Chapter 2

adhigatya jagatyadhīśvarādatha muktiṃ puruṣottamāttataḥ |
vacasāmapi gocaro na yaḥ sa tamānandamavindata dvijaḥ || 1 ||
[Analyze grammar]

adhunīta khagaḥ sa naikadhā tanumutphullatanūruhīkṛtām |
karayantraṇadanturāntare vyalikhaccañcupuṭena pakṣatī || 2 ||
[Analyze grammar]

ayamekatamena pakṣateradhimadhyordhvagajaṅghamaṅghriṇā |
skhalanakṣaṇa eva śiśriye drutakaṇḍūyitamaulirālayam || 3 ||
[Analyze grammar]

sa garudvanadurgadurgrahānkaṭu kīṭāndaśataḥ sataḥ kvacit |
nunude tanukaṇḍu paṇḍitaḥ paṭucañcūpuṭakoṭikuṭṭanaiḥ || 4 ||
[Analyze grammar]

ayametya taḍākanīḍajairlaghu paryavriyatātha śāṅkitaiḥ |
udaḍīyata vaikṛtātkaragrahajādasya vikasvarasvaraiḥ || 5 ||
[Analyze grammar]

vahato bahuśaivalakṣmatā dhṛtarudrākṣamadhuvrataṃ khagaḥ |
sa nalasya yayau karaṃ punaḥ sarasaḥ kokanadabhramādiva || 6 ||
[Analyze grammar]

patagaścirakālalālanādativiśrambhamavāpito nu saḥ |
atulaṃ vidadhe kutūhalaṃ bhujametasya bhajanmahībhujaḥ || 7 ||
[Analyze grammar]

nṛpamānasamiṣṭamānasaḥ sa nimajjatkutukāmṛtormiṣu |
avalambitakarṇaśaṣkulīkalasīkaṃ racayannavocata || 8 ||
[Analyze grammar]

mṛgayā na vigīyate nṛpairapi dharmāgamamarmapāragaiḥ |
smarasundara māṃ yadatyajastava dharmaḥ sadayodayojjvalaḥ || 9 ||
[Analyze grammar]

abalasvakulāśino jhaṣānnijanīḍadrumapīḍinaḥ khagān |
anavadyatṛṇārdino mṛgānmṛgayāghāya na bhūbhujāṃ ghnatām || 10 ||
[Analyze grammar]

yadavādiṣamapriyaṃ tava priyamādhāya nunutsurasmi tat |
kṛtamātapasaṃjvaraṃ tarorabhivṛṣyāmṛtamaṃśumāniva || 11 ||
[Analyze grammar]

upanamramayācitaṃ hitaṃ pratihartuṃ na tavāpi sāṃpratam |
karakalpajanāntarādvidheḥ śucitaḥ prāpi sa hi pratigrahaḥ || 12 ||
[Analyze grammar]

patagena mayā jagatpaterupakṛtyai tava kiṃ prabhūyate |
iti vedmi na tu tyajanti māṃ tadapi pratyupakartumartayaḥ || 13 ||
[Analyze grammar]

acirādupakarturācaredathavātmaupayikīmupakriyām |
pṛthuritthamathāṇurastu sā na viśeṣe viduṣāmiha grahaḥ || 14 ||
[Analyze grammar]

bhavitā na vicāracāru cettadapi śravyamidaṃ madīritam |
khagavāgiyamityato'pi kiṃ na mudaṃ dhāsyati kīragīriva || 15 ||
[Analyze grammar]

sa jayatyarisārthasārthakīkṛtanāmā kila bhīmabhūpatiḥ |
yamavāpya vidarbhabhūḥ prabhuṃ hasati dyāmapi śakrabhartṛkām || 16 ||
[Analyze grammar]

damanādamanākpraseduṣāstanayāṃ tathyagirastapodhanāt |
varamāpa sa diṣṭaviṣṭapatritayānanyasadṛgguṇodayām || 17 ||
[Analyze grammar]

bhuvanatrayasubhruvāmasau damayantī kamanīyatāmadam |
udiyāya yatastanuśriyā damayantīti tato'bhidhāṃ dadhau || 18 ||
[Analyze grammar]

