Chapter 13

kalpadrumānparimalā iva bhṛṅgamālāmātmāśrayāmakhilanindanaśākhivṛndāt |
tāṃ rājakādapagamayya vimānadhuryā ninyurnalākṛtidharānatha pañcavīrān || 1 ||
[Analyze grammar]

sākṣātkṛtākhilajagajjanatācaritrā tatrādhināthamadhikṛtya divastathā sā |
ūce yathā sa ca śacīpatirabhyadhāyi prākāśi tasya na ca naiṣadhakāyamāyā || 2 ||
[Analyze grammar]

brūmaḥ kimasya varavarṇini vīrasenodbhūtiṃ dviṣadbalavijitvarapauruṣasya |
senācarībhavadibhānanadānavārivāsena yasya janitāsurabhīraṇaśrīḥ || 3 ||
[Analyze grammar]

śubhrāṃśuhāragaṇahāripayodharāṅkacumbīndracāpakhacitadyumaṇiprabhābhiḥ |
anvāsyate samiti cāmaravāhinībhiryātrāsu caiṣa bahulābharaṇārcitābhiḥ || 4 ||
[Analyze grammar]

kṣoṇībhṛtāmatulakarkaśavigrahāṇāmuddāmadarpaharikuñjarakoṭibhājām |
pakṣacchidāmayamudagrabalo vidhāya magnaṃ vipajjalanidhau jagadujjahāra || 5 ||
[Analyze grammar]

bhūmībhṛtaḥ samiti jiṣṇumapavyapāyaṃ jānīhi na tvamaghavantamamuṃ kathaṃcit |
guptaṃ ghaṭapratibhaṭastani bāhunetraṃ nālokase'tiśayamadbhutametadīyam || 6 ||
[Analyze grammar]

lekhā nitambini balādisamṛddharājyaprājyopabhogapiśunā dadhate sarāgam |
etasya pāṇicaraṇaṃ tadanena patyā sārdhaṃ śacīva hariṇā mudamudvahasva || 7 ||
[Analyze grammar]

ākarṇya tulyamakhilāṃ sudatī lagantīmākhaṇḍale'pi ca nale'pi ca vācametām |
rūpaṃ samānamubhayatra vigāhamānā śrotrānna nirṇayamavāpadasau na netrāt || 8 ||
[Analyze grammar]

śakraḥ kimeṣa niṣādhādhipatiḥ sa veti dolāyamānamanasaṃ paribhāvya bhaimīm |
nirdiśya tatra pavanasya sakhāyamasyāṃ bhūyo'sṛjadbhagavatī vacasaḥ srajaṃ sā || 9 ||
[Analyze grammar]

eṣa pratāpanidhirudgatimānsadā'yaṃ kiṃ nām nārjitamanena dhanaṃjayena |
hema prabhūtamadhigaccha śuceramuṣmānāsyeva kasyacana bhāsvararūpasaṃpat || 10 ||
[Analyze grammar]

asyarthahetipaṭutākavalībhavattattatpārthivādhikaraṇaprabhavā'sya bhūtiḥ |
apyaṅgarāgajananāya maheśvarasya saṃjāyate rucirakarṇi tapasvino'pi || 11 ||
[Analyze grammar]

etanmukhā vibudhasaṃsadasāvaśeṣā mādhyasthyamasya yamato'pi mahendrato'pi |
enaṃ mahasvinamupehi sadāruṇoccairyenāmunā pitṛmukhi dhriyate karaśrīḥ || 12 ||
[Analyze grammar]

naivālpamedhasi paṭo rucimattvamasya madhyesaminnivasato ripavastṛṇāni |
utthānavāniha parābhavituṃ tarasvī śakyaḥ punarbhavati kena virodhināyam || 13 ||
[Analyze grammar]

sādhāraṇīṃ giramuṣarbudhanaiṣadhābhyāmetāṃ nipīya na viśeṣamavāptavatyā |
ūce nalo'yamiti taṃ prati cittamekaṃ brūte sma cānyadanalo'yamitīdamīyam || 14 ||
[Analyze grammar]

