Chapter 41

[English text for this chapter is available]

skaṃda uvāca |
uṣitvaivaṃ gṛhe vipro dvitīyādāśramātparam |
valīpalitasaṃyuktastṛtīyāśramamāviśet || 1 ||
[Analyze grammar]

apatyāpatyamālokya grāmyāhārānvisṛjya ca |
patnīṃ putreṣu saṃtyajya patnyā vā vanamāviśet || 2 ||
[Analyze grammar]

vasānaścarmacīrāṇi sāgnirmunyannavartanaḥ |
jaṭī sāyaṃprage snāyī śmaśrulonakhalomabhṛt || 3 ||
[Analyze grammar]

śākamūlaphalairvāpi paṃcayajñanna hāpayet |
ammūlaphalabhikṣābhirarcayedbhikṣukātithīn || 4 ||
[Analyze grammar]

anādātā ca dātā ca dāṃtaḥ svādhyāyatatparaḥ |
vaitānikaṃ ca juhuyādagnihotraṃ yathāvidhi || 5 ||
[Analyze grammar]

munyannaiḥ svayamānītaiḥ puroḍāśāṃśca nirvapet |
svayaṃkṛtaṃ ca lavaṇaṃ khādetsnehaṃ phalodravam || 6 ||
[Analyze grammar]

varjayeccheluśigrū ca kavakaṃ palalaṃ madhu |
munyannamāśvinemāsi tyajedyatpūrvasaṃcitam || 7 ||
[Analyze grammar]

grāmyāṇi phalamūlāni phālajānnaṃ ca saṃtyajet |
daṃtolūkhalako vā syādaśmakuṭṭotha vā bhavet || 8 ||
[Analyze grammar]

sadyaḥ prakṣālako vā syādathavā māsasaṃcayī |
triṣaḍdvādaśamāsānnaphalamūlādisaṃgrahī || 9 ||
[Analyze grammar]

naktāśye kāṃtarāśī vā ṣaṣṭhakālāśanopi vā |
cāṃdrāyaṇavratī vā syātpakṣabhugvātha māsabhuk || 10 ||
[Analyze grammar]

vaikhānasa matasthastu phalamūlāśanopi vā |
tapasā śoṣayeddehaṃ pitṝndevāṃśca tarpayet || 11 ||
[Analyze grammar]

agnimātmani cādhāya vicaredaniketanaḥ |
bhikṣayetprāṇayātrārthaṃ tāpasānvanavāsinaḥ || 12 ||
[Analyze grammar]

grāmādānīya vāśnīyādaṣṭau grāsānvasanvane |
itthaṃ vanāśramī vipro brahmaloke mahīyate || 13 ||
[Analyze grammar]

ativāhyāyuṣobhāgaṃ tṛtīyamiti kānane |
āyuṣastu turīyāṃśe tyaktvā saṃgānparivrajet || 14 ||
[Analyze grammar]

ṛṇatrayamasaṃśodhya tvanutpādya sutānapi |
tathā yajñānaniṣṭvā ca mokṣamicchanvrajatyadhaḥ || 15 ||
[Analyze grammar]

manāgapi na bhūtānāṃ yasmādutpadyate bhayam |
sarvabhūtāni tasyeha prayacchaṃtyabhayaṃ sadā || 15 ||
[Analyze grammar]

eka eva carennityamanagniraniketanaḥ |
siddhyarthamasahāyaḥ syādgrāmamannārthamāśrayet || 17 ||
[Analyze grammar]

jīvitaṃ maraṇaṃ vātha nābhikāṃkṣetkvacidyatiḥ |
kālameva pratīkṣeta nirdeśaṃ bhṛtako yathā || 18 ||
[Analyze grammar]

sarvatra mamatā śūnyaḥ sarvatra samatāyutaḥ |
vṛkṣamūlaniketaśca mumukṣuriha śasyate || 19 ||
[Analyze grammar]

dhyānaṃ śaucaṃ tathā bhikṣā nityamekāṃtaśīlatā |
yateścatvārikarmāṇi paṃcamaṃ nopapadyate || 20 ||
[Analyze grammar]

vārṣikāṃścaturomāsānviharenna yatiḥ kvacit |
bījāṃkurāṇāṃ jaṃtūnāṃ hiṃsā tatra yato bhavet || 21 ||
[Analyze grammar]

gacchetpariharanjantūnpibetkaṃ vastraśodhitam |
vācaṃ vadedanudvegāṃ na krudhyetkenacitkvacit || 22 ||
[Analyze grammar]

caredātmasahāyaśca nirapekṣo nirāśrayaḥ |
nityamadhyātmanirato nīcakeśa nakho vaśī || 23 ||
[Analyze grammar]

kusuṃbhavāsā daṃḍāḍhyo bhikṣāśī khyātivarjitaḥ |
alābudārumṛdveṇu pātraṃ śastaṃ na paṃcamam || 24 ||
[Analyze grammar]

na grāhyaṃ taijasaṃ pātraṃ bhikṣukeṇa kadācana |
varāṭake saṃgṛhīte tatratatra dinedine || 25 ||
[Analyze grammar]

