Chapter 7

atha priyāsādanaśīlanādau manorathaḥ pallavitaḥ purā yaḥ |
vilokanenaiva sa rājaputryāḥ patyā bhuvaḥ purṇavadabhyamāni || 1 ||
[Analyze grammar]

pratipratīkaṃ prathamaṃ priyāyāmathāntarānandasudhāsamudre |
tataḥ pramodāśruparamparāyāṃ mamajjatustasya dṛśau nṛpasya || 2 ||
[Analyze grammar]

brahmādvayasyānvabhavatpramodaṃ romāgra evāgranirīkṣite'syāḥ |
yathaucitītthaṃ tadaśeṣadṛṣṭāvatha smarādvaitamudaṃ tathāsau || 3 ||
[Analyze grammar]

velāmatikramya pṛthuṃ mukhendorālokapīyūṣarasena tasyāḥ |
nalasya rāgāmbunidhau vivṛddhe tuṅgau kucāvāśrayataḥ sma dṛṣṭī || 4 ||
[Analyze grammar]

magnā sudhāyāṃ kimu tanmukhendorlagnā sthitā tatkucayoḥ kimantaḥ |
cireṇa tanmadhyamamuñcatāsya dṛṣṭiḥ ṛśīya skhalanādbhiyā nu || 5 ||
[Analyze grammar]

priyāṅgapānthā kucayornivṛttya nivṛttya lolā naladṛgbhramantī |
babhautamāṃ tanmṛganābhilepatamaḥsamāsāditadigbhrameva || 6 ||
[Analyze grammar]

vibhramya taccārunitambacakre dūtasya dṛktasya khalu skhalantī |
sthirā cirādāsta tadūrurambhāstambhāvupāśliṣya kareṇa gāḍham || 7 ||
[Analyze grammar]

vāsaḥ paraṃ netramahaṃ na netraṃ kimu tvamāliṅgaya tanmayāpi |
uronitamboru kuru prasādamitīva sā tatpadayoḥ papāta || 8 ||
[Analyze grammar]

dṛśoryathākāmamathopahṛtya sa preyasīmālikulaṃ ca tasyāḥ |
idaṃ pramodādbhutasaṃbhṛtena mahīmahendro manasā jagāda || 9 ||
[Analyze grammar]

pade vidhāturyadi manmatho vā mamābhiṣicyeta manoratho vā |
tadā ghaṭetāpi na vā tadetatpratipratīkādbhutarūpaśilpam || 10 ||
[Analyze grammar]

taraṅgiṇī bhūmibhṛtaḥ prabhūtā jānāmi śṛṅgārarasasya seyam |
lāvaṇyapūro'jani yauvanena yasyāṃ tathoccaistanatā ghanena || 11 ||
[Analyze grammar]

asyāṃ vapurvyūhavidhānavidyāṃ kiṃ dyotayāmāsa navāṃ sa kāmaḥ |
pratyaṅgasaṅgasphuṭalabdhabhūmā lāvaṇyasīmā yadimāmupāste || 12 ||
[Analyze grammar]

jambālajālātkimakarṣi jambūnadyā na hāridranibhaprabheyam |
apyaṅgayugmasya na saṅgacihnamunnīyate danturatā yadatra || 13 ||
[Analyze grammar]

satyeva sāmye sadṛśādaśeṣādguṇāntareṇoccakṛṣe yadaṅgaiḥ |
asyāstataḥ syāttulanāpi nāma vastu tvamīṣāmupamāpamānaḥ || 14 ||
[Analyze grammar]

purākṛtiḥ straiṇamimāṃ vidhātumabhūdvidhātuḥ khalu hastalekhaḥ |
yeyaṃ bhavadbhāvipuraṃdhrisṛṣṭiḥ sāsyai yaśastajjayajaṃ pradātum || 15 ||
[Analyze grammar]

bhavyāni hānīraguretadaṅgādyathā yathānarti tathā tathā taiḥ |
asyādhikasyopamayopamātā dātā pratiṣṭhāṃ khalu tebhya eva || 16 ||
[Analyze grammar]

