Chapter 5

atha saṃpreṣitāsthānaḥ sacivānabravīnnṛpaḥ |
yadbravīmi nibodhantu bhavantastatsacetasaḥ || 1 ||
[Analyze grammar]

ṛṇaiḥ kila samāghrātaḥ puruṣo jāyate tribhiḥ |
brahmacaryeṣṭisaṃtānairṛṣidevasvadhābhujām || 2 ||
[Analyze grammar]

tatrādhigatavedo'hamiṣṭāśeṣamahākratuḥ |
aputratvāttu pitṛbhirgṛhītaḥ piṇḍabhojibhiḥ || 3 ||
[Analyze grammar]

na ca putrāṅgasaṃsparśātsukhaheturanuttaraḥ |
sukhibhiḥ sa hi nirdiṣṭaścandanādapi śītalaḥ || 4 ||
[Analyze grammar]

alaṃ cātiprasaṅgena sarvathā gṛhamedhinām |
dṛṣṭādṛṣṭasukhaprāpteḥ putrādanyanna kāraṇam || 5 ||
[Analyze grammar]

tadasti yadi vaḥ kāṅkṣā niṣprajānāṃ prajāṃ prati |
ārabhadhvaṃ mayā sārdhaṃ devatārādhanaṃ tataḥ || 6 ||
[Analyze grammar]

te tu sapramadāḥ śrutvā rājñaḥ putrārthinaḥ kathām |
siddhakalpātmasaṃkalpāḥ pratyūcurdarśitasmitāḥ || 7 ||
[Analyze grammar]

putrajanma vaṇigvadhvā yātrāyāṃ citradarśanam |
piṅgalīdarśanaṃ ceti prayogo'yamanuṣṭhitaḥ || 8 ||
[Analyze grammar]

asmābhiḥ sa ca devena tathaiva saphalīkṛtaḥ |
kṛtaḥ kāle prayogo hi nāphalo jātu jāyate || 9 ||
[Analyze grammar]

tena saṃkalpasadṛśīmārabhadhvaṃ kriyāmiti |
sacivairabhyanujñātastatheti pratipannavān || 10 ||
[Analyze grammar]

sa puṇye'hani saṃpūjya devatāgnidvijanmanaḥ |
yayau nāgavanodyānaṃ sadāraḥ saha mantribhiḥ || 11 ||
[Analyze grammar]

māgadhī tu kṛtotsāhā devyā vāsavadattayā |
alamāli tavānena khedeneti nivāritā || 12 ||
[Analyze grammar]

uktā ca nanu bālāsi mṛṇālītantukomalā |
anubhūtasukhā cāsi bhrāturbhartuśca veśmani || 13 ||
[Analyze grammar]

duḥsahāni tu duḥkhāni mayā ninditabhāgyayā |
anubhūtāni tenāhaṃ śaktā duḥkhamupāsitum || 14 ||
[Analyze grammar]

yaśca me bhavitā putraḥ sa bhavatyā bhaviṣyati |
kṛttikāgarbhasaṃbhūto bhavānyā iva ṣaṇmukhaḥ || 15 ||
[Analyze grammar]

iti tasyāṃ nivṛttāyāṃ saha vāsavadattayā |
tapobhiracirād rājā rājarājamatoṣayat || 16 ||
[Analyze grammar]

ekadā pratibhuddhau tu daṃpatī jātasaṃbhramau |
hā devi hāryaputreti vyāharantau parasparam || 17 ||
[Analyze grammar]

athopaspṛśya nṛpatirnamaskṛtvā dhanādhipam |
puraḥ purohitādīnāmācakhyau svapnamādṛtaḥ || 18 ||
[Analyze grammar]

adya paśyāmyahaṃ svapne vyomni kāmapi devatām |
prabhāmbhaḥsaṃtativyastanabhomaṇḍalanīlatām || 19 ||
[Analyze grammar]

sā māmuktavatī vācā ghambhīrasukumārayā |
tvāmāhvayati vitteśastadāśāṃ gamyatāmataḥ || 20 ||
[Analyze grammar]

mayaumiti pratijñāte saṃdhyāraktataraṃ karam |
āropya prasthitā vyomni diśaṃ vitteśapālitām || 21 ||
[Analyze grammar]

śarveṇeha dhṛtā gaṅgā pariṇītātra pārvatī |
ityādīndarśayantī nau pradeśaṃ pārvatīpituḥ || 22 ||
[Analyze grammar]

nīyamānaḥ krameṇetthamathāhaṃ dṛṣṭavānpuraḥ |
candrapāṣāṇanirmāṇaprākārāmalakāpurīm || 23 ||
[Analyze grammar]

gaṇānāṃ pārvatībharturgaṇairagaṇitairyutam |
yasyā bāhyamadṛṣṭāntaṃ kalpapādapakānanam || 24 ||
[Analyze grammar]

nānāmaṇiprabhājālakalmāṣaśikharāṇyapi |
śubhrayatyeva harmyāṇi yasyāṃ rudrenducandrikā || 25 ||
[Analyze grammar]

avatārya tu māṃ dvāre guhyakeśvaraveśmanaḥ |
vadati kṣaṇamatraiva sthīyatāmiti devatā || 26 ||
[Analyze grammar]

sā praviśya pratīhāryā saha nirgamya bhāṣate |
anujñātapraveśo'si devenāgamyatāmiti || 27 ||
[Analyze grammar]

bhavanānīva devānāṃ ṣaḍatikramya saptame |
kakṣāntare prakṛṣṭarddhau paśyāmi draviṇeśvaram || 28 ||
[Analyze grammar]

atha tatrāpsarāḥ kācitkāṃcidāha nirīkṣya mām |
sakhi nūnamasāveṣa yasyāsau bhavitā sutaḥ || 29 ||
[Analyze grammar]

mayā mantrayamāṇānāmṛṣīṇāmagrataḥ śrutam |
bharatānāmayaṃ vaṃśe viśuddhe jāyatāmiti || 30 ||
[Analyze grammar]

na caiṣa kevalaṃ dhanyastena putreṇa pārthivaḥ |
so'pi sādhūpamānasya putraḥ pātraṃ bhaviṣyati || 31 ||
[Analyze grammar]

tena tattādṛśaṃ putraṃ labhatāmeṣa bhūpatiḥ |
asāvapi śacīśakracaritau pitarāvapi || 32 ||
[Analyze grammar]

kārye guruṇi saktatvāttṛṇīkṛtasurāṅganaḥ |
sakiṃkaragaṇaṃ prahvaḥ praṇamāmi dhanādhipam || 33 ||
[Analyze grammar]

manuṣyadharmā tu bhujaṃ bhujageśvarapīvaram |
udyamyāha manuṣyendra svāgataṃ sthīyatāmiti || 34 ||
[Analyze grammar]

āsanne ratnacaraṇe dāpite kanakāsane |
vyavadhāya tu māmāste devī nīcaistarāsanā || 35 ||
[Analyze grammar]

svananti parivādinyastāḍitā nāradādibhiḥ |
anekākārakaraṇaḥ śrūyate puṣkaradhvaniḥ || 36 ||
[Analyze grammar]

urvaśīmenakārambhācitralekhākratusthalāḥ |
gāyantyaḥ kuṭṭitatalānartayante tilottamām || 37 ||
[Analyze grammar]

evaṃprāye ca vṛttānte kumāro nalakūbaraḥ |
rājarājasutaḥ krīḍannāyātaḥ saha bālakaiḥ || 38 ||
[Analyze grammar]

merusāramahāratnasaṃghātakṛtasaṃhatim |
krīḍāśakaṭikāṃ karṣannitaścetaśca gacchati || 39 ||
[Analyze grammar]

atha skhalitacakrāyāstasyāḥ kusumasaṃcaye |
utplutya patitaṃ ratnaṃ vaiḍūryakṣodakuṭṭime || 40 ||
[Analyze grammar]

atha prasāritakaraḥ kuvero nalakūbaram |
mahyametaddadasveti tad ratnamudayācata || 41 ||
[Analyze grammar]

