Chapter 43

|| tricatvāriṃśo'dhyāyaḥ ||

lakṣmīḥ-
yogihṛtkamalāvāsa ṣāḍguṇyaparikarmita|
nagarādyālaye bhaktāstvāmarcārūpiṇaṃ vibhum|| 43.1 ||
pūjayanti namasyanti vānaprasthāḥ kadācana|
didṛkṣā yadi teṣāṃ vai tatkālaḥ kathyatāṃ hare|| 43.2 ||
śrībhagavān-
vadāmi kamale tubhyaṃ pūjākālo mamendire|
nabhasyasya tu māsasya śuklapakṣasya vai guruḥ|| 43.3 ||
daśamyāṃ mṛgayāyātrāṃ kariṣyannavamīdine|
hayaṃ vāhanamādāya vādyaghoṣādibhiḥ saha|| 43.4 ||
āyudhānyapi cādāya nadīṃ gacchet saro'pi vā|
saṃśodhya vāhanaṃ hetīnalaṃkṛtya paṭādibhiḥ|| 43.5 ||
dhāma pradakṣiṇīkṛtya nayedālayamabjaje|
daśamyāṃ devadevasya kṛtvā nityārcanaṃ purā|| 43.6 ||
saṃprārthayedvibhuṃ mūlamutsavārthaṃ gurūttamaḥ|
yogivandyapadāmbhoja bhaktarakṣaṇadīkṣita|| 43.7 ||
yātrāṃ tu mṛgayāṃ kartuṃ tavecchāmi jagadguro|
mayā saṃprārthito bimbe karmākhye saṃnidhiṃ kuru|| 43.8 ||
iti saṃprārthya lakṣmīśaṃ karmārcāyāṃ vicintayet|
rakṣābandhaṃ ca vidhivat kṛtvā saṃsthāpayeddharim|| 43.9 ||
arghyādinā samabhyarcya havirantaṃ nivedayet|
aśvamāropya deveśamalaṃkṛtya ca bhūṣaṇaiḥ|| 43.10 ||
mṛgayānuguṇaiḥ sarvairvastrairmālyailaṃkṛtam|
bhaktairbhāgavataiḥ sārdhaṃ yātropakaraṇānvitaiḥ|| 43.11 ||
saṃnaddhaiḥ sāyudhaiścaiva bhṛtyairnītvā mahāvanam|
tatra dhyānaparairnityaṃ vānaprasthaiḥ samarpitam|| 43.12 ||
kandamūlaphalaṃ cānyad gururdeve nivedayet|
kārayitvā tu mṛgayāṃ vahnivṛkṣasamīpataḥ|| 43.13 ||
nītvā prapādike ramye sthāpayitvā jagatpatim|
vahnivṛkṣasya mūle tu prokṣya puṇyāhavāriṇā|| 43.14 ||
āyudhāni nidhāyātha pūjayet svasvamantrataḥ|
deśiko mūlamantreṇa śamīpallavamāharet|| 43.15 ||
nidadhyād devaśirasi sarvabhūvijayāya tat|
bāṇān dhanuśca saṃgṛhya caturdikṣu dharordhvayoḥ|| 43.16 ||
prayuñjyādastramantreṇa dhanvanāgeti cāpyṛcā|
tato'rcayeddevadevaṃ vividhairupahārakaiḥ|| 43.17 ||
vānaprasthaistāpasādyairarpitāni ca bhaktitaḥ|
kandamūlaphalādīni vividhāḥ kusumasrajaḥ|| 43.18 ||
samarpya devadevāya tāmbūlaṃ ca nivedayet|
sāyāhne samanuprāpte punaraśve niyojya ca|| 43.19 ||
pradīpairvividhairvādyairvedapārāyaṇairapi|
pradakṣiṇaṃ kārayitvā sarvā vīthīrvarānane|| 43.20 ||
ālayāntaṃ prāpayitvā ghaṭadīpaṃ ca darśayet|
devasya śramaśāntyarthaṃ snāpayennavabhirghaṭaiḥ|| 43.21 ||
śaktiṃ mūle niyojyātha prārthayeddharimavyayam|
yanmayānuṣṭhitaṃ deva daśamyutsavamadya te|| 43.22 ||
tasminnyūnādhikaṃ cettat kṣamyatāṃ bhaktapūjanam|
iti vijñāpya deveśaṃ yathāvat pūjayettataḥ|| 43.23 ||
aparaṃ devi vakṣyāmi hyutsavaṃ puṣṭikāmadam|
svargadaṃ cāpi sarveṣāṃ vaiṣṇavānāṃ ca muktidam|| 43.24 ||
bhūmiputraḥ purā devi narako nāma dānavaḥ|
