Chapter 16

[English text for this chapter is available]

sūta uvāca |
tataḥ parīkṣiddvijavaryaśikṣayā mahīṃ mahābhāgavataḥ śaśāsa ha |
yathā hi sūtyāmabhijātakovidāḥ samādiśan vipra mahadguṇastathā || 001 ||
[Analyze grammar]

sa uttarasya tanayāmupayema irāvatīm |
janamejayādīṃścaturastasyāmutpādayatsutān || 002 ||
[Analyze grammar]

ājahārāśvamedhāṃstrīn gaṅgāyāṃ bhūridakṣiṇān |
śāradvataṃ guruṃ kṛtvā devā yatrākṣigocarāḥ || 003 ||
[Analyze grammar]

nijagrāhaujasā vīraḥ kaliṃ digvijaye kvacit |
nṛpaliṅgadharaṃ śūdraṃ ghnantaṃ gomithunaṃ padā || 004 ||
[Analyze grammar]

śaunaka uvāca |
kasya hetornijagrāha kaliṃ digvijaye nṛpaḥ |
nṛdevacihnadhṛkśūdra ko'sau gāṃ yaḥ padāhanat |
tatkathyatāṃ mahābhāga yadi kṛṣṇakathāśrayam || 005 ||
[Analyze grammar]

athavāsya padāmbhoja makarandalihāṃ satām |
kimanyairasadālāpairāyuṣo yadasadvyayaḥ || 006 ||
[Analyze grammar]

kṣudrāyuṣāṃ nṛṇāmaṅga martyānāmṛtamicchatām |
ihopahūto bhagavānmṛtyuḥ śāmitrakarmaṇi || 007 ||
[Analyze grammar]

na kaścinmriyate tāvadyāvadāsta ihāntakaḥ |
etadarthaṃ hi bhagavānāhūtaḥ paramarṣibhiḥ |
aho nṛloke pīyeta harilīlāmṛtaṃ vacaḥ || 008 ||
[Analyze grammar]

mandasya mandaprajñasya vayo mandāyuṣaśca vai |
nidrayā hriyate naktaṃ divā ca vyarthakarmabhiḥ || 009 ||
[Analyze grammar]

sūta uvāca |
yadā parīkṣitkurujāṅgale'vasatkaliṃ praviṣṭaṃ nijacakravartite |
niśamya vārtāmanatipriyāṃ tataḥ śarāsanaṃ saṃyugaśauṇḍirādade || 010 ||
[Analyze grammar]

svalaṅkṛtaṃ śyāmaturaṅgayojitaṃ rathaṃ mṛgendradhvajamāśritaḥ purāt |
vṛto rathāśvadvipapattiyuktayā svasenayā digvijayāya nirgataḥ || 011 ||
[Analyze grammar]

bhadrāśvaṃ ketumālaṃ ca bhārataṃ cottarān kurūn |
kimpuruṣādīni varṣāṇi vijitya jagṛhe balim || 012 ||
[Analyze grammar]

nagarāṃśca vanāṃścaiva nadīśca vimalodakāḥ |
puruṣān devakalpāṃśca nārīśca priyadarśanāḥ || 013 ||
[Analyze grammar]

adṛṣṭapūrvān subhagān sa dadarśa dhanañjayaḥ |
sadanāni ca śubhrāṇi nārīścāpsarasāṃ nibhāḥ || 014 ||
[Analyze grammar]

tatra tatropaśṛṇvānaḥ svapūrveṣāṃ mahātmanām |
pragīyamāṇaṃ ca yaśaḥ kṛṣṇamāhātmyasūcakam || 015 ||
[Analyze grammar]

ātmānaṃ ca paritrātamaśvatthāmno'stratejasaḥ |
snehaṃ ca vṛṣṇipārthānāṃ teṣāṃ bhaktiṃ ca keśave || 016 ||
[Analyze grammar]

tebhyaḥ paramasantuṣṭaḥ prītyujjṛmbhitalocanaḥ |
mahādhanāni vāsāṃsi dadau hārānmahāmanāḥ || 017 ||
[Analyze grammar]

sārathyapāraṣadasevanasakhyadautya vīrāsanānugamanastavanapraṇāmān |
snigdheṣu pāṇḍuṣu jagatpraṇatiṃ ca viṣṇor bhaktiṃ karoti nṛpatiścaraṇāravinde || 018 ||
[Analyze grammar]

tasyaivaṃ vartamānasya pūrveṣāṃ vṛttimanvaham |
nātidūre kilāścaryaṃ yadāsīttannibodha me || 019 ||
[Analyze grammar]