gosahasravadhaṃ pāpaṃ śrutireṣā sanātanī |
hṛdi sasneha bhāvena ceddrakṣetstriyamekadā || 26 ||
[Analyze grammar]

koṭidvayaṃ brahmakalpaṃ kuṃbhīpākī na saṃśayaḥ |
ekakālaṃ caredbhaikṣaṃ na kuryāttatra vistaram || 27 ||
[Analyze grammar]

vidhūmesanna musale vyaṃgāre bhuktavajjane |
vṛtte śarāvasaṃpāte bhikṣāṃ nityaṃ caredyatiḥ || 28 ||
[Analyze grammar]

alpāhāro rahaḥsthāyī ttviṃdriyārtheṣvalolupaḥ |
rāgadveṣavirnirmukto bhikṣurmokṣāya kalpate || 29 ||
[Analyze grammar]

āśrame tu yatiryasya muhūrtamapi viśramet |
kiṃ tasyānekataṃtreṇa kṛtakṛtyaḥ sa jāyate || 30 ||
[Analyze grammar]

saṃcitaṃ yadgrahasthena pāpamāmaraṇāṃtikam |
nirdhakṣyati hi tatsarvamekarātroṣito yatiḥ || 31 ||
[Analyze grammar]

dṛṣṭvā jarābhibhavanamasahyaṃ rogapīḍitam |
dehatyāgaṃ punargarbhaṃ garbhakleśaṃ ca dāruṇam || 32 ||
[Analyze grammar]

nānāyoni nivāsaṃ ca viyogaṃ ca priyaiḥ saha |
apriyaiḥ saha saṃyogamadharmādduḥkhasaṃbhavam || 33 ||
[Analyze grammar]

punarnirayasaṃvāsaṃnānānarakayātanāḥ |
karmadoṣasamudbhūtā nṛṇāṃgatiranekadhā || 34 ||
[Analyze grammar]

deheṣvanityatāṃ dṛṣṭvā nityatā paramātmanaḥ |
kurvīta muktaye yatnaṃ yatrayatrāśrame rataḥ || 35 ||
[Analyze grammar]

karapātrīti vikhyātā bhikṣāpātravivarjitā |
teṣāṃ śataguṇaṃ puṇyaṃ bhavatyeva dinedine || 36 ||
[Analyze grammar]

āśramāṃścaturastvevaṃ kramādāsevya paṃḍitaḥ |
nirdvaṃdvastyaktasaṃgaśca brahmabhūyāya kalpate || 37 ||
[Analyze grammar]

asaṃyataḥ kubuddhīnāmātmā baṃdhāya kalpate |
dhīmadbhiḥ saṃyataḥ sopi padaṃ dadyādanāmayam || 38 ||
[Analyze grammar]

śruti smṛti purāṇaṃ ca vidyopaniṣadastathā |
ślokāḥ maṃtrāṇi bhāṣyāṇi yaccānyadvāṅmayaṃ kvacit || 39 ||
[Analyze grammar]

vedānuvacanaṃ jñātvā brahmacarya tapo damaḥ |
śraddhopavāsaḥ svātaṃtryamātmanojñānahetavaḥ || 40 ||
[Analyze grammar]

sa hi sarvairvijijñāsya ātmaivāśramavartibhiḥ |
śrotavyastvatha maṃtavyo draṣṭavyaśca prayatnataḥ || 41 ||
[Analyze grammar]

ātmajñānena muktiḥ syāttacca yogādṛte nahi |
sa ca yogaściraṃ kālamabhyāsādeva sidhyati || 42 ||
[Analyze grammar]

nāraṇyasaṃśrayādyogo na nānāgraṃtha ciṃtanāt |
na dānairna vratairvāpi na tapobhirna vā makhaiḥ || 43 ||
[Analyze grammar]

na ca padmāsanādyogo na vā ghrāṇāgravīkṣaṇāt |
na śauce na na maunena na maṃtrārādhanairapi || 44 ||
[Analyze grammar]

abhiyogātsadābhyāsāttatraiva ca viniścayāt |
punaḥpunaranirvedātsidhyedyogo na cānyathā || 45 ||
[Analyze grammar]

ātmakrīḍasya satataṃ sadātmamithunasya ca |
ātmanyeva su tṛptasya yogasiddhirna dūrataḥ || 46 ||
[Analyze grammar]

atrātmavyatirekeṇa dvitīyaṃ yo na paśyati |
ātmārāmaḥ sa yogīṃdro brahmībhūto bhavediha || 47 ||
[Analyze grammar]

saṃyogastvātmamanasoryoga ityucyate budhaiḥ |
prāṇāpānasamāyogo yoga ityapi kaiścana || 48 ||
[Analyze grammar]

viṣayeṃdriya saṃyogo yoga ityapyapaṃḍitaiḥ |
viṣayāsaktacittānāṃ jñānaṃ mokṣaśca dūrataḥ || 49 ||
[Analyze grammar]

