Chapter 49

|| ekonapañcāśo'dhyāyaḥ ||
(atha prāyaścittavidhiḥ)

śrīḥ-
bhagavan sarvalokeśa sarvajña vadatāṃvara|
pūrvoktakarṣaṇādyeṣu hyutsavānteṣu karmasu|| 49.1 ||
dhāmnaḥ kadācid bimbasya vaikalye bhedane'pi vā|
pūjāyāścāpi lope vā spṛṣṭe vā pūjaketaraiḥ|| 49.2 ||
ācāryaguṇahīnena pūjite vālayādiṣu|
caṇḍālādipraveśe vā pratiṣṭhādiṣu karmasu|| 49.3 ||
kartavyaṃ na kṛtaṃ cedvā hyanyathā vā kṛtaṃ bhavet|
prāyaścittaṃ bhavet kiṃcidasti cettadvadasva me|| 49.4 ||
śrībhagavān-
śāstroktavidhinā sarvaṃ kartavyaṃ karṣaṇādikam|
nyūnaṃ vā viparītaṃ vā śāstrīyasya bhavedyadi|| 49.5 ||
tattatkāryānurodhena prāyaścittaṃ bhavet kila|
devālayasya nirmāṇe prathamaṃ varayed gurum|| 49.6 ||
maduktagotrasaṃbhūtaṃ pāraṃparyeṇa dīkṣitam|
tathāvidhena guruṇā cakrābje'pyabhiṣecitam|| 49.7 ||
pāñcarātrārthatattvajñaṃ vṛddhaṃ bhaktaṃ hareḥ priyam|
yajamānaḥ prārthayīta sa tu kṛṣyādikaṃ caret|| 49.8 ||
tathāvidhena guruṇā kṛṣyādi na kṛtaṃ yadi|
anyena vā kṛtamapi śilāsaṃgrahaṇādikam|| 49.9 ||
tathādhāraśilānyāso mūrdheṣṭa(ka)śilā api|
mantrahīnena vinyāso (1)garbhavinyāsameva ca|| 49.10 ||
(1.gra. garbhanyasana)
pratiṣṭhāsamaye pūrvaṃ mayoktaṃ dīkṣitaṃ gurum|
varayitvā tu tenaiva tattatkālocitāni ca|| 49.11 ||
yathākramaṃ tu kṛtvaiva pratiṣṭhā(2)mārabhet tataḥ|
kṛṣyādikāryābhāve'pi mantrairhomaiśca tāḥ kriyāḥ|| 49.12 ||
(2.gra. mārabheta hi|)
kṛtvottaraṃ pratiṣṭhāṃ vai prārabheta vicakṣaṇaḥ|
anyathā yajamānasya bimbasya tvālayasya ca|| 49.13 ||
rājño rāṣṭrasya nāśaḥ syāt tasmāt kuryādyathāvidhi|
piṇḍikāyāṃ mūlabimbaṃ ratnanyāsādipūrvakam|| 49.14 ||
sthāpayenmantrasahitaṃ yathāśakti yathāvidhi|
anyathā devasāṃnidhyaṃ na bhavet kamalekṣaṇe|| 49.15 ||
kathaṃcidapi vinyasya mūlamantrāyutaṃ japet|
pratiṣṭhādiṣu kāryeṣu prapā vā maṇḍapaṃ tu vā|| 49.16 ||
pramāṇādadhikā(3) vedinyūnā vā toraṇāni ca|
dhvajā vā pālikādyāśca ghaṭāḥ karakameva ca|| 49.17 ||
(3.gra. dadhikaṃ)
kuṇḍāni sruk‌sruvau vāpi samidhaśca tathā rame|
pūrvoktānāṃ doṣaśāntyai śāntihomaṃ samācaret|| 49.18 ||
aṣṭottarasahasraṃ ca manumaṣṭākṣaraṃ japet|
anyakāryaniyuktāstu ghaṭādyā ye ca mṛnmayāḥ|| 49.19 ||
kuṇḍāni sruk‌sruvā cāpi darbhāḥ paridhayastathā|
devacihnitavastrāṇi dhvajāni dvāratoraṇān|| 49.20 ||
dravyāṇi hutaśeṣāṇi dārupātrāṇi vai rame|
pratiṣṭhādiṣu kāryeṣu nopayuñjyāt kadācana|| 49.21 ||
yadi mohena gṛhṇīyāt tatkarma punarācaret|
śāntihomaṃ ca kurvīta brāhmaṇānapi bhojayet|| 49.22 ||
aṅkurānarpayet pūrvaṃ mṛtsaṃgrahaṇapūrvakam|
akṛtaṃ cet kṛtaṃ vāpi bhakṣitaṃ mūṣikādibhiḥ|| 49.23 ||
bhavedvā raktavarṇaṃ tu notpadyetāthavā rame|
vyatyāsena sthāpitā vā śarāvaghaṭapālikāḥ|| 49.24 ||
svasthānātpatitā vāpi bhinnā vā mantrasaṃskṛtāḥ|
mantrasaṃskārahīnā vā homādyā na kṛtā yadi|| 49.25 ||
[raktādidoṣasaṃyuktā mantrahīnāśca vai yadi|]
pātrāṇi śodhayitvā tu punaraṅkuramarpayet|| 49.26 ||
sthānād bhraṣṭāni pātrāṇi parityajya ca tatsthale|
sthāpayitvā punastāni teṣu bījāni vāpayet|| 49.27 ||
ayutaṃ mūlamantraṃ ca kuryācchāntiṃ ca deśikaḥ|
pratiṣṭhādiṣu kāryeṣu stāpiteṣu ghaṭeṣvapi|| 49.28 ||
bhinno vā patito vāpi chidrito vāpi bhārgavi|
spṛṣṭo vā'spṛśyamanujairdevaṃ tasmāttu maṇḍale|| 49.29 ||
samāvāhya ghaṭaṃ tvanyaṃ lakṣaṇena samanvitam|
tasmiṃsthāne tu saṃsthāpya maṇḍalād devatāṃ rame|| 49.30 ||
āvāhya pūrvavat pūjāṃ kuryād deśikasattamaḥ|
vamrībhirdūṣito vāpi spṛṣṭo vā patitādibhiḥ|| 49.31 ||
ghaṭe devaṃ samāvāhya vediṃ saṃśodhya śilpibhiḥ|
saṃstīrya taṇḍulāṃstasminnānāvarṇāṃstu śāstravit|| 49.32 ||
cakrābjaṃ vilikhet pūrvaṃ prokṣayet puṇyavāriṇā|
kumbhād devaṃ samāvāhya pūrvavat pūjayed guruḥ|| 49.33 ||
dvādaśārṇāyutaṃ japtvā śāntihomaṃ ca kārayet|
prapāṃ vedīṃśca kuṇḍāni toraṇāni dhvajāṃstathā|| 49.34 ||
kṛtvaivopakramet karma hyaṅgānyetāni deśikaḥ|
akṛtvopakrametkarma tatsarvaṃ niṣphalaṃ bhavet|| 49.35 ||
tattatkṛtvā punaḥ karma prārabheta vicakṣaṇaḥ|
kumbhānāmavakāśeṣu vinyasedaṣṭamaṅgalān|| 49.36 ||
ghaṭeṣu pratimāścaiva nikṣipenmantrapūrvakam|
akṛtvā yadi kurvīta pūrvoktavidhinācaret|| 49.37 ||
anirvāṇasya dīpasya nirvāṇe dīpayet punaḥ|
netramantrāyutairhutvā śāntihomaṃ samācaret|| 49.38 ||
vahnau kuṇḍe sthale culyāṃ saṃskṛte'nugatiṃ gate|
aspṛśyaiśca tathā spṛṣṭe mahiṣyājyādibhirhute|| 49.39 ||
agnipratiṣṭhāṃ karmādau mohādavidhinā kṛte|
punaragniṃ pratiṣṭhāpya śāstradṛṣṭena vartmanā|| 49.40 ||
mūlamantrasahasreṇa juhuyāt sarpiṣāhutīḥ|
śāntihomaṃ tataḥ kuryāt śataṃ brāhmaṇabhojanam|| 49.41 ||
asamiddhe hute'gnau tu punarhomaṃ samācaret|
naimittikeṣu kāmyeṣu prāyaścittādikarmasu|| 49.42 ||
tadaṅgahomamanyasmin kuṇḍe vā sthaṇḍile'pi vā|
kuryādvā laukikāgnau tu vāstvīśakṣetrapālayoḥ|| 49.43 ||
