Chapter 3

[English text for this chapter is available]

| sūta uvāca |
tataḥ praṇamya bhūyaḥ sa vasiṣṭhaṃ munipuṃgavam |
yayau tatra sutāstasya yatra te śatasaṃkhyakāḥ || 1 ||
[Analyze grammar]

tānapi prāha natvā sa tamevārthaṃ narādhipaḥ |
vasiṣṭhavacanaṃ kṛtsnaṃ tasya tairapi śaṃsitam || 2 ||
[Analyze grammar]

tatastānsa punaḥ prāha yuṣmākaṃ janako'dhunā |
aśakto mā divaṃ netuṃ saśarīraṃ visarjitaḥ || 3 ||
[Analyze grammar]

tasmādyadi na māṃ yūyaṃ yājayiṣyatha sāṃpratam |
parityajya kariṣyāmi śīghramanyaṃ purohitam || 4 ||
[Analyze grammar]

yo māṃ yajñaprabhāvena nayiṣyati surālayam |
anenaiva śarīreṇa sahitaṃ guruputrakāḥ || 5 ||
[Analyze grammar]

tasya tadvacanaṃ śrutvā sarve te munisattamāḥ |
paraṃ kopaṃ samāviṣṭāstamūcuḥ paruṣākṣaraiḥ || 6 ||
[Analyze grammar]

yasmāttvayā gurustyakto hitakṛtpāpavānasi |
tasmādbhavādhunā pāpa caṃḍālo lokaniṃditaḥ || 7 ||
[Analyze grammar]

atha tadvacanāṃte sa tatkṣaṇātpṛthivīpatiḥ |
babhūvāṃtyajarūpāḍhyo vikṛtākāradehabhṛt || 8 ||
[Analyze grammar]

yavamadhyaḥ kṛśagrīvaḥ piṃgākṣo bhugnanāsikaḥ |
kṛṣṇāṃgaḥ śaṃkuvarṇaśca durgaṃdhena samāvṛtaḥ || 9 ||
[Analyze grammar]

athātmānaṃ samālokya vikṛtaṃ sa narādhipaḥ |
caṇḍāladharmiṇaṃ sadyo lajjayā'dhomukhaḥ sthitaḥ || 10 ||
[Analyze grammar]

yāhiyāhīti vipraistairbhartsyamāno muhurmuhuḥ |
sarvataḥ sārameyaiśca kliśyamāno nirargalaiḥ |
kākakokilasaṃkāśo jīrṇavastrāvaguṃṭhitaḥ || 11 ||
[Analyze grammar]

tataḥ sa cintayāmāsa duḥkhena mahatā vṛtaḥ |
kiṃ karomi kva gacchāmi kathaṃ śāṃtirbhaviṣyati || 12 ||
[Analyze grammar]

kiṃ mayaitatsumūrkheṇa vāṃchitaṃ durlabhaṃ padam |
tatprabhāvena vibhraṣṭaḥ kuladharmo'pi me svakaḥ || 13 ||
[Analyze grammar]

kiṃ jalaṃ praviśāmyadya kiṃ vā dīptaṃ hutāśanam |
bhakṣayāmi viṣaṃ kiṃ vā kathaṃ syānmṛtyuradya me || 14 ||
[Analyze grammar]

anena vapuṣā dārānvīkṣayiṣyāmi tānkatham |
tādṛśena śarīreṇa yābhiḥ saṃkrīḍitaṃ mayā || 15 ||
[Analyze grammar]

kathaṃ putrāṃstathā pautrānsuhṛtsaṃbaṃdhibāṃdhavān |
vīkṣayiṣyāmi tānbhūyastathānyaṃ sevakaṃ janam || 16 ||
[Analyze grammar]

ye mayā nirjitāḥ sarve ripavaḥ saṃgare purā || 15 ||
[Analyze grammar]

te'dya māmīdṛśaṃ śrutvā harṣaṃ yāsyaṃti nirbhayāḥ || 17 ||
[Analyze grammar]

ye mayā tarpitā dānairbrāhmaṇā vedapāragāḥ |
te'dya māmīdṛśaṃ śrutvā saṃbhaviṣyaṃti duḥkhitāḥ || 18 ||
[Analyze grammar]

