Chapter 103

[English text for this chapter is available]

| adhyāya || 103 ||
[Analyze grammar]

śrīmārkaṇḍeya uvāca |
tato gacchenmahīpāla eraṇḍīsaṅgamaṃ param |
yacchrutaṃ vai mayā rājañchivasya vadataḥ purā || 1 ||
[Analyze grammar]

etadeva purā praśnaṃ gauryā pṛṣṭastu śaṅkaraḥ |
provāca nṛpaśārdūla guhyādguhyataraṃ śubham || 2 ||
[Analyze grammar]

īśvara uvāca |
śṛṇu devi paraṃ guhyaṃ nākhyātaṃ kasyacinmayā |
revāyāścottare kūle tīrthaṃ paramaśobhanam |
bhrūṇahatyāharaṃ devi kāmadaṃ putravardhanam || 3 ||
[Analyze grammar]

pārvatyuvāca |
kathayasva mahādeva tīrthaṃ paramaśobhanam |
bhrūṇahatyāharaṃ kasmātkāmadaṃ svargadarśanam || 4 ||
[Analyze grammar]

īśvara uvāca |
atrirnāma mahādevi mānaso brahmaṇaḥ sutaḥ |
agnihotrarato nityaṃ devatātithipūjakaḥ || 5 ||
[Analyze grammar]

somasaṃsthāśca saptaiva kṛtā vipreṇa pārvati |
anasūyeti vikhyātā bhāryā tasya guṇānvitā || 6 ||
[Analyze grammar]

pativratā patiprāṇā patyuḥ kāryahite ratā |
evaṃ yāti tataḥ kāle na putrā na ca putrikā || 7 ||
[Analyze grammar]

aparāhṇe mahādevi sukhāsīnau tu sundari |
vadantau sukhaduḥkhāni pūrvavṛttāni yāni ca || 8 ||
[Analyze grammar]

atriruvāca |
saumye śubhe priye kānte cārusarvāṅgasundari |
vidyāvinayasampanne padmapatranibhekṣaṇe || 9 ||
[Analyze grammar]

pūrṇacandranibhākāre pṛthuśroṇibharālase |
na tvayā sadṛśī nārī trailokye sacarācare || 10 ||
[Analyze grammar]

ratiputraphalā nārī paṭhyate vedavādibhiḥ |
putrahīnasya yatsaukhyaṃ tatsaukhyaṃ mama sundari || 11 ||
[Analyze grammar]

yathāhaṃ na tathā putraḥ samarthaḥ sarvakarmasu |
punnāmanarakādbhadre jātamātreṇa sundari || 12 ||
[Analyze grammar]

patantaṃ rakṣayeddevi mahāpātakinaṃ yadi |
mahāghore gatā vāpi duṣṭakarmapitāmahāḥ || 13 ||
[Analyze grammar]

taddharanti suputrāśca vaitaraṇyāṃ gatānapi |
putreṇa lokāñjayati pautreṇa paramā gatiḥ || 14 ||
[Analyze grammar]

atha putrasya pautreṇa pragacchedbrahma śāśvatam |
nāsti putrasamo bandhuriha loke paratra ca || 15 ||
[Analyze grammar]

ahaśca madhyarātre ca cintayānasya sarvadā |
śuṣyanti mama gātrāṇi grīṣme nadyudakaṃ yathā || 16 ||
[Analyze grammar]

anasūyovāca |
yattvayā śocitaṃ vipra tatsarvaṃ śocayāmyaham |
tavodvegakaraṃ yacca tanme dahati cetasi || 17 ||
[Analyze grammar]

yena putrā bhaviṣyanti āyuṣmanto guṇānvitāḥ |
tatkāryaṃ ca samīkṣasva yena tuṣyetprajāpatiḥ || 18 ||
[Analyze grammar]

atriruvāca |
tapastaptaṃ mayā bhadre jātamātreṇa duṣkaram |
vratopavāsaniyamaiḥ śākāhāreṇa sundari || 19 ||
[Analyze grammar]

kṣīṇadehastu tiṣṭhāmi hyaśakto'haṃ mahāvrate |
tena śocāmi cātmānaṃ rahasyaṃ kathitaṃ mayā || 20 ||
[Analyze grammar]

anasūyovāca |
bhartuḥ pativratā nārī ratiputravivardhinī |
trivargasādhanā sā ca ślāghyā ca viduṣāṃ jane || 21 ||
[Analyze grammar]

japastapastīrthayātrā mṛḍejyāmantrasādhanam |
devatārādhanaṃ caiva strīśūdrapatanāni ṣaṭ || 22 ||
[Analyze grammar]

īdṛśaṃ tu mahādoṣaṃ strīṇāṃ tu vratasādhane |
vadanti munayaḥ sarve yathoktaṃ vedabhāṣitam || 23 ||
[Analyze grammar]

anujñātā tvayā brahmaṃstapastapsyāmi duṣkaram |
putrārthitvaṃ samuddiśya toṣayāmi surottamān || 24 ||
[Analyze grammar]

atriruvāca |
sādhu sādhu mahāprājñe mama saṃtoṣakāriṇi |
ājñātā tvaṃ mayā bhadre putrārthaṃ tapa āśraya || 25 ||
[Analyze grammar]

devatānāṃ manuṣyāṇāṃ pitḥṇāmanṛṇo bhave |
na bhāryāsadṛśo bandhustriṣu lokeṣu vidyate || 26 ||
[Analyze grammar]

