niranvayāt || 30 || {30}
[Analyze grammar]

tanme janmāpi vyarthaṃ syāddhyaputro 'smi niranvayāt |
hā hato 'haṃ svadaivena kiṃ mayātra kariṣyate || 31 || {31}
[Analyze grammar]

kasyāgre saṃvadiṣyāmi ko me buddhiṃ pradāsyati |
kasyāhaṃ śaraṇaṃ yāsye ko māṃ samuddhariṣyati || 32 || {32}
[Analyze grammar]

iti cintāviṣaṇno 'sau tasthau koṣṭhe yathāturaḥ |
nirutsāhī gṛhānnaiva nirapāyātkadācana || 33 || {33}
[Analyze grammar]

etaccintāviṣaṇṇābhaṃ taṃ gṛhasthaṃ suhṛjjanāḥ |
dṛṣṭvaiva sahasopetya bodhayituṃ samabruvan || 34 || {34}
[Analyze grammar]

kiṃ te duḥkhaṃ samutpannaṃ kenaivaṃ tiṣṭhase sakhe |
vaktavyaṃ cettadā āśu sarvathā vaktumarhasi || 35 || {31}
[Analyze grammar]

iti pṛṣṭe suhṛdbhistairgṛhasthaḥ sa viniśvasan |
tān sarvān suhṛdo dṛṣṭvā tadduḥkhaṃ samudāharat || 36 || {36}
[Analyze grammar]

suhṛdo me bhavanto hi tanmayātra pracakṣyate |
saṃpattirmahatī me 'sti putro naiva sutāpi naḥ || 37 || {37}
[Analyze grammar]

tena me saṃpadaḥ sarvā vinakṣyanti nirarthitāḥ |
etaccintāviṣārttāhaṃ tiṣṭhāmi putravāṃchitaḥ || 38 || {38}
[Analyze grammar]

aputrasya sukhaṃ nāsti paratreha samaṃtataḥ |
tanme janmāpi vyarthaṃ syādaputrasya niranvayāt || 39 || {39}
[Analyze grammar]

tathā hato 'haṃ svadaivena kiṃ mayātra cariṣyate |
iti tenodite sarve jñātivaṃdhusuhṛjjanāḥ || 40 || {40}
[Analyze grammar]

tasya grīhapateścaivāṃ tadupāyaṃ samādiśat |
kiṃ bhadrātra viṣādena yatra devādhikāratā || 41 || {41}
[Analyze grammar]

tathāpi kriyatāṃ yatnaṃ klaibyaṃ tyaktvā tvayādhunā |
yadaśakyaṃ valairdravyaistadupāyena śakyate || 42 || {42}
[Analyze grammar]

tasmātklaibyamiha tyaktvā kuru yatnaṃ samāhitaḥ |
devatārādhanāṃ kṛtvā sarvakāryaṃ hi sādhayet || 43 || {43}
[Analyze grammar]

tadādau devatāḥ pūjya yācasva putramātmanā |
tato devaprasādena tavadharmānubhāvataḥ |
putro vā duhitā vāpi samupapatsyate dhruvaṃ || 44 || {44}
[Analyze grammar]

tataste saṃtatiścaivaṃ varddhiṣyati kramāttathā |
tadāpi bhṛśato muktaḥ sadgatiṃ samavāpnuyāt || 45 || {45}
[Analyze grammar]

iti taiḥ samupādiṣṭaṃ śrutvāsāvanumoditāḥ |
devatārādhanaṃ kartuṃ prayatātmā samārabhat || 46 || {46}
[Analyze grammar]

pūjāṃgaiḥ pūjayitvaivaṃ brahmāṇaṃ harimīśvaraṃ |
iṃdrādilokapālānāṃ saṃtatiṃ samayācata || 47 || {47}
[Analyze grammar]

evaṃ putrābhilāsī sa sadā ca santatīchayā |
devatārādhanaṃ kṛtvā tasthau nityaṃ samutsukaḥ || 48 || {48}
[Analyze grammar]

nityamevaṃ kṛtasyāpi tasya daivapraṇāmataḥ |
na putro duhitā vāpi nodapādi cirādapi || 49 || {49}
[Analyze grammar]

tathā cāpi gṛhastho 'sau devatāsu nirāśayā |
santatyucchinnacintārttastasthau bhūyo viṣāditaḥ || 50 || {50}
[Analyze grammar]

tataḥ kaścitsuhṛtsādhuḥ saṃbuddhopāsakaḥ sudhīḥ |
taṃ gṛhasthamupāgatya tathaivaṃ paryabodhayat || 51 || {51}
[Analyze grammar]

sādho kinte viṣādena taddhīraṃ samupāśraya |
yadi te santatau vāṃchā tanme śrutvā tataścara || 52 || {52}
[Analyze grammar]

kimevaṃ devatāḥ pūjya yācase putramādarāt |
yatra daivādhikāratvaṃ tatra kiṃ devatā valaṃ || 53 || {53}
[Analyze grammar]

vaṃśārthe yadi te bhaktirastyevaṃ devatāsu tat |
saṃbuddhaśaraṇaṃ gatvā saddharmaṃ samupāśraya || 54 || {54}
[Analyze grammar]

tato dharmānubhāvena buddhasyāpi prasādataḥ |
nūnaṃ te satsutaḥ śīghramutpatsyati na saṃśayaḥ || 55 || {55}
[Analyze grammar]

yadi notpatsyate putrastava devavirodhataḥ |
puṇyamutpatsyate nūnaṃ tena sadgatimāpnuyāt || 56 || {56}
[Analyze grammar]

ye buddhaśaraṇaṃ yānti te labhanti śubhāśayaṃ |
ye viśuddhāśayā loke saddharmaṃ te śṛṇvanti hi || 57 || {57}
[Analyze grammar]

ye saddharmānuśṛṇvanto bodhicittaṃ labhanti te |
pralabdhabodhicittā ye te caranti guṇārthinaḥ || 58 || {58}
[Analyze grammar]

guṇakāmāśca ye loke te bhajanti jinātmajān |
bodhisatvānubhāvena bodhicaryāṃ samāpnuyuḥ || 59 || {59}
[Analyze grammar]

