Chapter 1

nipīya yasya kṣitirakṣiṇaḥ kathāstathādriyante na budhāḥ sudhāmapi |
nalaḥ sitacchattritakīrtimaṇḍalaḥ sa rāśirāsīnmahasāṃ mahojjvalaḥ || 1 ||
[Analyze grammar]

rasaiḥ kathā yasya sudhāvadhīraṇī nalaḥ sa bhūjānirabhūdguṇādbhutaḥ |
suvarṇadaṇḍaikasitātapatritajvalatpratāpāvalikīrtimaṇḍalaḥ || 2 ||
[Analyze grammar]

pavitramatrātanute jagadyuge smṛtā rasakṣālanayeva yatkathā |
kathaṃ na sā madgiramāvilāmapi svasevinīmeva pavitrayiṣyati || 3 ||
[Analyze grammar]

adhītibodhācaraṇapracāraṇairdaśāścatasraḥ praṇayannupādhibhiḥ |
caturdaśatvaṃ kṛtavānkutaḥ svayaṃ na vedmi vidyāsu caturdaśasvayam || 4 ||
[Analyze grammar]

amuṣya vidyā rasanāgranartakī trayīva nītāṅgaguṇena vistaram |
agāhatāṣṭādaśatāṃ jigīṣayā navadvayadvīpapṛthagjayaśriyām || 5 ||
[Analyze grammar]

digīśavṛndāṃśavibhūtirīśitā diśāṃ sa kāmaprasarāvarodhinīm |
babhāra śāstrāṇi dṛśaṃ dvayādhikāṃ nijatrinetrāvataratvabodhikām || 6 ||
[Analyze grammar]

padaiścaturbhiḥ sukṛte sthirīkṛte kṛte'munā ke na tapaḥ prapedire |
bhuvaṃ yadekāṅghrikaniṣṭhayā spṛśandadhāvadharmo'pi kṛśastapasvitām || 7 ||
[Analyze grammar]

yadasya yātrāsu baloddhataṃ rajaḥ sphuratpratāpānaladhūmamañjima |
tadeva gatvā patitaṃ sudhāmbudhau dadhāti paṅkībhavadaṅkatāṃ vidhau || 8 ||
[Analyze grammar]

sphuraddhanurnisvanataddhanāśaugapragalbhavṛṣṭivyayitasya saṃgare |
nijasya tejaḥśikhinaḥ paraśśatā vitenuriṅgālamivāyaśaḥ pare || 9 ||
[Analyze grammar]

analpadagdhāripurānalojjvalairnijapratāpairvalayajjvaladbhuvaḥ |
pradakṣiṇīkṛtya jayāya sṛṣṭayā rarāja nīrājanayā sa rājaghaḥ || 10 ||
[Analyze grammar]

nivāritāṣṭena mahītale'khile nirītibhāvaṃ gamite'tivṛṣṭayaḥ |
na tatyajurnūnamananyaviśramāḥ pratīpabhūpālamṛgīdṛśāṃ dṛśaḥ || 11 ||
[Analyze grammar]

sitāṃśuvarṇairvayati sma tadguṇairmahāsivemnaḥ sahakṛtvarī bahum |
digaṅganāṅgāvaraṇaṃ raṇāṅgaṇe yaśaḥpaṭaṃ tadbhaṭacāturīturī || 12 ||
[Analyze grammar]

pratīpabhūpairiva kiṃ tato miyā viruddhadharmairapi bhettṛtojjhitā |
amitrajinmitrajidojasā sa yadvicāradṛkāradṛgapyavartata || 13 ||
[Analyze grammar]

tadojasastadyaśasaḥ sthitāvimau vṛtheti citte kurute yadā yadā |
tanoti bhānoḥ pariveṣakaitavāttadā vidhiḥ kuṇḍalanāṃ vidhorapi || 14 ||
[Analyze grammar]

aye daridro bhaviteti vaidhasīṃ lipiṃ lalāṭe'rthijanasya jāgratīm |
mṛṣāṃ na cakre'lpitakalpapādapaḥ praṇīya dāridryadaridratāṃ nṛpaḥ || 15 ||
[Analyze grammar]

vibhajya merurna yadarthisātkṛto na sindhurutsargajalavyayairmaruḥ |
amāni tattena nijāyaśoyugaṃ dviphālabaddhāścikurāḥ śiraḥ sthitam || 16 ||
[Analyze grammar]

ajasramabhyāsamupeyuṣā samaṃ mudaiva devaḥ kavinā budhena ca |
dadhau paṭīyānsamayaṃ nayannayaṃ dineśvaraśrīrudayaṃ dine dine || 17 ||
[Analyze grammar]

adhovidhānātkamalapravālayoḥ śiruḥsu dānādakhilakṣamābhujām |
puredamūrdhvaṃ bhavatīti vedhasā padaṃ kimasyāṅkitamūrdhvarekhayā || 18 ||
[Analyze grammar]

