Chapter 13

|| trayodaśo'dhyāyaḥ ||

bhagavān-
mukhyamūrtiḥ śilābhirvā lohairvā dārubhistu vā|
sudhābhirvā prayatnena mṛdābhirvābhikalpayet|| 13.1 ||
mukhyamūrtimṛttikayā kartumicchati cedrame|
ārabhya vatsarāntena kuryāttāḥ śāsvatīḥ samāḥ|| 13.2 ||
tiṣṭheyurnātra saṃdeho racanā tu tathāvidhā|
yadyat krameṇa kartavyaṃ mūrtīnāṃ vastulepanam|| 13.3 ||
tatprakāraṃ pravakṣyāmi śṛṇuṣva kamalālaye|
(1)prathamaṃ dārusaṃghāto dvitīyaṃ rajjuveṣṭanam|| 13.4 ||
(1.pā. prathamaḥ)
mṛdālepastṛtīyastu (2)turīyo nāḍibandhanam|
pañcamo rajjuveṣṭaḥ syānnārikelatvacā punaḥ|| 13.5 ||
(2.pā. turīyaṃ)
miśritā mṛttikā ṣaṣṭhī saptamaṃ rajjuveṣṭanam|
aṣṭamaḥ śarkarālepo navamaṃ maṭayojanam|| 13.6 ||
bhūṣaṇaṃ daśamaṃ viddhi (3)śuklālepamataḥ param|
dvādaśo varṇalepaḥ syāttattanamūrtyanusārataḥ|| 13.7 ||
(3.pā. ekādaśamataḥ param| śuklālepanamuddiṣṭaṃ)
varṇalepavidhānaṃ tu mūlamūrtervinā bhavet|
[candanāgarutailādyairmūlabimbānulepanam|]
puroditānāṃ bimbānāṃ mūlānāṃ mānamucyate|| 13.8 ||
ṛjvīmekāṃ purā bhūmau mūrtiṃ śilpī vilekhayet|
tatra mānādikaṃ sarvamādāya tadanantaram|| 13.9 ||
taruṇā śilayā vāpi kalpayed bimbamuttamam|
aṣṭādhikaśatāṃśo yaḥ sonnateraṅgulo bhavet|| 13.10 ||
dve aṅgule kalā netraṃ golakaṃ bhāva eva ca|
aṅgulādaṣṭabhāgo yaḥ sa yavaḥ parikīrtitaḥ|| 13.11 ||
ṣaṭkalaṃ ca parijñeyaṃ tālaṃ bimbādikarmaṇi|
mukhāṅganābhimeḍhrakṣmāstālamānāstathoruyuk|| 13.12 ||
dvitālaṃ ca tathā jaṅghe gulphajānugalaṃ (4)ca kam|
tryaṅgulaṃ tryaṅgulaṃ jñeyamityunmānamudāhṛtam|| 13.13 ||
(4.gra. rame|)
jaṭādharāṇāṃ bimbānāṃ dīrghahrāsavaśena tu|
catuṣkalaṃ ca trikalaṃ mānaṃ mānādbahiḥ kṣipet|| 13.14 ||
tripañcasaptaśikharo mauliraṣṭakalonnataḥ|
nirjaṭānāṃ lalāṭordhve makuṭaṃ vā suśobhanam|| 13.15 ||
kalena hrāsavṛddhistu kārye tvatra hyavekṣayā|
yathoditeṣu bhāgeṣu ekaikenāṅgulena tu|| 13.16 ||
āsyanāsālalāṭārthaṃ vadanāṃśaṃ bhajet tridhā|
tato'grataḥ kalāmānaṃ ghrāṇaṃ syāt tilapuṣpavat|| 13.17 ||
kalārdhena tu vistāraḥ sonnatistatpuṭadvayam|
nāsāgragrāhanirmuktaṃ gojimānaṃ caturyavam|| 13.18 ||
taccaturyavamānena ghrāṇāgreṇāntarīkṛtam|
