Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 3.11
nirodhapariṇāmamabhidhāya samādhipariṇāmamāha —
sarvārthataikāgratayoḥ kṣayodayau cittasya samādhipariṇāmaḥ || vibhūti 11 ||
vṛttiḥ — sarvārthatā calatvānnānāvidhārthagrahaṇaṃ cittasya vikṣepo dharmaḥ | ekasminnevālambane sadṛśapariṇāmitaikāgratā | sā'pi cittasya dharmaḥ | tayoryathākramaṃ kṣayodayau sarvārthatālakṣaṇasya dharmasya kṣayo'tyantābhibhava ekāgratālakṣaṇasya dharmasya prādurbhāvo'bhivyaktiścittasyodriktasattvasyānvayitayā'vasthānaṃ samādhipariṇāma ityucyate | pūrvasmāt pariṇāmādasyāyaṃ viśeṣaḥ — tatra saṃskāralakṣaṇayoḥ dharmayorabhibhavaprādurbhāvau pūrvasya vyutthānasaṃskārarūpasya nyagbhāva uttarasya nirodhasaṃskārarūpasyodbhavo'nabhibhūtatvenāvasthānam | iha tu kṣayodayāviti sarvātmatārūpasya vikṣepasyātyantatiraskārādanutpattiratīte'dhvani praveśaḥ kṣaya ekāgratālakṣaṇasya dharmasyodbhavo vartamāne'dhvani prakaṭatvam || 11 ||