Chapter 2

[English text for this chapter is available]

skaṃda uvāca |
kathametatsamutpannaṃ kairvā kṣetraṃ niṣevitam |
ko vā tasyāpyadhīśaḥ syādetadvistarato vada || 1 ||
[Analyze grammar]

śiva uvāca |
anādisiddhametattu yathā vedā harestanūḥ |
adhiṣṭhātā hariḥ sākṣānnāradādyairniṣevitam || 2 ||
[Analyze grammar]

purā kṛtayugasyādau svīyāṃ duhitaraṃ vidhiḥ |
rūpayauvanasaṃpannāṃ sa tāṃ yabhitumudyataḥ || 3 ||
[Analyze grammar]

taṃ dṛṣṭvā tādṛśaṃ roṣācchiraḥ khaḍgena pañcadhā |
cicchedā'haṃ kapālaṃ tadbrahmahatyāsamudyate || 4 ||
[Analyze grammar]

haste kṛtvā jagāmāśu tatra tīrthāni sevitum |
divi bhūmau ca pātāle tapaścaraṇapūrvakam || 5 ||
[Analyze grammar]

na gatā brahmahatyā me kapālaṃ tādṛśaṃ kare |
tadā vaikuṇṭhamagamaṃ draṣṭuṃ lakṣmīpatiṃ harim || 6 ||
[Analyze grammar]

vinayāvanato bhūtvā namaskṛtya punaḥ punaḥ |
sarvamākhyātavāṃstasmai vyasanaṃ karuṇātmane || 7 ||
[Analyze grammar]

tasyopadiṣṭamādāya badarīṃ samupāgataḥ |
tatkṣaṇādbrahmahatyā me vepamānā muhurmuhuḥ || 8 ||
[Analyze grammar]

aṃtarhitaṃ kapālaṃ tatkarādvigalitaṃ mama |
tataḥprabhṛti tatkṣetraṃ pārvatyā saha sādaram || 9 ||
[Analyze grammar]

tiṣṭhāmi tapa āsthāya ṛṣīṇāṃ prītimāvahan |
vārāṇasyāṃ yathā prītiḥ śrīśailaśikhare tathā || 10 ||
[Analyze grammar]

kailāse śivayā sārddhaṃ tatonaṃtaguṇādhikā |
anyatra bharaṇānmuktiḥ svadharmavidhipūrvakāta || 11 ||
[Analyze grammar]

badarī darśanādeva muktiḥ puṃsāṃ kare sthitā |
hareścaraṇasānnidhyaṃ yatra vaiśvānaraḥ svayam || 12 ||
[Analyze grammar]

tatra kedārarūpeṇa mama liṃgaṃ pratiṣṭhitam |
kedāradarśanātsparśādarccanādbhaktibhāvataḥ || 13 ||
[Analyze grammar]

koṭijanmakṛtaṃ pāpaṃ bhasmībhavati tatkṣaṇāt |
kalāmātreṇa tiṣṭhāmi tatra kṣetre viśeṣataḥ || 14 ||
[Analyze grammar]

kalā paṃcadaśaivātra mūrtimadhye hyavasthitam || 15 ||
[Analyze grammar]

jitakṛtāṃtabhayāḥ śivayoginaḥ kṛtamṛgājinakṛttisuvāsasaḥ |
varavibhūtijaṭānvitabhūṣaṇāḥ svayamupāsata eva jaṭādharam || 16 ||
[Analyze grammar]

phaladalāṃbusamīraṇatoṣitāḥ śivamanojitamṛtyupariśramāḥ |
girivarasthitanirjitamānasāḥ prasaranirmmalabuddhimahodayāḥ || 17 ||
[Analyze grammar]

kamalakomalakāṃtimukhāṃbujāḥ śivakṛpājitanirbharavairiṇaḥ |
karadhṛtāṃjalimauliśivekṣaṇāḥ śivamupāsata eva niśāmukhe || 18 ||
[Analyze grammar]

karadhṛtajapamālāḥ śāṃtisaṃtoṣabhājaḥ kṛtanatiparanityaprārthanāścandramaulau |
haracaraṇasarojadhyānavijñānamūrtivyathitajanamanojāḥ sarvabhāvānnitāṃtam || 19 ||
[Analyze grammar]

vārāṇasyāṃ mṛtānāṃ ca tārakaṃ brahmasaṃjñakam |
janānāṃ pūjanāttatra mama liṃgasya jāyate || 20 ||
[Analyze grammar]

vahnitīrthaṃ paribhrājadbhagavaccaraṇāṃtike |
kedārākhyaṃ mahāliṃgaṃ dṛṣṭvā no janmabhāgbhavet || 21 ||
[Analyze grammar]

skanda uvāca |
kathaṃ vaiśvānaraḥ śrīmānsarvalokaikakāraṇam |
badarīmanusaṃtasthau tanme vada mahāmate || 22 ||
[Analyze grammar]