etādṛśīmatha vilokya sarasvatī tāṃ saṃdehacitrabhayacitritacittavṛttim |
devasya sūnumaravindavikāsiraśmeruddiśya dikpatimudīrayituṃ pracakre || 15 ||
[Analyze grammar]

daṇḍaṃ bibhartyayamaho jagatastataḥ syātkampākulasya sakalasya na paṅkapātaḥ |
svarvaidyayorapi madavyayadāyinībhiretasya rugbhiramaraḥ kimu kaścidasti || 16 ||
[Analyze grammar]

mittrapriyopajananaṃ prati heturasya saṃjñā śrutāsuhṛdayaṃ na janasya kasya |
chāyedṛgasya ca na kutracidadhyagāyi taptaṃ yamena niyamena tapo'munaiva || 17 ||
[Analyze grammar]

kiṃca prabhāvanamitākhilarājatejā devaḥ pitāmbaramaṇī ramaṇīyamūrtiḥ |
utkrāntidā kamanu na pratibhāti śaktiḥ kṛṣṇatvamasya ca pareṣu gadānniyoktuḥ || 18 ||
[Analyze grammar]

ekaḥ prabhāvamayameti paretarājau tajjīviteśadhiyamatra nidhatsva mugdhe |
bhūteṣu yasya khalu bhūriyamasya vaśyabhāvaṃ samāśrayati dasrasahodarasya || 19 ||
[Analyze grammar]

gumpho girāṃ śamananaiṣādhayoḥ samānaḥ śaṅkāmanekanaladarśanajātaśaṅke |
citte vidarbhavasudhādhipateḥ sutāyā yannirmame khalu tadeṣa pipeṣa piṣṭam || 20 ||
[Analyze grammar]

tatrāpi tatrabhavatī bhṛśasaṃśayālorālokya sā vidhiniṣedhanivṛttimasyāḥ |
yāthaḥpatiṃ prati dhṛtābhimukhāṅgulīkapāṇiḥ kramocitamupākramatābhidhātum || 21 ||
[Analyze grammar]

yā sarvatomukhatayā vyavatiṣṭhamānā yādoraṇairjayati naikavidārakā yā |
etasya bhūritaravārinidhiścamūḥ sā yasyāḥ pratītiviṣayaḥ parato na rodhaḥ || 22 ||
[Analyze grammar]

nāsīrasīmani ghanadhvanirasya bhūyānkumbhīravānsamakaraḥ sahadānavāriḥ |
utpadmakānanasakhaḥ sukhamātanoti ratnairalaṃkaraṇabhāvamitairnadīnaḥ || 23 ||
[Analyze grammar]

sasyandanaiḥ pravahaṇaiḥ pratikūlapātaṃ kā vāhinī na tanute punarasya nāma |
tasyā vilāsavati karkaśatāśritā yā bhūmaḥ katham bahutayāsikatā vayaṃ tāḥ || 24 ||
[Analyze grammar]

śoṇaṃ padapraṇayinaṃ guṇamasya paśya kiṃcāsya sevanaparaiva sarakhatī sā |
enaṃ bhajasva subhage bhuvanādhināthaṃ kiṃ vā bhajanti tamimaṃ kamalāśayā na || 25 ||
[Analyze grammar]

śaṅkālatātatimanekanalāvalambāṃ vāṇī navardhayatu tāvadabhedikeyam |
bhīmodbhavāṃ prati nale ca jaleśvare ca tulyaṃ tathāpi yadavardhayadatra citram || 26 ||
[Analyze grammar]

bālāṃ vilokya vibudhairapi māyibhistairacchadmitāmiyamalīkanalīkṛtasvaiḥ |
āha sma tāṃ bhagavatī niṣadhādhināthaṃ nirdiśya rājapariṣatpariveṣabhājam || 27 ||
[Analyze grammar]

atyājilabdhavijayaprasarastvayā kiṃ vijñāyate rucipadaṃ na mahīmahendraḥ |
pratyarthidānavaśatāhitaceṣṭayāsau jīmūtavāhanadhiyaṃ na karoti kasya || 28 ||
[Analyze grammar]