nāsparśi dṛṣṭāpi vimohikeyaṃ doṣairaśeṣaiḥ svabhiyeti manye |
anyeṣu tairākulitastadasyāṃ vasatyasāpatnyasukhī guṇaughaḥ || 17 ||
[Analyze grammar]

aujjhi priyāṅgairghṛṇayaiva rūkṣā na vāridurgāttu varāṭakasya |
na kaṇṭakairāvaraṇācca kāntirdhūlībhṛtā kāñcanaketakasya || 18 ||
[Analyze grammar]

pratyaṅgamasyāmabhikena rakṣāṃ kartuṃ maghoneva nijāstramasti |
vajraṃ ca bhūṣāmaṇimūrtidhāri niyojitaṃ taddyutikārmukaṃ ca || 19 ||
[Analyze grammar]

asyāḥ sapakṣaikavidhoḥ kacaughaḥ sthāne mukhasyopari vāsamāpa |
pakṣasthatāvadbahucandrako'pi kalāpināṃ yena jitaḥ kalāpaḥ || 20 ||
[Analyze grammar]

asyā yadāsyena purastiraśca tiraskṛtaṃ śītarucāndhakāram |
sphuṭasphuradbhaṅgikacacchalena tadeva paścādidamasti baddham || 21 ||
[Analyze grammar]

asyāḥ kacānāṃ śikhinaśca kiṃnu vidhiṃ kalāpau vimateragātām |
tenāyamebhiḥ kimapūji puṣpairabhartsi dattvā sa kimardhacandram || 22 ||
[Analyze grammar]

keśāndhakārādatha dṛśyabhālasthalārdhacandrā sphuṭamaṣṭamīyam |
enāṃ yadāsādya jagajjayāya manobhuvā siddhirasādhi sādhu || 23 ||
[Analyze grammar]

pauṣpaṃ dhanuḥ kiṃ madanasya dāhe śyāmībhavatkesaraśeṣamāsīt |
vyadhāddvidheśastadapi krudhā kiṃ bhaimībhruvau yena vidhirvyadhatta || 24 ||
[Analyze grammar]

bhrūbhyāṃ priyāyā bhavatā manobhūcāpena cāpe ghanasārabhāvaḥ |
nijāṃ yadaploṣadaśāmapekṣya saṃpratyanenādhikavīryatārji || 25 ||
[Analyze grammar]

smāraṃ dhanuryadvidhunojjhitāsyā yāsyena bhūtena ca lakṣmalekhā |
etadbhruvau janma tadāpa yugmaṃ līlācalatvocitabālabhāvam || 26 ||
[Analyze grammar]

eṣutrayeṇaiva jagattrayasya vinirjayātpuṣpamayāśugena |
śeṣā dvibāṇī saphalīkṛteyaṃ priyādṛgambhojapade'bhiṣicya || 27 ||
[Analyze grammar]

seyaṃ mṛduḥ kausumacāpayaṣṭiḥ smarasya muṣṭigrahaṇārhamadhyā |
tanoti naḥ śrīmadapāṅgamuktāṃ mohāya yā dṛṣṭiśaraughavṛṣṭim || 28 ||
[Analyze grammar]

āghūrṇitaṃ pakṣmalamakṣipadmaṃ prāntadyutiśvaityajitāmṛtāṃśu |
asyā ivāsyāścaladindranīlagolāmalaśyāmalatāratāram || 29 ||
[Analyze grammar]

karṇotpalenāpi mukhaṃ sanāthaṃ labheta netradyutinirjitena |
yadyetadīyena tataḥ kṛtārthā svacakṣuṣī kiṃ kurute kuraṅgī || 30 ||
[Analyze grammar]

tvacaḥ samuttārya dalāni rītyā mocātvacaḥ pañcaṣapāṭanāyām |
saurairgṛhītairvidhirutpalaughādasyāmabhūdīkṣaṇarūpaśilpī || 31 ||
[Analyze grammar]

cakoranetraiṇadṛgutpalānāṃ nimeṣayantreṇa kimeṣa kṛṣṭaḥ |
sāraḥ sudhodgāramayaḥ prayatnairvidhātumetannayane vidhātuḥ || 32 ||
[Analyze grammar]

