Chapter 10

[English text for this chapter is available]

śrīśuka uvāca |
atha sindhusauvīrapate rahūgaṇasya vrajata ikṣumatyāstaṭe tatkulapatinā śibikāvāhapuruṣānveṣaṇasamaye daivenopasāditaḥ sa dvijavara upalabdha eṣa pīvā yuvā saṃhananāṅgo gokharavaddhuraṃ voḍhumalamiti pūrvaviṣṭigṛhītaiḥ saha gṛhītaḥ prasabhamatadarha uvāha śibikāṃ sa mahānubhāvaḥ || 1 ||
[Analyze grammar]

yadā hi dvijavarasyeṣumātrāvalokānugaterna samāhitā puruṣagatistadā viṣamagatāṃ svaśibikāṃ rahūgaṇa upadhārya puruṣānadhivahata āha he voḍhāraḥ sādhvatikramata kimiti viṣamamuhyate yānamiti || 2 ||
[Analyze grammar]

atha ta īśvaravacaḥ sopālambhamupākarṇyopāyaturīyācchaṅkitamanasastaṃ vijñāpayāṃ babhūvuḥ || 3 ||
[Analyze grammar]

na vayaṃ naradeva pramattā bhavanniyamānupathāḥ sādhveva vahāmaḥ ayamadhunaiva niyukto'pi na drutaṃ vrajati nānena saha voḍhumu ha vayaṃ pārayāma iti || 4 ||
[Analyze grammar]

sāṃsargiko doṣa eva nūnamekasyāpi sarveṣāṃ sāṃsargikāṇāṃ bhavitumarhatīti niścitya niśamya kṛpaṇavaco rājā rahūgaṇa upāsitavṛddho'pi nisargeṇa balātkṛta īṣadutthitamanyuravispaṣṭabrahmatejasaṃ jātavedasamiva rajasāvṛtamatirāha || 5 ||
[Analyze grammar]

aho kaṣṭaṃ bhrātarvyaktamurupariśrānto dīrghamadhvānameka eva ūhivānsuciraṃ nātipīvā na saṃhananāṅgo jarasā copadruto bhavānsakhe no evāpara ete saṅghaṭṭina iti bahuvipralabdho'pyavidyayā racitadravyaguṇakarmāśayasvacaramakalevare'vastuni saṃsthānaviśeṣe'haṃ mametyanadhyāropitamithyāpratyayo brahmabhūtastūṣṇīṃ śibikāṃ pūrvavaduvāha || 6 ||
[Analyze grammar]

atha punaḥ svaśibikāyāṃ viṣamagatāyāṃ prakupita uvāca rahūgaṇaḥ kimidamare tvaṃ jīvanmṛto māṃ kadarthīkṛtya bhartṛśāsanamaticarasi pramattasya ca te karomi cikitsāṃ daṇḍapāṇiriva janatāyā yathā prakṛtiṃ svāṃ bhajiṣyasa iti || 7 ||
[Analyze grammar]

evaṃ bahvabaddhamapi bhāṣamāṇaṃ naradevābhimānaṃ rajasā tamasānuviddhena madena tiraskṛtāśeṣabhagavatpriyaniketaṃ paṇḍitamāninaṃ sa bhagavānbrāhmaṇo brahmabhūtasarvabhūta suhṛdātmā yogeśvaracaryāyāṃ nātivyutpannamatiṃ smayamāna iva vigatasmaya idamāha || 8 ||
[Analyze grammar]

brāhmaṇa uvāca |
tvayoditaṃ vyaktamavipralabdhaṃ bhartuḥ sa me syādyadi vīra bhāraḥ |
ganturyadi syādadhigamyamadhvā pīveti rāśau na vidāṃ pravādaḥ || 9 ||
[Analyze grammar]

sthaulyaṃ kārśyaṃ vyādhaya ādhayaśca kṣuttṛḍbhayaṃ kaliricchā jarā ca |
nidrā ratirmanyurahaṃ madaḥ śuco dehena jātasya hi me na santi || 10 ||
[Analyze grammar]