jagajjayaṃ tena ca kośamakṣayaṃ praṇītavāñśaiśavaśeṣavānayam |
sakhā ratīśasya kraturyathā vanaṃ vapustathāliṅgadathāsya yauvanam || 19 ||
[Analyze grammar]

adhāri padmeṣu tadaṅghriṇā ghṛṇā kva tacchayacchāyalavo'pi pallave |
tadāsyadāsye'pi gato'ghikāritāṃ na śāradaḥ pārvikaśarvarīśvaraḥ || 20 ||
[Analyze grammar]

kimasya lomnāṃ kapaṭena koṭibhirvidhirna lekhābhirajīgaṇadguṇān |
na romakūpaughamiṣājjagatkṛtā kṛtāśca kiṃ dūṣaṇaśūnyabindavaḥ || 21 ||
[Analyze grammar]

amuṣya dorbhyāmaridurgaluṇṭhane dhruvaṃ gṛhītārgaladīrghapīnatā |
uraḥśriyā tatra ca gopurasphuratkapāṭadurdharṣatiraḥprasāritā || 22 ||
[Analyze grammar]

svakelileśasmitaninditenduno nijāṃśadṛktarjitapadmasaṃpadaḥ |
atadbayījitvarasundarāntare na tanmukhasya pratimā carācare || 23 ||
[Analyze grammar]

saroruhaṃ tasya dṛśaiva nirjitaṃ jitāḥ smitenaiva vidhorapi śriyaḥ |
kutaḥ paraṃ bhavyamaho mahīyasī tadānanasyopamitau daridratā || 24 ||
[Analyze grammar]

svavālabhārasya taduttamāṅgajaiḥ samaṃ camaryeva tulābhilāṣiṇaḥ |
anāgase śaṃsati bālacāpalaṃ punaḥ punaḥ pucchavilolanacchalāt || 25 ||
[Analyze grammar]

mahībhrtastasya ca manmathaśriyā nijasya cittasya ca taṃ pratīcchayā |
dvidhā nṛpe tatra jagattrayībhuvāṃ natabhruvāṃ manmathavibhramo'bhavat || 26 ||
[Analyze grammar]

nimīlanabhraṃśajuṣā dṛśā bhṛśaṃ nipīya taṃ yastridaśībhirarjitaḥ |
amūstamabhyāsabharaṃ vivṛṇvate nimeṣaniḥsvairadhunāpi locanaiḥ || 27 ||
[Analyze grammar]

adastadākarṇi phalāḍhyajīvitaṃ dṛśordvayaṃ nastadavīkṣi cāphalam |
iti sma cakṣuḥśravasāṃ priyā nale stuvanti nindanti hṛdā tadātmanaḥ || 28 ||
[Analyze grammar]

vilokayantībhirajasrabhāvanā balādamuṃ netranimīlaneṣvapi |
alambhi martyābhiramuṣya darśane na vighnaleśo'pi nimeṣanirmitaḥ || 29 ||
[Analyze grammar]

na kā niśi svapnagataṃ dadarśa taṃ jagāda gotraskhalite ca kā na tam |
tadātmatādhyātadhavā rate ca kā cakāra vā na svamanobhavodbhavam || 30 ||
[Analyze grammar]

śriyāsya yogyāhamiti svamīkṣituṃ kare tamālokya surūpayā dhṛtaḥ |
vihāya bhaimīmapdarpayā kayā na darpaṇaḥ śvāsamalīmasaḥ kṛtaḥ || 31 ||
[Analyze grammar]

yathohyamānaḥ khalu bhogabhojinā prasahya vairocanijasya pattanam |
vidarbhajāyā madanastathā mano nalāvaruddhaṃ vayasaiva veśitaḥ || 32 ||
[Analyze grammar]

nṛpe'nurūpe nijarūpasaṃpadāṃ dideśa tasminbahuśaḥ śrutiṃ gate |
viśiṣya sā bhīmanarendranandanā manobhavājñaikavaśaṃvadaṃ manaḥ || 33 ||
[Analyze grammar]

upāsanāmetya pituḥ sma rajyate dine dine sāvasareṣu bandinām |
paṭhatsu teṣu pratibhūpatīnalaṃ vinidraromājani śṛṇvatī nalam || 34 ||
[Analyze grammar]

kathāprasaṅgeṣu mithaḥ sakhīmukhāttṛṇe'pi tanvyā nalanāmani śrute |
drutaṃ vidhūyānyadabhūyatānayā mudā tadākarṇanasajjakarṇayā || 35 ||
[Analyze grammar]

smarātparāsoranimeṣalocanādvimemi tadbhinnamudāhareti sā |
janena yūnaḥ stuvatā tadāspade nidarśanaṃ naiṣādhamabhyaṣecayat || 36 ||
[Analyze grammar]