ṛṇīkṛtā kiṃ harinībhirāsīdasyāḥ sakāśānnayanadvayaśrīḥ |
bhūyoguṇeyaṃ sakalā balādyattābhyo'nayā'labhyata bibhyatībhyaḥ || 33 ||
[Analyze grammar]

dṛśau kimasyāścapalasvabhāve na dūramākramya mitho miletām |
na cetkṛtaḥ syādanayoḥ prayāṇe vighnaḥ śravaḥkūpanipātabhītyā || 34 ||
[Analyze grammar]

kedārabhājā śiśirapraveśātpuṇyāya manye mṛtamutpalinyā |
jātā yatastatkusumekṣaṇeyaṃ yātaśca tatkorakadṛkcakoraḥ || 35 ||
[Analyze grammar]

nāsādasīyā tilapuṣpatūṇaṃ jagattrayavyastaśaratrayasya |
śvāsānilāmodabharānumeyāṃ dadhaddvibāṇīṃ kusumāyudhasya || 36 ||
[Analyze grammar]

bandhūkabandhūbhavadetadasyā mukhendunānena sahojjihānā |
rāgaśriyā śaiśavayauvanīyāṃ svamāha saṃdhyāmadharoṣṭhalekhā || 37 ||
[Analyze grammar]

asyā mukhendāvadharaḥ sudhābhūbimbasya yuktaḥ pratibimba eṣaḥ |
tasyāthavā śrīrdrumabhāji deśe saṃbhāvyamānasya tu vidrume sā || 38 ||
[Analyze grammar]

jāne'tirāgādidameva bimbaṃ bimbasya ca vyaktamito'dharatvam |
dvayorviśeṣāvagamākṣamāṇāṃ nāmni bhramo'bhūdanayorjanānām || 39 ||
[Analyze grammar]

madhyopakaṇṭhāvadharoṣṭhabhāgau bhātaḥ kimapyucchvasitau yadasyāḥ |
tatsvapnasaṃbhogavitīrṇadantadaṃśena kiṃ vā na mayāparāddham || 40 ||
[Analyze grammar]

vidyā vidarbhendrasutādharoṣṭhe nṛtyanti katyantarabhedabhājaḥ |
itīva rekhābhirapaśramastāḥ saṃkhyātavānkautukavānvidhātā || 41 ||
[Analyze grammar]

saṃbhujyamānādya mayā niśānte svapne'nubhūtā madhurādhareyam |
asīmalāvaṇyaradacchadetthaṃ kathaṃ mayaiva pratipadyate vā || 42 ||
[Analyze grammar]

yadi prasādīkurute sudhāṃśereṣā sahasrāṃśamapi smitasya |
tatkaumudīnāṃ kurute tameva nimicchaya devaḥ saphalaṃ sa janma || 43 ||
[Analyze grammar]

candrādhikaitanmukhacandrikāṇāṃ darāyataṃ tatkiraṇāddhanānām |
puraḥsarasrastapṛṣaddvitīyaṃ radāvalidvandvati binduvṛndam || 44 ||
[Analyze grammar]

seyaṃ mamaitadvirahārtimūrcchātamīvibhātasya vibhāti saṃdhyā |
mahendrakāṣṭhāgatarāgakartrī dvijairamībhiḥ samupāsyamānā || 45 ||
[Analyze grammar]

rājau dvijānāmiha rājadantāḥ saṃbibhrati śrotriyavibhramaṃ yat |
udvegarāgādimṛjāvadātāścatvāra ete tadavaimi muktāḥ || 46 ||
[Analyze grammar]

