Chapter 7

tato visṛjyāśrumukhaṃ rudantaṃ chandaṃ vanacchandatayā nirāsthaḥ |
sarvārthasiddho vapuṣābhibhūya tamāśramaṃ siddhamiva prapede || 1 ||
[Analyze grammar]

sa rājasūnurmṛgarājagāmī mṛgājiraṃ tanmṛgavat praviṣṭaḥ |
lakṣmīviyukto 'pi śarīralakṣmyā cakṣūṃṣi sarvāśramiṇāṃ jahāra || 2 ||
[Analyze grammar]

sthitā hi hastasthayugāstathaiva kautūhalāccakradharāḥ sadārāḥ |
tamindrakalpaṃ dadṛśurna jagmurdhuryā ivārdhāvanataiḥ śirobhiḥ || 3 ||
[Analyze grammar]

viprāśca gatvā bahiridhmahetoḥ prāptāḥ samitpuṣpapavitrahastāḥ |
tapaḥpradhānāḥ kṛtabuddhayo 'pi taṃ draṣṭumīyurna maṭhānabhīyuḥ || 4 ||
[Analyze grammar]

hṛṣṭāśca kekā mumucurmayūrā dṛṣṭvāmbudaṃ nīlamivonnamantam |
śaṣpāṇi hitvābhimukhāśca tasthurmṛgāścalākṣā mṛgacāriṇaśca || 5 ||
[Analyze grammar]

dṛṣṭvā tamikṣvākukulapradīpaṃ jvalantamudyantamivāṃśumantam |
kṛte 'pi dohe janitapramodāḥ prasusruvurhomaduhaśca gāvaḥ || 6 ||
[Analyze grammar]

kaścidvasūnāmayamaṣṭamaḥ syātsyādaśvinoranyataraścyuto 'tra |
ucceruruccairiti tatra vācastaddarśanādvismayajā munīnām || 7 ||
[Analyze grammar]

lekharṣabhasyeva vapurdvitīyaṃ dhāmeva lokasya carācarasya |
sa dyotayāmāsa vanaṃ hi kṛtsnaṃ yadṛcchayā sūrya ivāvatīrṇaḥ || 8 ||
[Analyze grammar]

tataḥ sa tairāśramibhiryathāvadabhyarcitaścopanimantritaśca |
pratyarcayāṃ dharmabhṛto babhūva svareṇa bhādrāmbudharopamena || 9 ||
[Analyze grammar]

kīrṇaṃ tataḥ puṇyakṛtā janena svargābhikāmena vimokṣakāmaḥ |
tamāśramaṃ so 'nucacāra dhīrastapāṃsi citrāṇi nirīkṣamāṇaḥ || 10 ||
[Analyze grammar]

tapovikārāṃśca nirīkṣya saumyastapovane tatra tapodhanānām |
tapasvinaṃ kañcidanuvrajantaṃ tattvaṃ vijijñāsuridaṃ babhāṣe || 11 ||
[Analyze grammar]

tatpūrvamadyāśramadarśanaṃ me yasmādimaṃ dharmavidhiṃ na jāne |
tasmādbhavānarhati bhāṣituṃ me yo niścayo yaṃ prati vaḥ pravṛttaḥ || 12 ||
[Analyze grammar]

tato dvijātiḥ sa tapovihāraḥ śākyarṣabhāyarṣabhavikramāya |
kramena tasmai kathayāñcakāra tapoviśeṣaṃ tapasaḥ phalaṃ ca || 13 ||
[Analyze grammar]

agrāmyamannaṃ salilaprarūḍhaṃ parṇāni toyaṃ phalamūlameva |
yathāgamaṃ vṛttiriyaṃ munīnāṃ bhinnāstu te te tapasāṃ vikalpāḥ || 14 ||
[Analyze grammar]