tena devāḥ praśaṃsanti na bhāryāsadṛśaṃ sukham |
sanmukhe manmukhāḥ putrāḥ vilome tu parāṅmukhāḥ || 27 ||
[Analyze grammar]

tena bhāryāṃ praśaṃsanti sadevāsuramānuṣāḥ |
mahāvrate mahāprājñe sattvavati śubhekṣaṇe || 28 ||
[Analyze grammar]

tapastapasva śīghraṃ tvaṃ putrārthaṃ tu mamājñayā |
etadvākyāvasāne tu sāṣṭāṅgaṃ praṇatābravīt || 29 ||
[Analyze grammar]

tvatprasādena viprendra sarvānkāmānavāpnuyām |
haṃsalīlāgatiḥ sā ca mṛgākṣī varavarṇinī || 30 ||
[Analyze grammar]

niyamasthā tato bhūtvā samprāptā narmadāṃ nadīm |
śivasvedodbhavāṃ devīṃ sarvapāpapraṇāśanīm || 31 ||
[Analyze grammar]

yasyā darśanamātreṇa naśyate pāpasañcayaḥ |
snānamātreṇa vai yasyā aśvamedhaphalaṃ labhet || 32 ||
[Analyze grammar]

ye pibanti mahādevi śraddadhānāḥ payaḥ śubham |
somapānena tattulyaṃ nātra kāryā vicāraṇā || 33 ||
[Analyze grammar]

ye smaranti divā rātrau yojanānāṃ śatairapi |
mucyante sarvapāpebhyo rudralokaṃ prayānti te || 34 ||
[Analyze grammar]

narmadāyāḥ samīpe tu tāvubhau yojanadvaye |
na paśyanti yamaṃ tatra ye mṛtā varavarṇini || 35 ||
[Analyze grammar]

tatastaduttare kūle eraṇḍyāḥ saṅgame śubhe |
niyamasthā viśālākṣī śākāhāreṇa sundari || 36 ||
[Analyze grammar]

toṣayantī trīṃśca devāñchubhaiḥ stotrairvrataistathā |
grīṣmeṣu ca mahādevi pañcāgniṃ sādhayettataḥ || 37 ||
[Analyze grammar]

varṣākāle cārdravāsāścareccāndrāyaṇāni ca |
hemante tu tataḥ prāpte toyamadhye vasetsadā || 38 ||
[Analyze grammar]

prātaḥsnānaṃ tataḥ sandhyāṃ kuryāddevarṣitarpaṇam |
devānāmarcanaṃ kṛtvā homaṃ kuryādyathāvidhi || 39 ||
[Analyze grammar]

yajate vaiṣṇavāṃllokān snānajāpyahutena ca |
evaṃ varṣaśate prāpte rudraviṣṇupitāmahāḥ || 40 ||
[Analyze grammar]

samprāptā dvijarūpaistu eraṇḍyāḥ saṅgame priye |
purataḥ saṃsthitāstasyā vedamabhyuddharanti ca || 41 ||
[Analyze grammar]

anasūyā japaṃ tyaktvā nirīkṣya tānmuhurmuhuḥ |
utthitā sā viśālākṣī arghaṃ dattvā yathāvidhi || 42 ||
[Analyze grammar]

adya me saphalaṃ janma adya me saphalaṃ tapaḥ |
darśanena tu viprāṇāṃ sarvapāpaiḥ pramucyate || 43 ||
[Analyze grammar]

pradakṣiṇaṃ tataḥ kṛtvā sāṣṭāṅgaṃ praṇatābravīt |
kandamūlaphalaṃ śākaṃ nīvārānapi pāvanān |
prayacchāmyahamadyaiva munīnāṃ bhāvitātmanām || 44 ||
[Analyze grammar]

viprā ūcuḥ |
tapasā tu vicitreṇa tapaḥsatyena suvrate |
tṛptāḥ sma sarvakāmaistu suvrate tava darśanāt || 45 ||
[Analyze grammar]

asmākaṃ kautukaṃ jātaṃ tāpasena vratena yat |
svargamokṣasutasyārthe tapastapasi duṣkaram || 46 ||
[Analyze grammar]

anasūyovāca |
tapasā sidhyate svargastapasā paramā gatiḥ |
tapasā cārthakāmau ca tapasā guṇavānsutaḥ |
tapa eva ca me viprāḥ sarvakāmaphalapradam || 47 ||
[Analyze grammar]

viprā ūcuḥ |
tanvī śyāmā viśālākṣī snigdhāṅgī rūpasaṃyutā |
haṃsalīlāgatigamā tvaṃ ca sarvāṅgasundarī || 48 ||
[Analyze grammar]

kiṃ ca te tapasā kāryamātmānaṃ śocyase katham || 49 ||
[Analyze grammar]

anasūyovāca |
yadi rudraśca viṣṇuśca svayaṃ sākṣātpitāmahaḥ |
gūḍharūpadharāḥ sarve taccihnamupalakṣaye || 50 ||
[Analyze grammar]

tasyā vākyāvasāne tu svarūpaṃ darśayanti te |
svasvarūpaiḥ sthitā devāḥ sūryakoṭisamaprabhāḥ || 51 ||
[Analyze grammar]

caturbhujo mahādevi śaṅkhacakragadādharaḥ |
atasīpuṣpavarṇastu pītavāsā janārdanaḥ || 52 ||
[Analyze grammar]

garutmānvāhanaṃ yasya śriyā ca sahito hariḥ |
prasannavadanaḥ śrīmānsvayaṃrūpo vyavasthitaḥ || 53 ||
[Analyze grammar]

pītavāsā mahādevi caturvadanapaṅkajaḥ |
haṃsopari samārūḍho hyakṣamālākarodyataḥ || 54 ||
[Analyze grammar]

