Chapter 29

[English text for this chapter is available]

sūta uvāca |
ataḥ paraṃ śṛṇudhvaṃ hi lohāsuraviceṣṭitam |
baleḥ putraśatasyāpi kathayiṣyāmi viśrutam || 1 ||
[Analyze grammar]

yathā tau bhrātarau vṛddhau prāpatuḥ sthānamuttamam |
tadā prabhṛti vairāgyaṃ daityo lohāsure dadhau || 2 ||
[Analyze grammar]

kiṃ karomi kva gacchāmi tapase sthānamuttamam |
yasya pāraṃ na jānaṃti devatā munayo narāḥ || 3 ||
[Analyze grammar]

ko mayā'rādhyatāṃ devo hṛdi ciṃtayate bhṛśam |
iti ciṃtayatastasya matirjātā mahātmanaḥ || 4 ||
[Analyze grammar]

dadhau gaṃgāṃ svaśīrṣeṇa puṣpavaṃtau ca netrayoḥ |
hṛdā nārāyaṇaṃ devaṃ brahmāṇaṃ kaṭimaṃḍale || 5 ||
[Analyze grammar]

iṃdrādyā devatāḥ sarve yaddehe pratibiṃbitāḥ |
prapaśyaṃti tadātmānaṃ bhāskaraḥ salile yathā || 6 ||
[Analyze grammar]

tamevārādhayiṣyāmi niraṃjanamakalmaṣaḥ |
evaṃ kṛtvā matiṃ daitya stapastepe suduṣkaram |
bhīto janmabhayādghorādduṣkaraṃ yanmahātmabhiḥ || 7 ||
[Analyze grammar]

aṃbubhakṣo vāyubhakṣaḥ śīrṇaparṇāśanastathā |
divyaṃ varṣaśataṃ sāgraṃ yadā tepe mahattapaḥ |
tatastutoṣa bhagavāṃstriśūlavaradhārakaḥ || 8 ||
[Analyze grammar]

īśvara uvāca |
varaṃ vṛṇīṣva bhadraṃ te manasā yadabhīpsitam |
lohāsura mayā deyaṃ tava nāsti tapobalāt || 9 ||
[Analyze grammar]

ityukto dānavastatra śaṃkarāgre vaco'bravīt || 10 ||
[Analyze grammar]

lohāsura uvāca |
yadi tuṣṭosi deveśa varamekaṃ vṛṇomyaham |
śarīrasyājaratvaṃ ca mā mṛtyorapi me bhayam || 11 ||
[Analyze grammar]

janmanyasminprabho bhūyātsthātavyaṃ hṛdaye mama |
evamastu śivaḥ prāha tatra taṃ dānaveśvaram || 12 ||
[Analyze grammar]

śarvalabdhavaro daivātpunastepe mahattapaḥ |
ramye sarasvatītīre taraṇāya bhavārṇavāt || 13 ||
[Analyze grammar]

vatsarāṇāṃ sahasrāṇi prayutānyarbudāni ca |
śaṃkate bhagavāniṃdro bhītastasya tapobalāt || 14 ||
[Analyze grammar]

mā me padacyutirbhūyāddaityallohāsurātkvacit |
maghavānguptarūpeṇa sametyāśramakānanam || 15 ||
[Analyze grammar]

tapobhaṃgaṃ prakurute kaṃpayitvā mahāsuram |
tāḍayaṃti śarīre taṃ muṣṭibhistīkṣṇakarkaśaiḥ || 16 ||
[Analyze grammar]

atha tena ca daityena dhyānamutsṛjya vīkṣitam |
iṃdreṇa tatkṛtaṃ sarvaṃ tapobalavināśanam || 17 ||
[Analyze grammar]

tasya tairabhavadyuddhamiṃdrādyairatha karkkaśaiḥ |
ekasya bahubhiḥ sārddhaṃ devāste tena saṃyuge || 18 ||
[Analyze grammar]

rudhirāklinnadehā vai prahārairjarjarīkṛtāḥ |
keśavaṃ śaraṇaṃ prāptā trāhi trāhīti bhāṣiṇaḥ || 19 ||
[Analyze grammar]