mukhyāgnau yadi kurvīta punaragniṃ prakalpayet|
samitparidhidarbhāṇāṃ kūrcānāṃ haviṣāmapi|| 49.44 ||
ājyasthālyādipātrāṇāṃ tathā sruksruvayorapi|
tilājyādipadārthānāmekavastu vilopane|| 49.45 ||
hutaṃ nirarthakaṃ sarvaṃ tasmāt tāni tu saṃbhriyāt|
sarvathā homakāryeṣu tilamājyaṃ na lopayet|| 49.46 ||
tābhyāṃ viyuktahomasya prāyaścittaṃ na vidyate|
pratiṣṭhādiṣu kāryeṣu vartamāneṣu vai rame|| 49.47 ||
akasmāt pañcamo vāpi patitaḥ pātakī tu vā|
kuṣṭhī vāpyaṅgahīno vā pretāśaucavigarhitaḥ|| 49.48 ||
rajasvalā vā praviśecchālāṃ deśikasattamaḥ|
sarvavastūni saṃtyajya ghaṭādīni yathāpuram|| 49.49 ||
paryagnikaraṇaṃ kṛtvā gomayenānulipya ca|
puṇyāhavāriṇā prokṣya ghaṭādīn sthāpayet punaḥ|| 49.50 ||
yathākramaṃ punaḥ kuryādāditaḥ sarvakarmakam|
śālāmagniryadi dahet punaḥ kṛtvā tu maṇḍapam|| 49.51 ||
śāntihomaṃ (4)ca kurvīta kuryāt karma ca pūrvavat|
sahasraṃ brāhmaṇān devi bhojayet prabhusattamaḥ|| 49.52 ||
(4.gra. tataḥ kṛtvā)
ayutaṃ dvādaśārṇena nṛsūktena ca ṣoḍaśa|
agnipratiṣṭhā pūrvaṃ syāt tena śāntirbhaviṣyati|| 49.53 ||
vāstvīśasya kṣetrapasya pūjāṃ homaṃ ca kalpayet|
na kuryādyadi mohena tatkarma viphalaṃ bhavet|| 49.54 ||
pratiṣṭhāṅgaṃ jale vāso nayanonmīlanaṃ tathā|
śayanaṃ cābhiṣekaṃ ca mantranyasanameva ca|| 49.55 ||
tattavasaṃhārahomaṃ ca (5)ṣaḍaṃganyāsapūrvakam|
dvārapūjā kumbhapūjā dhvajapūjā ca nityaśaḥ|| 49.56 ||
(5.gra. vyomayānādisaṃskṛtim|)
cakrābjapūjanaṃ caiva kālayorhoma eva ca|
bījāvāpaṃ kumbhapūjā vedapārāyāṇaṃ tathā|| 49.57 ||
eteṣvanyatamābhāve sarvaṃ karma nirarthakam|
tāni karmāṇi kṛtvaiva punaḥ sthāpanamācaret|| 49.58 ||
adīkṣitairbrāhmaṇādyaiḥ spṛṣṭaśca pratilomajaiḥ|
āśocavadbhiḥ patitaiḥ kuṣṭhyapasmārarogibhiḥ|| 49.59 ||
śvagardabhādibhiḥ spaṣṭo nityakarmaparāṅmukhaiḥ|
tuluṣkapañcamādyaiśca saṃlāpyodakyayā saha|| 49.60 ||
rudhirārdraḥ svinnagātrastathā kopasamanvitaḥ|
paradārarataścāpi paradravyāpahārakaḥ|| 49.61 ||
mūko vā badhiro vāpi paṅgurvā mantravarjitaḥ|
saṃdhyādikarmahīnaśca paranindāparaḥ sadā|| 49.62 ||
duḥkhito vārcakaḥ pūjāmakarodyadi vai hareḥ|
taddoṣaśāntaye devaṃ pañcaviṃśatibhirghaṭaiḥ|| 49.63 ||
abhiṣicya tathā śāntimūrlamantrasahasrakaiḥ|
hutvā saṃpātamānīya devasya śirasi nyaset|| 49.64 ||
tataḥ pūjāṃ prakurvīta deśikendro yathākramam|
avagāhasnānapūrvaṃ pādaśaucamathācamam|| 49.65 ||
prokṣaṇaṃ puṇyasalilairmantranyasanameva ca|
bhūtaśuddhiṃ ca hṛdyāgaṃ pīṭhakalpanameva ca|| 49.66 ||
nirmālyādivisargaṃ ca sthānaśuddhiṃ bhṛgoḥ sute|
bimbaśuddhiṃ (6)tato devaṃ pūjayecca yathākramam|| 49.67 ||
(6.gra. ca kṛtvaiva)
eteṣvanyatamaṃ vāpi vinā pūjā bhavedyadi|
sā pūjā niṣphalaṃ jñeyā kṛtvā tattadyathāvidhi|| 49.68 ||
punaḥ pujāṃ prakurvīta taddoṣasyopaśāntaye|
dvādaśārṇajapaṃ kuryādaṣṭottarasahasrakam|| 49.69 ||
arghyādīnāṃ ca pātreṣu śāstroktadravyasaṃcayam|
nikṣipyaiva hareḥ pūjā kartavyā tulasīṃ tu vā|| 49.70 ||
tadabhāve tu sā pūjā niṣphalā tatpratikriyā|
mūlamantraśataṃ japtvā punardravyānvitairjalaiḥ|| 49.71 ||
pūjayedarghyadānādyaiḥ kṣīrasāgarasaṃbhave|
akasmāt dīpanirvāṇe pūjāmadhye gurūttamaḥ|| 49.72 ||
taddīpaṃ punaruddīpya netramantraśataṃ japet|
prāṇyaṅgasaṃbhavaistailairajoṣṭrādighṛtairapi|| 49.73 ||
tathā madhūkaheraṇḍapuṃnāgaphalasaṃbhavaiḥ|
tailernarānubhūtaiśca vastrakhaṇḍaiśca vartibhiḥ|| 49.74 ||
dīpayitvā guruḥ pūjāṃ karoti yadi vai rame|
devasya saṃnidhirna syāt taddoṣasya praśāntaye|| 49.75 ||
saṃśodhya dīpapātrāṇi goghṛtairdīpayet punaḥ|
pañcaviṃśatibhirdevaṃ kalaśaiḥ snāpayet purā|| 49.76 ||
śāntihomaṃ ca kṛtvaiva punaḥ pūjāṃ samārabhet|
dhūpādiṣūpacāreṣvekasminnakṛte sati|| 49.77 ||
taddoṣaśāntaye devi netramaṣṭottaraṃ japet|
punastatkarma kurvīta bhagavatprītaye'rcakaḥ|| 49.78 ||
antaḥpūjanakāle tu pidadhyācca kavāṭakam|
bāhyamaṇḍapapūjāyāṃ mahājanasamīpataḥ|| 49.79 ||
anācchādyaiva devasya pūjāṃ kuryād vicakṣaṇaḥ|
anyatrācchādanaṃ nityamannādyādinivedane|| 49.80 ||
vāhanādiṣvalaṃkāre no ced doṣo mahān bhavet|
devālayāntardevasya hyabhiṣeko mahān bhavet|| 49.81 ||
ālayasya bahi(:)sthāne na kuryādabhiṣecanam|
vyatyāsaṃ yadi kurvīta japenmūlāyutaṃ guruḥ|| 49.82 ||
dhūpapātraṃ dīpapātramarghyādīnāṃ ca bhājanam|
nīrājanārthapātraṃ ca chatraṃ ghaṇṭā ca cāmare|| 49.83 ||
patākādiśca nipatenmūlamantraśataṃ japet|
eteṣu yasya kasyāpi saṃbhedo jāyate yadi|| 49.84 ||
punaḥ saṃdhāya tattacca pañcagavyena śodhayet|
pratiṣṭhākālamārabhya pūjākāle tu yatkṛtam|| 49.85 ||
ghaṇṭāghoṣo vedapāṭhastathā tauryatrikādikam|
pūjākāle pratidinaṃ kuryāt tattajjalodbhave|| 49.86 ||
yadi ghaṇṭādighoṣeṇa hīnaṃ cet pūjanaṃ hareḥ|
taddoṣasya praśāntyarthaṃ dvādaśārṇāyutaṃ japet|| 49.87 ||