āgato narmadātīre brahmā lokapitāmahaḥ |
yo'sau sarvajagadvyāpī svayaṃ sākṣānmaheśvaraḥ || 55 ||
[Analyze grammar]

vṛṣabhaṃ tu samārūḍho daśabāhusamanvitaḥ |
bhasmāṅgarāgaśobhāḍhyaḥ pañcavaktrastrilocanaḥ || 56 ||
[Analyze grammar]

jaṭāmukuṭasaṃyuktaḥ kṛtacandrārddhaśekharaḥ |
evaṃrūpadharo devaḥ sarvavyāpī maheśvaraḥ || 57 ||
[Analyze grammar]

anasūyā nirīkṣyaitaddevānāṃ darśanaṃ param |
vepamānā tataḥ sādhvī surāndṛṣṭvā muhurmuhuḥ || 58 ||
[Analyze grammar]

anasūyovāca |
kiṃ vyāpārasvarūpāstu viṣṇurudrapitāmahāḥ |
etadvai śrotumicchāmi hyaśeṣaṃ kathayantu me || 59 ||
[Analyze grammar]

brahmovāca |
prāvṛṭkālo hyahaṃ brahmā āpaścaiva prakīrtitāḥ |
megharūpo hyahaṃ prokto varṣayāmi ca bhūtale || 60 ||
[Analyze grammar]

ahaṃ sarvāṇi bījāni prāksandhyāsūdite ravau |
etadvai kāraṇaṃ sarvaṃ rahasyaṃ kathitaṃ param || 61 ||
[Analyze grammar]

viṣṇuruvāca |
hemantaśca bhavedviṣṇurviśvarūpaṃ carācaram |
pālanāya jagatsarvaṃ viṣṇormāhātmyamuttamam || 62 ||
[Analyze grammar]

rudra uvāca |
grīṣmakālo hyahaṃ proktaḥ sarvabhūtakṣayaṃkaraḥ |
karṣayāmi jagatsarvaṃ rudrarūpastapasvini || 63 ||
[Analyze grammar]

evaṃ brahmā ca viṣṇuśca rudraścaiva mahāvrate |
trayo devāstrayaḥ sandhyāstrayaḥ kālāstrayo'gnayaḥ || 64 ||
[Analyze grammar]

tathā brahmā ca viṣṇuśca rudraścaikātmatāṃ gataḥ |
varaṃ dadyuśca te bhadre yastvayā manasīpsitam || 65 ||
[Analyze grammar]

anasūyovāca |
dhanyā puṇyā hyahaṃ loke ślāghyā vandyā ca sarvadā |
brahmā viṣṇuśca rudraśca prasannavadanāḥ śubhāḥ || 66 ||
[Analyze grammar]

yadi tuṣṭāstrayo devā dayāṃ kṛtvā mamopari |
asmiṃstīrthe tu sāṃnidhyādvaradāḥ santu me sadā || 67 ||
[Analyze grammar]

rudra uvāca |
evaṃ bhavatu te vākyaṃ yattvayā prārthitaṃ śubhe |
pratyakṣā vaiṣṇavī māyā eraṇḍīnāma nāmataḥ || 68 ||
[Analyze grammar]

yasyā darśanamātreṇa naśyate pāpasañcayaḥ |
caitramāse tu samprāpte ahorātroṣito bhavet || 69 ||
[Analyze grammar]

eraṇḍyāḥ saṅgame snātvā brahmahatyāṃ vyapohati |
rātrau jāgaraṇaṃ kuryātprabhāte bhojayeddvijān || 70 ||
[Analyze grammar]

yathoktena vidhānena piṇḍaṃ dadyādyathāvidhi |
pradakṣiṇāṃ tato dadyāddhiraṇyaṃ vastrameva ca || 71 ||
[Analyze grammar]

rajataṃ ca tathā gāvo bhūmidānamathāpi vā |
sarvaṃ koṭiguṇaṃ proktamiti svāyambhuvo'bravīt || 72 ||
[Analyze grammar]

ye mriyanti narā devi eraṇḍyāḥ saṅgame śubhe |
yāvadyugasahasraṃ tu rudraloke vasanti te || 73 ||
[Analyze grammar]

ahorātroṣito bhūtvā japedrudrāṃśca vaidikān |
ekādaśaikasaṃjñāṃśca sa yāti paramāṃ gatim || 74 ||
[Analyze grammar]

vidyārthī labhate vidyāṃ dhanārthī labhate dhanam |
putrārthī labhate putrāṃllabhetkāmān yathepsitān || 75 ||
[Analyze grammar]

eraṇḍyāḥ saṅgame snātvā revāyā vimale jale |
mahāpātakino vāpi te yānti paramāṃ gatim || 76 ||
[Analyze grammar]

anasūyovāca |
yadi tuṣṭāstrayo devā mama bhaktipracoditāḥ |
mama putrā bhavantveva harirudrapitāmahāḥ || 77 ||
[Analyze grammar]

viṣṇuruvāca |
pūjyā yatputratāṃ yānti na kadācicchrutaṃ mayā |
śubhe dadāmi putrāṃste devatulyaparākramān |
rūpavanto guṇopetānyajvinaśca bahuśrutān || 78 ||
[Analyze grammar]