bodhicaryāratā ye ca na te gachaṃti durgatiṃ |
sarvakleśagaṇāñjitvā saukhyāvatīmavāpnuyuḥ || 60 || {60}
[Analyze grammar]

evaṃ matvā jinaṃ smṛtvā saddharmaṃ samupāśrayeḥ |
tataste saṃbhavedbhadramihāmutrāpi sarvataḥ || 61 || {61}
[Analyze grammar]

iti tenoditaṃ śrutvā gṛhastho 'sau 'numoditaḥ |
tatheti pratisaṃśrutya saṃbuddhaṃ smartumaichata || 62 || {62}
[Analyze grammar]

tato gṛhapatirnityaṃ sadāraḥ śraddhayānvitaḥ |
saṃbuddhaṃ sugataṃ smṛtvā vaṃśamevamayācata || 63 || {63}
[Analyze grammar]

namaste bhagavannātha bhavatāṃ śaraṇaṃ vraje |
tanmāṃ karuṇāya dṛṣṭyā draṣṭumarhasi sarvathā || 64 || {64}
[Analyze grammar]

bhavāneva hi jagannāthaḥ sarvasatvahitārthadaḥ |
tvayā mahyaṃ hitārthāya satputraṃ dātumarhasi || 65 || {65}
[Analyze grammar]

ityevaṃ sa gṛhī sādhuḥ putrābhilaṣitaḥ sadā |
sabhāryaḥ sugataṃ smṛtvā tathā nityaṃ samutsukaḥ || 66 || {66}
[Analyze grammar]

tadaiva samaye kaściddevaputro divaścyutaḥ |
sa saṃbuddhānubhāvena tadbhāryāgarbhamāviśat || 67 || {67}
[Analyze grammar]

tataḥ svāpannasatvābhūtsā bhāryā gṛhiṇaḥ satī |
dohadalakṣaṇopetā kṛśāṅgī bhāvinī kramāt || 68 || {68}
[Analyze grammar]

pravṛddhagarbhā sā dṛṣṭvā svayaṃ ca garbhamādarāt |
dakṣapārśvagataṃ satvaṃ matvā caivaṃ vyaciṃtayat || 69 || {69}
[Analyze grammar]

nūnaṃ me jāyate garbhe satvo buddhānubhāvataḥ |
yadayaṃ dakṣiṇe vartti tena putro bhavetkhalu || 70 || {70}
[Analyze grammar]

iti niścitya sā nārī putrotpatyāśayā mudā |
svasvāmino pure sthitvā rahasyaivaṃ nyavedayat || 71 || {71}
[Analyze grammar]

dṛṣṭyāryaputra varddhasva yadahaṃ garbhiṇī bhave |
nūnamayaṃ bhavetputro yatsthito dakṣiṇodare || 72 || {72}
[Analyze grammar]

iti bhāryoditaṃ śrutvā sa gṛhasthaḥ pramoditaḥ |
daksiṇaṃ vāhumunnamya nandannevamudānayat || 73 || {73}
[Analyze grammar]

cirābhilaṣitaṃ putramukhaṃ paśyeyaṃ sāṃprataṃ |
jātaḥ syānnāmajātā me kulavaṃśasthitirbhavet || 74 || {74}
[Analyze grammar]

kṛtyāni ca prakurvīta bibhṛyādbharaṇaṃ prati |
nūnaṃ buddhānubhāvena satputro 'pi bhaviṣyati || 75 || {75}
[Analyze grammar]

yadasmākaṃ kṛtaṃ pūrvaṃ karma dānādikaṃ śubhaṃ |
etatpuṇyānubhāvena bhavetkuśalametayoḥ || 76 || {76}
[Analyze grammar]

tatastena sadā bharttā saha saṃmodacāriṇī |
pathyāhāropacāraiśca varddhito sukhacāriṇī || 77 || {77}
[Analyze grammar]

tataḥ sā samaye sūta putraṃ divyātisuṃdaraṃ |
darśanīyaṃ susaumyāṅgaṃ prāsādikaṃ manoharaṃ || 78 || {78}
[Analyze grammar]

sarvāṅgalakṣaṇopetaṃ sadīnārakaradvayaṃ |
sarvasatvamanāpīśamabhirūpaṃ subhadrikaṃ || 79 || {79}
[Analyze grammar]

tataḥ sā jananī tasya vālakasya karadvayaṃ |
dīnārāṃkitamālokya saharṣaṃ vismitābhavat || 80 || {80}
[Analyze grammar]

tato 'sau janakaścāpi jātaṃ putramahādbhutaṃ |
sakhībhirveditaṃ śrutvā vismito draṣṭumāyayau || 81 || {81}
[Analyze grammar]

tataḥ prajāpatiḥ sāpi vismito svāmino 'grataḥ |
darśayitvā sutaṃ putraṃ śaṃkitaivaṃ nyavedayat || 82 || {82}
[Analyze grammar]

svāmiṃ paśya mahāścaryamasya hemānvitau karau |
tacchubhaṃ vāpyaśubhaṃ vā darśayitvā vicāraya || 83 || {83}
[Analyze grammar]

iti bhāryoditaṃ śrutvā dṛṣṭvā taṃ vālakaṃ ciraṃ |
dīnāraṃ bhujayoḥ paśyaṃ tasthau savismayānvitaḥ || 84 || {84}
[Analyze grammar]

tatastasya gṛhastho 'sau nimittaṃ jñātumādarāt |
naimittikaṃ samāhūya dārakaṃ tamadarśayat || 85 || {86}
[Analyze grammar]

bhavanto dṛśyatāmasya dārakasya karadvayaṃ |
tannimittaṃ parijñāya tatphalaṃ vaktumarhatha || 86 || {86}
[Analyze grammar]

ityukte tena te sarve dṛṣṭvā taṃ dārakaṃ śubhaṃ |
dīnāre bhujayoścāpi parijñāyaivamabravīt || 87 || {87}
[Analyze grammar]

sādho gṛhapate hyasya dārakasya karadvayaṃ |
suvarṇalakṣaṇopetaṃ tatte bhadraṃ bhavetkhalu || 88 || {88}
[Analyze grammar]

