Chapter 10

bhūya eva ca rājendra śṛṇu me vacanaṃ hitam |
yathā sa devapravaraḥ kathāyāmevamabravīt || 1 ||
[Analyze grammar]

ikṣvākūṇāṃ kule jāto bhaviṣyati sudhārmikaḥ |
rājā daśaratho nāmnā śrīmān satyapratiśravaḥ || 2 ||
[Analyze grammar]

aṅgarājena sakhyaṃ ca tasya rājño bhaviṣyati |
kanyā cāsya mahābhāgā śāntā nāma bhaviṣyati || 3 ||
[Analyze grammar]

putrastvaṅgasya rājñastu lomapāda iti śrutaḥ |
taṃ sa rājā daśaratho gamiṣyati mahāyaśāḥ || 4 ||
[Analyze grammar]

anapatyo'smi dharmātmañ śāntābhartā mama kratum |
āhareta tvayājñaptaḥ saṃtānārthaṃ kulasya ca || 5 ||
[Analyze grammar]

śrutvā rājño'tha tadvākyaṃ manasā sa vicintya ca |
pradāsyate putravantaṃ śāntā bhartāramātmavān || 6 ||
[Analyze grammar]

pratigṛhya ca taṃ vipraṃ sa rājā vigatajvaraḥ |
āhariṣyati taṃ yajñaṃ prahṛṣṭenāntarātmanā || 7 ||
[Analyze grammar]

taṃ ca rājā daśaratho yaṣṭukāmaḥ kṛtāñjaliḥ |
ṛśyaśṛṅgaṃ dvijaśreṣṭhaṃ varayiṣyati dharmavit || 8 ||
[Analyze grammar]

yajñārthaṃ prasavārthaṃ ca svargārthaṃ ca nareśvaraḥ |
labhate ca sa taṃ kāmaṃ dvijamukhyādviśāṃ patiḥ || 9 ||
[Analyze grammar]

putrāścāsya bhaviṣyanti catvāro'mitavikramāḥ |
vaṃśapratiṣṭhānakarāḥ sarvalokeṣu viśrutāḥ || 10 ||
[Analyze grammar]

evaṃ sa devapravaraḥ pūrvaṃ kathitavān kathām |
sanatkumāro bhagavānpurā devayuge prabhuḥ || 11 ||
[Analyze grammar]

sa tvaṃ puruṣaśārdūla tamānaya susatkṛtam |
svayameva mahārāja gatvā sabalavāhanaḥ || 12 ||
[Analyze grammar]

anumānya vasiṣṭhaṃ ca sūtavākyaṃ niśamya ca |
sāntaḥpuraḥ sahāmātyaḥ prayayau yatra sa dvijaḥ || 13 ||
[Analyze grammar]

vanāni saritaścaiva vyatikramya śanaiḥ śanaiḥ |
abhicakrāma taṃ deśaṃ yatra vai munipuṃgavaḥ || 14 ||
[Analyze grammar]

āsādya taṃ dvijaśreṣṭhaṃ lomapādasamīpagam |
ṛṣiputraṃ dadarśādau dīpyamānamivānalam || 15 ||
[Analyze grammar]

tato rājā yathānyāyaṃ pūjāṃ cakre viśeṣataḥ |
sakhitvāttasya vai rājñaḥ prahṛṣṭenāntarātmanā || 16 ||
[Analyze grammar]

lomapādena cākhyātamṛṣiputrāya dhīmate |
sakhyaṃ saṃbandhakaṃ caiva tadā taṃ pratyapūjayat || 17 ||
[Analyze grammar]

evaṃ susatkṛtastena sahoṣitvā nararṣabhaḥ |
saptāṣṭadivasān rājā rājānamidamabravīt || 18 ||
[Analyze grammar]

śāntā tava sutā rājan saha bhartrā viśāmpate |
madīyaṃ nagaraṃ yātu kāryaṃ hi mahadudyatam || 19 ||
[Analyze grammar]

tatheti rājā saṃśrutya gamanaṃ tasya dhīmataḥ |
uvāca vacanaṃ vipraṃ gaccha tvaṃ saha bhāryayā || 20 ||
[Analyze grammar]

ṛṣiputraḥ pratiśrutya tathetyāha nṛpaṃ tadā |
sa nṛpeṇābhyanujñātaḥ prayayau saha bhāryayā || 21 ||
[Analyze grammar]

tāvanyonyāñjaliṃ kṛtvā snehāt saṃśliṣya corasā |
nanandaturdaśaratho lomapādaśca vīryavān || 22 ||
[Analyze grammar]

tataḥ suhṛdamāpṛcchya prasthito raghunandanaḥ |
paurebhyaḥ preṣayāmāsa dūtān vai śīghragāminaḥ |
kriyatāṃ nagaraṃ sarvaṃ kṣiprameva svalaṃkṛtam || 23 ||
[Analyze grammar]

tataḥ prahṛṣṭāḥ paurāste śrutvā rājānamāgatam |
tathā pracakrustat sarvaṃ rājñā yat preṣitaṃ tadā || 24 ||
[Analyze grammar]

tataḥ svalaṃkṛtaṃ rājā nagaraṃ praviveśa ha |
śaṅkhadundubhinirghoṣaiḥ puraskṛtya dvijarṣabham || 25 ||
[Analyze grammar]

tataḥ pramuditāḥ sarve dṛṣṭvā taṃ nāgarā dvijam |
praveśyamānaṃ satkṛtya narendreṇendrakarmaṇā || 26 ||
[Analyze grammar]

antaḥpuraṃ praveśyainaṃ pūjāṃ kṛtvā tu śāstrataḥ |
kṛtakṛtyaṃ tadātmānaṃ mene tasyopavāhanāt || 27 ||
[Analyze grammar]

antaḥpurāṇi sarvāṇi śāntāṃ dṛṣṭvā tathāgatām |
saha bhartrā viśālākṣīṃ prītyānandamupāgaman || 28 ||
[Analyze grammar]

pūjyamānā ca tābhiḥ sā rājñā caiva viśeṣataḥ |
uvāsa tatra sukhitā kaṃ cit kālaṃ saha dvijā || 29 ||
[Analyze grammar]