punastaiḥ pūjanaṃ kuryād devasya prītaye guruḥ|
kalṛptavastvādyabhāvena kālamekaṃ dvayaṃ tu vā|| 49.88 ||
kālatritayameva syāt pūjanaṃ kamale yadi|
pūrvoktakāladravyādyaistattatkālādanantaram|| 49.89 ||
pūjayed doṣaśāntyarthaṃ śāntihomaṃ samācaret|
evamekāhahīne tu navabhiḥ kalaśairharim|| 49.90 ||
saṃsnāpya śāntihomaṃ ca kārayet taddinocitaiḥ|
dravyairdviguṇitairdevaṃ pūjayeddharimavyayam|| 49.91 ||
ārabhya dvidinaṃ yāvat pakṣāntaṃ na kṛtaṃ yadi|
ekāśītighaṭairdevaṃ snāpayetacchāntihomavat|| 49.92 ||
kṛtvā dviguṇatairdravyaiḥ (7)pūjayecca yathākramam|
(8)tāvadvāsarasaṃkhyāyāḥ brāhmaṇānapi bhojayet|| 49.93 ||
(7.gra. tāvato vāsarasya ca|)
(8.gra. pūjayenmantravaddevaṃ)
māsaikasminnatikrānte pūjāhīnena vai rame|
aṣṭottaraśatairdevaṃ kalaśairabhiṣicya ca|| 49.94 ||
śāntihomaṃ dvijātīnāṃ sahasrasyāpi bhojanam|
kṛtvā dviguṇitairdravyaiḥ pūjayecca yathākramam|| 49.95 ||
pūjāhīne vatsare tu saṃprokṣaṇamataścaret|
trivarṣāntaṃ mānuṣasya pūjanaṃ na kṛtaṃ yadi|| 49.96 ||
pratiṣṭhāpya yathāśāstraṃ pūjayed deśikottamaḥ|
svayaṃvyakteṣu divyeṣu pūjālopo na dūṣaṇam|| 49.97 ||
yathā vaikuṇṭhaloke'haṃ svayaṃvyakte tathaiva ca|
atra māṃ pūjakaḥ ko nu nityaṃ pūjayati priye|| 49.98 ||
tathaiva tatra sāṃnidhyāt pūjālopo na doṣakṛt|
divyeṣvapi ca pūrvaṃ hi devaireva pratiṣṭhitaḥ|| 49.99 ||
tadārabhya ca devāśca krameṇāgatya nityaśaḥ|
mānuṣāṇāmadṛśyāste pūjayanti ramāpatim|| 49.100 ||
atasteṣāṃ ca bimbānāṃ pūjālopo na vidyate|
tathāpi mānuṣe loke svayaṃvyaktādiṣu priye|| 49.101 ||
parasparavirodhena hyalakṣyeṇa ca kopataḥ|
na kuryādyadi pūjāṃ tu pāñcarātrārthatattavavit|| 49.102 ||
ajñānāṃ mānavānāṃ tu manastoṣaṇahetave|
sahasrārādhānaṃ kuryādaṣṭottaraśatairghaṭaiḥ|| 49.103 ||
abhiṣekaṃ purā kṛtvā tataḥ śāntiṃ samāpya ca|
pīṭhārcanaṃ tu kṛtvaiva devamāvāhayed rame|| 49.104 ||
akṛtvā pīṭhayajanaṃ devamāvāhayedyadi|
sā pūjā niṣphalā jñeyā devatāsaṃnidhirna ca|| 49.105 ||
dvādaśārṇasahasraṃ tu doṣasyāsya praśāntaye|
japitvā ca yathāśāstraṃ pīṭhapūjāṃ ca kalpayet|| 49.106 ||
akṛtvāvāhanaṃ (9)pūjā karmārcādiṣu yā pūjā(bhavet)|
sā pūjā niṣphalā jñeyā punarāvāhya pūjayet|| 49.107 ||
(9.gra. pūjāṃ karmārcādiṣu vai rame|)
layāyāgaṃ bhogayāgaṃ kriyāhīnamathāpi vā|
mantramudrāvihīnaṃ ca viparyāsena vā kṛtam|| 49.108 ||
eṣāṃ doṣavinirmuktyai japenmūlasahasrakam|
punastāni prakurvīta yathāśāstraṃ vicakṣaṇaḥ|| 49.109 ||
dvārasthitānāṃ devānāṃ tathāvaraṇavāsinām|
pūjādīne purā teṣāṃ tattanmantraśataṃ japam|| 49.110 ||
kṛtvā tu mantravatpūjāṃ kuryādarcakasattamaḥ|
vyatyāsātpūjane vāpi pūrvoktaṃ tu samācaret|| 49.111 ||
nīrājanāntimaṃ pūrvaṃ mūlabimbaṃ samarcayet|
tataḥ karmādibimbānāṃ mantravatkramaśe bhavet|| 49.112 ||
anarcya mūlabimbaṃ vā samakālena vā rame|
vyatyāsena ca vā kuryāt pūjanaṃ gurusattamaḥ|| 49.113 ||
taddoṣaśāntaye devi japenmūlasahasrakam|
punaḥ pūjāṃ prakurvīta mūlārcādeṣu mantravat|| 49.114 ||
alaṃkārāsanānte tu kuryānnīrājanaṃ hareḥ|
na kuryādyadi mohena mūlamantraśataṃ japet|| 49.115 ||
tato yathāvatkurvīta nīrājanavidhiṃ guruḥ|
adīkṣitairudakyādidṛṣṭaṃ vā pratilomajaiḥ|| 49.116 ||
patitaiḥ śvasṛgālādyairdṛṣṭaṃ vā mūṣikādibhiḥ|
āghrātaṃ makṣikābhiśca sevitaṃ ca pipīlikaiḥ|| 49.117 ||
krimikaiśanakhaiḥ spṛṣṭaṃ bhinnabhāṇḍasthitaṃ tu vā|
atyuṣṇamatiśītaṃ vā vyañjanaiśca vivarjitam|| 49.118 ||
amantrasaṃskṛtaṃ vā syādanyamuddiśya vā kṛtam|
tuṣapāṣāṇaśakalaiḥ saṃyutaṃ nāvadhāritam|| 49.119 ||
guḍānnena vihīnaṃ na haraye vinivedayet|
pañcāśatā tvekahīnaiḥ kalaśaiḥ snāpayeddharim|| 49.120 ||
juhuyānmūlamantreṇa sahasreṇa gurūttamaḥ|
śāntihomaṃ ca kṛtvaiva pūnaḥ pūjāṃ samācaret|| 49.121 ||
[svayaṃvyaktādimartyāntaṃ samaṃ pūjā pratikriyā|]
nivedayet tato'nnādyaṃ śuddhaṃ vyañjanasaṃyutam|| 49.122 ||
kaṇaistu bhavati vyādhistuṣaidaridryasaṃbhavaḥ|
kṛmibhiḥ putranāśaḥ syāt keśairdāravināśanam|| 49.123 ||
pāṣāṇairmaraṇaṃ siddhaṃ bhasmanā kalaho bhavet|
aṅgārairvahninā bādho bhagnairbhaṅgastu vigrahe|| 49.124 ||
itthaṃ doṣo bhaveddevi yajamānānavekṣaṇāt|
tasmāt taddoṣabhītaḥ san yajamāno dine dine|| 49.125 ||
prātarārabhya rātryantaṃ paśyetkāryāṇyatandritaḥ|
[nivedanārthamānītaṃ madhye'nnaṃ patitaṃ yadi|| 49.126 ||
mahānasasthitānnādīn taṭākādiṣu nikṣipet|
tato mahānasaṃ puṇyasalilaiḥ prokṣya vācayet|| 49.127 ||]
anyatra pacanāgārād dīkṣitetarasaṃskṛtam|
amantrasaṃskṛtaṃ cāpi saṃspṛṣṭaṃ mākṣikādibhiḥ|| 49.128 ||
ayogyairapi saṃspṛṣṭaṃ prabhūtānnaṃ bhṛgoḥ sute|
astramantreṇa saṃśodhya śoṣaṇādīni kārayet|| 49.129 ||
nivedayet tato'nnādyamalpe tvitthaṃ na cācaret|
[bhogalakṣmīvīralakṣmyoḥ pūjanaṃ yugapadyadi|| 49.130 ||
bhogalakṣmyāḥ purā kuryād vīralakṣmyāstataḥ param|]
