Chapter 27

|| saptaviṃśo'dhyāyaḥ ||

śrīḥ-
abhiṣekāḥ pratiṣṭhāyāṃ bahavaḥ samudīritāḥ|
teṣāṃ saṃkhyā ghaṭānāṃ ca devān dravyāṇi vai manum|| 27.1 ||
śrotumicchāmi tat sarvaṃ vaktumarhasi śāstravit|
(1)bhagavān-
(1.gra. pustako idaṃ nāsti|)
kṣīrārṇavasamudrūte yadyatpṛṣṭaṃ tvayānaghe|| 27.2 ||
vistareṇādya tartsavaṃ śṛṇuṣvaikāyanoditam|
ekabere garbhagehapurataḥ snapanārthikāḥ(2)|| 27.3 ||
(2.gra. kām|)
bahuberavidhāne tu prāsādasyāgrato'pi vā|
sarvāvaraṇabhūṣveva dikṣu sarvāsu vā rame|| 27.4 ||
pratiṣṭhāvat prapāṃ kṛtvā prādeśocchrāyasaṃmitām|
vediṃ prakalpayettatra ghaṭasaṃkhyānurodhataḥ|| 27.5 ||
brahmasthānādibhedana vibhajettāṃ purā guruḥ|
vīthīrvihāya pūjārthaṃ brīhibhistaṇḍulaistilaiḥ|| 27.6 ||
pratyekaṃ kalpayetpīṭhaṃ ghaṭānāṃ cakramudritam|
teṣu pīṭheṣu kalaśān viṣṇugāyatriyā nyaset|| 27.7 ||
mahābhiṣeke kartavye kumbhānaṣṭottaraṃ śatam|
brahmasthāne madhyapade parito'ṣṭasu dikṣvapi|| 27.8 ||
caturaścaturo devi sthāpayeddevatāpade|
kāṣṭhāsu nava nava sthāpyā guruṇāṣṭāsu vai ghaṭāḥ|| 27.9 ||
devasthānīyakumbhānāṃ prācyādiṣu yathākramam|
madhyakumbhān pādyamārghyamācāmaṃ kṣīrameva ca|| 27.10 ||
dadhi pañcāmṛtaṃ devi madhugandhodakaṃ tathā|
śuddhodaiḥ paritaḥ kumbhān pūrayedastravidhyayā|| 27.11 ||
brahmasthāne'pyaṣṭadikṣu pauruhūtādikeṣu ca|
kumbheṣvekaikaṃ caturṣu phalavāri ca mārjanam|| 27.12 ||
madhuparkaṃ patranīraṃ ratnodakamataḥ param|
lohavārīkṣutoyaṃ ca gulāpaḥ pūrayed budhaḥ|| 27.13 ||
madhyame vedhasassthāne (3)kalaśeṣu caturṣvapi|
ghṛtamuṣṇodakaṃ puṣpasarvauṣadhijalairapi|| 27.14 ||
(3.gra. caturṣu kalaśeṣvapi|)
prādakṣiṇyena saṃpūrya teṣu kūrcān vinikṣipet|
aśvatthāmrapravālaiśca nārikelaphalānyapi|| 27.15 ||
pidadhyād ghaṭavaktrāṇi cakramantreṇa deśikaḥ|
vastreṇa veṣṭayetkumbhagale pratyekaśo guruḥ|| 27.16 ||
sarvān vāpyekavastreṇa vibhavānuguṇaṃ rame|
ācchādya navavastreṇa kalaśān prāgudaṅmukhaḥ|| 27.17 ||
kumbhānāṃ paścime deśe kalpayet snānaviṣṭaram|
snānavedyuttare bhāge gandhatoyena pūritam|| 27.18 ||
gālitaṃ pavamānādyairmantritaṃ sāpidhānakam|
upasnānārthapātraṃ tu sthāpayet (4)deśiko mahat|| 27.19 ||
(4.gra. kalaśān bahūn|)
śaṅkhapātraṃ cakrapātraṃ śatadhāraṃ tathaiva ca|
sahasradhāraṃ paṭalaṃ snānārthaṃ svarṇanirmitam|| 27.20 ||
sajjīkuryāt tathā pātraṃ candanakṣodasaṃyutam|
tintriṇīphalapaṅkasya bahusārasya bhājanam|| 27.21 ||
arghyādidīpapātrāntaṃ pūjādravyāṇi kalpayet|
antaḥ praviśya mūlādi karmabimbāni vai kramāt|| 27.22 ||
