Chapter 8

[English text for this chapter is available]

athāṣṭāmo'dhyāyaḥ |
śrīnārada uvāca |
atha daityasutāḥ sarve śrutvā tadanuvarṇitam |
jagṛhurniravadyatvānnaiva gurvanuśikṣitam || 1 ||
[Analyze grammar]

athācāryasutasteṣāṃ buddhimekāntasaṃsthitām |
ālakṣya bhītastvarito rājña āvedayadyathā || 2 ||
[Analyze grammar]

śrutvā tadapriyaṃ daityo duḥsahaṃ tanayānayam |
kopāveśacaladgātraḥ putraṃ hantuṃ mano dadhe || 3 ||
[Analyze grammar]

kṣiptvā paruṣayā vācā prahrādamatadarhaṇam |
āhekṣamāṇaḥ pāpena tiraścīnena cakṣuṣā || 4 ||
[Analyze grammar]

praśrayāvanataṃ dāntaṃ baddhāñjalimavasthitam |
sarpaḥ padāhata iva śvasanprakṛtidāruṇaḥ || 5 ||
[Analyze grammar]

śrīhiraṇyakaśipuruvāca |
he durvinīta mandātmankulabhedakarādhama |
stabdhaṃ macchāsanodvṛttaṃ neṣye tvādya yamakṣayam || 6 ||
[Analyze grammar]

kruddhasya yasya kampante trayo lokāḥ saheśvarāḥ |
tasya me'bhītavanmūḍha śāsanaṃ kiṃ balo'tyagāḥ || 7 ||
[Analyze grammar]

śrīprahrāda uvāca |
na kevalaṃ me bhavataśca rājansa vai balaṃ balināṃ cāpareṣām |
pare'vare'mī sthirajaṅgamā ye brahmādayo yena vaśaṃ praṇītāḥ || 8 ||
[Analyze grammar]

sa īśvaraḥ kāla urukramo'sāvojaḥ sahaḥ sattvabalendri yātmā |
sa eva viśvaṃ paramaḥ svaśaktibhiḥ sṛjatyavatyatti guṇatrayeśaḥ || 9 ||
[Analyze grammar]

jahyāsuraṃ bhāvamimaṃ tvamātmanaḥ samaṃ mano dhatsva na santi vidviṣaḥ |
ṛte'jitādātmana utpathe sthitāttaddhi hyanantasya mahatsamarhaṇam || 10 ||
[Analyze grammar]

dasyūnpurā ṣaṇṇa vijitya lumpato manyanta eke svajitā diśo daśa |
jitātmano jñasya samasya dehināṃ sādhoḥ svamohaprabhavāḥ kutaḥ pare || 11 ||
[Analyze grammar]

śrīhiraṇyakaśipuruvāca |
vyaktaṃ tvaṃ martukāmo'si yo'timātraṃ vikatthase |
mumūrṣūṇāṃ hi mandātmannanu syurviklavā giraḥ || 12 ||
[Analyze grammar]

yastvayā mandabhāgyokto madanyo jagadīśvaraḥ |
kvāsau yadi sa sarvatra kasmātstambhe na dṛśyate || 13 ||
[Analyze grammar]

so'haṃ vikatthamānasya śiraḥ kāyāddharāmi te |
gopāyeta haristvādya yaste śaraṇamīpsitam || 14 ||
[Analyze grammar]

evaṃ duruktairmuhurardayanruṣā sutaṃ mahābhāgavataṃ mahāsuraḥ |
khaḍgaṃ pragṛhyotpatito varāsanātstambhaṃ tatāḍātibalaḥ svamuṣṭinā || 15 ||
[Analyze grammar]

tadaiva tasminninado'tibhīṣaṇo babhūva yenāṇḍakaṭāhamasphuṭat |
yaṃ vai svadhiṣṇyopagataṃ tvajādayaḥ śrutvā svadhāmātyayamaṅga menire || 16 ||
[Analyze grammar]