durnivārā manovṛttiryāvatsā na nivartate |
kiṃ vadaṃtyapiyogasya tāvannedīyasī kutaḥ || 50 ||
[Analyze grammar]

vṛttihīnaṃ manaḥ kṛtvā kṣetrajñe paramātmani |
ekīkṛtya vimucyeta yogayuktaḥ sa ucyate || 51 ||
[Analyze grammar]

bahirmukhāni sarvāṇi kṛtvā khānyaṃtarāṇi vai |
manasyeveṃdriyagrāmaṃ manaścātmani yojayet || 52 ||
[Analyze grammar]

sarvabhāvavinirmuktaṃ kṣetrajñaṃ brahmaṇi nyaset |
etaddhyānaṃ ca yogaśca śeṣonyo graṃthavistaraḥ || 53 ||
[Analyze grammar]

yannāsti sarvalokeṣu tadastīti virudhyate |
kathyamānaṃ tadanyasya hṛdayenāvatiṣṭhate || 54 ||
[Analyze grammar]

svasaṃvedyaṃ hi tadbrahma kumārī strī sukhaṃ yathā |
ayogī naiva tadvetti jātyaṃdha iva vartikām || 55 ||
[Analyze grammar]

nityābhyasanaśīlasya svasaṃvedyaṃ hi tadbhavet |
tatsūkṣmatvādanirdeśyaṃ paraṃ brahma sanātanam || 56 ||
[Analyze grammar]

kṣaṇamapyekamudakaṃ yathā na sthiratāmiyāt |
vātāhataṃ yathā cittaṃ tasmāttasya na viśvaset || 57 ||
[Analyze grammar]

ato'nilaṃ niruṃdhīta cittasya sthairya hetave |
marunnirodhanārthāya ṣaḍaṃgaṃ yogamabhyaset || 58 ||
[Analyze grammar]

āsanaṃ prāṇasaṃrodhaḥ pratyāhāraśca dhāraṇā |
dhyānaṃ samādhiretāni yogāṃgāni bhavaṃti ṣaṭ || 59 ||
[Analyze grammar]

āsanānīha tāvaṃti yāvaṃtyo jīvayo nayaḥ |
siddhāsanamidaṃ proktaṃ yogino yogasiddhidam || 60 ||
[Analyze grammar]

etadabhyasanānnityaṃ varṣmadārḍhyamavāpnuyāt || 61 ||
[Analyze grammar]

dakṣiṇaṃ caraṇaṃ nyasya vāmorūpari yogavit |
yāmyorūpari vāmaṃ ca padmāsanamidaṃ viduḥ || 62 ||
[Analyze grammar]

karābhyāṃ dhārayetpaścādaṃguṣṭhau dṛḍhabaṃdhavit |
bhavetpadmāsanādasmādabhyāsāddṛḍhavigrahaḥ || 63 ||
[Analyze grammar]

athavā hyāsane yasminsukhamasyopajāyate |
svastikādau tadadhyāsya yogaṃ yuṃjīta yogavit || 64 ||
[Analyze grammar]

na toyavahnisāmīpye na jīrṇāraṇyagoṣṭhayoḥ |
na daṃśamaśakākīrṇe na caitye na ca catvare || 69 ||
[Analyze grammar]

keśabhasmatuṣāṃgāra kīkasādi pradūṣite |
nābhyasetpūtigaṃdhādau na sthāne janasaṃkule || 66 ||
[Analyze grammar]

sarvabādhāvirahite sarveṃdriyasukhāvahe |
manaḥprasādajanane sragdhūpāmodamodite || 67 ||
[Analyze grammar]

nātitṛptaḥ kṣudhārto na na viṇmūtraprabādhitaḥ |
nādhvakhinno na ciṃtārto yogaṃ yuṃjīta yogavit || 68 ||
[Analyze grammar]

ūrusthottānacaraṇaḥ savyenyasyottaraṃ karam |
uttānaṃ kiṃcidunnamya vaktraṃ viṣṭabhya corasā || 69 ||
[Analyze grammar]

nimīlitākṣaḥ sattvastho daṃtairdaṃtānna saṃspṛśet |
tālusthācalajihvaśca saṃvṛtāsyaḥ suniścalaḥ || 70 ||
[Analyze grammar]

sanniyamyeṃdriyagrāmaṃ nātinīcocchritāsanaḥ |
madhyamaṃ cottamaṃ cātha prāṇāyāmamupakramet || 71 ||
[Analyze grammar]

cale'nile calaṃ sarvaṃ niścale tatra niścalam |
sthāṇutvamāpnuyādyogī tato'nilaniruṃdhanāt || 72 ||
[Analyze grammar]

yāvaddehe sthitaḥ prāṇo jīvitaṃ tāvaducyate |
nirgate tatra maraṇaṃ tataḥ prāṇaṃ niruṃdhayet || 73 ||
[Analyze grammar]

yāvadbaddho maruddehe yāvacceto nirāśrayam |
yāvaddṛṣṭirbhuvormadhye tāvatkālabhayaṃ kutaḥ || 74 ||
[Analyze grammar]

