Chapter 16

vṛtaḥ pratasthe sa rathairatho rathī gṛhānvidarbhādhipaterdharādhipaḥ |
purodhasaṃ gautamamātmavittamaṃ dvidhā puraskṛtya gṛhītamaṅgalaḥ || 1 ||
[Analyze grammar]

vibhūṣaṇāṃśupratibimbitaiḥ sphuṭaṃ bhṛśāvadātaiḥ svanivāsibhirguṇaiḥ |
mṛgekṣaṇānāṃ samupāsi cāmarairvidhūyamānaiḥ sa vidhuprabhaiḥ prabhuḥ || 2 ||
[Analyze grammar]

parārdhyaveṣābharaṇaiḥ puraḥsaraiḥ samaṃ jihāne niṣadhāvanībhuji |
dadhe sunāsīrapadābhidheyatāṃ sa rūḍhimātrādyadi vṛtraśātravaḥ || 3 ||
[Analyze grammar]

nalasya nāsīrasṛjāṃ mahībhujāṃ kirīṭaratnaiḥ punaruktadīpayā |
adīpi rātrau varayātrayā tayā camūrajomiśratamisrasaṃpadā || 4 ||
[Analyze grammar]

vidarbharājaḥ kṣitipānanukṣaṇaṃ śubhakṣaṇāsannataratvasatvaraḥ |
dideśa dūtānpathi yānyathottaraṃ camūmamuṣyopacikāya taccayaḥ || 5 ||
[Analyze grammar]

haridvipadvīpibhirāṃśukairnabhonabhasvadādhmāpanapīnitairabhūt |
tarasvadaśvadhvajinīdhvajairvanaṃ vicitracīnāmbaravallivellivellitam || 6 ||
[Analyze grammar]

bhuvāhvayantīṃ nijatoraṇasrajā gajālikarṇānilakhelayā tataḥ |
dadarśa dūtīmiva bhīmajanmanah sa tatpratīhāramahīṃ mahīpatiḥ || 7 ||
[Analyze grammar]

ślathairdalaiḥ stambhayugasya rambhayoścakāsti caṇḍātakamaṇḍitā sma sā |
priyāsakhīvāsya manaḥsthitisphuratsukhāgatapraśnitatūryaniḥsvanā || 8 ||
[Analyze grammar]

vinetṛbhartṛdvayabhītidāntayoḥ parasparasmādanavāptavaiśasaḥ |
ajāyata dvāri narendrasenayoḥ samāgamaḥ sphāramukhāravodgamaḥ || 9 ||
[Analyze grammar]

nirdiśya bandhūnita ityudīritaṃ damena gatvārdhapathe kṛtārhaṇam |
vinītamā dvārata eva padgatāṃ gataṃ tamaikṣiṣṭa mudā vidarbharāṭ || 10 ||
[Analyze grammar]

athāyamutthāya visārya doryugaṃ mudā pratīyeṣa tamātmajanmanaḥ |
surasravantyā iva pātramāgataṃ bhṛtābhitovīcigatiḥ saritpatiḥ || 11 ||
[Analyze grammar]

yathāvadasmai puruṣottamāya tāṃ sa sādhulakṣmīṃ bahuvāhinīśvaraḥ |
śivāmatha svasya śivāya nandanāṃ dade patiḥ sarvavide mahībhṛtām || 12 ||
[Analyze grammar]

asisvadadyanmadhuparkamarpitaṃ sa tadvyadhāttarkamudarkadarśine |
yadeṣa pāsyanmadhu bhīmajādharaṃ miṣeṇa puṇyāhavidhiṃ tadākṛta || 13 ||
[Analyze grammar]

varasya pāṇiḥ paradhātakautukī vadhūkaraḥ paṅkajakāntitaskaraḥ |
surājñi tau tatra vidarbhamaṇḍale tato nibaddhau kimu karkaśaiḥ kuśaiḥ || 14 ||
[Analyze grammar]

vidarbhajāyāḥ karavārijena yannalasya pāṇerupari sthitaṃ kila |
viśaṅkya sūtraṃ puruṣāyitasya tadbhaviṣyato'smāyi tadā tadālibhiḥ || 15 ||
[Analyze grammar]

sakhā yadasmai kila bhīmasaṃjñayā sa yakṣasakhyādhigataṃ dadau bhavaḥ |
dadau tadeṣa śvaśuraḥ surocitaṃ nalāya cintāmaṇidāma kāmadam || 16 ||
[Analyze grammar]