nityapūjāṃ samāpyātha prārthayed gurusattamaḥ|
sarvāde sarvajīvātman sarvajña sakalaprabho|| 27.23 ||
abhiṣeko(kaṃ?) mayā te'dya kartuṃ saṃprārthayāmi bho|
jagatsaṃprīṇanārthāya karmabimbamalaṃkuru|| 27.24 ||
iti saṃprārthya cāvāhya snānamaṇḍapamānayet|
snānāsane devadevaṃ śrībhūmisahitaṃ nayet|| 27.25 ||
puṇyāhaṃ vācayet pūrvaṃ pañcakālaparāyaṇaiḥ|
saṃprokṣya kalaśādīni dvārapūjāmupakramet|| 27.26 ||
niṣadvarāśca sūktāni paṭheyurvaiṣṇavottamāḥ|
bahirvādyāni gāyeyurnṛtyeyurnartakījanāḥ|| 27.27 ||
purā puṣpāṅkuraṃ kṛtvā vidhivaddeśikottamaḥ|
ghaṭānāṃ pūrvadeśe tu kuṇḍe vā sthaṇḍile'pi vā|| 27.28 ||
divyānalaṃ pratiṣṭhāpya kumbheṣvāsanakalpanam|
kṛtvā tattad‌dravyadevān ghaṭeṣvāvāhya pūjayet|| 27.29 ||
agnau pīṭhaṃ prakalpyātha vāsudevaṃ yajed guruḥ|
tattad‌dravyādhidevān vai samuddiśya ghṛtāhutīḥ|| 27.30 ||
saṃkhyābhiraṣṭabhirhutvā caruṇā ṣoḍaśāhutīḥ|
sarpiṣāṣṭottaraśataṃ viṣṇugāyatriyā (5)hute|| 27.31 ||
(5.gra.hunet)
home hutājyaśeṣeṇa madhyakumbheṣu secayet|
bahnisthaṃ paramātmānaṃ cintayet karmakautuke|| 27.32 ||
agnimudvāsya tadanu snapanārthaṃ jagad‌guroḥ|
snāna(6)śāṭīṃ samarpyātha yajedarghyādinā harim|| 27.33 ||
(6.gra. śaṭyau)
(7)devānāṃ svasya haste ca rakṣāsūtraṃ tu bandhayet|
gandhamārjārabījotthaṃ gandhatailaiśca pācitam|| 27.34 ||
(7.gra. devasya dakṣiṇe haste)
astreṇa śodhayet taṃ vai tilatailena deśikaḥ|
śiraḥprabhṛti pādāntaṃ devasyodvartanaṃ caret|| 27.35 ||
tatoddhared dravyakumbhān viṣṇugāyatriyā rame|
pādyādikalaśairdevaṃ snāpayenmantrapūrvakam|| 27.36 ||
pratidravyaṃ tu mantreṇa hyarghyālabhanamālyakaiḥ|
dhūpādibhiḥ samabhyarcya tatastenābhiṣecayet|| 27.37 ||
dravyanyāsaṃ krameṇaiva taduddhāraḥ prakīrtitaḥ|
ghaṭena yena deveśaḥ snāpyate guruṇā rame|| 27.38 ||
tad‌ghaṭāveṣṭitaṃ sūtraṃ chitvā prādeśasaṃmitam|
badhvā hareḥ kare devi snāpayettaddhaṭāmbunā|| 27.39 ||
pādyādidravyakumbhānāṃ snapanānte gurūttamaḥ|
gandhapaṅkaiḥ samālipya devāṅgeṣu tataḥ param|| 27.40 ||
ardhyādibhiḥ samabhyarcya mudgānnādi nivedayet|
devasya pṛṣṭhabhāgastho gururmūrdhnyupari prabhoḥ|| 27.41 ||
sahasradhārāpaṭalaṃ dhārayenmūlavidyayā|
śaṅkhābjanidhikarkaryau puṇyatīrthaprapūritau|| 27.42 ||
gṛhītvā savyavāmasthau vibhordeśikasattamau|
niyojayetāṃ tattīrthaṃ paṭale mūlavidyayā|| 27.43 ||
sahasradhārayā snānamevaṃ kuryādramāpateḥ|
dvijāḥ puruṣasūktena toṣayeyustadā harim|| 27.44 ||
trivāramabhiṣicyaivaṃ devyāvapyabhiṣecayet|
