Chapter 19

[English text for this chapter is available]

sūta uvāca |
mahīpatistvatha tatkarma garhyaṃ |
vicintayan nātmakṛtaṃ sudurmanāḥ |
aho mayā nīcamanāryavatkṛtaṃ |
nirāgasi brahmaṇi gūḍhatejasi || 1 ||
[Analyze grammar]

dhruvaṃ tato me kṛtadevahelanād |
duratyayaṃ vyasanaṃ nātidīrghāt |
tadastu kāmaṃ hyaghaniṣkṛtāya me |
yathā na kuryāṃ punarevamaddhā || 2 ||
[Analyze grammar]

adyaiva rājyaṃ balamṛddhakośaṃ |
prakopitabrahmakulānalo me |
dahatvabhadrasya punarna me'bhūt |
pāpīyasī dhīrdvijadevagobhyaḥ || 3 ||
[Analyze grammar]

sa cintayannitthamathāśṛṇod yathā |
muneḥ sutokto nirṛtistakṣakākhyaḥ |
sa sādhu mene na cireṇa takṣakā |
nalaṃ prasaktasya viraktikāraṇam || 4 ||
[Analyze grammar]

atho vihāyemamamuṃ ca lokaṃ |
vimarśitau heyatayā purastāt |
kṛṣṇāṅghrisevāmadhimanyamāna |
upāviśat prāyamamartyanadyām || 5 ||
[Analyze grammar]

yā vai lasacchrītulasīvimiśra |
kṛṣṇāṅghrireṇvabhyadhikāmbunetrī |
punāti lokānubhayatra seśān |
kastāṃ na seveta mariṣyamāṇaḥ || 6 ||
[Analyze grammar]

iti vyavacchidya sa pāṇḍaveyaḥ |
prāyopaveśaṃ prati viṣṇupadyām |
dadhau mukundāṅghrimananyabhāvo |
munivrato muktasamastasaṅgaḥ || 7 ||
[Analyze grammar]

tatropajagmurbhuvanaṃ punānā |
mahānubhāvā munayaḥ saśiṣyāḥ |
prāyeṇa tīrthābhigamāpadeśaiḥ |
svayaṃ hi tīrthāni punanti santaḥ || 8 ||
[Analyze grammar]

atrirvasiṣṭhaścyavanaḥ śaradvān |
ariṣṭanemirbhṛguraṅgirāśca |
parāśaro gādhisuto'tha rāma |
utathya indrapramadedhmavāhau || 9 ||
[Analyze grammar]

medhātithirdevala ārṣṭiṣeṇo |
bhāradvājo gautamaḥ pippalādaḥ |
maitreya aurvaḥ kavaṣaḥ kumbhayoniḥ |
dvaipāyano bhagavān nāradaśca || 10 ||
[Analyze grammar]

anye ca devarṣibrahmarṣivaryā |
rājarṣivaryā aruṇādayaśca |
nānārṣeyapravarān sametān |
abhyarcya rājā śirasā vavande || 11 ||
[Analyze grammar]

sukhopaviṣṭeṣvatha teṣu bhūyaḥ |
kṛtapraṇāmaḥ svacikīrṣitaṃ yat |
vijñāpayāmāsa viviktacetā |
upasthito'gre'bhigṛhītapāṇiḥ || 12 ||
[Analyze grammar]

rājovāca |
aho vayaṃ dhanyatamā nṛpāṇāṃ |
mahattamānugrahaṇīyaśīlāḥ |
rājñāṃ kulaṃ brāhmaṇapādaśaucād |
dūrād visṛṣṭaṃ bata garhyakarma || 13 ||
[Analyze grammar]

tasyaiva me'ghasya parāvareśo |
vyāsaktacittasya gṛheṣvabhīkṣṇam |
nirvedamūlo dvijaśāparūpo |
yatra prasakto bhayamāśu dhatte || 14 ||
[Analyze grammar]

taṃ mopayātaṃ pratiyantu viprā |
gaṅgā ca devī dhṛtacittamīśe |
dvijopasṛṣṭaḥ kuhakastakṣako vā |
daśatvalaṃ gāyata viṣṇugāthāḥ || 15 ||
[Analyze grammar]

punaśca bhūyād‍bhagavatyanante |
ratiḥ prasaṅgaśca tadāśrayeṣu |
mahatsu yāṃ yāmupayāmi sṛṣṭiṃ |
maitryastu sarvatra namo dvijebhyaḥ || 16 ||
[Analyze grammar]

iti sma rājādhyavasāyayuktaḥ |
prācīnamūleṣu kuśeṣu dhīraḥ |
udaṅmukho dakṣiṇakūla āste |
samudrapat‍nyāḥ svasutanyastabhāraḥ || 17 ||
[Analyze grammar]

evaṃ ca tasmin naradevadeve |
prāyopaviṣṭe divi devasaṅghāḥ |
praśasya bhūmau vyakiran prasūnaiḥ |
mudā muhurdundubhayaśca neduḥ || 18 ||
[Analyze grammar]

maharṣayo vai samupāgatā ye |
praśasya sādhvityanumodamānāḥ |
ūcuḥ prajānugrahaśīlasārā |
yaduttamaślokaguṇābhirūpam || 19 ||
[Analyze grammar]

na vā idaṃ rājarṣivarya citraṃ |
bhavatsu kṛṣṇaṃ samanuvrateṣu |
ye'dhyāsanaṃ rājakirīṭajuṣṭaṃ |
sadyo jahurbhagavatpārśvakāmāḥ || 20 ||
[Analyze grammar]

sarve vayaṃ tāvadihāsmahe'dya |
kalevaraṃ yāvadasau vihāya |
lokaṃ paraṃ virajaskaṃ viśokaṃ |
yāsyatyayaṃ bhāgavatapradhānaḥ || 21 ||
[Analyze grammar]