bahordurāpasya varāya vastunaścitasya dātuṃ pratibimbakaitavāt |
babhautarāmantaravasthitaṃ dadhadyadarthamabhyarthitadeyamarthine || 17 ||
[Analyze grammar]

asiṃ bhavānyāḥ kṣatakāsarāsuraṃ varāya bhīmaḥ sma dadāti bhāsuram |
dade hi tasmai dhavanāmadhāriṇe sa śaṃbhusaṃbhoganimagnayānayā || 18 ||
[Analyze grammar]

adhāri yaḥ prāṅnahiṣāsuradviṣā kṛpāṇamasmai tamadatta kūkudaḥ |
ahāyi tasyā hi dhavārdhamajjinā sa dakṣiṇārdhena parāṅgadāraṇaḥ || 19 ||
[Analyze grammar]

uvāha yaḥ sāndratarāṅgakānanaḥ svaśauryasūryodayaparvatavratam|
sanirjharaḥ śāṇanadhautadhārayā samūḍhasaṃdhyaḥ kṣataśatrujāsṛjā || 20 ||
[Analyze grammar]

yamena jihvā prahiteva yā nijā tamātmajāṃ yācitumarthinā bhṛśam |
sa tāṃ dade'smai parivāraśobhinīṃ karagrahārhāmasiputrikāmapi || 21 ||
[Analyze grammar]

yadaṅgabhūmī babhatuḥ svayoṣitāmurojapattrāvalinetrakajjale |
raṇasthalasthaṇḍilaśāyitāvratairgṛhītadīkṣairiva dakṣiṇīkṛte || 22 ||
[Analyze grammar]

puraiva tasminsamadeśi tatsutābhikena yaḥ sauhṛdanāṭināgninā |
nalāya viśrāṇayati sma taṃ rathaṃ nṛpaḥ sulaṅghyādrisamudrakāpatham || 23 ||
[Analyze grammar]

prasūtavattā nalakūbarānvayaprakāśitāsyāpi mahārathasya yat |
kuberadṛṣṭāntabalena puṣpakaprakṛṣṭataitasya tato'numīyate || 24 ||
[Analyze grammar]

mahendramuccaiḥśravasā pratārya yannijena patyā'kṛta sindhuranvitam |
sa taddade'smai hayaratnamarpitaṃ purā'nubandhuṃ varuṇena bandhutām || 25 ||
[Analyze grammar]

javādavārīkṛtadūradṛkpathastathākṣiyugmāya dade mudaṃ na yaḥ |
dadaddidṛkṣādaradāsatāṃ yathā tayaiva tatpāṃsulakaṇṭhanālatām || 26 ||
[Analyze grammar]

divaspaterādaradarśinādarādaḍhauki yastaṃ prati viśvakarmaṇā |
tamekamāṇikyamayaṃ mahonnataṃ patadgrahaṃ grāhitavānnalena saḥ || 27 ||
[Analyze grammar]

nalena tāmbūlavilāsitojjhitairmukhasya yaḥ pūgakaṇairbhṛto na vā |
iti vyaveci svamayūkhamaṇḍalādudañcaduccāruṇacāruṇaścirāt || 28 ||
[Analyze grammar]

mayena bhīmaṃ bhagavantamarcatā nṛpeti pūjā prabhunāmni yā kṛtā |
adatta bhīmo'pi sa naiṣadhāya tāṃ harinmaṇerbhojanabhājanam mahat || 29 ||
[Analyze grammar]

chade sadaiva cchavimasya bibhratāṃ na kekināṃ sarpaviṣaṃ visarpati |
na nīlakaṇṭhatvamadhāsyadatra cet sa kālakūṭaṃ bhagavānabhokṣyata || 30 ||
[Analyze grammar]

virādhya durvāsasamaskhaladdivaḥ srajaṃ tyajannasya kimindrasindhuraḥ |
adatta tasmai sa madacchalātsadā yamabhramātaṅgatayaiva varṣukam || 31 ||
[Analyze grammar]

madānmadagre bhavatāthavā bhiyā paraṃ digantādapi yāta jīvata |
iti sma yo dikkariṇaḥ svakarṇayorvinaiva varṇasrajamāgatairgataiḥ || 32 ||
[Analyze grammar]

babhāra bījaṃ nijakīrtaye radau dviṣāmakīrtyai khalu dānavipluṣaḥ |
śravaḥśramaiḥ kumbhakucāṃ śiraḥśriyaṃ mude madasvedavatīmupāsta yaḥ || 33 ||
[Analyze grammar]

