Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 2.1
atha sādhanapādaḥ ||
te te duṣprāpayogarddhisiddhaye yena darśitāḥ | upāyāḥ sa jagannāthastryakṣo'stu prārthitāptaye || tadevaṃ prathame pāde samāhitacittasya sopāyaṃ yogamabhidhāya vyutthitacittasyāpi kathamupāyābhyāsapūrvako yogaḥ svāsthyamupayātīti tatsādhanānuṣṭhānapratipādanāya kriyāyogamāha —
tapaḥ svādhyāyeśvarapraṇidhānāni kriyāyogaḥ || sādhana 1 ||
vṛttiḥ — tapaḥ śāstrāntaropadiṣṭaṃ kṛcchracāndrāyaṇādi | svādhyāyaḥ praṇavapūrvāṇāṃ mantrāṇāṃ japaḥ | īśvarapranidhānaṃ sarvakriyāṇāṃ tasmin paramagurau phalanirapekṣatayā samarpaṇam | etāni kriyāyoga ityucyate || 1 ||