āśrutya tad ṛṣigaṇavacaḥ parīkṣit |
samaṃ madhucyud guru cāvyalīkam |
ābhāṣatainānabhinandya yuktān |
śuśrūṣamāṇaścaritāni viṣṇoḥ || 22 ||
[Analyze grammar]

samāgatāḥ sarvata eva sarve |
vedā yathā mūrtidharāstripṛṣṭhe |
nehāthavāmutra ca kaścanārtha |
ṛte parānugrahamātmaśīlam || 23 ||
[Analyze grammar]

tataśca vaḥ pṛcchyamimaṃ vipṛcche |
viśrabhya viprā iti kṛtyatāyām |
sarvātmanā mriyamāṇaiśca kṛtyaṃ |
śuddhaṃ ca tatrāmṛśatābhiyuktāḥ || 24 ||
[Analyze grammar]

tatrābhavad bhagavān vyāsaputro |
yadṛcchayā gāmaṭamāno'napekṣaḥ |
alakṣyaliṅgo nijalābhatuṣṭo |
vṛtaśca bālairavadhūtaveṣaḥ || 25 ||
[Analyze grammar]

taṃ dvyaṣṭavarṣaṃ sukumārapāda |
karorubāhvaṃsakapolagātram |
cārvāyatākṣonnasatulyakarṇa |
subhrvānanaṃ kambusujātakaṇṭham || 26 ||
[Analyze grammar]

nigūḍhajatruṃ pṛthutuṅgavakṣasaṃ |
āvartanābhiṃ valivalgūdaraṃ ca |
digambaraṃ vaktravikīrṇakeśaṃ |
pralambabāhuṃ svamarottamābham || 27 ||
[Analyze grammar]

śyāmaṃ sadāpīcyavayo'ṅgalakṣmyā |
strīṇāṃ manojñaṃ rucirasmitena |
pratyutthitāste munayaḥ svāsanebhyaḥ |
tallakṣaṇajñā api gūḍhavarcasam || 28 ||
[Analyze grammar]

sa viṣṇurāto'tithaya āgatāya |
tasmai saparyāṃ śirasā'jahāra |
tato nivṛttā hyabudhāḥ striyo'rbhakā |
mahāsane sopaviveśa pūjitaḥ || 29 ||
[Analyze grammar]

sa saṃvṛtastatra mahān mahīyasāṃ |
brahmarṣirājarṣidevarṣi saṅghaiḥ |
vyarocatālaṃ bhagavān yathenduḥ |
graharkṣatārānikaraiḥ parītaḥ || 30 ||
[Analyze grammar]

praśāntamāsīnamakuṇṭhamedhasaṃ |
muniṃ nṛpo bhāgavato'bhyupetya |
praṇamya mūrdhnāvahitaḥ kṛtāñjaliḥ |
natvā girā sūnṛtayānvapṛcchat || 31 ||
[Analyze grammar]

parīkṣiduvāca |
aho adya vayaṃ brahman satsevyāḥ kṣatrabandhavaḥ |
kṛpayātithirūpeṇa bhavadbhistīrthakāḥ kṛtāḥ || 32 ||
[Analyze grammar]

yeṣāṃ saṃsmaraṇāt puṃsāṃ sadyaḥ śuddhyanti vai gṛhāḥ |
kiṃ punardarśanasparśa pādaśaucāsanādibhiḥ || 33 ||
[Analyze grammar]

sānnidhyātte mahāyogin pātakāni mahāntyapi |
sadyo naśyanti vai puṃsāṃ viṣṇoriva suretarāḥ || 34 ||
[Analyze grammar]

api me bhagavān prītaḥ kṛṣṇaḥ pāṇḍusutapriyaḥ |
paitṛṣvaseyaprītyarthaṃ tad‍gotrasyāttabāndhavaḥ || 35 ||
[Analyze grammar]

anyathā te'vyaktagateḥ darśanaṃ naḥ kathaṃ nṛṇām |
nitarāṃ mriyamāṇānāṃ saṃsiddhasya vanīyasaḥ || 36 ||
[Analyze grammar]

ataḥ pṛcchāmi saṃsiddhiṃ yogināṃ paramaṃ gurum |
puruṣasyeha yatkāryaṃ mriyamāṇasya sarvathā || 37 ||
[Analyze grammar]

yacchrotavyamatho japyaṃ yatkartavyaṃ nṛbhiḥ prabho |
smartavyaṃ bhajanīyaṃ vā brūhi yadvā viparyayam || 38 ||
[Analyze grammar]

nūnaṃ bhagavato brahman gṛheṣu gṛhamedhinām |
na lakṣyate hyavasthānaṃ api godohanaṃ kvacit || 39 ||
[Analyze grammar]

sūta uvāca |
evamābhāṣitaḥ pṛṣṭaḥ sa rājñā ślakṣṇayā girā |
pratyabhāṣata dharmajño bhagavān bādarāyaṇiḥ || 40 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe śukāgamanaṃ nāma ekonaviṃśo'dhyāyaḥ || 19 ||
[Analyze grammar]