na tena vāheṣu vivāhadakṣiṇīkṛteṣu saṃkhyānubhave'bhavatkṣamaḥ |
na śātakumbheṣu na mattakumbhiṣu prayatnavānko'pi na ratnarāśiṣu || 34 ||
[Analyze grammar]

karagrahe vāmyamadhatta yastayoḥ prasādya bhaimyānu ca dakṣiṇīkṛtaḥ |
kṛtaḥ puraskṛtya tato nalena sa pradakṣiṇastatkṣaṇamāśuśukṣaṇiḥ || 35 ||
[Analyze grammar]

sthirā tvamaśmeva bhaveti mantravāganeśadāśāsya kimāśu tāṃ hriyā |
śilā caletpreraṇayā nṛṇāmapi sthitestu nācāli biḍaujasāpi sā || 36 ||
[Analyze grammar]

priyāṃśukagranthinibaddhavāsasaṃ tadā purodhā vidadhe vidarbhajām |
jagāda vicchidya paṭaṃ prayāsyato nalādaviśvāsamivaiṣa viśvavit || 37 ||
[Analyze grammar]

dhruvāvalokāya tadunmukhabhuvā nirdiśya patyābhidadhe vidarbhajā |
kimasya na syādaṇimākṣisākṣikastathāpi tathyo mahimāgamoditaḥ || 38 ||
[Analyze grammar]

dhavena sādarśi vadhūrarundhatīṃ satīmimāṃ paśya gatāmivāṇutām |
kṛtasya pūrvaṃ hṛdi bhūpateḥ kṛte tṛṇīkṛtasvargapaterjanāditi || 39 ||
[Analyze grammar]

prasūnatā tatkarapallavasthitairuḍucchavirvyomavihāribhiḥ pathi |
mukhe'marāṇāmanale radāvalerabhāji lājairanayojjhitairdyutiḥ || 40 ||
[Analyze grammar]

tayā pratīṣṭāhutidhūmapaddhatirgatā kapole mṛganābhiśobhitām |
yayau dṛśorañjanatāṃ śrutau śritā tamālalīlāmalike'lakāyitā || 41 ||
[Analyze grammar]

apahnutaḥ svedabharaḥ kare tayostrapājuṣordānajalairmilanmuhuḥ |
dṛśorapi prasrutamasru sāttvikaṃ ghanaiḥ samādhīyata dhūmalaṅghanaiḥ || 42 ||
[Analyze grammar]

bahūni bhīmasya vasūni dakṣiṇāṃ prayacchataḥ sattvamavekṣya tatkṣaṇam |
janeṣu romāñcamiteṣu miśratāṃ yayustayoḥ kaṇṭakakuḍmalaśriyaḥ || 43 ||
[Analyze grammar]

babhūva na stambhavijitvarī tayoḥ śrutikriyārambhaparamparātvarā |
na kampasaṃpattimalumpadagrataḥ sthito'pi vahniḥ samidhā samedhitaḥ || 44 ||
[Analyze grammar]

damasvasuḥ pāṇimamuṣya gṛhṇataḥ purodhasā saṃvidadhetarāṃ vidheḥ |
maharṣiṇevāṅgirasena sāṅgatā pulomajāmudvahataḥ śatakratoḥ || 45 ||
[Analyze grammar]

sakautukāgāramagātpuraṃdhribhiḥ sahasrarandhrīkṛtamīkṣituṃ tataḥ |
adhātsahasrākṣatanutramitratāmadhiṣṭhitaṃ yatkhalu jiṣṇunāmunā || 46 ||
[Analyze grammar]

tathāśanāya niraśeṣi no hriyā na samyagāloki parasparakriyā |
vimuktasaṃbhogamaśāyi saspṛhaṃ vareṇa vadhvā ca yathāvidhi tryaham || 47 ||
[Analyze grammar]

kaṭākṣaṇājjanyajanairnijaprajāḥ kvacitparīhārasamacīkarttarām |
dharāpsarobhirvarayātrayāgatānabhojayadbhojakulāṅkuraḥ kvacit || 48 ||
[Analyze grammar]

sa kaṃcidūce racayantu temanopahāramatrāṅgaruceryathocitam |
pipāsataḥ kāścana sarvatomukhaṃ tavārpayantāmapi kāmamodanam || 49 ||
[Analyze grammar]

mukhena tetropaviśatvasāviti prayācya sṛṣṭānumatiṃ khalāhasat |
varāṅgabhāgaḥ svamukhaṃ mato'dhunā sa hi sphuṭaṃ yena kilopaviśyate || 50 ||
[Analyze grammar]