nalasya pṛṣṭā niṣadhāgatā guṇānmiṣeṇa dūtadvijabandicāraṇāḥ |
nipīya tatkīrtikathāmathānayā cirāya tasthe vimanāyamānayā || 37 ||
[Analyze grammar]

priyaṃ priyā ca trijagajjayiśriyau likhādhilīlāgṛhamittikāvapi |
iti sma sā kāruvareṇa lekhitaṃ nalasya ca svasya ca sakhyamīkṣate || 38 ||
[Analyze grammar]

manorathena svapatīkṛtaṃ nalaṃ niśi kva sā na svapatī sma paśyati |
adṛṣṭamapyarthamadṛṣṭavaibhavātkaroti suptirjanadarśanātithim || 39 ||
[Analyze grammar]

nimīlitādakṣiyugācca nidrayā hṛdo'pi bāhyendriyamaunamudritāt |
adarśi saṅgopya kadāpyavīkṣito rahasyamasyāḥ sa mahanmahīpatiḥ || 40 ||
[Analyze grammar]

aho ahobhirmahimā himāgame'pyabhiprapede prati tāṃ smarārditām |
tapartupūrtāvapi medasāṃ bharā vibhāvarībhirbibharāṃbabhūvire || 41 ||
[Analyze grammar]

svakāntikīrtivrajamauktikasrajaḥ śrayantamantarghaṭanāguṇaśriyam |
kadācidasyā yuvadhairyalopinaṃ nalo'pi lokādaśṛṇodguṇotkaram || 42 ||
[Analyze grammar]

tameva labdhvāvasaraṃ tataḥ smaraḥ śarīraśobhājayajātamatsaraḥ |
amoghaśaktyā nijayeva mūrtayā tayā vinirjetumiyeṣa naiṣadham || 43 ||
[Analyze grammar]

akāri tena śravaṇātithirguṇaḥ kṣamābhujā bhīmanṛpātmajālayaḥ |
taduccadhairyavyayasaṃhiteṣuṇā smareṇa ca svātmaśarāsanāśrayaḥ || 44 ||
[Analyze grammar]

amuṣya dhīrasya jayāya sāhasī tadā khalu jyāṃ viśikhaiḥ sanāthayan |
nimajjayāmāsa yaśāṃsi saṃśaye smarastrilokīvijayārjitānyapi || 45 ||
[Analyze grammar]

anena bhaimīṃ ghaṭayiṣyatastathā vidheravandhyecchatayā vyalāsi tat |
abhedi tattādṛganaṅgamārgaṇairyadasya pauṣpairapi dhairyakañcukam || 46 ||
[Analyze grammar]

kimanyadadyāpi yadastratāpitaḥ pitāmaho vārijamāśrayatyaho |
smaraṃ tanucchāyatayā tamātmanaḥ śaśāka śaṅke sa na laṅghituṃ nalaḥ || 47 ||
[Analyze grammar]

urobhuvā kumbhayugena jṛmbhitaṃ navopahāreṇa vayaskṛtena kim |
trapāsariddurgamapi pratīrya sā nalasya tanvī hṛdayaṃ viveśa yat || 48 ||
[Analyze grammar]

apahnuvānasya janāya yannijāmadhīratāmasya kṛtaṃ manobhuvā |
abodhi tajjāgaraduḥkhasākṣiṇī niśā ca śayyā ca śaśāṅkakomalā || 49 ||
[Analyze grammar]

smaropatapto'pi bhṛśaṃ na sa prabhurvidarbharājaṃ tanayāmayācata |
tyajantyamūñśarma ca mānino varaṃ tyajanti na tvekamayācitavratam || 50 ||
[Analyze grammar]

mṛṣāviṣādābhinayādayaṃ kvacijjugopa niḥśvāsatatiṃ viyogajām |
vilepanasyādhikacandrabhāgatāvibhāvanāccāpalalāpa pāṇḍutām || 51 ||
[Analyze grammar]

śaśāka nihnotumayena tatpriyāmayaṃ babhāṣe yadalīkavīkṣitām |
samāja evālapitāsu vaiṇikairmumūrccha yatpañcamamūrcchanāsu ca || 52 ||
[Analyze grammar]

avāpa sāpatrapatāṃ sa bhūpatirjitendriyāṇāṃ dhuri kīrtitasthitiḥ |
asaṃvare śaṃbaravairivikrame krameṇa tatra sphuṭatāmupeyuṣi || 53 ||
[Analyze grammar]

alaṃ nalaṃ roddhumamī kilābhavanguṇā vivekapramukhā na cāpalam |
smaraḥ sa ratyāmaniruddhameva yatsṛjatyayaṃ sarganisarga īdṛśaḥ || 54 ||
[Analyze grammar]

