Chapter 12

tataḥ śamavihārasya munerikṣvākucandramāḥ |
arāḍasyāśramaṃ bheje vapuṣā pūrayanniva || 1 ||
[Analyze grammar]

sa kālāmasagotreṇa tenālokyaiva dūrataḥ |
uccaiḥ svāgatamityuktaḥ samīpamupajagmivān || 2 ||
[Analyze grammar]

tāvubhau nyāyataḥ pṛṣṭvā dhātusāmyaṃ parasparam |
dāravyormedhyayorvṛṣyoḥ śucau deśe niṣīdatuḥ || 3 ||
[Analyze grammar]

tamāsīnaṃ nṛpasutaṃ so 'bravīnmunisattamaḥ |
bahumānaviśālābhyāṃ darśanābhyāṃ pibanniva || 4 ||
[Analyze grammar]

viditaṃ me yathā saumya niṣkrānto bhavanādasi |
chittvā snehamayaṃ pāśaṃ pāśaṃ dṛpta iva dvipaḥ || 5 ||
[Analyze grammar]

sarvathā dhṛtimaccaiva prājñaṃ caiva manastava |
yastvaṃ prāptaḥ śriyaṃ tyaktvā latāṃ viṣaphalāmiva || 6 ||
[Analyze grammar]

nāścaryaṃ jīrṇavayaso yajjagmuḥ pārthivā vanam |
apatyebhyaḥ śriyaṃ dattvā bhuktocchiṣṭāmiva srajam || 7 ||
[Analyze grammar]

idaṃ me matamāścaryaṃ nave vayasi yadbhavān |
abhuktveva śriyaṃ prāptaḥ sthito viṣayagocare || 8 ||
[Analyze grammar]

tadvijñātumimaṃ dharmaṃ paramaṃ bhājanaṃ bhavān |
jñānapūrvamadhiṣṭhāya śīghraṃ duḥkhārṇavaṃ tara || 9 ||
[Analyze grammar]

śiṣye yadyapi vijñāte śāstraṃ kālena vartate |
gāmbhīryādvyavasāyācca suparīkṣyo bhavān mama || 10 ||
[Analyze grammar]

iti vākyamarāḍasya vijñāya sa narādhipaḥ |
babhūva paramaprītaḥ provācottarameva ca || 11 ||
[Analyze grammar]

viraktasyāpi yadidaṃ saumukhyaṃ bhavataḥ param |
akṛtārtho 'pyanenāsmi kṛtārtha iva samprati || 12 ||
[Analyze grammar]

didṛkṣuriva hi jyotiryiyāsuriva daiśikam |
tvaddarśanādahaṃ manye titīrṣuriva ca plavam || 13 ||
[Analyze grammar]

tasmādarhasi tadvaktuṃ vaktavyaṃ yadi manyase |
jarāmaraṇarogebhyo yathāyaṃ parimucyate || 14 ||
[Analyze grammar]

ityarāḍaḥ kumārasya māhātmyādeva coditaḥ |
saṅkṣiptaṃ kathayāṃ cakre svasya śāstrasya niścayam || 15 ||
[Analyze grammar]

śrūyatāmayamasmākaṃ siddhāntaḥ śṛṇvatāṃ vara |
yathā bhavati saṃsāro yathā vai parivartate || 16 ||
[Analyze grammar]

prakṛtiśca vikāraśca janma mṛtyurjaraiva ca |
tattāvatsattvamityuktaṃ sthirasattva parehi naḥ || 17 ||
[Analyze grammar]

tatra tu prakṛtirnāma viddhi prakṛtikovida |
pañca bhūtānyahaṅkāraṃ buddhimavyaktameva ca || 18 ||
[Analyze grammar]

vikāra iti buddhiṃ tu viṣayānindriyāṇi ca |
pāṇipādaṃ ca vādaṃ ca pāyūpasthaṃ tathā manaḥ || 19 ||
[Analyze grammar]

asya kṣetrasya vijñānāt kṣetrajña iti sañjñi ca |
kṣetrajña iti cātmānaṃ kathayantyātmacintakāḥ || 20 ||
[Analyze grammar]