nyastaṃ ca rājaputreṇa rājarājakarodare |
ratnaṃ paṅkajagarbhasthabandhūkamiva rājate || 42 ||
[Analyze grammar]

duṣṭalakṣaṇamuktānāṃ muktānāṃ parivāritam |
ṣaḍviṃśatyā padmarāgamaṣṭāśri bahalaprabham || 43 ||
[Analyze grammar]

vittādhipatinā mahyaṃ dattaṃ devyai ca tanmayā |
stanayorantare nyastamanayāpi sphuranmudā || 44 ||
[Analyze grammar]

siṃhaśāvastato bhūtvā cañcadvāladhikeśaraḥ |
vidārya dakṣiṇaṃ kukṣimetasyāḥ praviśatyasau || 45 ||
[Analyze grammar]

tadavasthāmimāṃ dṛṣṭvā hā devīti vadannaham |
pratibuddha iti svapnamācaṣṭe sma narādhipaḥ || 46 ||
[Analyze grammar]

atha nakṣatraśāstrajñaḥ siddhādeśaḥ sasaṃmadaḥ |
ādityaśarmā svapnasya dvijaḥ phalamavarṇayat || 47 ||
[Analyze grammar]

vijayasva mahārāja putreṇa dviṣatāṃ gaṇam |
samādhineva balinā rāgādīnāṃ balīyasām || 48 ||
[Analyze grammar]

vimānaghanasaṃghātasthagitendudivākaraḥ |
vidyādharasamūhendraḥ putrastava bhaviṣyati || 49 ||
[Analyze grammar]

yāstā muktāparīvārāstasya ṣaḍviṃśati maṇeḥ |
mahākulā bhaviṣyanti bhāryāstava sutasya tāḥ || 50 ||
[Analyze grammar]

ye cāṣṭāvaśrayo ratnaṃ parito lakṣitāstvayā |
vidyāstā viddhi putrasya bhaviṣyantī bhaviṣyataḥ || 51 ||
[Analyze grammar]

evaṃ ca sthāpite svapne rājakīye dvijanmanā |
svasvapnaḥ kathitastatra devyā vāsavadattayā || 52 ||
[Analyze grammar]

āryaputreṇa yo dṛṣṭaḥ sa eva sakalo mayā |
kukṣau vidāryamāṇe ca hāryaputreti bhāṣitam || 53 ||
[Analyze grammar]

iti śrutavataḥ svapnau tulyāvādityaśarmaṇaḥ |
bhaviṣyadviṣaye jñāne dṛḍhatāṃ niścayo gataḥ || 54 ||
[Analyze grammar]

atha vijñāpayāmāsa rumaṇvānmedinīpatim |
dṛṣṭaḥ svapno mayā yaḥ sa śravaṇenānugṛhyatām || 55 ||
[Analyze grammar]

deve saniyame jāte cedivatsaniveśinaḥ |
devasyāpatyalābhāya sarve saniyamāḥ sthitāḥ || 56 ||
[Analyze grammar]

tatrāhamadya paśyāmi svapne garuḍavāhanam |
mārgitaśca mayā dehi svāmine naḥ prajā iti || 57 ||
[Analyze grammar]

sa vihasyoktavānpūrṇaḥ svāminaste manorathaḥ |
tavāpi pūrayāmīti mahyaṃ bāṇaṃ vitīrṇavān || 58 ||
[Analyze grammar]

sapraṇāmaṃ tamādāya hṛdaye nidadhāmi ca |
akālakaumudīṃ cemāṃ paśyāmi pratibodhitaḥ || 59 ||
[Analyze grammar]

eṣo'pi sthāpitaḥ svapnaḥ prītenādityaśarmaṇā |
yādṛśo'sya suto bhavī tādṛśaḥ śrūyatāmiti || 60 ||
[Analyze grammar]

sāyako hi guṇenārthī tasmādasya bhaviṣyati |
putraḥ ṣāḍguṇyatattvajño yuktaścāyaṃ guṇairguṇaiḥ || 61 ||
[Analyze grammar]

paratantragatisthānaḥ khagāmī ca yataḥ śaraḥ |
tena rājasutapraiṣyaḥ khecaraśca bhaviṣyati || 62 ||
[Analyze grammar]

athākathayadātmīyaṃ svapnaṃ yaugandharāyaṇaḥ |
mamādyaikonapañcāśanmaruto darśanaṃ gatāḥ || 63 ||
[Analyze grammar]

teṣāmekaḥ sphuraddyotaḥ khadyotanikaradyutim |
svaṃ vimucya mudā mahyaṃ saṃnāhaṃ dattavāniti || 64 ||
[Analyze grammar]

bhartuḥ saṃnāhasadṛśaḥ śūro'dhyavasitaḥ sutaḥ |
bhavato bhavitetyevaṃ svapnamāsthāpayaddvijaḥ || 65 ||
[Analyze grammar]

ṛṣabheṇeti kathitaṃ dṛṣṭavānasmi gogaṇam |
bravīti tatra māmekā praviśemāṃ guhāmiti || 66 ||
[Analyze grammar]

tatra praviśatā dṛṣṭāścatuḥṣaṣṭirmayā kalāḥ |
catasraśca mahāvidyāvinyastāścitrakarmaṇi || 67 ||
[Analyze grammar]

tatra citrīyamāṇo'haṃ citraṃ citraṃ vilokayan |
bodhito jṛmbhaṇairmandrairbherīṇāṃ garjitairiti || 68 ||
[Analyze grammar]

sthapito'yamiti svapnaḥ putrastava bhaviṣyati |
aśeṣacitravinyastakalākuśaladhīriti || 69 ||
[Analyze grammar]

dṛṣṭaṃ vasantakenāpi svapnaṃ kathitamityatha |
dattavānpāvako mahyaṃ kuṇḍalaṃ rucirojjvalam || 70 ||
[Analyze grammar]

iti vyākriyamāṇeṣu svapneṣu ravisāratheḥ |
bhinnaṃ bhābhistamo jātaṃ cakoranayanāruṇam || 72 ||
[Analyze grammar]

komalānilavikṣiptanalinasparśabodhatāḥ |
resurvivādarasitāḥ sarasīṣu śakuntayaḥ || 73 ||
[Analyze grammar]

gambhīrapratinirghoṣabhīṣitendrāvarodhanaḥ |
devatāgārabherīṇāmuccairdhvanirajṛmbhata || 74 ||
[Analyze grammar]

avadanta ca vṛndāni bandināṃ medinīpatim |
pūritārthisamūhāśa tavāśā pūryatāmiti || 75 ||
[Analyze grammar]

yuvā dhīraḥ sabhe yogyo yajamānasya jāyatām |
ityādibhirdvijāścainaṃ mantravādyairavardhayan || 76 ||
[Analyze grammar]

nimittairevamākāraiḥ kāryasaṃsiddhiśaṃsibhiḥ |
ādityaśarmaṇo jātamaṅgaṃ romāñcakarkaśam || 77 ||
[Analyze grammar]

padmāvatyā tato harṣādvivāhae iva nṛtyati |
vasantake dhvanattāle nanarta gaṇikāgaṇaḥ || 78 ||
[Analyze grammar]

alaṃ cātiprasaṅgena saṃkṣepādavadhāryatām |
vadhūvṛndaparīvārāḥ pranṛttāḥ śvaśurā api || 79 ||
[Analyze grammar]

atiharṣaparītatvādvitantrīparivādinīḥ |
tāḍayanti sma gandharvāḥ svarāvismṛtasāraṇāḥ || 80 ||
[Analyze grammar]

evamādau tu vṛttānte vartamāne mahīpatiḥ |
kṛtābhiṣekādividhiḥ suraviprānapūjayat || 81 ||
[Analyze grammar]

praviśya stūyamānaśca vṛndairbrāhmaṇabandinām |
pauramantaḥpuraṃ caiva dānādibhiramānayat || 82 ||
[Analyze grammar]