anaṅgacihnaṃ sa vinā śaśāka no yadāsituṃ saṃsadi yatnavānapi |
kṣaṇaṃ tadārāmanihārakaitavānniṣevituṃ deśamiyeṣa nirjanam || 55 ||
[Analyze grammar]

atha śriyā bhartsitamatsyalāñchanaḥ samaṃ vayasyaiḥ svarahasyavedibhiḥ |
puropakaṇṭhopavanaṃ kilekṣitā dideśa yānāya nideśakāriṇaḥ || 56 ||
[Analyze grammar]

amī tatastasya vibhūṣitaṃ sitaṃ jave'pi māne'pi ca pauruṣādhikam |
upāharannaśvamajasracañcalaiḥ khurāñcalaiḥ kṣoditamandurodaram || 57 ||
[Analyze grammar]

athāntareṇāvaṭugāminādhvanā niśīthinīnāthamahaḥsahodaraiḥ |
nigālagāddevamaṇerivotthitairvirājitaṃ kesarakeśaraśmibhiḥ || 58 ||
[Analyze grammar]

ajasrabhūmītaṭakuṭṭanotthitairupāsyamānaṃ caraṇeṣu reṇubhiḥ |
rayaprakarṣādhyayanārthamāgatairjanasya cetobhirivāṇimāṅkitaiḥ || 59 ||
[Analyze grammar]

calācalaprothatayā mahībhṛte svavegadarpāniva vaktumutsukam |
alaṃ girā veda kilāyamāśayaṃ svayaṃ hayasyeti ca maunamāsthitam || 60 ||
[Analyze grammar]

mahārathasyādhvani cakravartinaḥ parānapekṣodvahanādyaśaḥ sitam |
radāvadātāṃśumiṣādanīdṛśāṃ hasantamantarbalamarvatāṃ raveḥ || 61 ||
[Analyze grammar]

sitatviṣaścañcalatāmupeyuṣo miṣeṇa pucchasya ca kesarasya ca |
sphuṭaṃ calaccāmarayugmacihnanairanihnuvānaṃ nijavājirājatām || 62 ||
[Analyze grammar]

api dvijihvābhyavahārapauruṣe mukhānuṣaktāyatavalguvalgayā |
upeyivāṃsaṃ pratimallatāṃ rayasmaye jitasya prasabhaṃ garutmataḥ || 63 ||
[Analyze grammar]

sa sindhujaṃ śītamahaḥsahodaraṃ harantamuccaiḥśravasaḥ śriyaṃ hayam |
jitākhilakṣmābhṛdanalpalocanastamāruroha kṣitipākaśāsanaḥ || 64 ||
[Analyze grammar]

nijā mayūkhā iva tīkṣṇadīdhitiṃ sphuṭāravindāṅkitapāṇipaṅkajam |
tamaśvavārā javanāśvayāyinaṃ prakāśarūpā manujeśamanvayuḥ || 65 ||
[Analyze grammar]

calannalaṃkṛtya mahārayaṃ hayaṃ svavāhavāhocitaveṣapeśalaḥ |
pramodaniḥspandatarākṣipakṣmabhirvyaloki lokairnagarālayairnalaḥ || 66 ||
[Analyze grammar]

kṣaṇādathaiṣa kṣaṇadāpatiprabhaḥ prabhañjanādhyeyajavena vājinā |
sahaiva tābhirjanadṛṣṭivṛṣṭibhirbahiḥ puro'bhūtpuruhūtapauruṣāḥ || 67 ||
[Analyze grammar]

tataḥ pratīccha prahareti bhāṣiṇī parasparollāsitaśalyapallave |
mṛṣā mṛdhaṃ sādibale kutūhalānnalasya nāsīragate vitenatuḥ || 68 ||
[Analyze grammar]

prayātumasmākamiyaṃ kiyatpadaṃ dharā tadambhodhirapi sthalāyatām |
itīva vāhairnijavegadarpitaiḥ payodhirodhakṣamamuddhataṃ rajaḥ || 69 ||
[Analyze grammar]

hareryadakrāmi padaikakrena khaṃ padaiścaturbhiḥ kramaṇe'pi tasya naḥ |
trapā harīṇāmiti namritānanairnyavarti tairardhanabhaḥkṛtakramaiḥ || 70 ||
[Analyze grammar]

camūcarāstasya nṛpasya sādino jinoktiṣu śrāddhatayaiva saindhavāḥ |
vihāradeśaṃ tamavāpya maṇḍalīmakārayanbhūrituraṃgamānapi || 71 ||
[Analyze grammar]

dviṣadbhirevāsya vilaṅghitā diśo yaśobhirevābdhirakāri goṣpadam |
itīva dhārāmavadhīrya maṇḍalīkriyāśriyāmaṇḍi turaṃgamaiḥ sthalī || 72 ||
[Analyze grammar]

