Chapter 20

|| viṃśo'dhyāyaḥ ||

aṅkurārpaṇakāryasya dinaṃ niścitya deśikaḥ|
tataḥ pūrvadine tāvat pratiṣṭhāmaṣṭapaṃ tathā|| 20.1 ||
garbhagehādisarvāṇi pacanāgārameva ca|
āsthānamaṇṭapādīni gopurāṇi tathaiva ca|| 20.2 ||
dvārāṇi ca kavāṭāni salilaiḥ śodhayetpurā|
dhāmno bhittiṣu sarvatra śvetaraktādivarṇakaiḥ|| 20.3 ||
citrayoccitrakārastu sarvatra kamalodbhave|
darbhāṇāṃ caiva mālābhirnālikeraphalasya ca|| 20.4 ||
[panasasya ca pūgasya kadalīnāṃ phalasya ca|]
bandhayet sarvato gucchān vitānāni ca (1)sarvataḥ|| 20.5 ||
maṇḍapādiṣu sarvatra pratidvāraṃ phalairyutān|
dvau dvau stambhān kadalyāstu pārśvayorapi bandhayet|| 20.6 ||
dhvajairvandanamālābhiḥ sarvato dhāma śobhayet|
tathā prapāṃ pratiṣṭhāyāḥ aṅkurārpaṇakarmaṇaḥ|| 20.7 ||
vitānādyairalaṃkṛtya tayoḥ prācyādiṣu kramāt|
aindra'svatthaṃ dakṣiṇasyāmaudumbaramudīritam|| 20.8 ||
nyagrodhaṃ paścimasyāmuttare plakṣatoraṇam|
dvitālaṃ bhūtalaṃ khātvā sthāpayettoraṇān dṛḍham|| 20.9 ||
dhvajau dvau dvau pratidvāraṃ sthāpayedupari kramāt|
tiraskariṇyā sarvatra maṇḍapaṃ parigūhayet|| 20.10 ||
karpūrāgarukastūricanda(2)nairdevadārubhiḥ|
niryāsānāṃ viśeṣaiśca dhūpaiḥ saṃmūrcchayet prapām|| 20.11 ||
tato bhūmiṃ yathāvacca gomayairlepayed dvijaiḥ|
śodhayecca śalākābhiralaṃkuryāt sudhādibhiḥ|| 20.12 ||
bahiḥ prapāyāścatṛṣu dvāreṣu kanakaprabhe|
satyādilikhitān ketūnupariṣṭāttu bandhayet|| 20.13 ||
athācāryaḥ śilpiśālāṃ śilpaśāstrārthatattvavit|
mūlādisarvabimbāni paśyecchāstroktavartmanā|| 20.14 ||
śilāmayasya vārkṣasya lohenotpāditasya ca|
nayanonmīlanaṃ kāryaṃ śilpinā kārumandire|| 20.15 ||
sudhāmayasya bimbasya vastrairutpāditasya ca|
bhittyādiṣu vilekhyasya mṛṇmayasya tathaiva ca|| 20.16 ||
netradānaṃ garbhagehe śilpinā kārayet sudhīḥ|
śilāmayādibimbānāṃ kṛtvā mantrābhiṣecanam|| 20.17 ||
rathādiṣu samāropya sarvavāditraniḥsvanaiḥ|
vedaghoṣairvīthikāsu prādakṣiṇyena vai hareḥ|| 20.18 ||
karbhagehaṃ samānāyya pīṭhe brahmaśilāmaye|
garteṣu navasu svarṇaratnādīni purā nyaset|| 20.19 ||
pratigartaṃ pañcasaṃkhyāṃ tattadbhedaṃ vadāmi te|
vajraṃ suvarṇasahitamuśīraṃ vrīhayastathā|| 20.20 ||
aindryāṃ dakṣiṇato garte tvindranīlamayastathā|
tilaṃ sīsaṃ candanaṃ ca paścime mauktikaṃ tathā|| 20.21 ||
rajataṃ pāradaṃ caiva mudgośīraṃ tathottare|