śriyameva paraṃ dharādhipādguṇasindhoruditāmavehi tām |
vyavadhāvapi vā vidhoḥ kalāṃ mṛḍacūḍānilayāṃ na veda kaḥ || 19 ||
[Analyze grammar]

cikuraprakarā jayanti te viduṣī mūrdhani sā bibharti yān |
paśunāpyapuraskṛtena tattulanāmicchatu cāmareṇa kaḥ || 20 ||
[Analyze grammar]

svadṛśorjanayanti sāntvanāṃ khurakaṇḍūyanakaitavānmṛgāḥ |
jitayorudayatpramīlayostadakharvekṣaṇaśobhayā bhayā || 21 ||
[Analyze grammar]

api lokayugaṃ dṛśāvapi śrutadṛṣṭā ramaṇīguṇā api |
śṛutigāmitayā damasvasurvyatibhāte sutarāṃ dharāpate || 22 ||
[Analyze grammar]

nalinaṃ malinaṃ vivṛṇvatī pṛṣatīmaspṛśatī tadīkṣaṇe |
api khañjanamajñanāñcite vidadhāte rucigarvadurvidham || 23 ||
[Analyze grammar]

adharaṃ kila bimbanāmakaṃ phalamasmāditi bhavyamanvayam |
labhate'dharabimbamityadaḥ padamasyā radanacchadaṃ vadat || 24 ||
[Analyze grammar]

hatasāramivendumaṇḍalaṃ damayantīvadanāya vedhasā |
kṛtamadhyabilaṃ vilokyate dhṛtagambhīrakhanīkhanīlima || 25 ||
[Analyze grammar]

dhṛtalāñchanagomayāñcanaṃ vidhumālepanapāṇḍuraṃ vidhiḥ |
bhramayatyucitaṃ vidarbhajānananīrājanavardhamānakam || 26 ||
[Analyze grammar]

suṣamāviṣaye parīkṣaṇe nikhilaṃ padmamabhāji tanmukhāt |
adhunāpi na bhaṅgalakṣaṇaṃ salilonmajjanamujjhati sphuṭam || 27 ||
[Analyze grammar]

dhanuṣī ratipañcabāṇayorudite viśvajayāya tadbhruvau |
nailikena taduccanāsike tvayi nālīkavimuktikāmayoḥ || 28 ||
[Analyze grammar]

sadṛśī tava śūra sā paraṃ jaladurgasthamṛṇālajidbhujā |
api mittrajuṣāṃ saroruhāṃ gṛhayāluḥ karalīlayā śriyaḥ || 29 ||
[Analyze grammar]

vayasī śiśutātaduttare sudṛśi svābhividhiṃ vidhitsunī |
vidhināpi na romarekhayā kṛtasīmnī pravibhajya rajyataḥ || 30 ||
[Analyze grammar]

ayi tadvapuṣi prasarpatorgamite kāntijharairagādhatām |
smarayauvanayoḥ khalu dvayoḥ plavakumbhau bhavataḥ kucāvubhau || 31 ||
[Analyze grammar]

kalase nijahetudaṇḍajaḥ kimu cakrabhramakāritāguṇaḥ |
sa taduñcakucau bhavanprabhājharacakrabhramamātanoti yat || 32 ||
[Analyze grammar]

bhajate khalu ṣaṇmukhaṃ śikhī cikurairnirmitabarhagarhaṇaḥ |
api jambharipuṃ damasvasurjitakumbhaḥ kucaśobhayebharāṭ || 33 ||
[Analyze grammar]

udaraṃ natamadhyapṛṣṭatāsphuṭadaṅguṣṭhapadena muṣṭinā |
caturaṅgulamadhyanirgatatrivalibhrāji kṛtaṃ damasvasuḥ || 34 ||
[Analyze grammar]

udaraṃ parimāti muṣṭṣinā kutukī ko'pi damasvasuḥ kimu |
dhṛtataccaturaṅgulīva yadvalibhirbhāti sahemakāñcibhiḥ || 35 ||
[Analyze grammar]

pṛthuvartulatannitambakṛnmihirasyandanaśilpaśikṣayā |
vidhirekakacakracāriṇaṃ kimu nirmitsati mānmathaṃ ratham || 36 ||
[Analyze grammar]

tarumūruyugena sundarī kimu rambhāṃ pariṇāhinā param |
taruṇīmapi juṣṇureva tāṃ dhanadāpatyatapaḥ phalastanīm || 37 ||
[Analyze grammar]

jalaje ravisevayeva ye padametatpadatāmavāpatuḥ |
dhruvametya rutaḥ sahaṃsakīkurutaste vidhipattradaṃpatī || 38 ||
[Analyze grammar]