tavāyaṃ dārako dātā maheśākhyo bhavetkila |
svahastaṃ saṃprasāryaiva hemavṛṣṭiṃ kariṣyati || 89 || {89}
[Analyze grammar]

apanīya svayaṃ hastādidaṃ dīnāramarpayet |
apanīte punaranyatprādurbhavettato 'dhikaṃ || 90 || {90}
[Analyze grammar]

ityevaṃ taiḥ samādiṣṭaṃ śrutvā saṃharṣito gṛhī |
tato jātimahaṃ kṛtvā jñātīnevamabhāṣata || 91 || {91}
[Analyze grammar]

bhavanto dārakasyāsya śubhākṣarasamanvitaṃ |
nāmadheyaṃ yathāyogyaṃ kriyatāṃ saṃprasiddhitaṃ || 92 || {92}
[Analyze grammar]

iti tenārthitaṃ śrutvā sarve te jñātayastathā |
dṛṣṭvā tasya nimittāni saṃmatenaivamabruvan || 93 || {93}
[Analyze grammar]

yasmāddhastadvayo 'pyasya hiraṇyenopalakṣitaṃ |
tannāmnā prasiddho 'stu hiraṇyapāṇirityayaṃ || 94 || {94}
[Analyze grammar]

evaṃ jñātisamudiṣṭaṃ śrutvāsau sa gṛhādhipaḥ |
tatheti tasya putrasya cakre nāmavyavasthitaṃ || 95 || {95}
[Analyze grammar]

tato hiraṇyapāṇiḥ sa dārakaḥ pratipālane |
aṣṭāsu yo 'pi dhātrīṣu tena pitrā samarpitaḥ || 96 || {96}
[Analyze grammar]

tābhiḥ prapālyamāno 'sau pathyapuṣṭopacāraṇaiḥ |
varddhito 'bhūtkramādāśu hradasthamiva paṃkajaṃ || 97 || {97}
[Analyze grammar]

tathā kramātpravṛddho 'sau hiraṇyapāṇirātmavit |
śrāddho bhadrāśayo dhīmān svaparārthahitārthikaḥ || 98 || {98}
[Analyze grammar]

tataḥ sa śikṣituṃ vidyāḥ sadguruṃ samupāśrayat |
kramātteṣāṃ prasādācca vidyāpāraṃ yayau laghuḥ || 99 || {99}
[Analyze grammar]

tato 'sau dārako vidvāndātā śraddhāsamanvitaḥ |
svahastaṃ saṃprasāryaiva dadau dānaṃ yathepsitaṃ || 100 || {100}
[Analyze grammar]

gurubhyo brāhmaṇebhyaśca yācakebhyaḥ sa dārakaḥ |
svahastaṃ saṃprasāryaiva dadau hemaṃ yathepsitaṃ || 101 || {1}
[Analyze grammar]

tathā taddānamākarṇya śravaṇabrāhmaṇādayaḥ |
arthino dhanalubdhāśca saṃpratīyuḥ samaṃtataḥ || 102 || {2}
[Analyze grammar]

tathā taṃ samupetyaivaṃ sarvadigbhyaḥ samāgatāḥ |
vālāvṛddhādayo dīnā yayācire yathepsitaṃ || 103 || {3}
[Analyze grammar]

tadā hiraṇyapāṇiḥ sa dṛṣṭvaitānarthino mudā |
sarvopakaraṇaiścāpi sarvāṃstān samatoṣayat || 104 || {4}
[Analyze grammar]

tataste yācakāḥ sarve tenaiva paritarpitāḥ |
yathechayā sukhaṃ bhuktvā pracerurdharmamānasā || 105 || {5}
[Analyze grammar]

tathā vīthigataścaivaṃ hastadvayaṃ prasārya saḥ |
hemarāśiṃ samutthāpya sarvebhyaḥ pradadau mudā || 106 || {6}
[Analyze grammar]

tathā sarve 'pi te lokā dhanāḍhyāḥ sukhino 'bhavan |
naiko 'bhūtkṛpano duḥkhī no 'pi kaściddaridritaḥ || 107 || {7}
[Analyze grammar]

sarve 'pi dhaninaḥ prāḍhyā dātāro bhogino 'bhavan |
satyadharmānuraktāśca saddharmaśravaṇārthinaḥ || 108 || {8}
[Analyze grammar]

tadā tasyaiva tatkīrttiḥ sarvatra bhuvaneṣvapi |
lokairudgīryamāno 'sau prasasāra samaṃtataḥ || 109 || {9}
[Analyze grammar]

taddṛṣṭvā brāhmaṇo lobhī mātsaryaprahatāśayaḥ |
tad yaśaḥ pratilabdhaṃ sa manasaivaṃ vyacintayat || 110 || {10}
[Analyze grammar]

yadasya bhujayorhema cintāmaṇisamaṃ khalu |
tenāyaṃ bhavate śrīmānprārthitārthādhikapradaḥ || 111 || {11}
[Analyze grammar]

yaccāyaṃ dārakaḥ śrāddhaḥ prārthanāsaṃpradāyakaḥ |
tadahaṃ prārthanāṃ kṛtvā pratigṛhṇīya tatmaṇiṃ || 112 || {12}
[Analyze grammar]

ityasau manasā dhyatvā lobhākṛṣṭo tvarānvitaḥ |
taṃ hiraṇyabhujaṃ pretya taddīnāraṃ samayācata || 113 || {13}
[Analyze grammar]

jayo 'stu te sadā sādho dīrghāyuśca sumaṃgalaṃ |
tathaiva tvaṃ sadā bhūyā arthināṃ kalpapādapaḥ || 114 || {14}
[Analyze grammar]

tvatkīrttyā samāhūtaḥ prāgato 'smi yadāśayā |
tadarthaṃ pūrayitvā me cittaṃ harṣaya sarvataḥ || 115 || {15}
[Analyze grammar]

ityevaṃ prārthite tena vipreṇābhipragalbhinā |
dṛṣṭvā hiraṇyapāṇiḥ sa taṃ vipraṃ pratyabhāṣata || 116 || {16}
[Analyze grammar]

sādhu vipra prasīda tvaṃ yadarthaṃ samupāgataḥ |
tadarthaṃ saṃpradatvādya harṣayiṣyāmi te manaḥ || 117 || {17}
[Analyze grammar]

tacchaṃkā mā kṛthā hyatra yad yatte hṛdi rocate |
tattannūnaṃ pradāsye te tadvadasva yadīhitaṃ || 118 || {18}
[Analyze grammar]

iti tenoditaṃ śrutvā vipro 'sau saṃpraharṣitaḥ |
svastītyāśīrvaco datvā taddīnāramayācata || 119 || {19}
[Analyze grammar]

sādho hiraṇyapāṇe yattava hastasamudbhavaṃ |
taddīnāraṃ pradatvā me cittaṃ saṃharṣayārthadaḥ || 120 || {20}
[Analyze grammar]

iti tenoditaṃ śrutvā tatpitāsau suvismitaḥ |
savandhujñātimitrastaṃ putramevamabhāṣata || 121 || {21}
[Analyze grammar]

