Chapter 86

saṃjaya uvāca |
vartamāne tathā raudre rājanvīravarakṣaye |
śakuniḥ saubalaḥ śrīmānpāṇḍavānsamupādravat || 1 ||
[Analyze grammar]

tathaiva sātvato rājanhārdikyaḥ paravīrahā |
abhyadravata saṃgrāme pāṇḍavānāmanīkinīm || 2 ||
[Analyze grammar]

tataḥ kāmbojamukhyānāṃ nadījānāṃ ca vājinām |
āraṭṭānāṃ mahījānāṃ sindhujānāṃ ca sarvaśaḥ || 3 ||
[Analyze grammar]

vanāyujānāṃ śubhrāṇāṃ tathā parvatavāsinām |
ye cāpare tittirajā javanā vātaraṃhasaḥ || 4 ||
[Analyze grammar]

suvarṇālaṃkṛtairetairvarmavadbhiḥ sukalpitaiḥ |
hayairvātajavairmukhyaiḥ pāṇḍavasya suto balī |
abhyavartata tatsainyaṃ hṛṣṭarūpaḥ paraṃtapaḥ || 5 ||
[Analyze grammar]

arjunasyātha dāyāda irāvānnāma vīryavān |
sutāyāṃ nāgarājasya jātaḥ pārthena dhīmatā || 6 ||
[Analyze grammar]

airāvatena sā dattā anapatyā mahātmanā |
patyau hate suparṇena kṛpaṇā dīnacetanā || 7 ||
[Analyze grammar]

bhāryārthaṃ tāṃ ca jagrāha pārthaḥ kāmavaśānugām |
evameṣa samutpannaḥ parakṣetre'rjunātmajaḥ || 8 ||
[Analyze grammar]

sa nāgaloke saṃvṛddho mātrā ca parirakṣitaḥ |
pitṛvyeṇa parityaktaḥ pārthadveṣāddurātmanā || 9 ||
[Analyze grammar]

rūpavānvīryasaṃpanno guṇavānsatyavikramaḥ |
indralokaṃ jagāmāśu śrutvā tatrārjunaṃ gatam || 10 ||
[Analyze grammar]

so'bhigamya mahātmānaṃ pitaraṃ satyavikramam |
abhyavādayadavyagro vinayena kṛtāñjaliḥ |
irāvānasmi bhadraṃ te putraścāhaṃ tavābhibho || 11 ||
[Analyze grammar]

mātuḥ samāgamo yaśca tatsarvaṃ pratyavedayat |
tacca sarvaṃ yathāvṛttamanusasmāra pāṇḍavaḥ || 12 ||
[Analyze grammar]

pariṣvajya sutaṃ cāpi so''tmanaḥ sadṛśaṃ guṇaiḥ |
prītimānabhavatpārtho devarājaniveśane || 13 ||
[Analyze grammar]

so'rjunena samājñapto devaloke tadā nṛpa |
prītipūrvaṃ mahābāhuḥ svakāryaṃ prati bhārata |
yuddhakāle tvayāsmākaṃ sāhyaṃ deyamiti prabho || 14 ||
[Analyze grammar]

bāḍhamityevamuktvā ca yuddhakāla upāgataḥ |
kāmavarṇajavairaśvaiḥ saṃvṛto bahubhirnṛpa || 15 ||
[Analyze grammar]

te hayāḥ kāñcanāpīḍā nānāvarṇā manojavāḥ |
utpetuḥ sahasā rājanhaṃsā iva mahodadhau || 16 ||
[Analyze grammar]

te tvadīyānsamāsādya hayasaṃghānmahājavān |
kroḍaiḥ kroḍānabhighnanto ghoṇābhiśca parasparam |
nipetuḥ sahasā rājansuvegābhihatā bhuvi || 17 ||
[Analyze grammar]

nipatadbhistathā taiśca hayasaṃghaiḥ parasparam |
śuśruve dāruṇaḥ śabdaḥ suparṇapatane yathā || 18 ||
[Analyze grammar]

tathaiva ca mahārāja sametyānyonyamāhave |
parasparavadhaṃ ghoraṃ cakruste hayasādinaḥ || 19 ||
[Analyze grammar]

tasmiṃstathā vartamāne saṃkule tumule bhṛśam |
ubhayorapi saṃśāntā hayasaṃghāḥ samantataḥ || 20 ||
[Analyze grammar]

prakṣīṇasāyakāḥ śūrā nihatāśvāḥ śramāturāḥ |
vilayaṃ samanuprāptāstakṣamāṇāḥ parasparam || 21 ||
[Analyze grammar]