niyujyācchādanapaṭaṃ snāna(8)śāṭīṃ vimucya ca|| 27.45 ||
(8.gra. śāṭyau)
tintriṇīvānapaṅkaiśca (9)bagu(hu)sārairgururvibhoḥ|
aṅgāni śodhayet paścādupasnānārthavāribhiḥ|| 27.46 ||
(9.gra. bahu)
snāpayet plotavastreṇa kuryādaṅgāni nirvṛtim|
alaṃkārāsane devaṃ saṃprārthya vidhivadyajet|| 27.47 ||
bhojyāsane tato nītvā havirādi nivedayet|
mahāhavirvidhānaṃ tu vibhave sati kalpayet|| 27.48 ||
abhiṣekajalaṃ viṣṇorye pibanti vahanti ca|
sarvatīrthābhiṣekasya te phalaṃ prāpnuvanti hi|| 27.49 ||
pādyaṃ kumbhādikumbheṣu dravyanikṣepa īryate|
śyāmākaṃ viṣṇuparṇī ca dūrvā kamalameva ca|| 27.50 ||
dravyāṇyetāni catvāri pādyakumbhe vinikṣipet|
yavaṃ siddhārthakaṃ gandhapuṣpākṣataphalaṃ tilam|| 27.51 ||
kuśāgrametānyaṣṭau ca hyarghyāṅgāni prakīrtyate|
elālavaṅgakarpūraṃ kṣipedācamanīyake|| 27.52 ||
kadalīnālikeraṃ ca sitāmadhughṛtaṃ tathā|
dravyāṇeyetāni saṃyojya pañcāmṛtaghaṭe kṣipet|| 27.53 ||
candanāgarukarpūraṃ gandharājaṃ murā tathā|
uśīraṃ kuṅkumaṃ māṃsī gandhakumbhe samarpayet|| 27.54 ||
kadalībilvacūtāni panasaṃ bījapūrakam|
nārikelaṃ cāmalakaṃ mātuluṅgaṃ phalāmbhasaḥ|| 27.55 ||
rajanī sahadevī ca śirīṣaṃ sūryavartinī|
sadābhadrakuśāgrāṇi mārjanāmbhasi nikṣipet|| 27.56 ||
madhukṣīraṃ ca dadhyājyaṃ madhuparkaṃ ghaṭasya hi|
nyagrodhāśvattha-vakula-kadambāmraśirīṣajāḥ|| 27.57 ||
palāśabilvajāścāpi pallavāḥ patravāriṇaḥ|
indukāntaṃ sūryakāntamayaskāntaṃ pravālakam|| 27.58 ||
vaiḍūryaṃ padmarāgaṃ ca brahmarāgaṃ ca gāruḍam|
indranīlaṃ puṣyarāgaṃ sphaṭikaṃ vajramauktikam|| 27.59 ||
etāni ratnakumbhe tu nikṣiped gurusattamaḥ|
hiraṇyaṃ rajataṃ tāmramayastrapa jalodbhave|| 27.60 ||
etāni pañcalohāni lohakumbheṣu nikṣipet|
godhūmayavanīvārasālimudgapriyaṅgukān|| 27.61 ||
māṣavrīhīn bījakumbhe prakṣipet kamalekṣaṇe|
śamyudumbarabilvānāṃ palāśāśvatthavṛkṣayoḥ|| 27.62 ||
vaṭakhādiracāmpeyavikaṅkatatarostathā|
tvak‌sārameṣāṃ vṛkṣāṇāṃ kaṣāyāmbhasi nikṣipet|| 27.63 ||
koṣṭhaṃ māṃsī haridre dve murā śaileyacampakān|
vacākacoramustāśca sarvauṣadhighaṭe kṣipet|| 27.64 ||
nīvāratilasiddhārthayavaveṇuyavāṃstathā|
tulasīdalayuktāṃstu śāntyambhasi vinikṣipet|| 27.65 ||
padmaṃ nīlotpalaṃ caiva sthalābjamukulāni ca|
ketakīmallikājātinandyāvartasumāni ca|| 27.66 ||
cāmpeyameghāvakulasumāni sumabhājane|
śakṛdrasaṃ ca gomūtraṃ dadhi kṣīraṃ ghṛtaṃ tathā|| 27.67 ||
pañcagavyāni tatpātre nikṣipedadbhirabjaje|
puṇyakṣetrābdhyāpagābhyaḥ puṇyagādyantamadhyataḥ|| 27.68 ||