yenāmunā bahuvigāḍhasureśvarādhvarājyābhiṣekavikasanmahasā babhūve |
āvarjanaṃ tamanu te nanu sādhu nāmagrāhaṃ mayā nalamudīritamevamatra || 29 ||
[Analyze grammar]

yaccaṇḍimāraṇavidhivyasanaṃ ca tattvaṃ buddhvāśayāśritamamuṣya ca dakṣiṇatvam |
saiṣā nale sahajarāgabharādamuṣminnātmānamarpayitumarhasi dharmarāje || 30 ||
[Analyze grammar]

kiṃ te tathā matiramuṣya yathāśayaḥ syāttvatpāṇipīḍanavinirmitaye'napāśaḥ |
kānmānavānavati no bhuvanaṃ cariṣṇūnnāsāvamutra naratā bhavatīti yuktam || 31 ||
[Analyze grammar]

ślokādiha prathamato hariṇā dvitīyāddhūmadhvajena śamanena samaṃ tṛtīyāt |
turyācca tasya varuṇena samānabhāvaṃ sā jānatī punaravādi tayā vimugdhā || 32 ||
[Analyze grammar]

tvaṃ yā'rthinī kila nale na śubhāya tasyāḥ kva syānnijārpaṇamamuṣya catuṣṭaye te |
indrānalāryamatanūjapayaḥpatīnāṃ prāpyaikarūpyamiha saṃsadi dīpyamāne || 33 ||
[Analyze grammar]

devaḥ patirviduṣi naiṣa dharājagatyā nirṇīyate na kimu na vriyate bhavatyā |
nāyaṃ nalaḥ khalu tavātimahānalābho yadyenamujjhasi varaḥ kataraḥ paraste || 34 ||
[Analyze grammar]

indrāgnidakṣiṇadigīśvarapāśibhistāṃ vācaṃ nale taralitātha samāṃ pramāya |
sā sindhuveṇiriva vāḍavavītihotraṃ lāvaṇyabhūḥ kamapi bhīmasutāpa tāpam || 35 ||
[Analyze grammar]

sāptuṃ prayacchati na pakṣacatuṣṭaye tāṃ tallābhaśaṃsini na pañcamakoṭimātre |
śraddhāṃ dadhe niṣadharāḍvimatau matānāmadvaitatattva iva satyatare'pi lokaḥ || 36 ||
[Analyze grammar]

kāriṣyate paribhavaḥ kalinā nalasya tāṃ dvāparastu sutanūmadunotpurastāt |
bhaimīnalopayamanaṃ piśunau sahete na dvāparaḥ kila kaliśca yuge jagatyām || 37 ||
[Analyze grammar]

utkaṇṭhayanpṛthagimāṃ yugapannaleṣu pratyekameṣu parimohayamāṇabāṇaḥ |
jānīvahe nijaśilīmukhaśīlisaṃkhyāsāphalyamāpa sa tadā yadi pañcabāṇaḥ || 38 ||
[Analyze grammar]

devāniyaṃ niṣādharājarucastyajantī rūpādarajyata nale na vidarbhasubhrūḥ |
janmāntarādhigatakarmavipākajanmaivonmīlati kvacana kasyacanānurāgaḥ || 39 ||
[Analyze grammar]

kva prāpyate sa patagaḥ paripṛcchyate yaḥ pratyemi tasya hi pureva nalaṃ gireti |
sasmāra sasmaramatiḥ prati naiṣadhīyaṃ tatrāmarālayamarālamarālakeśī || 40 ||
[Analyze grammar]

ekaikamaikṣata muhurmahatādareṇa bhedaṃ viveda na ca pañcasu kaṃcideṣā |
śaṅkāśataṃ vitaratā haratā punastadunmādineva manaseyamidaṃ tadāha || 41 ||
[Analyze grammar]

asti dvicandramatirasti janasya tatra bhrāntau dṛgantacipiṭīkaraṇādirādiḥ |
svacchopasarpaṇamapi pratimābhimāne bhedabhrame punaramīṣu na me nimittam || 42 ||
[Analyze grammar]

