Chapter 21

|| ekaviṃśo'dhyāyaḥ ||

pratiṣṭhārambhadivasāt tṛtīye divase'pi vā|
pūrvasmin divase vāpi pratiṣṭhāṅkuramārabhet|| 21.1 ||
tasmin dine deśikendraścaturo ṛtvijastathā|
prāsādasya pratiṣṭhārthaṃ vṛṇuyādātmasaṃmatam|| 21.2 ||
ācāryaṃ so'pi caturo ṛtvijaḥ prārthayedrame|
yūyaṃ śrīpāñcarātrasya tattvajñā brahmavādinaḥ|| 21.3 ||
ato hareḥ pratiṣṭhārthaṃ prāsādasya mayā saha|
kurudhvaṃ karma vidhivannāpacāro bhaved yathā|| 21.4 ||
iti saṃprārthya taiḥ sākaṃ snāyādvapanapūrvakam|
śuklāmbaradharāḥ sarve kṛtapañcāṅgabhūṣaṇāḥ|| 21.5 ||
kṛtordhvapuṇḍrāḥ śuddhāśca śuddhayajñopavītinaḥ|
bhaṭṭācāryo devadevaṃ svagṛhe pūjayetpurā|| 21.6 ||
svarṇatāmbūlavastrāṇi brāhmaṇebhyo'dadatpurā|
tebhyo'nujñāmanuprāpya yajamānena saṃmitaḥ|| 21.7 ||
ṛtvigbhirbrāhmaṇaiścaiva sarvavāditraniḥ svanaiḥ|
paricāravaraiścāpi chatracāmarapāṇibhiḥ|| 21.8 ||
tāmbūlapūgapūṣpāṇi phalāni svarṇapātrake|
grāhayitvā vedaghoṣaiḥ kārtāntikavaraiḥ saha|| 21.9 ||
itthaṃ sarvopakaraṇaiḥ paśyan śakunamuttamam|
sumuhūrte deśikendraḥ pūrṇakumbhaṃ kare vahan|| 21.10 ||
gṛhādgacchedudīcīṃ vā prācīṃ vā manasā harim|
dhyāyan vai śākunaṃ sūktamanyairdeśikasattamaiḥ|| 21.11 ||
bhadraṃ karṇaṃ paṭhan devi raherdhāma pradakṣiṇam|
kṛtvā maṇḍapamācāryaḥ praviśeddīkṣitaiḥ saha|| 21.12 ||
ṛtviktato darbhapuñjairdīrghībhūtaiḥ sapāvakaiḥ|
ākarṣayeddevadhāmni sarvasmin maṇḍape tathā|| 21.13 ||
prākāreṣu ca sarvatra śucīva iti mantrataḥ|
paryagnikaraṇaṃ kuryāt tena śuddhirdhruvā bhavet|| 21.14 ||
prakṣālya ca tataḥ pādāvācamya ca yathāvidhi|
nityakarmaṇi darbhābhyāṃ pavitraṃ dhārayetkṛtam|| 21.15 ||
tribhistu pitṛkāryeṣu caturbhiścābhicārake|
pañcabhiḥ (1)pauṣṭike ṣaḍbhiḥ śāntikāryeṣu bhojane|| 21.16 ||
(1.gra. daivike)
pavitraṃ valayaṃ dvābhyāṃ saptabhiḥ sarvakarmasu|
dvyaṅgulaṃ valayaṃ proktaṃ granthirekāṅgulī bhavet|| 21.17 ||
caturaṅgulamāyāmaḥ pañcamuṣṭimitāḥ kuśāḥ|
[pavitraṃ valayaṃ proktaṃ hemaratnavinirmitam]|| 21.18 ||
karaśuddhiṃ tataḥ kṛtvā pavitraṃ dhārayet kare|
prāṇāyāmatrayaṃ kṛtvā viṣṭarāsanamāsthitaḥ|| 21.19 ||
caraṇaṃ pavitramuccārya mahīṃ prakṣālayet purā|
viṣṇorarāṭamantreṇa darbhaiḥ saṃmārjayedanu|| 21.20 ||
gandhadvāreti mantreṇa gomayenānulepayet|
āpa undantu mantreṇa sudhācūrṇairalaṃkriyāt|| 21.21 ||
devasya tveti mantreṇa vikiredakṣatān kṣitau|
