Chapter 36

[English text for this chapter is available]

|| sūta uvāca |
śrutvā viṣṇukṛtaṃ divyaṃ paranāmavibhūṣitam |
sahasranāmasvastotraṃ prasanno'bhūnmaheśvaraḥ || 1 ||
[Analyze grammar]

parīkṣārthaṃ harerīśaḥ kamaleṣu maheśvaraḥ |
gopayāmāsa kamalaṃ tadaikaṃ bhuvaneśvaraḥ || 2 ||
[Analyze grammar]

paṃkajeṣu tadā teṣu sahasreṣu babhūva ca |
nyūnamekaṃ tadā viṣṇurvihvalaśśivapūjane || 3 ||
[Analyze grammar]

hṛdā vicāritaṃ tena kuto vai kamalaṃ gatam |
yātaṃ yātu sukhenaiva mannetraṃ kamalaṃ na kim || 4 ||
[Analyze grammar]

jñātveti netramuddhṛtya sarvasattvāvalambanāt |
pūjayāmāsa bhāvena stavayāmāsa tena ca || 5 ||
[Analyze grammar]

tataḥ stutamatho dṛṣṭvā tathābhūtaṃ haro harim |
mā meti vyāharanneva prādurāsījjagadguruḥ || 6 ||
[Analyze grammar]

tasmādavatatārāśu maṇḍalātpārthivasya ca |
pratiṣṭhitasya hariṇā svaliṃgasya maheśvaraḥ || 7 ||
[Analyze grammar]

yathoktarūpiṇaṃ śambhuṃ tejorāśisamutthitam |
namaskṛtya puraḥ sthitvā sa tuṣṭāva viśeṣataḥ || 8 ||
[Analyze grammar]

tadā prāha mahādevaḥ prasannaḥ prahasanniva |
samprekṣya kṛpayā viṣṇuṃ kṛtāṃjalipuṭaṃ sthitam || 9 ||
[Analyze grammar]

śaṅkara uvāca |
jñātaṃ mayedaṃ sakalaṃ tava cittepsitaṃ hare |
devakāryaṃ viśeṣeṇa devakāryyaratātmanaḥ || 10 ||
[Analyze grammar]

devakāryyasya siddhyarthaṃ daityanāśāya cāśramam |
sudarśanākhyaṃ cakraṃ ca dadāmi tava śobhanam || 11 ||
[Analyze grammar]

yadrūpaṃ bhavatā dṛṣṭaṃ sarvalokasukhāvaham |
hitāya tava deveśa dhṛtaṃ bhāvaya taddhruvam || 12 ||
[Analyze grammar]

raṇājire smṛtaṃ tadvai devānāṃ duḥkhanāśanam |
idaṃ cakramidaṃ rūpamidaṃ nāmasahasrakam || 13 ||
[Analyze grammar]

ye śṛṇvanti sadā bhaktyā siddhi syādanapāyinī |
kāmānāṃ sakalānāṃ ca prasādānmama suvrata || 14 ||
[Analyze grammar]

sūta uvāca |
evamuktvā dadau cakraṃ sūryāyutasamaprabham |
sudarśanaṃ svapādotthaṃ sarvaśatruvināśanam || 15 ||
[Analyze grammar]

viṣṇuścāpi susaṃskṛtya jagrāhodaṅmukhastadā |
namaskṛtya mahādevaṃ viṣṇurvacanamabravīt || 16 ||
[Analyze grammar]

viṣṇuruvāca |
śṛṇu deva mayā dhyeyaṃ paṭhanīyaṃ ca kiṃ prabho |
duḥkhānāṃ nāśanārthaṃ hi vada tvaṃ lokaśaṃkara || 17 ||
[Analyze grammar]

sūta uvāca |
iti pṛṣṭastadā tena santuṣṭastu śivo'bravīt |
prasannamānaso bhūtvā viṣṇuṃ devasahāyakam || 18 ||
[Analyze grammar]

|| śiva uvāca |
rūpaṃ dhyeyaṃ hare me hi sarvānarthapraśāntaye |
anekaduḥkhanāśārthaṃ paṭha nāmasahasrakam || 19 ||
[Analyze grammar]