śritapuṇyasaraḥ saritkathaṃ na samādhikṣapitākhilakṣapam |
jalajaṃ gatimetu mañjulāṃ damayantīpadanāmni janmani || 39 ||
[Analyze grammar]

sarasīḥ pariśīlituṃ mayā gamikarmīkṛtanaikanīvṛtā |
atithitvamanāyi sā dṛśoḥ sadasatsaṃśayagocarodarī || 40 ||
[Analyze grammar]

avadhṛtya divo'pi yauvatairna sahādhītavatīmimāmaham |
katamastu vidhāturāśaye patirasyā vasatītyacintayam || 41 ||
[Analyze grammar]

anurūpamimaṃ nirūpayannatha sarveṣvapi pūrvapakṣatām |
yuvasu vyapanetumakṣamastvayi siddhāntadhiyaṃ nyaveśayam || 42 ||
[Analyze grammar]

anayā tava rūpasīmayā kṛtasaṃskāravibodhanasya me |
ciramapyavalokitādya sā smṛtimārūḍhavatī śucismitā || 43 ||
[Analyze grammar]

tvayi vīra virājate paraṃ damayantīkilakiñcitaṃ kila |
taruṇīstana eva dīpyate maṇihārāvalirāmaṇīyakam || 44 ||
[Analyze grammar]

tava rūpamidaṃ tayā vinā viphalaṃ puṣpamivāvakeśinaḥ |
iyamṛddhadhanā vṛthāvanī svavanī saṃpravadatpikāpi || 45 ||
[Analyze grammar]

anayā surakāmyamānayā saha yogaḥ sulabhastu na tvayā |
ghanasaṃvṛtayāmbudāgame kumudeneva niśākaratviṣā || 46 ||
[Analyze grammar]

tadahaṃ vidadhe tathātathā damayantyāḥ savidhe tava stavam |
hṛdaye nihitastayā bhavānapi nendreṇa yathāpanīyate || 47 ||
[Analyze grammar]

tava saṃmitimeva kevalāmidhagantuṃ dhigidaṃ niveditam |
bruvate hi phalena sādhavo na tu kaṇṭhena nijopayogitām || 48 ||
[Analyze grammar]

tadidaṃ viśadaṃ vacomṛtaṃ paripīyābhyuditaṃ dvijādhipāt |
atitṛptatayā vinirmame sa tadudgāramiva smitaṃ sitam || 49 ||
[Analyze grammar]

parimṛjya bhujāgrajanmanā patagaṃ kokanadena naiṣadhaḥ |
mṛdu tasya mude'kiradgiraḥ priyavādāmṛtakūpakaṇṭhajāḥ || 50 ||
[Analyze grammar]

na tulāviṣaye tavākṛtirna vacovartmani te suśīlatā |
tvadudāharaṇākṛtau guṇā iti sāmudrakasāramudraṇā || 51 ||
[Analyze grammar]

na suvarṇamayī tanuḥ paraṃ nanu kiṃ vāgapi tāvakī tathā |
na paraṃ pathi pakṣapātitānavalambe kimu mādṛśe'pi sā || 52 ||
[Analyze grammar]

bhṛśatāpabhṛtā mayā bhavānmarudāsādi tuṣārasāravān |
dhanināmitaraḥ satāṃ punarguṇavatsaṃnidhireva sannidhiḥ || 53 ||
[Analyze grammar]

śataśaḥ śṛutimāgataiva sā trijaganmohamahauṣadhirmama |
amunā tava śaṃsitena tu svadṛśaivādhigatāmavaimi tām || 54 ||
[Analyze grammar]

akhilaṃ viduṣāmanāvilaṃ suhṛdā ca svahṛdā ca paśyatām |
savidhe'pi nasūkṣmasākṣiṇīvadanālaṃkṛtimātramakṣiṇī || 55 ||
[Analyze grammar]

amitaṃ madhu tatkathā mama śravaṇaprāghuṇakīkṛtā janaiḥ |
madanānalabodhane bhavetkhaga dhāyyā dhigadhairyadhāriṇaḥ || 56 ||
[Analyze grammar]

viṣamo malayāhimaṇḍalīviṣaphūtkāramayo mayohitaḥ |
khaga kālakalatradigbhavaḥ pavanastadvirahānalaidhasā || 57 ||
[Analyze grammar]