ardhāṅgulaṃ cottaroṣṭhamadharoṣṭhaṃ tu sāṅgulam|| 13.19 ||
golakaṃ cubukaṃ viddhi sṛkviṇyau caturaṅgule|
ādyasya nāsikāṃśasya madhyabhāgasamāśrite|| 13.20 ||
kuryānnetraśruticchidre tatra netre kalāntare|
kalāyāmasamaṃ dairghyāt kalārdhena tu vistṛtam|| 13.21 ||
yadutpaladalākāraṃ dviyavenādhikaṃ tu tat|
kuryāt padmadalākāraṃ netrārdhaṃ vṛttatārakam|| 13.22 ||
tāradaighyaṃ tribhāgena tvādyasyānyasya cādhikam|
yavenaikena vārdhena jyotistatpañcabhāgakam|| 13.23 ||
tribhāgenāpi vihitaṃ tatpadmadalalocanam|
dviṣaḍyavaṃ, netrakośaṃ vistāreṇa yavādhikam|| 13.24 ||
sārdhāṅguladvayaṃ dairghyāt dve kale bhrūlate smṛte|
madhyato dviyave bālacandratulye sulakṣaṇe|| 13.25 ||
tadantaraṃ kalārdhaṃ ca tatkoṭisamasūtrake|
śrotre dvyaṅgulavistīrṇe (5)āyāmena dvigolake|| 13.26 ||
(5.gra. āyāme)
dviyavaḥ kaṇṭhaparidhiparvaṇī dve caturyave|
madhyaṃ tābhyāṃ tathā viddhi droṇī sārdhāṅgulā tu vai|| 13.27 ||
kalārdhena tu tacchidraṃ pāśamānaṃ yathāruci|
aṅgulādvikalāntaṃ tu vaiṣamyamapi yatra tat|| 13.28 ||
antaśchidrairvinirmuktaṃ tadvijñeyaṃ caturyavam|
sadalaṃkaraṇopetamevaṃ śrotradvayaṃ smṛtam|| 13.29 ||
catuṣkalaṃ lalāṭaṃ tu śikhare dve dvigolake|
ucchrāyāt tryaṅgule caiva hyagrato'ṅgulavistṛte|| 13.30 ||
keśabhūmeḥ samudbhūtaṃ lalāṭopari saṃsthitam|
kuryāt kalārdhamānaṃ tu vaktraṃ cālakasaṃśrayam|| 13.31 ||
kapolaparidhiṃ kuryāt (6)karṇāt karṇagataṃ samam|
tanmadhye vartulau bhāṇḍau paricchinnau puroditaiḥ|| 13.32 ||
(6.gra. kaṣṭhātkaṇṭhagataṃ samam|)
śirasaḥ pariṇāhaṃ tu viddhi ṣaṭ‌triṃśadaṅgulam|
śrotrakoṭidvayāccaiva mastakasya yadantaram|| 13.33 ||
satkambusadṛśī grīvā mūlamadhyāgrato hi sā|
paridherdvadaśa kalā ekaviṃśāṅgulāgrataḥ|| 13.34 ||
aṣṭādaśāṅgulā caiva svāṅgāt tryaṃśena vistṛtā|
tanmūlavistṛtau skandhau tuṅgau vṛttāyatau samau|| 13.35 ||
ṣaḍaṅgulaṃ tadbāhulyaṃ bāhumānamathocyate|
skandhottamāṅgaṃ trikalaṃ sandhyantaṃ ṣaṭ‌kalaṃ smṛtam|| 13.36 ||
saṃdhervai maṇibandhāntaṃ mānaṃ navakalaṃ smṛtam|
maṇermadhyamaśaṅkhānto hastaḥ saptāṅgulo mataḥ|| 13.37 ||
parijñeyaṃ kalāhīnaṃ tanmānaṃ madhyamāṅgule|
taccaturyavahīnāṃ ca sā vāmā tu pradeśinī|| 13.38 ||