grīṣmo hemantamantreṇa dhānyapīṭhaṃ prakalpayet|| 21.22 ||
śaṃ no devīti mantreṇa śatapatraṃ likhet sudhīḥ|
dhanvanāgeti mantreṇa darbhairūrdhvaṃ paristaret|| 21.23 ||
tasmin lakṣaṇasaṃyuktaṃ kanakādivinirmitam|
ratnaṃ svarṇaṃ nālikera(2)kūrcamaśvatthapallavam|| 21.24 ||
(2.gra. māmrāśvatthadalaṃ tathā|)
(3)vinikṣipya ca toyena gandhenā(4)pūrayet ghaṭam|
candanākṣatamālābhirbhūṣaṇaiścāpyalaṃkriyāt|| 21.25 ||
(3.gra. kūrcaṃ nikṣipya)
(4.gra. pūritaṃ)
tasya kumbhasya paritaḥ ekāyanavido nyaset|
sūryamaṇḍalamadhyasthaharerdakṣiṇahastataḥ|| 21.26 ||
sahasrāraṃ samāvāhya kumbhe nārāyaṇaṃ smaran|
saṃpūjya gandhapuṣpādyaiḥ phalādīni nivedayet|| 21.27 ||
darbhaiḥ spṛṣṭaghaṭaiḥ sārdhaṃ puṇyāhaṃ vācayed guruḥ|
oṃkārādyaṃ pavitrāntaṃ mantrāṇāṃ prāk‌catuṣṭayam|| 21.28 ||
tata ātmānuvādaṃ ca hyātmavyūhamataḥ param|
śuddhaye'stu paro devo vāsudevo'stu śuddhaye|| 21.29 ||
saṃkarṣaṇaḥ śuddhaye'stu pradyumnaścāstu śuddhaye|
aniruddhaḥ keśavaśca śrīmānnārāyaṇastathā|| 21.30 ||
mādhavaḥ śuddhaye cāstu govindaḥ śuddhaye tathā|
śuddhaye viṣṇurastvādyaḥ śuddhaye madhusūdanaḥ|| 21.31 ||
trivikramo vāmanaśca śrīdharaścāstu śuddhaye|
hṛṣīkeśaḥ padmanābhaḥ śuddhaye'stu jagatpatiḥ|| 21.32 ||
dāmodaraḥ śuddhaye'stu padmanābho'stu śuddhaye|
dhruvo'nantastu śaktyātmā śuddhaye madhusūdanaḥ|| 21.33 ||
vidyādhidevaḥ kapilo viśvarūpo'stu śuddhaye|
vihaṅgamastu kroḍātmā śuddhaye baḍabānanaḥ|| 21.34 ||
dharmo vāgīśvaro deva ekārṇavaśayastathā|
śuddhaye'stu sadā devaḥ kūrmaḥ pātāladhārakaḥ|| 21.35 ||
varāhaḥ śuddhaye cāstu nārasiṃho'stu śuddhaye|
amṛtāharaṇaścāpi śrīpatiścāstu śuddhaye|| 21.36 ||
kāntātmā rāhujiccāstu kālanemistu śuddhaye|
pārijātaharaścāstu lokanāthastu śuddhaye|| 21.37 ||
dattātreyastu bhagavān nyagrodhaśayanastathā|
ekaśṛṃgatanuścāstu vāmanaścāstu śuddhaye|| 21.38 ||
trivikramo naraścaiva nārāyaṇaharistathā|
jvalatparaśubhṛ(5)drāmaḥ kṛṣṇaścāstu viśuddhaye|| 21.39 ||
(5.gra. drāmaṃ)
rāmo dhanurdharaścāstu vedaviccāstu śuddhaye|
śuddhaye'stu sadā kalkī sarvadoṣakṣayaṃkaraḥ|| 21.40 ||
śuddhaye'stu sadā devaḥ pātālaśayanaḥ prabhuḥ|
śuddhaye santu sarveṣāṃ sarve sarvatra sarvadā|| 21.41 ||
ṛddhaye puṣṭaye santu śāntaye siddhaye sadā|
śivāya muktivṛddhibhyāmavighnāya ca karmaṇām|| 21.42 ||
mantrāṇāṃ deśikendrāṇāṃ dāsīdāsagavāmapi|
