![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 6.7
jitātmanaḥ praśāntasya paramātmā samāhitaḥ |
śītoṣṇasukhaduḥkheṣu tathā mānāpamānayoḥ ||7||
The Subodhinī commentary by Śrīdhara
jitātmanaḥ svasmin bandhutvaṃ sphuṭayati jitātmana iti | jita ātmā yena tasya praśāntasya rāgādirahitasyaiva | paraṃ kevalamātmā śītoṣṇādiṣu satsvapi samāhitaḥ svātmaniṣṭho bhavati nānyasya | yadvā tasya hṛdi paramātmā samāhitaḥ sthito bhavati ||7||
The Gūḍhārthadīpikā commentary by Madhusūdana
jitātmanaḥ svabandhutvaṃ vivṛṇoti jitātmana iti | śītoṣṇasukhaduḥkheṣu cittavikṣepakareṣu satsvapi tathā mānāpamānayoḥ pūjāparibhavayościttavikṣepahetvoḥ satoriti teṣu samatveneti vā | jitātmanaḥ prāguktasya jitendriyasya praśāntasya sarvatra samabuddhayā rāgadveṣaśūnyasya paramātmā svaprakāśajñānasvabhāva ātmā samāhitaḥ samādhiviṣayo yogārūḍho bhavati | paramiti vā cchedaḥ | jitātmanaḥ praśāntasyaiva paraṃ kevalamātmā samāhito bhavati nānyasya | tasmājjitātmā praśāntaśca bhavedityarthaḥ ||7||
The Sārārthavarṣiṇī commentary by Viśvanātha
atha yogārūḍhasya cihnāni darśayati tribhiḥ | jitātmano jitamanasaḥ praśāntasya rāgādirahitasya yoginaḥ paramatiśayena samāhitaḥ samādhistha ātmā bhavet | śītādiṣu satsvapi mānāpamānayoḥ prāptayorapi ||7||
The Gītābhūṣaṇa commentary by Baladeva
yogārambhayogyāmavasthāmāha jiteti tribhiḥ | śītoṣṇādiṣu mānāpamānayośca jitātmano'vikṛtamanasaḥ praśāntasya rāgādiśūnyasyātmā paramatyarthaṃ samāhitaḥ samādhistho bhavati ||7||
__________________________________________________________