pūjānte sarvabījāni mātrādānaṃ gulānnavat|| 49.131 ||
nivedayecca devāya viśeṣayajanaiḥ saha|
mātrādānavihīne tu śāntihomaṃ samācaret|| 49.132 ||
punastattatsamarpyātha namaskṛtvā kṣamāpayet|
saṃkalpya pūjāṃ homāntamutsavāntamathāpi vā|| 49.133 ||
pūjakena tu madhyāhne hotavyaṃ na kṛtaṃ yadi|
rātrihomena sahitaṃ dviguṇaṃ juhuyād guruḥ|| 49.134 ||
pūrṇāhutiṃ ca dviguṇairdravyaireva (10)kriyād guruḥ|
ekāhānmāsaparyantaṃ homastu na kṛto yadi|| 49.135 ||
(10.gra. tu kārayet|)
pañcāśataikahīnastu kalaśaiḥ snāpayeddharim|
tatkāladviguṇairdravyairjuhuyānmantravittamaḥ|| 49.136 ||
māsādūrdhvaṃ vatsarāntaṃ homo na kriyate yadi|
ekāśītighaṭairdevamabhiṣicya ca goghṛtaiḥ|| 49.137 ||
mūlamantrasahasreṇa śāntiṃ ca (11)juhuyāttataḥ|
tatkāladviguṇairdravyaiḥ pūrṇāhutyā ca bhāmini|| 49.138 ||
(11.gra. juhuyāda guruḥ|)
itthaṃ varṣādapi bhavet trivarṣāntaṃ rame yadi|
manuṣyanirmitaṃ bimbaṃ saṃprokṣyaiva tu pūjayet|| 49.139 ||
balihīne tvitthameva viśeṣaḥ kathyate'dhunā|
āvāhite balidravye deve ca patite yadi|| 49.140 ||
tad‌dravyād‌dhṛdaye devamāvāhya tadanantaram|
śuddhamanyatsamādāya dravyaṃ deśikasattamaḥ|| 49.141 ||
tasminnāvāhya hṛdayād devaṃ dikṣu baliṃ kṣipet|
taddoṣaśāntaye devaṃ kṣīreṇaivābhiṣecayet|| 49.142 ||
śāntihomaṃ ca kurvīta mūlamantraśataṃ japet|
yānād bimbe nipatite spṛṣṭe vā patitādibhiḥ|| 49.143 ||
baliberaṃ tu navabhiḥ kalaśairabhiṣicya ca|
śāntihomaṃ ca kurvīta japenmūlasahasrakam|| 49.144 ||
tālanartanagānānāṃ vihīne dīpanāśane|
tattaddoṣasya śāntyarthaṃ tattatkāle gurūttamaḥ|| 49.145 ||
japenmūlasahasraṃ tu punastattatprakalpayet|
balidānātparaṃ (12)devaṃ mūlādutsavakautuke|| 49.146 ||
(12.mūlānmadhyāhne makhakautuke|)
āvāhya yānamāropya kārayedutsavaṃ guruḥ|
pūjāmātraṃ tu vā kuryāt kālayorubhayorapi|| 49.147 ||
itthaṃ tu na kṛtaṃ devi taddoṣasya praśāntaye|
dvādaśārṇasahasraṃ tu japtvā śāntiṃ samācaret|| 49.148 ||
[ātapaiśca mahāvātadhūlibhirvarṣabindubhiḥ|
spṛśeccedbhagavadbimbaṃ snāpayennavabhirghaṭaiḥ|| 49.149 ||]
kṛtvotsavaṃ vā sāyāhne rātri(13)pūjāṃ samācaret|
dvijātīnāṃ tu maraṇaṃ grāmādau saṃbhavedyadi|| 49.150 ||
(13.gra. pūjāmupakramet|)
yāvadgrāmasya madhyasthaḥ śavastiṣṭhati vallabhe|
grāmādestāvadāśaucaṃ tāvatpūjāṃ na cācaret|| 49.151 ||
grāmādvinirgate prete vāstuśāntyādikaṃ caret|
guruḥ pūjāṃ prārabheta na tataḥ pūrvamācaret|| 49.152 ||
pūjane tu samārabdhe mṛtiścettadanantaram|
upakrāntāṃ tu tāṃ pūjāṃ saṃgraheṇa samāpayet|| 49.153 ||
prete grāmādviniryāte grāmaśuddhiṃ vidhāya ca|
tato yathāvat pūjāṃ ca kuryād deśikasattamaḥ|| 49.154 ||
strīśūdrāṇāṃ ca bālānāṃ maraṇaṃ saṃbhavedyadi|
grāmādīnāṃ na cāśaucaṃ (14)syāt kṣīrodasaṃbhave|| 49.155 ||
(14.gra. tathā brahmacatuḥśate|)
ekādaśadhanurbhyo'ntaḥ śūdrastrīśavadūṣite|
bahirniṣkāsya tatpaścāt pūjanaṃ prākramed guruḥ|| 49.156 ||
[dhanuḥsaṃkhyākalpanaṃ tu dvitīyadvāramāditaḥ|
grāmamārgeṇa kartavyaṃ na tu tiryakprakalpayet|| 49.157 ||]
vidyamāne śave pūjāṃ kuryāccet kamalālaye|
tatkālasaṃskṛtānnāni haraye vā nivedayet|| 49.158 ||
ekāśītighaṭairdevaṃ snāpayenmantrapūrvakam|
kṛtvā śāntiṃ tataḥ pūjāṃ yathāvat kārayed guruḥ|| 49.159 ||
vaikhānasaṛṣirdevi brahmaṇo nakhaniḥsṛtaḥ|
himavacchikhare ramye gaṅgādvāre tapasyati|| 49.160 ||
pāñcarātrasamaṃ śāstraṃ matpūjārthaṃ kariṣyati|
tacchiṣyā bhṛgumukhyādyā vaikhānasamunīritam|| 49.161 ||
śāstraṃ vaikhānasaṃ nāma hyadhītya munipuṃgavāḥ|
tacchāstroktavimānādibimbāni hyālayāni ca|| 49.162 ||
tacchāstreṇa pratiṣṭhāpya pūjayiṣyanti vai rame|
evaṃ śaivādiśāstrāṇi bhaviṣyanti ca bhūtale|| 49.163 ||
tadārādhakamartyaiśca tacchāstreṇa ca dīkṣitaiḥ|
etacchāstrānyasiddhāntadīkṣitairanyagotribhiḥ|| 49.164 ||
nūtanairdīkṣitairvāpi paradīkṣāvivarjitaiḥ|
mantrasiddhāntabimbāni na (15)spṛśyeta kadācana|| 49.165 ||
(15.gra. spṛśyeran)
yadi spṛśeyurdeveśaṃ pañcaviṃśatibhirghaṭaiḥ|
snāpayitvā (16)tataḥ śāntiṃ homaṃ caiva samācaret|| 49.166 ||
(16.gra. tu vidhivat śāntihomaṃ samācaret|)
(17)[adīkṣito vārcako'pi pūjaketaravaṃśajaḥ|]
dīkṣito'pi ca sanyāsī kṣatriyo vaiśya eva vā|| 49.167 ||
(17.gra. pustake ayamardhaślokaḥ kuṇḍalito dṛśyate|)
adīkṣito brāhmaṇo vā kuṣṭhī yakṣmā ca mūkakaḥ|
kāṇo vāpyaṅgahīno vā pratilomaja eva vā|| 49.168 ||
strī vāpyanupanīto vā kuṇḍo vā golako'pi vā|
spṛśedyadi hariṃ devi navabhiḥ kalasairguruḥ|| 49.169 ||
abhiṣicya japenmūlamantraṃ japtvā sahasrakam|
śāṃtihomaṃ ca kurvīta taddoṣasyāpanuttaye|| 49.170 ||
caṇḍālapulkasau vāpi parastrīsakta eva vā|
ajñātajātirdasyurvā patito jātidūṣitaḥ|| 49.171 ||
mleccho vā praviśedantaḥ spṛśedvā bimbamabjaje|
tadgatāni ca pātrāṇi śuddhiṃ kṛtvā yathāvidhi|| 49.172 ||
pāñcarātroktavidhinā (18)vāstuśāntiṃ samāpya ca|