tataḥ kṣīṇe hayānīke kiṃciccheṣe ca bhārata |
saubalasyātmajāḥ śūrā nirgatā raṇamūrdhani || 22 ||
[Analyze grammar]

vāyuvegasamasparśā jave vāyusamāṃstathā |
āruhya śīlasaṃpannānvayaḥsthāṃsturagottamān || 23 ||
[Analyze grammar]

gajo gavākṣo vṛṣakaścarmavānārjavaḥ śukaḥ |
ṣaḍete balasaṃpannā niryayurmahato balāt || 24 ||
[Analyze grammar]

vāryamāṇāḥ śakuninā svaiśca yodhairmahābalaiḥ |
saṃnaddhā yuddhakuśalā raudrarūpā mahābalāḥ || 25 ||
[Analyze grammar]

tadanīkaṃ mahābāho bhittvā paramadurjayam |
balena mahatā yuktāḥ svargāya vijayaiṣiṇaḥ |
viviśuste tadā hṛṣṭā gāndhārā yuddhadurmadāḥ || 26 ||
[Analyze grammar]

tānpraviṣṭāṃstadā dṛṣṭvā irāvānapi vīryavān |
abravītsamare yodhānvicitrābharaṇāyudhān || 27 ||
[Analyze grammar]

yathaite dhārtarāṣṭrasya yodhāḥ sānugavāhanāḥ |
hanyante samare sarve tathā nītirvidhīyatām || 28 ||
[Analyze grammar]

bāḍhamityevamuktvā te sarve yodhā irāvataḥ |
jaghnuste vai parānīkaṃ durjayaṃ samare paraiḥ || 29 ||
[Analyze grammar]

tadanīkamanīkena samare vīkṣya pātitam |
amṛṣyamāṇāste sarve subalasyātmajā raṇe |
irāvantamabhidrutya sarvataḥ paryavārayan || 30 ||
[Analyze grammar]

tāḍayantaḥ śitaiḥ prāsaiścodayantaḥ parasparam |
te śūrāḥ paryadhāvanta kurvanto mahadākulam || 31 ||
[Analyze grammar]

irāvānatha nirbhinnaḥ prāsaistīkṣṇairmahātmabhiḥ |
sravatā rudhireṇāktastottrairviddha iva dvipaḥ || 32 ||
[Analyze grammar]

urasyapi ca pṛṣṭhe ca pārśvayośca bhṛśāhataḥ |
eko bahubhiratyarthaṃ dhairyādrājanna vivyathe || 33 ||
[Analyze grammar]

irāvānatha saṃkruddhaḥ sarvāṃstānniśitaiḥ śaraiḥ |
mohayāmāsa samare viddhvā parapuraṃjayaḥ || 34 ||
[Analyze grammar]

prāsānuddhṛtya sarvāṃśca svaśarīrādariṃdamaḥ |
taireva tāḍayāmāsa subalasyātmajānraṇe || 35 ||
[Analyze grammar]

nikṛṣya niśitaṃ khaḍgaṃ gṛhītvā ca śarāvaram |
padātistūrṇamāgacchajjighāṃsuḥ saubalānyudhi || 36 ||
[Analyze grammar]

tataḥ pratyāgataprāṇāḥ sarve te subalātmajāḥ |
bhūyaḥ krodhasamāviṣṭā irāvantamathādravan || 37 ||
[Analyze grammar]

irāvānapi khaḍgena darśayanpāṇilāghavam |
abhyavartata tānsarvānsaubalānbaladarpitaḥ || 38 ||
[Analyze grammar]

lāghavenātha carataḥ sarve te subalātmajāḥ |
antaraṃ nādhyagacchanta carantaḥ śīghragāminaḥ || 39 ||
[Analyze grammar]

bhūmiṣṭhamatha taṃ saṃkhye saṃpradṛśya tataḥ punaḥ |
parivārya bhṛśaṃ sarve grahītumupacakramuḥ || 40 ||
[Analyze grammar]

athābhyāśagatānāṃ sa khaḍgenāmitrakarśanaḥ |
upahastāvahastābhyāṃ teṣāṃ gātrāṇyakṛntata || 41 ||
[Analyze grammar]

āyudhāni ca sarveṣāṃ bāhūnapi ca bhūṣitān |
apatanta nikṛttāṅgā gatā bhūmiṃ gatāsavaḥ || 42 ||
[Analyze grammar]

vṛṣakastu mahārāja bahudhā parivikṣataḥ |
amucyata mahāraudrāttasmādvīrāvakartanāt || 43 ||
[Analyze grammar]

tānsarvānpatitāndṛṣṭvā bhīto duryodhanastataḥ |
abhyabhāṣata saṃkruddho rākṣasaṃ ghoradarśanam || 44 ||
[Analyze grammar]