pratimāsamasau niśāpatiḥ khaga saṃgacchati yaddinādhipam |
kimu tīvrataraistataḥ karairmama dāhāya sa dhairyataskaraiḥ || 58 ||
[Analyze grammar]

kusumāni yadi smareṣavo na tu vajraṃ viṣavallijāni tat |
hṛdayaṃ yadamūmuhannamūrmama yaccātitarāmatītapan || 59 ||
[Analyze grammar]

tadihānavadhau nimajjato mama kaṃdarpaśarādhinīradhau |
bhava pota ivāvalambanaṃ vidhinākasmikasṛṣṭasaṃnidhiḥ || 60 ||
[Analyze grammar]

athavā bhavataḥ pravartanā na kathaṃ piṣṭamiyaṃ pinaṣṭi naḥ |
svata eva satāṃ parārthatā grahaṇānāṃ hi yathā yathāṛthatā || 61 ||
[Analyze grammar]

tava vartmani vartatāṃ śivaṃ punarastu tvaritaṃ samāgamaḥ |
ayi sādhaya sādhayepsitaṃ smaraṇīyāḥ samaye vayaṃ vayaḥ || 62 ||
[Analyze grammar]

iti taṃ sa visṛjya dhairyavānnṛpatiḥ sūnṛtavāgbṛhaspatiḥ |
aviśadvanaveśma vismitaḥ smṛtilagnaiḥ kalahaṃsaśaṃsitaiḥ || 63 ||
[Analyze grammar]

atha bhīmasutāvalokanaiḥ saphalaṃ kartumahastadeva saḥ |
kṣitimaṇḍalamaṇḍanāyitaṃ nagaraṃ kuṇḍinamaṇḍajo yayau || 64 ||
[Analyze grammar]

prathamaṃ pathi locanātirthi pathikāprārthitasiddhiśaṃsinam |
kalasaṃ jalasaṃbhṛtaṃ puraḥ kalahaṃsaḥ kalayāṃbabhūva saḥ || 65 ||
[Analyze grammar]

avalambya didṛkṣayāmbare kṣaṇamāścaryarasālasaṃ gatam |
sa vilāsavane'vanībhṛtaḥ phalamaikṣiṣṭa rasālasaṃgatam || 66 ||
[Analyze grammar]

nabhasaḥ kalabhairupāsitaṃ jaladairbhūritarakṣupaṃ nagam |
sa dadarśa pataṅgapuṃgavo viṭapacchannatarakṣupannagam || 67 ||
[Analyze grammar]

sa yayau dhutapakṣatiḥ kṣaṇaṃ kṣaṇamūrdhvāyanadurvibhāvanaḥ |
vitatīkṛtaniścalacchadaḥ kṣaṇamālokakadattakautukaḥ || 68 ||
[Analyze grammar]

tadūdīdhitidhārayā rayādgatayā lokavilokanāmasau |
chadahema kaṣannivālasatkaṣapāṣāṇanibhe nabhastale || 69 ||
[Analyze grammar]

vinamadbhiradhaḥ sthitaiḥ khagairjhaṭiti śyenanipātaśaṅkibhiḥ |
sa niraikṣi dṛśaikayopari syadajhāṃkāritapatrapaddhatiḥ || 70 ||
[Analyze grammar]

dadṛśe na janena yannasau bhuvi tacchāyamavekṣya tatkṣaṇāt |
divi dikṣu vitīrṇacakṣuṣā pṛthuvegadrutamuktadṛkpathaḥ || 71 ||
[Analyze grammar]

na vanaṃ pathi śiśriye'munā kvacidapyuccataradrucā rutam |
na sagotrajamanvavādi vā gativegaprasaradrucā rutam || 72 ||
[Analyze grammar]

atha bhīmabhujena pālitā nagarī mañcurasau dharājitā |
patagasya jagāma dṛkpathaṃ haraśailopamasaudharājitā || 73 ||
[Analyze grammar]

dayitaṃ prati yatra saṃtatā ratihāsā iva rejire bhuvaḥ |
sphaṭikopalavigrahā gṛhāḥ śaśabhṛdbhittaniraṅkabhittayaḥ || 74 ||
[Analyze grammar]

nṛpanīlamaṇīgṛhatviṣāmupadheryatra bhayena bhāsvataḥ |
śaraṇārthamuvāsa vāsare'pyasadāvṛttyudayattamaṃ tamaḥ || 75 ||
[Analyze grammar]