māsadvayaparīmāṇe tataḥ kāle'tigacchati |
devyāṃ sattvasamāveśavārttāṃ prāvartayatkṣitau || 83 ||
[Analyze grammar]

yena yena śrutā vārttā śabareṇa śukena vā |
giriṣṭhaḥ pañjarastho vā mugdhastatraiva tatra saḥ || 84 ||
[Analyze grammar]

striyaḥ prasūtikuśalāḥ kumārādicikitsakāḥ |
garbhakarmavidaścānye nityaṃ tāṃ paryacārayan || 85 ||
[Analyze grammar]

mlāyanmadhūkavicchāyakapolaṃ jihmalocanam |
śvaśrūstasyā mukhaṃ dṛṣṭvā bubudhe dohadavyathām || 86 ||
[Analyze grammar]

pṛcchati sma ca tāṃ putri śīghramācakṣva dohadam |
anākhyāte hi garbhasya vaiphalyamapi dṛśyate || 87 ||
[Analyze grammar]

lajjamānā yadā nāsau kathayāmāsa dohadam |
tadā svavṛttaṃ sā vadhvai vyāhartumupacakrame || 88 ||
[Analyze grammar]

antarvatnīmapṛcchanmāmekadā śvaśurastava |
bādhate dohado yastvāṃ sa kṣipraṃ kathyatāmiti || 89 ||
[Analyze grammar]

mayā tu praṇayinyāpi prakṛṣṭataralajjayā |
sakhīmukhena kathitaṃ bahukṛtvo'nuyuktayā || 90 ||
[Analyze grammar]

iyaṃ māṃ bādhate śraddhā sāśu saṃpādyatāmiti |
sā ca saṃpāditāmātyaiḥ śatānīkasya śāsanāt || 91 ||
[Analyze grammar]

bālabhāskarabimbābhādadhānāḥ sānulepanāḥ |
vyacaranta purīṃ raktāmambarābharaṇasrajaḥ || 92 ||
[Analyze grammar]

raktātapatravyajanāraktakambalavāhyakāḥ |
raktāśokavanākāraparivārakadambakāḥ || 93 ||
[Analyze grammar]

suyamunamathāruhya padmarāganagāruṇam |
digdāhādiva raktānāmapaśyaṃ maṇḍalaṃ diśām || 94 ||
[Analyze grammar]

atha pakṣānilabhrāntasaṃbhāntajanavīkṣitaḥ |
jyeṣṭhaputra ivāgacchadgaruḍasya vihaṃgamaḥ || 95 ||
[Analyze grammar]

sarasāmiṣagṛddhaśca mugdhāmādāya māmasau |
agamadgaganaṃ vegācchatānīkasya paśyataḥ || 96 ||
[Analyze grammar]

tataḥ pradeśe kasmiṃscidavatāritavān sa mām |
bhakṣayiṣyanniṣiddhaśca kenāpyākāśamāśrayat || 97 ||
[Analyze grammar]

paśyāmi sma ca tatra dvau kṛśāv ṛṣikumārakau |
prabhāmaṇḍalasaṃsargapiṅgalāṅgau jvalajjaṭau || 98 ||
[Analyze grammar]

tau māmavocatāṃ devi mā bhaiṣīrayamāśramaḥ |
vasiṣṭhasyāśritaḥ puṇyāmudayādrerupatyakām || 99 ||
[Analyze grammar]

āgaccha nanu pāvastvāṃ tatretyukte gatā satī |
paśyāmi sma jagajjyeṣṭhaṃ śreṣṭhatāpasaveṣṭitam || 100 ||
[Analyze grammar]

vanditaśca mayā dūrādāśiṣā māmavardhayat |
putri putraṃ vijāyasva yaśaḥpātramajarjaram || 101 ||
[Analyze grammar]

na cotkaṇṭhā tvayā kāryā svajane matsanāthayā |
ādityavaṃśajānāṃ hi saṃniveśaḥ parāyaṇaḥ || 102 ||
[Analyze grammar]

iti viśvāsya māṃ vākyairmadhurairevamādibhiḥ |
āvāsaḥ kriyatāṃ vadhvā iti śiṣyān samādiśat || 103 ||
[Analyze grammar]

kṣipramāvasathaṃ kṛtvā te śilādāruveṇubhiḥ |
khātaśālaparikṣiptaṃ vasiṣṭhāya nyavedayan || 104 ||
[Analyze grammar]

tāpasī kṛtasānāthyā tatrāhamavasaṃ sukham |
ṛṣibhiḥ kriyamāṇeṣu garbhasaṃskārakarmasu || 105 ||
[Analyze grammar]

prasūtā cāsmi daśame māse putraṃ patiṃ tava |
anukūlasavitṛādigrahasūcitasaṃpadam || 106 ||
[Analyze grammar]

jātakarma tataḥ kṛtvā sūryavaṃśaguruḥ svayam |
divase dvādaśe nāma putrasya kṛtavānmama || 107 ||
[Analyze grammar]

bālo jātaḥ sujāto'yaṃ yasmādudayaparvate |
tasmādudayano nāma prasiddhimupayātviti || 108 ||
[Analyze grammar]

vede gandharvavede ca sakalāsu kalāsu ca |
sāstreṣu cāstraśastreṣu buddhirasya vinīyata || 109 ||
[Analyze grammar]

gacchatsu divaseṣvevaṃ vasiṣṭhenaiṣa vāritaḥ |
mā kadācidbhavānasmāddūraṃ gā āśramāditi || 110 ||
[Analyze grammar]

nisargakarkaśatvāttu kṣatrajātestapovanāt |
niryāya mṛgayāmeṣa samakrīḍata kānane || 111 ||
[Analyze grammar]

ekadā bhrājamāno'yaṃ divyaiḥ srakcandanādibhiḥ |
abhivāditavānbhīto vasiṣṭhaṃ darśitasmitam || 112 ||
[Analyze grammar]

vasiṣṭhaḥ pṛṣṭavānenamapi dṛṣṭāḥ kumārakāḥ |
nalinyāṃ prastutakrīḍābhavatā bhogināmiti || 113 ||
[Analyze grammar]

āma dṛṣṭā iti prokte sutena mama nīcakaiḥ |
ācakṣva vistareṇeti vasiṣṭhastamabhāṣata || 114 ||
[Analyze grammar]

pṛṣṭenodayenoktamahamājñāpitastvayā |
na gantavyaṃ tvayā dūrametasmādāśramāditi || 115 ||
[Analyze grammar]

ārabhya ca tataḥ kālātkiṃ punaḥ kāraṇaṃ guruḥ |
māṃ nivārayatītyāsamahaṃ kautūhalākulaḥ || 116 ||
[Analyze grammar]

so'haṃ doṣamasaṃcintya gurvājñābhaṅgasaṃbhavam |
dūramadyāśramādasmādgacchāmi diśamuttarām || 117 ||
[Analyze grammar]

tatra paśyāmi nalinīṃ nānāsarasijāṇḍajām |
vanavāraṇasaṃkṣobhasaṃghaṭṭitanadāmbhasam || 118 ||
[Analyze grammar]

tasyāmamānuṣākārāmayā dṛṣṭāḥ kumārakāḥ |
unmajjanto nimajjantastarantaścāruṇekṣaṇāḥ || 119 ||
[Analyze grammar]

te māṃ taṭasthamālokya puñjībhūya sasaṃbhramāḥ |
dīrghadīrghabhujākṣepairagādhaṃ jalamāśritāḥ || 120 ||
[Analyze grammar]

ahaṃ tānuktavānasmi mā palāyadhvamāsyatām |
nanvahaṃ bhavato draṣṭumāśramādṛṣirāgataḥ || 121 ||
[Analyze grammar]

iti madvacanaṃ śrutvā teṣāmekena bhāṣitam |
kiṃ te'smābhirmahāsattva bhāṣitairgamyatāmiti || 122 ||
[Analyze grammar]

satyasatyaṃ na yakṣo'smi na piśāco na rākṣasaḥ |
tena mā bhaiṣṭa ḍhaukadhvamiti tānahamuktavān || 123 ||
[Analyze grammar]