saśiṣyaḥ kapilaśceha pratibuddha iti smṛtiḥ |
saputraḥ pratibuddhaśca prajāpatirihocyate || 21 ||
[Analyze grammar]

jāyate jīryate caiva budhyate mriyate ca yat |
tadvyaktamiti vijñeyamavyaktaṃ tu viparyayāt || 22 ||
[Analyze grammar]

ajñānaṃ karma tṛṣṇā ca jñeyāḥ saṃsārahetavaḥ |
sthito 'smiṃstritaye yastu tatsattvaṃ nābhivartate || 23 ||
[Analyze grammar]

vipratyayādahaṅkārātsandehādabhisamplavāt |
aviśeṣānupāyābhyāṃ saṅgādabhyavapātataḥ || 24 ||
[Analyze grammar]

tatra vipratyayo nāma viparītaṃ pravartate |
anyathā kurute kāryaṃ mantavyaṃ manyate 'nyathā || 25 ||
[Analyze grammar]

bravīmyahamahaṃ vedmi gacchāmyahamahaṃ sthitaḥ |
itīhaivamahaṅkārastvanahaṅkāra vartate || 26 ||
[Analyze grammar]

yastu bhāvena sandigdhānekībhāvena paśyati |
mṛtpiṇḍavadasandeha sandehaḥ sa ihocyate || 27 ||
[Analyze grammar]

ya evāhaṃ sa evedaṃ mano buddhiśca karma ca |
yaścaivaṃ sa gaṇaḥ so 'hamiti yaḥ so 'bhisamplavaḥ || 28 ||
[Analyze grammar]

aviśeṣaṃ viśeṣajña pratibuddhāprabuddhayoḥ |
prakṛtīnāṃ ca yo veda so 'viśeṣa iti smṛtaḥ || 29 ||
[Analyze grammar]

namaskāravaṣaṭkārau prokṣaṇābhyukṣaṇādayaḥ |
anupāya iti prājñairupāyajña praveditaḥ || 30 ||
[Analyze grammar]

sajjate yena durmedhā manovākkarmabuddhibhiḥ |
viṣayeṣvanabhiṣvaṅga so 'bhiṣvaṅga iti smṛtaḥ || 31 ||
[Analyze grammar]

mamedamahamasyeti yadduḥkhamabhimanyate |
vijñeyo 'bhyavapātaḥ sa saṃsāre yena pātyate || 32 ||
[Analyze grammar]

ityavidyā hi vidvāṃsaḥ pañcaparvā samīhate |
tamo mohaṃ mahāmohaṃ tāmisradvayameva ca || 33 ||
[Analyze grammar]

tatrālasyaṃ tamo viddhi mohaṃ mṛtyuṃ ca janma ca |
mahāmohastvasaṃmoha kāma ityavagamyatām || 34 ||
[Analyze grammar]

yasmādatra ca bhūtāni pramuhyanti mahāntyapi |
tasmādeṣa mahābāho mahāmoha iti smṛtaḥ || 35 ||
[Analyze grammar]

tāmisramiti cākrodha krodhamevādhikurvate |
viṣādaṃ cāndhatāmisramaviṣāda pracakṣate || 36 ||
[Analyze grammar]

anayāvidyayā bālaḥ saṃyuktaḥ pañcaparvayā |
saṃsāre duḥkhabhūyiṣṭhe janmasvabhiniṣicyate || 37 ||
[Analyze grammar]

draṣṭā śrotā ca mantā ca kāryaṃ karaṇameva ca |
ahamityevamāgamya saṃsāre parivartate || 38 ||
[Analyze grammar]

ityebhirhetubhirdhīman tamaḥsrotaḥ pravartate |
hetvabhāve phalābhāva iti vijñātumarhasi || 39 ||
[Analyze grammar]

tatra samyagmatirvidyānmokṣakāma catuṣṭayam |
pratibuddhāprabuddhau ca vyaktamavyaktameva ca || 40 ||
[Analyze grammar]