śirīṣakoṣādapi komalāyā vedhā vidhāyāṅgamaśeṣamasyāḥ |
prāptaprakarṣaḥ sukumārasarge samāpayadvāci mṛdutvamudrām || 47 ||
[Analyze grammar]

prasūnabāṇādvayavādinī sā kāciddvijenopaniṣatpikena |
asyāḥ kimāsyadvijarājato vā nādhīyate bhaikṣabhujā tarubhyaḥ || 48 ||
[Analyze grammar]

padmāṅkasadmānamavekṣya lakṣmīmekasya viṣṇoḥ śrayaṇātsapatnīm |
āsyendumasyā bhajate jitābjaṃ sarasvatī tadvijigīṣayā kim || 49 ||
[Analyze grammar]

kaṇṭhe vasantī caturā yadasyāḥ sarasvatī vādayate vipañcīm |
tadeva vāgbhūya mukhe mṛgākṣyāḥ śrotuḥ śrutau yāti sudhārasavam || 50 ||
[Analyze grammar]

vilokitāsyā mukhamunnamayya kiṃ vedhaseyaṃ suṣamāsamāptau |
dhṛtyudbhavā yaccibuke cakāsti nimne manāgaṅguliyantraṇeva || 51 ||
[Analyze grammar]

priyāmukhībhūya sukhī sudhāṃśurjayatyayaṃ rāhubhayavyayena |
imāṃ dadhārādharabimbalīlāṃ tasyaiva vālaṃ karacakravālam || 52 ||
[Analyze grammar]

asyā mukhasyāstu na purṇamāsyaṃ pūrṇasya jitvā mahimā himāṃśum |
bhūlakṣma khaṇḍaṃ dadhadardhamindurbhālastṛtīyaḥ khalu yasya bhāgaḥ || 53 ||
[Analyze grammar]

vyadhatta dhātā vadanābjamasyāḥ samrājamambhojakule'khile'pi |
sarojarājau sṛjato'dasīyāṃ netrābhidheyāvata eva sevām || 54 ||
[Analyze grammar]

divārajanyo ravisomabhīte candrāmbuje nikṣipataḥ svalakṣmīm |
āsye yadāsyā na tadā tayoḥ śṛīrekaśriyedaṃ tu kadā na kāntam || 55 ||
[Analyze grammar]

asyā mukhaśrīprativimbameva jalācca tātānmukurācca mittrāt |
abhyarthya dhattaḥ khalu padmacandrau vibhūṣaṇaṃ yācitakaṃ kadācit || 56 ||
[Analyze grammar]

arkāya patye khalu tiṣṭhamānā bhṛṅgairmitāmakṣibhirambukelau |
bhaimīmukhasya śriyamambujinyo yācanti vistāritapadmahastāḥ || 57 ||
[Analyze grammar]

asyā mukhenaiva vijitya nityaspardhī milatkuṅkumaroṣābhāsā |
prasahya candraḥ khalu nahyamānaḥ syādeva tiṣṭhatpariveṣapāśaḥ || 58 ||
[Analyze grammar]

vidhorvidhirbimbaśatāni lopaṃlopaṃ kuhūrātriṣu māsimāsi |
abhaṅguraśrīkamamuṃ kimasyā mukhendumasthāpayadekaśeṣam || 59 ||
[Analyze grammar]

kapolapattrānmakarātsaketubhūbhyāṃ jigīṣurdhanuṣā jaganti |
ihāvalambyāsti ratiṃ manobhū rajyadvayasyo madhunādhareṇa || 60 ||
[Analyze grammar]

viyogabāṣpāñcitanetrapadmacchadmārpitotsargapayaḥprasūnau |
karṇau kimasyā ratitatpatibhyāṃ nivedyapūpau vidhiśilpamīdṛk || 61 ||
[Analyze grammar]

ihāviśedyena pathātivakraḥ śāstraughaniṣyandasudhāpravāhaḥ |
so'syāḥ śravaḥpattrayuge praṇālīrekhaiva dhāvatyabhikarṇakūpam || 62 ||
[Analyze grammar]

asyā yadaṣṭādaśa saṃvibhajya vidyāḥ śrutī dadhraturardhamardham |
karṇāntarutkīrṇagabhīrarekhaḥ kiṃ tasya saṃkhyaiva navānavāṅkaḥ || 63 ||
[Analyze grammar]

manye'munā karṇalatāmayena pāśadvayena cchiduretareṇa |
ekākipāśaṃ varuṇaṃ vijigye'naṅgīkṛtāyāsatatī ratīśaḥ || 64 ||
[Analyze grammar]