sūta uvāca |
devānāṃ vākyamākarṇya vāsudevo janārdanaḥ |
yuyudhe keśavastena yuddhe varṣaśataṃ kila || 20 ||
[Analyze grammar]

tato nārāyaṇaṃ tatra jigāya sa varorjitaḥ |
atha nārāyaṇo devo jito lohāsureṇa tu || 21 ||
[Analyze grammar]

maṃtrayāmāsa rudreṇa brahmaṇā ca punaḥpunaḥ |
mīmāṃsitvā trayo devāḥ punaryuddhasamudyamam || 22 ||
[Analyze grammar]

lohāsurasya daityasya vapurdṛṣṭvā punarnavam |
mahadāsītpunaryuddhaṃ daityakeśavayostataḥ || 23 ||
[Analyze grammar]

na mamāra yadā daityo viṣṇunā prabhaviṣṇunā |
tarasā taṃ keśavo'pi pātayāmāsa bhūtale || 24 ||
[Analyze grammar]

uttānaṃ patitaṃ dṛṣṭvā pinākī parameśvaraḥ |
dadhāra hṛdaye tasya svarūpaṃ rūpavarjitaḥ || 25 ||
[Analyze grammar]

kaṇṭhe tasthau tato brahmā tasya lohāsurasya ca |
caraṇau pīḍayāmāsa svasthityā puruṣottamaḥ || 26 ||
[Analyze grammar]

atha daityaḥ samuttasthau bhṛśaṃ baddhopi bhūtale |
dṛṣṭvotthitaṃ tato daityaṃ pātayaṃtaṃ surottamān || 27 ||
[Analyze grammar]

uvāca divyayā vācā viraṃciḥ kamalāsanaḥ || 28 ||
[Analyze grammar]

brahmovāca |
lohāsura sadā rakṣa vācodharmamabhīkṣṇaśaḥ |
tvayā yatprārthitaṃ rudrāttadeva samupasthitam || 29 ||
[Analyze grammar]

ahaṃ viṣṇuśca rudraśca trayo'mī surasattamāḥ |
tvaddehamupavekṣyāmo yāvadābhūtasaṃplavam || 30 ||
[Analyze grammar]

dānaveśa śivaprāptirbhāvabhaktyaiva jāyate |
śivaṃ cālayituṃ buddhiḥ kathaṃ tava bhaviṣyati || 31 ||
[Analyze grammar]

acalāṃścālayedyastu prāsādānbrāhmaṇānpurān |
acireṇaiva kālena pātakenaiva lipyate || 32 ||
[Analyze grammar]

śmaśānavatparityājyaḥ satyadharmabahiṣkṛtaḥ |
satyavāgasi bhadraṃ te mā vicālaya devatāḥ || 33 ||
[Analyze grammar]

yena yātāstu pitaro yena yātāḥ pitāmahāḥ |
tena mārgeṇa gaṃtavyaṃ na collaṃghyā satāṃ gatiḥ || 34 ||
[Analyze grammar]

dānaveśa pitā te hi dadau lokatrayaṃ hareḥ |
vākpāśabaddhaḥ pātāle rājyaṃ cakre mahīpatiḥ || 35 ||
[Analyze grammar]

tathā tvamasi vākpāśācchivabhaktisamanvitaḥ |
bhūtale tiṣṭha daityeṃdra mā vāgvaikalpyamāpnuhi || 36 ||
[Analyze grammar]

varāṃste ca pradāsyāmo mā vicālyā hi devatāḥ || 37 ||
[Analyze grammar]

vyāsa uvāca |
tacchrutvā brahmaṇo vākyaṃ saṃtuṣṭo dānaveśvaraḥ |
prāha prasannayā vācā brahmāṇaṃ keśavaṃ haram || 38 ||
[Analyze grammar]

lohāsura uvāca |
vākpāśabaddhastiṣṭhāmi na punarbhavatāṃ bale |
brahmā viṣṇuśca rudraśca trayo'mī surasattamāḥ || 39 ||
[Analyze grammar]

sthāsyaṃti ceccharīre me kiṃ na labdhaṃ mayā tataḥ |
idaṃ kalevaraṃ me hi samārūḍhaṃ tribhiḥ suraiḥ || 40 ||
[Analyze grammar]

