Chapter 6

atha ṣaṣṭhaḥ paṭalaḥ ||
atha vakṣyāmi saṃkṣepāt snānācāmādi pūjanam |
yena samyakkṛteneha sādhakaḥ siddhimāpnuyāt || 1 ||
[Analyze grammar]

tīrthe nadyāṃ taṭāke vā sudhīrgatvā kuśādimān |
mṛdamastreṇa saṅgṛhya sarvadoṣavivarjitām || 2 ||
[Analyze grammar]

astreṇa kṣālite tīrthe saṃsthāpya vibhajet tridhā |
astreṇa ca hṛdā prokṣya bhāgāṃstān kavacena ca || 3 ||
[Analyze grammar]

pradakṣiṇaṃ parikramya namaskṛtvā'tha tajjalam |
pūrvāṃśena malasnānaṃ kṛtvā majjet triromiti || 4 ||
[Analyze grammar]

dvitīyenālabhet paścādācamya vidhipūrvakam |
tṛtīyaṃ dikṣu sarvāsu kṣiped vighnopaśāntaye || 5 ||
[Analyze grammar]

pratisrotaḥ punarmajjet tīrthaṃ dhyātvā tu vaiṣṇavam |
tīrthaṃ punaḥ samāsādya vidhinā'camya vāgyataḥ || 6 ||
[Analyze grammar]

mantranyāsaṃ kramāt kṛtvā prokṣya mūlādibhistathā |
tataścācamya kurvīta prāṇāyāmatrayaṃ kramāt || 7 ||
[Analyze grammar]

mūlamantreṇa sāṅgena vyastena susamāhitaḥ |
nābhyāśliṣṭena toyena tatastenādhamarṣaṇam || 8 ||
[Analyze grammar]

samastena samuddiṣṭaṃ sarvapāpaharaṃ tathā |
kṛtvā'bhiṣekamuttīrya paridhāya sitāmbaram || 9 ||
[Analyze grammar]

ācānto nyasya samprokṣya kuśāgraiḥ pūrvavat kramāt |
upaviśya śucau deśe prāṇāyāmatrayaṃ caret || 10 ||
[Analyze grammar]

paratattvena kṛtvaivaṃ namaskṛtya ca mārjayet |
upasthānaṃ tataḥ kuryāt paratattvena deśikaḥ || 11 ||
[Analyze grammar]

dhyātvā jyotirmayaṃ viṣṇuṃ maṇḍalasthaṃ jalārghyadaḥ |
sthitvā'ṣṭottarajaptena mūlamantraśatena tu || 12 ||
[Analyze grammar]

gāyatryā caiva vaiṣṇavyā praṇavādyantaruddhayā |
upaviśya śucau deśe tatastarpaṇamārabhet || 13 ||
[Analyze grammar]

viṣṇvādidevatāścarṣīn manuṣyāṃ pitṝṃstathā |
tarpayet tānaśeṣeṇa paścāt tīrthaṃ tu saṃharet || 14 ||
[Analyze grammar]

mūlamantraṃ japan gacched vāgyataścintayan harim |
ājānu pādau prakṣālya hastāvākorparaṃ punaḥ || 15 ||
[Analyze grammar]

triḥ pibedaṃ brahmatīrthena dvirūnmṛjya mukhaṃ punaḥ |
vāmahastaṃ ca pādau ca prokṣyāṅgāni punaḥ spṛśet || 16 ||
[Analyze grammar]

vedāstrayastribhiḥ pānaiḥ pitaraśca pitāmahāḥ |
kramaśastṛptimāyānti tathaiva prapitāmahāḥ || 17 ||
[Analyze grammar]

mārjane prathame brahmā dvitīye dakṣa eva ca |
tatrātharvetihāsāśca tṛptimāyānti saṃsmṛtāḥ || 18 ||
[Analyze grammar]

cakṣuṣoḥ spṛṣṭayostṛptiṃ candrādityau prayāsyataḥ |
aṅguṣṭhe'nāmikāṃ kṛtvā tarjanīṃ pavano nasoḥ || 19 ||
[Analyze grammar]

kaniṣṭhāṃ karṇayordasrau bāhvoraṅguṣṭhakena ca |
śakraśailāśca tṛpyanti nābhau viṣṇuśca madhyayā || 20 ||
[Analyze grammar]

