Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 3.51
tasminneva samādhau sthityupāyamāha —
svāmyupanimantraṇe saṅgasmayā'karaṇaṃ punaraniṣṭaprasaṅgāt || vibhūti 51 ||
vṛttiḥ — catvāro yogino bhavanti | tatrābhyāsavān pravṛttamātrajyotiḥ prathamaḥ | ṛtambharaprajño dvitīyaḥ | bhūtendriyajayī tṛtīyaḥ | atikrāntabhāvanīyaścaturthaḥ | tatra caturthasya samādheḥ prāptasaptavidhabhūmiprāntaprajño bhavati | ṛtambharaprajñasya dvitīyāṃ madhumatīsaṃjñāṃ bhūmikāṃ sākṣātkurvataḥ svāmino devā upanimantrayitāro bhavanti | divyastrīrasāyanādikam [divyastrīvasanādikam ] upaḍhaukayantīti tasminnupanimantraṇe nā'nena saṅgaḥ kartavyo nāpi smayaḥ | saṅgatikaraṇe punarviṣayabhoge patati smayakaraṇe kṛtakṛtyamātmānaṃ manyamāno na samādhāvutsahate | ataḥ saṅgasmayayostena varjanaṃ kartavyam || 51 ||