tulasībilvakamalamūlebhyaśca hṛtāḥ śubhāḥ|
mṛtsnāstu mṛttikākumbhe jalena saha pūrayet|| 27.69 ||
etāni dravyajālāni vibhavecchānusārataḥ|
ekaṃ vātha samastaṃ vā tattatkumbhe tu nikṣipet|| 27.70 ||
gandhodakairvā kalaśān galitaiḥ śuddhavāribhiḥ|
droṇamānaṃ pañcagavyaṃ ghṛtaṃ kṣīraṃ ca mākṣikam|| 27.71 ||
tādṛgevetararasaṃ tāvadeva guḍodakam|
ghaṭeṣu pūrayed vidvān dravyakumbhāmbhasā rame|| 27.72 ||
aṣṭabhāge tvekabhāgaṃ dravyamānaṃ vidhīyate|
hemādi lohajālāni ratnāni ca yathā vasu|| 27.73 ||
tattad‌dravyādhidevān vai tata āvāhya pūjayet|
ghṛtakumbhādhidevastu vāsudevaḥ sanātanaḥ|| 27.74 ||
saṃkarṣaṇastaptatoyakumbhasya sumavāriṇaḥ|
pradyumno devatā devi sarvauṣadhijalasya tu|| 27.75 ||
aniruddho devatā syāt puṇyatīrthaghaṭasya hi|
vāsudevaḥ śuddhatoyakumbhe nārāyaṇaḥ smṛtaḥ|| 27.76 ||
keśavaḥ pādyakumbhasya devo nārāyaṇastathā|
arghyakumbhasya cācāmatoyanāthastu mādhavaḥ|| 27.77 ||
govindaḥ kṣīrakumbhasya viṣṇurdadhnaḥ sarodbhave|
pañcāmṛtasya devastu madhusūdananāmakaḥ|| 27.78 ||
trivikramastu madhuno gandhakumbhasya vāmanaḥ|
śrīdharaḥ phalakumbhasya mārjanāmbho'dhidevatā|| 27.79 ||
hṛṣīkeśaḥ padmanābho madhuparkasya padmaje|
dāmodaraḥ patradevo ratnanīrasya vai prabhuḥ|| 27.80 ||
narottamo'dhokṣajastu lohāmṛtaghaṭasya hi|
gulāmbhaso nṛsiṃhaḥ syādikṣunīrasya cācyutaḥ|| 27.81 ||
devatā bījakumbhasya kāṣāyasya hariḥ smṛtaḥ|
kṛṣṇastu śāntikumbhasya pañcagavyaghaṭasya tu|| 27.82 ||
pañcatattvādhidevaḥsyānmṛttoyakalaśasya hi|
ādisūkaradevaśca devā itthaṃ prakīrtitāḥ|| 27.83 ||
pratyekaṃ dhūpadīpādigandhaiḥ saṃpūjya devatāḥ|
tataḥ sādhakamukhyāstu gāyatrīṃ viṣṇumuccaran|| 27.84 ||
dravyanyāsakrameṇaiva gṛhītvā kalaśān rame|
ācāryasya kare dadyāditaraiḥ saha deśikaḥ|| 27.85 ||
mantraṃ samuccaran devamabhiṣiñcedudaṅmukhaḥ|
viṣṇugāyatriyā devaṃ pādyakumbhena vai tataḥ|| 27.86 ||
tadviṣṇoriti mantreṇa snāpayedarghyavāriṇā|
na te viṣṇo iti manuṃ vadannācāmavāriṇā|| 27.87 ||
āpyāyasveti mantreṇa gokṣīreṇābhiṣecayet|
dadhikrāvṇa yajuṣā dadhnā saṃsnāpayeddharim|| 27.88 ||
pañcāmṛtena deveśaṃ snāpayenmūlavidyayā|
madhuvāteti mantreṇa madhuparkeṇa vai vibhum|| 27.89 ||
gandhadvāreti vai mantramuccaran gandhavāribhiḥ|
phalinītyanuvākena snāpayet phalavāriṇā|| 27.90 ||
śaṃ no devīti manunā snāpayenmārjanāmbubhiḥ|
yā oṣadhīriti mantreṇa snāpayet patravāribhiḥ|| 27.91 ||
ratnodakairiṣetveti lohatoyābhiṣecanam|
madhu vāteti mantreṇa snapanaṃ gulavāribhiḥ|| 27.92 ||