dvikalā ca parijñeyā sāṅguṣṭhā tu kanīyasī|
dviparvā ca smṛto'ṅguṣṭhaḥ sarvāścāṅgulivistṛtāḥ|| 13.39 ||
sarvāsāṃ mūlaparyantād hrāsayecca yavaṃ yavam|
agraparvārdhamānena kāryā liṅgopamā nakhāḥ|| 13.40 ||
mānamaṅguṣṭhamūlasya paridheśca yadaṅgulam|
taccaturyavahīneṃ ca jñeyaṃ triṣvaṅgulīṣu ca|| 13.41 ||
nyūnāṅgule kalā sārdhā prāgvad hrāsaśca veṣṭanāt|
aṅguṣṭhamaṅgulaṃ cāgrāt tisro vā ṣaḍ yavā smṛtāḥ|| 13.42 ||
ardhāṅgulāgrato nyūnā viddhi madhyakramakṣatam|
na ca (7)lakṣā samaṃ cāgrātsāṅguladvitalaṃ karaḥ|| 13.43 ||
(7.gra. lakṣmā)
īṣannimnatalaṃ caiva lakṣmarekhāvibhūṣitam|
śākhāmūlāvadheḥ pāṇibāhulyaṃ dve yave'ṅgulam|| 13.44 ||
caturyavādhikaṃ caiva maṇibandhāvaderbhavet|
madhye kalārdhatulyaṃ tu tadbāhulyaṃ bhaved rame|| 13.45 ||
maṇibandhāvadherbāhuveṣṭanaṃ ṣaṭ‌kalaṃ smṛtam|
saṃdheḥ saptakalaṃ viddhi sāṅgulaṃ triyavaṃ smṛtam|| 13.46 ||
hīnamardhāṅgulenaiva mūlādvai navagolakam|
tathaiva saṃdherūrdhvaṃ tu vistāraḥ prāgvadatra ca|| 13.47 ||
atrāpi pūrvavad dṛṣṭvā kāryāntasthā kṣiti svayam(?)|
tālaṃ galāvadhestyaktvā tanmānenāntarīkṛte|| 13.48 ||
stanadvayaṃ samaṃ kuryāt taddhārā ca samāṃsalā|
nimnaṃ hṛdgolakārdhena ūrdhvato ratnarāḍyutam|| 13.49 ||
stanābhyāṃ trikalau bāhyau triyavaṃ stanamaṇḍalam|
yavonnataṃ tathā cāgrād vistṛtaṃ tena cūcukam|| 13.50 ||
locanaṃ triyavaṃ sārdhaṃ kakṣamānamudāhṛtam|
skandhamānavinirmuktaṃ ṣaṣṭhamaṃ (8)śālayeśśamam(?)|| 13.51 ||
(8.gra. sāvadheḥ)
droṇīnikāyasadṛśamadhyarāśeḥ samāṃsalam|
kakṣāntarveṣṭanaṃ viddhi pañcatāraṃ salocanam|| 13.52 ||
vināṅguladvayenaiva dve tāle dviguṇīkṛte|
yavatrayasamāyukte viddhi tatkukṣiveṣṭanam|| 13.53 ||
triyavonā kalāmānaṃ vijñeyaṃ nābhimaṇḍalam|
tanmānaṃ syāt (9)triyavonaṃ tu taṃ nimnataṃ(10) vidhīyate|| 13.54 ||
(9.gra. tryavonaṃ| `triyavonaṃ' iti paṭhanīmaṃ, yadyapi akṣarādhikam|)
(10.gra. tvaṃ. `tantimnatvaṃ' iti paṭhitavyam|)
paridhirnābhimadhye tu tritālaḥ sa trilocanam|
ṣaḍgolakaṃ ca tanmānaṃ paridhyardhaṃ kaṭeḥ smṛtam|| 13.55 ||
karikumbhopamau pīnau paritaḥ pañcagolakau|
sphijau kaupīnarājīva dvyaṅgulā mūlataḥ smṛtā|| 13.56 ||
parito dvyaṅgulaṃ mānaṃ meḍhraṃ tu trikalaṃ bhavet|