śṛṇu putra mayā proktaṃ tavaiva hitakāraṇaṃ |
yadi te svāminī prītistatkarttavyaṃ hi sarvathā || 122 || {22}
[Analyze grammar]

tvaṃ hi putra mayā labdhaḥ saṃbuddhasyānubhāvataḥ |
tatsaṃbuddhaśāsane kāryameva dātu samarhasi || 123 || {23}
[Analyze grammar]

yaccedanbhujayorjātaṃ dīnāraṃ maṇisaṃnibhaṃ |
tadapi sugatasyaiva prabhāvānmanyatāṃ khalu || 124 || {24}
[Analyze grammar]

yaccedaṃ te karodbhūtaṃ jīvitaṃ sahajendriyaṃ |
tatsvakarātsamuddhṛtya kathaṃ dadyā dvijātaye || 125 || {25}
[Analyze grammar]

yadīdaṃ dāsyate hastātsamuddhṛtya valādapi |
tadā te jīvitaṃ vāpi sahānena vrajaṃ khalu || 126 || {26}
[Analyze grammar]

tasmādevaṃ parijñāya yadi te jīvita priyaṃ |
tadevaṃ sahajaṃ hema mā pradāhi dvijātaye || 127 || {27}
[Analyze grammar]

tadanyaddīyatāṃ tasmai yad yadvastu samīchitaṃ |
idaṃ tu sarvathānyasmai dātavyaṃ naiva yatnataḥ || 128 || {28}
[Analyze grammar]

yenaiva tvaṃ maheśākhyo sarvārthiprārthitārthadaḥ |
tena yadā paribhraṣṭastadā kiṃ tena manyase || 129 || {29}
[Analyze grammar]

yenāpi ca tvayā sarve yācakāḥ saṃpratarpitāḥ |
taccintāmaṇisāmānyaṃ kathaṃ dātuṃ samichasi || 130 || {30}
[Analyze grammar]

yattvayā sukṛtaṃ karma prakṛtvā puṇyamācitaṃ |
nūnaṃ tasya vipākatvaṃ bhuṃjayoste pratiṣṭhitaṃ || 131 || {31}
[Analyze grammar]

tasmādidaṃ mahāratnaṃ kasmiñcinmā pradīyatāṃ |
datvā tvidaṃ mahāratnaṃ kimanyal labdhamichasi || 132 || {32}
[Analyze grammar]

yadi tvidaṃ mahāratnaṃ dātumevaṃ pratiṣṭhitaṃ |
saṃpradehi jinendrāya tatpuṇyamakṣayaṃ vahuṃ || 133 || {33}
[Analyze grammar]

puṇyena labhyate janma śuddhavamṣe mahatkule |
puṇyena dīyate kīrttiṃ nirvṛtiṃ ca samāpnuyāt || 134 || {34}
[Analyze grammar]

yadi puṇye 'sti te vāṃchā tadbuddhaśaraṇaṃ gataḥ |
dehi buddhānuśāsinyā taddānaṃ hi mahatphalaṃ || 135 || {35}
[Analyze grammar]

tato nityaṃ sukhaṃ bhuktvā kṛtvā saṃbodhisādhanaṃ |
kramādbodhicariṃ prāpte nirvṛtiṃ vā samāpnuyāḥ || 136 || {36}
[Analyze grammar]

iti pitrā samādiṣṭaṃ śrutvāsau hemabhṛtsudhīḥ |
tatheti niścayaṃ kṛtvā punarevamabhāṣata || 137 || {37}
[Analyze grammar]

satyaṃ tāta tvayādiṣṭaṃ tatsarvaṃ hitameva me |
tasmāttathā cariṣyāmi tvadājñāṃ śirasā vahan || 138 || {38}
[Analyze grammar]

kiṃ tu satyaṃ mayā proktāmidaṃ dātuṃ dvijātaye |
tatkathamanyathā kṛtvā puṇyameva samāpnuyāt || 139 || {39}
[Analyze grammar]

tatsatyaṃ pūraṇe tāta pradadyāmi mamātmanaḥ |
atha na dāsyate hyatra kiyatkālaṃ hi jīvitaṃ || 140 || {40}
[Analyze grammar]

yadidaṃ bhujayorhemaṃ mamātmasahasaṃbhavaṃ |
tathaivaṃ sahajīvena vinakṣyati na saṃśayaḥ || 141 || {41}
[Analyze grammar]

yathedaṃ tu mahāratnaṃ mama devasamudbhavaṃ |
tathaivaṃ saṃpradatvāsmai punaḥ prāpsyāmi te 'dhikaṃ || 142 || {42}
[Analyze grammar]

yathā buddhānubhāyena saṃjātaṃ karayoridaṃ |
tathā satyānubhāvena punaranyajjaniṣyate || 143 || {43}
[Analyze grammar]

dharmeṇa tuṣyate buddho mūlaṃ dharmasya satyavāk |
tatsatyapāraṇārthena dāsyāmyahamidaṃ maṇiṃ || 144 || {44}
[Analyze grammar]

satyaṃ vinā na phullante puṇyāni prakṛtānyapi |
mlānibhūtāni naśyante śasyānīvāmṛtaṃ vinā || 145 || {45}
[Analyze grammar]