uñchena jīvanti khagā ivānye tṛṇāni kecinmṛgavaccaranti |
kecidbhujaṅgaiḥ saha vartayanti valmīkabhūtā iva mārutena || 15 ||
[Analyze grammar]

aśmaprayatnārjitavṛttayo 'nye kecitsvadantāpahatānnabhakṣāḥ |
kṛtvā parārthaṃ śrapaṇaṃ tathānye kurvanti kāryaṃ yadi śeṣamasti || 16 ||
[Analyze grammar]

kecijjalaklinnajaṭākalāpā dviḥ pāvakaṃ juhvati mantrapūrvam |
mīnaiḥ samaṃ kecidapo vigāhya vasanti kūrmollikhitaiḥ śarīraiḥ || 17 ||
[Analyze grammar]

evaṃvidhaiḥ kālacitaistapobhiḥ parairdivaṃ yāntyaparairnṛlokam |
duḥkhena mārgeṇa sukhaṃ kṣiyanti duḥkhaṃ hi dharmasya vadanti mūlam || 18 ||
[Analyze grammar]

ityevamādi dvipadendravatsaḥ śrutvā vacastasya tapodhanasya |
adṛṣṭatattvo 'pi na santutoṣa śanairidaṃ cātmagataṃ jagāda || 19 ||
[Analyze grammar]

duḥkhātmakaṃ naikavidhaṃ tapaśca svargapradhānaṃ tapasaḥ phalaṃ ca |
lokāśca sarve pariṇāmavantaḥ svalpe śramaḥ khalvayamāśramāṇām || 20 ||
[Analyze grammar]

śriyaṃ ca bandhūn viṣayāṃśca hitvā ye svargahetau niyamaṃ caranti |
te viprayuktāḥ khalu gantukāmā mahattaraṃ svaṃ vanameva bhūyaḥ || 21 ||
[Analyze grammar]

kāyaklamairyaśca tapo 'bhidhānaiḥ pravṛttimākāṅkṣati kāmahetoḥ |
saṃsāradoṣānaparīkṣamāṇo duḥkhena so 'nvicchati duḥkhameva || 22 ||
[Analyze grammar]

trāsaśca nityaṃ maraṇātprajānāṃ yatnena cecchanti punaḥ prasūtim |
satyāṃ pravṛttau niyataśca mṛtyustatraiva magno yata eva bhītaḥ || 23 ||
[Analyze grammar]

ihārthameke praviśanti khedaṃ svargārthamanye śramamāpnuvanti |
sukhārthamāśākṛpaṇo 'kṛtārthaḥ patatyanarthe khalu jīvalokaḥ || 24 ||
[Analyze grammar]

na khalvayaṃ garhita eva yatno yo hīnamutsṛjya viśeṣagāmī |
prājñaiḥ samānena pariśrameṇa kāryaṃ tu tadyatra punarna kāryam || 25 ||
[Analyze grammar]

śarīrapīḍā tu yadīha dharmaḥ sukhaṃ śarīrasya bhavatyadharmaḥ |
dharmeṇa cāpnoti sukhaṃ paratra tasmādadharmaṃ phalatīha dharmaḥ || 26 ||
[Analyze grammar]

yataḥ śarīraṃ manaso vaśena pravartate vāpi nivartate vā |
yukto damaścetasa eva tasmāccittādṛte kāṣṭhasamaṃ śarīram || 27 ||
[Analyze grammar]