yuvāmime me stritame itīriṇau gale tathoktā nijagucchamekikā |
na bhāsyadastucchagalo vadanniti nyadhatta janyasya tataḥ parākṛṣat || 51 ||
[Analyze grammar]

nalāya vālavyajanaṃ vidhunvatī damasya dāsyā nibhṛtaṃ pade'rpitāt |
ahāsi lokaiḥ saraṭātpaṭojjhinī bhayena jaṅghāyatilaṅghiraṃhasaḥ || 52 ||
[Analyze grammar]

puraḥsthalāṅgūlamadātkhalā vṛsīmupāviśattatra ṛjurvaradvijaḥ |
punastadutthāpya nijāmatervadā'hasacca paścātkṛtapucchatatpradā || 53 ||
[Analyze grammar]

svayaṃ kathābhirvarapakṣasubhruvaḥ sthirīkṛtāyāḥ padayugmamantarā |
pareṇa paścānnibhṛtaṃ nyadhāpayaddadarśa cādarśatalaṃ hasankhalu || 54 ||
[Analyze grammar]

athopacāroddhuracārulocanā vilāsanirvāsitadhairyasaṃpadaḥ |
smarasya śilpaṃ varavargavikriyā vilokakaṃ lokamahāsayanmuhuḥ || 55 ||
[Analyze grammar]

tirovaladvaktrasarojanālayā smite smitaṃ yatkhalu yūni bālayā |
tayā tadīye hṛdaye nikhāya tadvyadhīyatāsaṃmukhalakṣyavedhitā || 56 ||
[Analyze grammar]

kṛtaṃ yadanyatkaraṇocitatyajā didṛkṣu cakṣuryadavāri bālayā |
hṛdastadīyasya tadeva kāmuke jagāda vārtāmakhilāṃ khaluṃ khalu || 57 ||
[Analyze grammar]

jalaṃ dadatyāḥ kalitānatermukhaṃ vyavasyatā sāhasikena cumbitam |
pade patadvāriṇi mandapāṇinā pratīkṣito'nyekṣaṇavañcanakṣaṇaḥ || 58 ||
[Analyze grammar]

yuvānamālokya vidagdhaśīlayā svapāṇipāthoruhanālanirmitaḥ |
ślatho'pi sakhyāṃ paridhiḥ kalānidhau dadhāvaho taṃ prati gāḍhabandhatām || 59 ||
[Analyze grammar]

natabhruvaḥ svacchanakhānubimbanacchalena ko'pi sphuṭakampakaṇṭakaḥ |
payo dadatyāścaraṇe bhṛśaṃ kṣataḥ smarasya bāṇaiḥ śaraṇe nyavikṣata || 60 ||
[Analyze grammar]

mukhaṃ yadasmāyi vibhujya subhruvā hriyaṃ yadālambya natāsyamāsitam |
avādi vā yanmṛdu gadgadaṃ yuvā tadeva jagrāha tadāptilagnakam || 61 ||
[Analyze grammar]

vilokya yūnā vyajanaṃ vidhunvatīmavāptasattvena bhṛśaṃ prasiṣvade |
udastakaṇṭhena mṛṣoṣmanāṭinā vijitya lajjāṃ dadṛśe tadānanam || 62 ||
[Analyze grammar]

sa tatkucaspṛṣṭakaceṣṭidorlatācaladdalābhavyajanānilākulaḥ |
avāpa nānānalajālaśṛṅkhalānibaddhanīḍodbhavavibhramaṃ yuvā || 63 ||
[Analyze grammar]

avacchaṭā kāpi kaṭākṣaṇasya sā tathaiva bhaṅgī vacanasya kācana |
yathā yuvabhyāmanunāthane mithaḥ kṛśo'pi dūtasya na śeṣitaḥ śramaḥ || 64 ||
[Analyze grammar]

papau na ko'pi kṣamamāsyamelitaṃ jalasya gaṇḍūṣamudītasaṃmadaḥ |
cucumba tatra pratibimbitaṃ mukhaṃ puraḥ sphuratyāḥ smarakāṛmukabhruvaḥ || 65 ||
[Analyze grammar]

harinmaṇerbhojanabhājane'rpite gatāḥ prakopaṃ kila vārayātrikāḥ |
bhṛtaṃ na śākaiḥ pravitīrṇamasti vastviṣedamevaṃ hariteti bodhitāḥ || 66 ||
[Analyze grammar]