taistu saṃjātaviśrambhaiḥ saṃharanvā muhūrtakam |
āgaccha prārthito mitra gṛhaṃ no gamyatāmiti || 124 ||
[Analyze grammar]

mayā tadanurodhena gacchāmīti pratiśrute |
māmādāya nimagnāste tasyaiva saraso'mbhasi || 125 ||
[Analyze grammar]

athānuditacandrārkagrahanakṣatratārakam |
candrasūryamaṇidyotapradhvastadhvāntasaṃcayam || 126 ||
[Analyze grammar]

sthavirāturanirvṛttavirūpajanavarjitam |
ramyaharmyāvalīgarbhajṛmbhitātodyanisvanam || 127 ||
[Analyze grammar]

aśeṣairviyutaṃ doṣairaśeṣaiḥ saṃyutaṃ guṇaiḥ |
praveśito'smi muditairadhiṣṭhānaṃ kumārakaiḥ || 128 ||
[Analyze grammar]

teṣāmekastu māmāha bhogināṃ bhogināmiyam |
purī bhogavatī nāma vasatiḥ kalpajīvinām || 129 ||
[Analyze grammar]

tanayaḥ kambalasyāhamayamaśvatarasya tu |
anye ca sūnavo'nyeṣāṃ nāgasenābhṛtāmiti || 130 ||
[Analyze grammar]

tataḥ kambalaputreṇa nītvāhaṃ svaṃ gṛhaṃ mahat |
grāhitārghādisatkāraḥ kārito veṣamīdṛśam || 131 ||
[Analyze grammar]

itare netumaicchanta svagṛhānmāṃ mayoditāḥ |
anujānīta māmadya suhṛdo mā sma kupyata || 132 ||
[Analyze grammar]

guruṇā pratiṣiddho'hametāṃ bhūmimupāgataḥ |
bhītaśca kupitāttasmāttasmānnayata māmiti || 133 ||
[Analyze grammar]

te tu māmāhuruttiṣṭha gamyatāṃ svamidaṃ puram |
punarāgacchatā kāryamanutkaṇṭhabhujaṃgamam || 134 ||
[Analyze grammar]

tasyāmeva ca ramyatvātkrīḍāmaḥ saṃtataṃ vayam |
suhṛdo'pi yadīcchā syādgacchettāṃ nalinīmiti || 135 ||
[Analyze grammar]

ityuktvā mama tairvaktre paṭāntenāvaguṇṭhite |
uttīrṇamahamātmānaṃ paśyāmi sarasastataḥ || 136 ||
[Analyze grammar]

iti bhogavatīṃ dṛṣṭvā so'hamāyāmi saṃprati |
mamāsminnaparādhe ca pramāṇaṃ bhagavāniti || 137 ||
[Analyze grammar]

vasiṣṭhastamathāvocadupāyo'yaṃ mayā kṛtaḥ |
yena nāgakumārāste dṛṣṭigocaratāṃ gatāḥ || 138 ||
[Analyze grammar]

idānīmapi taiḥ sārdhaṃ gatvā bhogavatīṃ tvayā |
gāndharvaṃ hastividyā ca śikṣitavyāḥ savistarāḥ || 139 ||
[Analyze grammar]

yadi ca grāhayetkiṃcittvāṃ nāgādhipatistataḥ |
sanāgamūrchanā grāhyā vīṇā ghoṣavatī tvayā || 140 ||
[Analyze grammar]

aṅkamāropitāyāṃ ca tantryo yasyāmanāhatāḥ |
madhuraṃ nisvaneyustāṃ vidyāṃ ghoṣavatīmiti || 141 ||
[Analyze grammar]

gurorudayanaḥ śrutvā nāgalokaṃ gatastataḥ |
gate bahutithe kāle vīṇāpāṇirupāgataḥ || 142 ||
[Analyze grammar]

kṛtābhivādo guruṇā pariṣvaktaśca sāśruṇā |
tadviyogāgnitaptāṅgīmambāmaṅgairaśītayat || 143 ||
[Analyze grammar]

ekadā tu sukhāsīno vasiṣṭhastamabhāṣata |
tāta ghoṣavatīghoṣasaṃgītaṃ śrāvyatāmiti || 144 ||
[Analyze grammar]

tannideśācca patyau te pragīte saha vīṇayā |
jagatpracalanācāryo nabhasvānapi nācalat || 145 ||
[Analyze grammar]

niśceṣṭamāśramaṃ dṛṣṭvā mūkakeśarivāraṇam |
raktāṃ ghoṣavatīṃ muktvā tuṣṇīmāsītpatistava || 146 ||
[Analyze grammar]

uktaścaiṣa vasiṣṭhena na tvayāsmiṃstapovane |
vādanīyā punarvīṇā geyaṃ vā śanakairapi || 147 ||
[Analyze grammar]

anye'pi dhvanayaḥ prāyaścalayanti samāhitān |
samādheḥ kiṃ punaryena sākṣiṇo'pi vimohitāḥ || 148 ||
[Analyze grammar]

tasmādavītarāgāṇāṃ samādhimavihiṃsatā |
dūre tapovanādasmādvīṇeyaṃ vādyatāmiti || 149 ||
[Analyze grammar]

tataścārabhya divasādudayācalacāriṇaḥ |
nāgānudayano'gṛhṇād ramyairghoṣavatīrutaiḥ || 150 ||
[Analyze grammar]

dāntavyālagajārūḍhaḥ siṃhādivyālavellitaḥ |
kvaṇadghoṣavatīpāṇirāyāti sma tapovanam || 151 ||
[Analyze grammar]

evaṃ yāti kvacitkāle bhagavānmāmabhāṣata |
dārakastaruṇo jātaḥ kauśāmbīṃ gamyatāmiti || 152 ||
[Analyze grammar]

mayā tu nirvacanayā kathite'sminmanorathe |
guruṇā tīrthasalilairabhiṣiktaḥ suto mama || 153 ||
[Analyze grammar]

tacchiṣyāstu tadādiṣṭāmāmādāya saputrakām |
ākāśena nayanti sma kṣaṇena nagarīmimām || 154 ||
[Analyze grammar]

athāhaṃ nagarodyāne ramye tairavatāritā |
muhūrtaṃ preritavatī gaganāgamanaśramam || 155 ||
[Analyze grammar]

avatīrya tu te bhartā krīḍāpuṣkariṇīṃ pituḥ |
padmabhañjikayā krīḍandṛṣṭa udyānapālakaiḥ || 156 ||
[Analyze grammar]

tairgatvā kathitaṃ rājñe deva devakumārakaḥ |
adhunaivāgataḥ svargādgāhate nalinīmiti || 157 ||
[Analyze grammar]

rājā tu drutamāgatya dṛṣṭvā devasamaṃ sutam |
deva evāyamityuktvā praṇāmaṃ kartumudyataḥ || 158 ||
[Analyze grammar]

tatastapasvibhiḥ khasthaiḥ saṃbhrāntaiḥ sa nivāritaḥ |
rājannudayanaputraṃ na namaskartumarhasi || 159 ||
[Analyze grammar]

saṃdehaścedimāṃ pṛccha mahiṣī mṛgayāvatīm |
premasaṃbhramasaṃtrāsalajjābhiḥ kheditāmiti || 160 ||
[Analyze grammar]

rājā tu tānatho dṛṣṭvā māmapaśyatsutaṃ tataḥ |
muhūrtaṃ cintayitvā tu vihasanprasthito gṛhān || 161 ||
[Analyze grammar]

athāyamṛṣibhiḥ proktaḥ puraḥsthitvā sasaṃbhramaiḥ |
na gantavyaṃ na gantavyaṃ naiṣa svapno nivartyatām || 162 ||
[Analyze grammar]

atha vā bhavatu svapnaḥ svapne'pi na virudhyate |
durlabhenāpi hi svapne vallabhena samāgamaḥ || 163 ||
[Analyze grammar]

yacca brūmastadākarṇya cetaḥkarṇasukhāvaham |
tato yasyāsi sāpatyāmādāya dayitāmiti || 164 ||
[Analyze grammar]