praviṣṭamātre taddevamekāśītighaṭairguruḥ|| 49.173 ||
(18.gra. vāstuśuddhiṃ samācaret|)
snāpayedyadi pūrvoktāḥ spṛśanti sma hariṃ rame|
saṃprokṣaṇaṃ tataḥ kuryāt śāstradṛṣṭena vartmanā|| 49.174 ||
eteṣu yo vā ko vāpi garbhāntarmṛtinvabhūt|
(19)bimbasya vā śavasparśaḥ saṃbhaveddoṣaśāntaye|| 49.175 ||
(19.gra. bimbasya vā śavasparśaṃ bhavettadoṣaśāntaye|)
(20)pratiṣṭhāṃ śāstrasaṃsiddhāṃ nayanonmīlanaṃ tathā|
jalādhivāsaṃ ca vinā kuryāddeśikasattamaḥ|| 49.176 ||
(20.gra. punaḥ pratiṣṭhāṃ kurvīta jalādhivasanaṃ tathā|
         tattvanyāsaṃ ca śayanaṃ nayanonmīlanaṃ vinā||)
[hīrṇoddhārapratiṣṭhāyāmevaṃ kuryādvicakṣaṇaḥ|]
brāhmaṇakṣatriyaviśāṃ spṛṣṭe vā dūṣite śavaiḥ|| 49.177 ||
abhiṣicya ghṛtairdevaṃ prokṣaṇaṃ ca samācaret|
śūdrasya vānulomānāṃ śavaiḥ spṛṣṭe'tha dūṣite|| 49.178 ||
pūrvoktavidhimācarya sahasrārādhanaṃ caret|
mūlārcā yadi vā vastraiścitrairvā mṛṇmayaistu vā|| 49.179 ||
kṛtā cettāṃ parityajya tatsthāne'nyāṃ niveśayet|
pratiṣṭhāṃ ca yathāśāstraṃ kuryāddeśikasattamaḥ|| 49.180 ||
sarvatra bāhmaṇānāṃ ca sahasraṃ bhojayet prabhuḥ|
[bhaṭṭācāryaḥ sādhakāśca tathaiva paricārakāḥ|| 49.181 ||
āsaneṣvāsikāṃ bhuktiṃ śayane ca yathātatham|
kuryuḥ karmaṇyadhikṛtā doṣo naiva tadā bhavet|| 49.182 ||
anye cet kuryuravaniṃ lepayed gomayāmbubhiḥ|
puṇyāhasalilairdevamandiraṃ prokṣayed guruḥ|| 49.183 ||]
eteṣu pañcamādyeṣu yo vā ko vāpi mānavaḥ|
praviṣṭo vā mṛto vāpi pākaśālāṃ purā rame|| 49.184 ||
tatrasthāgniṃ parityajya kuṇḍacullisthamapyatha|
sarvatra gomayā(21)lepaṃ prokṣaṇaṃ pañcagavyataḥ|| 49.185 ||
(21.gra. lepaḥ)
puṇyāhasalilaiścāpi vāstuhomādipūrvakam|
pratiṣṭhāpya ca tacchālāṃ tato'gniṃ ca yathāvidhi|| 49.186 ||
kalpayitvā tato homaṃ pacanaṃ cāpi kārayet|
prathamāvaraṇād devi dhvajastambhāvasānakam|| 49.187 ||
caṇḍālādiṣu yāteṣu navabhiḥ kalaśairharim|
mṛtaścet tatra yaḥ kaścid devamaṣṭottaraiḥ śataiḥ|| 49.188 ||
snāpayitvā tu kalaśaiḥ śāntihomaṃ samācaret|
dhvajastambhādupakramya rathyāvaraṇamantataḥ|| 49.189 ||
prathamāvaraṇādau tu śakṛnmūtrādidūṣite|
[pūrvokteṣu praviṣṭeṣu puṇyāhaiḥ prokṣayet (22)jalaiḥ]|| 49.190 ||
(22.gra. sthalam|)
tatkṣaṇāt tadbahirnītvā mārjanāllepanādibhiḥ|
śodhayitvā bhuvaṃ paścāt prokṣayet puṇyavāribhiḥ|| 49.191 ||
garbhagehe tu deveśaṃ snāpayennavabhirghaṭaiḥ|
prathamāvaraṇādyeṣu (23)prākāre yatra kutracit|| 49.192 ||
(23.gra. prākāreṣvapi pañcasu|)
advāreṇa bahirnītvā mṛtaṃ jantuṃ (24)gurūttamaḥ|
tataḥ pūrvoktavidhinā prāyaścittaṃ samācaret|| 49.193 ||
(24.gra. naraṃ tathā)
gardabhaśvasṛgālādyairvānareṇa ca potriṇā|
kāko vā kukkuṭo vāpi gṛdhro vā śyena eva vā|| 49.194 ||
godhā vā saraṭo vāpi rājamūṣaka eva vā|
[mārjālasarpamaṇḍūkagaulībhiḥ saraṭādibhiḥ|| 49.195 ||]
spṛśecca pañcaviṃśadbhiḥ kalaśaiḥ snāpayeddharim|
[pipīlikādyairbimbasya sparśadoṣo na vidyate|| 49.196 ||]
eteṣāṃ garbhagehāntarmṛtirvā sparśanaṃ tu vā|
aṣṭottaraśatairdevaṃ kalaśairabhiṣicya ca|| 49.197 ||
śāntihomaṃ tataḥ kuryāt sahasrārādhanaṃ caret|
prathamāvaraṇādyeṣu prākāreṣvapi saptasu|| 49.198 ||
varṇānāṃ prasave devi pañcamādistriyastu vā|
prasūtāścet tadā(25) tatra mṛtāviva vidhirbhavet|| 49.199 ||
(25.gra. devi)
mṛgāṇāṃ pakṣiṇāṃ vāpi prasave mṛtivadbhavet|
sarvatra gomayālepo brāhmaṇānāṃ tu bhojanam|| 49.200 ||
prokṣaṇaṃ puṇyasalilaiḥ pañcagavyaistathaiva ca|
ārādhanaṃ bhagavato hareḥ kuryād vicakṣaṇaḥ|| 49.201 ||
mānuṣasthāpitānāṃ tu bimbānāmitthamīritam|
svayaṃvyaktādibimbeṣu mṛnmayādiṣu vai rame|| 49.202 ||
saṃprāpteṣvapi doṣeṣu prokṣayitvā yathāvidhi|
sahasrārādhanaṃ kṛtvā nityapūjāṃ (26)samācaret|| 49.203 ||
(26.upakramet)
evaṃ doṣān guṇān vīkṣya tattatkālocitān guruḥ|
prāyaścittaṃ purā kṛtvā nityapūjāṃ samācaret|| 49.204 ||
rātrau pūjāṃ balerdānamutsavaṃ ca yathāvidhi|
yāmārdhapūjanaṃ cāpi kṛtvā mūlāt tato rame|| 49.205 ||
āvāhya śayanārcāyāṃ pūjayitvā tato guruḥ|
kṣīrānnādi nivedyātha śāyayecchayane śubhe|| 49.206 ||
[tattatkarmārthabimbe tu tatra saṃnihite sati|
tattatkarmaviśeṣāṇāṃ vyatyayaṃ na samācaret|| 49.207 ||
tattatkarmasu bimbaṃ tu hīnaṃ cet pūjanādiṣu|
samastapūjanaṃ kuryāt karmārcāyāṃ gurūttamaḥ|| 49.208 ||]
kuryāt pratidinaṃ bhadre gītanāṭyasamanvitam|
eṣotsavastvavaśyaṃ hi rājarāṣṭrābhivṛddhaye|| 49.209 ||
na kuryādyadi mohena śrīḥ prabhorvimukhī bhavet|
madhukṣīraghṛtairdevaṃ prātaḥ saṃsnāpya deśikaḥ|| 49.210 ||
kṣīrānnādīni sarvāṇi dviguṇāni nivedayet|
[sūtakaṃ vā mṛtāśaucaṃ pūjārambhe śrutaṃ yadi|| 49.211 ||
āśaucamācared vidvān pūjānte vidhivadrame|]
nitye naimittike kāmye hyutsave snapane tathā|| 49.212 ||
prāyaścitte pratiṣṭhāyāṃ prokṣaṇe deśikottamaḥ|
vapanasnānapūrvaṃ hi rakṣābandhaṃ tathartvijaḥ|| 49.213 ||
