Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 1.25
evamīśvarasya svarūpamabhidhāya pramāṇamāha —
tatra niratiśayaṃ sārvajñyabījam || samādhi 25 ||
vṛttiḥ — tasmin bhagavati sarvajñatvasya yadbījamatītānāgatādigrahaṇasyālpatvaṃ mahatvaṃ ca mūlatvādbījamiva bījam | tat tatra niratiśayaṃ kāṣṭhāṃ prāptam | dṛṣṭā hyalpatvamahatvādīnāṃ dharmāṇāṃ sātiśayānāṃ kāṣṭhāprāptiḥ | yathā paramāṇāvalpatvasyākāśe paramamahatvasya | evaṃ jñānādayo'pi cittadharmāstāratamyena paridṛśyamānāḥ kvacinniratiśayatāmāsādayanti | yatra caite niratiśayāḥ sa īśvaraḥ | yadyapi sāmānyamātre'numānasya paryavasitatvānna viśeṣāvagatiḥ sambhavati tathāpi śāstrādasya sarvajñatvādayo viśeṣā avagantavyāḥ | tasya svaprayojanābhāve kathaṃ prakṛtipuruṣayoḥ saṃyogaviyogāvāpādayatīti nā''śaṅkanīyaṃ tasya kāruṇikatvādbhūtānugraha eva prayojanam | kalpapralayamahāpralayeṣu niḥśeṣān saṃsāriṇa uddhariṣyāmīti tasyādhyavasāyaḥ | yadyasyeṣṭaṃ tattasya prayojanamiti || 25 ||