Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 3.49
indriyajayamabhidhāyā'ntaḥkaraṇajayamāha —
sattvapuruṣānyatākhyātimātrasya sarvabhāvādhiṣṭhātṛtvaṃ sarvajñātṛtvaṃ ca || vibhūti 49 ||
vṛttiḥ — tasmin buddheḥ sāttvike pariṇāme kṛtasaṃyamasya yā sattvapuruṣayorutpadyate vivekakhyātirguṇānāṃ kartṛtvābhimānaśithilībhāvarūpā tanmāhātmyāt tatraiva sthitasya yoginaḥ sarvādhiṣṭhātṛtvaṃ sarvajñātṛtvaṃ ca samādherbhavati | sarveṣāṃ guṇapariṇāmānāṃ bhāvānāṃ svāmivadākramaṇaṃ sarvabhāvādhiṣṭhātṛtvam | teṣāmeva ca śāntoditāvyapadeśyadharmitvenāvasthitānāṃ yathāvadvivekajñānaṃ sarvajñātṛtvam | eṣāṃ cāsmiñchāstre parasyāṃ vaśīkārasaṃjñāyāṃ prāptāyāṃ viśokā nāma siddhirityucyate || 49 ||