Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 2.23
dṛśyadraṣṭārau vyākhyāya saṃyogaṃ vyākhyātumāha —
svasvāmiśaktyoḥ svarūpopalabdhihetuḥ saṃyogaḥ || sādhana 23 ||
vṛttiḥ — kāryadvāreṇāsya lakṣaṇaṃ karoti | svaśaktirdṛśyasya svabhāvaḥ | svāmiśaktirdraṣṭuḥ svarūpam | tayordvayorapi saṃvedyasaṃvedakatvena vyavasthitayoryā svarūpopalabdhistasyāḥ kāraṇaṃ yaḥ sa saṃyogaḥ | sa ca sahajo bhogyabhoktṛbhāvasvarūpānanyaḥ [ pā0 sa ca sahajabhogyabhoktṛbhāvasvarūpānnānyaḥ]| na hi tayornityayorvyāpakayoḥ svarūpādatiriktaḥ kaścit saṃyogaḥ | yadeva bhogyasya bhogyatvaṃ bhoktuśca bhoktṛtvamanādisiddhaṃ sa eva saṃyogaḥ || 23 ||