ārśyaśṛṅgiṃ maheṣvāsaṃ māyāvinamariṃdamam |
vairiṇaṃ bhīmasenasya pūrvaṃ bakavadhena vai || 45 ||
[Analyze grammar]

paśya vīra yathā hyeṣa phalgunasya suto balī |
māyāvī vipriyaṃ ghoramakārṣīnme balakṣayam || 46 ||
[Analyze grammar]

tvaṃ ca kāmagamastāta māyāstre ca viśāradaḥ |
kṛtavairaśca pārthena tasmādenaṃ raṇe jahi || 47 ||
[Analyze grammar]

bāḍhamityevamuktvā tu rākṣaso ghoradarśanaḥ |
prayayau siṃhanādena yatrārjunasuto yuvā || 48 ||
[Analyze grammar]

svārūḍhairyuddhakuśalairvimalaprāsayodhibhiḥ |
vīraiḥ prahāribhiryuktaḥ svairanīkaiḥ samāvṛtaḥ |
nihantukāmaḥ samare irāvantaṃ mahābalam || 49 ||
[Analyze grammar]

irāvānapi saṃkruddhastvaramāṇaḥ parākramī |
hantukāmamamitraghno rākṣasaṃ pratyavārayat || 50 ||
[Analyze grammar]

tamāpatantaṃ saṃprekṣya rākṣasaḥ sumahābalaḥ |
tvaramāṇastato māyāṃ prayoktumupacakrame || 51 ||
[Analyze grammar]

tena māyāmayāḥ kḷptā hayāstāvanta eva hi |
svārūḍhā rākṣasairghoraiḥ śūlapaṭṭiśapāṇibhiḥ || 52 ||
[Analyze grammar]

te saṃrabdhāḥ samāgamya dvisāhasrāḥ prahāriṇaḥ |
acirādgamayāmāsuḥ pretalokaṃ parasparam || 53 ||
[Analyze grammar]

tasmiṃstu nihate sainye tāvubhau yuddhadurmadau |
saṃgrāme vyavatiṣṭhetāṃ yathā vai vṛtravāsavau || 54 ||
[Analyze grammar]

ādravantamabhiprekṣya rākṣasaṃ yuddhadurmadam |
irāvānkrodhasaṃrabdhaḥ pratyadhāvanmahābalaḥ || 55 ||
[Analyze grammar]

samabhyāśagatasyājau tasya khaḍgena durmateḥ |
ciccheda kārmukaṃ dīptaṃ śarāvāpaṃ ca pañcakam || 56 ||
[Analyze grammar]

sa nikṛttaṃ dhanurdṛṣṭvā khaṃ javena samāviśat |
irāvantamabhikruddhaṃ mohayanniva māyayā || 57 ||
[Analyze grammar]

tato'ntarikṣamutpatya irāvānapi rākṣasam |
vimohayitvā māyābhistasya gātrāṇi sāyakaiḥ |
ciccheda sarvamarmajñaḥ kāmarūpo durāsadaḥ || 58 ||
[Analyze grammar]

tathā sa rākṣasaśreṣṭhaḥ śaraiḥ kṛttaḥ punaḥ punaḥ |
saṃbabhūva mahārāja samavāpa ca yauvanam || 59 ||
[Analyze grammar]

māyā hi sahajā teṣāṃ vayo rūpaṃ ca kāmajam |
evaṃ tadrākṣasasyāṅgaṃ chinnaṃ chinnaṃ vyarohata || 60 ||
[Analyze grammar]

irāvānapi saṃkruddho rākṣasaṃ taṃ mahābalam |
paraśvadhena tīkṣṇena ciccheda ca punaḥ punaḥ || 61 ||
[Analyze grammar]

sa tena balinā vīraśchidyamāna iva drumaḥ |
rākṣaso vyanadadghoraṃ sa śabdastumulo'bhavat || 62 ||
[Analyze grammar]

paraśvadhakṣataṃ rakṣaḥ susrāva rudhiraṃ bahu |
tataścukrodha balavāṃścakre vegaṃ ca saṃyuge || 63 ||
[Analyze grammar]