(27)kṛtvaiva kāryajātāni kuryurdevi yathākramam|
abadhvā yadi mohena (28)kuryāccedutsavādikam|| 49.214 ||
(27.gra. bad‌dhvaiva)
(28.gra. kuryuśce)
śāntihomaṃ (29)tataḥ kṛtvā mūlamaṣṭottaraṃ japet|
tataḥ śāstroktavidhinā badhvā pratisaraṃ rame|| 49.215 ||
(29.gra. purā)
āditastatkriyāṃ kuryādanyathā tvakṛtaṃ kṛtam|
mūlādīnāṃ ca bimbānāmitthameva vidhirbhavet|| 49.216 ||
[mahotsavādyutsaveṣu karaste deśikasya ca|
devadevasya naṣṭe tu chihne (chinne) vā kautuke guruḥ|| 49.217 ||
sūtrāntaraṃ punarbaghvā śāntihomaṃ samācaret|]
pratiṣṭhādiṣu kāryeṣu baddhapratisaro guruḥ|| 49.218 ||
vyādhitaścet tasya putraḥ śiṣyo vā dīkṣitaḥ svayam|
anujñayā gurostasya snātvā vapanapūrvakam|| 49.219 ||
badhvā sūtraṃ tadārabhya kriyāśeṣaṃ (30)samāpayet|
madhye mṛto yadi gurustacchiṣyastvanyagotriyaḥ|| 49.220 ||
(30.samācaret|)
rakṣāṃ kṛtvā tato devaṃ pañcaviṃśatibhirghaṭaiḥ|
snāpayitvā śāntihomaṃ kṛtvā karma samācaret|| 49.221 ||
rakṣāmaṅgalasūtraṃ yo badhnan varteta deśikaḥ|
śāvāśaucaṃ sūtakaṃ ca tasya nāsti jalodbhave|| 49.222 ||
snānamātraṃ bhavatyeva kiṃcidbhedastvathartvijām|
karmamadhye'pi cāśaucaṃ mṛte tvātmānvite bhavet|| 49.223 ||
pitā mātā jyeṣṭhaputro bhāryā cātmānvitāḥ smṛtāḥ|
tatkārye deśikastvanyaṃ dīkṣayitvā niyojayet|| 49.224 ||
pratiṣṭhādiṣu kāryeṣu dīkṣito gurusattamaḥ|
ekaputrastasya pitā prāpnuyāt pañcatāṃ yadi|| 49.225 ||
baddhapratisaro gatvā śmaśānaṃ pādukāṃ dharan|
asthisaṃcayanāntaṃ ca karma kṛtvā yathāvidhi|| 97.226 ||
snātvā cālayamāgatya ghaṭaiḥ ṣoḍaśabhistataḥ|
abhiṣikto mantravidbhirdevakāryaṃ tataścaret|| 49.227 ||
utsavānte devakāryaṃ samāpya ca yathāvidhi|
āśaucaṃ karmakāṇḍoktaṃ daśarātraṃ samācaret|| 49.228 ||
tarpaṇaṃ piṇḍadānaṃ ca śrāddhaṃ cāpi sapiṇḍanam|
pāñcarātroktamathavā kuryād deśikasattamaḥ|| 49.229 ||
devaṃ tamutsavānte ca śatenāṣṭottarairghaṭaiḥ|
snāpayecchāntihomaṃ ca kuryādācāryasattamaḥ|| 49.230 ||
dīkṣito mṛtasaṃghānnaṃ śūdrānnaṃ tailasevanam|
mithunībhavanaṃ caiva varjayet kalahaṃ tathā|| 49.231 ||
yadi kurvīta mohena pañcaviṃśatibhirghaṭaiḥ|
devaṃ saṃsnāpayetpūrvaṃ sahasrārādhanaṃ caret|| 49.232 ||
mahānadīsnānapūrvaṃ dīkṣitaḥ pañcagavyakam|
dvādaśārṇasahasrasya japamekāha(31) mabjaje|| 49.233 ||
(31.gra. bhojanam)
(32)upavāsaṃ ca kurvīta tato devaṃ spṛśet guruḥ|
ekasminnālaye devi dīkṣito baddakaṃkaṇaḥ|| 49.234 ||
(32.gra. kurvīta ca tato devaṃ spṛśeddīkṣitasattamaḥ|)
ālayāntaradīkṣāyāṃ na badhnīyācca kaṃkaṇam|
[ekaṃ karma samuddiśya rakṣābandhaṃ kṛtaṃ yadi|| 49.235 ||
tenaiva sarvakarmāṇi kuryād deśikasattamaḥ|]
yadi badhnīta mohena tatkarma punarācaret|| 49.236 ||
[mātāpitrordīkṣitaśca vidhuro malinīpatiḥ|]
śrāddhakartā ca patnyāṃ tu garbhiṇyāmapi dīkṣitaḥ|| 49.237 ||
kaṃkaṇaṃ tu na badhnīyāt tathācāravigarhitaḥ|
[ekakuṇḍavidhānaṃ cedutsavādiṣu padmaje|| 49.238 ||
ācāryāmātraṃ badhnīyāt kautukaṃ ṛtvijāṃ vinā|
rakṣāsūtraṃ vinā kuryādekaghasrotsavādikam|| 49.239 ||
bhaktabimbādyutsavaṃ ca sadyaḥ saṃprokṣaṇaṃ tathā|
ekoddiṣṭe sthitaṃ tvabdaṃ nimitte tvaṣṭamāsikam|| 49.240 ||
pitṛvarṇe'pi ṣaṇmāsaṃ vaiśvadeve trimāsikam|
dvimāsaṃ viṣṣuvarṇe tu tyajet kautukakarmaṇi|| 49.241 ||]
sapiṇḍīkaraṇaṃ bhuktvā pūjako dīkṣito'pi san|
daśāhātparato devi mahātīrthāvagāhanam|| 49.242 ||
trisahasraṃ dvādaśārṇajapaṃ kuryād viśuddhaye|
[akṛtvā yadi mohena bhagavantaṃ spṛśedyadi|| 49.243 ||
triṃśadbhiḥ kalaśairdevaṃ snāpayed doṣaśāntaye|]
(33)sahasrārādhanaṃ kuryāt taddoṣasya (34)praśāntaye|| 49.244 ||
(33.gra. pustake'yamardhaślokaḥ kuṇḍalito dṛśyate|)
(34.gra. upaśāntaye|)
[śrāddhabhoktā tu deveśaṃ taddine pūjayedyadi|
garbhagehapraveśe ca snāpayennavabhirghaṭaiḥ|| 49.245 ||
sūtakaṃ vā mṛtāśaucaṃ viṣṇorvā sagṛhādike|
śrutaṃ yadi bahistūrṇaṃ javenāgatya mandirāt|| 49.246 ||
āśaucamācarenmartyastathā strī tu rajasvalā|
(35)pañcaviṃśatibhiḥ kumbhaiḥ snāpayedanyathā yadi||] 49.247 ||
(35.gra. navabhiḥ kalaśairyadi iti pāṭhāntaraṃ gra. pustake darśitam|)
śūdradravye gṛhīte vā doṣānnasya ca bhakṣaṇāt|
kālalobhādinā vāpi nīcairmāsaṃ sahāsanāt|| 49.248 ||
dīkṣitasya manaḥ kiṃcit paścāttāpayutaṃ bhavet|
śuddhān vedavido viprānaṣṭau vā ṣaḍathāpi vā|| 49.249 ||
vṛtvādhvaryūnekaghaṭaṃ vrīhibhāre niveśya ca|
vāsudevaṃ vedamūrtimāvāhya ca ghaṭe purā|| 49.250 ||
pūjayitvā tato vedān vedau vā vedameva vā|
ṛtviṅmukādupaśrutya tanmantritajalena ca|| 49.251 ||
abhiṣikto yadi bhavet sa me prītatamo bhavet|
tasya pūjāṃ pratīkṣe'haṃ kadā vā tādṛśo bhavet|| 49.252 ||
sakṛnniyuṅktastambhaṃ vā vastraṃ vā pakṣilekhitam|
nopayuñjyāt punastaṃ vai niyojayati (36)cedyadi|| 49.253 ||
(36.gra. mohitaḥ)
tatparityajya (37)deveśaṃ pañcaviṃśatibhirghaṭaiḥ|