dhruvaṃ vinītaḥ smitapūrvavāgyuvā kimapyapṛcchanna vilokayanmukham |
sthitāṃ puraḥ sphāṭikakuṭṭime vadhūṃ tadaṅghriyugmāvanimadhyabaddhadṛk || 67 ||
[Analyze grammar]

amī lasadbāṣpamakhaṇḍitākhilaṃ viyuktamanyonyamamuktamāṛdavam |
rasottaraṃ gauramapīvaraṃ rasādabhuñjatāmodanamodanaṃ janāḥ || 68 ||
[Analyze grammar]

vayovaśastokavikasvarastanīṃ tirastiraścumbati sundare dṛśā |
svayaṃ kila srastamuraḥsthamambaraṃ gurustanī hrīṇatarā parādade || 69 ||
[Analyze grammar]

yadādihetuḥ surabhiḥ samudbhave bhavedyadājyaṃ surabhirdhruvaṃ tataḥ |
vadhūbhirebhyaḥ pravitīrya pāyasaṃ tadoghakulyātaṭasaikataṃ kṛtam || 70 ||
[Analyze grammar]

yadaṣyapītā vasudhālayaiḥ sudhā tadapyadaḥ svādu tato'numīyate |
api kratūṣarbudhadagdhagandhine spṛhāṃ yadasmai dadhate sudhāndhasaḥ || 71 ||
[Analyze grammar]

abodhi no hrīnibhṛtaṃ madiṅgitaṃ pratītya vā nādṛtavatyasāviti |
lunāti yūnaḥ sma dhiyaṃ kiyadgatā nivṛtya bālādaradarśaneṣuṇā || 72 ||
[Analyze grammar]

na rājikārāddhamabhoji tatra kairmukhena sītkārakṛtā dadhaddadhi |
dhutottamāṅgaiḥ kaṭubhāvapāṭavādakāṇḍakaṇḍūyitamūrdhatālubhiḥ || 73 ||
[Analyze grammar]

viyogidāhāya kaṭūbhavattviṣastuṣārabhānoriva khaṇḍamāhṛtam |
sitaṃ mṛdu prāgatha dāhadāyi tatkhalaḥ suhṛtpūrvamivāhitastataḥ || 74 ||
[Analyze grammar]

navau yuvānau nijabhāvagopināvabhūmiṣu prāgvihitabhramikramaḥ |
dṛśorvidhattaḥ sma yadṛcchayā kila tribhāgamanyonyamukhe punaḥ punaḥ || 75 ||
[Analyze grammar]

vyadhustamāṃ te mṛgamāṃsasādhitaṃ rasādaśitvā mṛdu temanaṃ manaḥ |
niśādhavotsaṅgakuraṅgajairadaḥ palaiḥ sapīyūṣajalaiḥ kimaśrapi || 76 ||
[Analyze grammar]

parasparākūtajadūtakṛtyayoranaṅgamārāddhumapi kṣaṇaṃ prati |
nimeṣaṇenaiva kiyaccirāyuṣā janeṣu yūnorudapādi nirṇayaḥ || 77 ||
[Analyze grammar]

aharniśā veti ratāya pṛcchati kramoṣṇaśītānnakarārpaṇādviṭe |
hriyā vidagdhā kila tanniṣedhinī nyadhatta saṃdhyāmadhure'dhare'ṅgulim || 78 ||
[Analyze grammar]

krameṇa kūraṃ spṛśatoṣmaṇaḥ padaṃ sitāṃ ca śītāṃ catureṇa vīkṣitā |
dadhau vidagdhāruṇite'dhare'ṅgulīmanaucitīcintanavismitā kila || 79 ||
[Analyze grammar]

kiyattyajannodanamānayankiyatkarasya papraccha gatāgatena yām |
ahaṃ kimeṣyāmi kimeṣyasīti sā vyadhatta namraṃ kila lajjayānanam || 80 ||
[Analyze grammar]

yathāmiṣe jagmuranāmiṣabhramaṃ nirāmiṣe cāmiṣamohamūhire |
tathā vidagdhaiḥ parikarmanirmitaṃ vicitramete parihasya bhojitāḥ || 81 ||
[Analyze grammar]

nakhena kṛtvādharasannibhāṃ nibhādyuvā mṛduvyañjanamāṃsaphālikām |
dadaṃśa dantaiḥ praśaśaṃsa tadrasaṃ vihasya paśyanpariveṣikādharam || 82 ||
[Analyze grammar]