āhāraśuddhyā yadi puṇyamiṣṭaṃ tasmānmṛgāṇāmapi puṇyamasti |
ye cāpi bāhyāḥ puruṣāḥ phalebhyo bhāgyāparādhena parāṅmukhatvāt || 28 ||
[Analyze grammar]

duḥkhe 'bhisandhistvatha puṇyahetuḥ sukhe 'pi kāryo nanu so 'bhisandhiḥ |
atha pramāṇaṃ na sukhe 'bhisandhirduḥkhe pramāṇaṃ nanu nābhisandhiḥ || 29 ||
[Analyze grammar]

tathaiva ye karmaviśuddhihetoḥ spṛśantyapastīrthamiti pravṛttāḥ |
tatrāpi toṣo hṛdi kevalo 'yaṃ na pāvayiṣyanti hi pāpamāpaḥ || 30 ||
[Analyze grammar]

spṛṣṭaṃ hi yadyadguṇavadbhirambhastattatpṛthivyāṃ yadi tīrthamiṣṭam |
tasmādguṇāneva paraimi tīrthamāpastu niḥsaṃśayamāpa eva || 31 ||
[Analyze grammar]

iti sma tattadbahuyuktiyuktaṃ jagāda cāstaṃ ca yayau vivasvān |
tato havirdhūmavivarṇavṛkṣaṃ tapaḥpraśāntaṃ sa vanaṃ viveśa || 32 ||
[Analyze grammar]

abhyuddhṛtaprajvalitāgnihotraṃ kṛtābhiṣekarṣijanāvakīrṇam |
jāpyasvanākūjitadevakoṣṭhaṃ dharmasya karmāntamiva pravṛttam || 33 ||
[Analyze grammar]

kāścinniśāstatra niśākarābhaḥ parīkṣamāṇaśca tapāṃsyuvāsa |
sarvaṃ parikṣepya tapaśca matvā tasmāttapaḥkṣetratalājjagāma || 34 ||
[Analyze grammar]

anvavrajannāśramiṇastatastaṃ tadrūpamāhātmyagatairmanobhiḥ |
deśādanāryairabhibhūyamānānmahārṣayo dharmamivāpayāntam || 35 ||
[Analyze grammar]

tato jaṭāvalkalacīrakhelāṃstapodhanāṃścaiva sa tāndadarśa |
tapāṃsi caiṣāmanubudhyamānastasthau śive śrīmati mārgavṛkṣe || 36 ||
[Analyze grammar]

athopasṛtyāśramavāsinastaṃ manuṣyavaryaṃ parivārya tasthuḥ |
vṛddhaśca teṣāṃ bahumānapūrvaṃ kalena sāmnā giramityuvāca || 37 ||
[Analyze grammar]

tvayyāgate pūrṇa ivāśramo 'bhūtsampadyate śūnya iva prayāte |
tasmādimaṃ nārhasi tāta hātuṃ jijīviṣordehamiveṣṭamāyuḥ || 38 ||
[Analyze grammar]

brahmarṣirājarṣisurarṣijuṣṭaḥ puṇyaḥ samīpe himavān hi śailaḥ |
tapāṃsi tānyeva tapodhanānāṃ yatsaṃnikarṣādbahulībhavanti || 39 ||
[Analyze grammar]

tīrthāni puṇyānyabhitastathaiva sopānabhūtāni nabhastalasya |
juṣṭāni dharmātmabhirātmavadbhirdevarṣibhiścaiva mahārṣibhiśca || 40 ||
[Analyze grammar]

itaśca bhūyaḥ kṣamamuttaraiva diksevituṃ dharmaviśeṣahetoḥ |
na hi kṣamaṃ dakṣiṇato budhena padaṃ bhavedekamapi prayātum || 41 ||
[Analyze grammar]

tapovane 'sminnatha niṣkriyo vā saṅkīrṇadharmā patito 'śucirvā |
dṛṣṭastvayā yena na te vivatsā tadbrūhi yāvadrucito 'stu vāsaḥ || 42 ||
[Analyze grammar]

ime hi vāñchanti tapaḥsahāyaṃ taponidhānapratimaṃ bhavantam |
vāsastvayā hīndrasamena sārdhaṃ vṛhaspaterabhyudayāvahaḥ syāt || 43 ||
[Analyze grammar]

ityevamukte sa tapasvimadhye tapasvimukhyena manīṣimukhyaḥ |
bhavapraṇāśāya kṛtapratijñaḥ svaṃ bhāvamantargatamācacakṣe || 44 ||
[Analyze grammar]