nivṛttāya ca te tasmai bhāruṇḍaharaṇādikam |
ācakṣate sma vṛttāntamāśramānayanāditi || 165 ||
[Analyze grammar]

rājā tu putramāliṅgya harṣamūrchāvicetanaḥ |
nipatandharaṇīpṛṣṭe putreṇa lambhitaḥ kṣaṇam || 166 ||
[Analyze grammar]

māṃ ca dṛṣṭvā ciraṃ dṛṣṭvā devadṛṣṭiviceṣṭayā |
niśvāsairakṣipaddīrghairnetrāmbukaṇikāgaṇam || 167 ||
[Analyze grammar]

baddhāñjalirnarapatirbravīti sma ca tānṛṣīn |
avatāreṇa gurubhiḥ prasādaḥ kriyatāmiti || 168 ||
[Analyze grammar]

tairuktaṃ na samādiṣṭāvasiṣṭhena vayaṃ tataḥ |
gacchāmo nāvatīryaiva svasti tubhyaṃ bhavatviti || 169 ||
[Analyze grammar]

tānayācata bhūpālo yatkiṃcitsvāṅgadhāritam |
asmatpāvanamujjhitvā yatheṣṭaṃ gamyatāmiti || 170 ||
[Analyze grammar]

mṛgājināni te kṣiptvā taḍitkāntijaṭāguṇāḥ |
tatraivāntardadhuścaṇḍamarudvyastā ivāmbudāḥ || 171 ||
[Analyze grammar]

mṛgājināni tu nṛpo daivatānīva bhaktimān |
pūjayitvā tadudyānaṃ namnāvocanmṛgājinam || 172 ||
[Analyze grammar]

sā mṛgājinayātreyaṃ tataḥ prabhṛti vāsarāt |
pravartitā nṛpatinā prasiddhimagamadbhuvi || 173 ||
[Analyze grammar]

tataḥ kṛtvā sutaṃ rājā yuvarājaṃ mṛgājine |
praviṣṭo hṛṣṭahṛdayaḥ prahṛṣṭāṃ nagarīmiti || 174 ||
[Analyze grammar]

so'yaṃ mayedṛśo labdhaḥ putraḥ saṃpādya dohadam |
tavāpi dohado yaḥ sa putri saṃpādyatāmiti || 175 ||
[Analyze grammar]

yadā tu naivākathayal lajjayā nṛpatistadā |
māgadhīmuktavānpṛccha dohadaṃ bhaginīmiti || 176 ||
[Analyze grammar]

padmāvatī tu tāṃ pṛṣṭvā tadākhyātamavarṇayat |
duḥsaṃpādā kila śraddhā mametyāha śanairiyam || 177 ||
[Analyze grammar]

atha tāmabravīduccairhasitvā mṛgayāvatī |
mugdhe kiṃ nāma duḥsādhyamupāyacaturairnṛbhiḥ || 178 ||
[Analyze grammar]

śrūyatāṃ vā purāvṛttaṃ mathurāyāmabhūnnṛpaḥ |
ugraseno mahāsenaḥ śatrusenāmbudānilaḥ || 179 ||
[Analyze grammar]

tasya strī guṇasaṃpannā śucyācārakulodbhavā |
āsīnmanoramācārā yā nāmnāpi manoramā || 180 ||
[Analyze grammar]

kadācidāgate kāle samṛddhakuṭajārjune |
rasanmayūrasāraṅgameghamaṇḍūkamaṇḍale || 181 ||
[Analyze grammar]

manoramaṃ gṛhodyānaṃ praviveśa manoramā |
kadambānilamāghrātumudbhūtaprathamārtavā || 182 ||
[Analyze grammar]

tadā ca drumilo nāma dānavo nabhasā vrajan |
udyānaśobhayākṛṣṭadṛṣṭistāṃ tatra dṛṣṭavān || 183 ||
[Analyze grammar]

kṛtograsenarūpeṇa tena sāpāyacetasā |
samagacchata sadyaśca sasattvā samapadyata || 184 ||
[Analyze grammar]

strībhiśca dohadaṃ pṛṣṭā kṛcchrāduktavatī hriyā |
viṣṇoḥ śoṇitamāṃsāntrairgamayāmi tṛṣāmiti || 185 ||
[Analyze grammar]

śrutvedamugrasenena ciraṃ saṃmantrya mantribhiḥ |
sṛṣṭaḥ piṣṭamayo viṣṇurmeṣāmiṣabhṛtodaraḥ || 186 ||
[Analyze grammar]

mandapradīpakiraṇe tasyā vasatimandire |
nyastaḥ piṣṭamayo viṣṇuḥ kṣapāyāṃ kṣapitastayā || 187 ||
[Analyze grammar]

duḥsaṃpāde'pi saṃpanne dohade'sminnupāyataḥ |
vadhyaṃ yādavasiṃhasya kaṃsaṃ sutamasuta sā || 188 ||
[Analyze grammar]

tena bravīmi nāstyeva duḥsaṃpādā kriyā nṛbhiḥ |
tasmāttavāpi yā śraddhā sāpi saṃpādyatāmiti || 189 ||
[Analyze grammar]

kathitaṃ ca tataḥ śrutvā padmāvatyeyamicchati |
ambarasthavimānasthā kṛtsnāṃ draṣṭuṃ mahīmiti || 190 ||
[Analyze grammar]

athovāca hasannuccaiḥ krīḍāśīlo vasantakaḥ |
devasya dāsabhāryāṇāmayameva manorathaḥ || 191 ||
[Analyze grammar]

mayā tu bhaṇitāḥ sarvādīrghasthambhāvalambinīm |
dolāmāruhya nabhasā muhurāyāta yāta ca || 192 ||
[Analyze grammar]

upāyamanyaṃ patayo bhavatīnāṃ na jānate |
tenākāśagatiśraddhā tathā ca pūryatāmiti || 193 ||
[Analyze grammar]

tataḥ prahasitā sarve rumaṇvānidamabravīt |
nivartyatāṃ parīhāsaḥ prastutaṃ vartyatāmiti || 194 ||
[Analyze grammar]

yaugandharāyaṇenoktaṃ kimatra paricintyate |
asādhāraṇa evāyaṃ viṣayaḥ śilpināmiti || 195 ||
[Analyze grammar]

rumaṇvatā tu takṣāṇaḥ saṃnipātya pracoditāḥ |
yantramākāśasaṃcāri tvaritaiḥ kriyatāmiti || 196 ||
[Analyze grammar]

athotkramya ciraṃ sarve mantrayitvā ca śilpinaḥ |
rumaṇvantamabhāṣanta saṃtrāsapraskhaladgiraḥ || 197 ||
[Analyze grammar]

caturvidhāni jānīmo vayaṃ yantrāṇi tad yathā |
jalāśmapāṃśuyantrāṇi kāṇḍarāśikṛtāni ca || 198 ||
[Analyze grammar]

ākāśayantrāṇi punaryavanāḥ kila jānate |
asmākaṃ tu na yātāni gocaraṃ cakṣuṣāmiti || 199 ||
[Analyze grammar]

tatra ca brāhmaṇaḥ kaścidabravīdāgrahārikaḥ |
bhoḥ sabhe śrūyatāṃ tāvad yanmayākhyānakaṃ śrutam || 200 ||
[Analyze grammar]

asti pukvasako nāma mahāsenasya vardhakī |
skandhāvāreṇa sārdhaṃ sa surāṣṭraviṣayaṃ gataḥ || 201 ||
[Analyze grammar]

tena tatrāparo dṛṣṭaḥ surūpaḥ śilpidārakaḥ |
viśvilo nāma yaḥ śilpī sadṛśo viśvakarmaṇā || 202 ||
[Analyze grammar]

atha pukvasakastasya pitaraṃ mayamabravīt |
tava putrāya duhitā dattā ratnāvalī mayā || 203 ||
[Analyze grammar]

praṣṭavyaśca tvayā nāhaṃ kīdṛśī sā guṇairiti |
kularūpābhijātyādiguṇaratnāvalī hi sā || 204 ||
[Analyze grammar]

saṃpadyate ca naḥ kiṃcinmahāsenaparigrahāt |
tasmātsaṃvardhasiddhyarthaṃ putraṃ prasthāpayeriti || 205 ||
[Analyze grammar]

mayena ca pratijñāto gatvā pukvasako gṛhān |
jāmātrāgamanākāṅkṣī mahāntaṃ kālamakṣipat || 206 ||
[Analyze grammar]

kṛtvā rājakule karma kadācidgṛhamāgatam |
bhaṇati sma na taṃ kaścitsnāhi bhuṅkṣveti cākulaḥ || 207 ||
[Analyze grammar]

bhāryayā kathitaṃ tasmai kimetaditi pṛṣṭayā |
āgantukena kenāpi sarvamākulitaṃ gṛham || 208 ||
[Analyze grammar]