sāvitryākṣatatoyena śatadhāreti mantrataḥ|
snāpayet bījatoyena oṣadhya iti mantrataḥ|| 27.93 ||
kaṣāyādbhiḥ śāntitoyairvedāhamiti mantrataḥ|
ghṛtasnāteti mantreṇa ghṛtena snapanaṃ vibhoḥ|| 27.94 ||
tvaṃ viṣṇuriti yajuṣā snānamuṣṇāmbudārayā|
yo'pāṃ puṣpamiti snānaṃ kuryātpuṣpāmbubhirguruḥ|| 27.95 ||
sarvauṣadhyudakenātha puṃsūktenābhiṣecanam|
viṣṇoḥ karmeti mantreṇa pañcagavyābhiṣecanam|| 27.96 ||
ud‌dhṛtāsīti mṛttauyairimaṃ me gaṅgamantrataḥ|
śuddhatīrthena deveśamathavā mūlavidyayā|| 27.97 ||
jitaṃ ta iti mantrādvā ambhasyeti ca vā rame|
yaddravyasya ca yo mantrastanamantreṇābhiṣecayet|| 27.98 ||
athavā pauruṣaiḥ sūktairdvādaśākṣaravidyayā|
athavā viṣṇugāyatryā ṣaḍarṇenāthavā rame|| 27.99 ||
svamūrtividyayā vāpi (10)snāpayet śrīpatiṃ guruḥ|
ekāśītighaṭanyāsamūnapañcāśatastathā|| 27.100 ||
(10.pā. snapanaṃ madhuvidviṣaḥ|)
triṃśataḥ pañcaviṃśatyā ekaviṃśatikasya ca|
tathā saptadaśasyāpi ṣoḍaśasya sarodbhave|| 27.101 ||
dvādaśānāṃ navānāṃ ca pañcānāmekasaṃkhyayā|
sthāpitasya ghaṭānāṃ ca vadāmi nyāsamabjaje|| 27.102 ||
ekāśītyā yadā devi kalaśairabhiṣicyate|
vairiñce sthāpayedvidvānnavasaṃkhyāṃ tu madhyame|| 27.103 ||
divyasthāne'pyaṣṭadikṣu pratyekaṃ navasaṃkhyakān|
vidhātṛpadakumbhānāṃ puṇyatīrthaṃ tu madhyame|| 27.104 ||
parito'ṣṭasu kumbheṣu prācyādiṣu yathākramam|
phalodakaṃ mārjanāmbho madhuparkaṃ ca patravat|| 27.105 ||
salilaṃ ratnasaṃyuktaṃ lohavāri tathekṣujam|
śāntivāri ca devasya padeṣu prāgupakramāt|| 27.106 ||
dravyāṇi madhyakumbheṣu hyaṣṭottaraśate yathā|
paritastadvadeva syādūnapañcāśataḥ śṛṇu|| 27.107 ||
brahmasthāne nava ghaṭān pūrvavad dravyasaṃyutān|
saṃsthāpya devatāsthāne dikṣvaṣṭasu yathākramam|| 27.108 ||
pañca pañca vinikṣipya teṣu madhyaghaṭeṣu vai|
pādyādiṣu ca yad‌dravyaṃ tad‌dravyeṇaiva pūrayet|| 27.109 ||
śuddhodakaiḥ koṇakumbhān kṣīrābdhimathanodbhave|
triṃśadbhiḥ kalaśairdevi yadā devo'bhiṣicyate|| 27.110 ||
parameṣṭhipade madhye dvau ghaṭau puṇyavāriṇā|
akṣatābhiśca saṃpūrya tayoraṣṭasu dikṣvapi|| 27.111 ||
ekaikaṃ prāgupakramya sthāpayet dravyasaṃyutān|
dadhi pañcāmṛtaṃ tadvanmākṣikaṃ gandhavāri ca|| 27.112 ||
phalodakaṃ mārjanāmbho madhuparkaṃ sapatrakam|
devasthāne caturdikṣu pañca pañca ghaṭān nyaset|| 27.113 ||
teṣu madhyamakumbheṣu pādyārghyācamanāni ca|
kṣīramāpūrayedanyān śuddhādbhiḥ pañcaviṃśakaiḥ|| 27.114 ||
kalaśairabhiṣekaḥ syādvairiñce pañca vai ghaṭān|