sa vikramanputravadhepsurojasā niśamya nirhrādamapūrvamadbhutam |
antaḥsabhāyāṃ na dadarśa tatpadaṃ vitatrasuryena surāriyūthapāḥ || 17 ||
[Analyze grammar]

satyaṃ vidhātuṃ nijabhṛtyabhāṣitaṃ vyāptiṃ ca bhūteṣvakhileṣu cātmanaḥ |
adṛśyatātyadbhutarūpamudvahanstambhe sabhāyāṃ na mṛgaṃ na mānuṣam || 18 ||
[Analyze grammar]

sa sattvamenaṃ parito vipaśyanstambhasya madhyādanunirjihānam |
nāyaṃ mṛgo nāpi naro vicitramaho kimetannṛmṛgendra rūpam || 19 ||
[Analyze grammar]

mīmāṃsamānasya samutthito'grato nṛsiṃharūpastadalaṃ bhayānakam |
prataptacāmīkaracaṇḍalocanaṃ sphuratsaṭākeśarajṛmbhitānanam || 20 ||
[Analyze grammar]

karāladaṃṣṭraṃ karavālacañcala kṣurāntajihvaṃ bhrukuṭīmukholbaṇam |
stabdhordhvakarṇaṃ girikandarādbhuta vyāttāsyanāsaṃ hanubhedabhīṣaṇam || 21 ||
[Analyze grammar]

divispṛśatkāyamadīrghapīvara grīvoruvakṣaḥsthalamalpamadhyamam |
candrāṃśugauraiśchuritaṃ tanūruhairviṣvagbhujānīkaśataṃ nakhāyudham || 22 ||
[Analyze grammar]

durāsadaṃ sarvanijetarāyudha pravekavidrāvitadaityadānavam |
prāyeṇa me'yaṃ hariṇorumāyinā vadhaḥ smṛto'nena samudyatena kim || 23 ||
[Analyze grammar]

evaṃ bruvaṃstvabhyapatadgadāyudho nadannṛsiṃhaṃ prati daityakuñjaraḥ |
alakṣito'gnau patitaḥ pataṅgamo yathā nṛsiṃhaujasi so'surastadā || 24 ||
[Analyze grammar]

na tadvicitraṃ khalu sattvadhāmani svatejasā yo nu purāpibattamaḥ |
tato'bhipadyābhyahananmahāsuro ruṣā nṛsiṃhaṃ gadayoruvegayā || 25 ||
[Analyze grammar]

taṃ vikramantaṃ sagadaṃ gadādharo mahoragaṃ tārkṣyasuto yathāgrahīt |
sa tasya hastotkalitastadāsuro vikrīḍato yadvadahirgarutmataḥ || 26 ||
[Analyze grammar]

asādhvamanyanta hṛtaukaso'marā ghanacchadā bhārata sarvadhiṣṇyapāḥ |
taṃ manyamāno nijavīryaśaṅkitaṃ yaddhastamukto nṛhariṃ mahāsuraḥ |
punastamāsajjata khaḍgacarmaṇī pragṛhya vegena gataśramo mṛdhe || 27 ||
[Analyze grammar]

taṃ śyenavegaṃ śatacandra vartmabhiścarantamacchidra muparyadho hariḥ |
kṛtvāṭṭahāsaṃ kharamutsvanolbaṇaṃ nimīlitākṣaṃ jagṛhe mahājavaḥ || 28 ||
[Analyze grammar]

viṣvaksphurantaṃ grahaṇāturaṃ harirvyālo yathākhuṃ kuliśākṣatatvacam |
dvāryūrumāpatya dadāra līlayā nakhairyathāhiṃ garuḍo mahāviṣam || 29 ||
[Analyze grammar]

saṃrambhaduṣprekṣyakarālalocano vyāttānanāntaṃ vilihansvajihvayā |
asṛglavāktāruṇakeśarānano yathāntramālī dvipahatyayā hariḥ || 30 ||
[Analyze grammar]

