V. Svaparārthakriyā (5th akṣaya, Dāna)

[English text for this chapter is available]

atha khalv āyuṣmāñ śāradvatīputro'kṣayamatiṃ bodhisattvam idam avocat: asti kācid anyā, kulaputra, bodhisattvānām akṣayatā?

akṣayamatir āha: asti, bhadanta śāradvatīputra, bodhisattvānāṃ dānam apy akṣayam. tat kasya hetor? apramāṇatvāt. apramāṇo hi, bhadanta śāradvatīputra, bodhisattvānām dānaparibhogaḥ.

annam annārthibhyo dadāty āyuṣpratibhānasukhabalavarṇopadarśanāya | pānaṃ pānārthibhyo dadāti sarvakleśatṛṣṇāvinodanāya | yānaṃ yānārthibhyo dadāti sukhasamṛddhivastusaṃgrahaṇāya | vastraṃ vastrārthibhyo dadāti hrīrapatrāpyasuvarṇamayavarṇapariśodhanāya | dīpaṃ dīpārthibhyo dadāti tathāgatadivyacakṣuḥparidarśanāya | vādyaṃ vādyārthibhyo dadāti tathāgatadivyaśrotrapariśuddhaye | gandhopalepanaṃ gandhopalepanārthebhyo dadāti śīlaśrutasamādhigandhopalepanāya | mālāṃ mālārthibhyo dadāti dhāraṇīpratibhānabodhyaṅgapuṣpaprāpaṇāya | cūrṇaṃ cūrṇārthibhyo dadāti kāyasya manojñagandhaprāpaṇāya | sarvarasaṃ sarvarasārthibhyo dadāti rasarasāgratāmahāpuruṣalakṣaṇaparipūraye | layanaṃ layanārthibhyo dadāti sarvasattvānāṃ layanaśaraṇaparāyaṇatrāṇakaraṇāya | śayanaṃ śayanārthibhyo dadāti sarvāvaraṇaprahāṇadevabrahmavihāratathāgataśayanaprāpaṇāya | āsanam āsanārthibhyo dadāti sarvatrisahasramahāsahasrabhūmibodhimaṇḍavajrāsanaprāpaṇāya | pariṣkāraṃ pariṣkārārthibhyo dadāti bodhipariṣkāraparipūraye | bhaiṣajyaṃ sarvaglānabhaiṣajyārthibhyo dadāty ajarāmaraṇāmṛtasukhaparipūraye | dāsīdāsaparityāgo bodhisattvānāṃ dānaṃ svatantrasvabalasvayaṃbhūjñānaparipūraye | sarvasuvarṇarajatamaṇimuktāvaiḍūryaśaṅkhaśilāpravāḍaratnaparityāgo bodhisattvānāṃ dānaṃ dvātriṃśanmahāpuruṣalakṣaṇaparipūraye | vicitrabhūṣaṇāni bodhisattvānāṃ dānam aśītyanuvyañjanaparipūraye | cūḍamaṇimukuṭā bodhisattvānāṃ dānam adṛśyoṣṇīṣaprāpaṇāya | aśvahastirathapattivāhanā bodhisattvānāṃ dānaṃ mahāyānaparipūraye | udyānavimānatapovanavihāraparityāgo bodhisattvānāṃ dānaṃ dhyānāṅgāṅgasaṃbhāraparipūraye | priyaputraduhitṛbhāryāparityāgo bodhisattvānāṃ dānam anuttarasamyaksaṃbodhiprītyabhisaṃbodhanāya | dhanadhānyakośakoṣṭāgāraparityāgo bodhisattvānāṃ dānaṃ saddharmakośakoṣṭāgāraparipūraye | grāmanagaranigamarāṣṭrarājadhānījambudvīpacaturdvīparājyaiśvaryaparityāgo bodhisattvānāṃ dānaṃ sarvākāravaropetasaddharmarājabodhimaṇḍagamanāya | sarvasukharatikriḍāparityāgo bodhisattvānāṃ dānaṃ dharmaratyadhimuktiprāpaṇāya.

caraṇe bodhisattvānāṃ dānaṃ saddharmacaraṇabodhimaṇḍagamanāya | karatalo bodhisattvānāṃ dānaṃ sarvasattvasaddharmakaradānāya | karṇanāsā bodhisattvānāṃ dānam anupahatendriyasamāptaye | nayane bodhisattvānāṃ dānaṃ sarvasattvānāvaraṇabuddhacakṣurdharmacakṣuḥprāpaṇāya | uttamāṅgaśiro bodhisattvānāṃ dānaṃ traidhātukaviśiṣṭottamasarvajñajñānaprāpaṇāya | māṃsaśonitaparityāgo bodhisattvānāṃ dānam asāraśarīrādattasāropajīvyatāyai | chaviparityāgo bodhisattvānāṃ dānaṃ mṛdusnigdhasuvarṇamayavarṇapariśodhanāya | asthimajjā bodhisattvānāṃ dānaṃ vajradṛḍhābhedyanārāyāṇakaṭhinabuddhakāyaprāpaṇāya.