ātmaiva tātasya caturbhujasya jātaścaturdorucitaḥ smaro'pi |
taccāpayoḥ karṇalate bhruvorjye vaṃśatvagaṃśau cipiṭe kimasyāḥ || 65 ||
[Analyze grammar]

grīvādbhutaivāvaṭuśobhitāpi prasādhitā māṇavakena seyam |
āliṅgyatāmapyavalambamānā surūpatābhāgakhilordhvakāyā || 66 ||
[Analyze grammar]

kavitvagānapriyavādasatyānyasyā vidhātā vyadhitādhikaṇṭham |
rekhātrayanyāsamiṣādamīṣāṃ vāsāya so'yaṃ vibabhāja sīmāḥ || 67 ||
[Analyze grammar]

bāhū priyāyā jayatāṃ mṛṇālaṃ dvandve jayo nāma na vismayo'smin |
uccaistu taccitramamuṣya bhagnasyālokyate nirvyathanaṃ yadantaḥ || 68 ||
[Analyze grammar]

ajīyatāvartaśubhaṃyunābhyāṃ dorbhyāṃ mṛṇālaṃ kimu komalābhyām |
niḥsūtramāṣṭe ghanapaṅkamṛtsu mūrtāsu nākīrtiṣu tannimagnam || 69 ||
[Analyze grammar]

rajyannakhasyāṅgulipañcakasya miṣādasau haiṅgulapadmatūṇe |
haimaikapuṅkhyāsti viśuddhaparvā priyākare pañcaśarī smarasya || 70 ||
[Analyze grammar]

asyāḥ karaspardhanagardhanarddhirbālatvamāpatkhalu pallavo yaḥ |
bhūyo'pi nāmādharasāmyagarvaṃ kurvankathaṃ vāstu na sa pravālaḥ || 71 ||
[Analyze grammar]

asyaiva sargāya bhavatkarasya sarojasṛṣṭirmama hastalekhaḥ |
ityāha dhātā hariṇekṣaṇāyāṃ kiṃ hastalekhīkṛtayā tayāsyām || 72 ||
[Analyze grammar]

kiṃ narmadāyā mama seyamasyā dṛśyābhito bāhulatāmṛṇālī |
kucau kimuttasthaturantarīpe smaroṣmaśuṣyattarabālyavāraḥ || 73 ||
[Analyze grammar]

tālaṃ prabhu syāḍanukartumetāvutthānasusthau patitaṃ na tāvat |
paraṃ ca nāśritya taruṃ mahāntaṃ kucau kṛśāṅghyāḥ svata eva tuṅgau || 74 ||
[Analyze grammar]

etatkucaspardhitayā ghaṭasya khyātasya śāstreṣu nidarśanatvam |
tasmācca śilpānmaṇikādikārī prasiddhanāmājani kumbhakāraḥ || 75 ||
[Analyze grammar]

gucchālayasvacchatamodabinduvṛndābhamuktāphalaphenilāṅke |
māṇikyahārasya vidarbhasubhūpayodhare rohati rohitaśrīḥ || 76 ||
[Analyze grammar]

niḥśaṅkasaṃkocitapaṅkajo'yamasyāmudīto mukhamindubimbaḥ |
citraṃ tathāpi stanakokayugmaṃ na stokamapyañcati viprayogam || 77 ||
[Analyze grammar]