ātmīyāstaṇḍulāstena randhanāya samarpitāḥ |
mandako'hamamībhirme maṇḍaḥ saṃpādyatāmiti || 209 ||
[Analyze grammar]

kāṣṭhabhāraśataṃ dagdhaṃ na ca svidyanti taṇḍulāḥ |
tenāyamākulo lokastatkimetadbhavediti || 210 ||
[Analyze grammar]

atha pukvasakenoktaṃ pariṣvajya kuṭumbinīm |
gṛhasthe vardhase diṣṭyā prāptaste duhiturvaraḥ || 211 ||
[Analyze grammar]

kvāsau kvāsau viśvabhadra iti pṛcchati bhartari |
śiraḥ prāvṛtya bhāryāsmai karmaśālāmadarśayat || 212 ||
[Analyze grammar]

niṣkramya karmaśālātaḥ satvaraṃ viśvilastataḥ |
abhivāditavānprahvaḥ prasāritabhujaṃ gurum || 213 ||
[Analyze grammar]

utkṣipya śvaśureṇāpi harṣanetrāmbuvarṣiṇā |
nirantaraṃ pariṣvaktaścirādṛṣṭaḥ suhṛd yathā || 214 ||
[Analyze grammar]

kṛtārghādisaparyaśca pṛṣṭaḥ pukvasakena saḥ |
kiṃmayāstaṇḍulāstāta kathyatāmiti so'bravīt || 215 ||
[Analyze grammar]

ete pāṇḍarakāṣṭhasya kāṣṭhena taṇḍulā mayā |
ghaṭitā ghaṭikāmātrātkaraghāṭataroriti || 216 ||
[Analyze grammar]

atha pukvasakenoktaṃ karmedaṃ viśvakarmaṇaḥ |
tavāpi śilpisiṃhasya tṛtīyasya na vidyate || 217 ||
[Analyze grammar]

adyaiva ca dinaṃ bhadramato ratnāvlaīkaraḥ |
gṛhyatāmiti tenokte viśvilenoktamomiti || 218 ||
[Analyze grammar]

ratnāvalyā sa saṃgamya sphuradujjvalaśobhayā |
saṃmīyate sma nāṅgeṣu daridra iva kāmukaḥ || 219 ||
[Analyze grammar]

ālekhyavidyādharayoryathā saṃmukhayostayoḥ |
mahān kālo'tiyāti sma nimeṣojjhitacakṣuṣoḥ || 220 ||
[Analyze grammar]

atha ratnāvalīṃ dṛṣṭvā vicintāmiva viśvilaḥ |
kimetaditi saṃdihya kimetaditi pṛṣṭavān || 221 ||
[Analyze grammar]

tasyāmabhāṣamāṇāyāmekābhāṣata dārikā |
bhartṛdāraka yadyasti śrotumicchā tataḥ śṛṇu || 222 ||
[Analyze grammar]

syālakāstava jalpanti pūrvamekākinīṃ vayam |
adhunā saha jāmātrā puṣṇīmo bhaginīmiti || 223 ||
[Analyze grammar]

iti śrutvā vanaṃ gatvā cittvā dārūṇi kānyapi |
yantrāṇi ghaṭayāmāsa yāvanānyatha viśvilaḥ || 224 ||
[Analyze grammar]

vṛkṣāyurvedanirdiṣṭaiḥ pādapāṅgaiścakāra saḥ |
āyurārogyakārīṇi pākopakaraṇāni ca || 225 ||
[Analyze grammar]

sahasraguṇamūlyāni tāni vikrīya taddhanam |
śvaśurāya dadāti sma sa ca prītastadādade || 226 ||
[Analyze grammar]

evaṃ dineṣu gacchatsu vidrāṇa iva pukvasaḥ |
viśvilādīn samāhūya saviṣādamabhāṣata || 227 ||
[Analyze grammar]

ahamājñāpito rājñā brahmadattaḥ suhṛdmama |
kāśideśapatistena praṇayādahamarthitaḥ || 228 ||
[Analyze grammar]

tava pukvasako nāma takṣāsti kuśalaḥ kila |
dharmādhikārakārāya sa me prasthāpyatāmiti || 229 ||
[Analyze grammar]

tacca devakulaṃ kṛtvā svabuddhisamakarmakam |
vārāṇasyāmavighnena bhavānāvartatāmiti || 230 ||
[Analyze grammar]

avaśyaṃ ca mayā tatra gantavyamanujīvinā |
martavyaṃ cāsya caṇḍasya rājño vākyamakurvatā || 231 ||
[Analyze grammar]

dīrghakālaṃ ca tatkarma daśā ceyamanuttarā |
tasmātpukvasakaḥ sarvaiḥ sudṛṣṭaḥ kriyatāmiti || 232 ||
[Analyze grammar]

viśvilena tataḥ proktamalaṃ trāsamupāsya vaḥ |
bhṛtyaṃ vārāṇasīṃ yāntamanujānīta māmiti || 233 ||
[Analyze grammar]

śvaśureṇābhyanujñātaḥ prītena ca mahībhujā |
dūtaiḥ sa pratidūtaiśca saha vārāṇasīṃ gataḥ || 234 ||
[Analyze grammar]

bahukālaprayāte'pi patyau ratnāvalī mukham |
saṃtatāśrujalāsāradhautaṃ mlānakapolakam || 235 ||
[Analyze grammar]

āyatāśītaniśvāsaṃ nāsāgrāhitalocanam |
dantāvaraṇasaṃskāraśūnyamagalitālakam || 236 ||
[Analyze grammar]

visraṃsamānaraśanaṃ jaghanaṃ malināṃśukam |
na dadhāti sma śokāndhā bāhū ca skhaladaṅgadau || 237 ||
[Analyze grammar]

tasyāmitthamavasthāyāmamantrayata pukvasaḥ |
gṛhiṇīṃ cakitaḥ paśya niścintāṃ tanayāmiti || 238 ||
[Analyze grammar]

sābravitsuṣṭhu paśyāmi lajjamānā ca te mukham |
na darśayāmi nanvevaṃ straiṇaṃ kimapi cāpalam || 239 ||
[Analyze grammar]

yasyāsamena rūpeṇa guṇaiścāgaṇitaiḥ purī |
vṛtā na labhate śāntimapaśyantī tamutsukā || 240 ||
[Analyze grammar]

darśanasparśanālāpaiściraṃ yā tena lālitā |
seyamevamaśoketi mandabhāgyā bhaṇāmi kim || 241 ||
[Analyze grammar]

jāyāpatyostayoritthaṃ mitho mantrayamāṇayoḥ |
dinastokeṣu yāteṣu garbhaṃ ratnāvalī dadhau || 242 ||
[Analyze grammar]

kṛtakrodhasmito bhāryāmatha pukvasako'bravīt |
bho paśya dayitāpatye duhituḥ prakriyāmiti || 243 ||
[Analyze grammar]

bhartṛkopanimittena tanayādoṣajanmanā |
jātena ca nṛpāccaṇḍātprākampata bhayena sā || 244 ||
[Analyze grammar]