anekasaṃyojanayā tathākṛternikṛtya niṣpiṣya ca tādṛgarjanāt |
amī kṛtākālikavastuvismayaṃ janā bahu vyañjanamabhyavāharan || 83 ||
[Analyze grammar]

pipāsurasmīti vibodhitā mukhaṃ nirīkṣya bālā suhitena vāriṇaḥ |
punaḥ kar kartumanā galantikāṃ hasātsakhīnāṃ sahasā nyavartata || 84 ||
[Analyze grammar]

yuvā samāditsuramatragaṃ ghṛtaṃ vilokya tatraiṇadṛśo'nubimbanam |
cakāra tannīviniveśinaṃ karaṃ babhūva tacca sphuṭakaṇṭakotkaram || 85 ||
[Analyze grammar]

pralehajasnehadhṛtānubimbanāṃ cucumba ko'pi śritabhojanacchalaḥ |
muhuḥ parispṛśya karāṅgulīmukhaistato nu raktaiḥ svamavāpitairmukham || 86 ||
[Analyze grammar]

arādhi yanmīnamṛgājapattrijaiḥ palairmṛdu svādu sugandhi temanam |
aśāki lokaiḥ kuta eva jemituṃ na tattu saṃkhyātumapi sma śakyate || 87 ||
[Analyze grammar]

kṛtārthanaścāṭubhiriṅgitaiḥ purā parāsi yaḥ kiṃcanakuñcitabhuvā |
kṣipanmukhe bhojanalīlayāṅgulīḥ punaḥ prasannānanayānvakampi saḥ || 88 ||
[Analyze grammar]

akāri nīhāranibhaṃ prabhañjanādadhūpi yaccāgurusāradārubhiḥ |
nipīya bhṛṅgārakasaṅgi tatra tairavarṇi vāri prativāramīdṛśam || 89 ||
[Analyze grammar]

tvayā vidhātaryadakāri cāmṛtaṃ kṛtaṃ ca yajjīvanamambu sādhu tat |
vṛthedamārambhi tu sarvatomukhastathocitaḥ kartuṃidaṃpibastava || 90 ||
[Analyze grammar]

sarojakośābhinayena pāṇinā sthite'pi kūre muhureva yācate |
sakhi tvamasmai vitara tvamityubhe mitho na vādāddadatuḥ kilaudanam || 91 ||
[Analyze grammar]

iyaṃ kiyaccārukuceti paśyate payaḥpradāyā hṛdayaṃ samāvṛtam |
dhruvaṃ manojñā vyataradyuduttaraṃ bhiṣeṇa bhṛṅgāradhṛte karadvayī || 92 ||
[Analyze grammar]

amībhirākaṇṭhamabhoji tadgṛhe tuṣāradhārāmṛditeva śarkarā |
hayadviṣadbaṣkayaṇīpayaḥsutaṃ sudhāhradātpaṅkamivoddhṛtaṃ dadhi || 93 ||
[Analyze grammar]

tadantarantaḥ suṣirasya bindubhiḥ karambitaṃ kalpayatā jagatkṛtā |
itastataḥ spaṣṭamacori māyinā nirīkṣya tṛṣṇācalajihvatābhṛtā || 94 ||
[Analyze grammar]

dadāsi me tanna ruceryadāspadaṃ na yatra rāgaḥ sitayāpi kiṃ tayā |
itīriṇe bimbaphalaṃ phalecchalādadāyi bimbādharayārucecca tat || 95 ||
[Analyze grammar]

samaṃ yayoriṅgitavānvayasyayostayorvihāyopahṛtapratīṅgitām |
akāri nākūtamavāri sā yayā vidagdhayā'rañji tayaiva bhāvavit || 96 ||
[Analyze grammar]

sakhīṃ prati smāha yuveṅgitekṣiṇī krameṇa te'yaṃ kṣamate na ditsutām |
viloma tadvyañjanamarpyate tvayā varaṃ kimasmai na nitāntamarthine || 97 ||
[Analyze grammar]

samāptilipyeva bhujikriyāvidherdalodaraṃ vartulayālayīkṛtam |
alaṃkṛtaṃ kṣīravaṭaistadaśnatāṃ rarāja pākārpitagairikaśriyā || 98 ||
[Analyze grammar]

cucumba norvīvalayorvaśīṃ paraṃ puro'dhipāri pratibimbitāṃ viṭaḥ |
punaḥpunaḥ pānakapānakaitavāccakāra taccumbanacuṃkṛtānyapi || 99 ||
[Analyze grammar]

