Chapter 10

sūta uvāca |
navamābdaṃ vayaḥ prāpte kṛṣṇāṃśo balavattaraḥ |
paṭhitvānvīkṣikīṃ vidyāṃ catuḥṣaṣṭikalāstathā || 1 ||
[Analyze grammar]

dharmaśāstraṃ tathaivāpi sarvaśreṣṭhaṃ babhūva ha |
tasminkāle bhṛguśreṣṭha mahīrājo nṛpottamaḥ || 2 ||
[Analyze grammar]

karārthaṃ preṣayāmāsa svasainyaṃ ca mahāvatīm |
te vai lakṣaṃ mahāśūrāḥ sarvaśastrāstradhāriṇaḥ || 3 ||
[Analyze grammar]

ūcuḥ parimalaṃ bhūpaṃ śṛṇu caṃdrakulodbhava |
sarve ca bhārate varṣe ye rājāno mahābalāḥ || 4 ||
[Analyze grammar]

ṣaḍaṃśaṃ karamādāyāsmadrājāya dadaṃti vai |
bhavānkare hi tasyaiva yogyo bhavati sāṃpratam || 5 ||
[Analyze grammar]

adyaprabhṛti cedrājñe tasmai dadyātkaraṃ na hi |
mahīrājasya raudrāstraiḥ kṣayaṃ yāsyati sainikaiḥ || 6 ||
[Analyze grammar]

ye bhūpā jayacaṃdrasya pakṣagāste hi tadbhayāt |
dadaṃte bhūmirājāya daṃḍaṃ tanmānasatkṛtāḥ || 7 ||
[Analyze grammar]

iti śrutvā sa nṛpatistasmai rājñe mahātmane |
karaṃ ṣaḍaṃśamādāya dadau prītisamanvitaḥ || 8 ||
[Analyze grammar]

daśalakṣamitaṃ dravyaṃ gṛhītvā te samāyayuḥ |
mahīrājaḥ prasannātmā pūrvavairamapāharat || 9 ||
[Analyze grammar]

tadā te lakṣaśūrāśca kānyakubjamupāyayuḥ |
jayacaṃdraṃ tu natvocuḥ śṛṇu lakṣaṇakovida || 10 ||
[Analyze grammar]

pṛthvīrājo mahārājo daṃḍaṃ tvattaḥ samicchati |
ityuktastairvaiṣṇavāstrī lakṣaṇastānuvāca ha || 11 ||
[Analyze grammar]

maddeśe maṃḍalīkāśca bahavaḥ saṃti sāṃpratam |
bhūmirājo māṃḍaliko mayi jīvati mā bhavet || 12 ||
[Analyze grammar]

ityuktvā vaiṣṇavāstraṃ tānkruddhaḥ sa ca samādadhat |
tadastrajvālataḥ sarve bhayabhītā pradudruvuḥ || 13 ||
[Analyze grammar]

mahīrājastu tacchrutvā mahadbhayamupāgamat |
daśābdaṃ ca vayaḥ prāpte kṛṣṇāṃśe mallakovide || 14 ||
[Analyze grammar]

nānāmallāḥ samājagmustena rājñaiva satkṛtāḥ |
teṣāṃ madhye sa kṛṣṇāṃśo bāhuśālī babhūva ha || 15 ||
[Analyze grammar]

urvīyādhipateḥ putraḥ ṣoḍaśābdavayā balī |
śatamallaiśca sahitaḥ kadācitsa samāgataḥ || 16 ||
[Analyze grammar]

pitṛṣvasṛpatiṃ bhūpaṃ natvā nāmnā'bhayo balī |
uvāca śṛṇu bhūpāla kṛṣṇo'yaṃ madamattaraḥ || 17 ||
[Analyze grammar]

tena sārddhaṃ bhavenmallayuddhaṃ mama nṛpottama |
iti vajrasamaṃ vākyaṃ śrutvā rājā bhayāturaḥ || 10 ||
[Analyze grammar]

uvāca śyālajaṃ premṇā bhavānyuddhaviśāradaḥ |
aṣṭābdo'yaṃ sutaḥ snigdho mama prāṇasamo bhuvi || 19 ||
[Analyze grammar]

kva bhavānvajrasadṛśaḥ kva suto'yaṃ sukomalaḥ |
anyairmallairmadīyaiśca sārddhaṃ yogyo bhavānraṇe || 20 ||
[Analyze grammar]

iti śrutvā nṛpaḥ syālo mahīpatiriti smṛtaḥ |
sa tamāha ruṣāviṣṭo bālo'yaṃ balavattaraḥ || 21 ||
[Analyze grammar]