caturyavaṃ ca tatkośaṃ veṣṭanaṃ tu ṣaḍaṅgulam|| 13.57 ||
dvyaṅgulau vṛṣaṇau dairghyānmūlāntasamavistṛtau|
parito dvyaṅgulaṃ viddhi pāyurandhraṃ suvartulam|| 13.58 ||
ūrumānaṃ parijñeyaṃ madhyabhūmernavāṅgulam|
ṣaṭkalaṃ mūladeśācca agrāntaṃ trikalaṃ smṛtam|| 13.59 ||
hīnamekāṅgulenaiva dvikalaṃ jānumaṇḍalam|
vistāreṇonnatatvena caturyavasamaṃ tu tat|| 13.60 ||
jaṅghāmūle parijñeyaṃ veṣṭanaṃ navagolakam|
dvisaptāṅgulakaṃ madhye sārdhapañcakalaṃ tataḥ|| 13.61 ||
atrāpi veṣṭanaṃ viddhi tṛtīyāṃśena vistṛtam|
madhyamūlāvasānebhyo vistāramānuguṇyataḥ|| 13.62 ||
bhujābhyāṃ madhyadeśasya tathāṅguligaṇasya ca|
ūruyugmasya jaṅghābhyāmāpādyā dvipahastatā|| 13.63 ||
satālabhaṅgamānaṃ ca dairghyaṃ vai caraṇaṃ smṛtam|
pārṣṇidvigolakatate tanmadhye sāṅgule kale|| 13.64 ||
dvikalaṃ cāśritaṃ caiva bāhulyena kalā (11)samam‌|
padamaṅguṣṭhanikaṭāt triyavonaṃ vidurbudhāḥ|| 13.65 ||
(11.gra. samau|)
bāhulaṃ ca kalāmānaṃ gulphadeśācca sāṅgulam|
kanīyo'ṅgulimūlācca gulphāntaṃ piṇḍikāṅgulam|| 13.66 ||
jaṅghāvasānadeśācca veṣṭanaṃ saptalocanam|
kalāhīnaṃ tathaivāgrāt pariṇāho vidhīyate|| 13.67 ||
caraṇaṃ vidhinā tena kūrmapṛṣṭhasamaṃ bhavet|
tryaṅgulena ca taddairghayamaṅguṣṭhasya ca dīrghatā|| 13.68 ||
pañcāṅgulaḥ parijñeyaḥ paridhistatra vai rame|
yavadvayādhikā kāryā taddairdhyāttu pradeśinī|| 13.69 ||
aṅguṣṭhāyāmatulyātha kāryā vai padamadhyagā|
madhyāṅgule dviraṣṭāṃśahīnā tadanu yā sthitā|| 13.70 ||
tadvattadanugā yā ca triparvāstāstu pūrvavat|
saṃyuktā nakhajālena kūrmapṛṣṭhopamena ca|| 13.71 ||
dvikalaṃ tu yavārdhenaṃ pādatarjaniveṣṭanam|
catuścaturyavonaṃ ca taccheṣāṇāṃ prakīrtitam|| 13.72 ||
sarve samāṃsalāḥ saumyāḥ samāstvavayavāḥ śubhāḥ|
daśanaṃ valibāhyasthe daṃṣṭro sapta yavonnate|| 13.73 ||
yavadvayonnataṃ mānaṃ madhyadantacatuṣṭayam|
tatpakṣagānāṃ sarveṣāṃ mānaṃ viddhi caturyavam|| 13.74 ||
dviyavaṃ dvijavistāramagrānmūlādyavadvayam|
tatsārdhaṃ madhyadeśācca sarve dantā nirantarāḥ|| 13.75 ||
lomapradakṣiṇāvartamayugjanmotthitaṃ śabham|
suniścitaṃ hitaṃ caitanmānamavyabhicāri yat|| 13.76 ||
manohāritvamekatra rūpalāvaṇyabhūṣitam|