vedaśāstrāgamādīnāṃ (6)vratānāmiṣṭasaṃpadām|| 21.43 ||
(6.gra. dhanadhānyādi)
(7)āyuṣyārogyamedhānāṃ dhanadhānyādisaṃpadām|
rājño janapadasyāpi yajamānasya mantriṇām|
pañcakālaviśuddhānāṃ vaiṣṇavānāṃ tapasvinām|| 21.44 ||
(7.gra. eṣaḥ ardhaśloko nāsti|)
svastyastu ca śivaṃ cāstu śivaṃ cāstu punaḥ punaḥ|
avighnamaniśaṃ cāstu dīrghamāyuṣyamastu naḥ|| 21.45 ||
samāhitamanaścāstu puṇyāhaṃ sarvaśuddhikṛt|
śaṅkhacakragadāpadmayuktaḥ sarveśvareśvaraḥ|| 21.46 ||
prīyatāṃ vāsudevo'yaṃ śrīpatiḥ sarvasiddhidaḥ|
prīyatāṃ prīyatāmadya pūrvoktāḥ sarvadevatāḥ|| 21.47 ||
itthamekāyanaproktapuṇyāhaṃ dīkṣitottamaiḥ|
vācayitvā tadadbhiḥ svamātmānaṃ prokṣayet purā|| 21.48 ||
tataḥ śiṣyān sādhakāṃśca ṛtvijaḥ paricārakān|
padārthāni ca sarvāṇi yāgamaṇḍapameva ca|| 21.49 ||
sadanaṃ devadevasya prokṣayet prathamaṃ guruḥ|
kapilājarayorgrāhyaṃ pañcagavyaṃ praśasyate|| 21.50 ||
pañcagavyaṃ tu gṛhṇīyāt mṛtpātre nūtane śubhe|
ārtā jarāgarbhiṇībhyām avatsebhyo daśāhataḥ|| 21.51 ||
pūrvaṃ tu na tu gṛhnīyāt gṛhītaṃ na tu śuddhikṛt|
gomūtraṃ gomayaṃ kṣīraṃ dadhisarpiśca pañcakam|| 21.52 ||
visṛjyamāne saṃgrāhyaṃ mūtraṃ bhūmiṣṭhameva ca|
soṣṇaṃ krimyādirahitaṃ gomayaṃ pīḍayettataḥ|| 21.53 ||
rasaṃ sadyastanaghṛtamahorātroṣitaṃ dadhi|
kṣīraṃ grāhyamataptaṃ ca śuddhānyetāni sarvadā|| 21.54 ||
gomūtraṃ viṣṇugāyatryā gandhadvāreti gomayam|
āpyāyasveti ca kṣīraṃ dadhikrāvṇeti vai dadhi|| 21.55 ||
ghṛtaṃ śukramasītyevaṃ dravyāṇi saha yojayet|
viṣṇugāyatriyā yadvā pañcopaniṣadāpi vā|| 21.56 ||
ekamānaṃ ghṛtaṃ yugmaṃ dadhi syāt triguṇaṃ payaḥ|
ṣaḍguṇaṃ mūtrametasmāt śakṛddhāricaturguṇam|| 21.57 ||
snapane kathitaṃ mānaṃ prokṣaṇe pañcakaṃ samam|
gomayena samaṃ mūtraṃ dadhi syād dviguṇaṃ tataḥ|| 21.58 ||
ghṛtaṃ caturguṇaṃ proktaṃ tataścāṣṭaguṇaṃ payaḥ|
prāśane pañcagavyānāṃ pramāṇamidamīritam|| 21.59 ||
etena pañcagavyena dhāmnaḥ sarvasthalānyapi|
yāgaśālāmaṇḍapādi prokṣayet sarvato guruḥ|| 21.60 ||
dhūpayet sarvato dhūpānakṣatān kusumaiḥ saha|
siddhārthāṃścāpi vikiret secayet gandhavāribhiḥ|| 21.61 ||
raṅgavallyādibhirdhāma śobhayet sarvato diśi|
anirvāṇān bahūn dīpān goghṛtairdīpayedrame|| 21.62 ||
[akṛtvā yadi puṇyāhaṃ kuryāt karma nirarthakam|]

|| iti śrīśrīpraśna saṃhitāyāṃ pratiṣṭhākarmaṇi (8)ekaviṃśo'dhyāyaḥ ||
(8.`viṃśo'dhyāyaḥ' iti mātṛkāyām|)