yathāvadetadvijñāya kṣetrajño hi catuṣṭayam |
ārjavaṃ javatāṃ hitvā prāpnoti padamakṣaram || 41 ||
[Analyze grammar]

ityarthaṃ brāhmaṇā loke paramabrahmavādinaḥ |
brahmacaryaṃ carantīha brāhmaṇān vāsayanti ca || 42 ||
[Analyze grammar]

iti vākyamidaṃ śrutvā munestasya nṛpātmajaḥ |
abhyupāyaṃ ca papraccha padameva ca naiṣṭhikam || 43 ||
[Analyze grammar]

brahmacaryamidaṃ caryaṃ yathā yāvacca yatra ca |
dharmasyāsya ca paryantaṃ bhavān vyākhyātumarhati || 44 ||
[Analyze grammar]

ityarāḍo yathāśāstraṃ vispaṣṭārthaṃ samāsataḥ |
tamevānyena kalpena dharmamasmai vyabhāṣata || 45 ||
[Analyze grammar]

ayamādau gṛhānmuktvā bhaikṣākaṃ liṅgamāśritaḥ |
samudācāravistīrṇaṃ śīlamādāya vartate || 46 ||
[Analyze grammar]

santoṣaṃ paramāsthāya yena tena yatastataḥ |
viviktaṃ sevate vāsaṃ nirdvandvaḥ śāstravitkṛtī || 47 ||
[Analyze grammar]

tato rāgādbhayaṃ dṛṣṭvā vairāgyācca paraṃ śivam |
nigṛhṇannindriyagrāmaṃ yatate manasaḥ śrame || 48 ||
[Analyze grammar]

atho viviktaṃ kāmebhyo vyāpādādibhya eva ca |
vivekajamavāpnoti pūrvadhyānaṃ vitarkavat || 49 ||
[Analyze grammar]

tacca dhyānaṃ sukhaṃ prāpya tattadeva vitarkayan |
apūrvasukhalābhena hriyate bāliśo janaḥ || 50 ||
[Analyze grammar]

śamenaivaṃvidhenāyaṃ kāmadveṣavigarhiṇā |
brahmalokamavāpnoti paritoṣeṇa vañcitaḥ || 51 ||
[Analyze grammar]

jñātvā vidvān vitarkāṃstu manaḥsaṅkṣobhakārakān |
tadviyuktamavāpnoti dhyānaṃ prītisukhānvitam || 52 ||
[Analyze grammar]

hriyamāṇastayā prītyā yo viśeṣaṃ na paśyati |
sthānaṃ bhāsvaramāpnoti deveṣvābhāsureṣvapi || 53 ||
[Analyze grammar]

yastu prītisukhāttasmādvivecayati mānasam |
tṛtīyaṃ labhate dhyānaṃ sukhaṃ prītivivarjitam || 54 ||
[Analyze grammar]

tatra kecidvyavasyanti mokṣa ityapi māninaḥ |
sukhaduḥkhaparityāgādavyāpārācca cetasaḥ || 55 ||
[Analyze grammar]

yastu tasminsukhe magno na viśeṣāya yatnavān |
śubhakṛtsnaiḥ sa sāmānyaṃ sukhaṃ prāpnoti daivataiḥ || 56 ||
[Analyze grammar]

tādṛśaṃ sukhamāsādya yo na rajyannupekṣate |
caturthaṃ dhyānamāpnoti sukhaduḥkhavivarjitam || 57 ||
[Analyze grammar]

asya dhyānasya tu phalaṃ samaṃ devairvṛhatphalaiḥ |
kathayanti bṛhatkālaṃ vṛhatprajñāparīkṣakāḥ || 58 ||
[Analyze grammar]

samādhervyutthitastasmāddṛṣṭvā doṣāṃścharīriṇām |
jñānamārohati prājñaḥ śarīravinivṛttaye || 59 ||
[Analyze grammar]

tatastaddhyānamutsṛjya viśeṣe kṛtaniścayaḥ |
kāmebhya iva satprājño rūpādapi virajyate || 60 ||
[Analyze grammar]