mahāviṣṇuḥ sadā viṣṇuścaturbhirhṛdi ke'khilaiḥ |
etadācamanaṃ proktaṃ dīkṣitasya viseṣataḥ || 21 ||
[Analyze grammar]

yāgasthānaṃ samāsādya devaṃ saṃsmṛtya vāgyataḥ |
astrema gṛhamālokya vediṃ sthaṇḍilameva ca || 22 ||
[Analyze grammar]

tataḥ pradakṣiṇīkṛtya namaskṛtya samāhitaḥ |
kṛtvopavītavadvastramuttaraṃ prāṅmukhaḥ śuciḥ || 23 ||
[Analyze grammar]

nārasiṃhena digbandhaṃ kṛtvā padmāsanasthitaḥ |
paratattvaṃ samuccārya kṛtvā brahmāñjaliṃ śubham || 24 ||
[Analyze grammar]

prāṇāyāmatrayaṃ kuryād dhāraṇātrayasaṃyutam |
nābhimaṇḍalamadhye yaṃ dhūmraṃ caṇḍānilātmakam || 25 ||
[Analyze grammar]

viśleṣayadaghaṃ dehāt sarvagātropaśoṣakam |
dhārayeddhṛdaye cāgniṃ tāreṇārkādupāhṛtam || 26 ||
[Analyze grammar]

jvālābhistiryagūrdhvādho dahantaṃ kāṣṭhavat tanum |
śikhānte jīvamāyojya bījena susamāhitaḥ || 27 ||
[Analyze grammar]

gatvā suṣumnārandhreṇa tato'rkasyoparisthitāt |
candrādamṛtamānīya svatanuṃ bhasmasātkṛtām || 28 ||
[Analyze grammar]

plāvayitvā navaṃ dehaṃ pārthivaiḥ paramāṇubhiḥ |
jalabudbudamadhyasthaṃ prājāpatyaṃ tu kalpayet || 29 ||
[Analyze grammar]

ātmānaṃ yojayitvā'tra sarvajñaṃ gatakalmaṣam |
astraśodhitayormūlaṃ karayorvyāpakaṃ nyaset || 30 ||
[Analyze grammar]

dakṣiṇe'ṅguṣṭhamārabhya bījāni kramaśo nyaset |
tārādyantāni vāme'pi talāntamubhayatra tu || 31 ||
[Analyze grammar]

aṅgāni ca tayornyasya sarvāṅge vyāpakaṃ nyaset |
prathamaṃ mūrndhi vinyasya lalāṭe ca dvitīyakam || 32 ||
[Analyze grammar]

tṛtīyaṃ hṛdaye caiva caturthaṃ nābhimaṇḍale |
pañcamaṃ tu nyasedūrvoḥ pādāvasthaṃ tu ṣaṣṭhakam || 33 ||
[Analyze grammar]

sṛṣṭinyāso'yamāsīne kartavyaḥ kāmyasiddhaye |
sthite kuryāt sthitinyāsaṃ nābhyādi hṛdayāntakam || 34 ||
[Analyze grammar]

śayite saṃhṛtinyāsaṃ pādādi pratilomataḥ |
sthitinyāso gṛhasthasya sṛṣṭyākhyo brahmacāriṇaḥ || 35 ||
[Analyze grammar]

mumukṣoḥ saṃhṛtinyāsa evaṃ nyāsasridhā smṛtaḥ |
evaṃ nyāsavidhiṃ kṛtvā tārādyantaiḥ ṣaḍakṣaraiḥ || 36 ||
[Analyze grammar]

hṛdayādīni cāṅgāni svasthāneṣu niyojayet |
japtvā mantraṃ tato'streṇa saṃvidhya śakalaṃ tyajet || 37 ||
[Analyze grammar]

puṣpamastreṇa ca kṣiptvā sambhārānupakalpayet |
astrakṣālitapātrasthe gandhapuṣpānvite jale || 38 ||
[Analyze grammar]

mantraṃ nyasyāṣṭakṛtvastu praṇavenābhimantrayet |
tatastu prokṣaṇaṃ kuryādastramantreṇa sarvataḥ || 39 ||
[Analyze grammar]

phaṭkārāntena medhāvī tataḥ pīṭhaṃ prakalpayet |
maṇḍale sthaṇḍile'rcāyāṃ pūjayeddhṛdi vā budhaḥ || 40 ||
[Analyze grammar]