acīkaraccāru hayena yā bhramīrnijātapatrasya talasthale nalaḥ |
marukimadyāpi na tāsu śikṣate vitatya vātyāmayacakracaṅkramān || 73 ||
[Analyze grammar]

viveśa gatvā sa vilāsakānanaṃ tataḥ kṣaṇātkṣoṇipatirdhṛtīcchayā |
pravālarāgacchuritaṃ suṣupsayā harirdhanacchāyamivārṇasāṃ nidhim || 74 ||
[Analyze grammar]

vanāntaparyantamupetya saspṛhaṃ krameṇa tasminnavatīrṇadṛkpathe |
vyavarti dṛṣṭiprakaraiḥ puraukasāmanuvrajadbandhusamājabandhubhiḥ || 75 ||
[Analyze grammar]

tataḥ prasūne ca phale ca mañjule sa saṃmukhasthāṅgulinā janādhipaḥ |
nivedyamānaṃ vanapālapāṇinā vyalokayatkānanakāmanīyakam || 76 ||
[Analyze grammar]

phalāni puṣpāṇi ca pallave kare vayotipātodgatavātavepite |
sthitaiḥ samādāya maharṣivāṛdhakādvane tadātithyamaśikṣi śākhibhiḥ || 77 ||
[Analyze grammar]

vinidrapattrāligatālikaitavānmṛgāṅkacūḍāmaṇivarjanārjitam |
dadhānamāśāsu cariṣṇu duryaśaḥ sa kautukī tatra dadarśa ketakam || 78 ||
[Analyze grammar]

viyogabhājāṃ hṛdi kaṇṭakaiḥ kaṭurnidhīyase karṇiśaraḥ smareṇa yat |
tato durākarṣatayā tadantakṛdvigīyase manmathadehadāhinā || 79 ||
[Analyze grammar]

tvadagrasūcyā sacivena kāminormanobhavaḥ sīvyati duryaśaḥ paṭau |
sphuṭaṃ sa pattraiḥ karapattramūrtibhirviyogihṛddāruṇi dāruṇāyate || 80 ||
[Analyze grammar]

dhanurmadhusvinnakaro'pi bhīmajāparaṃ parāgaistava dhūlihastayan |
prasūnadhanvā śarasātkaroti māmiti krudhākruśyata tena ketakam || 81 ||
[Analyze grammar]

vidarbhasubhrūstanatuṅgatāptaye ghaṭānivāpaśyadalaṃ tapasyataḥ |
phalāni dhūmasya dhayānadhomukhānsa dāḍime dohadadhūpini drume || 82 ||
[Analyze grammar]

viyoginīmaikṣata dāḍimīmasau priyasmṛteḥ spaṣṭamudītakaṇṭakām |
phalastanasthānavidīrṇarāgihṛdviśacchrukāsyasmarakiṃśukāśugām || 83 ||
[Analyze grammar]

smarārdhacandreṣunibhe kraśīyasāṃ sphuṭaṃ palāśe'dhvajuṣāṃ palāśanāt |
sa vṛntamālokata khaṇḍamanvitaṃ viyogihṛtkhaṇḍini kālakhaṇḍajam || 84 ||
[Analyze grammar]

navā latā gandhavahena cumbitā karambitāṅgī makarandaśīkaraiḥ |
dṛśā nṛpeṇa smitaśobhikuṅmalā darādarābhyāṃ darakampinī pape || 85 ||
[Analyze grammar]

vicinvatīḥ pānthapataṅgahiṃsanairapuṇyakarmāṇyalikajjalacchalāt |
vyalokayaccampakakorakāvalīḥ sa śambarārerbalidīpikā iva || 86 ||
[Analyze grammar]

amanyatāsau kusumeṣu garbhagaṃ parāgamandhaṃkaraṇaṃ viyoginām |
smareṇa mukteṣu purā purāraye tadaṅgabhasmeva śareṣu saṃgatam || 87 ||
[Analyze grammar]

pikādvane śṛṇvati bhṛṅgahuṃkṛtairdaśāmudañcatkaruṇe viyoginām |
anāsthayā sūnakaraprasāriṇīṃ dadarśa dūnaḥ sthalapadminīṃ nalaḥ || 88 ||
[Analyze grammar]

rasālasālaḥ samadṛśyatāmunā sphuraddvirephāravaroṣahuṃkṛtiḥ |
samīralolairmukulairviyogine janāya ditsanniva tarjanābhiyam || 89 ||
[Analyze grammar]

dinedine tvaṃ tanuredhi re'dhikaṃ punaḥ punarmūrccha ca tāpamṛccha ca |
itīva pānthāñśapataḥ pikāndvijānsakhedamaikṣiṣṭa sa lohitekṣaṇān alisrajā || 90 ||
[Analyze grammar]

kuḍmalamuccaśekharaṃ nipīya cāmpeyamadhīrayā dhiyā |
sa dhūmaketuṃ vipade viyoginā mudītamātaṅkitavānaśaṅkata || 91 ||
[Analyze grammar]