dharmaḥ padaikena caran vicchāyāmupalabhya gām |
pṛcchati smāśruvadanāṃ vivatsāmiva mātaram || 020 ||
[Analyze grammar]

dharma uvāca |
kaccidbhadre'nāmayamātmanaste vicchāyāsi mlāyateṣanmukhena |
ālakṣaye bhavatīmantarādhiṃ dūre bandhuṃ śocasi kañcanāmba || 021 ||
[Analyze grammar]

pādairnyūnaṃ śocasi maikapādamātmānaṃ vā vṛṣalairbhokṣyamāṇam |
āho surādīn hṛtayajñabhāgān prajā uta svinmaghavatyavarṣati || 022 ||
[Analyze grammar]

arakṣyamāṇāḥ striya urvi bālān śocasyatho puruṣādairivārtān |
vācaṃ devīṃ brahmakule kukarmaṇyabrahmaṇye rājakule kulāgryān || 023 ||
[Analyze grammar]

kiṃ kṣatrabandhūn kalinopasṛṣṭān rāṣṭrāṇi vā tairavaropitāni |
itastato vāśanapānavāsaḥ snānavyavāyonmukhajīvalokam || 024 ||
[Analyze grammar]

yadvāmba te bhūribharāvatāra kṛtāvatārasya harerdharitri |
antarhitasya smaratī visṛṣṭā karmāṇi nirvāṇavilambitāni || 025 ||
[Analyze grammar]

idaṃ mamācakṣva tavādhimūlaṃ vasundhare yena vikarśitāsi |
kālena vā te balināṃ balīyasā surārcitaṃ kiṃ hṛtamamba saubhagam || 026 ||
[Analyze grammar]

dharaṇyuvāca |
bhavān hi veda tatsarvaṃ yanmāṃ dharmānupṛcchasi |
caturbhirvartase yena pādairlokasukhāvahaiḥ || 027 ||
[Analyze grammar]

satyaṃ śaucaṃ dayā kṣāntistyāgaḥ santoṣa ārjavam |
śamo damastapaḥ sāmyaṃ titikṣoparatiḥ śrutam || 028 ||
[Analyze grammar]

jñānaṃ viraktiraiśvaryaṃ śauryaṃ tejo balaṃ smṛtiḥ |
svātantryaṃ kauśalaṃ kāntirdhairyaṃ mārdavameva ca || 029 ||
[Analyze grammar]

prāgalbhyaṃ praśrayaḥ śīlaṃ saha ojo balaṃ bhagaḥ |
gāmbhīryaṃ sthairyamāstikyaṃ kīrtirmāno'nahaṅkṛtiḥ || 030 ||
[Analyze grammar]

ete cānye ca bhagavannityā yatra mahāguṇāḥ |
prārthyā mahattvamicchadbhirna viyanti sma karhicit || 031 ||
[Analyze grammar]

tenāhaṃ guṇapātreṇa śrīnivāsena sāmpratam |
śocāmi rahitaṃ lokaṃ pāpmanā kalinekṣitam || 032 ||
[Analyze grammar]

ātmānaṃ cānuśocāmi bhavantaṃ cāmarottamam |
devān pitṝnṛṣīn sādhūn sarvān varṇāṃstathāśramān || 033 ||
[Analyze grammar]

brahmādayo bahutithaṃ yadapāṅgamokṣa kāmāstapaḥ samacaran bhagavatprapannāḥ |
sā śrīḥ svavāsamaravindavanaṃ vihāya yatpādasaubhagamalaṃ bhajate'nuraktā || 034 ||
[Analyze grammar]

tasyāhamabjakuliśāṅkuśaketuketaiḥ śrīmatpadairbhagavataḥ samalaṅkṛtāṅgī |
trīnatyaroca upalabhya tato vibhūtiṃ lokān sa māṃ vyasṛjadutsmayatīṃ tadante || 035 ||
[Analyze grammar]

yo vai mamātibharamāsuravaṃśarājñām akṣauhiṇīśatamapānudadātmatantraḥ |
tvāṃ duḥsthamūnapadamātmani pauruṣeṇa sampādayan yaduṣu ramyamabibhradaṅgam || 036 ||
[Analyze grammar]

kā vā saheta virahaṃ puruṣottamasya premāvalokarucirasmitavalgujalpaiḥ |
sthairyaṃ samānamaharanmadhumāninīnāṃ romotsavo mama yadaṅghriviṭaṅkitāyāḥ || 037 ||
[Analyze grammar]

tayorevaṃ kathayatoḥ pṛthivīdharmayostadā |
parīkṣinnāma rājarṣiḥ prāptaḥ prācīṃ sarasvatīm || 038 ||
[Analyze grammar]