kiṃ vā tanoti mayi naiṣadha eva kāvavyūhaṃ vidhāya parihāsamasau vilāsī |
vijñānavaibhavabhṛtaḥ kimu tasya vidyā sā vidyate na turagāśayavediteva || 43 ||
[Analyze grammar]

eko nalaḥ kimayamanyatamaḥ kimailaḥ kāmo'paraḥ kimu kimu dvayamāśvineyau |
kiṃ rūpadheyabharasīmatayā sameṣu teṣveva neha nalamohamahaṃ vahe vā || 44 ||
[Analyze grammar]

pūrvaṃ mayā virahaniḥsahayāpi dṛṣṭaḥ so'yaṃ priyastata ito niṣadhādhirājaḥ |
bhūyaḥ kimāgatavatī mama sā daśeyaṃ paśyāmi yadvilasitena nalānalīkān || 45 ||
[Analyze grammar]

mugdhā dadhāmi kathamitthamathāpaśaṅkāṃ saṃkrandanādikapaṭaḥ sphuṭamīdṛśo'yam |
devyānayaiva racitā hi tathā tathaiṣāṃ gāthā yathā digadhipānapi tāḥ spṛśanti || 46 ||
[Analyze grammar]

etanmadīyamativañcakapañcakasthe nāthe kathaṃ nu manujasya cakāstu cihnam |
lakṣmāṇi tāni kimamī na vahanti hanta barhirmukhā dhutarajastanutāmukhāni || 47 ||
[Analyze grammar]

yāce nalaṃ kimamarānathavā tadarthaṃ nityārcanādapi mamāphalinairalaṃ taiḥ |
kaṃdarpaśoṣaṇaśilīmukhapātapītakāruṇyanīranidhigahvaradhoracittaiḥ || 48 ||
[Analyze grammar]

īśā diśāṃ nalabhuvaṃ pratipadya lekhā varṇiśriyaṃ guṇavatāmapi vaḥ kathaṃ vā |
mūrkhāndhakūpapatanādiva pustakānāmastaṃ gataṃ bata paropakṛtivratatvam || 49 ||
[Analyze grammar]

yasyeśvareṇa yadalekhi lalāṭapaṭṭe tatsyādayogyamapi yogyamapāsya tasya |
kā vāsanāstu bibhṛyāmiha yāṃ hṛdāhaṃ nārkātapairjalajameti himaistu dāham || 50 ||
[Analyze grammar]

itthaṃ yatheha madabhāgyamanena manye kalpadrumo'pi sa mayā khalu yācyamānaḥ |
saṃkocasaṃjvaradalāṅgulipallavāgrapāṇībhavanbhavati māṃ prati baddhamuṣṭiḥ || 51 ||
[Analyze grammar]

devyāḥ kare varaṇamālyamathārpaye vā yo vairaseniriha tatra niveśayeti |
saiṣā mayā makhabhujāṃ dviṣatī kṛtā syātsvasmai tṛṇāya tu vihanmi na bandhuratnam || 52 ||
[Analyze grammar]

yaḥ syādamīṣu paramāṛthanalaḥ sa mālāmaṅgīkarotu varaṇāya mameti cainām |
taṃ prāpayāmi yadi tattu visṛjya lajjāṃ kurve kathaṃ jagati śṛṅvati hī viḍambaḥ || 53 ||
[Analyze grammar]

itaranalatulābhāgeṣa śeṣāḥ sudhābhiḥ snapayati mama ceto naiṣadhaḥ kasya hetoḥ |
prathamacaramayorvā śabdayorvarṇasakhye vilasati carame'nuprāsabhāsāṃ vilāsaḥ || 54 ||
[Analyze grammar]

iti manasi vikalpānudyataḥ saṃtyajantī kvacidapi damayantī nirṇayaṃ nāsasāda |
mukhamatha paritāpāskanditānandamasyā mihiraviracitāvaskandaminduṃ nininda || 55 ||
[Analyze grammar]

śrīharśaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
svādūtpādabhṛti trayodaśatayādeśyastadīye mahākāvye'yaṃ vyaramannalasya carite sargo rasāmbhonidhiḥ || 56 ||
[Analyze grammar]