sitadīpramaṇiprakalpite yadgāre hasadaṅkarodasi |
nikhilānniśi pūrṇimā tithīnupatasthe'tithirekikā tithiḥ || 76 ||
[Analyze grammar]

sudatījanamajjanārpitairghusṛṇairyatra kaṣāyitāśayā |
na niśākhilayāpi vāpikā prasasāda grahileva māninī || 77 ||
[Analyze grammar]

kṣaṇanīravayā yayā niśi śritavaprāvaliyogapaṭṭayā |
maṇiveśmamayaṃ sma nirmalaṃ kimapi jyotirabāhyamijyate || 78 ||
[Analyze grammar]

vilalāsa jalāśayodare kvacana dyauranuvimbiteva yā |
parikhākapaṭasphuṭasphuratpratibimbānavalambitāmbuni || 79 ||
[Analyze grammar]

vrajate divi yadgṛhāvalīcalacelāñcaladaṇḍatāḍanāḥ |
vyatarannaruṇāya viśramaṃ sṛjate helihayālikālanām || 80 ||
[Analyze grammar]

kṣitigarbhadharāmbarālayaistalamadhyoparipūriṇāṃ pṛthak |
jagatāṃ kila yākhilādbhutājani sārairnijacihnadhāribhiḥ || 81 ||
[Analyze grammar]

dadhadambudanīlakaṇṭhatāṃ vahadatyacchasudhojjvalaṃ vapuḥ |
kathamṛcchatu yatra nāma na kṣitibhṛnmandiramindumaulitām || 82 ||
[Analyze grammar]

bahurūpakaśālabhañjikāmukhacandreṣu kalaṅkaraṅkavaḥ |
yadanekakasaudhakaṃdharāharibhiḥ kukṣigatīkṛtā iva || 83 ||
[Analyze grammar]

balisadmadivaṃ sa tathyavāgupari smāha divo'pi nāradaḥ |
adharātha kṛtā yayeva sā viparītājani bhūvibhūṣayā || 84 ||
[Analyze grammar]

pratihaṭṭapathe gharaṭṭajātpathikāhvānadasaktusaurabhaiḥ |
kalahānna ghanānyadutthitādadhunāpyujjhati ghargharasvaraḥ || 85 ||
[Analyze grammar]

varaṇaḥ kanakasya māninīṃ divamaṅkādamarādrirāgatām |
ghanaratnakapāṭapakṣatiḥ parirabhyānunayannuvāsa yām || 86 ||
[Analyze grammar]

analaiḥ pariveṣametya yā jvaladarkopalavaprajanmabhiḥ |
udayaṃ layamantarā raveravahadbāṇapurīparārdhyatām || 87 ||
[Analyze grammar]

bahukambumaṇirvarāṭikāgaṇanāṭatkarakarkaṭotkaraḥ |
himavālukayācchavālukaḥ paṭu dadhvāna yadāpaṇārṇavaḥ || 88 ||
[Analyze grammar]

yadagāraghaṭāṭṭakuṭṭimasravadindūpalatundilāpayā |
mumuce na pativrataucitī praticandrodayamabhragaṅgayā || 89 ||
[Analyze grammar]

rucayostamitasya bhāsvataḥ skhalitā yatra nirālayāḥ kila |
anusāyamabhurvilepanā paṇakaśmīrajapaṇyavīthayaḥ || 90 ||
[Analyze grammar]

vitataṃ vaṇijāpaṇe'khilaṃ paṇituṃ yatra janena vīkṣyate |
munineva mṛkaṇḍusūnunā jagatīvastu purodare hareḥ || 91 ||
[Analyze grammar]

samameṇamadairyadāpaṇe tulayansaurabhalobhaniścalam |
paṇitā na janāravairavaidapi guñjantamaliṃ malīmasam || 92 ||
[Analyze grammar]

ravikāntamayena setunā sakalāhaṃ jvalanāhitoṣmaṇā |
śiśire niśigacchatāṃ purā caraṇau yatra dunoti no himaṃ || 93 ||
[Analyze grammar]

vidhudīdhitijena yatpathaṃ payasā naiṣadhaśīlaśītalam |
śaśikāntamayaṃ tapāgame kalitīvrastapati sma nātapaḥ || 94 ||
[Analyze grammar]