anasūyovāca |
īpsitaṃ tacca dātavyaṃ yanmayā prārthitaṃ hare |
nānyathā caiva kartavyā mama putraiṣaṇā tu yā || 79 ||
[Analyze grammar]

viṣṇuruvāca |
pūrvaṃ tu bhṛgusaṃvāde garbhavāsa upārjitaḥ |
tasyāhaṃ caiva pāraṃ tu naiva paśyāmi śobhane || 80 ||
[Analyze grammar]

smaramāṇaḥ purāvṛttaṃ cintayāmi punaḥpunaḥ |
evaṃ saṃcintya te devāḥ pitāmahamaheśvarāḥ || 81 ||
[Analyze grammar]

ayonijā bhaviṣyāmastava putrā varānane |
yonivāse mahāprājñi devā naiva vrajanti ca || 82 ||
[Analyze grammar]

sāṃnidhyātsaṅgame devi lokānāṃ tu varapradāḥ |
eraṇḍī vaiṣṇavī māyā pratyakṣā tvaṃ bhaviṣyasi || 83 ||
[Analyze grammar]

trayo devāḥ sthitāḥ pātha revāyā uttare taṭe |
varaprāptā tu sā devī gatā māhendraparvatam || 84 ||
[Analyze grammar]

kṣīṇāṅgī śukladehā ca rūkṣakeśī sudāruṇā |
kṛtayajñopavītā sā taponiṣṭhā śubhekṣaṇā || 85 ||
[Analyze grammar]

śilātalaniviṣṭo'sau dṛṣṭaḥ kānto mahāyaśāḥ |
hṛṣṭacitto'bhavaddevi uttiṣṭhottiṣṭha sābravīt || 86 ||
[Analyze grammar]

atriruvāca |
sādhu sādhu mahāprājñe hyanasūye mahāvrate |
acintyaṃ gālavādīnāṃ varaṃ prāptāsi durlabham || 87 ||
[Analyze grammar]

anasūyovāca |
tvatprasādena devarṣe varaṃ prāptāsmi durlabham |
tena devāḥ praśaṃsanti siddhāśca ṛṣayo'malāḥ || 88 ||
[Analyze grammar]

evamuktā tu sā devī harṣeṇa mahatā yutā |
ālokayettataḥ kāntaṃ tenāpi śubhadarśanā || 89 ||
[Analyze grammar]

īkṣaṇāccaiva saṃjātaṃ lalāṭe maṇḍalaṃ śubham |
navayojanasāhasraṃ maṇḍalaṃ raśmibhirvṛtam || 90 ||
[Analyze grammar]

kadambagolakākāraṃ triguṇaṃ parimaṇḍalam |
tasya madhye tu deveśi puruṣo divyarūpadhṛk || 91 ||
[Analyze grammar]

hemavarṇo'mṛtamayaḥ sūryakoṭisamaprabhaḥ |
ādyaḥ putro'nasūyāyāḥ svayaṃ sākṣātpitāmahaḥ || 92 ||
[Analyze grammar]

candramā iti vikhyātaḥ somarūpo nṛpātmaja |
iṣṭāpūrte ca saṃpāti kalāṣoḍaśakena tu || 93 ||
[Analyze grammar]

pratipacca dvitīyā ca tṛtīyā ca maheśvari |
caturthī pañcamī caiva avyayā ṣoḍaśī kalā || 94 ||
[Analyze grammar]

caturvidhasya lokasya sūkṣmo bhūtvā varānane |
āprīṇāti jagatsarvaṃ trailokyaṃ sacarācaram || 95 ||
[Analyze grammar]

sarve te hyupajīvanti hutaṃ dattaṃ śaśisthitam |
vanaspatigate some dhanavāṃśca varānane || 96 ||
[Analyze grammar]

bhuñjan paragṛhe mūḍho dadedabdakṛtaṃ śubham |
vanaspatigate some yastu chindyādvanaspatīn |
tena pāpena deveśi narā yānti yamālayam || 97 ||
[Analyze grammar]

vanaspatigate some maithunaṃ yo niṣevate |
brahmahatyāsamaṃ pāpaṃ labhate nātra saṃśayaḥ || 98 ||
[Analyze grammar]

vanaspatigate some manthānaṃ yo'dhivāhayet |
gāvastasya praṇaśyanti yāśca vai pūrvasaṃcitāḥ || 99 ||
[Analyze grammar]

vanaspatigate some hyadhvānaṃ yo'dhigacchati |
bhavanti pitarastasya taṃ māsaṃ reṇubhojanāḥ || 100 ||
[Analyze grammar]

amāvasyāṃ mahādevi yastu śrāddhaprado bhavet |
abdamekaṃ viśālākṣi tṛptāstatpitaro dhruvam || 101 ||
[Analyze grammar]

hiraṇyaṃ rajataṃ vastraṃ yo dadāti dvijātiṣu |
sarvaṃ lakṣaguṇaṃ devi labhate nātra saṃśayaḥ || 102 ||
[Analyze grammar]

evaṃ guṇaviśiṣṭo'sau somarūpaḥ prajāpatiḥ |
saṃjātaḥ prathamaḥ putro hyanasūyāsunandanaḥ || 103 ||
[Analyze grammar]

dvitīyastu mahādevi durvāsā nāma nāmataḥ |
sṛṣṭisaṃhārakartā ca svayaṃ sākṣānmaheśvaraḥ || 104 ||
[Analyze grammar]

