Chapter 49

[English text for this chapter is available]

munaya ūcuḥ |
bhagavañjaimine sarvaṃ vedavedāṃgapāraga |
tvadanugrahato'smābhirmāhātmyaṃ jagadīśituḥ || 1 ||
[Analyze grammar]

kṣetrarājasya tasyaiva yātrāṇāṃ caiva sarvaśaḥ |
bhagavadbhojanocchiṣṭaprāśanādiphalaṃ tathā || 2 ||
[Analyze grammar]

iṃdradyumnasya rājño vai vṛttāṃtamatidurlabham |
nīlamādhavarūpaṃ tu dārubrahmaprakāśanam || 3 ||
[Analyze grammar]

śrutaṃ tvadvadanāṃbhojādgalitaṃ tadyathāvidhi |
idānīṃ śrotumicchāmastvatto hi vadatāṃ vara || 4 ||
[Analyze grammar]

sarvaṃ vistarato brahmanvayaṃ sarve mudānvitāḥ |
purāṇaśravaṇasyaiva yaduktaṃ phalameva tat || 5 ||
[Analyze grammar]

ko vā tasya vidhiścaiva kena vā syāttu sāṃgakam |
asmāsu cedanukrośo yathāvadvaktumarhasi || 6 ||
[Analyze grammar]

jaiminiruvāca |
sādhu sādhu muniśreṣṭhā yatpṛṣṭaṃ parayā mudā |
tatra me prītiratulā jātā romāṃcakāriṇī || 7 ||
[Analyze grammar]

tadvaḥ sarvaṃ pravakṣyāmi śṛṇudhvaṃ sāvadhānataḥ |
purāṇaśravaṇāraṃbhe yathāvibhavamātmanaḥ || 8 ||
[Analyze grammar]

ādau saṃkalpya vidhivadbrāhmaṇaṃ śuddhavaṃśajam |
avyaṃgāvayavaṃ śāṃtaṃ svaśākhaṃ svapurodhasam || 9 ||
[Analyze grammar]

sarvaśāstrārthatattvajñaṃ bhūṣaṇairatiśobhanaiḥ |
vastracaṃdanamālyādyairvṛṇuyātpāṭhasaṃśrutau || 10 ||
[Analyze grammar]

kṛtāṃjalipuṭo bhūtvā tataḥ saṃprārthayeddvijam |
tvaṃ viṣṇurviṣṇureva tvaṃ na tu bhedaḥ kadācana || 11 ||
[Analyze grammar]

nirvighnaṃ me bhavatveva tvatprasādātprasīda ca |
tato vṛtaṃ brāhmaṇaṃ ca bahumūlyāsane śubhe || 12 ||
[Analyze grammar]

vāsayitvā ca tasyaiva gale mālāṃ vinikṣipet |
mastake puṣpagarbhaṃ ca caṃdanairanulepayet || 13 ||
[Analyze grammar]

yasmāttasmiṃśca samaye vipro vyāsasamo mataḥ |
tenaiva brāhmaṇenaiva pustake viṣṇurūpake || 14 ||
[Analyze grammar]

kārayedvyāsapūjāṃ ca śrīkhaṇḍāgurupuṣpakaiḥ |
nānopacārai rucirairbhakṣyabhojyādikairapi || 15 ||
[Analyze grammar]

bhaktyā cāsanadānādividhiḥ kāryo dine dine |
sāṃprataṃ kathayāmyevaṃ śrūyatāṃ śrotṛlakṣaṇam || 16 ||
[Analyze grammar]

gatānugatikānāṃ ca nivāsārthaṃ tathā dvijāḥ |
āsanāni yathāyogyaṃ racayitvā svayaṃ tathā || 17 ||
[Analyze grammar]

śubhāsanāṃtarastho hi bhavedutkaṇṭhamānasaḥ |
athavā saṃskṛte deśe sarvaiḥ saha vasedbhuvi || 18 ||
[Analyze grammar]

vyāsasyāgre nivasatirāsane nocca eva ca |
kṛtasnāno mudā yukto dhārayaṃñchuklavāsasī || 19 ||
[Analyze grammar]

ācāṃtaḥ śaṃkhacakrāditilakānvitavigrahaḥ |
manasā bhāvayedviṣṇuṃ viśvāsaṃ kārayedbhṛśam || 20 ||
[Analyze grammar]

purāṇe brāhmaṇe caiva deve ca maṃtrakarmaṇi |
tīrthe vṛddhasya vacane viśvāsaḥ phaladāyakaḥ || 21 ||
[Analyze grammar]

ato munivarāḥ sarvaṃ puṇyaṃ viśvāsakāraṇam |
pāṣaṃḍādikasaṃbhāṣaṃ vṛthālāpaṃ prayatnataḥ || 22 ||
[Analyze grammar]

purāṇaśravaṇe kāle sarvaciṃtāṃ ca varjayet |
anena vidhinā viprāḥ pratyahaṃ śṛṇuyānmudā || 23 ||
[Analyze grammar]

tataḥ pāṭhe samāpte ca karatālādikairmuhuḥ |
jaya kṛṣṇa jagannātha hara ityādināmabhiḥ || 24 ||
[Analyze grammar]

vistārayedyathākāśe śrūyate śabda eva saḥ |
evaṃ ca pratyahaṃ kuryātprītaye muravairiṇaḥ || 25 ||
[Analyze grammar]

tato graṃthasamāptau ca viṣṇuprīṇanatatparaḥ |
viśeṣādvastramālyādicaṃdanairbhūṣaṇaistathā |
bhūṣayetparayā bhaktyā vipraṃ vyāsasamaṃ dvijāḥ || 26 ||
[Analyze grammar]