kālasādhvasatobrahmā prāṇāyāmaṃ sadācaret |
yoginaḥ siddhimāpannāḥ samyakprāṇaniyaṃtraṇāt || 75 ||
[Analyze grammar]

maṃdo dvādaśamātrastu mātrā laghvakṣarā matā |
madhyamo dviguṇaḥ pūrvāduttamastriguṇastataḥ || 76 ||
[Analyze grammar]

svedaṃ kaṃpaṃ viṣādaṃ ca janayetkramaśastvasau |
prathamena jayetsvedaṃ dvitīyena tu vepathum || 77 ||
[Analyze grammar]

viṣādaṃ hi tṛtīyena siddhaḥ prāṇotha yoginaḥ |
bhavetkramātsanniruddhaḥ siddhaḥ prāṇotha yoginā |
krameṇa sevyamānosau nayate yatra cecchati || 78 ||
[Analyze grammar]

haṭhānniruddhaprāṇoyaṃ romakūpeṣu niḥsaret |
dehaṃvidārayatyeṣa kuṣṭhādijanayatyapi || 79 ||
[Analyze grammar]

tatpratyāyayitavyosau krameṇāraṇyahastivat |
vanyo gajo gajārirvā krameṇa mṛdutāmiyāt || 80 ||
[Analyze grammar]

karoti śāstṛnirdeśaṃ na ca taṃ parilaṃghayet |
tathā prāṇo hadisthoyaṃ yoginākramayogataḥ |
gṛhītaḥ sevyamānastu viśraṃbhamupagacchati || 81 ||
[Analyze grammar]

ṣaṭtriṃśadaṃgulo haṃsaḥ prayāṇaṃ kurute bahiḥ |
savyāpasavyamārgeṇa prayāṇātprāṇa ucyate || 82 ||
[Analyze grammar]

śuddhimeti yadā sarvaṃ nāḍīcakra manākulam |
tadaiva jāyate yogī kṣamaḥ prāṇanirodhane || 83 ||
[Analyze grammar]

dṛḍhāsano yathāśakti prāṇaṃ caṃdreṇa pūrayet |
recayedatha sūryeṇa prāṇāyāmoyamucyate || 84 ||
[Analyze grammar]

sravatpīyūṣadhāraughaṃ dhyāyaṃścaṃdrasamanvitam |
prāṇāyāmena yogīṃdraḥ sukhamāpnoti tatkṣaṇāt || 85 ||
[Analyze grammar]

raviṇā prāṇamākṛṣya pūrayedaudarīṃ darīm |
kuṃbhayitvā śanaiḥ paścādyogī caṃdreṇa recayet || 86 ||
[Analyze grammar]

jvalajvalanapuṃjābhaṃ śīlayannuṣmaguṃ hṛdi |
anena yāmyāyāmena yogīṃdraḥ śarmabhāgbhavet || 87 ||
[Analyze grammar]

itthaṃ māsatrayābhyāsādubhayāyāmasevanāt |
śuddhanāḍīgaṇo yogī siddhaprāṇobhidhīyate || 88 ||
[Analyze grammar]

yatheṣṭaṃ dhāraṇaṃ vāyoranalasya pradīpanam |
nādābhivyaktirārogyaṃ bhavennāḍīviśodhanāt || 89 ||
[Analyze grammar]

prāṇodehagatovāyurāyāmastannibaṃdhanam |
ekaśvāsamayī mātrā prāṇāyāmo nirucyate || 90 ||
[Analyze grammar]

prāṇāyāme'dhame gharmaḥ kaṃpo bhavati madhyame |
uttiṣṭheduttame deho baddhapadmāsano muhuḥ || 91 ||
[Analyze grammar]

prāṇāyāmairdaheddoṣānpratyāhāreṇa pātakam |
manodhairyaṃ dhāraṇayā dhyāneneśvaradarśanam || 92 ||
[Analyze grammar]

samādhinā labhenmokṣaṃ tyaktvā dharmaṃ śubhāśubham |
āsanena vapurdārḍhyaṃ ṣaḍaṃgamiti kīrtitam || 93 ||
[Analyze grammar]

prāṇāyāmadviṣaṭkena pratyāhāra udāhṛtaḥ |
pratyāhārairdvādaśabhirdhāraṇā parikīrtitā || 94 ||
[Analyze grammar]

bhavedīśvarasaṃgatyai dhyānaṃ dvādaśadhāraṇam |
dhyānadvādaśakenaiva samādhirabhidhīyate || 95 ||
[Analyze grammar]

samādheḥ parato jyotiranaṃtaṃ svaprakāśakam |
tasmindṛṣṭe kriyākāṃḍaṃ yātāyātaṃ nivartate || 96 ||
[Analyze grammar]

pavane vyomasaṃprāpte dhvanirutpadyate mahān |
ghaṃṭādīnāṃ pravādyānāṃ tataḥ siddhiradūrataḥ || 97 ||
[Analyze grammar]