ṛṣimadhyagato devi tapastapati duṣkaram |
so'pi rudratvamāyāti samprāpte bhūtaviplave || 105 ||
[Analyze grammar]

indro'pi śaptastenaiva durvāsasā varānane |
dvitīyasya tu putrasya sambhavaḥ kathito mayā || 106 ||
[Analyze grammar]

dattātreyasvarūpeṇa bhagavānmadhusūdanaḥ |
jagadvyāpī jagannāthaḥ svayaṃ sākṣājjanārdanaḥ || 107 ||
[Analyze grammar]

ete devāstrayaḥ putrā anasūyāyā maheśvari |
varadānena te devā hyavatīrṇā mahītale || 108 ||
[Analyze grammar]

putraprāptikaraṃ tīrthaṃ revāyāścottare taṭe |
anasūyākṛtaṃ pārtha sarvapāpakṣayaṃ param || 109 ||
[Analyze grammar]

śrīmārkaṇḍeya uvāca |
āścaryabhūtaṃ loke'sminnarmadāyāṃ purātanam |
bhrūṇahatyā gatā tatra brāhmaṇasya narādhipa || 110 ||
[Analyze grammar]

yudhiṣṭhira uvāca |
itihāsaṃ dvijaśreṣṭha kathayasva mamānagha |
sarvapāpaharaṃ loke duḥkhārtasya ca kathyatām || 111 ||
[Analyze grammar]

śrīmārkaṇḍeya uvāca |
suvarṇaśilake grāme gautamānvayasambhavaḥ |
kṛṣīvalo mahādevi bhāryāputrasamanvitaḥ || 112 ||
[Analyze grammar]

vasate tatra govindaḥ saṃjāto vipule kule |
putradārasamopeto gṛhakṣetrarataḥ sadā || 113 ||
[Analyze grammar]

śakaṭaṃ pūrayitvā tu kāṣṭhānāmagamadguham |
prakṣiptāni ca kāṣṭhāni hyekākī kṣudhayānvitaḥ || 114 ||
[Analyze grammar]

riṅgamāṇastadā putraḥ pituḥ śabdātsamāgataḥ |
na dṛṣṭastena vai putraḥ kāṣṭhaiḥ saṃchādito'vaśaḥ || 115 ||
[Analyze grammar]

āgatastvarito gehe pipāsārto narādhipa |
śakaṭaṃ mocya taddvāri savṛṣaṃ rajjusaṃyutam || 116 ||
[Analyze grammar]

bhāryā tasyaiva yā dṛṣṭā cittajñā vaśavartinī |
dṛṣṭvā nipātitaṃ putraṃ kāṣṭhairnirbhinnamastakam || 117 ||
[Analyze grammar]

ajalpamānākaruṇaṃ nikṣiptaṃ jñolikāṃ śiśum |
śuśrūṣaṇe ratā sādhvī priyasya ca narādhipa || 118 ||
[Analyze grammar]

tataḥ snānādikaṃ kṛtvā bhojanācchayanaṃ śubham |
putraṃ putravatāṃ śreṣṭhā hyutthāpayati śāsanaiḥ || 119 ||
[Analyze grammar]

yadā ca notthitaḥ suptaḥ putraḥ pañcatvamāgataḥ |
tadā sā dīnavadanā ruroda ca mumoha ca || 120 ||
[Analyze grammar]

tacchrutvā ruditaṃ śabdaṃ govindastrastamānasaḥ |
kimetaditi coktvā tu patito dharaṇītale || 121 ||
[Analyze grammar]

dvāvetau muktakeśau tu bhūmau nipatitau nṛpa |
vilepāte ca rājendra niḥśvāsocchvāsitena ca || 122 ||
[Analyze grammar]

kaṃ paśye prāṅgaṇe putraṃ dṛṣṭvā krīḍantamāturam |
saṃdhārayiṣye hṛdayaṃ sphuṭitaṃ tava kāraṇe || 123 ||
[Analyze grammar]

tvajjanmāntaṃ yaśo nityamakṣayāṃ kulasantatim |
dṛṣṭvā kimanṛṇībhūto yāsyāmi paramāṃ gatim || 124 ||
[Analyze grammar]

mama vṛddhasya dīnasya gatistvaṃ kila putraka |
ete manorathāḥ sarve cintitā viphalā gatāḥ || 125 ||
[Analyze grammar]

imāṃ tu vikalāṃ dīnāṃ vihīnāṃ sutabāndhavaiḥ |
rudantīṃ patitāṃ pāhi mātaraṃ dharaṇītale || 126 ||
[Analyze grammar]

punnāmno narakādyasmātpitaraṃ trāyate sutaḥ |
tena putra iti proktaḥ svayameva svayambhuvā || 127 ||
[Analyze grammar]

aputrasya gṛhaṃ śūnyaṃ diśaḥ śūnyā hyabāndhavāḥ |
mūrkhasya hṛdayaṃ śūnyaṃ sarvaśūnyaṃ daridratā || 128 ||
[Analyze grammar]

mṛṣāyaṃ vadate lokaścandanaṃ kila śītalam |
putragātrapariṣvaṅgaścandanādapi śītalaḥ || 129 ||
[Analyze grammar]