nakhāṅkurotpāṭitahṛtsaroruhaṃ visṛjya tasyānucarānudāyudhān |
ahansamastānnakhaśastrapāṇibhirdordaṇḍayūtho'nupathānsahasraśaḥ || 31 ||
[Analyze grammar]

saṭāvadhūtā jaladāḥ parāpatangrahāśca taddṛṣṭivimuṣṭarociṣaḥ |
ambhodhayaḥ śvāsahatā vicukṣubhurnirhrādabhītā digibhā vicukruśuḥ || 32 ||
[Analyze grammar]

dyaustatsaṭotkṣiptavimānasaṅkulā protsarpata kṣmā ca padābhipīḍitā |
śailāḥ samutpeturamuṣya raṃhasā tattejasā khaṃ kakubho na rejire || 33 ||
[Analyze grammar]

tataḥ sabhāyāmupaviṣṭamuttame nṛpāsane sambhṛtatejasaṃ vibhum |
alakṣitadvairathamatyamarṣaṇaṃ pracaṇḍavaktraṃ na babhāja kaścana || 34 ||
[Analyze grammar]

niśāmya lokatrayamastakajvaraṃ tamādidaityaṃ hariṇā hataṃ mṛdhe |
praharṣavegotkalitānanā muhuḥ prasūnavarṣairvavṛṣuḥ surastriyaḥ || 35 ||
[Analyze grammar]

tadā vimānāvalibhirnabhastalaṃ didṛkṣatāṃ saṅkulamāsa nākinām |
surānakā dundubhayo'tha jaghnire gandharvamukhyā nanṛturjaguḥ striyaḥ || 36 ||
[Analyze grammar]

tatropavrajya vibudhā brahmendra giriśādayaḥ |
ṛṣayaḥ pitaraḥ siddhā vidyādharamahoragāḥ || 37 ||
[Analyze grammar]

manavaḥ prajānāṃ patayo gandharvāpsaracāraṇāḥ |
yakṣāḥ kimpuruṣāstāta vetālāḥ sahakinnarāḥ || 38 ||
[Analyze grammar]

te viṣṇupārṣadāḥ sarve sunandakumudādayaḥ |
mūrdhni baddhāñjalipuṭā āsīnaṃ tīvratejasam |
īḍire naraśārdūlaṃ nātidūracarāḥ pṛthak || 39 ||
[Analyze grammar]

śrībrahmovāca |
nato'smyanantāya durantaśaktaye vicitravīryāya pavitrakarmaṇe |
viśvasya sargasthitisaṃyamānguṇaiḥ svalīlayā sandadhate'vyayātmane || 40 ||
[Analyze grammar]

śrīrudra uvāca |
kopakālo yugāntaste hato'yamasuro'lpakaḥ |
tatsutaṃ pāhyupasṛtaṃ bhaktaṃ te bhaktavatsala || 41 ||
[Analyze grammar]

śrīindra uvāca |
pratyānītāḥ parama bhavatā trāyatā naḥ svabhāgā |
daityākrāntaṃ hṛdayakamalaṃ tadgṛhaṃ pratyabodhi |
kālagrastaṃ kiyadidamaho nātha śuśrūṣatāṃ te |
muktisteṣāṃ na hi bahumatā nārasiṃhāparaiḥ kima || 42 ||
[Analyze grammar]

śrīṛṣaya ūcuḥ |
tvaṃ nastapaḥ paramamāttha yadātmatejo |
yenedamādipuruṣātmagataṃ sasarktha |
tadvipraluptamamunādya śaraṇyapāla |
rakṣāgṛhītavapuṣā punaranvamaṃsthāḥ || 43 ||
[Analyze grammar]

śrīpitara ūcuḥ |
śrāddhāni no'dhibubhuje prasabhaṃ tanūjair |
dattāni tīrthasamaye'pyapibattilāmbu |
tasyodarānnakhavidīrṇavapādya ārcchat |
tasmai namo nṛharaye'khiladharmagoptre || 44 ||
[Analyze grammar]