jīvanmṛtatvaṃ niyamena rājanādyantavadyadvikṛtasya dṛṣṭam |
svasvāmyabhāvo dhruva īḍya yatra tarhyucyate'sau vidhikṛtyayogaḥ || 11 ||
[Analyze grammar]

viśeṣabuddhervivaraṃ manākca paśyāma yanna vyavahārato'nyat |
ka īśvarastatra kimīśitavyaṃ tathāpi rājankaravāma kiṃ te || 12 ||
[Analyze grammar]

unmattamattajaḍavatsvasaṃsthāṃ gatasya me vīra cikitsitena |
arthaḥ kiyānbhavatā śikṣitena stabdhapramattasya ca piṣṭapeṣaḥ || 13 ||
[Analyze grammar]

śrīśuka uvāca |
etāvadanuvādaparibhāṣayā pratyudīrya munivara upaśamaśīla uparatānātmyanimitta upabhogena karmārabdhaṃ vyapanayanrājayānamapi tathovāha || 14 ||
[Analyze grammar]

sa cāpi pāṇḍaveya sindhusauvīrapatistattvajijñāsāyāṃ samyak |
śraddhayādhikṛtādhikārastaddhṛdayagranthimocanaṃ dvijavaca āśrutya bahuyogagranthasammataṃ tvarayāvaruhya śirasā pādamūlamupasṛtaḥ kṣamāpayanvigatanṛpadevasmaya uvāca || 15 ||
[Analyze grammar]

kastvaṃ nigūḍhaścarasi dvijānāṃ bibharṣi sūtraṃ katamo'vadhūtaḥ |
kasyāsi kutratya ihāpi kasmātkṣemāya naścedasi nota śuklaḥ || 16 ||
[Analyze grammar]

nāhaṃ viśaṅke surarājavajrānna tryakṣaśūlānna yamasya daṇḍāt |
nāgnyarkasomānilavittapāstrācchaṅke bhṛśaṃ brahmakulāvamānāt || 17 ||
[Analyze grammar]

tadbrūhyasaṅgo jaḍavannigūḍha vijñānavīryo vicarasyapāraḥ |
vacāṃsi yogagrathitāni sādho na naḥ kṣamante manasāpi bhettum || 18 ||
[Analyze grammar]

ahaṃ ca yogeśvaramātmatattvavidāṃ munīnāṃ paramaṃ guruṃ vai |
praṣṭuṃ pravṛttaḥ kimihāraṇaṃ tatsākṣāddhariṃ jñānakalāvatīrṇam || 19 ||
[Analyze grammar]

sa vai bhavā lokanirīkṣaṇārthamavyaktaliṅgo vicaratyapi svit |
yogeśvarāṇāṃ gatimandhabuddhiḥ kathaṃ vicakṣīta gṛhānubandhaḥ || 20 ||
[Analyze grammar]

dṛṣṭaḥ śramaḥ karmata ātmano vai bharturganturbhavataścānumanye |
yathāsatodānayanādyabhāvātsamūla iṣṭo vyavahāramārgaḥ || 21 ||
[Analyze grammar]

sthālyagnitāpātpayaso'bhitāpastattāpatastaṇḍulagarbharandhiḥ |
dehendriyāsvāśayasannikarṣāttatsaṃsṛtiḥ puruṣasyānurodhāt || 22 ||
[Analyze grammar]

śāstābhigoptā nṛpatiḥ prajānāṃ yaḥ kiṅkaro vai na pinaṣṭi piṣṭam |
svadharmamārādhanamacyutasya yadīhamāno vijahātyaghaugham || 23 ||
[Analyze grammar]

tanme bhavānnaradevābhimāna madena tucchīkṛtasattamasya |
kṛṣīṣṭa maitrīdṛśamārtabandho yathā tare sadavadhyānamaṃhaḥ || 24 ||
[Analyze grammar]

na vikriyā viśvasuhṛtsakhasya sāmyena vītābhimatestavāpi |
mahadvimānātsvakṛtāddhi mādṛṅnaṅkṣyatyadūrādapi śūlapāṇiḥ || 25 ||
[Analyze grammar]