ghanairamīṣāṃ pariveṣakairjanairavarṣi varṣopalagolakāvalī |
caladbhujābhūṣaṇaratnarociṣā dhṛtendracāpaiḥ śritacāndrasaurabhā || 10 ||
[Analyze grammar]

kiyadbahu vyañjanametadarpyate mameti tṛptervadatāṃ punaḥpunaḥ |
amūni saṃkhyātumasāvaḍhauki taiśchalena teṣāṃ kaṭhinīva bhūyasī || 101 ||
[Analyze grammar]

vidagdhabāleṅgitagupticāturī pravahlikotpāṭanapāṭave hṛdaḥ |
nijasya ṭīkāṃ prababandha kāmukaḥ spṛśadbhirākūtaśataistadaucitīm || 102 ||
[Analyze grammar]

ghṛtaplute bhojanabhājane puraḥ sphuratpuraṃdhripratibimbitākṛteḥ |
yuvā nidhāyorasi laḍḍukadvayaṃ nakhairlilekhātha mamarda nirdayam || 103 ||
[Analyze grammar]

vilokite rāgitareṇa sasmitaṃ hriyātha vaimukhyamite sakhījane |
tadālirānīya kuto'pi śārkarīṃ kare dadau tasya vihasya putrikām || 104 ||
[Analyze grammar]

nirīkṣya ramyāḥ pariveṣikā dhruvaṃ na bhuktamevaibhiravāptatṛptibhiḥ |
aśaknuvidbhirbahubhuktavattayā yadujjhitā vyañjanapuñjarāśayaḥ || 105 ||
[Analyze grammar]

pṛthakprakāreṅgitaśaṃsitāśayo yuvā yayodāsi tayāpi tāpitaḥ |
tato nirāśaḥ paribhāvayanparāmaye tayātoṣi saroṣāyaiva saḥ || 106 ||
[Analyze grammar]

payaḥ smitā maṇḍakamaṇḍanāmbarā vaṭānanenduḥ pṛthulaḍḍukastanī |
padaṃ rucerbhojyabhujāṃ bhujikriyā priyā babhūvojjvalakūrahāriṇī || 107 ||
[Analyze grammar]

ciraṃ yuvākūtaśataiḥ kṛtāṛthanaściraṃ saroṣeṅgitayā ca nirdhutaḥ |
sṛjankarakṣālanalīlayāñjalīnaseci kiṃcidvidhutāmbudhārayā || 108 ||
[Analyze grammar]

na ṣaḍvidhaḥ ṣiṅgajanasya bhojane tathā yathā yauvatavibhramodbhavaḥ |
apāraśṛṅgāramayaḥ samunmiṣanbhṛśaṃ rasastoṣamadhatta saptamaḥ || 109 ||
[Analyze grammar]

mukhe nidhāya kramukaṃ nalānugairathaujjhi parṇāliravekṣya vṛścikam |
damārpitāntarmukhavāsanirmitaṃ bhayāvilaiḥ svabhramahāsitākhilaiḥ || 110 ||
[Analyze grammar]

amīṣu tathyānṛtaratnajātayorvarāṭarāṭcārunitāntacāruṇoḥ |
svayaṃ gṛhāṇaikamihetyudīrya taddvayaṃ dadau śeṣajighṛkṣave hasan || 111 ||
[Analyze grammar]

iti dvikṛtvaḥ śucimṛṣṭabhojināṃ dināni teṣāṃ katicinmudā yayuḥ |
dviraṣṭasaṃvatsaravārasundarīparīṣṭibhistuṣṭimupeyuṣāṃ niśi || 112 ||
[Analyze grammar]

uvāsa vaidarbhagṛheṣu pañcaṣā niśāḥ kṛśāṅgīṃ pariṇīya tāṃ nalaḥ |
atha pratasthe niṣadhānsahānayā rathena vārṣṇeyagṛhītaraśminā || 113 ||
[Analyze grammar]

parasya na spraṣṭumimāmadhikriyā priyā śiśuḥ prāṃśurasāviti bruvan |
rathe sa bhaimīṃ svayamadhyarūruhanna tatkilāślikṣadimāṃ janekṣitaḥ || 114 ||
[Analyze grammar]

iti smaraḥ śīghramatiścakāra taṃ vadhūṃ ca romāñcabhareṇa karkaśau |
skhaliṣyati snigdhatanuḥ priyādiyaṃ mradīyasī pīḍanabhīrudoryugāt || 115 ||
[Analyze grammar]