sarvadā cānayorviddhi anyonyatvena saṃsthitam|| 13.77 ||
susaundāryaṃ tu mānasya kvacidākramya vartate|
lāvaṇyasya kvacinmānaṃ samācchādyāvatiṣṭhate|| 13.78 ||
yathābhirūpavān loke daridro'bhyeti mānyatām|
virūpo'pyativittāḍhyo nārūpo naiva nirdhanaḥ|| 13.79 ||
evaṃ dvayo'nvitaṃ(12) bimbamanādeyatvameti ca|
ādeyamekayuktaṃ ca nityaṃ yasmānmahāmate|| 13.80 ||
(12.mātṛkāyāṃ gra. pustake caivameva| `dvyananvitaṃ' iti bhavitavyam|)
samyaṅmāne ca saundarye bhaktānugrahakāmyayā|
mantrasaṃnidhiśaktirvai saphalā hyavatiṣṭhate|| 13.81 ||
sā samyakpratipannasya bimbe dṛggocarasthite|
amūrtā hlādayatyāśu jñātvaivaṃ yatsamācaret|| 13.82 ||
mānonmānapramāṇānāmatha saundaryasiddhaye|
ṛjoḥ susamapādasya tryaṅgulaṃ caraṇāntaram|| 13.83 ||
tadvai viṣamapādasya agrāttālasamaṃ smṛtam|
tatpārṣṇidvayamadyāttu parijñeyaṃ dvigolakam|| 13.84 ||
sthityarthaṃ brahmanāḍyā vai tathā mārgadvayasya ca|
sūtreṇa susame kuryād dehotthe dakṣiṇottare|| 13.85 ||
samapādasya bimbasya lalāṭānmeḍhramastakam|
prasārya sūtramācchādya tena nābhihṛdantaram|| 13.86 ||
ghrāṇāgramalakānāṃ ca siddhiryastilakordhvagaḥ|
evaṃ viṣamapādasya dakṣāṅguṣṭhāgragāṃ nayet|| 13.87 ||
gātrasāmyaṃ samāpādyaṃ kṣetrāt kṣetragatena vai|
sūtreṇa sarvabimbānāṃ vaiṣamyaṃ vyapavartate|| 13.88 ||
catustridvyaśraparitaḥ pariśuddhāyatiḥ śubhā|
aśubhāpariśuddhā tu vyatyayā bimbanirmitā|| 13.89 ||
lalāṭamaśvavaktrasya vistāraṃ dvādaśāṅgulam|
aṣṭalocanamāyāmādagrataścaturaṅgulam|| 13.90 ||
kalāgrasuṣire ghrāṇarandhre bhāgāntarīkṛte|
aṣṭāṅgule tu hanuke sṛgviṇyau dve'tha tatsame|| 13.91 ||
madhyataḥ śrotraśuktī dve dvyaṅgule dvikalonnate|
dvyaṅgulaṃ ghrāṇavaṃśaṃ tu tadūrdhvaṃ dvikalaṃ smṛtam|| 13.92 ||
viddhi vaktravikāsaṃ ca dviyavaṃ cāgrataḥ kramāt|
tameva hi yavāṃśena hanvantaṃ tanutāṃ nayet|| 13.93 ||
ghrāṇavaṃśasya pakṣau dvau madhyanimnau ca saṃhatau|
yavadvayena sārdhena dṛgghrāṇābhyāṃ tu cāntare|| 13.94 ||
adhodalaṃ tu dṛgdroṇeḥ yava(mā?)nena kuñcitam|
lalāṭaṃ sālakaṃ prāgvad dṛṅmadhyaṃ sāṅgulā kalā|| 13.95 ||
nṛsiṃhasya mukhaṃ viddhi paritaścāṣṭalocanam|
tadoṣṭhakhaṇḍadeśācca kuryātkarṇadvayotthitam|| 13.96 ||