ārśyaśṛṅgistato dṛṣṭvā samare śatrumūrjitam |
kṛtvā ghoraṃ mahadrūpaṃ grahītumupacakrame |
saṃgrāmaśiraso madhye sarveṣāṃ tatra paśyatām || 64 ||
[Analyze grammar]

tāṃ dṛṣṭvā tādṛśīṃ māyāṃ rākṣasasya mahātmanaḥ |
irāvānapi saṃkruddho māyāṃ sraṣṭuṃ pracakrame || 65 ||
[Analyze grammar]

tasya krodhābhibhūtasya saṃyugeṣvanivartinaḥ |
yo'nvayo mātṛkastasya sa enamabhipedivān || 66 ||
[Analyze grammar]

sa nāgairbahuśo rājansarvataḥ saṃvṛto raṇe |
dadhāra sumahadrūpamananta iva bhogavān |
tato bahuvidhairnāgaiśchādayāmāsa rākṣasam || 67 ||
[Analyze grammar]

chādyamānastu nāgaiḥ sa dhyātvā rākṣasapuṃgavaḥ |
sauparṇaṃ rūpamāsthāya bhakṣayāmāsa pannagān || 68 ||
[Analyze grammar]

māyayā bhakṣite tasminnanvaye tasya mātṛke |
vimohitamirāvantamasinā rākṣaso'vadhīt || 69 ||
[Analyze grammar]

sakuṇḍalaṃ samukuṭaṃ padmendusadṛśaprabham |
irāvataḥ śiro rakṣaḥ pātayāmāsa bhūtale || 70 ||
[Analyze grammar]

tasmiṃstu nihate vīre rākṣasenārjunātmaje |
viśokāḥ samapadyanta dhārtarāṣṭrāḥ sarājakāḥ || 71 ||
[Analyze grammar]

tasminmahati saṃgrāme tādṛśe bhairave punaḥ |
mahānvyatikaro ghoraḥ senayoḥ samapadyata || 72 ||
[Analyze grammar]

hayā gajāḥ padātāśca vimiśrā dantibhirhatāḥ |
rathāśca dantinaścaiva pattibhistatra sūditāḥ || 73 ||
[Analyze grammar]

tathā pattirathaughāśca hayāśca bahavo raṇe |
rathibhirnihatā rājaṃstava teṣāṃ ca saṃkule || 74 ||
[Analyze grammar]

ajānannarjunaścāpi nihataṃ putramaurasam |
jaghāna samare śūrānrājñastānbhīṣmarakṣiṇaḥ || 75 ||
[Analyze grammar]

tathaiva tāvakā rājansṛñjayāśca mahābalāḥ |
juhvataḥ samare prāṇānnijaghnuritaretaram || 76 ||
[Analyze grammar]

muktakeśā vikavacā virathāśchinnakārmukāḥ |
bāhubhiḥ samayudhyanta samavetāḥ parasparam || 77 ||
[Analyze grammar]

tathā marmātigairbhīṣmo nijaghāna mahārathān |
kampayansamare senāṃ pāṇḍavānāṃ mahābalaḥ || 78 ||
[Analyze grammar]

tena yaudhiṣṭhire sainye bahavo mānavā hatāḥ |
dantinaḥ sādinaścaiva rathino'tha hayāstathā || 79 ||
[Analyze grammar]

tatra bhārata bhīṣmasya raṇe dṛṣṭvā parākramam |
atyadbhutamapaśyāma śakrasyeva parākramam || 80 ||
[Analyze grammar]

tathaiva bhīmasenasya pārṣatasya ca bhārata |
raudramāsīttadā yuddhaṃ sātvatasya ca dhanvinaḥ || 81 ||
[Analyze grammar]

dṛṣṭvā droṇasya vikrāntaṃ pāṇḍavānbhayamāviśat |
eka eva raṇe śakto hantumasmānsasainikān || 82 ||
[Analyze grammar]

kiṃ punaḥ pṛthivīśūrairyodhavrātaiḥ samāvṛtaḥ |
ityabruvanmahārāja raṇe droṇena pīḍitāḥ || 83 ||
[Analyze grammar]

vartamāne tathā raudre saṃgrāme bharatarṣabha |
ubhayoḥ senayoḥ śūrā nāmṛṣyanta parasparam || 84 ||
[Analyze grammar]

āviṣṭā iva yudhyante rakṣobhūtā mahābalāḥ |
tāvakāḥ pāṇḍaveyāśca saṃrabdhāstāta dhanvinaḥ || 85 ||
[Analyze grammar]

na sma paśyāmahe kaṃcidyaḥ prāṇānparirakṣati |
saṃgrāme daityasaṃkāśe tasminyoddhā narādhipa || 86 ||
[Analyze grammar]