prāṇāyāmena yuktena sarvavyādhikṣayobhavet |
ayuktābhyāsayogena sarvavyādhisamudbhavaḥ || 98 ||
[Analyze grammar]

hikkā śvāsaśca kāsaśca śiraḥ karṇākṣivedanāḥ ||
bhavaṃti vividhā doṣāḥ pavanasya vyatikramāt || 99 ||
[Analyze grammar]

yuktaṃ yuktaṃ tyajedvāyuṃ yuktaṃyuktaṃ ca pūrayet |
yuktaṃyuktaṃ ca badhnīyāditthaṃ sidhyati yogavit || 100 ||
[Analyze grammar]

iṃdriyāṇāṃ hi caratāṃ viṣayeṣu yadṛcchayā |
yatpratyāharaṇaṃ yuktyā pratyāhāraḥ sa ucyate || 1 ||
[Analyze grammar]

pratyāharati yaḥ khāni kūrmoṃgānīva sarvataḥ |
pratyāhṛti vidhānena sa syādvigatakalmaṣaḥ || 2 ||
[Analyze grammar]

nābhideśe vasedbhānustāludeśe ca caṃdramāḥ |
varṣatyadhomukhaścaṃdro grasedūrdhvamukho raviḥ || 3 ||
[Analyze grammar]

karaṇaṃ tacca kartavyaṃ yena sā prāpyate sudhā |
ūrdhvanābhiradhastālurūrdhvaṃ bhānuradhaḥśaśī |
karaṇaṃ viparītākhyamabhyāsādeva jāyate || 4 ||
[Analyze grammar]

kākacaṃcuvadāsyena śītalaṃ śītalaṃ pibet |
prāṇaṃ prāṇavidhānajño yogī bhavati nirjaraḥ || 5 ||
[Analyze grammar]

rasanāṃ tāluvivare nidhāyordhvamukho'mṛtam |
dhayannijarratāṃ gacchedāṣaṇmāsānna saṃśayaḥ || 6 ||
[Analyze grammar]

ūrdhvajihvaḥ sthiro bhūtvā somapānaṃ karoti yaḥ |
māsārdhena na saṃdeho mṛtyuṃ jayati yogavit || 7 ||
[Analyze grammar]

saṃpīḍya rasanāgreṇa rājadaṃtabilaṃ mahat |
dhyātvā sudhāmayīṃ devīṃ ṣaṇmāsena kavirbhavet || 8 ||
[Analyze grammar]

amṛtāpūrṇadehasya yogino dvitrivatsarāt |
ūrdhvaṃ pravartate reto hyaṇimādiguṇodayam || 9 ||
[Analyze grammar]

nityaṃ somakalāpūrṇaṃ śarīraṃ yasya yoginaḥ |
takṣakeṇāpi daṣṭasya viṣaṃ tasya na sarpati || 110 ||
[Analyze grammar]

āsanena samāyuktaḥ prāṇāyāmena saṃyutaḥ |
pratyāhāreṇa saṃpanno dhāraṇāmatha cābhyaset || 11 ||
[Analyze grammar]

hṛdaye paṃcabhūtānāṃ dhāraṇāṃ yaḥ pṛthakpṛthak |
manaso niścalatvena dhāraṇā sābhidhīyate || 12 ||
[Analyze grammar]

haritālanibhāṃ bhūmiṃ sa lakārāṃ savedhasam |
catuṣkoṇāṃ hṛdi dhyāyedeṣā syātkṣitidhāraṇā || 13 ||
[Analyze grammar]

kaṃṭheṃ'butattvamardheṃdunibhaṃ viṣṇusamanvitam |
vakārabījaṃ kuṃdābhaṃ dhyāyannaṃbujayediti || 14 ||
[Analyze grammar]

tālusthamiṃdragopābhaṃ trikoṇaṃ rephasaṃyutam |
rudreṇādhiṣṭhitaṃ tejo dhyātvā vahniṃ jayediti || 15 ||
[Analyze grammar]

vāyutattvaṃ bhruvormadhye vṛttamaṃjanasannibham |
yaṃbījamīśadaivatyaṃ dhyāyanvāyuṃ jayediti || 16 ||
[Analyze grammar]

ākāśaṃ ca marīcivārisadṛśaṃ yadbrahmaraṃdhrasthitaṃ yannāthena sadāśivena sahitaṃ śāṃtaṃ hakārākṣaram |
prāṇaṃ tatra vinīya paṃcaghaṭikaṃ ciṃtānvitaṃ dhārayedeṣā mokṣakapāṭapāṭanapaṭuḥ proktā nabhodhāraṇā || 17 ||
[Analyze grammar]

staṃbhanīplāvanīcaiva dahanībhrāmaṇī tathā |
śamanī ca bhavaṃtyetā bhūtānāṃ paṃca dhāraṇāḥ || 18 ||
[Analyze grammar]

dhyai ciṃtāyāṃ smṛto dhātuściṃtā tattve suniścalā |
etaddhyānamiha proktaṃ saguṇaṃ nirguṇaṃ dvidhā || 19 ||
[Analyze grammar]

saguṇaṃ vaṇarbhedena nirguṇaṃ kevalaṃ matam |
samaṃtraṃ saguṇaṃ viddhi nirguṇaṃ maṃtravarjitam || 120 ||
[Analyze grammar]

aṃtaśceto bahiścakṣuravasthāpya sukhāsanam |
samatvaṃ ca śarīrasya dhyānamudrātisiddhidā || 21 ||
[Analyze grammar]

nāśvamedhena tatpuṇyaṃ na ca vai rājasūyataḥ |
yatpuṇyamekadhyānena labhedyogī sthirāsanaḥ || 22 ||
[Analyze grammar]

