Chapter 19

[English text for this chapter is available]

|| nārada uvāca |
brahmanvidhe mahābhāga kiṃ jātaṃ tadanaṃtaram |
kathaya tvaṃ prasādena tāṃ kathāṃ pāpanāśinīm || 1 ||
[Analyze grammar]

|| brahmovāca |
śrūyatāṃ sā kathā tāta yajjātaṃ tadanaṃtaram |
tava snehātpravakṣyāmi śivalīlāṃ mudāvahām || 2 ||
[Analyze grammar]

dhairyasya vyasanaṃ dṛṣṭvā mahāyogī maheśvaraḥ |
viciṃtitaṃ manasyevaṃ vismito'titataḥ param || 3 ||
[Analyze grammar]

|| śiva uvāca |
kimu vighnāḥ samutpannāḥ kurvatastapa uttamam |
kena me vikṛtaṃ cittaṃ kṛtamatra kukarmiṇā || 4 ||
[Analyze grammar]

kuvarṇanaṃ mayā prītyā parastryupari vai kṛtam |
jāto dharmavirodho'tra śrutisīmā vilaṃghitā || 5 ||
[Analyze grammar]

|| brahmovāca |
viciṃtyetthaṃ mahāyogī parameśassatāṃ gatiḥ |
diśo vilokayāmāsa paritaśśaṃkitastadā || 6 ||
[Analyze grammar]

vāmabhāge sthitaṃ kāmaṃ dadarśākṛṣṭabāṇakam |
svaśaraṃ kṣeptukāmaṃ hi garvitaṃ mūḍhacetasam || 7 ||
[Analyze grammar]

taṃ dṛṣṭvā tādṛśaṃ kāmaṃ girīśasya parātmanaḥ |
saṃjātaḥ krodhasaṃmardastatkṣaṇādapi nārada || 8 ||
[Analyze grammar]

kāmaḥ sthito'ntarikṣe sa dhṛtvā tatsaśaraṃ dhanuḥ |
cikṣepāstraṃ durnivāramamoghaṃ śaṃkare mune || 9 ||
[Analyze grammar]

babhūvāmoghamastraṃ tu moghaṃ tatparamātmani |
samaśāmyattatastasminsaṃkuddhe parameśvare || 10 ||
[Analyze grammar]

moghībhūte śive svestre bhayamāpāśu manmathaḥ |
cakaṃpe ca puraḥ sthitvā dṛṣṭvā mṛtyuṃjayaṃ prabhum || 11 ||
[Analyze grammar]

sasmāra tridaśānsarvānśakrādīnbhayavihvalaḥ |
sa smaro muniśārdūla svaprayāse nirarthake || 12 ||
[Analyze grammar]

kāmena susmṛtā devāśśakrādyāste munīśvara |
āyayuḥ sakalāste hi śaṃbhuṃ natvā ca tuṣṭuvuḥ || 13 ||
[Analyze grammar]

stutiṃ kurvatsu deveṣu kuddhasyāti harasya hi |
tṛtīyāttasya netrādvai nissasāra tato mahān || 14 ||
[Analyze grammar]

lalāṭa madhyagāttasmātsavahnirdrutasambhavaḥ |
jajvālorddhvaśikho dīptaḥ pralayāgnisamaprabhaḥ || 15 ||
[Analyze grammar]

utpatya gagane tūrṇaṃ niṣpatya dharaṇī tale |
bhrāmaṃbhrāmaṃ svaparitaḥ papāta medanīṃ pari || 16 ||
[Analyze grammar]

bhasmasātkṛtavānsādho madanaṃ tāvadeva hi |
yāvacca marutāṃ vācaḥ kṣamyatāṃ kṣamyatāmiti || 17 ||
[Analyze grammar]

hate tasminsmare vīre deva duḥkhamupāgatāḥ |
rurudurvihvalāścātikrośataḥ kimabhūditi || 18 ||
[Analyze grammar]

śvetāṃgā vikṛtātmā ca girirājasutā tadā |
jagāma maṃdiraṃ svaṃ ca samādāya sakhījanam || 19 ||
[Analyze grammar]

kṣaṇamātraṃ ratistatra visaṃjñā sābhavattadā |
bhartṛmṛtyujaduḥkhena patitā sā mṛtā iva || 20 ||
[Analyze grammar]

jātāyāṃ caiva saṃjñāyāṃ ratiratyaṃtavihvalā |
vilalāpa tadā tatroccaraṃtī vividhaṃ vacaḥ || 21 ||
[Analyze grammar]

|| ratiruvāca |
kiṃ karomi kva gacchāmi kiṃ kṛtaṃ daivatairiha |
matsvāminaṃ samāhūya nāśayāmāsuruddhatam || 22 ||
[Analyze grammar]

hā hā nātha smara svāminprāṇapriya sukhaprada |
idaṃ tu kimabhūdatra hā hā priya priyeti ca || 23 ||
[Analyze grammar]

|| brahmovāca || |
itthaṃ vilapatī sā tu vadaṃtī bahudhā vacaḥ |
hastau pādau tadāsphālya keśānatroṭayattadā || 24 ||
[Analyze grammar]

tadvilāpaṃ tadā śrutvā tatra sarve vanecarāḥ |
abhavanduḥkhitāssarve sthāvarā api nārada || 25 ||
[Analyze grammar]

etasminnaṃtare tatra devāśśakrādayo'khilāḥ |
ratimūcussamāśvāsya saṃsmaraṃto maheśvaram || 26 ||
[Analyze grammar]

|| devā ūcuḥ |
kiṃcidbhasma gṛhītvā tu rakṣa yatnādbhayaṃ tyaja |
jīvayiṣyati sa svāmī lapsyase tvaṃ punaḥ priyam || 27 ||
[Analyze grammar]