galatparāgaṃ bhramibhaṅgibhiḥ patatprasaktabhṛṅgāvali nāgakresaram |
sa māranārācanigharṣaṇaskhalajjvalatkaṇaṃ śāṇamiva vyalokayat || 92 ||
[Analyze grammar]

tadaṅgamuddiśya sugindha pātukāḥ śilīmukhālīḥ kusumādguṇaspṛśaḥ |
svacāpadurnirgatamārgaṇabhramātsmaraḥ svanantīravalokya lajjitaḥ || 93 ||
[Analyze grammar]

marullalatpallavakaṇṭakaiḥ kṣataṃ samucchalaccandanasārasaurabham |
sa vāranārīkucasaṃcitopamaṃ dadarśa mālūraphalaṃ pacelimam || 94 ||
[Analyze grammar]

yuvadvayīcittanimajjanocitaprasūnaśūnyetaragarbhagahvaram |
smareṣudhīkṛtya dhiyā bhayāndhayā sa pāṭalāyāḥ stabakaṃ prakampitaḥ || 95 ||
[Analyze grammar]

munidrumaḥ korakitaḥ śitidyutirvane'munāmanyata siṃhikāsutaḥ |
tamisrapakṣatruṭikūṭabhakṣitaṃ kalākalāpaṃ kila vaidhavaṃ vaman || 96 ||
[Analyze grammar]

purā haṭhākṣiptatuṣārapāṇḍuracchadā vṛtervīrudhi baddhavibhramāḥ |
milannimīlaṃ sasṛjurvilokitā nabhasvatastaṃ kusumeṣu kelayaḥ || 97 ||
[Analyze grammar]

gatā yadutsaṅgatale viśālatāṃ drumāḥ śirobhiḥ phalagauraveṇa tām |
kathaṃ na dhātrīmatimātranāmitaiḥ sa vandamānānabhinandati sma tān || 98 ||
[Analyze grammar]

nṛpāya tasmai himitaṃ vanānilaiḥ sughīkṛtaṃ puṣparasairaharmahaḥ |
vinirmitaṃ ketakareṇubhiḥ sitaṃ viyogine'datta na kaumudīmudaḥ || 99 ||
[Analyze grammar]

ayogabhājo'pi nṛpasya paśyatā tadeva sākṣādamṛtāṃśumānanam |
pikena roṣāruṇacakṣuṣā muhuḥ kuhūrutāhūyata candravairiṇī || 10 ||
[Analyze grammar]

aśokamarthānvitanāmatāśayā gatāñśaraṇyaṃ gṛhaśocino'dhvagān |
amanyatāvantamivaiṣa pallavaiḥ pratīṣṭakāmajvaladastrajālakam || 101 ||
[Analyze grammar]

vilāsavāpītaṭavīcivādanātpikāligīteḥ śikhilāsyalāghavāt |
vane'pi tauryatrikamārarādha taṃ kva bhogamāpnoti na bhāgyabhāgjanaḥ || 102 ||
[Analyze grammar]

tadarthamadhyāpya janena tadvane śukā vimuktāḥ paṭavastamastuvan |
svarāmṛtenopajaguśca sārikāstathaiva tatpauruṣagāyanīkṛtāḥ || 103 ||
[Analyze grammar]

itīṣṭagandhāḍhyamaṭannasau vanaṃ pikopagīto'pi śukastuto'pi ca |
avindatāmodabharaṃ bahiścaraṃ vidarbhasubhrūviraheṇa nāntaram || 104 ||
[Analyze grammar]

kareṇa mīnaṃ nijaketanaṃ dadhaddrumālavālāmbuniveśaśaṅkayā |
vyatarki sarvartughane vane madhuṃ sa mittramatrānusaranniva smaraḥ || 105 ||
[Analyze grammar]

latābalālāsyakalāgurustaruprasūnagandhotkarapaśyatoharaḥ |
asevatāmuṃ madhugandhavāriṇi praṇītalīlāplavano vanānilaḥ || 106 ||
[Analyze grammar]

atha svamādāya hbayena manthanācciratnaratnādhikamuccitaṃ cirāt |
nilīya tasminniva sannapāṃnidhirvane taḍāko dadṛśe'vanībhujā || 107 ||
[Analyze grammar]

payonilīnābhramukāmukāvalīradānanantoragapucchasucchavīn |
jalārdharuddhasya taṭāntabhūbhido mṛṇālajālasya miṣādbabhāra yaḥ || 108 ||
[Analyze grammar]

taṭāntaviśrāntaturaṃgamacchaṭāsphuṭānubimbodayacumbanena yaḥ |
babhau caladvīcikaśāntaśātanaiḥ sahasramuccaiḥ śravasāmivāśrayam || 109 ||
[Analyze grammar]