ātmaśaktyā pradadyācca dakṣiṇāṃ vai yathāvidhi |
ye ye pradadyuryadyacca mattastacchṛṇutādhunā || 27 ||
[Analyze grammar]

rājānaḥ kariṇo dadyuḥ sālaṃkārānsulakṣaṇān |
kṣatriyā evamevaṃ ca te vai rājasamā matāḥ || 28 ||
[Analyze grammar]

brāhmaṇāḥ pustakāṃścaiva viṣṇorarcākaraṃḍikāḥ |
kanakaṃ rajataṃ caiva dhānyaṃ vastraṃ svabhaktitaḥ || 29 ||
[Analyze grammar]

viśaśca ratnabhūṣāḍhyānsindhudeśodbhavānapi |
gāśca lakṣaṇasaṃyuktāḥ savatsāśca payasvinīḥ || 30 ||
[Analyze grammar]

anyacca kanakādyaṃ ca tyajeyurdharmatatparāḥ |
śūdrāḥ pradadyuḥ parayā mudā saṃyuktamānasāḥ || 31 ||
[Analyze grammar]

vāsāṃsi ca suvarṇaṃ ca dhānyaṃ ratnāni gāstathā |
nānālaṃkārayuktāśca ghaṭoghnīrbālagarbhiṇīḥ || 32 ||
[Analyze grammar]

evaṃ vai dakṣiṇāṃ dadyādyena saṃtuṣyate guruḥ |
ātmanaḥ śaktito viprā vittaśāṭhyaṃ na kārayet || 33 ||
[Analyze grammar]

śāṃtikaṃ pauṣṭikaṃ caiva vratodvāhādi karma ca |
mokṣasya sādhakaṃ karma purāṇaśravaṇaṃ tathā || 34 ||
[Analyze grammar]

yajñādikaṃ ca dānaṃ ca vrataṃ nānāvidhaṃ tathā |
yadi ceddakṣiṇāhīnaṃ tadā bhavati niṣphalam || 35 ||
[Analyze grammar]

asurāḥ karmaṇastasya haraṃti phalameva tat |
yathā strīṇāṃ ca lāvaṇyaṃ bhartṛsnehavivarjitam || 36 ||
[Analyze grammar]

yuddhātpalāyitānāṃ ca pṛṣṭhaṃ kṛtvā dhanuṣmatām |
vinā dhāvanamaśvānāṃ duṣṭatvaṃ hi yathā dvijāḥ || 37 ||
[Analyze grammar]

mūkatveneva pāṃḍityaṃ sarvaśāstravipaścitām |
hīnaṃ dakṣiṇayā yadyatkarma tadvacca niṣphalam || 38 ||
[Analyze grammar]

dānena kṣīyate yasmāduritānāṃ kadaṃbakam |
dakṣiṇeti tathā viprā gīyate śāstravedibhiḥ || 39 ||
[Analyze grammar]

tato viprānbhojayedvai yathāśaktiprakalpitaiḥ |
karpūreṇa ca khaṃḍena sarpiṣā pāyasairyutaiḥ || 40 ||
[Analyze grammar]

ṣaḍvidhairannapānādyaiḥ susvādairamṛtopamaiḥ |
tebhyopi svarṇavastrādi yathāśaktyā pradāpayet || 41 ||
[Analyze grammar]

etadvaḥ kathitaṃ sarvaṃ purāṇaśravaṇasya ca |
sāṃgopāṃgavidhānaṃ ca yena syātsaphalaṃ tvidam |
idānīṃ bho muniśreṣṭhāḥ kimanyajjñātumicchatha || 42 ||
[Analyze grammar]

munaya ūcuḥ |
aho'smākaṃ mahābhāgyaṃ yatpāpaughavināśanam |
purāṇaśravaṇasyaiva phalamasmābhireva ca || 43 ||
[Analyze grammar]

sāṃgopāṃgavidhānaṃ ca śrutaṃ tvanmukhapaṃkajāt |
dhanyāḥ sma kṛtapuṇyāḥ sma saṃsāre vigatajvarāḥ || 44 ||
[Analyze grammar]

idānīmātmaśaktyā vai dīyate bhavate mune |
dakṣiṇā phalasaṃprāptyai prasannastvaṃ gṛhāṇa ca || 45 ||
[Analyze grammar]

ityuktavaṃto munayo hyakiṃcanāḥ samitkuśaṃ puṣpaphalākṣatādikam |
klṛptvā ca tasmai munayaḥ sumuktāḥ kṣetrottamaṃ jagmuratipraharṣitāḥ || 46 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetra māhātmye jaiminiṛṣisaṃvāda ekonapaṃcāśattamo'dhyāyaḥ || 49 ||
[Analyze grammar]