sthaṇḍilādyarcanāt siddho hṛtpadme manasā'rcayet |
dharmādharmādipādeṣamanantamayamāsanabh || 41 ||
[Analyze grammar]

triguṇākalitaṃ māyāvidyāsitasitāstaram |
vipulaṃ sthaṇḍilebhyarcya gandhapuṣpairyathākramam || 42 ||
[Analyze grammar]

tasyopari tathā padmaṃ praṇavena samāhitaḥ |
tadaṃśaiḥ sūryasomāgnimaṇḍalātmatrayaṃ punaḥ || 43 ||
[Analyze grammar]

uparyupari saṅkalpya patrakesarakarṇikāḥ |
vimalotkarṣiṇī jñānā kriyā yogā yathākramam || 44 ||
[Analyze grammar]

prahvī satyā tatheśā ca kesareṣvaṣṭa śaktayaḥ |
madhyato'nugrahā cānte pūjyāḥ sarvārthasiddhaye || 45 ||
[Analyze grammar]

hṛdyevaṃ yogapīṭhasthaṃ dhyātvā viṣṇumatandritaḥ |
kṣālite taijase pātre gandhapuṣpayutodake || 46 ||
[Analyze grammar]

praṇavena smared viṣṇumavyaktasyoparisthitam |
viṣṇumūrtiṃ tato dhyātvā sarvatejomayaṃ vibhum || 47 ||
[Analyze grammar]

karṇikopari sañacintya nirudhya sakalīkṛtam |
pūjayet sāṅgamavyagre bhaktyā'rghyādibhiracyutam || 48 ||
[Analyze grammar]

pūrveṇa hṛdayaṃ nyasya dakṣiṇena śirastathā |
paścimena śikhāṃ caiva kavacaṃ cottareṇa tu || 49 ||
[Analyze grammar]

āgneyādiṣu kāṇeṣu pūjayedastramuttamam |
vāsudevādikān nyasya dikṣu śaktīśca koṇataḥ || 50 ||
[Analyze grammar]

tadbahiḥ śaṅkhacakrābjagadā dikṣu niveśayet |
koṇeṣu ca tataḥ śārṅgakheṭakhaṅgaśarān nyaset || 51 ||
[Analyze grammar]

indramagniṃ yamaṃ caiva nirṛtiṃ varuṇaṃ tathā |
vāyuṃ somaṃ tatheśānaṃ svāsu dikṣu kramānnyaset || 52 ||
[Analyze grammar]

vajraṃ śaktiṃ ca daṇḍaṃ ca khaḍgaṃ pāśaṃ dhvajaṃ tathā |
gadāṃ triśūlaṃ ca bahisteṣāmastrāṇi kalpayet || 53 ||
[Analyze grammar]

agrato vainateyaṃ tu tṛtīyāvaraṇād bahiḥ |
viṣvaksenaṃ tathaiśānyāṃ dvitīyāvaraṇād bahiḥ || 54 ||
[Analyze grammar]

sarveṣāmapi caiteṣāṃ pratyekama padmamāsanam |
nāmabhiḥ kalpayed vidvānardhyaṃ devāya bhaktitaḥ || 55 ||
[Analyze grammar]

pādyamācamanīyaṃ ca srānamālepanaṃ tathā |
vastrālaṅkārapuṣpāṇi dhūpadīpanivedyakam || 56 ||
[Analyze grammar]

tatsarvaṃ viṣṇugāyatryā dātavyaṃ tu yathākramam |
dattvā devāya bhūṣāntaṃ snānādyaṅgeṣu kalpayet || 57 ||
[Analyze grammar]

gāyatryā ca tataḥ puṣpaṃ devāyānyebhya eva ca |
vyastena mūlamantreṇa samastena ca taiḥ saha || 58 ||
[Analyze grammar]

yāgo'yaṃ tasya vijñeyaḥ sadā'nye'rcyāḥ svanāmabhiḥ |
paratattvena vyāpyānte pūjayet taṃ sanātanam || 59 ||
[Analyze grammar]

dhūpaṃ dīpaṃ nivedyaṃ ca dattvā'smai vidhipūrvakam |
yathāsambhavato'nyeṣāṃ nivedyamupakalpayet || 60 ||
[Analyze grammar]

