Chapter 4

| || atha caturthaḥ paṭalaḥ ||
atha vakṣyāmi saṃkṣepāt kṣetrakṣetrajñanirṇayam |
sṛṣṭisaṃhārayogaṃ ca bhoktṛbhojyatvasaṃyutam || 1 ||
[Analyze grammar]

kṣetrākhyā prakṛtirjñeyā tadvit kṣetrajña īśvaraḥ |
ubhayaṃ cedamatyantamabhinnamiva tiṣṭhati || 2 ||
[Analyze grammar]

avyaktaṃ buddhyahaṅkārau tanmātrāṇīha pañca ca |
ekādaśendriyairbhūtaiḥ kṣetramevaṃ prakīrtitam || 3 ||
[Analyze grammar]

sthūlasūkṣmavibhāgena dvidhā kṣetramavasthitam |
kāryaṣoḍaśakaṃ sthūlaṃ sūkṣmaṃ buddhyādimātrajam || 4 ||
[Analyze grammar]

tadanityaṃ ca nityaṃ ca śarīraṃ sarvadehinām |
puryasyāmuṣito bhoktā puruṣaścaiṣa kathyate || 5 ||
[Analyze grammar]

cinmātraḥ puruṣo vyāpī vyāpyā pūstriguṇā jaḍā |
tanniyogāt svatantreva sūte bhāvān haratyapi || 6 ||
[Analyze grammar]

parārthā'cetanāsūkṣmā triguṇā nityavikriyā |
prakṛtirguṇabhedāt tu buddhyādivikṛtistridhā || 7 ||
[Analyze grammar]

sattvaṃ sukhaṃ rajo duḥkhaṃ tamo mohaśca te guṇāḥ |
te'nyonyābhibhavavyaktamithunāśrayavṛttayaḥ || 8 ||
[Analyze grammar]

laghuprakāśakaṃ sattvaṃ kriyānirbandhakṛd rajaḥ |
tamo guru nirodhyete sitaraktāsitāḥ smṛtāḥ || 9 ||
[Analyze grammar]

tribhireva guṇairetaiḥ prakṛtisthaiḥ samanvitāḥ |
sarve bhāvā bhavantyete śreṣṭhamadhyamakanyasāḥ || 10 ||
[Analyze grammar]

prakṛterguṇasaṃyogabhedaireko'pyanekadhā |
nirguṇo'pi pumān bhāti sphaṭiko'nyairivānvitaḥ || 11 ||
[Analyze grammar]

sāttvikairarcayenmuktyai bhāvairbhogāya rājasaiḥ |
tāmasaiḥ parapīḍādau miśritairmiśrasiddhaye || 12 ||
[Analyze grammar]

tasmāt taṃ pratyupāsīnaḥ sarvān bhāvānatandritaḥ |
kuryācca sāttvikāneva bhāvānanyopamardanāt || 13 ||
[Analyze grammar]

mahadākhyā'ṣṭadhā buddhirjātā'vyaktād guṇaistribhiḥ |
caturekatribhedā sā buddhiraṣṭavidhā smṛtā || 14 ||
[Analyze grammar]

dharmo jñānaṃ ca vairāgyamaiśvaryaṃ sattvabuddhayaḥ |
avairāgyaṃ rajobuddhiradharmādyāstamodhikāḥ || 15 ||
[Analyze grammar]

yamaśca niyamo dharmo manovākkāyajakriyaḥ |
devaprasādanāyāsau kartavyo mokṣakāṅakṣibhiḥ || 16 ||
[Analyze grammar]

śraddhā dhṛtiḥ prasādākhyo mānaso dharma uttamaḥ |
satyapriyahitālāpo vāgdharma iha kīrtitaḥ || 17 ||
[Analyze grammar]

śārīraḥ paricaryāśuddhyanugrahamayastridhā |
ete dharmāstu kartavyā varṇāśramagatāśca ye || 18 ||
[Analyze grammar]

vaidikāstāntrikā vā'sya siddhirbhavati nānyathā |
jñānaṃ tu mokṣadharmārthakāmāṅgatvāccaturvidham || 19 ||
[Analyze grammar]

dvidhā vivekanirvedakṛtaṃ vairāgyamiṣyate |
ādyamābhyantaraṃ muktyai bāhyamanyattu bandhanam || 20 ||
[Analyze grammar]

jāto buddherahaṅkārastrividhastriguṇātmakaḥ |
yena janturanātmānamātmānamiva manyate || 21 ||
[Analyze grammar]