śabdādīnāṃ ca tanmātrā yāvatkarṇādiṣu sthitā |
tāvadeva smṛtaṃ dhyānaṃ syātsamādhirataḥ param || 23 ||
[Analyze grammar]

dhāraṇā paṃcanāḍīkā dhyānaṃ syātṣaṣṭināḍikam |
dinadvāśakena syātsamādhiriha bhaṇyate || 24 ||
[Analyze grammar]

jalasaiṃdhavayoḥ sāmyaṃ yathā bhavati yogataḥ |
tathātmamanasoraikyaṃ samādhiriha bhaṇyate || 25 ||
[Analyze grammar]

yadā saṃkṣīyate prāṇo mānasaṃ ca pralīyate |
tadā samarasatvaṃ yatsa samādhirihocyate || 26 ||
[Analyze grammar]

yatsamatvaṃ dvayoratra jīvātmaparamātmanoḥ |
sanaṣṭasarvasaṃkalpaḥ samādhirabhidhīyate || 27 ||
[Analyze grammar]

nātmānaṃ na paraṃ vetti na śītaṃ noṣmameva ca |
samādhiyukto yogīṃdro na sukhaṃ na sukhetarat || 28 ||
[Analyze grammar]

kālyate naiva kālena lipyate naiva karmaṇā |
bhidyate na ca śastrāstrai yogī yuktaḥ samādhinā || 29 ||
[Analyze grammar]

yuktāhāravihāraśca yuktaceṣṭo hi karmasu |
yuktanidrāvabodhaśca yogī tattvaṃ prapaśyati || 130 ||
[Analyze grammar]

tattvavijñānamānaṃdaṃ brahma brahmavido viduḥ |
hetudṛṣṭāṃta rahitaṃ vāṅmanobhyāmagocaram || 31 ||
[Analyze grammar]

tatra yogī nirālaṃbe nirātaṃke nirāmaye |
ṣaḍaṃgayogavidhinā parebrahmaṇi līyate || 32 ||
[Analyze grammar]

yathā ghṛte ghṛtaṃ kṣiptaṃ ghṛtameva hi tadbhavet |
kṣīrekṣīraṃ tathā yogī tatra tanmayatāṃ vrajet || 33 ||
[Analyze grammar]

anasaṃjātapānīyairvidadhyādaṃgamardanam |
tyajetkaduṣṇaṃ lavaṇaṃ kṣīrabhojī sadā bhavet || 34 ||
[Analyze grammar]

brahmacārī jitakrodho jitalobho vimatsaraḥ |
abdamitthaṃ sadābhyāsātsa yogīti nigadyate || 35 ||
[Analyze grammar]

mahāmudrāṃ nabhomudrāmuḍḍīyānaṃ jalaṃdharam |
mūlabaṃdhaṃ tu yo vetti sa yogī yogasiddhibhāk || 36 ||
[Analyze grammar]

śodhanaṃ nāḍījālasya ghaṭanaṃ caṃdrasūryayoḥ |
rasānāṃ śoṣaṇaṃ samyaṅmahāmudrābhidhīyate || 37 ||
[Analyze grammar]

yoniṃ vāmāṃghriṇā'pīḍya kṛtvā vakṣasthale hanum |
hastābhyāṃ prasṛtaṃ pādaṃ dhārayeddakṣiṇaṃ ciram || 38 ||
[Analyze grammar]

prāṇena kukṣimāpūrya ciraṃ saṃrecayecchanaiḥ |
eṣā proktā mahāmudrā mahāghaughavināśinī || 39 ||
[Analyze grammar]

caṃdrāṃge tu samabhyasya sūryāṃge punarabhyaset |
yāvattulyā bhavetsaṃkhyā tato mudrāṃ visarjayet || 140 ||
[Analyze grammar]

na hi pathyamapathyaṃ vā rasāḥ sarvepi nīrasāḥ |
api ghoraṃ viṣaṃ pītaṃ pīyūṣamivajīryati || 41 ||
[Analyze grammar]

kṣayakuṣṭhagudāvarta gulmājīrṇapurogamāḥ |
tasya doṣāḥ kṣayaṃ yāṃti mahāmudrāṃ ca yobhyaset || 42 ||
[Analyze grammar]

