Chapter 57

[English text for this chapter is available]

atha saptapañcāśattamo'dhyāyaḥ 10. || 57 ||
[Analyze grammar]

satrājitaṃ hatvā śatadhanvanaḥ syamantakaharaṇaṃ tasya ca vadhaḥ akrūrasya ca palāyanaṃ punardvārakāyāṃ āgamanaṃ ca |
śrībādarāyaṇiruvāca |
vijñātārtho'pi govindo dagdhānākarṇya pāṇḍavān |
kuntīṃ ca kulyakaraṇe saharāmo yayau kurūn || 1 ||
[Analyze grammar]

bhīṣmaṃ kṛpaṃ sa viduraṃ gāndhārīṃ droṇameva ca |
tulyaduḥkhau ca saṅgamya hā kaṣṭamiti hocatuḥ || 2 ||
[Analyze grammar]

labdhvaitadantaraṃ rājanśatadhanvānamūcatuḥ |
akrūrakṛtavarmāṇau maṇiḥ kasmānna gṛhyate || 3 ||
[Analyze grammar]

yo'smabhyaṃ sampratiśrutya kanyāratnaṃ vigarhya naḥ |
kṛṣṇāyādānna satrājitkasmādbhrātaramanviyāt || 4 ||
[Analyze grammar]

evaṃ bhinnamatistābhyāṃ satrājitamasattamaḥ |
śayānamavadhīllobhātsa pāpaḥ kṣīṇajīvitaḥ || 5 ||
[Analyze grammar]

strīṇāṃ vikrośamānānāṃ krandantīnāmanāthavat |
hatvā paśūnsaunikavanmaṇimādāya jagmivān || 6 ||
[Analyze grammar]

satyabhāmā ca pitaraṃ hataṃ vīkṣya śucārpitā |
vyalapattāta tāteti hā hatāsmīti muhyatī || 7 ||
[Analyze grammar]

tailadroṇyāṃ mṛtaṃ prāsya jagāma gajasāhvayam |
kṛṣṇāya viditārthāya taptā'cakhyau piturvadham || 8 ||
[Analyze grammar]

tadākarṇyeśvarau rājannanusṛtya nṛlokatām |
aho naḥ paramaṃ kaṣṭamityasrākṣau vilepatuḥ || 9 ||
[Analyze grammar]

āgatya bhagavāṃstasmātsabhāryaḥ sāgrajaḥ puram |
śatadhanvānamārebhe hantuṃ hartuṃ maṇiṃ tataḥ || 10 ||
[Analyze grammar]

so'pi kṛtodyamaṃ jñātvā bhītaḥ prāṇaparīpsayā |
sāhāyye kṛtavarmāṇamayācata sa cābravīt || 11 ||
[Analyze grammar]

nāhamīśvarayoḥ kuryāṃ helanaṃ rāmakṛṣṇayoḥ |
ko nu kṣemāya kalpeta tayorvṛjinamācaran || 12 ||
[Analyze grammar]

kaṃsaḥ sahānugo'pīto yaddveṣāttyājitaḥ śriyā |
jarāsandhaḥ saptadaśa saṃyugādviratho gataḥ || 13 ||
[Analyze grammar]

pratyākhyātaḥ sa cākrūraṃ pārṣṇigrāhamayācata |
so'pyāha ko virudhyeta vidvānīśvarayorbalam || 14 ||
[Analyze grammar]

ya idaṃ līlayā viśvaṃ sṛjatyavati hanti ca |
ceṣṭāṃ viśvasṛjo yasya na vidurmohitājayā || 15 ||
[Analyze grammar]

yaḥ saptahāyanaḥ śailamutpāṭyaikena pāṇinā |
dadhāra līlayā bāla ucchilīndhramivārbhakaḥ || 16 ||
[Analyze grammar]

namastasmai bhagavate kṛṣṇāyādbhutakarmaṇe |
anantāyādibhūtāya kūṭasthāyātmane namaḥ || 17 ||
[Analyze grammar]

pratyākhyātaḥ sa tenāpi śatadhanvā mahāmaṇim |
tasminnyasyāśvamāruhya śatayojanagaṃ yayau || 18 ||
[Analyze grammar]

garuḍadhvajamāruhya rathaṃ rāmajanārdanau |
anvayātāṃ mahāvegairaśvai rājangurudruham || 19 ||
[Analyze grammar]

mithilāyāmupavane visṛjya patitaṃ hayam |
padbhyāmadhāvatsantrastaḥ kṛṣṇo'pyanvadravadruṣā || 20 ||
[Analyze grammar]