tatkarṇadvayamānena lalāṭāntaṃ nayet punaḥ|
pramāṇāt prāk praṇītācca saṃraṃbhād ghrāṇalakṣaṇam|| 13.97 ||
praplutaṃ vikasacchidraṃ ghrāṇavaṃśānvitaṃ bhavet|
tacchidre pūrvamānācca svasya vai triyavādhikam|| 13.98 ||
sagolamuttaraṅgeṣu sakalāṃśaṃ ca locanam|
adharoṣṭhaṃ parijñeyaṃ sacaturyavamaṅgulam|| 13.99 ||
sārdhaṃ catuṣkalaṃ vaktraṃ śeṣāyāmo hanoḥ smṛtaḥ|
tadvikāsaḥ parijñeyo netramānaṃ yavādhikam|| 13.100 ||
agrato hrāsamāyāti sṛkviṇyantaṃ hi cāṅgulam|
sarvavṛttaṃ tadardhena netrayugmaṃ savismayam|| 13.101 ||
pūrvavadvistṛtaṃ śrotraṃ kalārdhena tadunnateḥ|
tulyāṃ candrakalāyugmayogasya bhrūstrigolakam|| 13.102 ||
tanmānaṃ tu kalāmānaṃ śaṅkhāvartopamaṃ mahat|
bhāgamānaṃ samāvṛttaṃ kāryaṃ tacchirasi sphuṭam|| 13.103 ||
varāhasyānanaṃ dairghyaṃ sārdhatālaṃ vidhīyate|
vistāreṇa lalāṭācca tanmānaṃ dvyaṅgulānvitam|| 13.104 ||
saumyarūpasya ca vibhoḥ prodyatasya kalānvitam|
taccaturthāṃśamānena potradeśasya vistṛtiḥ|| 13.105 ||
tasyopariṣṭād bāhulyaṃ tatsamaṃ tvaṅgulaṃ tvadhaḥ|
hanudvayasya vai mānaṃ sārdhasaptāṅgulaṃ smṛtam|| 13.106 ||
śeṣāmānaṃ sarandhraṃ tu sṛgviṇībhyāṃ yadantaram|
tadvikāsaśca sārdhena kalārdhenāgradeśataḥ|| 13.107 ||
sa evāṅgulamānena vijñeyaḥ sṛgviṇīdvayāt|
ghrāṇarandhraśca vaktrokte daṃṣṭre tvardhakalonnate|| 13.108 ||
nāsāvaṃśaṃ yathāpūrvaṃ kadalīvāṭipṛṣṭhavat|
śrotre vājimukhokte tu koṭeḥ saptakalāntare|| 13.109 ||
tattulye locane kiṃtu prāntatīkṣṇe yavonvi(nna?)te|
eteṣāṃ vihitā grīvā hyaṅguladvitayena tu|| 13.110 ||
pratyekadeśāt saṃyuktā saumyamūrtyuditā ca yā|
vinocchrāyeṇa(nṛhare)ryasya gātrasya yā prabhā|| 13.111 ||
sā prabhā veṣṭanādbhāsāt kalārdhenādhikā bhavet|
vakṣaḥkaṭyudaraṃ saṃsphik kalāmānādhikaṃ tu tat|| 13.112 ||
tathaiva nakhapatrāṇi dehaścāsya samāṃsalaḥ|
saṃpūrṇe dakṣiṇāvartairlomabhiścātikuñcitaiḥ|| 13.113 ||
tricatuḥpañcavaktrasya vinaivordhvamukhena tu|
dakṣiṇottaravaktrābhyāṃ hrāsaṃ kuryād dvigolakam|| 13.114 ||
vikāsaḥ siṃhavaktrokta udagvaktrasya tatra ca|
samo dṛksaṃniveśastu caturṇāṃ mokṣasiddhaye|| 13.115 ||
ārogyabhogakaivalyaprāptaye'rdhāṅgulena tu|
kuryāt savyāpasavyābhyāmatho dṛksaṃniveśanam|| 13.116 ||