bhūmyāṃ bhavatu vikhyātaṃ matprabhāvātsurottamāḥ || 41 ||
[Analyze grammar]

lohāsurasya vākyena harṣitā stridaśāstrayaḥ |
daduḥ pratyuttaraṃ tasmai brahmaviṣṇumaheśvarāḥ || 42 ||
[Analyze grammar]

satyavākpāśato daityo na satyāccalito yataḥ |
tena satyena saṃtuṣṭā dāsyā maste manīpsitam || 43 ||
[Analyze grammar]

brahmovāca |
yathā snānaṃ brahmajñānaṃ dehatyāgo gayātale |
dharmāraṇye tathā daitya dharmmeśvarapuraḥ sthite || 44 ||
[Analyze grammar]

kūpe tarppaṇakaṃ śrāddhaṃ śaṃsaṃti pitaro divi |
saṃtuṣṭā piṃḍadānena gayāyāṃ pitaro yathā || 45 ||
[Analyze grammar]

vāṃchaṃti tarppaṇaṃ kūpe dharmāraṇye viśuddhaye |
dānavendra śarīraṃ tu tīrthaṃ tava bhaviṣyati || 46 ||
[Analyze grammar]

ekaviṃśativārāṃstu gayāyāṃ tarppaṇe kṛte |
pitṝṇāṃ yā parā tṛptirjāyate dānavādhipa || 47 ||
[Analyze grammar]

dharmeśvara purastātsā tvekadā pitṛtarpaṇāt |
syādvai daśaguṇā tṛptiḥ satyameva na saṃśayaḥ || 48 ||
[Analyze grammar]

pitṝṇāṃ piṃḍadānena akṣayyā tṛptirastviha |
śivarūpāṃtarāle vai dharmāraṇye dharātale || 49 ||
[Analyze grammar]

śraddhayaiva hi karttavyāḥ śrāddhapiṃḍodakakriyāḥ |
tathāṃtarāle cāsmākaṃ śrāddhapiṃḍau viśeṣataḥ || 50 ||
[Analyze grammar]

tathā śarīre kvāpistāṃciṃtā satyo'si suvrata |
triṣu lokeṣu duṣprāpaṃ satyaṃ te divi saṃsthitam || 51 ||
[Analyze grammar]

asmadvākyena satyena tattathā'surasattama |
gayāsamadhikaṃ tīrthaṃ tava jātaṃ dharātale || 52 ||
[Analyze grammar]

asmākaṃ sthitiravyagrā tava dehe na saṃśayaḥ |
satyapāśena baddhāḥ sma dṛḍhameva tvayā'nagha || 53 ||
[Analyze grammar]

viṣṇuruvāca |
gayāprayāga kasyā'pi phalaṃ samadhikaṃ smṛtam |
caturddaśyāmamāvāsyāṃ lohayaṣṭyāṃ piṃḍadānataḥ || 54 ||
[Analyze grammar]

baliputrasya satyena mahatī tṛptiratra hi |
mā kuruṣvātra saṃdehaṃ tava dehe sthitā svayam || 55 ||
[Analyze grammar]

sarasvatī puṇyatoyā brahmalokātprayātyuta |
plāvayiṣyaṃti dehāṃgaṃ mayā saha susaṃgatā || 56 ||
[Analyze grammar]

yatho vai dvārakā vāso devastatra maheśvaraḥ |
viraṃciryatra tīrthāni trīṇyetāni dharātale || 57 ||
[Analyze grammar]

bhaviṣyati ca pātāle svargaloke yamakṣaye |
vikhyātānyasuraśreṣṭha pi tṝṇāṃ tṛptihetave || 58 ||
[Analyze grammar]

athānyatsaṃpravakṣyāmi gāthāṃ pitṛkṛtāṃ parām |
ājñārūpāṃ hi putrāṇāṃ tāṃ śṛṇuṣva mamānagha || 59 ||
[Analyze grammar]

pitara ūcuḥ |
śaṃkarasyāgrataḥ sthānaṃ rudralokapradaṃ nṛṇām |
pāpadehaviśuddhyarthaṃ pāpenopahatātmanām || 60 ||
[Analyze grammar]