tathā kimājanmanijāṅkavardhitāṃ prahitya putrīṃ pitarau viṣedatuḥ |
visṛjya tau taṃ duhituḥ patiṃ yathā vinītatālakṣaguṇībhavadguṇam || 116 ||
[Analyze grammar]

nijādanuvrajya sa maṇḍalāvadhernalaṃ nivṛttau caṭulāpatāṃ gataḥ |
taḍāgakallola ivānilaṃ taṭāddhṛtānatirvyāvavṛte varāṭarāṭ || 117 ||
[Analyze grammar]

pitātmanaḥ puṇyamanāpadaḥ kṣamā dhanaṃ manastuṣṭirathākhilaṃ nalaḥ |
ataḥ paraṃ putri na ko'pi te'hamityudasrureṣa vyasṛjannijaurasīm || 118 ||
[Analyze grammar]

priyaḥ priyaikācaraṇāccireṇa tāṃ pituḥ smarantīmacikitsadādhiṣu |
tathāsta tanmātṛviyogavāḍavaḥ sa tu priyapremamahāmbudhāvapi || 119 ||
[Analyze grammar]

asau mahībhṛdbahudhātumaṇḍitastayā nijopatyakayeva kāmapi |
bhuvā kuraṅgakṣaṇadanticārayorbabhāra śobhāṃ kṛtapādasevayā || 120 ||
[Analyze grammar]

tadekatānasya nṛpasya rakṣituṃ ciroḍhayā bhāvamivātmani śriyā |
vihāya sāpatnyamarañji bhīmajā samagratadvāñchitapūrtivṛttibhiḥ || 121 ||
[Analyze grammar]

masāramālāvalitoraṇāṃ puraṃ nijādviyogādiva lambitālakām |
dadarśa paśyāmiva naiṣadhaḥ priyāmathāśritodgrīvikamunnatairgṛhaiḥ || 122 ||
[Analyze grammar]

purīnirīkṣānyamanā manāgiti priyāya bhaimyā nibhṛtaṃ visarjitaḥ |
yayau kaṭākṣaḥ sahasā nivartinā tadīkṣaṇenārdhapathe samāgamam || 123 ||
[Analyze grammar]

atha nagaradhṛtairamātyaratnaiḥ pathi samiyāya sa jāyayābhirāmaḥ |
madhuriva kusumaśriyā sanāthaḥ kramamilitairalibhiḥ kutūhalotkaiḥ || 124 ||
[Analyze grammar]

kiyadapi kathayansvavṛttajātaṃ śravaṇakutūhalacañcaleṣu teṣu |
kiyadapi nijadeśavṛttamebhyaḥ śravaṇapathaṃ sa nayanpurīṃ viveśa || 125 ||
[Analyze grammar]

atha pathi pathi lājairātmano bāhuvallīmukulakulasakulyaiḥ pūjayantyo jayeti |
kṣitipatimupanemustaṃ dadhānā janānāmamṛtajalamṛṇālīsaukumāṛyaṃ kumāryaḥ || 126 ||
[Analyze grammar]

abhinavadamayantīkāntijālāvalokapravaṇapurapurandhrīvaktracandrānvayena |
nikhilanagarasaudhāṭṭāvalīcandraśālāḥkṣāṇamiva nijasaṃjñāṃsānvayāmanvabhūvan || 127 ||
[Analyze grammar]

niṣadhanṛpamukhenduśrīsudhāṃ saudhavātāyanavivaragaraśmiśreṇinālopanītām |
papurasamapipāsāpāṃsulatvotparāgāṇyakhilapurapurandhrīnetranīlotpalāni || 128 ||
[Analyze grammar]

avanipatipathāṭṭastraiṇapāṇipravālaskhalitasurabhilājavyājabhājaḥpratīcchan |
upari kusumavṛṣṭīreṣa vaimānikānāmabhinavakṛtabhaimīsaudhabhūmiṃ viveśa || 129 ||
[Analyze grammar]

iti pariṇayamitthaṃ yānamekatra yāne daracakitakaṭākṣaprekṣaṇaṃ cānayostat |
divi diviṣadadhīśāḥkautukenāvalokya praṇidadhurivagantuṃ nākamānandasāndrāḥ || 130 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
kāśmīrairmahite caturdaśatayīṃ vidyāṃ vidadbhirmahākāvye tadbhuvi naiṣadhīyacarite sargo'gamatṣoḍaśaḥ || 131 ||
[Analyze grammar]