saha pūrvānanenaiva sāmyaṃ pratyaṅmukhasya ca|
niṣkrāsāyāmavistāraghrāṇadṛgbhrūśrutiṣvatha|| 13.117 ||
īṣattiryak‌kṣitinyastadṛṅmukhaṃ dakṣiṇaṃ śubham|
tadvacca śrotradṛgvaktramuttaraṃ sarvasiddhidam|| 13.118 ||
svakāryasūcanānnūnaṃ tanmantrasya ca saṃnidhiḥ|
ato'nyathā samāśritya śāntimāste ca mantrarāṭ|| 13.119 ||
nityaṃ tatsaṃnidhānācca bhūtavetālarākṣasāḥ|
ādarśanāt palāyante līyante darśanādrame|| 13.120 ||
ādāya śirasā mantrī samājñāṃ saṃprayānti te|
ataḥ samācaredyatnāt yena syād bimbasaṃnidhiḥ|| 13.121 ||
na hi tatsaṃnidhānādvai kaścidārabhate śubham|
varāhadaṃṣṭraṃ siṃhākṣaṃ tathā cipiṭanāsikam|| 13.122 ||
vidheyaṃ paścimaṃ vaktraṃ pañcavaktrasya vai vibhoḥ|
asyādharottarā(bhyā)mapyoṣṭhābhyāṃ samatā bhavet|| 13.123 ||
vibhinnatāṅgulārdhena tābhyāṃ tanmadhyagā sphuṭā|
kāryā daśanapālī vai mūlamadhyāgrataḥ samā|| 13.124 ||
kalārdhenolbaṇaṃ vṛttaṃ tadgaṇḍadvitayaṃ tataḥ|
dvikalaṃ cāgrataḥ śmaśruḥ kalā cārdhakalā kramāt|| 13.125 ||
saṃbandhaveṇīḥ pūrvokta(13)mānane sarvato bhavet|
siṃhasūkaravanmukhyavaktrāṇāṃ saumyatāṃ nayet|| 13.126 ||
(13.gra. mānenaiva bhavedrame|)
pramāṇaṃ dṛggatāllakṣyādvyavahāramayāttu vai|
vikāsaścāśvavaktrokteḥ saumyarūpasya bhūbhṛtaḥ|| 13.127 ||
tadādyoktestu nṛhareḥ prāgukto yaḥ samācaret|
tathā vaktrāṅgabhāvitve(14) vibhoḥ śaktīśvarasya ca|| 13.128 ||
(14.gra. kye)
hāranūpuravastrasrak‌kaṭakāṅgadabhūṣitā|
mālyopavītakeyūramakuṭādyupaśobhitā|| 13.129 ||
pratimā mantramūrtīnāṃ kṛtā bhavati siddhidā|
yat purā pañcadhā proktaṃ vāhanaṃ prāṇadaivatam|| 13.130 ||
tasya bimbasamutthena tālena mukhamaṇḍalam|
(15)dvyaṅgulaṃ tu lalāṭoktaṃ jaṭābandho dvilocanaḥ|| 13.131 ||
(15.gra. vyaṅgulaṃ)
dvyaṅgulenonnataḥ karṇamuraḥ pañcakalaṃ smṛtam|
aṣṭāṅgulaṃ tadudaraṃ kaṭiḥ pañcāṅgulonnatā|| 13.132 ||
navāṅgulonnatāvūrū jānunī dvyaṅgule smṛte|
aṣṭāṅgulocchrite jaṅghe dvyaṅgule (16)padapiṇḍake|| 13.133 ||
(16.gra. piṇḍa(ke)smṛte)
(17)śamamekakalāhīnaṃ tadgrīvāyāṃ ca veṣṭanam|
bimbatulyā parijñeyo sarvadā sāṅgavistṛtiḥ|| 13.134 ||
(17.gra. śamamekaṃ)
tadvibhāgādhikaṃ viddhi veṣṭanaṃ hyudarasya ca|