satyena varddhate dharmaṃ dharmeṇa pālyate naraḥ |
dharmiṣṭhaḥ sadgatiṃ yāti tasmātsatyaṃ mahadvalī || 146 || {46}
[Analyze grammar]

tasmātsatyavalenātra yaśodharmārthalabdhaye |
sarvathāsmai pradāsyāmi mā kṛthāstaṃ nivāraṇaṃ || 147 || {47}
[Analyze grammar]

iti putravacaḥ śrutvā pitā sa vismayānvitaḥ |
tathetyabhyanumoditvā tasthau tūṣṇī vilokayan || 148 || {48}
[Analyze grammar]

tato hiraṇyapāṇiḥ sa matvā pitrādhivāsitaṃ |
taddīnāraṃ sahasotkṛtya viprāya pradadau mudā || 149 || {49}
[Analyze grammar]

tatpradattamasau vipraḥ pratigṛhya pramoditaḥ |
datvāśīrvacanaṃ tasmai svagṛhaṃ sahasā yayau || 150 || {50}
[Analyze grammar]

tataścānantaraṃ tasya bhuje 'nyattadguṇādhikaṃ |
dīnāraṃ divyaratnābhaiḥ prādurāsīnmahādbhutaṃ || 151 || {51}
[Analyze grammar]

taddattānaṃtarodbhūtaṃ dīnāraṃ tadguṇādhikaṃ |
dṛṣṭvā śrutvā ca sarve te lokā āśu suvismitāḥ || 152 || {52}
[Analyze grammar]

tato hiraṇyapāṇiḥ sa evaṃ lokānpraharṣayan |
saṃbuddhaśāsane dātuṃ jetavanamupācarat || 153 || {53}
[Analyze grammar]

tatra bhikṣūnyatīndṛṣṭvā saddharmacaraṇotsukaḥ |
saṃbuddhaṃ sugataṃ draṣṭuṃ vihāraṃ samupāviśat || 154 || {54}
[Analyze grammar]

tatrāsau bhagavantaṃ tamadrākṣītsamitisthitaṃ |
dvātriṃśallakṣaṇāśītivyaṃjanaiḥ parimaṃḍitaṃ || 155 || {55}
[Analyze grammar]

vyāmaprabhāsamujvālaṃ sahasreṇādhikaprabhaṃ |
śānteṃdriyaṃ subhadrāṃgaṃ saumyarūpaṃ manoharaṃ || 156 || {56}
[Analyze grammar]

dṛṣṭvāsau suprasannātmā sahasā samupāgataḥ |
natvā pādau munestasya purastātsamupāśrayan || 157 || {57}
[Analyze grammar]

tatrāsau bhagavāntasya dṛṣṭvāśayaviśuddhatāṃ |
ādimadhyāntakalyāṇaṃ dideśa dharmamuttamaṃ || 158 || {58}
[Analyze grammar]

taṃ dharmaṃ sugatādiṣṭaṃ śrutvāsau saṃpramoditaḥ |
ānaṃdaṃ samupāśritya praṇamyaivaṃ vyajijñapat || 159 || {59}
[Analyze grammar]

bhadanta dātumichāmi saṃghebhyo bhojanaṃ khalu |
tadājñāṃ dehi me śāsta yadi te 'sti kṛpā mayi || 160 || {60}
[Analyze grammar]

iti vijñāpite tena hiraṇyapāṇinā mudā |
sa ānaṃdaḥ samālokya dārakaṃ taṃ samādiśat || 161 || {61}
[Analyze grammar]

sādhu vatsa mahābhāgyādbhadramālocitaṃ tvayā |
yadyatra dāsyate bhojyaṃ kārṣāpaṇaṃ pradīyatāṃ || 162 || {62}
[Analyze grammar]

evaṃkṛte tu te vatsa maṃgalaṃ sarvadā bhavet |
ataśca durgatiṃ hitvā sadgatiṃ samavāpnuyāḥ || 163 || {63}
[Analyze grammar]

ityānaṃdasamādiṣṭe dārako 'sau pramoditaḥ |
svayaṃ hastau prasāryaiva hemarāśiṃ vyadhātpunaḥ || 164 || {64}
[Analyze grammar]

tāṃ dṛṣṭvā bhikṣavaḥ sarve vismitāḥ saṃpraharṣitāḥ |
taddravyaiḥ sādhayāmāsa bhojyāni surasāni ca || 165 || {65}
[Analyze grammar]

tataḥ sa dārako bhojyaistaiḥ praṇītasusādhitaiḥ |
saṃbuddhapramukhaṃ sarvasāṃghikaṃ samatoṣayat || 166 || {66}
[Analyze grammar]

tato 'sau bhojanānte ca saṃbuddhapramukhaṃ kramāt |
sarvasaṃghaṃ praṇamyaivaṃ punastasthau kṛtāṃjaliḥ || 167 || {67}
[Analyze grammar]

tataḥ śrībhagavāndṛṣṭvā tasyāśayaviśuddhatāṃ |
āryasatyaṃ samāyuktaṃ dideśa dharmamuttamaṃ || 168 || {68}
[Analyze grammar]

tacchrutvā hemapāṇiḥ sa satkāyadṛṣṭiparvataṃ |
prabhitvā jñānavajreṇa viṃśatiśikharodgataṃ || 169 || {69}
[Analyze grammar]

śrotāpattiphalaṃ prāpto dṛṣṭasatyo 'bhavattataḥ |
saṃbuddhasagaṇaṃ natvā svagehaṃ harṣito yayau || 170 || {70}
[Analyze grammar]

tatra sarvaṃ sa tadvṛttaṃ pitrorākhyāya harṣitaḥ |
pravrajyācaraṇānujñāṃ pitarau pratyayācata || 171 || {71}
[Analyze grammar]

cittaṃ me rocate tāta pravrajyāvratasādhane |
tadanujñāṃ pradattaṃ me hitaṃ mayi yadīcchatha || 172 || {72}
[Analyze grammar]

iti putroditaṃ śrutvā svātmajaṃ sa pitāvadat |
mā kṛthā sahasā putra pravrajyācaraṇe manaḥ || 173 || {73}
[Analyze grammar]

pravrajyācaraṇe bhaikṣyaṃ duḥkhināmeva tadvrataṃ |
tvaṃ vṛddhimānmahādātā tatpravrajyāṃ kutaścareḥ || 174 || {74}
[Analyze grammar]