ābhyāṃ kucābhyāmibhakumbhayoḥ śrīrādīyate'sāvanayorna tābhyām |
bhayena gopāyitamauktikau tau pravyaktamuktābharaṇāvimau yat || 78 ||
[Analyze grammar]

karāgrajāgracchatakoṭirarthī yayorimau tau tulayetkucau cet |
sarvaṃ tadā śrīphalamunmadiṣṇu jātaṃ vaṭīmapyadhunā na labdhum || 79 ||
[Analyze grammar]

stanāvaṭe candanapaṅkile'syā jātasya yāvadyuvamānasānām |
hārāvalīratnamayūkhadhārākārāḥ sphuranti skhalanasya rekhāḥ || 80 ||
[Analyze grammar]

kṣīṇena madhye'pi satodareṇa yatprāpyate nākramaṇaṃ valibhyaḥ |
sarvāṅgaśuddhau tadanaṅgarājyavijṛmbhitaṃ bhīmabhuvīha citram || 81 ||
[Analyze grammar]

madhyaṃ tanūkṛtya yadīdamīyaṃ vedhā na dadhyātkamanīyamaṃśam |
kena stanau saṃprati yauvane'syāḥ sṛjedananyapratimāṅgayaṣṭeḥ || 82 ||
[Analyze grammar]

gaurīva patyā subhagā kadācitkarteyamapyardhatanūsamasyām |
itīva madhye vidadhe vidhātā romāvalīmecakasūtramasyāḥ || 83 ||
[Analyze grammar]

romāvalīrajjumurojakumbhau gambhīramāsādya ca nābhikūpam |
maddṛṣṭitṛṣṇā viramedyadi syānnaiṣāṃ bataiṣāsicayena guptiḥ || 84 ||
[Analyze grammar]

unmūlitālānabilābhanābhiśchinnaskhalacchṛṅkhalaromarājiḥ |
mattasya seyaṃ madanadvipasya prasvāpavaproccakucāstu vāstu || 85 ||
[Analyze grammar]

romāvalibhrūkusumaiḥ svamaurvīcāpeṣubhirmadhyalalāṭamūrdhni |
vyastairapi sthāsnubhiretadīyairjaitraḥ sa citraṃ ratijānivīraḥ || 86 ||
[Analyze grammar]

puṣpāṇi bāṇāḥ kucamaṇḍanāni bhruvau dhanurbhālamalaṃkariṣṇu |
romāvalī madhyavibhūṣaṇaṃ jyā tathāpi jetā ratijāniretaiḥ || 87 ||
[Analyze grammar]

asyāḥ khalu granthinibaddhakeśamallīkadambapratibimbaveṣāt |
smarapraśastī rajatākṣareyaṃ pṛṣṭhasthalīhāṭakapaṭtikāyām || 88 ||
[Analyze grammar]

cakreṇa viśVaṃ yudhi matsyaketuḥ piturjitaṃ vīkṣya sudarśanena |
jagajjigīṣatyamunā nitambamayena kiṃ durlabhadarśanena || 89 ||
[Analyze grammar]

romāvalīdaṇḍanitambacaker guṇaṃ ca lāvaṇyajalaṃ ca bālā |
tāruṇyamūrteḥ kucakumbhakarturbibharti śaṅke sahakāricakram || 90 ||
[Analyze grammar]

aṅgena kenāpi vijetumasyā gaveṣyate kiṃ calapattrapattram |
na cedviśeṣāditaracchadebhyastasyāstu kampastu kuto bhayena || 91 ||
[Analyze grammar]

bhrūścitralekhā ca tilottamāsyā nāsā ca rambhā ca yadūrusṛṣṭiḥ |
dṛṣṭā tataḥ pūrayatīyamekānekāpsaraḥprekṣaṇakautukāni || 92 ||
[Analyze grammar]

rambhāpi kiṃ cahnayati prakāṇḍaṃ na cātmanaḥ svena na caitadūrū |
svasyaiva yenopari sā dadānā pattrāṇi jāgartyanayorbhrameṇa || 93 ||
[Analyze grammar]

vidhāya mūrdhānamadhaścaraṃ cenmuñcettapobhiḥ svamasārabhāvam |
jāḍyaṃ ca nāñcetkadalī balīyastadā yadi syādidamūrucāruḥ || 94 ||
[Analyze grammar]