paridhiḥ kaṭideśasya caturnetrādhikastu vai|| 13.135 ||
(18)bimbokasadṛśaṃ viddhi tadūrvormūlaveṣṭanam|
(19)tadevaṃ jaṅghāmadhyasya jaṅghāntasya tadeva hi|| 13.136 ||
(18.gra. bimbena)
(19.tadeva)
pādaṃ pañcakalāyāmaṃ caturaṅgulavistṛtam|
tryaṅgulaṃ pārṣṇideśācca dvikalāṅguṣṭhayoḥ samā|| 13.137 ||
vijñeyāścāṅghrideśācca yavonāṅgulayaḥ (20)kramāḥ|
nābhirandhraṃ suvistīrṇaṃ dvyardhalocanavistṛtam|| 13.138 ||
(20.gra. kramāt)
madhyamāṅguliparyantaṃ maṇibandhānnavāṅgulam|
trikalaḥ parivistārastannakhā niśitonnatāḥ|| 13.139 ||
tadbāhurdvikalaṃ viddhi ucchrāyeṇa dvilocanam|
bhujopabhujayuktaṃ yattad dvitālasamaṃ viduḥ|| 13.140 ||
kalārdhenādhikaṃ bimbabāhvostadbāhuveṣṭanam|
[bimboṣṭhāṃsādvidhirhyeva(21)mīritaṃ padmasaṃbhave|| 13.141 ||]
(21.mā. etāni padāni na santi)
vṛttavaipulyamānena locane padmapatravat|
bhrūyugmaṃ narasiṃhoktaṃ ghrāṇāgraṃ śukacañcuvat|| 13.142 ||
kalārdhamānaṃ dīrghaṃ ca tadvaṃśaṃ gajapṛṣṭhavat|
svāyāmadīrghaṃ tatpakṣayugalaṃ kukṣideśataḥ|| 13.143 ||
tathaiva dairghyādardhena vistṛtaṃ haṃsapakṣavat|
svapakṣamānād dviguṇaṃ tatpucchaṃ śataśākhikam|| 13.144 ||
sapakṣamimamāyāmaṃ satyaṃ tvavayavānvitam|
sarveṣāṃ viddhi sāmānyaṃ viśeṣākhyamatho śṛṇu|| 13.145 ||
ūrudvayānnayed‌hrāsamaṅgulānāṃ trayaṃ tathā|
jaṅghākāṇḍocchrite kuryājjaṅghābhyāṃ cātra veṣṭanam|| 13.146 ||
bimbākhyamaṇibandhasya samamūlāt sarodbhave|
jāladeśāt tadardhena saha cārdhāṅgulena tu|| 13.147 ||
pāde jālaṃ parijñeyaṃ vistāreṇa ṣaḍaṅgulam|
śeṣaṃ satyoditaṃ sarvaṃ sarveṣāṃ viddhi sarvadā|| 13.148 ||
kiṃ tu pādānvitau pakṣau dairghyāttaddalavistṛtau|
eṣā coḍ‌ḍīyamānānāṃ svāyāmā pakṣavistṛtiḥ|| 13.149 ||
pañcānāṃ ca parijñeyaṃ sthitānāmardhalakṣaṇam|
etadādāya mānaṃ tu (22)pañcabhrūpakṣavarjitam|| 13.150 ||
(22.gra. pakṣabhrūpakṣa)
viddhi vāmanarūpasya lakṣaṇaṃ jalajodbhave|
lalāṭanāsāvaktrebhyaḥ samādāyāṅgulatrayam|| 13.151 ||
mastakasyopariṣṭāttu jaṭābandhaṃ prakalpayet|
jaṭābandhanamāyāmaṃ yathā syāt pañcatālakam|| 13.152 ||
etāvanmūlabimbānāṃ pramāṇamidamīritam|

|| iti śrīśrīpraśnasaṃhitāyāṃ trayodaśo'dhyāyaḥ(23) ||
(23.`dvādaśodhyāyaḥ' iti mātṛkāyām)