sukhadātā na kopyasti duḥkhadātā na kaścana |
sarvo'pi svakṛtaṃ bhuṃkte devāñśocasi vai vṛthā || 28 ||
[Analyze grammar]

|| brahmovāca |
ityāśvāsya ratiṃ devāssarve śivamupāgatāḥ |
suprasādya śivaṃ bhaktyā vacanaṃ cedamabruvan || 29 ||
[Analyze grammar]

|| devā ūcuḥ |
bhagavañchrūyatometadvacanaṃ naśśubhaṃ prabho |
kṛpāṃ kṛtvā maheśāna śaraṇāgatavatsala || 30 ||
[Analyze grammar]

suvicāraya suprītyā kṛti kāmasya śaṃkara |
kāmenaitatkṛtaṃ yatra na svārthaṃ tanmaheśvara || 31 ||
[Analyze grammar]

duṣṭena pīḍitairdevaistārakeṇā'khilairvibho |
karma tatkāritaṃ nātha nānyathā viddhi śaṃkara || 32 ||
[Analyze grammar]

ratirekākinī deva vilāpaṃ duḥkhitā satī |
karoti giriśa tvaṃ ca tāmāśvāsaya sarvadā || 33 ||
[Analyze grammar]

saṃhāraṃ kartukāmo'si krodhenānena śaṃkara |
daivataissaha sarveṣāṃ hatavāṃstaṃ yadi smaram || 34 ||
[Analyze grammar]

duḥkhaṃ tasyā raterdṛṣṭvā naṣṭaprāyāśca devatāḥ |
tasmāttvayā ca karttavyaṃ ratyāśokāpanodanam || 35 ||
[Analyze grammar]

|| brahmovāca |
ityākarṇya vacasteṣāṃ prasanno bhagavāñchivaḥ |
devānāṃ sakalānāṃ ca vacanaṃ cedamabravīt || 36 ||
[Analyze grammar]

|| śiva uvāca |
devāśca ṛṣayassarve madvacaśśṛṇutādarāt |
matkopena ca yajjātaṃ tattathā nānyathā bhavat || 37 ||
[Analyze grammar]

anaṃgastāvadeva syātkāmo ratipatiḥ prabhuḥ |
yāvaccāvataretkṛṣṇo dharaṇyāṃ rukmiṇīpatiḥ || 38 ||
[Analyze grammar]

dvārakāyāṃ yadā sthitvā putrānutpādayiṣyati |
tadā kṛṣṇastu rukmiṇyāṃ kāmamutpādayiṣyati || 39 ||
[Analyze grammar]

pradyumnanāma tasyaiva bhaviṣyati na saṃśayaḥ |
jātamātraṃ tu taṃ putraṃ śaṃbarassaṃhariṣyati || 40 ||
[Analyze grammar]

hṛtvā prāsya samudraṃ taṃ śaṃbaro dānavottamaḥ |
mṛtaṃ jñātvā vṛthā mūḍho nagaraṃ svaṃ gamiṣyati || 41 ||
[Analyze grammar]

tāvacca nagaraṃ tasya rate stheyaṃ yathāsukham |
tatraiva svapateḥ prāptiḥ pradyumnasya bhaviṣyati || 42 ||
[Analyze grammar]

tatra kāmo militvā taṃ hatvā śambaramāhave |
bhaviṣyati sukhī devāḥ pradyumnākhyassvakāminīm || 43 ||
[Analyze grammar]

tadīyaṃ caiva yaddravyaṃ nītvā sa nagaraṃ punaḥ |
gamiṣyati tayā sārddhaṃ devāssatyaṃ vaco mama || 44 ||
[Analyze grammar]

brahmovāca |
iti śrutvā vacaśśaṃbhordevā ūcuḥ praṇamya tam |
kiṃciducchvasitāścitte karau baddhvā natāṃgakāḥ || 45 ||
[Analyze grammar]

devā ūcuḥ |
devadeva mahādeva karuṇāsāgara prabho |
śīghraṃ jīvaya kāmaṃ tvaṃ rakṣa prāṇān raterhara || 46 ||
[Analyze grammar]

brahmovāca |
ityākarṇyāmaravacaḥ prasannaḥ parameśvaraḥ |
punarbabhāṣe karuṇāsāgarassakaleśvaraḥ || 47 ||
[Analyze grammar]

śiva uvāca |
he devāssuprasanno'smi jīvayiṣyāmi cāṃtare |
kāmaḥ sa madgaṇo bhūtvā vihariṣyati nityaśaḥ || 48 ||
[Analyze grammar]

nākhyeyamidamākhyānaṃ kasyacitpuratassurāḥ |
gacchata svasthalaṃ dukhaṃ nāśayiṣyāmi sarvataḥ || 49 ||
[Analyze grammar]

brahmovāca |
ityuktvāṃtardadhe rudro devānāṃ stuvatāṃ tadā |
sarve devāssuprassannā babhūvurgatavismayāḥ || 50 ||
[Analyze grammar]

tatastāṃ ca samāśvāsya rudrasya vacane sthitāḥ |
uktvā vacastadīyaṃ ca svaṃ svaṃ dhāma yayurmune || 51 ||
[Analyze grammar]

kāmapatnī samādiṣṭaṃ nagaraṃ sā gatā tadā |
pratīkṣamāṇā taṃ kālaṃ rudrādiṣṭaṃ munīśvara || 52 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe kāmanāśavarṇanaṃ nāmaikonaviṃśo'dhyāyaḥ || 19 ||
[Analyze grammar]