śarīre khāni yānyasya tānyādau parikalpayan |
ghaneṣvapi tato dravyeṣvākāśamadhimucyate || 61 ||
[Analyze grammar]

ākāśasamamātmānaṃ saṅkṣipya tvaparo budhaḥ |
tadaivānantataḥ paśyan viśeṣamadhigacchati || 62 ||
[Analyze grammar]

adhyātmakuśaleṣvanyo nivartyātmānamātmanā |
kiñcinnāstīti sampaśyannākiñcanya iti smṛtaḥ || 63 ||
[Analyze grammar]

tato muñjādiṣīkeva śakuniḥ pañjarādiva |
kṣetrajño niḥsṛto dehānmukta ityabhidhīyate || 64 ||
[Analyze grammar]

etattatparamaṃ brahma nirliṅgaṃ dhruvamakṣaram |
yanmokṣa iti tattvajñāḥ kathayanti manīṣiṇaḥ || 65 ||
[Analyze grammar]

ityupāyaśca mokṣaśca mayā sandarśitastava |
yadi jñātaṃ yadi rucir yathāvatpratipadyatām || 66 ||
[Analyze grammar]

jaigīṣavyo 'tha janako vṛddhaścaiva parāśaraḥ |
imaṃ panthānamāsādya muktā hyanye ca mokṣiṇaḥ || 67 ||
[Analyze grammar]

iti tasya sa tadvākyaṃ gṛhītvā na vicārya ca |
pūrvahetubalaprāptaḥ pratyuttaramuvāca saḥ || 68 ||
[Analyze grammar]

śrutaṃ jñānamidaṃ sūkṣmaṃ parataḥ parataḥ śivam |
kṣetreṣvasyāparityāgādavaimyetadanaiṣṭhikam || 69 ||
[Analyze grammar]

vikāraprakṛtibhyo hi kṣetrajñaṃ muktamapyaham |
manye prasavadharmāṇaṃ vījadharmāṇameva ca || 70 ||
[Analyze grammar]

yatkarmājñānatṛṣṇānāṃ tyāgānmokṣaśca kalpyate |
atyantastatparityāgaḥ satyātmani na vidyate || 71 ||
[Analyze grammar]

hitvā hitvā trayamidaṃ viśeṣastūpalabhyate |
ātmanastu sthitiryatra tatra sūkṣmamidaṃ trayam || 72 ||
[Analyze grammar]

sūkṣmatvāccaiva doṣāṇāmavyāpārācca cetasaḥ |
dīrghatvādāyuṣaścaiva mokṣastu parikalpyate || 73 ||
[Analyze grammar]

ahaṅkāraparityāgo yaścaiṣa parikalpyate |
satyātmani parityāgo nāhaṅkārasya vidyate || 74 ||
[Analyze grammar]

saṅkhyādibhiramuktaśca nirguṇo na bhavatyayam |
tasmādasati nairguṇye nāsya mokṣo 'bhidhīyate || 75 ||
[Analyze grammar]

guṇino hi guṇānāṃ ca vyatireko na vidyate |
rūpoṣṇābhyāṃ virahito na hyagnirupalabhyate || 76 ||
[Analyze grammar]

prāgdehānna bhaveddehī prāgguṇebhyastathā guṇī |
kasmādādau vimuktaḥ sañśarīrī badhyate punaḥ || 77 ||
[Analyze grammar]

kṣetrajño viśarīraśca jño vā syādajña eva vā |
yadi jño jñeyamasyāsti jñeye sati na mucyate || 78 ||
[Analyze grammar]

athājña iti siddho vaḥ kalpitena kimātmanā |
vināpi hyātmanājñānaṃ prasiddhaṃ kāṣṭhakuḍyavat || 79 ||
[Analyze grammar]

parataḥ paratastyāgo yasmāttu guṇavān smṛtaḥ |
tasmātsarvaparityāgānmanye kṛtsnāṃ kṛtārthatām || 80 ||
[Analyze grammar]