śṛṇu tatkāraṇaṃ bhūpa yathā jñāto mayā śiśuḥ |
āgaskṛtaṃ mahīrājaṃ matvā satilakaḥ sutam || 22 ||
[Analyze grammar]

paṃḍitāṃśca samāhūya muhūrtaṃ pṛṣṭavānmudā |
gaṇeśo nāma matimāñjyotiśśāstraviśāradaḥ || 23 ||
[Analyze grammar]

lakṣaṇaṃ vacanaṃ prāha mahīrājamanuttamam |
śivadattavaro rājankubera iva sāṃpratam || 24 ||
[Analyze grammar]

kṛṣṇāṃśastasya yogyo'yaṃ deśarājasuto'varaḥ |
nānyo'sti bhūtale rājansatyaṃ satyaṃ bravīmyaham || 25 ||
[Analyze grammar]

tacchrutvā lakṣaṇo vīraḥ pūrve barhiṣmatīṃ prati |
kalpakṣetraṃ dakṣiṇe ca bhūmigrāmaṃ tu paścime || 26 ||
[Analyze grammar]

uttare naimiṣāraṇyaṃ svakīyaṃ rāṣṭramādadhat |
ataḥ śreṣṭhaḥ kumāro'yaṃ kānyakubje mayā śrutaḥ || 27 ||
[Analyze grammar]

nāgotsave ca bhūpāla paṃcamyāṃ ca nabhassite |
dṛśyamātraṃ kumārāṃgaṃ tasmādyogyo hyayaṃ sutaḥ || 28 ||
[Analyze grammar]

iti śrutvā sa kṛṣṇāṃśo vākchareṇa prapīḍitaḥ |
abhayaṃ bhujayoḥ śīghraṃ gṛhītvā so'yudhadbalī || 29 ||
[Analyze grammar]

kṣaṇamātraṃ raṇaṃ kṛtvā bhūmimadhye tamakṣipat |
abhayasya bhujo bhagnastatra jāto balena vai || 30 ||
[Analyze grammar]

mūrcchitaṃ svasutaṃ jñātvā khaḍgahasto mahīpatiḥ |
preṣayāmāsa tānmallānkṛṣṇāṃśasya prahāraṇe || 31 ||
[Analyze grammar]

ruṣāviṣṭāṃśca tāñjñātvā kṛṣṇāṃśo balavattaraḥ |
tānekaikaṃ samākṣipya vijayī sa babhūva ha || 32 ||
[Analyze grammar]

parājite mallabale khaḍgahasto mahīpatiḥ |
maraṇāya matiṃ cakre kṛṣṇāṃśasya prabhāvataḥ || 33 ||
[Analyze grammar]

jñātvā tamīdṛśaṃ bhūpaṃ vārayāmāsa bhūpatiḥ |
abhayaṃ nīrujaṃ kṛtvā premṇā gehamavāsayat || 34 ||
[Analyze grammar]

navābdāṃge ca kṛṣṇāṃśe cāhlādādyāḥ kumārakāḥ |
mṛgayārthe dadhuścittaṃ tamūcurbhūpatiṃ priyam || 35 ||
[Analyze grammar]

namaste tāta bhūpāgrya sarvānaṃdapradāyaka |
asmabhyaṃ tvaṃ hayāndehi matpriyānkaruṇākara || 36 ||
[Analyze grammar]

iti śrutvā vacasteṣāṃ tathetyuktvā mahīpatiḥ |
bhūtale vāsino'śvānvai divyānrāṭ caturo varān || 37 ||
[Analyze grammar]

dadau tebhyo mudā yukto hariṇīgarbhasaṃbhavān |
ṛṣaya ūcuḥ |
tvanmukhena śrutaṃ sūta hariṇī vaḍavā yathā || 38 ||
[Analyze grammar]

bhīṣmasiṃhāya saṃprāptā śakrāddeveśato mune |
idānīṃ śrotumicchāmaḥ kuto jātāsturaṃgamāḥ || 39 ||
[Analyze grammar]

divyāṃgā bhūṣaṇāpannā nabhassalilagāminaḥ |
sūta uvāca |
deśarājena bhūpena purā dharmayutena vai || 40 ||
[Analyze grammar]

sevanaṃ bhāskarasyaiva kṛtaṃ ca dvādaśābdikam |
sevānte bhagavānsūryo varaṃ brūhi tamabravīt || 41 ||
[Analyze grammar]