kiṃ vāpyate vivāhastvaṃ daharaśca kumārikaḥ |
pravrajyā duṣkaraṃ sthānaṃ tatkathaṃ pracaretsutaḥ || 175 || {75}
[Analyze grammar]

tattāvattvaṃ yuvā putra vivāhitvā kulastriyaṃ |
bhuktvā saukhyaṃ yathākāmaṃ gṛhe dharmaṃ samācara || 176 || {76}
[Analyze grammar]

tato vaṃśaṃ samutpādya kulasthitiprasiddhaye |
kuladharmaṃ pratisthāpya tataḥ pravraja vārddhikaḥ || 177 || {77}
[Analyze grammar]

yadā vṛddho daridraśca pravrajyāṃ hi tadā caret |
yāvad yuvā samṛddhaśca tāvattvaṃ pravraja kathaṃ || 178 || {78}
[Analyze grammar]

saṃpattiḥ kṣaṇayauvanyametanmāravaladhruvaṃ |
tadetadā kathaṃ putra pravrajyāvratamācareḥ || 179 || {79}
[Analyze grammar]

ityetadduṣkaraṃ matvā pravrajyācaraṇe manaḥ |
sarvathā tvaṃ vinirvārya kuladharmaṃ samācara || 180 || {80}
[Analyze grammar]

tataste maṃgalaṃ nityaṃ imu putra bhaveddhruvaṃ |
yaśodharmasukhānvetya sadgatiṃ cāpyavāpnuyāḥ || 181 || {81}
[Analyze grammar]

iti pitroditaṃ śrutvā dārako 'sau viśaṃkitaḥ |
bodhayanpitaraṃ dharme punarevamabhāṣata || 182 || {82}
[Analyze grammar]

satyameva tathā tāta yadetadbhāṣyate tvayā |
tathāpi śrūyatāṃ tāta yadabhiprāyakaṃ mama || 183 || {83}
[Analyze grammar]

anityaṃ khalu saṃsāraṃ jīvitaṃ cāpi bhaṃguraṃ |
kṣaṇadhvaṃsi śarīraṃ ca kṣaṇasaṃpadghanopamaṃ || 184 || {84}
[Analyze grammar]

evaṃ paśyanahaṃ tāta saṃsārabhoganispṛhaḥ |
pravrajyāvratamāśritya prāptumichāmi nirvṛtiṃ || 185 || {85}
[Analyze grammar]

api ca dullabhaṃ janma mānuṣaṃ bhavacāriṇāṃ |
sarveṣāmapi jantūnāṃ maraṇaṃ sarvathā dhruvaṃ || 186 || {86}
[Analyze grammar]

mānuṣye labhyamāne tu kuto dharmānubhāvanā |
vinā dharmānubhāvena kathaṃ sadgatimāpnuyāt || 187 || {87}
[Analyze grammar]

saṃbuddho 'pi sasaṃgho 'yaṃ sthāsyati na sadeha ca |
anyatrāpi vrajennūnaṃ nirvṛtiṃ vā gamiṣyati || 188 || {88}
[Analyze grammar]

saṃbuddhe nirvṛtiṃ yāte saddharmo 'pi vinakṣyate |
saddharmāntargate loke mlechadharmavalī bhavet || 189 || {89}
[Analyze grammar]

mlechadharmavalīkrānte sarvatra bhūmimaṃḍale |
sarvalokāśca kāmāṃdhā bhaveyuḥ kleśamāninaḥ || 190 || {90}
[Analyze grammar]

tada dharmānusaṃvṛttau matiḥ kasyāpi no caret |
pravrajyāsaṃvaraṃ dhartuṃ kaḥ samartho bhaviṣyati || 191 || {91}
[Analyze grammar]

naiva saṃyujyate cittaṃ pravrajyāsaṃvaraṃ vinā |
aviśodhitacittātmā na yāyātparamāṃ gatiṃ || 192 || {92}
[Analyze grammar]

taccittaye viśuddhyarthaṃ nirvāṇapadalabdhaye |
pravrajyāsaṃvaraṃ dharttuṃ ichāmi tāta sāṃprataṃ || 193 || {93}
[Analyze grammar]

tad yadi me hitaṃ draṣṭumichasi tāta sarvadā |
tadanujñāṃ samādātumarhasi mātra cāraye || 194 || {94}
[Analyze grammar]

iti puroditaṃ śrutvā pitā sa paribodhitaḥ |
tathetyanumataṃ kṛtvābhavattūṣṇīvyavasthitaḥ || 195 || {95}
[Analyze grammar]

tadā tajjananī cāsau dṛṣṭvā taṃ sutamātmajaṃ |
snehādaśru vimocantī nivārayitumabravīt || 196 || {96}
[Analyze grammar]

hā putra kathamekānte māṃ vihāya kva yāsyase |
mā putra sahasā gacha kiṃcitkālaṃ vinodaya || 197 || {97}
[Analyze grammar]

yāvajjīvāmyahaṃ tāta tāvanmā gāḥ kuhāpi ca |
mṛtāyāṃ mayi bho putra tadā vrajasva vāṃchite || 198 || {98}
[Analyze grammar]

acireṇaiva māṃ mṛtyurgrahīṣyati na saṃśayaḥ |
tāvadeva gṛhe sthitvā dānaṃ kurvan sukhaṃ vasa || 199 || {99}
[Analyze grammar]

iti mātroditaṃ śrutvā putro 'sau parimoditaḥ |
natvā tāṃ jananīmevaṃ bodhayitumabhāṣata || 200 || {100}
[Analyze grammar]

yattvayāmve rudantyevaṃ mṛtyunāma prakīrtitaṃ |
tena me coditaṃ cittaṃ pravrajyāvratasādhane || 201 || {1}
[Analyze grammar]

dhruvaṃ janmavatāṃ mṛtyurmṛtānāṃ janma ca dhruvaṃ |
parivarttini saṃsāre mṛtaḥ ko hi na jāyate || 202 || {2}
[Analyze grammar]