dhāryyaṃ cakraṃ sadā me hi savārbhīṣṭasya siddhaye |
tvayā viṣṇo prayatnena sarvacakravaraṃ tvidam || 20 ||
[Analyze grammar]

anye ca ye paṭhiṣyanti pāṭhayiṣyanti nityaśaḥ |
teṣāṃ duḥkhaṃ na svapne'pi jāyate nātra saṃśayaḥ || 21 ||
[Analyze grammar]

rājñā ca saṃkaṭe prāpte śatāvṛttiṃ caredyadā |
sāṅgaḥ ca vidhisaṃyuktaṃ kalyāṇaṃ labhate naraḥ || 22 ||
[Analyze grammar]

roganāśakaraṃ hyetadvidyāvittadamuttamam |
sarvakāmapradaṃ puṇyaṃ śivabhaktipradaṃ sadā || 23 ||
[Analyze grammar]

yaduddiśya phalaṃ śreṣṭhaṃ paṭhiṣyanti narāstviha |
sapsyante nātra saṃdehaḥ phalaṃ tatsatyamuttamam || 24 ||
[Analyze grammar]

yaśca prātassamutthāya pūjāṃ kṛtvā madīyikām |
paṭhate matsamakṣaṃ vai nityaṃ siddhirna dūrataḥ || 25 ||
[Analyze grammar]

aihikīṃ siddhimāpnoti nikhilāṃ sarvakāmikām |
ante sāyujyamuktiṃ vai prāpnotyatra na saṃśayaḥ || 26 ||
[Analyze grammar]

sūta uvāca |
evamuktvā tadā viṣṇuṃ śaṃkaraḥ prītamānasaḥ |
upaspṛśya karābhyāṃ tamuvāca giriśaḥ punaḥ || 27 ||
[Analyze grammar]

|| śiva uvāca |
varado'smi suraśreṣṭha varānvṛṇu yathepsitān |
bhaktyā vaśīkṛto nūnaṃ stavenānena suvrataḥ || 28 ||
[Analyze grammar]

|| sūta uvāca |
ityukto devadevena devadevaṃ praṇamya tam |
suprasannataro viṣṇussāṃjalirvākyamabravīt || 29 ||
[Analyze grammar]

viṣṇuruvāca |
yathedānīṃ kṛpānātha kriyate cānyataḥ parā |
kāryyā caiva viśeṣeṇa kṛpālutvāttvayā prabho || 30 ||
[Analyze grammar]

tvayi bhaktirmahādeva prasīda varamuttamam |
nānyamicchāmi bhaktānāmārttayo naiva yatprabho || 31 ||
[Analyze grammar]

sūta uvāca |
tacchrutvā vacanaṃ tasya dayā vānsutarāṃ bhavaḥ |
pasparśa ca tadaṃgaṃ vai prāha śītāṃśuśekharaḥ || 32 ||
[Analyze grammar]

śiva uvāca |
mayi bhaktissadā te tu hare syādanapāyinī |
sadā vandyaśca pūjyaśca loke bhava surairapi || 33 ||
[Analyze grammar]

viṣvaṃbhareti te nāma sarvapāpaharaṃ param |
bhaviṣyati na saṃdeho matprasādātsurottama || 34 ||
[Analyze grammar]

|| sūta uvāca |
ityuktvāṃtardadhe rudrassarvadeveśvaraḥ prabhuḥ |
paśyatastasya viṣṇostu tatraiva ca munīśvarāḥ || 35 ||
[Analyze grammar]

janārdano'pi bhagavānvacanācchaṅkarasya ca |
prāpya cakraṃ śubhaṃ tadvai jaharṣāti svacetasi || 36 ||
[Analyze grammar]

kṛtvā dhyānaṃ ca tacchambhoḥ stotrametannirantaram |
papāṭhādhyāpayāmāsa bhaktebhyastadupādiśat || 37 ||
[Analyze grammar]

iti pṛṣṭaṃ mayākhyātaṃ śṛṇvatāmpāpahārakam |
ataḥparaṃ ca kiṃ śreṣṭhāḥ praṣṭumicchatha vai punaḥ || 38 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāṃ śivasahasranāmastotraphalavarṇanaṃ nāma ṣaṭtriṃśodhyāyaḥ || 36 ||
[Analyze grammar]