nidhāya puṇyasalilaṃ madhyakumbhe samarpayet|| 27.115 ||
taccaturdikṣu caturaḥ dadhi pañcāmṛtaṃ madhu|
gandhodakaṃ devatāyāḥ sthāne dikṣu caturṣvapi|| 27.116 ||
triṃśadvaddhaṭavinyāsastathā dravyaiśca pūraṇam|
ekaviṃśatikumbhasya sraṣṭṛsthānaghaṭaikake|| 27.117 ||
āpūrya puṇyatīrthena vidikṣu caturṣu kramāt|
pañca pañca ghaṭānnyasya teṣu madhyaghaṭeṣu vai|| 27.118 ||
akṣatāmbu tatā baijaṃ kaṣāyaṃ śāntivāri ca|
śuddhodaiḥ pūrayedanyān kalaśān gālitai rame|| 27.119 ||
daśa sapta ghaṭairbhadre yathā devo'bhiṣicyate|
sakarṇikaṃ ṣoḍaśabhirdalairdhānyena kalpitam|| 27.120 ||
pīṭhaṃ tasmin karṇikāyāṃ ghaṭamekaṃ tathā ghaṭān|
nikṣipyānyeṣu madhyasthe puṇyatīrthena pūrayet|| 27.121 ||
pādyamarghyaṃ tathācāmaṃ kṣīraṃ dadhi ca pañcabhiḥ|
amṛtaiḥ pūraṇaṃ devi mākṣikaṃ gandhavāri ca|| 27.122 ||
phalodakaṃ mārjanāmbho madhuparkaṃ ca nikṣipet|
patratoyaṃ ratnavāri lohatoyaṃ guḍodakam|| 27.123 ||
ikṣujaṃ madhyahīnaṃ syāt ṣoḍaśaiḥ kalaśairyadā|
abhiṣiñceddevadevaṃ ghaṭānāṃ vinyased guruḥ|| 27.124 ||
dvādaśānāṃ paścimasyāḥ prācyāntaṃ vrīhibhiḥ kramāt|
paṅktitrayaṃ purākalpya caturaścaturo ghaṭān|| 27.125 ||
ekaikasmin vinikṣipte triṣu dvādaśa vai bhavet|
(11)pādyādi dravyasalilaṃ patrāntaṃ teṣu pūrayet|| 27.126 ||
(11.gra. pādyāditoyakalaśān patrāntān teṣu nikṣipet|)
sthāpyeṣu navasaṃkhyeṣu kalaśeṣu yadā rame|
madhyakumbhe puṇyatīrthaṃ parito'ṣṭa ghaṭeṣu vai|| 27.127 ||
pādyādidravyanikṣepaṃ gandhāntaṃ tatra kārayet|
ghaṭeṣu pañcasaṃkhyeṣu puṇyatīrthaṃ tu madhyame|| 27.128 ||
āgneyādiṣu koṇeṣu sākṣataṃ bījavāri ca|
śāntitoyaṃ ca kāṣāyaṃ pūrayedekasaṃkhyake|| 27.129 ||
ghaṭe puṇyena toyena saṃpūrya snāpayeddharim|
ito'dhiko'pi śāstre'sminnabhiṣeka udīritaḥ|| 27.130 ||
tathāpi saṃgraheṇaiva mayā proktastava priye|
pratiṣṭhāyāmutsave ca prāyaścittādikarmasu|| 27.131 ||
saṃkrāntyādiṣu kāleṣu vibhavecchānusārataḥ|
catuḥsthānārcanaṃ kṛtvā snāpayecca tato harim|| 27.132 ||
eṣa mukhyo'bhiṣekaste kathitaḥ kamalekṣaṇe|
vinā homaṃ madhyamaḥ syāt tathā cakrābjamaṇḍale|| 27.133 ||
pūjāhīno'dhamo bhadre kuryācjñātvā vicakṣaṇaḥ|
[snānopayuktadravyāṇi dadhikṣīramadhūni ca|| 27.134 ||
anyāni sarvavastūni deśikaḥ svayamāharet|
devasya snapanānte tu yajamāno hareḥ purā|| 27.135 ||
ācāryān sādhakaṃścaiva toṣayadvividhairdhanaiḥ|
anyāṃśca vaiṣṇavān sarvān yathāśakti ca toṣayet|| 27.136 ||
snapanānte tūtsavaṃ ca vibhave sati kalpayet|]

|| iti śrīśrīpraśnasaṃhitāyāṃ saptaviṃśo'dhyāyaḥ ||