vaikṛtaḥ sāttviko garvo rājasastaijasāhvayaḥ |
bhūtādistāmaso nāmnā garvabhedā ime smṛtāḥ || 22 ||
[Analyze grammar]

vaikārikādahaṅkārāt pañca buddhīndriyāṇi ca |
samutpannāni yairjñānaṃ narasyārtheṣu jāyate || 23 ||
[Analyze grammar]

karmendriyāṇi pañcaiva karmārthāni ca taijasāt |
mano jātaṃ dvirūpaṃ ca tataḥ saṅkalpasādhanam || 24 ||
[Analyze grammar]

manaḥ śrotrādiṣu jñeyaṃ cittaṃ vāgādiṣu smṛtam |
bhūtādeḥ pañca jātāni tanmātrāṇi yathākramam || 25 ||
[Analyze grammar]

śabdaḥ sparśaśca rūpaṃ ca raso gandhaśca pañcamaḥ |
parameṣṭhyādayo jñeyā viṣṇostāḥ pañca śaktayaḥ || 26 ||
[Analyze grammar]

yābhireṣa paro devaḥ parame vyomni tiṣṭhati |
cicchaktiḥ sarvakāryādikūṭasthā parameṣṭhyasau || 27 ||
[Analyze grammar]

dvitīyā tasya yā śaktiḥ puruṣākyādivikriyā |
viśvākhyā vividhābhāsā tṛtīyā karaṇātmikā || 28 ||
[Analyze grammar]

caturthī viṣayaṃ prāpya nivṛttyākhyā sthitā punaḥ |
pūrṇajñānakriyāśaktitaḥ sarvākhyā tasya pañcamī || 29 ||
[Analyze grammar]

etābhiḥ śaktibhiryuktaḥ paramātmā nirañjanaḥ |
utpattisthitisaṃhārahetuḥ syādakriyo'pi san || 30 ||
[Analyze grammar]

nigrahānugrahau cāpi karoti jagataḥ prabhuḥ |
ekaikotkarṣabhedena pañcadhā pañcaśaktibhiḥ || 31 ||
[Analyze grammar]

pañcātmānaḥ smṛtā hyete sūkṣmarūpā vyavasthitāḥ |
saṃsāraviṣayātītā yogagamyāḥ sanātanāḥ || 32 ||
[Analyze grammar]

etat sūkṣmaśarīraṃ tu kathitaṃ mūrttikāraṇam |
tanmātrebhyastu bhūtāni kramājjātāni pañca vai || 33 ||
[Analyze grammar]

vyoma vāyuśca tejaśca jalaṃ pṛthvī ca pañcamī |
etat sthūlaśarīraṃ tu sarvādhāraṃ prajāyate || 34 ||
[Analyze grammar]

śrotraṃ tvakcakṣuṣī jihvā ghrāṇaṃ buddhīndriyāṇi tu |
karmendriyāṇi vākpāṇiguhyapāyvaṅghrayaḥ smṛtāḥ || 35 ||
[Analyze grammar]

evaṃ sṛṣṭiḥ śarīrāntā sthūlasūkṣmavibhāgataḥ |
kīrtitā te mayā sargaviparīto layakramaḥ || 36 ||
[Analyze grammar]

yathaikasūkṣmadeho'pi dehī janmani janmani |
dehairanekatāmeti tatā devo'pi mūrtibhiḥ || 37 ||
[Analyze grammar]

parasya puruṣasyaiva śaktayaḥ koṭiśo'parāḥ |
jātināmasvarūpāṇāṃ bhedād bhinnā iva sthitāḥ || 38 ||
[Analyze grammar]

śarīraṃ bhautikaṃ prāpya karmabhiḥ svairupārjitaiḥ |
dīrghaṃ bhramanti saṃsāre te vai saṃsāriṇo janāḥ || 39 ||
[Analyze grammar]