iti dharmamarāḍasya viditvā na tutoṣa saḥ |
akṛtsnamiti vijñāya tataḥ pratijagāma ha || 81 ||
[Analyze grammar]

viśeṣamatha śuśrūṣurudrakasyāśramaṃ yayau |
ātmagrāhācca tasyāpi jagṛhe na sa darśanam || 82 ||
[Analyze grammar]

sañjñāsañjñitvayordoṣaṃ jñātvā hi munirudrakaḥ |
ākiñcinyātparaṃ lebhe sañjñāsañjñātmikāṃ gatim || 83 ||
[Analyze grammar]

yasmāccālambane sūkṣme sañjñāsañjñe tataḥ param |
nāsañjñī naiva sañjñīti tasmāttatra gataspṛhaḥ || 84 ||
[Analyze grammar]

yataśca buddhistatraiva sthitānyatrāpracāriṇī |
sūkṣmāpādi tatastatra nāsañjñitvaṃ na sañjñitā || 85 ||
[Analyze grammar]

yasmācca tamapi prāpya punarāvartate jagat |
bodhisattvaḥ paraṃ prepsustasmādudrakamatyajat || 86 ||
[Analyze grammar]

tato hitvāśramaṃ tasya śreyo 'rthī kṛtaniścayaḥ |
bheje gayasya rājarṣernagarīsañjñamāśramam || 87 ||
[Analyze grammar]

atha nairañjanātīre śucau śuciparākramaḥ |
cakāra vāsamekāntavihārābhivratī muniḥ || 88 ||
[Analyze grammar]

pañcopatasthurdṛṣṭvātra bhikṣavastaṃ mumukṣavaḥ |
puṇyārjitadhanārogyamindriyārthā iveśvaram || 89 ||
[Analyze grammar]

sampūjyamānastaiḥ prahvairvinayānatamūrtibhiḥ |
tadvaṃśasthāyibhiḥ śiṣyairlolairmana ivendriyaiḥ || 90 ||
[Analyze grammar]

mṛtyujanmāntakaraṇe syādupāyo 'yamityatha |
duṣkarāṇi samārebhe tapāṃsyanaśanena saḥ || 91 ||
[Analyze grammar]

upavāsavidhīn nekān kurvan naradurācarān |
varṣāṇi ṣaṭkarmaprepsurakarotkārśyamātmanaḥ || 92 ||
[Analyze grammar]

annakāleṣu caikaikaiḥ sakolatilataṇḍulaiḥ |
apārapārasaṃsārapāraṃ prepsurapārayat || 93 ||
[Analyze grammar]

dehādapacayastena tapasā tasya yaḥ kṛtaḥ |
sa evopacayo bhūyastejasāsya kṛto 'bhavat || 94 ||
[Analyze grammar]

kṛśo 'pyakṛśakīrtiśrīrhlādaṃ cakre 'nyacakṣuṣam |
kumudānāmiva śaracchuklapakṣādicandramāḥ || 95 ||
[Analyze grammar]

tvagasthiśeṣo niḥśeṣairmedaḥpiśitaśoṇitaiḥ |
kṣīṇo 'pyakṣīṇagāmbhīryaḥ samudra iva sa vyabhāt || 96 ||
[Analyze grammar]

atha kaṣṭatapaḥspaṣṭavyarthakliṣṭatanurmuniḥ |
bhavabhīrurimāṃ cakre buddhiṃ buddhatvakāṅkṣayā || 97 ||
[Analyze grammar]

nāyaṃ dharmo virāgāya na bodhāya na muktaye |
jambumūle mayā prāpto yastadā sa vidhirdhruvaḥ || 98 ||
[Analyze grammar]

na cāsau durbalenāptuṃ śakyamityāgatādaraḥ |
śarīrabalavṛddhyarthamidaṃ bhūyo 'nvacintayat || 99 ||
[Analyze grammar]

kṣutpipāsāśramaklāntaḥ śramādasvasthamānasaḥ |
prāpnuyānmanasāvāpyaṃ phalaṃ kathamanirvṛtaḥ || 100 ||
[Analyze grammar]