śrīsiddhā ūcuḥ |
yo no gatiṃ yogasiddhāmasādhurahārṣīdyogatapobalena |
nānā darpaṃ taṃ nakhairvidadāra tasmai tubhyaṃ praṇatāḥ smo nṛsiṃha || 45 ||
[Analyze grammar]

śrīvidyādharā ūcuḥ |
vidyāṃ pṛthagdhāraṇayānurāddhāṃ nyaṣedhadajño balavīryadṛptaḥ |
sa yena saṅkhye paśuvaddhatastaṃ māyānṛsiṃhaṃ praṇatāḥ sma nityam || 46 ||
[Analyze grammar]

śrīnāgā ūcuḥ |
yena pāpena ratnāni strīratnāni hṛtāni naḥ |
tadvakṣaḥpāṭanenāsāṃ dattānanda namo'stu te || 47 ||
[Analyze grammar]

śrīmanava ūcuḥ |
manavo vayaṃ tava nideśakāriṇo ditijena deva paribhūtasetavaḥ |
bhavatā khalaḥ sa upasaṃhṛtaḥ prabho karavāma te kimanuśādhi kiṅkarān || 48 ||
[Analyze grammar]

śrīprajāpataya ūcuḥ |
prajeśā vayaṃ te pareśābhisṛṣṭā na yena prajā vai sṛjāmo niṣiddhāḥ |
sa eṣa tvayā bhinnavakṣā nu śete jaganmaṅgalaṃ sattvamūrte'vatāraḥ || 49 ||
[Analyze grammar]

śrīgandharvā ūcuḥ |
vayaṃ vibho te naṭanāṭyagāyakā yenātmasādvīryabalaujasā kṛtāḥ |
sa eṣa nīto bhavatā daśāmimāṃ kimutpathasthaḥ kuśalāya kalpate || 50 ||
[Analyze grammar]

śrīcāraṇā ūcuḥ |
hare tavāṅghripaṅkajaṃ bhavāpavargamāśritāḥ |
yadeṣa sādhuhṛcchayastvayāsuraḥ samāpitaḥ || 51 ||
[Analyze grammar]

śrīyakṣā ūcuḥ |
vayamanucaramukhyāḥ karmabhiste manojñais |
ta iha ditisutena prāpitā vāhakatvam |
sa tu janaparitāpaṃ tatkṛtaṃ jānatā te |
narahara upanītaḥ pañcatāṃ pañcaviṃśa || 52 ||
[Analyze grammar]

śrīkimpuruṣā ūcuḥ |
vayaṃ kimpuruṣāstvaṃ tu mahāpuruṣa īśvaraḥ |
ayaṃ kupuruṣo naṣṭo dhikkṛtaḥ sādhubhiryadā || 53 ||
[Analyze grammar]

śrīvaitālikā ūcuḥ |
sabhāsu satreṣu tavāmalaṃ yaśo gītvā saparyāṃ mahatīṃ labhāmahe |
yastāmanaiṣīdvaśameṣa durjano dviṣṭyā hataste bhagavanyathā'mayaḥ || 54 ||
[Analyze grammar]

śrīkinnarā ūcuḥ |
vayamīśa kinnaragaṇāstavānugā ditijena viṣṭimamunānukāritāḥ |
bhavatā hare sa vṛjino'vasādito narasiṃha nātha vibhavāya no bhava || 55 ||
[Analyze grammar]

śrīviṣṇupārṣadā ūcuḥ |
adyaitaddharinararūpamadbhutaṃ te dṛṣṭaṃ naḥ śaraṇada sarvalokaśarma |
so'yaṃ te vidhikara īśa vipraśaptastasyedaṃ nidhanamanugrahāya vidmaḥ || 56 ||
[Analyze grammar]