snāpayītvā śāntihomaṃ śatamaṣṭakṣaraṃ japet|| 49.254 ||
(37.gra. devaṃ yaḥ)
[aṣṭottaraśataiḥ kumbhaiḥ pratimādāhanādike|
vastrādidāhane tasya prabhāpīṭhādidāhane|| 49.255 ||
sudarśane'gninā dagdhe snāpayennavabhirghaṭaiḥ|
dhvaje vitāne chatre ca dagdhe cāstāraṇādike|| 49.256 ||
yathāvatpunarutpādya śāntihomādikaṃ caret]|
dhvajastambhe'gninā dagdhe paṭe vā tatparityajet|| 49.257 ||
tatsthāne'nyaṃ pratiṣṭhāpya taddoṣasyāpanuttaye|
āditastadyathāsāstraṃ karma kuryād vicakṣaṇaḥ|| 49.258 ||
pakṣīśāvāhite kumbhe bhinne vā patite'pi vā|
aspṛśyairvā ghaṭe spaṣṭe stambhe vāpi varānane|| 49.259 ||
paṭevā dūṣite (38)devi pūrvoktaṃ vidhimācaret|
dūṣitaṃ cedekameva tadgataṃ viṣṇumavyayam|| 49.260 ||
(38.gra. vāpi)
āvāhya ca tadanyasmin tasmin śuddhaṃ niveśayet|
punastasmin(39) samāvāhyābhyarcya gurusattamaḥ|| 49.261 ||
(39.gra. samāvāhya gandhādyairarcayed guruḥ|)
vihagendraṃ pratiṣṭhāpya utsavāvabhṛthāvadhi|
kālayoḥ pūjanaṃ kuryānna kuryātkālamabjaje|| 49.262 ||
parasmin divase pūjāṃ tad‌dravyaidvirguṇai(40) ścaret|
navasvapi dineṣvevaṃ pūjanaṃ ca kṛtaṃ yadi|| 49.263 ||
(40.gra. rbhavet|)
dhvajārohaṃ punaḥ kṛtvā hyutsavaṃ ca samācaret|
taddoṣaśāntaye devi devaṃ pūrvoktavartmanā|| 49.264 ||
saṃsnāpya śāntihomaṃ ca kuryād‌deśikasattamaḥ|
purā bheryādi saṃpūjya tato devān samāhvayet|| 49.265 ||
bheryādisthāpanaṃ kāryaṃ yathāśāstraṃ vicakṣaṇaḥ|
vyatyāsena sthāpanaṃ vā pūjanaṃ vā karoti cet|| 49.266 ||
puṇyāhasalilairvāpi na kṛtaṃ prokṣaṇaṃ yadi|
mūlamantrasahasraṃ tu japitvā deśikottamaḥ|| 49.267 ||
yathāvat sthāpya tadanu prokṣayet puṇyavāriṇā|
teṣu devān samāvāhya pūjayeccārghyapūrvakam|| 49.268 ||
saṃtāḍayitvā tadanu devān sarvān samāhvayet|
akṛtvā tāḍanaṃ devi devānāhvayate yadi|| 49.269 ||
dviraṣṭabhirghaṭairdevaṃ hariṃ saṃsnāpya śāntimat|
tataśca tāḍayed bherīṃ devānapi samāhvayet|| 49.270 ||
carmabhede koṇabhede śāntihomaṃ samācaret|
gārutmataṃ mantrajapaṃ gururāmreḍayecchatam|| 49.271 ||
punaranyatsamānīya yathāvattāḍayed guruḥ|
vīthīṣu tattatkāṣṭhāsu tattadvāhanasaṃyutān|| 49.272 ||
sānugān pārṣadān devān gāthābhiśca samāhvayet|
tathā dvārādirathyāntaṃ balidāneṣu sarvataḥ|| 49.273 ||
kālayorbalidānaṃ ca tauryatrikasamanvitam|
dadyād pratidinaṃ devi balidravyasamanvitam|| 49.274 ||
vismṛte tvekadeve tu tannāmaśatakaṃ japet|
tasmai dadyād baliṃ devi vismṛtāya tu sodakam|| 49.275 ||
ekakālaṃ balerdānaṃ na kṛtaṃ yadi vallabhe|
śāntihomaṃ purā kṛtvā devanāma yathākramam|| 49.276 ||
pratyekaṃ śatavāraṃ tu japitvā deśikottamaḥ|
anyasmin samaye teṣāmāhvānaṃ dviguṇaṃ balim|| 49.277 ||
mahāvṛṣṭyādibhiścaiva dasyubhirvāpi kevalam|
vighnite'pyutsave deve sodakaṃ balimutsṛjet|| 49.278 ||
vighnite balidāne'pi paredyavi purā rame|
ṣoḍaśaiḥ kalaśairdevamabhiṣicya ca śāntimat|| 49.279 ||
balidānaṃ tūtsavaṃ ca kuryāt pūrveṇa vai saha|
catuḥpañca dine devi vighnite hyutsave tathā|| 49.280 ||
balidāne'pi deveśamekāśītighaṭairharim|
snāpayitvā śāntihomamadattaṃ ca baliṃ tathā|| 49.281 ||
atikrāntotsavaṃ cāpi kṛtvā taddini utsavam|
kuryāttato'pi devasya kalyāṇe vighnite sati|| 49.282 ||
aṣṭottaraśatairdevaṃ kalaśairabhiṣicya ca|
śāntihomaṃ purā kṛtvā dinānāṃ tāvatāṃ balim|| 49.283 ||
utsavaṃ ca yathāsaṃkhyaṃ kṛtvā taddina utsavam|
balidānaṃ ca kurvīta tena doṣaḥ praśāmyati|| 49.284 ||
ārambhodvāsadinayorlupyate yadi vai baliḥ|
prabhūtānnaṃ ca haraye na nivedayate rame|| 49.285 ||
taddoṣaśāntaye devamaṣṭottaraśatairghaṭaiḥ|
abhiṣicya tataḥ śāntiṃ kṛtvā deśikasattamaḥ|| 49.286 ||
yathākramaṃ balerdānaṃ nivedya ca mahāhaviḥ|
tathotsavaṃ prākrameta na tataḥ pūrvamācaret|| 49.287 ||
[abhaktyā vā subhaktyā vā yena kenāpi vā rame|
devasyāṃge tathā yāne puṣpādīnvikiredyadi|| 49.288 ||
kirīṭabhūṣāśastrādipatane calane'pi vā|
navabhiḥ kalaśairdevaṃ snāpayed vidhipūrvakam|| 49.289 ||]
yānādhiṣṭhitadevasya bimbasya patanena vā|
ānīya cālayaṃ devi hyaṣṭottaraśatairghaṭaiḥ|| 49.290 ||
abhiṣicya yathāśāstraṃ śāntihomaṃ samāpya ca|
saṃprokṣaṇaṃ ca kṛtvaiva śeṣamutsavamācaret|| 49.291 ||
patitasya ca bimbasya kṣatiryadi bhavedrame|
mūle śaktiṃ samāvāhya samādhāya (41)harestanum|| 49.292 ||
(41.gra. gurūttamaḥ)
tataḥ pratiṣṭhāṃ kṛtvaiva dhvajārohaṇapūrvakam|
yathākramaṃ cotsavaṃ ca kuryād (42)deśikasattamaḥ|| 49.293 ||
(42.rāṣṭrābhivṛddhaye|)
[pādukā devadevyośca spṛśeccet pūjaketaraiḥ|
pādukā pañcabhiḥ kumbhaiḥ snāpayet patite'pi ca|| 49.294 ||]
devasyotsavakāle tu grāme maraṇasaṃbhave|
nirgamayya śavaṃ paścād vāstuśāntiṃ (43)samāpya ca|| 49.295 ||
(43.samācaret)
balidānaṃ cotsavaṃ ca tataḥ kuryād (44)vicakṣaṇaḥ|
[vīthibhramaṇakāle tu vīthyāṃ maraṇasaṃbhave|| 49.296 ||