prāha deva namastubhyaṃ yadi deyo varastvayā |
hayaṃ divyamayaṃ dehi nabhasthalajalātigam || 42 ||
[Analyze grammar]

tathetyuktvā raviḥ sākṣāddadau tasmai papihakam |
lokānpāti papīrjñeyastasyedaṃ nāma cottamam || 43 ||
[Analyze grammar]

ataḥ papīhako nāma lokapālanakarmavān |
sa hayo madamattaśca hariṇīṃ divyarūpiṇīm || 44 ||
[Analyze grammar]

bubhuje smaravegena tasyāṃ jātāsturaṃgamāḥ |
manorathaśca pītāṃgaḥ karālaḥ kṛṣṇarūpakaḥ || 45 ||
[Analyze grammar]

ekagarbhe samudbhūtau śaibyasugrīvakāṃśakau |
yasmindine samudbhūtau jiṣṇuviṣṇukalāṃśataḥ || 6 ||
[Analyze grammar]

tadā jātau hariṇyāśca meghapuṣpabalāhakau |
bindulaśca suvarṇāṃgaḥ śvetāṃgo harināgaraḥ || 47 ||
[Analyze grammar]

divyāṃgāste hi catvāraḥ pūrvaṃ jātā mahābalāḥ |
paścādaṃśāvatārāśca jātāsteṣāṃ mahātmanām || 48 ||
[Analyze grammar]

iti te kathitaṃ vipra śṛṇu tatra kathāṃ śubhām |
bhūtale te hayāḥ sarve prāptāścoparibhūmigāḥ || 49 ||
[Analyze grammar]

devasiṃhāya baline dadau cāśvaṃ manoratham |
āhlādāya karālaṃ ca kṛṣṇāṃśāyaiva bindulam || 50 ||
[Analyze grammar]

brahmānaṃdāya putrāya pradadau harināgaram |
te catvāro hayārūḍhā mṛgayārthaṃ vanaṃ yayuḥ || 51 ||
[Analyze grammar]

hariṇīṃ vaḍavāṃ śubhrāṃ balakhāniḥ samāruhat |
tadanu prayayau vīro vanaṃ siṃhaniṣevitam || 52 ||
[Analyze grammar]

āhlādenaiva śārdūlo hataḥ prāṇibhayaṃkaraḥ |
devasiṃhena siṃhaśca sūkaro balakhāninā || 53 ||
[Analyze grammar]

brahmānaṃdena hariṇo hatastatra mahāvane |
mṛgāḥ śataṃ hatāstaiśca tāngṛhītvā gṛhaṃ yayuḥ || 54 ||
[Analyze grammar]

etasminnaṃtare devī śāradā ca śubhānanā |
mṛgī svarṇamayī bhūtvā teṣāmagre pradhāvitā || 55 ||
[Analyze grammar]

dṛṣṭvā tāṃ mohitāḥ sarve svaiḥ svairbāṇairatāḍayan |
śarāstu saṃkṣayaṃ jagmurmṛgyaṃge balavattarāḥ || 56 ||
[Analyze grammar]

āhlādādyāśca te śūrā vismitāśca babhūvire |
tasminkāle sa kṛ्ṣṇāṃgo bāṇenaiva hyatāḍayat || 57 ||
[Analyze grammar]

tadā ca pīḍitā devī bhayabhītā yayau vanam |
kṛṣṇāṃśaḥ krodhatāmrākṣastatpaścātprayayau balī || 58 ||
[Analyze grammar]

vanāṃtaraṃ ca saṃprāpya devī dhṛtvā svakaṃ vapuḥ |
tamuvāca prasannākṣī parīkṣā te mayā kṛtā || 59 ||
[Analyze grammar]

yadā te ca bhayaṃ bhūyāttadā tvaṃ māṃ sadā smara |
sādhayiṣyāmi te kāryaṃ kṛṣṇāṃśo hi bhavānvibhuḥ || 60 ||
[Analyze grammar]

ityuktvāntarhitā devī śāradā sarvamaṃgalā |
kṛṣṇāṃśastu yayau gehaṃ taiśca sārddhaṃ mudā yutaḥ || 61 ||
[Analyze grammar]

tadā parākramaṃ teṣāṃ dṛṣṭvā rājā sukho'bhavat |
gṛhe gṛhe ca sarveṣāṃ lakṣmīrdevī samāviśat || 62 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṇḍāparaparyāye kaliyugīyetihāsasamuccaye daśamo'dhyāyaḥ || 10 ||
[Analyze grammar]