agnau ca kalpayet sāṅgaṃ yogapīṭhasthamujjvalam |
paristaraṇaparyukṣāpavitrakaraṇādi yat || 61 ||
[Analyze grammar]

praṇavenaiva sarvaṃ tat kṛtvā'thājyena homayet |
daśāṃśamaṅgamūrttīnāmanyeṣāmekaśaḥ kramāt || 62 ||
[Analyze grammar]

namaḥ pariṣadebhyaścetyaṣṭadikṣu baliṃ haret |
ācamya sakalīkṛtya japtvā stutvā praṇamya ca || 63 ||
[Analyze grammar]

arghyaṃ dattvā kṣamasveti saṃhṛtya hṛdi yojayet |
dhyāyejjyotirmayaṃ devaṃ śaṅkhacakragadādharam || 64 ||
[Analyze grammar]

pītavastramudārāṅgaṃ sarvābharaṇabhūṣitam |
śuddhasphaṭikasaṅkāśaṃ vāsudevaṃ caturbhujam || 65 ||
[Analyze grammar]

śaṅkhacakragadāpāṇiṃ dhṛtaśrīvatsakaustubham |
tathā saṅkarṣaṇaṃ dhyāyejjātarūpasamaprabham || 66 ||
[Analyze grammar]

dūrvāmarakataprakhyaṃ pradyumnaṃ ca tathā smaret |
nīlāmbudapratīkāśamaniruddhaṃ tathaiva ca || 67 ||
[Analyze grammar]

śāntasphaṭikasaṅkāśāṃ śriyaṃ padmarajaḥprabhām |
sarasvatīṃ tathārūpāṃ ratiṃ śyāmāṃ tu cintayet || 68 ||
[Analyze grammar]

śuklavarṇaṃ tathā śaṅkhaṃ cakramagnisamaprabham |
gadāṃ caiva haridrābhāṃ suvarṇābhaṃ tu paṅkajam || 69 ||
[Analyze grammar]

gadāṃ strīlakṣaṇairyuktāṃ sarvasaṃhārakāriṇīm |
khaḍgamākāśasaṃkāśaṃ dhyāyeccakrasamākṛtim || 70 ||
[Analyze grammar]

śārṅgaṃ ca tatsamaṃ pītamadhobhāge gadāsamam |
śaraṃ ca dhanurākāraṃ kheṭakaṃ khaṅgasannibham || 71 ||
[Analyze grammar]

cakramugraṃ prabhūtākṣaṃ nābhyaraprathinemikam |
lelihānaṃ durālokaṃ bhramadvahnisphuliṅgamuk || 72 ||
[Analyze grammar]

caturbāhuṃ dvibāhuṃ vā daṃṣṭriṇaṃ piṅgamūrdhajam |
lambodaraṃ tathā śaṅkhaṃ hrasvakuñcitamūrdhajam || 73 ||
[Analyze grammar]

indraḥ śyāmo yamaḥ pīto varuṇaḥ śyāma eva ca |
śaṅkhāmalaruciḥ somo vahniḥ śoṇastu kīrtitaḥ || 74 ||
[Analyze grammar]

sadaṃṣṭro nirṛtiḥ śyāmo vāyurdhūmraḥ praśasyate |
īśānastu bhaved rakta evaṃ dhyāyet kramādimān || 75 ||
[Analyze grammar]

indrakāraṃ bhaved vajraṃ citraśāstroditaṃ tu vā |
evamastrāṇi dikpānāmanyeṣāṃ ca prakalpayet || 76 ||
[Analyze grammar]

agnivarmaścaturbāhustārkṣyo lūnāgranāsikaḥ |
grasanniva dṛśā dhyeyo mahāpakṣo mahābalaḥ || 77 ||
[Analyze grammar]

viṣvakseno'bhravarṇastu śaṅkhacakragadādharaḥ |
pañcamūrdhā caturbāhuranantaḥ pṛṣṭhato hareḥ || 78 ||
[Analyze grammar]

dhyeyo'nye pārṣadāstasya jñātavyāścāgamāntare |
yo'nena vidhinā viṣṇuṃ pūjayed bhaktimān naraḥ || 79 ||
[Analyze grammar]

tasya hastagatāḥ kāmā ihāmutra ca yoginaḥ || 80 ||
[Analyze grammar]