punar aparaṃ, bhadanta śāradvatīputra, nāsti bodhisattvānāṃ pratikūlabhogaparyeṣṭidānaṃ | nāsti sattvotpīḍanadānaṃ | nāsti mānotpādanadānaṃ | nāsti bhayatrāsalajjādānaṃ | nāsti pravāritāparityāgadānaṃ | nāsti yathokta ūnadānaṃ | nāsti śubhe saty aśubhadānaṃ | nāsty anadhyāśayadānaṃ | nāsti śāṭhyamāyādānaṃ | nāsti kṛtrimadānaṃ | nāsti karmavipākauddhatyadānaṃ | nāsti mithyāśayadānaṃ | nāsti mohāśayadānaṃ | nāsty eṣaṇāśayadānaṃ | nāsti viparītāśayadānaṃ | nāsty āśraddhyadānaṃ | nāsty apriyadānaṃ | nāsti pratyupasthitadānaṃ | nāsty anurodhadānaṃ | nāsti sattvanānātvadānaṃ | nāsti dakṣiṇīyaparimārgaṇadānaṃ | nāsti sarvasattveṣv adakṣiṇīyāvamanyanādānaṃ | nāsti śīlavadutkarṣaṇāduḥśīlapaṃsanādānaṃ | nāsti pratikāradānaṃ | nāsti kīrtiślokaśabdadānaṃ | nāsty ātmotkarṣaparapaṃsanādānaṃ | nāsti paridāhadānaṃ | nāsti pratisāradānaṃ | nāsti kaukṛtyadānaṃ | nāsty pīḍādānaṃ | nāsti nikrandadānaṃ | nāsti karmavipākaspṛhādānaṃ | nāsty anumitadānaṃ | nāsti krodhadveṣamohavyāpādotpādadānaṃ | nāsti yācanakeṣūpataptadānaṃ | nāsty uccagghanollāpanadānaṃ | nāsti parāṅmukhadānaṃ | nāsty apaviddhadānaṃ | nāsty asatkṛtadānaṃ | nāsty asvahastadānaṃ | nāsty anityadānaṃ | nāsty apraśrabdhadānaṃ | nāsti paraluḍitadānaṃ | nāsti paricchinnadānaṃ | nāsti yathāsamarpita ūnadānaṃ | nāsty utsāhe'nutsāhadānaṃ | nāsti sattvo na kṣetram iti dānaṃ | nāsty alpāvamanyanādānaṃ | nāsty udāragarvitadānaṃ | nāsti vipratipattidānaṃ | nāsti jātyarthikadānaṃ | nāsti rūpabhogaiśvaryābhiratidānaṃ | nāsti śakrabrahmalokapālaviśvadevotpattipraṇidhidānaṃ | nāsti śrāvakapratyekabuddhayānapariṇāmitadānaṃ | nāsti kumārarājyaiśvaryārthikadānaṃ | nāsty ekajanmakṣayadānaṃ | nāsty alam iti bhūyo vaiyarthyadānaṃ | nāsti sarvajñatācittāpariṇāmitadānaṃ | nāsty akalpikadānaṃ | nāsty akāladānaṃ | nāsti viṣaśastradānaṃ | nāsti sattvaviheṭanadānam. na bodhisattvānāṃ dānaṃ paṇḍitair ninditam.

śūnyatākāraprasādhitaṃ tad dānaṃ tasmāt tad akṣayam | ānimittaparibhāvitaṃ tad dānaṃ tasmāt tad akṣayam | apraṇidhānapratiṣṭhitaṃ tad dānaṃ tasmāt tad akṣayam | anabhisaṃskṛtapariṇāmitaṃ tad dānaṃ tasmāt tad akṣayam | samāttaṃ tad dānaṃ tasmāt tad akṣayam | traidhātukāsaṃsṛṣṭaṃ tad dānaṃ tasmāt tad akṣayam. vimuktiniṣyandaphalaṃ tad dānaṃ tasmāt tad akṣayam | sarvamārātyantanigrahaṇaṃ tad dānaṃ tasmāt tad akṣayam | sarvakleśāsaṃsṛṣtaṃ tad dānaṃ tasmāt tad akṣayam | viśeṣagamanaṃ tad dānaṃ tasmāt tad akṣayam | sukṛtaniyataṃ tad dānaṃ tasmāt tad akṣayam | bodhimārgasaṃbhāropacayaṃ tad dānaṃ tasmāt tad akṣayam. samyakpariṇāmitaṃ tad dānaṃ tasmāt tad akṣayam | bodhimaṇḍālaṃkāravimuktiniṣyandaphalaṃ tad dānaṃ tasmāt tad akṣayam | sarvasattvopajīvyaṃ tad dānaṃ tasmāt tad akṣayam | aparyantaṃ tad dānaṃ tasmāt tad akṣayam | aparihāṇiṃ tad dānaṃ tasmāt tad akṣayam | aparyāpannaṃ tad dānaṃ tasmāt tad akṣayam | aparicchinnaṃ tad dānaṃ tasmāt tad akṣayam | vipulaṃ tad dānaṃ tasmāt tad akṣayam | aniśritaṃ tad dānaṃ tasmāt tad akṣayam | anavasthaṃ tad dānaṃ tasmāt tad akṣayam | anavadyaṃ tad dānaṃ tasmāt tad akṣayam | anapavāditaṃ tad dānaṃ tasmāt tad akṣayam | adāntaṃ tad dānaṃ tasmāt tad akṣayam | anabhibhūtaṃ tad dānaṃ tasmāt tad akṣayam | sarvajñajñānopanāmitaṃ tad dānaṃ tasmāt tad akṣayam.

idam ucyate, bhadanta śāradvatīputra, bodhisattvānām akṣayaṃ dānam.