tasmiṃstilodakenāpi sadgatiṃ yāṃti tarpitāḥ |
pitaro narakādvā pi suputreṇa sumedhasā || 61 ||
[Analyze grammar]

gopradānaṃ praśaṃsaṃti tattatra pitṛmuktaye |
pitrādikānsamuddiśya dṛṣṭvā rudraṃ ca keśavam || 62 ||
[Analyze grammar]

tilapiṇyākapiṃḍena tṛptiṃ yāsyāmahe parām |
caturddaśyāmamāvāsyāṃ tathā ca pitṛtarpaṇam || 63 ||
[Analyze grammar]

ajñātagotrajanmānastebhyaḥ piṃḍāṃstu nirvapet |
te'pi yāṃti divaṃ sarve ye datta iti śrutiḥ || 64 ||
[Analyze grammar]

sarvakāryāṇi saṃtyajya mānavaiḥ puṇyamīpsubhiḥ |
prāpte bhādrapade māse gaṃtavyā lohayiṣṭakā |
ajñātagotranāmnā tu piṃḍa maṃtramimaṃ śṛṇu || 65 ||
[Analyze grammar]

pitṛvaṃśe mṛtā ye ca mātṛvaṃśe tathaiva ca |
atītagotrajāstebhyaḥ piṃḍo'yamupatiṣṭhatu || 66 ||
[Analyze grammar]

viṣṇuruvāca |
anenaiva tu maṃtreṇa mamāgre surasattama |
kṣīṇe caṃdre caturddaśyāṃ nabhasye piṃḍamāharet || 67 ||
[Analyze grammar]

pitṝṇāmakṣayā tṛptirbhaviṣyati na saṃśayaḥ |
tilapiṇyākapiṃḍena pitaro mokṣamāpnuyuḥ || 68 ||
[Analyze grammar]

kṣaṇatrayavinirmuktā mānavā jagatītale |
bhaviṣyaṃti na saṃdeho lohayaṣṭyā tilatarpaṇe || 69 ||
[Analyze grammar]

snātvā yaḥ kurute cātra pitṛpiṃḍodakakriyāḥ |
pitarastasya tṛpyaṃti yāvadbrahmadivāniśam || 70 ||
[Analyze grammar]

amāvāsyādinaṃ prāpya māsi bhādrapade saraḥ |
brahmaṇo yaṣṭikāyāṃ tu yaḥ kuryātpitṛtarpaṇam || 71 ||
[Analyze grammar]

pitarastasya tṛptāḥ syuryāvadābhūtasaṃplavam |
teṣāṃ prasanno bhagavānādidevo maheśvaraḥ || 72 ||
[Analyze grammar]

asya tīrthasya yātrāyāṃ matiryeṣāṃ bhaviṣyati |
gokṣīreṇa tilaiḥ śvetaiḥ snātvā sārasvate jale || 73 ||
[Analyze grammar]

tarpayedakṣayā tṛptiḥ pitṝṇāṃ tasya jāyate |
śrāddhaṃ caiva praku rvīta saktubhiḥ payasā saha || 74 ||
[Analyze grammar]

amāvāsyādinaṃ prāpya pitṝṇāṃ modamicchukaḥ |
rudratīrthe tato dhenuṃ dayādvastrāṇi yamatīrthake || 75 ||
[Analyze grammar]

viṣṇutīrthe hiraṇyaṃ ca pitṝṇāṃ mokṣamicchukaḥ |
vinākṣatairvinā darbhairvinā cāsanameva ca |
vārimātrāllohayaṣṭyāṃ gayāśrāddhaphalaṃ labhet || 76 ||
[Analyze grammar]

sūta uvāca |
etadvaḥ kathitaṃ viprā lohāsuraviceṣṭitam |
yacchrutvā brahmahā goghno mucyate sarvapātakaiḥ || 77 ||
[Analyze grammar]

ekaviṃśativārantu gayāyāṃ piṃḍa pātane |
tatphalaṃ samavāpnoti sakṛdasmiñchrute sati || 78 ||
[Analyze grammar]

catuḥṣkoṭi dvilakṣaṃ ca sahasraṃ śatameva ca |
dhenavastena dattāḥ syurmāhātmyaṃ śṛṇu yāttu yaḥ || 79 ||
[Analyze grammar]