padāterbhagavāṃstasya padātistigmaneminā |
cakreṇa śira utkṛtya vāsasorvyacinonmaṇim || 21 ||
[Analyze grammar]

alabdhamaṇirāgatya kṛṣṇa āhāgrajāntikam |
vṛthā hataḥ śatadhanurmaṇistatra na vidyate || 22 ||
[Analyze grammar]

tata āha balo nūnaṃ sa maṇiḥ śatadhanvanā |
kasmiṃścitpuruṣe nyastastamanveṣa puraṃ vraja || 23 ||
[Analyze grammar]

ahaṃ vaidehamicchāmi draṣṭuṃ priyatamaṃ mama |
ityuktvā mithilāṃ rājanviveśa yadunandanaḥ || 24 ||
[Analyze grammar]

taṃ dṛṣṭvā sahasotthāya maithilaḥ prītamānasaḥ |
arhayāṃ āsa vidhivadarhaṇīyaṃ samarhaṇaiḥ || 25 ||
[Analyze grammar]

uvāsa tasyāṃ katicinmithilāyāṃ samā vibhuḥ |
mānitaḥ prītiyuktena janakena mahātmanā |
tato'śikṣadgadāṃ kāle dhārtarāṣṭraḥ suyodhanaḥ || 26 ||
[Analyze grammar]

keśavo dvārakāmetya nidhanaṃ śatadhanvanaḥ |
aprāptiṃ ca maṇeḥ prāha priyāyāḥ priyakṛdvibhuḥ || 27 ||
[Analyze grammar]

tataḥ sa kārayāmāsa kriyā bandhorhatasya vai |
sākaṃ suhṛdbhirbhagavānyā yāḥ syuḥ sāmparāyikīḥ || 28 ||
[Analyze grammar]

akrūraḥ kṛtavarmā ca śrutvā śatadhanorvadham |
vyūṣaturbhayavitrastau dvārakāyāḥ prayojakau || 29 ||
[Analyze grammar]

akrūre proṣite'riṣṭānyāsanvai dvārakaukasām |
śārīrā mānasāstāpā muhurdaivikabhautikāḥ || 30 ||
[Analyze grammar]

ityaṅgopadiśantyeke vismṛtya prāgudāhṛtam |
munivāsanivāse kiṃ ghaṭetāriṣṭadarśanam || 31 ||
[Analyze grammar]

deve'varṣati kāśīśaḥ śvaphalkāyāgatāya vai |
svasutāṃ gāndinīṃ prādāttato'varṣatsma kāśiṣu || 32 ||
[Analyze grammar]

tatsutastatprabhāvo'sāvakrūro yatra yatra ha |
devo'bhivarṣate tatra nopatāpā na mārikāḥ || 33 ||
[Analyze grammar]

iti vṛddhavacaḥ śrutvā naitāvadiha kāraṇam |
iti matvā samānāyya prāhākrūraṃ janārdanaḥ || 34 ||
[Analyze grammar]

pūjayitvābhibhāṣyainaṃ kathayitvā priyāḥ kathāḥ |
vijñatākhilacittajñaḥ smayamāna uvāca ha || 35 ||
[Analyze grammar]

nanu dānapate nyastastvayyāste śatadhanvanā |
syamantako maṇiḥ śrīmānviditaḥ pūrvameva naḥ || 36 ||
[Analyze grammar]

satrājito'napatyatvādgṛhṇīyurduhituḥ sutāḥ |
dāyaṃ ninīyāpaḥ piṇḍānvimucyarṇaṃ ca śeṣitam || 37 ||
[Analyze grammar]

tathāpi durdharastvanyaistvayyāstāṃ suvrate maṇiḥ |
kintu māmagrajaḥ samyaṅna pratyeti maṇiṃ prati || 38 ||
[Analyze grammar]

darśayasva mahābhāga bandhūnāṃ śāntimāvaha |
avyucchinnā makhāste'dya vartante rukmavedayaḥ || 39 ||
[Analyze grammar]

evaṃ sāmabhirālabdhaḥ śvaphalkatanayo maṇim |
ādāya vāsasācchannaḥ dadau sūryasamaprabham || 40 ||
[Analyze grammar]

syamantakaṃ darśayitvā jñātibhyo raja ātmanaḥ |
vimṛjya maṇinā bhūyastasmai pratyarpayatprabhuḥ || 41 ||
[Analyze grammar]

yastvetadbhagavata īśvarasya viṣṇor |
vīryāḍhyaṃ vṛjinaharaṃ sumaṅgalaṃ ca |
ākhyānaṃ paṭhati śṛṇotyanusmaredvā |
duṣkīrtiṃ duritamapohya yāti śāntim || 42 ||
[Analyze grammar]