padmarāgaṃ kāṃsyarājaśilāṃ rājendrameva ca|| 20.22 ||
prādakṣiṇyena nikṣipya tataiśādyapradakṣiṇāt|
lohaṃ vaiḍūryasahitaṃ cakrāṅkaṃ cābhrakaṃ tathā|| 20.23 ||
ṣāṣṭikāsatvīśadigbhāge vāyossthāne vinikṣipet|
puṣyarāgaṃ harītaṃ ca gairikaṃ śārikaṃ trapu|| 20.24 ||
samūrān nairṛte sthāne mahānīlaṃ ca vaṅgakam|
pāṣāṇamākṣikaṃ caiva yavāḥ sāgarikāstathā|| 20.25 ||
āgneye sphaṭikaṃ tāmraṃ manoguptaṃ tathaiva ca|
godhūmāḥ śaṅkhapuṣpāśca mantraṃ sāṅgamudīrayane|| 20.26 ||
madhye sarvāṇi tadanu sudhayā lepayet purā|
dvārād bhittyantabhūmiṃ tu saptadhā vibhajed guruḥ|| 20.27 ||
brahmasthānaṃ madhyamaṃ syāddevasthānamanantaram|
mānuṣaṃ ca tataḥ paścāt paiśācaṃ samudīritam|| 20.28 ||
ekabere brahmaśilāṃ brahmasthāne tu (3)nikṣipet|
bahuberavidhāne tu (4)devamānuṣayoḥ pade|| 20.29 ||
śrībhūmyorvainateyasya pārśvayormaṇḍape (5)purā|
dvāramadhyaṃ na saṃtyājyaṃ na (6)pārśve na ca pṛṣṭhataḥ|| 20.30 ||
yato hitārthaṃ sarveṣāṃ nirguṇaṃ ṣaḍ‌guṇātmanā|
ato brahmasadādīṣaddevabhāge sthitirbhavet|| 20.31 ||
mokṣādi phalasiddhīnāṃ prāptaye hyavicārataḥ|
bhagavantaṃ bimbarūpaṃ sthāpayedāsane purā|| 20.32 ||
bimbapīṭhaśilānāṃ ca kuryādekatvavatsthitim|
śilpī kuryāttataḥ pūrvaṃ vimānasyopari sthite|| 20.33 ||
śaṅkau stūpīṃ protayitvā kuryādakatvavatsthitim|
vimānasthitadevānāṃ nayanonmīlanaṃ tathā|| 20.34 ||
evaṃ mūlādibimbānāṃ vimānādeśca deśikaḥ|
nayanonmīlanādīni kārayitvā tu śilpibhiḥ|| 20.35 ||
karmādīnāṃ ca berāṇāṃ pīṭhasaṃyojanaṃ caret|
vastraṃ prasārya tadanu tasmin padmāni nikṣipet|| 20.36 ||
tasyopari punarvastraṃ śālibhāraṃ tadūrdhvataḥ|
tadardhaṃ taṇḍūlaṃ nyasya tasminnupari vai tilam|| 20.37 ||
tasmin padmaṃ vilikhyātha āstīrya kuśasaṃhatim|
prasārya nūtanaṃ vastraṃ tasmin pīṭhaṃ sapadmakam|| 20.38 ||
apadmaṃ vā vinikṣipya viṣṇorgāyatriyā tataḥ|
ratnanyāsādikaṃ kṛtvā tena mantreṇa vai guruḥ|| 20.39 ||
ājyenāṣṭottaraśataṃ nṛsūktena ca ṣoḍaśa|
annena ca tato devi prokṣayet puṇyavāriṇā|| 20.40 ||
manasā supratiṣṭheti pīṭhe devaṃ niyojayet|
pratiṣṭhāsīti vai sāma paṭheyuśca samantataḥ|| 20.41 ||
dṛḍhabandhaṃ śilpivaraḥ kuryāt taṃ toṣayet prabhuḥ|
dhanairbhūṣaṇavastrādyairvisṛjecca tato guruḥ|| 20.42 ||

|| iti śrīśrīpraśnasaṃhitāyāṃ (7)viṃśo'dhyāyaḥ ||