sitāmbujānāṃ nivahasya yaśchalādbabhāvaliśyāmalitodaraśriyām |
tamaḥsamacchāyakalaṅkasaṃkulaṃ kulaṃ sudhāṃśorbahalaṃ vahanbahu || 110 ||
[Analyze grammar]

rathāṅgabhājā kamalānuṣaṅgiṇā śilīmukhastomasakhena śārṅgiṇā |
sarojinīstambakadambakaitavānmṛṇālaśeṣāhibhuvānvayāyi yaḥ || 111 ||
[Analyze grammar]

taraṅgiṇīraṅkajuṣaḥ svavallabhāstaraṅgarekhā bibharāṃbabhūva yaḥ |
darodgataiḥ kokanadaughakorakairdhṛtapravālāṅkurasaṃcayaśca yaḥ || 112 ||
[Analyze grammar]

mahīyasaḥ paṅkajamaṇḍalasya yaśchalena gaurasya ca mecakasya ca |
nalena mene salile nilīnayostviṣaṃ vimuñcanvidhukālakūṭayoḥ || 113 ||
[Analyze grammar]

calīkṛtā yatra taraṅgariṅgaṇairabālaśaivālalatāparamparāḥ |
dhruvaṃ dadhurvāḍavahavyavāḍavasthitiprarohattamabhūmadhūmatām || 114 ||
[Analyze grammar]

prakāmamādityamavāpya kaṇṭakaiḥ karambitāmodabharaṃ vivṛṇvatī |
dhṛtasphuṭaśrīgṛhavigrahā divā sarojinī yatprabhavāpsarāyitā || 115 ||
[Analyze grammar]

yadambupūrapratibimbitāyatirmaruttaraṅgaistaralastaṭadrumaḥ |
nimajjya mainākamahībhṛtaḥ satastatāna pakṣāndhuvataḥ sapakṣatām || 116 ||
[Analyze grammar]

payodhilakṣmīmuṣi kelipalvale riraṃsuhaṃsīkalanādasādaram |
sa tatra citraṃ vicarantamantike hiraṇmayaṃ haṃsamabodhi naiṣadhaḥ || 117 ||
[Analyze grammar]

priyāsu bālāsu ratakṣamāsu ca dvipattritaṃ pallavitaṃ ca bibhratam |
smarārjitaṃ rāgamahīruhāṅkuraṃ miṣeṇa cañcvoścaraṇadvayasya ca || 118 ||
[Analyze grammar]

mahīmahendrastamavekṣya sa kṣaṇaṃ śakuntamekāntamanovinodinam |
priyāviyogādvidhuro'pi nirbharaṃ kutūhalākrāntamanā manāgabhūt || 119 ||
[Analyze grammar]

avaśyabhavyeṣvanavagrahagrahā yayā diśā dhāvati vedhasaḥ spṛhā |
tṛṇena vātyeva tayānugamyate janasya cittena bhṛśāvaśātmanā || 120 ||
[Analyze grammar]

athāvalambya kṣaṇamekapādikāṃ tadā nidadrāvupapalvalaṃ khagaḥ |
sa tiryagāvarjitakaṃdharaḥ śiraḥ pidhāya pakṣeṇa ratiklamālasaḥ || 121 ||
[Analyze grammar]

sanālamātmānananirjitaprabhaṃ hriyā nataṃ kāñcanamambujanma kim |
abuddha taṃ vidrumadaṇḍamaṇḍitaṃ sa pītamambhaḥprabhucāmaraṃ nu kim || 122 ||
[Analyze grammar]

kṛtāvarohasya hayādupānahau tataḥ pade rejaturasya bibhratī |
tayoḥ pravālairvanayostathāmbujairniyoddhukāme kimu baddhavarmaṇī || 123 ||
[Analyze grammar]

vidhāya mūrtiṃ kapaṭena vāmanīṃ svayaṃ balidhvaṃsiviḍāmbinīmayam |
upetapārśvaścaraṇena mauninā nṛpaḥ pataṅgaṃ samadhatta pāṇinā || 124 ||
[Analyze grammar]

tadāttamātmānamavetya saṃbhramātpunaḥpunaḥ prāyasadutplavāya saḥ |
gato virutyoḍḍayane nirāśatāṃ karau niroddhurdaśati sma kevalam || 125 ||
[Analyze grammar]

sasaṃbhramotpātipatatkulākulaṃ saraḥ prapadyotkatayānukampratām |
tamūrmilolaiḥ patagagrahānnṛpaṃ nyavārayadvāriruhaiḥ karairiva || 126 ||
[Analyze grammar]

patatriṇā tadrucireṇa vañcitaṃ śriyaḥ prayāntyāḥ pravihāya palvalam |
calatpadāmbhoruhanūpuropamā cukūja kūle kalahaṃsamaṇḍalī || 127 ||
[Analyze grammar]