āsīdayaṃ ca vṛttānto rājñāhṛtaśca pukvasaḥ |
sutādoṣavipākaṃ ca paśyan rājakulaṃ gataḥ || 245 ||
[Analyze grammar]

sa vihasya nṛpeṇokto mā bhaiṣirduhitustava |
jāmātraivāhito garbhastaccedamavadhīyatām || 246 ||
[Analyze grammar]

ye mayā preṣitā dūtājāmātrā bhavataḥ saha |
nivṛttamatraistaireva mahyamāveditaṃ yathā || 247 ||
[Analyze grammar]

ārabhya prathamādeva prayāṇādeṣa viśvilaḥ |
yantrakukkuṭamāsthāya pradeśe kvāpi yātavān || 248 ||
[Analyze grammar]

rātrau ca yāmaśeṣāyāṃ prāvṛtyāgatya mastakam |
avijñātaḥ kilāsmābhiradhyaśeta svasaṃstare || 249 ||
[Analyze grammar]

kadācitpratibuddheṣu dūteṣu sa parāgataḥ |
pādeṣu patitasteṣāmayācata viṣaṇṇakaḥ || 250 ||
[Analyze grammar]

nedaṃ kasyacidākhyeyaṃ śilpikasyetarasya vā |
ākāśayantravijñānaṃ survijñānamayāvanaiḥ || 251 ||
[Analyze grammar]

khaṭvāghaṭanavijñānamivedaṃ pracurībhavet |
lokena paribhūyeta kṣaṇarāgā hi mānuṣāḥ || 252 ||
[Analyze grammar]

nindite vandanīye'sminnāstāṃ tāvacca pātakam |
dṛṣṭa eva mahāndoṣo jīvanasyāpahāraṇam || 253 ||
[Analyze grammar]

ahaṃ hi bhāryayā sārdhamuṣitvā rajanīṃ divā |
kurvannarapaterājñāṃ neṣyāmi divasāniti || 254 ||
[Analyze grammar]

tacca devakulaṃ tena ghaṭitaṃ kila tādṛśam |
draṣṭumicchā samutpannā yena duścakṣuṣāmapi || 255 ||
[Analyze grammar]

brahmadattena dattaṃ ca dhanarāśimanuttamam |
na gṛhṇāti sma vakti sma gururme labhatāmiti || 256 ||
[Analyze grammar]

evamuktvā mahāseno mahatā dhanarāśinā |
sarvasvaharaṇāttrastaṃ toṣayāmāsa pukvasam || 257 ||
[Analyze grammar]

viśvilo'pi muhūrtena vārāṇasyāḥ parāgataḥ |
ākāśayantramāsthāya praviṣṭaśca gṛhānniśi || 258 ||
[Analyze grammar]

atīte māsamātre ca viśvilaṃ pukvaso'bravīt |
adya māmāha nṛpatiḥ śanairutsārya sasmitam || 259 ||
[Analyze grammar]

ākāśayantravijñānaṃ jāmātre kathitaṃ tvayā |
yanmahyamapi tatsarvamarthine kathyatāmiti || 260 ||
[Analyze grammar]

mayā tu kathitaṃ tasmai na tasmai kathitaṃ mayā |
tasmai tu kathitaṃ prītaiḥ śilpibhiryāvanairiti || 261 ||
[Analyze grammar]

rājñā tu kupitenoktaṃ nedaṃ lokavaco mṛṣā |
śilpinaḥ saha śāṭhyena jāyanta iti ghuṣyate || 262 ||
[Analyze grammar]

tamidaṃ śāṭhyamujjhitvā mannideśaṃ samācara |
anyathā jīvaloko'yaṃ sudṛṣṭaḥ kriyatāmiti || 263 ||
[Analyze grammar]

tad rakṣatā mama prāṇān saputrānanujīvinaḥ |
rājñe tad yantravijñānamarthine kathyatāmiti || 264 ||
[Analyze grammar]

viśvilastu pratijñāya śvaśurāya tathāstviti |
rātrau ratnāvalīṃ suptāṃ pratibodhyedamabravīt || 265 ||
[Analyze grammar]

āmantraye'haṃ bhavatīṃ gacchāmi svagṛhānprati |
upāyaistava pitrāhamasmātsthānādvivāsitaḥ || 266 ||
[Analyze grammar]

ākāśayantravijñānaṃ prāptuṃ mattaḥ sa vāñchati |
pracchādyaṃ ca tadasmābhirnidhānaṃ kṛpaṇairiva || 267 ||
[Analyze grammar]

tadāstāṃ tāvadātmā me tava vā dayitaḥ pitā |
vijñānasyāsya rakṣāyai tyajeyaṃ bhavatīṃ api || 268 ||
[Analyze grammar]

iti ratnāvalī śrutvā bhartāramidamabravīt |
kiṃ cāhaṃ durbhagā yena bhaktāṃ tyajasi māmiti || 269 ||
[Analyze grammar]

yānaṃ kukkuṭasaṃsthānamāsthāya saha bhāryayā |
rātrāvākāśamutpatya svasthānaṃ viśvilo yayau || 270 ||
[Analyze grammar]

te caivamaurasānbandhūñchilpaguptyai tyajanti ye |
te śilpaṃ darśayantīti kasyeyamasatī matiḥ || 271 ||
[Analyze grammar]

tasmādamī śaṭhā baddhāḥ pīḍyantāṃ tāḍanādibhiḥ |
asādhyāḥ sāmadānābhyāṃ nīcā hi vadhasādhanāḥ || 272 ||
[Analyze grammar]

iti senāpatiḥ śrutvā sarvān saṃyamya śilpinaḥ |
atāḍayadavocacca yantramāyojyatāmiti || 273 ||
[Analyze grammar]

etasminneva vṛttānte kaścidāgantuko'bravīt |
ahaṃ karomi vo yantraṃ mā sma tāḍyanta śilpinaḥ || 274 ||
[Analyze grammar]

yantropakaraṇaṃ cedamidānīṃ dīyatāmiti |
tacca saṃpāditaṃ sarvamacireṇa rumaṇvatā || 275 ||
[Analyze grammar]

teṣu cānyatamaḥ śilpī tamāgantumabhāṣata |
ārohakaparīmāṇaṃ senānīranuyujyatām || 276 ||
[Analyze grammar]

ajñātavāhyasaṃkhyābhirbahavaḥ śilpino nṛpaiḥ |
vipannayantraiḥ śrūyante mathitāḥ kupitairiti || 277 ||
[Analyze grammar]

atha tenoktaṃ manye te varākā grāmyaśilpikāḥ |
kiṃ vā vacobhirbahubhiḥ kṣaṇamāsthīyatāmiti || 278 ||
[Analyze grammar]

ityuktvā garuḍākāramacireṇa cakāra saḥ |
vimānamambaropetaṃ mandārakusumārcitam || 279 ||
[Analyze grammar]

sa cābhāṣata rājānaṃ rājan rājajanārdanaḥ |
ākramya garuḍaṃ krāma krāntapūrvāṃ mahīmimām || 280 ||
[Analyze grammar]

atha rājāvadaddevīṃ devi kiṃ sthīyate'dhunā |
vimānamidamāruhya yatheṣṭaṃ gamyatāmiti || 281 ||
[Analyze grammar]

avocatsā ca rājānamaryaputra tvayā vinā |
nodyānamapi gacchāmi kuto'nālambanāṃ divam || 282 ||
[Analyze grammar]

evaṃ devī bravītīti rājñokte śilpinoditam |
nanu voḍhumidaṃ śaktaṃ sakalāṃ nagarīmiti || 283 ||
[Analyze grammar]

sāntaḥpuraparīvāraḥ sadārasacivastataḥ |
sapauraśreṇivargaśca yānamadhyāsta bhūpatiḥ || 284 ||
[Analyze grammar]

tena ketupatākādichāyāvicchuritāmbarām |
puṇyamākāśamāviśya prākprācīmagamaddiśam || 285 ||
[Analyze grammar]