kapālakuhare jihvā praviṣṭā viparītagā |
bhruvoraṃtargatā dṛṣṭirmudrā bhavati khecarī || 43 ||
[Analyze grammar]

na pīḍyate śaraugheṇa na ca lipyeta karmaṇā |
bādhyate na sa kālena yo mudrāṃ vetti khecarīm || 44 ||
[Analyze grammar]

cittaṃ carati khe yasmā jihvā carati khe gatā |
tenaiṣā khecarī nāma mudrā siddhairniṣevitā || 45 ||
[Analyze grammar]

yāvadbiṃduḥ sthito dehe tāvanmutyubhayaṃ kutaḥ |
yāvadbaddhā nabhomudrā tāvadbiṃdurna gacchati || 46 ||
[Analyze grammar]

uḍḍīnaṃ kurute yasmādahorātraṃ mahākhagaḥ |
uḍīyānaṃ tataḥ proktaṃ tatra baṃdho vidhīyate || 47 ||
[Analyze grammar]

jaṭhare paścimaṃ tānaṃ nābherūrdhvaṃ ca dhārayet |
uṅḍīyāno hyayaṃ baṃdho mṛtyorapi bhayaṃ tyajet || 48 ||
[Analyze grammar]

badhnāti hi śirājālamadhogāmi nabhojalam |
eṣa jālaṃdharo baṃdhaḥ kaṃṭhe duḥkhaughanāśanaḥ || 49 ||
[Analyze grammar]

jālaṃdhare kṛte baṃdhe kaṃṭhasakocalakṣaṇe |
na pīyūṣaṃ patatyagnau na ca vāyuḥ pradhāvati || 150 ||
[Analyze grammar]

pārṣṇibhāgena saṃpīḍya yonimākuṃcayedgudam |
apānamūrdhvamākṛṣya mūlabaṃdho vidhīyate || 51 ||
[Analyze grammar]

apānaprāṇayoraikye kṣayo mūtrapurīṣayoḥ |
yuvā bhavati vṛddhopi satataṃ mūlabaṃdhanāt || 52 ||
[Analyze grammar]

prāṇāpānavaśo jīvaḥ ūrddhvādhaḥ paridhāvati |
vāmadakṣiṇamārgeṇa caṃcalo na sthitiṃ labhet || 53 ||
[Analyze grammar]

guṇabaddho yathā pakṣī gatopyākṛṣyate punaḥ |
guṇairbaddhastathā jīvaḥ prāṇāyāmena kṛṣyate || 54 ||
[Analyze grammar]

apānaḥ karṣati prāṇaṃ prāṇopānaṃ ca karṣati |
ūrdhvādhaḥ saṃsthitāvetau saṃyojayati yogavit || 55 ||
[Analyze grammar]

hakāreṇa bahiryāti sakāreṇa viśetpunaḥ |
haṃsahaṃsetyato maṃtraṃ jīvo japati sarvadā || 56 ||
[Analyze grammar]

ṣaṭśatāni divārātrau sahasrāṇyekaviṃśatiḥ |
etatsaṃkhyānvitaṃ maṃtraṃ jīvo japati sarvadā || 57 ||
[Analyze grammar]

ajapā nāma gāyatrī yogināṃ mokṣadāyinī |
asyāḥ saṃkalpamātreṇa naraḥ pāpaiḥ pramucyate || 58 ||
[Analyze grammar]

aṃtarāyā bhavaṃtīha yogino yogahānidāḥ |
śrūyate dūragā vārtā dūrasthaṃ dṛśyate puraḥ || 59 ||
[Analyze grammar]

yojanānāṃ śataṃ yātuṃ śaktiḥsyānnimiṣārdhataḥ |
aciṃtitāni śāstrāṇi kaṃṭhapāṭhī bhavaṃti hi || 160 ||
[Analyze grammar]

dhāraṇāśa ktiratyugrā mahābhāro laghurbhavet |
kṣaṇaṃ kṛśaḥ kṣaṇaṃ sthūlaḥ kṣaṇamalpaḥ kṣaṇaṃ mahān || 61 ||
[Analyze grammar]

parakāyaṃ praviśati tiraścāṃ vetti bhāṣitam |
divyagaṃdhaṃ tanau dhatte divyāṃ vāṇīṃ pravakti ca || 62 ||
[Analyze grammar]

prārthyate divyakanyābhirdivyaṃ dhārayate vapuḥ |
ityādayoṃtarāyāḥ syuryogasaṃsiddhisūcakāḥ || 63 ||
[Analyze grammar]

yadyebhiraṃtarāyairna kṣipyate'syeha mānasam |
tadagre tatsamāpnoti padaṃ brahmādi durlabham || 64 ||
[Analyze grammar]

yatprāpya na nivarteta yatprāpya na ca śocati |
tallabhyate ṣaḍaṃgena yogena kalaśodbhava || 65 ||
[Analyze grammar]

ekena janmanā yogaḥ kathamitthaṃ prasidhyati |
ṛte ca yogasaṃsiddheḥ kathaṃ muktirihāpyate || 66 ||
[Analyze grammar]