dharmiṣṭho vīryāvāṃścāpi maraṇaṃ yāti sarvataḥ |
pāpiṣṭho nighnitaścāpi maraṇaṃ yāti sarvataḥ || 203 || {3}
[Analyze grammar]

dharmiṣṭhaḥ satsukhaṃ bhuktvā mṛto yātyeva sadgatiṃ |
pāpiṣṭho duḥkhatāṃ bhuktvā mṛto gachati durgatiṃ || 204 || {4}
[Analyze grammar]

yadā saṃtyajate jantuḥ saṃsāraprāṇavāyunā |
tadā saṃtyajyate sarvairvaṃdhumitrajanairapi || 205 || {5}
[Analyze grammar]

tadā na vidyate ko 'pi hitakārī sahānugaḥ |
dharma ekaḥ sahāyaḥ syātsarvatrāpi hitārthakṛt || 206 || {6}
[Analyze grammar]

tasmātmātaḥ prayatnena karttavyaṃ dharmamādarāt |
dharmeṇa rakṣyate sarva ihāmutra sahāpi hi || 207 || {7}
[Analyze grammar]

dharmeṇaivābhipālyante vālavṛddhāturādayaḥ |
dharmeṇa sudhṛtāḥ satvā nimagnā duḥkhasāgare || 208 || {8}
[Analyze grammar]

dharmeṇa jīyate duṣṭo dharmeṇa jīyate kaliḥ |
dharmeṇa jīyate rāgo mṛtyurdharmeṇa jīyate || 209 || {9}
[Analyze grammar]

dharmeṇa sukule janma lakṣmī dharmeṇa sthīyate |
vidyāyaśo 'rthamoksāśca prāpyante dharmataḥ khalu || 210 || {10}
[Analyze grammar]

dharmaṃ tu saugataṃ kāryaṃ sarvalokahitaṃkaraṃ |
sugatasyāpi dharmeṣu pravrajyādharmamuttamaṃ || 211 || {11}
[Analyze grammar]

yamāśritya mahāsatvā jitvā kleśagaṇān laghuḥ |
sākṣādarhatpadaṃ prāpya vrajanti nirvṛtiṃ parāṃ || 212 || {12}
[Analyze grammar]

iti matvā hi te sarve bhikṣavo bhavanispṛhāḥ |
pravrajyāvratamāśritya bhavanti brahmacāriṇaḥ || 213 || {13}
[Analyze grammar]

tathātrāhaṃ samichāmi pravrajyāvratamuttamaṃ |
tadanujñāṃ pradatvā me nātra kāryo viṣāditaḥ || 214 || {14}
[Analyze grammar]

yadi na dīyate 'nujñā tadapi no viyogataḥ |
akasmānmṛtyunā ghrāya grasiṣyati puro hi naḥ || 215 || {15}
[Analyze grammar]

tadā kiṃ te kariṣyāmi mamāpi kiṃ kariṣyasi |
kṛtvānuśocanāṃ caiva yāsyāmo maraṇaṃ dhruvaṃ || 216 || {16}
[Analyze grammar]

iti mātaḥ parijñāya tadanujñāṃ pradehi me |
viṣādaṃ mā kṛthā atra prasādīnī bhavetprabhu || 217 || {17}
[Analyze grammar]

tathā te maṃgalaṃ nityamihāmutrāpi saṃbhavet |
ahaṃ ca saugataṃ dharmaṃ dhṛtvā nirvṛtimāpnuyāṃ || 218 || {18}
[Analyze grammar]

iti putroditaṃ śrutvā mātāsau paribodhitā |
tathānumodanāṃ kṛtvā tasthau tūṣṇīvyavasthitān || 219 || {19}
[Analyze grammar]

atha hiraṇyapāṇiḥ saḥ pitrormatvābhisaṃmataṃ |
tayośca caraṇe natvā sahasā niryayau gṛhāt || 220 || {20}
[Analyze grammar]

tatra jñātigaṇāṃścāsau vandhumitrasuhṛjjanān |
kṛpaṇātithisaṃghādiṃ vāṃchitārthairatoṣayat || 221 || {21}
[Analyze grammar]

tato 'sau vāṃdhavān sarvān saṃtarpya paribodhayan |
āśu jetavanaṃ gatvā vihāraṃ samupāviśat || 222 || {22}
[Analyze grammar]

tatrāsau sugataṃ dṛṣṭvā kṛtāṃjalipuṭo mudā |
bhagavaṃtaṃ tamānamya pravrajyāṃ samayācata || 223 || {23}
[Analyze grammar]

namaste bhagavacchāsta bhavatāṃ caraṇaṃ vraje |
tatpravrajyāvrataṃ datvā brahmacaryaṃ pradehi me || 224 || {24}
[Analyze grammar]

iti tenārthite 'sau śrībhagavāntamabhāṣata |
ehi bhikṣo kumāra tvaṃ brahmacaryaṃ carehi sa || 225 || {25}
[Analyze grammar]

iti prokto munīndro 'sau pāṇinā tacchiraḥ spṛśan |
samyakpravājayitvāśu svasaṃghe taṃ samagrahīt || 226 || {26}
[Analyze grammar]

ehīti proktamātre 'pi jinendreṇa sa muṇḍitaḥ |
khikkhirīpātrahastābhūc lcīvaraprāvṛtaḥ sudhīḥ || 227 || {27}
[Analyze grammar]

tataḥ śikṣāsu śikṣitvā prāpyopasaṃpado 'pi ca |
vyāyacchadghaṭamānaśca samādhiṣu samāhitaḥ || 228 || {28}
[Analyze grammar]

tadidaṃ paṃcagaṃdaṃ ca bhavacakraṃ calācalaṃ |
viditvā sarvasaṃskāragatiścāpi vighāṭinī || 229 || {29}
[Analyze grammar]

bhiṃdan sarvamavidyāṅgaṃ prāpya vidyāḥ śubhaṃkarāḥ |
pratisaṃvidguṇaprāpto jitakleśagaṇo yatiḥ || 230 || {30}
[Analyze grammar]

sākṣādarhatpadaṃ prāpya vītarāgo jitendriyaḥ |
samaloṣṭasuvarṇaśca vāsīcaṃdanasaṃnibhaḥ || 231 || {31}
[Analyze grammar]