śubhena karmaṇā yānti gatimūrdhvamukhīṃ śubhām |
aśubhenāśubhaṃ caiva tathā gatimadhomukhīm || 40 ||
[Analyze grammar]

pumāṃso vyākṛte magnāścidrūpā api te svataḥ |
aśaktāḥ svaṃ paraṃ jñātumāśrayadhvāntamohitāḥ || 41 ||
[Analyze grammar]

rāgadveṣādayasteṣāṃ doṣāḥ prakṛtisambhavāḥ |
saṃsāravāsanāmeva kurvantyasya pṛthagvidhām || 42 ||
[Analyze grammar]

teṣāṃ sattvaguṇodreke gatirdevatvamiṣyate |
mānuṣyaṃ rajasā proktaṃ tiryaktvaṃ tamasā tathā || 43 ||
[Analyze grammar]

evaṃ śarīriṇaḥ sarve gacchanti vividhāṃ gatim |
kālacakraṃ samāruhya bhramantyajñānamāyayā || 44 ||
[Analyze grammar]

yatra vyastāḥ samastā vā dharmādyāḥ sāttvikā guṇāḥ |
sa priyo'syāpriyaścānyo yatrādharmādayaḥ sthitāḥ || 45 ||
[Analyze grammar]

pralayānte tu samprāpte nirvyāpāraḥ paraḥ pumān |
vijñānaghanarūpo'sau parame vyomni tiṣṭhati || 46 ||
[Analyze grammar]

yata evamato labdhvā śarīraṃ sarvasādhanam |
śubhaṃ karmaiva kartavyaṃ tatprasādāya mānavaiḥ || 47 ||
[Analyze grammar]

prasādite'smin sarveṣāṃ svavarṇāśramakarmabhiḥ |
sarve hastagatāḥ kāmā muktiścānte na durlabhā || 48 ||
[Analyze grammar]

kāryārthā mūrtayastasya lokānugrahahetavaḥ |
ataḥ sākāramiṣṭvemaṃ bhaktyāpyāḥ sarvasiddhayaḥ || 49 ||
[Analyze grammar]

bhaktyaiva parayā tuṣṭo devadevaḥ sa yoginām |
pūjādyanugrahāyādau rūpaṃ bheje caturbhujam || 50 ||
[Analyze grammar]

tasmāt tenaiva rūpeṇa dhyeyo'rcyaśca sadā budhaiḥ |
ākāre'smin kṛtā pūjā stutirvā dhyānameva vā || 51 ||
[Analyze grammar]

vidhinā śāstradṛṣṭena deva eva kṛtā bhavet |
udayāyāparaḥ pūjyo nirvāṇāya paraḥ pumān || 52 ||
[Analyze grammar]

pūrvāhṇe cāparāhṇe ca pūjanaṃ śasyate tayoḥ |
śyāmamaṣṭabhujaṃ devaṃ kalpayitvā savāhanam || 53 ||
[Analyze grammar]

sāyudhaṃ saparīvāramudayārthī prapūjayet |
śuddhasphaṭikasaṅkāśaṃ śaṅkhacakragadādharam || 54 ||
[Analyze grammar]

caturbhujamanantasthaṃ yajenmokṣāya bhaktitaḥ |
sṛṣṭibījaṃ viduḥ padmaṃ cakraṃ sthitinibandhanam || 55 ||
[Analyze grammar]

gadaśaṅkhau ca saṃhāramuktyarthau sarvadā smṛtau |
sarvatattvayutasyaiva pūjā saṃhāramārgataḥ || 56 ||
[Analyze grammar]

dhyānaṃ phalānapekṣitvamiti mokṣārthināṃ kramaḥ |
uttarottarabhūyiṣṭhaṃ karmavāgbuddhyupāsanam || 57 ||
[Analyze grammar]

tāmasaṃ rājasaṃ caiva sāttvikaṃ ca tathā bhavet |
samayo'gre samācāraḥ svādhyāyo dravyasaṅgrahaḥ || 58 ||
[Analyze grammar]

buddhiryāgaḥ stitirdhyānamityevaṃ vidhiraṣṭadhā |
dvividhaḥ puruṣo bhakto dīkṣito'dīkṣitastathā || 59 ||
[Analyze grammar]

dīkṣitaḥ sarvakartā'nyaḥ samayārcanamātrabhāk |
kriyārcā samayo bhaktaviśvāsaḥ pūjanādaraḥ || 60 ||
[Analyze grammar]

naḥ kathāśrutiḥ śāntiranājīvo vratāṣṭakam |
svārāmotpāditaiḥ puṣpairvanyaiḥ krītaistu vā'rcayet || 61 ||
[Analyze grammar]

pratigrāhyaṃ na pūjārthaṃ dātureva phalaṃ yataḥ |
alābhe gandhapuṣpābhyām puṣpairapi samarcayet || 62 ||
[Analyze grammar]

puṣpālābhe tu toyena toyālābhe tu cetasā || 63 ||
[Analyze grammar]