Chapter 11

|| ekādaśo'dhyāyaḥ ||

sthitaṃ yānasamārūḍhamāsīnaṃ lokavikramam|
śayanaṃ viśvarūpaṃ ca ṣaḍvidhaṃ bimbamucyate|| 11.1 ||
mamāvatārabhedeṣu tattatkāryānurodhataḥ|
bhidyate bahudhā devi yajamānasyānurodhataḥ|| 11.2 ||
caturaśre suvṛtte ca ṣaḍaśre sthāpayed vibhum|
sthitaṃ yānasamārūḍhamāsīnaṃ lokavikramam|| 11.3 ||
vṛttāyate śayānaṃ syāccaturaśrāyate tathā|
aṣṭāśraye viśvarūpa(1)mekamālokya kalpayet|| 11.4 ||
(1.gra. meva)
arcārūpasya nirmāṇe padārthā api ṣaḍvidhāḥ|
ratnasphaṭikalohāśca śilā dāruśca mṛṇmayaḥ|| 11.5 ||
pūrvapaścimato bimbaṃ na hīnaṃ nirmitaṃ yadi|
tatpūrṇaṃ bimbamityāhuḥ pūrvabhāgaṃ tu yatra vai|| 11.6 ||
mukhādisahitaṃ bimbamardhacitraṃ taducyate|
paṭādilikhitaṃ yattu taccitraṃ hīnamucyate|| 11.7 ||
(2)ratnaistu nirmitaṃ bimbaṃ sarvakāmaphalapradam|
(3)saṃpatpradaṃ svarṇabimbaṃ rajataṃ jñānadaṃ bhavet|| 11.8 ||
(2.pā. nirdoṣā ratnajāḥ sarvāḥ sarvakāmaphalapradāḥ|)
(3.gra. saṃpatkaraṃ)
saubhāgyadāyakaṃ tāmramevaṃ trividhamīritam|
yaśovittajñānadāyi śvetaśailasamudbhavam|| 11.9 ||
ārādhanīyaṃ (4)vipreṇa tadanyatsarvakāmadam|
kṣatriyādibhirārādhyaṃ sveṣāṃ caiveṣṭasiddhaye|| 11.10 ||
(4.gra. viprāṇāṃ)
siddhā maharṣayo yatra tapasyanti dvijā api|
martyāgamye devasevye paripakvaśilāmaye|| 11.11 ||
ācāryaḥ prathamaṃ gatvā bimbayogyāṃ śilāṃ rame|
samyak parīkṣya cāgatya yajamānāya vedayet|| 11.12 ||
yajamāno guruścaiva brāhmaṇān bhojayet purā|
tebhyaścānugrahaṃ prāpya (5)yajamānena sammitaḥ|| 11.13 ||
(5.gra. yajamāno guruḥ svayam|)
(6)rathakārādisahito gatvā tatra prapāṃ kriyāt|
aṅkurārpaṇa(7)pūrvaṃ hi sthaṇḍile sthāpayed ghaṭān|| 11.14 ||
(6.gra. rathakāreṇa)
(7.gra. pūrvāṇi)
vinyasya parameṣṭhyākhyavidyayā kūrcapallavaiḥ|
alaṃkṛtya pidhāyāsyānanucakraṃ ca pūjayet|| 11.15 ||
puṇyāhavāriṇā prokṣya siddhārthāṃścakravidyayā|
vikīrya cakramudrāṃ ca pradarśyānantaraṃ guruḥ|| 11.16 ||
madhye tu paramātmānaṃ karake ca sudarśanam|
indrādīnupakumbheṣu prāpaṇāntaṃ samarcayet|| 11.17 ||
samitsarpiḥ puṣphalairdalaiḥ pañcabhirapyatha|
mūlamantreṇa juhuyāt pṛthagaṣṭottaraṃ śatam|| 11.18 ||
caruṇāpi nṛsūktena juhuyāt ṣoḍaśāhutīḥ|
vanadevān parvatāṃśca gaṇḍaśailāṃstaṭānapi|| 11.19 ||
śṛṅgāṃśca nirjharānabdhīn vṛkṣānapyoṣadīrapi(8)|
vanaspatiṃ(tīn) jarāyujānaṇḍajān svedajānapi|| 11.20 ||
(8.gra. dhīstataḥ)
udbhidaḥ sarvabhūtāni titro'pi vyāhṛtīrapi|
namastayā ca vyāhṛtyā hutvā saṃpātamāharet|| 11.21 ||
pūrṇāhutiṃ tato hutvā saṃpātaṃ sparśavidyayā|
tasyāṃ śilāyāṃ vinyasya balidānaṃ ca kalpayet|| 11.22 ||
dadhyannaṃ rajanīcūrṇayuktaṃ lājānapūpikām|
payodadhighṛtaṃ rambhāśalāṭūṃścaruṇā saha|| 11.23 ||
dadyācca sarvabhūtebhyo balidānaṃ tu deśikaḥ|
sumuhūrte śilāṃ vīkṣya siddhārthāṃścakravidyayā|| 11.24 ||
dadyāt baliṃ pratidiśaṃ bhūtebhyaḥ kamalekṣaṇe|
puṇyāhaṃ vācayitvātha prokṣya pūruṣavidyayā|| 11.25 ||
śilāṃ spṛṣṭvātha mūlena datvārdhyaṃ prītimandire|
japedaṣṭottaraśataṃ mūlamantraṃ gurūttamaḥ|| 11.26 ||
bimbasyānuguṇaṃ kuryāt (9)sūtrapātaṃ śilābhuvi|
bimbaṃ śītalayā kuryānna tūṣṇaśilayā kvacit|| 11.27 ||
(9.gra. sūtrapātraṃ)
yadi bimbaṃ śīta(la)yā kuryāllakṣaṇasaṃyutam|