śiva uvāca |
purā samājaḥ samabhūdṛṣīṇāmūrdhvaretasām |
gaṃgā bhagavatī yatra kāliṃdyā saha saṃgatā || 23 ||
[Analyze grammar]

daśāśvamedhikaṃ nāma tīrthaṃ trailokyaviśrutam |
babhūva tatra bhagavānhutabhukpraśrayānataḥ |
ṛṣīṇāmagrataḥ sthitvā praṣṭuṃ samupacakrame || 24 ||
[Analyze grammar]

vaiśvānara uvāca |
dṛṣṭvā ihaikadṛgjñānā bhavanto brahmavittamāḥ |
dīnārthe karuṇāpūrṇā hṛdayārdrā dayālavaḥ || 25 ||
[Analyze grammar]

sarvadurlakṣaṇodbhūtapātakāliptacetasaḥ |
kathaṃ syānnirayānmuktirmama brahmaviduttamāḥ || 26 ||
[Analyze grammar]

sarveṣāmṛṣivaryyāṇāmājagāma munīśvaraḥ |
gaṃgāṃbhasi samāplutya vākyaṃ cedamuvāca ha || 27 ||
[Analyze grammar]

vyāsa uvāca |
astyekaḥ paramopāyo bhavataḥ pāpaniṣkṛtau |
sarvabhakṣākhyadoṣasya badarīṃ śaraṇaṃ śraya || 28 ||
[Analyze grammar]

yatrāste bhagavānsākṣāddevadevo janārddanaḥ |
bhaktānāmapyabhaktānāmaghahā madhusūdanaḥ || 29 ||
[Analyze grammar]

tatra gaṃgāṃbhasi snātvā kṛtvā pradakṣiṇāṃ hareḥ |
daṃḍavatpraṇipātena sarvapāpakṣayo bhavet || 30 ||
[Analyze grammar]

tato vyāsamukhācchrutvā ṛṣīṇāmanuvādataḥ |
uttarābhimukho vahnirgaṃdhamādanamāyayau || 31 ||
[Analyze grammar]

tato badarikāṃ prāpya snātvā gaṃgāṃbhasi svayam |
nārāyaṇāśramaṃ gatvā natvā provāca bhaktimān || 32 ||
[Analyze grammar]

agniruvāca |
viśudavijñānaghanaṃ purāṇaṃ sanātanaṃ viśvasṛjāṃ patiṃ gurum |
anekamekaṃ jagadekanāthaṃ namāmyanaṃtāśritaśuddhabuddhim || 33 ||
[Analyze grammar]

māyāmayīṃ śaktimupetya viśvakarttāramuddiśya rajopayuktam |
sattvena cāsya sthitihetumugramatho tamobhigrasitāramīḍe || 34 ||
[Analyze grammar]

avidyayā viśvavimohitātmā vidyaikarūpaṃ vitataṃ trilokyām |
vidyāśritatvātsakalajñamīśaṃ tvavidyayā jīvamahaṃ prapadye || 35 ||
[Analyze grammar]

bhaktecchayāviṣkṛtadehayogamābhogabhogārpitayogayogam |
kauśeyapītāmbarajuṣṭaśaktiṃ vicitraśaktyaṣṭamayeṣṭamīḍe || 36 ||
[Analyze grammar]

atha prasanno bhagavānstutaḥ sarvairhṛdi sthitaḥ |
provāca madhuraṃ vākyaṃ pāvakaṃ pāvanārthinam || 37 ||
[Analyze grammar]

śrīnārāyaṇa uvāca |
varaṃ varaya bhadraṃ te varado'hamupāgataḥ |
stavenānena tuṣṭo'smi vinayena tavānadha || 38 ||
[Analyze grammar]

agniruvāca |
jñātaṃ bhagavatā sarvaṃ yadarthamahamāgataḥ |
tathāpi kathayāmyetadīśvarājñānupālanam || 39 ||
[Analyze grammar]

sarvabhakṣo bhavāmyeva niṣkṛtistu kathaṃ bhavet |
atyantabhayasaṃpattiretasmājjāyate mama || 40 ||
[Analyze grammar]

śrīnārāyaṇa uvāca |
kṣetradarśanamātreṇa prāṇināṃ nāsti pātakam |
matprasādātpātakaṃ tu tvayi māstu kadācana || 41 ||
[Analyze grammar]

tataḥ prabhṛti bhūtātmā pāvakaḥ sarvato bhṛśam |
kalayāvasthitaścātra sarvadoṣavivarjitaḥ || 42 ||
[Analyze grammar]

ya etatprātarutthāya śṛṇoti śrāvayecchuciḥ |
agnitīrthakṛtasnānaṃ phalaṃ prāpnotyasaṃśayam || 43 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrībadarikāśramamāhātmye'gnikṛtabhagavatstutivarṇanaṃnāma dvitīyo'dhyāyaḥ || 2 ||
[Analyze grammar]