dadarśa darśakastatra yānaṃ yānnagaropari |
devo vidyādharo vāpi bhoḥ ko'yamiti cābravīt || 286 ||
[Analyze grammar]

padmāvatīdvitīyena sa ca rājñābhivāditaḥ |
anujñātaśca saṃyāto nṛpaḥ pavanavartmanā || 287 ||
[Analyze grammar]

iti pradakṣiṇīkṛtya sa bhuvaṃ sāgarāmbarām |
avantinagarīṃ prāyātpravṛttodakadānakām || 288 ||
[Analyze grammar]

yātrānubhavanotkaṇṭhaṃ jñātvā śilpī mahīpatim |
stambhayāmāsa tad yantramathātuṣyannarādhipaḥ || 289 ||
[Analyze grammar]

pradyotasya tadālokya ratnapradyotapiñjaram |
kimetaditi saṃdehadolādolamabhūnmanaḥ || 290 ||
[Analyze grammar]

mahāṃścedayamutpāto ramaṇīyamataḥ katham |
iṣṭasaṃprāptilambhaścednāsmābhiḥ śrutamīdṛśam || 291 ||
[Analyze grammar]

saṃdihanmānasasyeti pradyotasya puraḥ śaram |
pātayāmāsa vatseśaḥ śanakairlekhitākṣaram || 292 ||
[Analyze grammar]

mahāsenastamādāya citrametadavācayat |
rājannudayanaścauraḥ sadārastvāṃ namasyati || 293 ||
[Analyze grammar]

iti śrutvā mahāseno jāmātaramabhāṣata |
caurāya dattamabhayaṃ tasmādavataratviti || 294 ||
[Analyze grammar]

ālokyāvantikauśāmbyāṃ vimānodakadānake |
draṣṭavyeṣu tanūbhūtamudbhūteṣu kutūhalam || 295 ||
[Analyze grammar]

kāṃcidvelāmupāsyaivamāmantrya śvaśurau tataḥ |
lokālokitayānaśca kauśāmbyāmavarūḍhavān || 296 ||
[Analyze grammar]

pūjitāmaraviprāgnigurupaurānujīvinā |
ājñāpitaṃ nṛpatinā śilpī saṃmānyatāmiti || 297 ||
[Analyze grammar]

athābhibhūya prabhayā suprabhāmaciraprabhām |
tiṣṭhantīmambare'paśyaddevatāmavanīśvaraḥ || 298 ||
[Analyze grammar]

tataścitrīyamāṇaṃ sā tamabhāṣata pārthivam |
pūjitaiva tvayā yattvāṃ pūjyaṃ pūjitavatyaham || 299 ||
[Analyze grammar]

vijñāpyaṃ śrūyatāṃ cedamastyahaṃ guhyakāṅganā |
guhyakādhipaterāptā bhadreti paricārikā || 300 ||
[Analyze grammar]

kadācinnabhasā yāntī satī dṛṣṭavatī saraḥ |
kandarāyāṃ nagendrasya mahendrasya nabhaḥprabham || 301 ||
[Analyze grammar]

tatra saṃkrīḍamānaṃ ca kareṇukaradhāritaiḥ |
vījyamānaṃ sarasijaiḥ kāntārakariyūthapam || 302 ||
[Analyze grammar]

āsīcca mama taṃ dṛṣṭvā karāmṛṣṭavaśāmukham |
kartāro hastiśikṣāyāṃ satyamāhuridaṃ yathā || 303 ||
[Analyze grammar]

devadānavagandharvapiśacoragarākṣasām |
kanyāḥ sujātā diṅnāgairnānāsattvāstato gatāḥ || 304 ||
[Analyze grammar]

tataḥ sapadi nirmāya hastinīrūpamātmanā |
madāmodavibhinnāmbhastadevāvataraṃ saraḥ || 305 ||
[Analyze grammar]

sāmarṣakariṇīyūthakaṭākṣekṣitarūpayā |
prītena yūthapatinā ciramākrīḍitaṃ mayā || 306 ||
[Analyze grammar]

athendukiraṇākārakiraṇe'ruṇasārathau |
sa gajaḥ kṣālitakaṭaḥ kaṭakaṃ prāviśadgireḥ || 307 ||
[Analyze grammar]

ahaṃ tu vyasanasevāphalamutprekṣya dāruṇam |
sadyaḥ kṛtanijākārā rājarājasabhāmagām || 308 ||
[Analyze grammar]

dhanadasyorumālambya tasya yūthapateḥ karam |
smarantī tāḍayāmi sma cāmareṇa dhanādhipam || 309 ||
[Analyze grammar]

sa kaṭākṣeṇa māṃ dṛṣṭvā krodhavisphuritādharaḥ |
trāsotkampitadikcakraḥ kṛtavāñchāpabhājanam || 310 ||
[Analyze grammar]

dhyāyantyā hastinaṃ yasmāccāmareṇāhamāhataḥ |
tvamavantipatestasmādabhavye hastinī bhava || 311 ||
[Analyze grammar]

tatroktaṃ pūrṇabhadreṇa yakṣeṇāgasi tucchake |
prabhunā devadevena muktaḥ śāpo mahāniti || 312 ||
[Analyze grammar]

śrutvedaṃ pūrṇabhadro'pi śapto yasmāttvametayā |
śaptayā pīḍitastasmādbhava hastī mahāniti || 313 ||
[Analyze grammar]

śokadīnamukhāvāvāṃ dṛṣṭvā vittapaterabhūt |
karaṇotkhātakopasya navanītanibhaṃ manaḥ || 314 ||
[Analyze grammar]

abravīcca yadāhaṃ vāṃ smariṣyāmi kvacittadā |
śāpādasmādvimokṣyethe vibhītaṃ mā sma putrakau || 315 ||
[Analyze grammar]

sāhaṃ bhadravatī jātā mahāsenasya hastinī |
pūrṇabhadro'pi tasyaiva nāgo vyālo nalāgiriḥ || 316 ||
[Analyze grammar]

mahāsenasya bhavane paratantrasya tiṣṭhataḥ |
āvayoścaritaṃ yattatsarvaṃ pratyakṣameva te || 317 ||
[Analyze grammar]

tadā cāpaharantī tvāṃ dhanādhipatinā smṛtā |
ahamaprapya kauśāmbīṃ vipannā gahane vane || 318 ||
[Analyze grammar]

na tathā vyasanenāsi pīḍitastena tādṛśā |
yathā mayi vipannāyāṃ priyadāraḥ striyāmiva || 319 ||
[Analyze grammar]

yakṣayonimavāpyāhaṃ tiryagyonimivāpsarāḥ |
tvāmeva śocitavatī seva śaptaṃ śatakratum || 320 ||
[Analyze grammar]

āsīcca me kadā nāma kathaṃ nāma ca bhūpateḥ |
kaṃ nāma ca kariṣye'hamupakāraṃ manāgiti || 321 ||
[Analyze grammar]

nītaścāsi mayā svapne tadā dhanapateḥ sabhām |
bhrāmitaśca vimānena sugarbhasthasuto mahīm || 322 ||
[Analyze grammar]

bhaviṣyantaṃ ca te putraṃ magnaṃ kasyāṃcidāpadi |
vidyādharendramuddhartā sukhamāstāṃ bhavāniti || 323 ||
[Analyze grammar]

prākārasya tataḥ khaṇḍamapanīya jagāma sā |
yattadbhadravatīdvāraṃ kauśāmbyāṃ prathitaṃ bhuvi || 324 ||
[Analyze grammar]

athāśrūyanta paurāṇāṃ jalpitāni gṛhe gṛhe |
siddhādeśavacaḥ satyaṃ kṛtaṃ vyomacarairiti || 325 ||
[Analyze grammar]

sīmantonnayanāntakarmaviratāvautsukyagarbhā purī pratyāsannakaragṛheva taruṇī kṛcchrānnināya kṣapām |
śuddhānte ca śukādipañjaravayaḥkolāhale'pi śrute rājā dārakajanmasaṃpadaghanaprahlādamutpraikṣata || 326 ||
[Analyze grammar]