taddevasaṃnidhau (10)saṃpat sadā pūrṇā bhavet dhruvam|| 11.28 ||
(10.gra. sarvasaṃpūrṇā sadā bhavet|)
puṃliṅgaśilayā kuryānnādavatyā (11)sadā harim|
(12)strīśilā pādapīṭhaṃ syādraratnanyāsaṃ napuṃsake|| 11.29 ||
(11.gra.hariṃ guruḥ|)
(12.pā. puṃśilā|)
śilāmevaṃ parīkṣyātha(13) rathakāraistu bhedayet|
sā śilā nipated bhūmyāṃ na bhaved bimbasādhane|| 11.30 ||
(13.gra. parīkṣyaiva|)
madhye sthitāpi vā grāhyā tāmuddhṛtya guruḥ śilām|
mahākumbhajalaiḥ prokṣya tataḥ karakavāriṇā|| 11.31 ||
pariṣicya pratikṛtiṃ śilpibhiḥ kārayed guruḥ|
devīnāṃ ca śriyādīnāṃ nirmāṇe strīśilā varā|| 11.32 ||
puṃśilā pādapīṭhe syādratnanyāsaṃ napuṃsake|
śrīsūktenaiva devīnāṃ śilāsaṃgrahaṇaṃ caret|| 11.33 ||
madhyakumbhe śriyaṃ devīṃ paritaḥ kalaśeṣu ca|
vāgīśvarīṃ kriyāṃ kīrtiṃ lakṣmīṃ sṛṣṭimataḥ parām|| 11.34 ||
prahvīṃ satyāṃ tato brāhmīṃ karake ca sudarśanam|
yathā pūrvaṃ taditarat śriyamagnau tu pūjayet|| 11.35 ||
itarā api cāvāhya vāgīśādyā yathākramam|
brahmādikalpane devi ghaṭasthāpanakarmaṇi|| 11.36 ||
brahmādīn madhyakumbhasthān pūrvādiṣu yathākramam|
indrādīn pūjayet vidvān karake ca sudarśanam|| 11.37 ||
pūrṇāhutiṃ tataḥ kuryāt saṃpātājyena vai śilām|
sparśayettattadaṅgeṣu mūlamantreṇa deśikaḥ|| 11.38 ||
devībrahmādibimbāni kārayecchilpivargataḥ|
dāruṇā yadi kalpyeta bimbāni svārthasiddhaye|| 11.39 ||
dārusagrahaṇaṃ kuryād vṛścikāditrimāsake|
vṛścikādyaṣṭamāseṣu agaruścandano'thavā|| 11.40 ||
kāśmaryo devadāruśca madhūkaharicandanau|
khadiraścārjunaścaiva kadambapanasau tathā|| 11.41 ||
bilvaḥ pūrvoktavṛkṣā ye sāravanto na koṭarāḥ|
suṣirādivihīnāśca gṛhṇīyāt tān drumādhipān|| 11.42 ||
dagdhān vakrān granthiyuktān sasākhān varjayedrame|
śilāsaṃgrahavaddhomaḥ sarvaḥ kāryo yathāvidhi|| 11.43 ||
anokahānāmaṅgāni pravālādīni pūrvavat|
prācīnakuṇḍe juhuyāt sarpirādi gurūttamaḥ|| 11.44 ||
prakṣālayed vṛkṣamūlaṃ vāsasā chādayedrame|
sadarbheṇa smaran mūlaṃ prādakṣiṇyena (14)gurūttamaḥ|| 11.45 ||
(14.gra. vai guruḥ|)
mūrtibhiśca dvādaśabhirmatsyādibhiranukramāt|
vyāhṛtībhistataḥ paścādupatiṣṭhenmahīruham|| 11.46 ||
karmaṇā pūrvavṛttena sthāvaratvamupāgataḥ|
vṛṇobhi viṣṇorbimbārthaṃ tava mokṣāya vai druma|| 11.47 ||
sthāvaratvādito gaccha divyaṃ rūpamanuttamam|
prāpya yogāṃśca vipulān vāsudevaprasādataḥ|| 11.48 ||
anubhūya tato mokṣaṃ yāhi sūriniṣevitam|
ityupasthāya mantreṇa rakṣāsūtraṃ tu bandhayet|| 11.49 ||
anuktamanyatkartavyaṃ śilāsaṃgrahavanniśi|
prabhāte deśikaḥ snātvā muhūrte śobhane śuciḥ|| 11.50 ||
chindyād vṛkṣaṃ kuṭhāreṇa prāṅmukhaḥ puruṣātmanā|
rathakārastato vṛkṣaṃ chedayed gurvanujñayā|| 11.51 ||
prācyāmudīcyāṃ patitastarurabhyudayāvahaḥ|
kuryād bimbaṃ prakāṇḍena śākhayāpyanurūpayā|| 11.52 ||
kumbhodakena taṃ siñced dhyātvā tatra sthitaṃ harim|
mūlamantreṇa paritaḥ siñcet karakavāriṇā|| 11.53 ||
devālayaṃ taruṃ nītvā dhāmamānānusārataḥ|
ālaye cādhivāsādi sthāpayitvā drumaṃ bhuvi|| 11.54 ||
kuryād bahirvane yadvā sarvaṃ tadvadyathāvidhi|
bimbamatyadbhutākāraṃ śilayā (vā)drumeṇa vā|| 11.55 ||
kārayet saṃskṛtenaiva tvanyathānarthamāpnuyāt|
kuryādyatoktavidhinā kṛtaṃ mokṣāya vai bhavet|| 11.56 ||

|| iti śrīśrīpraśnasaṃhitāyāṃ ekādaśo'dhyāyaḥ ||