śmaśrugrahaṇakrīḍantaṃ dhūlidhūsaritānanam |
puṇyahīnā na paśyanti nijotsaṅgasamāsthitam || 130 ||
[Analyze grammar]

digambaraṃ gatavrīḍaṃ jaṭilaṃ dhūlidhūsaram |
puṇyahīnā na paśyanti gaṅgādharamivātmajam || 131 ||
[Analyze grammar]

vīṇāvādyasvaro loke susvaraḥ śrūyate kila |
ruditaṃ bālakasyaiva tasmādāhlādakārakam || 132 ||
[Analyze grammar]

mṛgapakṣiṣu kākeṣu paśūnāṃ svarayoniṣu |
putraṃ teṣu samasteṣu vallabhaṃ bruvate budhāḥ || 133 ||
[Analyze grammar]

matsyāśvaprakarāścaiva kūrmagrāhādayo'pi vā |
putrotpattau ca hṛṣyanti vipattau yānti duḥkhitām || 134 ||
[Analyze grammar]

devagandharvayakṣāśca hṛṣyante putrajanmani |
pañcatve te'pi śocanti mandabhāgyo'smi putraka || 135 ||
[Analyze grammar]

ṛṣimelāpakaṃ cakre putrārthe rāghavo nṛpa |
indrasthāne sthitastasya prokṣate hyāsanaṃ yataḥ || 136 ||
[Analyze grammar]

svargavāsaṃ sutādbāhyaṃ vidyate na tu pāṇḍava |
cakre daśarathastasmātputrārthaṃ yajñamuttamam || 137 ||
[Analyze grammar]

rāmo lakṣmaṇaśatrughnau bharatastatra sambhavāt |
kārtavīryo jito yena rāmeṇāmitatejasā || 138 ||
[Analyze grammar]

sa rāmo rāmacandreṇa aṣṭavarṣeṇa nirjitaḥ |
ekākinā hato vālī plavagaḥ śatrudurjayaḥ || 139 ||
[Analyze grammar]

rāvaṇo brahmaputro yastrailokyaṃ yasya śaṅkate |
hataḥ sa rāmacandreṇa saputraḥ sahabāndhavaḥ || 140 ||
[Analyze grammar]

evaṃ putraṃ vinā saukhyaṃ martyaloke na vidyate |
vaṃśārthe maithunaṃ yasya svargārthe yasya bhāratī || 141 ||
[Analyze grammar]

mṛṣṭānnaṃ brāhmaṇasyārthe svarge vāsaṃ tu yānti te |
brahmahatyāśvamedhābhyāṃ na paraṃ pāpapuṇyayoḥ || 142 ||
[Analyze grammar]

putrotpattivipattibhyāṃ na paraṃ sukhaduḥkhayoḥ |
kiṃ bravīmīti bho vatsa na tu saukhyaṃ sutaṃ vinā || 143 ||
[Analyze grammar]

evaṃ bahuvidhaṃ duḥkhaṃ pralapitvā punaḥpunaḥ |
janaiścāśvāsito vipro bālaṃ gṛhya bahirgataḥ || 144 ||
[Analyze grammar]

tataḥ saṃskṛtya taṃ bālaṃ vidhidṛṣṭena karmaṇā |
samavetau tu duḥkhārtāvāgatau svagṛhaṃ punaḥ || 145 ||
[Analyze grammar]

evaṃ gṛhāgate vipre rātrirjātā yudhiṣṭhira |
bhūmau prasupto govindaḥ putraśokena pīḍitaḥ || 146 ||
[Analyze grammar]

yāvannirīkṣate bhāryā bhartāraṃ duḥkhapīḍitam |
kṛmirāśigataṃ sarvaṃ govindaṃ samapaśyata || 147 ||
[Analyze grammar]

duḥkhādduḥkhatare magnā dṛṣṭvā taṃ pātakānvitam |
evaṃ duḥkhanimagnāyāḥ śarvarī vigatā tadā || 148 ||
[Analyze grammar]

paśupālastu mahiṣīmuktvāraṇye'gamadgṛhāt |
araṇye mahiṣīḥ sarvā rakṣayitvā gṛhāgataḥ || 149 ||
[Analyze grammar]

vijñaptaḥ paśupālena govindo brāhmaṇottamaḥ |
yāvadbhokṣyāmyahaṃ svāminmahiṣīstvaṃ ca rakṣase || 150 ||
[Analyze grammar]

tataḥ sa tvarito vipro jagāma mahiṣīḥ prati |
na tatra mahiṣīḥ paśyetpaścātkṣetrābhisammukham || 151 ||
[Analyze grammar]

dhāvamānaśca viprastu eraṇḍīsaṅgame gataḥ |
tataḥ praviṣṭastu jale revairaṇḍyostu saṅgame || 152 ||
[Analyze grammar]

tajjalaṃ pītamātraṃ tu tvarayā cātitarṣitaḥ |
akāmātsalilaṃ pītvā prakṣālya nayane śubhe || 153 ||
[Analyze grammar]

ājagāma tataḥ paścādbhavanaṃ divasakṣaye |
bhuktvā duḥkhānvito rātrau govindaḥ śayanaṃ yayau || 154 ||
[Analyze grammar]

nidrābhibhūtaḥ śokena śrameṇaiva tu kheditaḥ |
punastaccārdharātre tu tasya bhāryā yudhiṣṭhira || 155 ||
[Analyze grammar]

kṛmibhirveṣṭitaṃ gāntraṃ kvacitpaśyatyaveṣṭitam |
punaḥ sā vismayāviṣṭā tasya bhāryā guṇānvitā |
uvāca duṣkṛtaṃ tasya sādhvasāviṣṭacetasā || 156 ||
[Analyze grammar]

bhāryovāca |
atīte pañcame cāhni tvindhanaṃ kṣipatastu te |
gṛhapaścādgato bālo hyajñānādghātitastvayā || 157 ||
[Analyze grammar]

mayā tatpātakaṃ ghoraṃ rahasyaṃ na prakāśitam |
tena pracchannapāpena dahyamānā divāniśam || 158 ||
[Analyze grammar]

na sukhaṃ tava gātrasya paśyāmi na hi cātmanaḥ |
nidrā mama śamaṃ yātā ratiścaiva tvayā saha || 159 ||
[Analyze grammar]