nirvṛtiḥ prāpyate samyaksatatendriyatarpaṇāt |
santarpitendriyatayā manaḥsvāsthyamavāpyate || 101 ||
[Analyze grammar]

svasthaprasannamanasaḥ samādhirupapadyate |
samādhiyuktacittasya dhyānayogaḥ pravartate || 102 ||
[Analyze grammar]

dhyānapravartanāddharmāḥ prāpyante yairavāpyate |
durlabhaṃ śāntamajaraṃ paraṃ tadamṛtaṃ padam || 103 ||
[Analyze grammar]

tasmādāhāramūlo 'yamupāya itiniścayaḥ |
asūrikaraṇe dhīraḥ kṛtvāmitamatirmatim || 104 ||
[Analyze grammar]

snāto nairañjanātīrāduttatāra śanaiḥ kṛśaḥ |
bhaktyāvanataśākhāgrairdattahastastaṭadrumaiḥ || 105 ||
[Analyze grammar]

atha gopādhipasutā daivatairabhicoditā |
udbhūtahṛdayānandā tatra nandabalāgamat || 106 ||
[Analyze grammar]

sitaśaṅkhojjvalabhujā nīlakambalavāsinī |
sapheṇamālānīlāmburyamuneva saridvarā || 107 ||
[Analyze grammar]

sā śraddhāvardhitaprītirvikasallocanotpalā |
śirasā praṇipatyainaṃ grāhayāmāsa pāyasam || 108 ||
[Analyze grammar]

kṛtvā tadupabhogena prāptajanmaphalāṃ sa tām |
bodhiprāptau samartho 'bhūtsantarpitaṣaḍindriyaḥ || 109 ||
[Analyze grammar]

paryāptāpyānamūrtaśca sārdhaṃ suyaśasā muniḥ |
kāntidhairyaikabhāraikaḥ śaśāṅkārṇavavalbabhau || 110 ||
[Analyze grammar]

āvṛtta iti vijñāya taṃ jahuḥ pañcabhikṣavaḥ |
manīṣiṇamivātmānaṃ nirmuktaṃ pañcadhātavaḥ || 111 ||
[Analyze grammar]

vyavasāyadvitīyo 'tha śādvalāstīrṇabhūtalam |
so 'śvatthamūlaṃ prayayau bodhāya kṛtaniścayaḥ || 112 ||
[Analyze grammar]

tatastadānīṃ gajarājavikramaḥ padasvanenānupamena bodhitaḥ |
mahāmunerāgatabodhiniścayo jagāda kālo bhujagottamaḥ stutim || 113 ||
[Analyze grammar]

yathā mune tvaccaraṇāvapīḍitā muhurmuhurniṣṭanatīva medinī |
yathā ca te rājati sūryavatprabhā dhruvaṃ tvamiṣṭaṃ phalamadya bhokṣyase || 114 ||
[Analyze grammar]

yathā bhramantyo divi vāyapaṅktayaḥ pradakṣiṇaṃ tvāṃ kamalākṣa kurvate |
yathā ca saumyā divi vānti vāyavastvamadya buddho niyataṃ bhaviṣyasi || 115 ||
[Analyze grammar]

tato bhujaṅgapravareṇa saṃstutastṛṇānyupādāya śucīni lāvakāt |
kṛtapratijño niṣasāda bodhaye mahātarormūlamupāśritaḥ śuceḥ || 116 ||
[Analyze grammar]

tataḥ sa paryaṅkamakampyamuttamaṃ babandha suptoragabhogapiṇḍitam |
bhinadmi tāvadbhuvi naitadāsanaṃ na yāmi tāvatkṛtakṛtyatāmiti || 117 ||
[Analyze grammar]

tato yayurmudamatulāṃ divaukaso vavāsire na mṛgaganā na pakṣiṇaḥ |
na sasvanurvanataravo 'nilāhatāḥ kṛtāsane bhagavati niścalātmani || 118 ||
[Analyze grammar]