ubhe eva hi nirvāṇavartmanī kila kuṃbhaja |
kiṃ vā kāśyāṃ tanutyāgaḥ kiṃ vā yogoyamīdṛśaḥ || 67 ||
[Analyze grammar]

caṃcaleṃdriyavṛttitvātkalikalmaṣajṛṃbhaṇāt |
alpāyuṣāṃ tathā nṛṇāṃ kveha yoga mahodayaḥ || 68 ||
[Analyze grammar]

ataeva hi jaṃtūnāṃ mahodayapadapradaḥ |
sadaiva sa dayāvārdhiḥ kāśyāṃ viśveśvaraḥ sthitaḥ || 69 ||
[Analyze grammar]

kāśyāṃ sukhena kaivalyaṃ yathālabhyeta jaṃtubhiḥ |
yogayuktyādyupāyaiśca na tathānyatra kutracit || 170 ||
[Analyze grammar]

kāśyāṃ svadehasaṃyogaḥ samyagyoga udāhṛtaḥ |
mucyate neha yogena kṣipramanyena kenacit || 71 ||
[Analyze grammar]

viśveśvaro viśālākṣī dyunadīkālabhairavaḥ |
śrīmānḍhuṃḍhirdaṃḍapāṇiḥ ṣaḍaṃgo yoga eṣa vai || 72 ||
[Analyze grammar]

etatṣaḍaṃgayo yogaṃ nityaṃ kāśyāṃ niṣevate |
saṃprāpya yoganidrāṃ sa dīrghāmamṛtamaśnute || 73 ||
[Analyze grammar]

oṃkāraḥ kṛttivāsāśca kedāraśca triviṣṭapaḥ |
vīreśvarothaviśveśaḥ ṣaḍaṃgoyamihāparaḥ || 74 ||
[Analyze grammar]

pādodakāsisaṃbheda jñānodamaṇikarṇikāḥ |
ṣaḍaṃgoyaṃ mahāyogo brahmadharmahradāvapi || 75 ||
[Analyze grammar]

ṣaḍaṃgasevanādasmādvārāṇasyāṃ narottama |
na jātu jāyate jaṃturjananī jaṭhare punaḥ || 76 ||
[Analyze grammar]

gaṃgāsnānaṃ mahāmudrā mahāpātakanāśanī |
etanmudrākṛtābhyāsopyamṛtatvamavāpnuyāt || 77 ||
[Analyze grammar]

kāśīvīthiṣu saṃcāro mudrā bhavati khecarī |
khecaro jāyate nūnaṃ khecaryā mudrayānayā || 78 ||
[Analyze grammar]

uḍḍīya sarvato deśādyānaṃ vārāṇasīṃ prati |
uṅḍīyāno mahābaṃdha eṣa muktyai prakalpate || 79 ||
[Analyze grammar]

jalasya dhāraṇaṃ mūrdhni viśveśa snānajanmanaḥ |
eṣa jālaṃdharo baṃdhaḥ samastasuradurlabhaḥ || 180 ||
[Analyze grammar]

vṛto vighnaśatenāpi yanna kāśīṃ tyajetsudhīḥ |
mūlabaṃdhaḥ smṛto hyeṣa duḥkhamūlanikṛṃtanaḥ || 81 ||
[Analyze grammar]

iti yogaḥ samākhyāto mayā te dvividho mune |
saṣaḍaṃgaḥ samudraśca muktaye śaṃbhubhāṣitaḥ || 82 ||
[Analyze grammar]

yāvanneṃdriya vaiklavyaṃ yāvadvyādhirna bādhate |
yāvatkālavilaṃbosti tāvadyogarato bhavet || 83 ||
[Analyze grammar]

ubhayoryogayormadhye kāśīyogoyamuttamaḥ |
kāśīyogaṃ samabhyasya prāpnuyādyogamuttamam || 84 ||
[Analyze grammar]

ādhivyādhisahāyinyā jarayā mṛtyuliṃgayā |
kālaṃ nikaṭato jñātvā kāśīnāthaṃ samāśrayeta || 85 ||
[Analyze grammar]

kāśīnāthaṃ samāśritya kutaḥ kālabhayaṃ nṛṇām |
kruddhopi jīvahṛtkālastacca kāśyāṃ sumaṃgalam || 86 ||
[Analyze grammar]

ātithyenehasiyathā pratīkṣetātithiṃ kṛtī |
kāśyāṃ kālaṃ tathāyāṃtaṃ bhāgyavānsaṃpratīkṣate || 87 ||
[Analyze grammar]

kaliḥ kālaḥ kṛtaṃkarma trikaṃṭakamitīritam |
etattrayaṃ na prabhavedānaṃdavanavāsinām || 88 ||
[Analyze grammar]

anyatrātarkitaḥ kālaḥ kalayiṣyatyasaṃśayam |
kālādabhayamiccheccettataḥ kāśīṃ samāśrayet || 89 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe yogākhyānaṃ nāmaikacatvāriṃśo'dhyāyaḥ || 41 ||
[Analyze grammar]