śrūyate mānave śāstre śloko gīto maharṣibhiḥ |
smṛtvā smṛtvā tu taṃ citte paritāpo na śāmyati || 160 ||
[Analyze grammar]

kīrtanānnaśyate dharmo vardhate'sau nigūhanāt |
iha loke pare caiva pāpasyāpyevameva ca || 161 ||
[Analyze grammar]

evaṃ saṃcityamānāhaṃ sthitā rātrau bhayāturā |
kṛmirāśigataṃ tvāṃ hi kasyāhaṃ kathayāmi kim || 162 ||
[Analyze grammar]

punastvaṃ cādya me dṛṣṭo bhrūṇahatyākṛmiśritaḥ |
kvacidbhindanti te gātraṃ kvacinnaṣṭāḥ samantataḥ || 163 ||
[Analyze grammar]

etatsaṃsmṛtya saṃsmṛtya vimṛśāmi punaḥpunaḥ |
na jāne kāraṇaṃ kiṃcitpṛcchantyāḥ kathayasva me || 164 ||
[Analyze grammar]

taḍāgaṃ vā saridvāpi tīrthaṃ vā devatārcanam |
yaṃ gato'si prabhāvo'yaṃ tasya nānyasya me sthitam || 165 ||
[Analyze grammar]

evamuktastu vipro'sau kathayāmāsa bhārata |
bhāryāyā yaddivā vṛttaṃ śaṅkamāno nṛpottama || 166 ||
[Analyze grammar]

adyāhaṃ mahiṣīsārthaṃ eraṇḍīsaṅgamaṃ gataḥ |
nābhimātre jale gatvā pītavānsalilaṃ bahu || 167 ||
[Analyze grammar]

nānyattīrthaṃ vijānāmi saritaṃ sara eva vā |
satyaṃ satyaṃ punaḥ satyaṃ kathitaṃ tava bhāmini || 168 ||
[Analyze grammar]

evaṃ jñātvā tu sā sarvamupavāsakṛtakṣaṇā |
sapatnīko gatastatra saṅgame varavarṇini || 169 ||
[Analyze grammar]

snātvā tatra jale ramye natvā devaṃ tu bhāskaram |
snāpayāmāsa deveśaṃ śaṅkaraṃ comayā saha || 170 ||
[Analyze grammar]

pañcagavyaghṛtakṣīrairdadhikṣaudraghṛtairjalaiḥ |
gandhamālyādidhūpaiśca naivedyaiśca suśobhanaiḥ || 171 ||
[Analyze grammar]

pūjya trayīmayaṃ liṅgaṃ devīṃ kātyāyanīṃ śubhām |
rātrau jāgaraṇaṃ kṛtvā patyāsi pativratā || 172 ||
[Analyze grammar]

tataḥ prabhāte vimale dvijānsampūjya yatnataḥ |
godānena hiraṇyena vastreṇānnena bhārata || 173 ||
[Analyze grammar]

govindaḥ pūjayāmāsa svaśaktyā brāhmaṇāñchubhān |
muktapāpo gṛhāyātaḥ svabhāryāsahito nṛpa || 174 ||
[Analyze grammar]

evaṃ yaḥ śṛṇute bhaktyā govindākhyānamuttamam |
paṭhate parayā bhaktyā bhrūṇahatyā praṇaśyati || 175 ||
[Analyze grammar]

krīḍate śāṃkare loke yāvadābhūtasamplavam |
yaścaivāśvayuje māsi caitre vā nṛpasattama || 176 ||
[Analyze grammar]

saptamyāṃ ca site pakṣe sopavāso jitendriyaḥ |
sāttvikīṃ vāsanāṃ kṛtvā yo vasecchivamandire || 177 ||
[Analyze grammar]

dhyāyamāno virūpākṣaṃ triśūlakarasaṃsthitam |
kaṃsāsuranihantāraṃ śaṅkhacakragadādharam || 178 ||
[Analyze grammar]

pakṣirājasamārūḍhaṃ trailokyavaradāyakam |
pitāmahaṃ tato dhyāyeddhaṃsasthaṃ caturānanam || 179 ||
[Analyze grammar]

sargapradaṃ samastasya kamalākaraśobhitam |
yo hyevaṃ vasate tatra triyame sthāna uttame || 180 ||
[Analyze grammar]

tataḥ prabhāte vimale hyaṣṭamyāṃ ca narādhipa |
brāhmaṇān pūjayedbhaktyā sarvadoṣavivarjitān || 181 ||
[Analyze grammar]

sarvāvayavasampūrṇānsarvaśāstraviśāradān |
vedābhyāsaratānnityaṃ svadāraniratānsadā || 182 ||
[Analyze grammar]