tathā ye suhṛdo'bhīṣṭā nityaṃ mama hite ratāḥ |
kāmavasthāṃ prayāsyanti dṛṣṭvā māṃ sthitamīdṛśam || 19 ||
[Analyze grammar]

bhadrajātyā gajā ye me madāndhāḥ ṣaṣṭihāyanāḥ |
mayā vinā mitho yuddhe kastānadya niyokṣyati || 20 ||
[Analyze grammar]

aśvāstittirakalmāṣāḥ sudāṃtāḥ sādibhirdṛḍhaiḥ |
kastāṃścitrapadanyāsairniyāmyati mayā vinā || 21 ||
[Analyze grammar]

tathā me bhṛtyavargāste kulīnā yuddhadurmadāḥ |
māṃ vinā kasya yāsyaṃti samīpe'dya suduḥkhitāḥ || 22 ||
[Analyze grammar]

saṃkhyāhīnastathā kośastādṛṅme bahuratnabhāk |
kasya yāsyati saṃbhogaṃ mayā hīnastu rakṣitaḥ || 23 ||
[Analyze grammar]

tathā me saṃkhyayā hīnaṃ dhānyaṃ gojāvikaṃ mahat |
bhaviṣyati kathaṃ hīnaṃ mayābhīṣṭaistu rakṣitam || 24 ||
[Analyze grammar]

evaṃ bahuvidhaṃ rājā sa vilapya ca duḥkhitaḥ |
jagāma nagarābhyāśaṃ padbhyāmeva śanaiḥśanaiḥ || 25 ||
[Analyze grammar]

tato rātrau samāsādya svaṃ puraṃ janavarjitam |
dvāre sthitvā samāhūya putraṃ maṃtribhiranvitam || 26 ||
[Analyze grammar]

kathayāmāsa vṛttāṃtaṃ sarvaṃ śāpasamudbhavam |
dūre sthitaḥ sa putrāṇāṃ vasiṣṭhasya mahātmanaḥ || 27 ||
[Analyze grammar]

vajrapātopamaṃ vākyaṃ te'pi tasya niśamya tat |
bāṣpaparyākulairāsyai ruruduḥ śokasaṃyutāḥ || 28 ||
[Analyze grammar]

hā nātha hā mahārāja hā nityaṃ dharmavatsala |
tvayā hīnā bhaviṣyāmaḥ kathamadya suduḥkhitāḥ || 29 ||
[Analyze grammar]

kimetadyujyate teṣāṃ vāsiṣṭhānāṃ durātmanām |
śāpaṃ daduḥ svayājyasya viśeṣādvinatasya ca || 30 ||
[Analyze grammar]

te vayaṃ rājaśārdūla parityajya gṛhādikam |
antyajatvaṃ gamiṣyāmastvayā sārdhamasaṃśayam || 31 ||
[Analyze grammar]

triśaṃkuruvāca |
bhaktiścedasti yuṣmākaṃ mamopari nirargala |
tanme putrasya maṃtritvaṃ sarve kuruta sāṃpratam || 32 ||
[Analyze grammar]

hariścaṃdraḥ suputroyaṃ mama jyeṣṭhaḥ suvallabhaḥ |
niyojayadhvamavyagrāḥ padavyāṃ mama satvaram || 33 ||
[Analyze grammar]

ahaṃ punaḥ kariṣyāmi yanme manasi saṃsthitam |
mṛtyuṃ vā saṃprayāsyāmi sadeho vā surālayam || 34 ||
[Analyze grammar]

evamuktvā parityajya sarvāṃstānsa mahīpatiḥ |
jagāmāraṇyamāśritya padbhyāmeva śanaiḥ śanaiḥ || 35 ||
[Analyze grammar]

tepi sanmaṃtriṇastūrṇaṃ putraṃ tasya susammatam |
rājye niyojayāsamāsurnādavāditraniḥsvanaiḥ || 36 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye triśaṃkūpākhyāne hariścandrarājyopalaṃbhonāma tṛtīyo'dhyāyaḥ || 3 ||
[Analyze grammar]