tenemā hiṃsitāḥ pūrvaṃ māṃ prajāḥ śaraṇaṃ yayuḥ|| 43.25 ||
tato'hamahanaṃ devi narakaṃ dānavādhipam|
sa tu divyaṃ vapuḥ prāpya māṃ ca stutvā vaco'bravīt|| 43.26 ||
puṇyaśloka hare viṣṇo kamalāsanapūrvaja|
tvāṃ prārthaye namaskṛtya bhaktapriya hitaṃkara|| 43.27 ||
tvayā hato'haṃ saṃtuṣṭo dānavānāṃ sudurlabham|
tvatprasādāt svargavāsaṃ vasiṣyāmi na saṃśayaḥ|| 43.28 ||
paraṃ tu bādhitāḥ pūrvaṃ modantāṃ sakalāḥ prajāḥ|
mannāmnā hyutsavaṃ kuryurālayeṣu gṛheṣu ca|| 43.29 ||
abhyañjanasnānadānaṃ nūtanāmbaradhāraṇam|
kuryurdevāya bhakṣyādiguḍānnādicaturvidham|| 43.30 ||
nivedayeyurityevaṃ saṃprārthyā svargamabhyagāt|
tato devān mānuṣāṃśca tadāśāsaṃ jalodbhave|| 43.31 ||
āśvayuk‌kṛṣṇapakṣasya caturdaśyāṃ vidhūdaye|
tailena snāpayeddevamavaśiṣṭena vai guruḥ|| 43.32 ||
śirasā dhārayet pūrvaṃ bhaktebhyo dhārayettataḥ|
bhagavad‌gātrasaṃspṛṣṭaṃ tailaṃ mantraiśca mantritam|| 43.33 ||
śirasā dhārayeyuste śarīreṣu na limpayet|
yo mohāllimpate gātraṃ sa tu rauravamāpnuyāt|| 43.34 ||
guruḥ pūrvoktarītyātha snātvā devasya saṃnidhim|
praviśya nityapūjāṃ ca kṛtvā homāvasānakam|| 43.35 ||
narakāntaka śārṅgeśa caturdaśyutsavāya te|
kṛpayā karmabimbe'smin saṃnidhatsva ramāpate|| 43.36 ||
itthaṃ vijñāpya cāvāhya mūlācchaktiṃ gurūttamaḥ|
deveśaṃ yānamāropya nayedāsthānamaṇṭapam|| 43.37 ||
ārādhya dhūpadīpādyairguḍānnādicaturvidham|
nivedayecca bhakṣyādi tāmbūlaṃ mukhavāsanam|| 43.38 ||
anāhatāni vastrāṇi dārayeddharimavyayam|
tadvidhānaṃ pravakṣyāmi śṛṇu paṅkajasaṃbhave|| 43.39 ||
devasya tu purobhāge dhānyapīṭhaṃ prakalpayet|
haimāni vastrayugmāni paṭṭajānyaparāṇyapi|| 43.40 ||
svarṇapātre nālikeraphalatāmbūlaśobhite|
nidhāya dhānyapīṭhe tu prokṣya puṇyāhavāriṇā|| 43.41 ||
teṣu vastreṣu vai candramāvāhyābhyarcayettataḥ|
gajādau vā yānavarye paricārakamūrdhni vā|| 43.42 ||
nidhāya cchatravādyādisahito deśikottamaḥ|
dhāma pradakṣiṇīkṛtya paridadhyādyathākramam|| 43.43 ||
garbhamandiramāviśya mūlārcāyāśca daivyayoḥ|
karmabimbādibimbānāṃ dhārayennūtanāṃbaram|| 43.44 ||
nivedya bhakṣyabhojyādi bhaktebhyo dāpayettataḥ|
evaṃ kṛtvā tu deveśaṃ garbhamandiramānayet|| 43.45 ||
karmabimbagatāṃ śaktiṃ mūlārcāyāṃ niyojayet|
caturdaśyutsavaṃ viṣṇo mayā bhaktyā hyanuṣṭhitam|| 43.46 ||
atra kiṃcit parityaktaṃ jñānato'jñānato'pi vā|
madbhakta iti tatsarvaṃ kṣantumarhasi mādhava|| 43.47 ||
iti vijñāpya madhyāhnapūjāśeṣaṃ samāpayet|
|| iti śrīśrīpraśnasaṃhitāyāṃ narakacaturdaśyutsavanāma (1)dvicatvāriṃśo'dhyāyaḥ ||
(1.`tricatvāriṃśo'dhyāya' iti bhāvyam|
      `catuścatvāriṃśo'dhyāya' iti gra. pustake vartate|)