śrāddhe dāne vrate yogyān brāhmaṇān pāṇḍunandana |
pretānāṃ pūjanaṃ tatra devapūrvaṃ samārabhet || 183 ||
[Analyze grammar]

pretatvānmucyate śīghrameraṇḍyāṃ piṇḍatarpaṇaiḥ |
dānāni tatra deyāni hyannamukhyāni sarvadā || 184 ||
[Analyze grammar]

hiraṇyabhūmikanyāśca dhūrvāhau śubhalakṣaṇau |
sīreṇa sahitau pārtha dhānyaṃ droṇakasaṃkhyayā || 185 ||
[Analyze grammar]

alaṃkṛtāṃ savatsāṃ ca kṣīriṇīṃ taruṇīṃ sitām |
raktāṃ vā kṛṣṇavarṇāṃ vā pāṭalāṃ kapilāṃ tathā || 186 ||
[Analyze grammar]

kāṃsyadohanasaṃyuktāṃ rukmakhuravibhūṣaṇām |
svarṇaśṛṅgīṃ savatsāṃ ca brāhmaṇāyopapādayet || 187 ||
[Analyze grammar]

prīyatāṃ me jagannāthā harakṛṣṇapitāmahāḥ |
saṃsārarakṣaṇī devī surabhī māṃ samuddharet || 188 ||
[Analyze grammar]

putrārthaṃ yāḥ striyaḥ pārtha hyeraṇḍīsaṅgame nṛpa |
snāpyante rudrasūktaiśca caturvedodbhavaistathā || 189 ||
[Analyze grammar]

caturbhirbrāhmaṇaiḥ śastaṃ dvābhyāṃ yogyaiśca kārayet |
ekena sārdrakumbhena dāmpatyamabhiṣecayet || 190 ||
[Analyze grammar]

daivajñenaiva caikena athavā sāmagena vā |
pañcaratnasamāyuktaṃ kumbhe tatraiva kārayet || 191 ||
[Analyze grammar]

gandhatoyasamāyuktaṃ sarvauṣadhivimiśritam |
āmrapallavasaṃyuktamaśvatthamadhukaṃ tathā || 192 ||
[Analyze grammar]

guṇṭhitaṃ sitavastreṇa sitacandanacarcitam |
sitapuṣpaistu saṃchannaṃ siddhārthakṛtamadhyamam || 193 ||
[Analyze grammar]

kāṃsyapātre tu saṃsthāpya putrārthī deśikottamaḥ |
aṅgalagnaṃ tu yadvastraṃ kaṭakābharaṇaṃ tathā || 194 ||
[Analyze grammar]

tatsarvaṃ maṇḍale tyājyaṃ siddhyarthaṃ cātmanastadā |
praṇamya bhāskaraṃ paścādācāryaṃ rudrarūpiṇam || 195 ||
[Analyze grammar]

madhuraṃ ca tato'śnīyāddevyā bhuvana uttame |
phaladānaṃ ca viprāya chatraṃ tāmbūlameva ca || 196 ||
[Analyze grammar]

upānahau ca yānaṃ ca sa bhavedduḥkhavarjitaḥ |
bhāskare krīḍate loke yāvadābhūtasamplavam || 197 ||
[Analyze grammar]

dānaṃ koṭiguṇaṃ sarvaṃ śubhaṃ vā yadi vāśubham |
yathā nadīnadāḥ sarve sāgare yānti saṃkṣayam || 198 ||
[Analyze grammar]

evaṃ pāpāni naśyanti hyeraṇḍīsaṅgame nṛṇām |
samantācchastrapātena hyeraṇḍīsaṅgame nṛpa || 199 ||
[Analyze grammar]

bhrūṇahatyāsamaṃ pāpaṃ naśyate śaṅkaro'bravīt |
prāṇatyāgaṃ ca yo bhaktyā jātavedasi kārayet || 200 ||
[Analyze grammar]

anāśakaṃ nṛpaśreṣṭha jale vā tadanantaram |
pañcasāhasrikaṃ mānaṃ varṣāṇāṃ jātavedasi || 201 ||
[Analyze grammar]

jale trīṇi sahasrāṇyanāśake ṣaṣṭiṃ bhuñjate |
kākā bakāḥ kapotāśca hyulūkāḥ paśavastathā || 202 ||
[Analyze grammar]

saṃgamodakasaṃspṛṣṭāste yānti paramāṃ gatim |
vṛkṣāśca tatpadaṃ jñātvā yāṃ gatiṃ yānti yoginaḥ || 203 ||
[Analyze grammar]

eraṇḍikā mayā devī dṛṣṭo me manmatheśvaraḥ |
kiṃ samartho yamo ruṣṭo bhadro bhadrāṇi paśyati || 204 ||
[Analyze grammar]

mṛttikāṃ saṅgamodbhūtāṃ ye ca guṇṭhanti nityaśaḥ |
bhrūṇahatyādipāpāni naśyante nātra saṃśayaḥ || 205 ||
[Analyze grammar]

eraṇḍīsaṅgame martyo luṇṭhyamāno narādhipa |
sarvapāpairvinirmuktaḥ padaṃ gacchatyanāmayam || 206 ||
[Analyze grammar]

eraṇḍyāḥ saṅgamaṃ martyāḥ kīrtayantyāśramasthitāḥ |
vimuktapāpā jāyante satyaṃ śaṅkarabhāṣitam || 207 ||
[Analyze grammar]

eraṇḍīpādapāgraistu dṛṣṭaiḥ pāpaṃ vyapohati || 208 ||
[Analyze grammar]

tīrthākhyānamidaṃ puṇyaṃ ye paṭhiṣyanti mānavāḥ |
śṛṇvanti cāpare bhaktyā muktapāpā bhavanti te || 209 ||
[Analyze grammar]

etatte sarvamākhyātameraṇḍīsaṅgamaṃ nṛpa |
bhūyaścānyatpravakṣyāmi sarvapāpakṣayaṃkaram || 210 ||
[Analyze grammar]