ūruprakāṇḍadvitayena tanvyāḥ karaḥ parājīyata vāraṇīyaḥ |
yuktaṃ hriyā kuṇḍalanacchalena gopāyati svaṃ mukhapuṣkaraṃ saḥ || 95 ||
[Analyze grammar]

asyāṃ munīnāmapi mohamūhe bhṛgurmahānyatkucaśailaśīlī |
nānāradāhlādi mukhaṃ śriyorurvyāso mahābhāratasargayogyaḥ || 96 ||
[Analyze grammar]

kramodgatā pīvaratādhijaṅghaṃ vṛkṣādhirūḍhaṃ viduṣī kimasyāḥ |
api bhramībhaṅgibhirāvṛtāṅgaṃ vāso latāveṣṭitakapravīṇam || 97 ||
[Analyze grammar]

arundhatīkāmapuraṃdhrilakṣmījambhadviṣaddāranavāmbikānām |
caturdaśīyaṃ tadihocitaiva gulphadvayāptā yadadṛśyasiddhiḥ || 98 ||
[Analyze grammar]

asyāḥ padau cārutayā mahāntāvapekṣya saukṣmyāllavabhāvabhājaḥ |
jātā pravālasya mahīruhāṇāṃ jānīmahe pallavaśabdalabdhiḥ || 99 ||
[Analyze grammar]

jagadvadhūmūrdhasu rūpadarpādyadenayādāyi padāravindam |
tatsāndrasindūraparāgarāgairdvayaṃ pravālaprabalāruṇaṃ tat || 10 ||
[Analyze grammar]

ruṣāruṇā sarvaguṇairjayantyā bhaimyāḥ padaṃ śrīḥ sma vidhervṛṇīte |
dhruvaṃ sa tāmacchalayadyataḥ sā bhṛśāruṇaitatpadabhāgvibhāti || 101 ||
[Analyze grammar]

yānena tanvyā jitadantināthau pādābjarājau pariśuddhapārṣṇī |
jāne na śuśrūṣayituṃ svamicchū natena mūrdhnā katarasya rājñaḥ || 102 ||
[Analyze grammar]

karṇākṣidantacchadabāhupāṇipādādinaḥ svākhilatulyajetuḥ |
udvegabhāgadvayatābhimānādihaiva vedhā vyadhita dvitīyaṃ || 103 ||
[Analyze grammar]

tuṣāraniḥśeṣitamabjasargaṃ vidhātukāmasya punarvidhātuḥ |
pañcasvihāsyāṅghrikareṣvabhikhyābhikṣādhunā madhukarīsadṛkṣā || 104 ||
[Analyze grammar]

eṣyanti yāvadgaṇanāddigantānnṛpāḥ smarātāḥ śaraṇe praveṣṭum |
ime padābje vidhināpi sṛṣṭāstāvatya evāṅgulayo'tra lekhāḥ || 105 ||
[Analyze grammar]

priyānakhībhūtavato mudedaṃ vyadhādvidhiḥ sādhudaśatvamindoḥ |
etatpadacchadmasarāgapadmasaubhāgyabhāgyaṃ kathamanyathā syāt || 106 ||
[Analyze grammar]

yaśaḥ padāṅguṣṭhanakhau mukhaṃ ca bibharti pūrṇenducatuṣṭayaṃ yā |
kalācatuḥṣaṣṭirupaitu vāsaṃ tasyāṃ kathaṃ subhruvi nāma nāsyām || 107 ||
[Analyze grammar]

sṛṣṭātiviśvā vidhinaiva tāvattasyāpi nītopari yauvanena |
vaidagdhyamadhyāpya manobhuveyamavāpitā vākpatrapārameva || 108 ||
[Analyze grammar]

iti sa cikurādārabhyaināṃ nakhāvadhi varṇayanhariṇaramaṇīnetrāṃ citrāmbudhau taradantaraḥ |
hṛdayabharaṇodvelānandaḥ sakhīvṛtabhīmajānayanaviṣayībhāve bhāvaṃ dadhāra dharādhipaḥ || 109 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
gauḍarvīśakulapraśastibhaṇitibhrātaryayaṃ tanmahākāvye cāruṇi vairasenicarite sargo'gamatsaptamaḥ || 110 ||
[Analyze grammar]