ṛjvātmanāṃ dharmabhṛtāṃ munīnāmiṣṭātithitvātsvajanopamānam |
evaṃvidhairmāṃ prati bhāvajātaiḥ prītiḥ parātmā janitaśca mārgaḥ || 45 ||
[Analyze grammar]

snigdhābhirābhirhṛdayaṅgamābhiḥ samāsataḥ snāta ivāsmi vāgbhiḥ |
ratiśca me dharmanavagrahasya vispanditā samprati bhūya eva || 46 ||
[Analyze grammar]

evaṃ pravṛttān bhavataḥ śaraṇyānatīva sandarśitapakṣapātān |
yāsyāmi hitveti mamāpi duḥkhaṃ yathaiva bandhūṃstyajatastathaiva || 47 ||
[Analyze grammar]

svargāya yuṣmākamayaṃ tu dharmo mamābhilāṣastvapunarbhavāya |
asmin vane yena na me vivatsā bhinnaḥ pravṛttyā hi nivṛttidharmaḥ || 48 ||
[Analyze grammar]

tannāratirme na parāpacāro vanādito yena parivrajāmi |
dharme sthitāḥ pūrvayugānurūpe sarve bhavanto hi mahārṣikalpāḥ || 49 ||
[Analyze grammar]

tato vacaḥ sūnṛtamarthavacca suślakṣṇamojasvi ca garvitaṃ ca |
śrutvā kumārasya tapasvinaste viśeṣayuktaṃ bahumānamīyuḥ || 50 ||
[Analyze grammar]

kaściddvijastatra tu bhasmaśāyī prāṃśuḥ śikhī dāravacīravāsāḥ |
āpiṅgalākṣastanudīrghaghoṇaḥ kuṇḍodahasto giramityuvāca || 51 ||
[Analyze grammar]

dhīmannudāraḥ khalu niścayaste yastvaṃ yuvā janmani dṛṣṭadoṣaḥ |
svargāpavargau hi vicārya samyagyasyāpavarge matirasti so 'sti || 52 ||
[Analyze grammar]

yajñaistapobhirniyamaiśca taistaiḥ svargaṃ yiyāsanti hi rāgavantaḥ |
rāgeṇa sārdhaṃ ripuṇeva yuddhvā mokṣaṃ parīpsanti tu sattvavantaḥ || 53 ||
[Analyze grammar]

tadbuddhireṣā yadi niścitā te tūrṇaṃ bhavān gacchatu vindhyakoṣṭham |
asau munistatra vasatyarāḍo yo naiṣṭhike śreyasi labdhacakṣuḥ || 54 ||
[Analyze grammar]

tasmādbhavāñchroṣyati tattvamārgaṃ satyāṃ rucau sampratipatsyate ca |
yathā tu paśyāmi matistavaiṣā tasyāpi yāsyatyavadhūya buddhim || 55 ||
[Analyze grammar]

puṣṭāśvaghoṇaṃ vipulāyatākṣaṃ tāmrādharoṣṭhaṃ sitatīkṣṇadaṃṣṭram |
idaṃ hi vaktraṃ tanuraktajihvaṃ jñeyārṇavaṃ pāsyati kṛtsnameva || 56 ||
[Analyze grammar]

gambhīratā yā bhavatastvagādhā yā dīptatā yāni ca lakṣaṇāni |
ācāryakaṃ prāpsyasi tatpṛthivyāṃ yannarṣibhiḥ pūrvayuge 'pyavāptam || 57 ||
[Analyze grammar]

paramamiti tato nṛpātmajastamṛṣijanaṃ pratinandya niryayau |
vidhivadanuvidhāya te 'pi taṃ praviviśurāśramiṇastapovanam || 58 ||
[Analyze grammar]