parikhāvalayacchalena yā na pareṣāṃ grahaṇasya gocaraḥ |
phaṇibhāṣitabhāṣyaphakkikāviṣamā kuṇḍalanāmavāpitā || 95 ||
[Analyze grammar]

mukhapāṇipadākṣṇī paṅkajai racitāṅgeṣvapareṣu campakaiḥ |
svayamādita yatra bhīmajā smarapūjākusumasrajaḥ śriyam || 96 ||
[Analyze grammar]

jaghanastanabhāragauravādviyadālambya vihartumakṣamāḥ |
dhruvamapsaraso'vatīrya yāṃ śatamadhyāsata tatsakhījanaḥ || 97 ||
[Analyze grammar]

sthitiśālisamastavarṇatāṃ na kathaṃ citramayī bibhartu yā |
svarabhedamupaitu yā kathaṃ kalitānalpamukhāravā na vā || 98 ||
[Analyze grammar]

svarucāruṇayā patākayā dinamarkeṇa samīyuṣottṛṣaḥ |
lilihurbahudhā sudhākaraṃ niśi māṇikyamayā yadālayāḥ || 99 ||
[Analyze grammar]

lilihe svarucā patākayā niśi jihvānibhayā sudhākaram |
śritamarkakaraiḥ pitāsu yannṛpasadmāmalapadmarāgajam || 10 ||
[Analyze grammar]

amṛtadyutilakṣma pītayā militaṃ yadvalabhīpatākayā |
valayāyitaśeṣaśāyinaḥ sakhitāmādita pītavāsasaḥ || 101 ||
[Analyze grammar]

aśrāntaśrutipāṭhapūtarasanāvirbhūtabhūristavājihmabrahmamukhaughavighnitanavasvargakriyākelinā |
pūrvaṃ gādhisutena sāmighaṭitā muktā nu mandākinī yatprāsādadukūlavalliranilāndolairakheladdivi || 102 ||
[Analyze grammar]

yadativimalanīlaveśmaraśmibhramaritabhāḥ śucisaudhavastravalliḥ |
alabhata śamansvasuḥ śiśutvaṃ divasakarāṅkatale calā luṭhanti || 103 ||
[Analyze grammar]

svaprāṇeśvaranarmaharmyakaṭakātithyagrahāyotsukaṃ pāthodaṃ nijakelisaudhaśikharādāruhya yatkāminī |
sākṣādapsaraso vimānakalitavyomāna evābhavadyanna prāpa nimeṣamabhratarasā yāntī rasādadhvani || 104 ||
[Analyze grammar]

vaidarbhīkeliśaile marakataśikharādutthitairaṃśudarbhairbrahmāṇḍāghātabhagnasyadajamadatayā hrīdhṛtāvāṅmukhatvaiḥ |
kasyā nottānagāyā divi surasurabherāsyadeśaṃ gatāgrairyadgogrāsapradānavratasukṛtamaviśrāntamujjṛmbhate sma || 105 ||
[Analyze grammar]

vidhukaraparirambhādātmaniṣyandapūrṇaiḥ śaśidṛṣadupakḷptairālavālaistarūṇām |
viphalitajalasekaprakriyāgauraveṇa vyaraci sa hṛtacittastatra bhaimīvanena || 106 ||
[Analyze grammar]

atha kanakapatattrastatra tāṃ rājaputrīṃ sadasi sadṛśabhāsāṃ visphurantīṃ sakhīnām |
uḍupariṣādi madhyasthāyiśītāṃśulekhānukaraṇapaṭulakṣmīmakṣilakṣīcakāra || 107 ||
[Analyze grammar]

bhramaṇarayavikīrṇasvarṇabhāsā khagena kvacana patanayogyaṃ deśamanviṣyatādhaḥ |
mukhavidhumadasīyaṃ sevituṃ lambamānaḥ śaśiparidhirivordhvaṃ maṇḍalastena tene || 108 ||
[Analyze grammar]

anubhavati śacītthaṃ sā ghṛtācīmukhābhirna saha sahacarībhirnandanānandamuccaiḥ |
iti matirudayāsītpakṣiṇaḥ prekṣya bhaimīṃ vipinabhuvi sakhībhiḥ sārdhamābaddhakelim || 109 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
dvaitīyīkatayā mito'yamagamattasya prabandhe mahākāvye cāruṇi naiṣadhīyacarite sargo nisargojjvalaḥ || 110 ||
[Analyze grammar]