na vāsayogyā vasudheyamīdṛśastvamaṅga yasyāḥ patirujjhitasthitiḥ |
iti prahāya kṣitimāśritā nabhaḥ khagāstamācukruśurāravaiḥ khalu || 128 ||
[Analyze grammar]

na jātarūpacchadajātarūpatādvijasya dṛṣṭeyamiti stuvanmuhuḥ |
avādi tenātha sa mānasaukasā janādhināthaḥ karapañjaraspṛśā || 129 ||
[Analyze grammar]

dhigastu tṛṣṇātaralaṃ bhavanmanaḥ samīkṣya pakṣānmama hemajanmanaḥ |
tavārṇavasyeva tuṣārasīkarairbhavedamībhiḥ kamalodayaḥ kiyān || 130 ||
[Analyze grammar]

na kevalaṃ prāṇivadho vadho mama tvadīkṣaṇādviśvasitāntarātmanaḥ |
vigarhitaṃ dharmadhanairnibarhaṇaṃ viśiṣya viśvāsajuṣāṃ dviṣāmapi || 131 ||
[Analyze grammar]

padepade santi bhaṭā raṇodbhaṭā nateṣu hiṃsārasa eṣa pūryate |
dhigīdṛśaṃ te nṛpate kuvikramaṃ kṛpāśraye yaḥ kṛpaṇe patatriṇi || 132 ||
[Analyze grammar]

phalena mūlena ca vāribhūruhāṃ munerivetthaṃ mama yasya vṛttayaḥ |
tvayādya tvasminnapi daṇḍadhāriṇā kathaṃ na patyā dharaṇī hṛṇīyate || 133 ||
[Analyze grammar]

itīdṛśaistaṃ viracayya vāṅmayaiḥ sacitravailakṣyakṛpaṃ nṛpaṃ khagaḥ |
dayāsamudre sa tadāśaye'tithīcakāra kāruṇyarasāpagā giraḥ || 134 ||
[Analyze grammar]

madekaputrājananī jarāturā navaprasūtirvaraṭā tapasvinī |
gatistayoreṣa janastamardayannaho vidhe tvāṃ karuṇā ruṇaddhi na || 135 ||
[Analyze grammar]

muhūrtamātraṃ bhavanindayā dayāsakhāḥ sakhāyaḥ sravadaśravo mama |
nivṛttimeṣyanti paraṃ duruttarastvayaiva mātaḥ sutaśokasāgaraḥ || 136 ||
[Analyze grammar]

madarthasaṃdeśamṛṇālamantharaḥ priyaḥ kiyaddūra iti tvayodite |
vilokayantyā rudato'tha pakṣiṇaḥ priye sa kīdṛgbhavitā tava kṣaṇaḥ || 137 ||
[Analyze grammar]

kathaṃ vidhātarmayi pāṇipaṅkajāttava priyāśaityamṛdutvaśilpinaḥ |
viyokṣyate vallabhayeti nirgatā lipirlalāṭaṃtapaniṣṭhurākṣarā || 138 ||
[Analyze grammar]

ayi svayūthyairaśanikṣatopamaṃ mamādya vṛttāntamimaṃ batoditā |
mukhāni lolākṣi diśāmasaṃśayaṃ daśāpi śūnyāni vilokayiṣyasi || 139 ||
[Analyze grammar]

mamaiva śokena vidīrṇavakṣasā tvayā vicitrāṅgi vipadyate yadi |
tadāsmi daivena hato'pi hā hataḥ sphuṭaṃ yataste śiśavaḥ parāsavaḥ || 140 ||
[Analyze grammar]

tavāpi hāhā virahātkṣudhākulāḥ kulāyakūleṣu viluṭhya teṣu te |
cireṇa labdhā bahubhirmanorathairgatāḥ kṣaṇenāsphuṭītekṣaṇā mama || 141 ||
[Analyze grammar]

sutāḥ kamāhūya cirāya cuṃkṛtairvidhāya kamprāṇi mukhāni kaṃ prati |
kathāsu śiṣyadhvamiti pramīlya sa snutasya sekādbubudhe nṛpāśruṇaḥ || 142 ||
[Analyze grammar]

itthamamuṃ vilapantamamuñcaddīnadayālutayāvanipālaḥ |
rūpamadarśi dhṛto'si yadarthaṃ gaccha yathecchamathetyabhidhāya || 143 ||
[Analyze grammar]

ānandajāśrubhiranusriyamāṇamārgānprākśokanirgamitanetrapayaḥpravāhān |
cakre sa cakranibhacaṅkramaṇacchalena nīrājanāṃ janayatāṃ nijabāndhavānām || 144 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
taccintāmaṇimantracintanaphale śṛṅgārabhaṅgyā mahākāvye cāruṇi naiṣadhīyacarite sargo'yamādirgataḥ || 145 ||
[Analyze grammar]