ākāśasamacittaśca nirvikalpo niraṃjanaḥ |
saṃsārabhogyasatkāralābhalobhasunispṛhaḥ || 232 || {32}
[Analyze grammar]

paṃcābhijñapadaprāpto caturbrahmavihārikaṃ |
sadevāsuramartyānāṃ traidhātukanivāsināṃ || 233 || {33}
[Analyze grammar]

pūjyo mānyo 'bhivaṃdyaśca babhūva sa hiraṇyabhṛt |
tataste bhikṣavaḥ sarve dṛṣṭvā taṃ dārakaṃ yatiṃ || 234 || {34}
[Analyze grammar]

vismitāḥ śrīghanaṃ natvā paprachustasya karmatāṃ |
bhagavan kena dharmeṇa hiraṇyapāṇirayaṃ sudhīḥ || 235 || {35}
[Analyze grammar]

sarvārthino hi saṃtarpya sākṣādarhanbhavatyapi |
iti tairbhikṣubhiḥ pṛṣṭe bhagavāntāntathābravīt || 236 || {36}
[Analyze grammar]

śrūyatāṃ bhikṣavaḥ sarvairyuṣmābhirvismitāśayaiḥ |
anena yatkṛtaṃ karma tanmayā kathyate 'dhunā || 237 || {37}
[Analyze grammar]

purāsīdbhagavānbuddhaḥ kāśyapo 'rhanmunīśvaraḥ |
sarvavidyādhipaḥ śāstā tathāgato vināyakaḥ || 238 || {38}
[Analyze grammar]

sasāṃghiko jinendro 'sau vārāṇasīmupāśritaḥ |
bodhicaryāṃ samādiśya kṛtvā dharmamayaṃ jagat || 239 || {39}
[Analyze grammar]

sarvāṇi buddhakāryāṇi samāpya nirvṛtiṃ yayau |
tadā rājā kṛkī nāma matvā taṃ nirvṛtiṃ gataṃ || 240 || {40}
[Analyze grammar]

vidhivadagnisaṃskāraṃ kārayitvā mahārcanaiḥ |
tatastaddhāturatnāni garbha āropya sādarāt || 241 || {41}
[Analyze grammar]

hemaratnamayaṃ stūpaṃ kārayāmāsa sa prabhuḥ |
tatsusiddhaṃ pratiṣṭhāpya sadvidhānairmahotsavaiḥ || 242 || {42}
[Analyze grammar]

mahaścāpi tadā tatra sthāpayitvā bhajannṛpaḥ |
tasminnāropyamānāyāṃ yaṣṭyāṃ pūjāparigrahī || 243 || {43}
[Analyze grammar]

kintavo kaṃdaro nāma nidadhe rūpakadvayaṃ |
tataḥ sa pādayornatvā praṇidhānaṃ vyadhāttathā || 244 || {44}
[Analyze grammar]

yanmayā śraddhayā bhaktyāropitaṃ rūpakadvayaṃ |
yatpuṇyaṃ ca vipākena jāyeyaṃ sukule sadā || 245 || {45}
[Analyze grammar]

karodbhavasuvarṇaiḥ saṃtarpayitvārthino janān |
evaṃvidhaṃ ca śāstāramārogya samupāśritaḥ || 246 || {46}
[Analyze grammar]

etaddharmaṃ samāsādya prāpnuyāṃ paramāṃ gatiṃ |
tena puṇyavipākena praṇidhānena bhūyasā || 247 || {47}
[Analyze grammar]

hiraṇyapāṇirayaṃ dātā bhavatyarhaṃ sa sāṃprataṃ |
evaṃ sarve 'pi saṃsāre bhuṃjate karmajaṃ phalaṃ || 248 || {48}
[Analyze grammar]

yenaivaṃ yatkṛtaṃ karma tenaiva bhuṃjyate phalaṃ |
abhuktaṃ kṣīyate naiva karma kvāpi kadā cana || 249 || {49}
[Analyze grammar]

śubhaṃ vāpyaśubhaṃ vāpi bhuktaṃ tu kṣīyate khalu |
nāgnibhirdahyate karma klidyate nodakairapi || 250 || {50}
[Analyze grammar]

vāyubhiḥ śuṣyate nāpi bhūmiṣu kṣīyate na hi |
anyathāpi bhavennaiva saṃsāre karmaṇo gatiḥ || 251 || {51}
[Analyze grammar]

śubhasya śubhataiva syātkṛṣṇasya kṛṣṇataiva hi |
miśrasya miśritaiva syādanyathā na sadā bhavet || 252 || {52}
[Analyze grammar]

evaṃ matvātha saṃsāre caritavyaṃ sadā śubhaṃ |
na praṇasyaṃti karmāṇi kalpakoṭiśatairapi || 253 || {53}
[Analyze grammar]

sāmagrīṃ prāpya kālaṃ ca phalanti prāṇināṃ khalu |
ityasau bhagavānbuddhaḥ satkarmadeśanāmataiḥ || 254 || {54}
[Analyze grammar]

tarpayan sa kalāṃl lokāntato viśrāntamādadhau |
iti śāstroditaṃ śrutvā sarve te bhikṣusāṃghikāḥ || 255 || {55}
[Analyze grammar]

śubheṣveva sadā nityaṃ saṃpraceruḥ samāhitaḥ |
mahārāja tvayāpyevaṃ caritavyaṃ śubhe sadā || 256 || {56}
[Analyze grammar]

bodhayitvā prajāñcaivaṃ sthāpanīyāḥ śubhe sadā |
tataste maṃgalaṃ nityaṃ sarvatrāpi bhavetkhalu |
kramādbodhicarīṃ prāpya saṃbodhipadamāpuṇyāḥ || 257 || {57}
[Analyze grammar]

iti tena samādiṣṭaṃ śrutvā sa nṛpatīśvaraḥ |
tathetyabhyanumoditvā prābhyanaṃdatsapārṣadaḥ || 258 || {58}
[Analyze grammar]

śṛṇvanti ye śrāvayantīha yaśca hiraṇyapāṇeravadānametat |
te kleśamuktāḥ sugatānubhaktāḥ prayānti nūnaṃ sugatālayeṣu || 259 || {59}
[Analyze grammar]