(44.gurūttamaḥ|)
pretasthānaṃ bahistyaktvā vīthibhramaṇamācaret|
anyathā cotsave klṛpte tvadhamādhamamārgataḥ|| 49.297 ||
daṃva saṃsnāpya vidhivat śāntihomaṃ samācaret|
rathotsavasya kāle tu vīthyāṃ maraṇasaṃbhave|| 49.298 ||
niṣkāsya tacchavaṃ paścādyātrotsavamathācaret|]
dagdhe ca vahninā grāme mahāvātyābhipīḍite|| 49.299 ||
pañcagavyādibhiḥ prokṣya śāntihomaṃ samācaret|
navabhiḥ kalaśairdevaṃ saṃsnāpyotsavamācaret|| 49.300 ||
navāhādyutsave klṛpte nyūnaṃ vāpyadhikaṃ tu vā|
karoti yadi mohena tasya doṣasya śāntaye|| 49.301 ||
triṃśadbhiḥ kalaśairdevamabhiṣicya ca śāntimat|
pūrvavaccotsavaṃ kuryāt dhvajārohaṇapūrvakam|| 49.302 ||
[utsavādiṣu sarveṣu evameva samācaret|]
vinā grāmaṃ pattanaṃ vā yatra kutrāpi cālayam|| 49.303 ||
tatra sthitasya devasya balidānotsavau rame|
antarāvaraṇe kuryānna bahistau samācaret|| 49.304 ||
(45)kuryādyadi bahistau tu triṃśadbhiḥ kalaśairharim|
snāpayitvā yathāvacca prākārāntaṃ samācaret|| 49.305 ||
(45.gra. yadi kurvīta mohena)
grāmādivīthiṣu rame tuluṣkapatitādayaḥ|
tiṣṭhanti cettadā devi prākāreṣu baliṃ kṣipet|| 49.306 ||
daivamānuṣadoṣeṇa dhvajārohe tu vighnite|
anāvṛṣṭyā dasyubhirvā paracakrapraveśanāt|| 49.307 ||
ekadvitridinaṃ bhadre vighnite tu mahotsave|
ekāśītighaṭairdevamabhiṣicya yathāvidhi|| 49.308 ||
pūrvāṅkuraṃ parityajya punaḥ kṛtvāṅkurārpaṇam|
dhvajārohādikaṃ sarvaṃ kuryād deśikasattamaḥ|| 49.309 ||
evaṃ tīrthadināntaṃ ca hyutsave vighnite rame|
aṣṭottaraśatairdevaṃ kalaśairabhiṣicya ca|| 49.310 ||
śāntihomaṃ brāhmaṇānāṃ sahasrasya ca bhojanam|
kṛtvā punastīrthadine aṅkurārpaṇapūrvakam|| 49.311 ||
[māse yathokte'tikrānte nakṣatre ca tathā tithau|
utsavānantare māsi yadyarvāgvatsarādbhavet|| 49.312 ||
na kṛto vatsarādarvāgaṣṭottaraśatairghaṭaiḥ|
saṃsnāpya devadeveśaṃ luptotsavamathācaret|| 49.313 ||
vasantādyutsave lupte snapanaṃ tvadhamottamam|
kṛtvā luptotsavaṃ kuryāttadanantaramāsi vā|| 49.314 ||]
dhvajārohādyutsavaṃ ca kuryāt(46) śāstrārthatattvavit|
rathotsave pravṛtte tu cakracchede'kṣabhañjane|| 49.315 ||
(46.gra. deśikasattamaḥ)
rajjucchede śikhākumbhe patite sārathau tu vā|
kṛtvaiva pūrvavad devi puṇyāhaiḥ prokṣya vai ratham|| 49.316 ||
yātrānte śāntihomaṃ ca kuryād brāhmaṇabhojanam|
ārohaṇe tvayogyānāṃ rathasyopari vai rame|| 49.317 ||
niṣkāsya tān pañcagavyaiḥ puṇyāhaiḥ prokṣya vai ratham|
yātrānte navasaṃkhyābhiḥ kalaśairabhiṣecayet|| 49.318 ||
dagdhe rathasyaikadeśe tasya śāntiṃ vadāmi te|
tatkāle pañcagavyaiśca (47)puṇyaiśca salilairapi|| 49.319 ||
(47.gra. puṇyāha)
yātrānte'ṣṭottarairdevaṃ kalaśairabiṣicya ca|
śāntihomaṃ mūlamantrajapaṃ cāyutameva ca|| 49.320 ||
brāhmaṇānāṃ sahasraṃ ca bhojayecca gurūttamaḥ|
rathasya tu mahaddāhe tvavatārya rathāddharim|| 49.321 ||
khageśe devamāropya nayedālayamabjaje|
rathavegena deveśaḥ patedvā sarathastu vā|| 49.322 ||
ānāyya devatāṃ dhāma prokṣayecchāntipūrvakam|
rathabhramaṇavelāyāṃ cakreṇa maraṇaṃ yadi|| 49.323 ||
mṛgāṇāṃ vā manuṣyāṇāṃ śavaṃ niṣkāsayet purā|
khātvā bhūmiṃ śavaspṛṣṭāṃ nikṣipedanyamṛttikām|| 49.324 ||
puṇyāhaiḥ pañcagavyaiśca salilaiḥ prokṣayed bhuvam|
rathasya bhramaṇaṃ cāpi kārayitvā gurūttamaḥ|| 49.325 ||
yātrānte devadeveśamaṣṭottaraśatairghaṭaiḥ|
(48)abhiṣicya tataḥ kuryāt prokṣaṇaṃ śāstracoditam|| 49.326 ||
(48.gra. abhiṣicya tataḥ śāntiṃ brāhmaṇānāṃ sahasrakam|)
[kuryācca bhojayeddepi japenmūlāyutaṃ guruḥ|]
ekadvitridine tāvat svasthānānna caledyadi|| 49.327 ||
vighnite vā rathārohe (49)dināni katicidyadi|
kathaṃcid bhrāmayeddevi rathaṃ doṣāpanuttaye|| 49.328 ||
(49.gra. ekadvitridinaṃ guruḥ|)
[mahārathaṃ māsamekaṃ vīthīṣu bhrāmayedyadi|]
yātrānte vāsudevasya hyekāśītighaṭai(50)rhareḥ|| 49.329 ||
(50.gra. harim|)
abhiṣekaṃ śāntihomaṃ kuryānmūlasahasrakam|
japaṃ ca brāhmaṇānāṃ ca sahasramapi bhojayet|| 49.330 ||
kṛtvotsavaṃ vā pratyabdamekasmin hāyane yadi|
na kṛtaścedrathārohastadānīṃ mantravid guruḥ|| 49.331 ||
sthasthitān devavarān pratyekaṃ pūjayet tataḥ|
tilairājyaiśca carubhiḥ śatamaṣṭottarāhutīḥ|| 49.332 ||
śāntihomaṃ ca kṛtvā tu (51)rathaṃ saṃprokṣya deśikaḥ|
tato yathāvaddeveśaṃ rathamāropayed guruḥ|| 49.333 ||
(51.gra. rathamārohayettataḥ|)
[mahotsavāṅgabhūtānāṃ cūrṇādyutsavakarmaṇām|]
lope tattatpraśāntyarthaṃ devaṃ dvādaśabhirghaṭaiḥ|| 49.334 ||
snāpayitvā śāntihomaṃ kṛtvā cotsavamācaret|
divotsavaṃ divā kuryādāntaṃ rātrestadutsavam|| 49.335 ||
vyatyāsenotsavaṃ kuryāt śāntihomaṃ samācaret|
svayaṃvyaktādidevānāṃ tīrthāvabhṛthamutsavam|| 49.336 ||
rātrāvapi ca kurvīta mānuṣasya na kārayet|
yadi rātrau prakurvīta taddevaṃ navabhirghaṭaiḥ|| 49.337 ||
saṃsnāpya śāntihomaṃ ca kuryād deśikasattamaḥ|
tīrthayātrāvighnitaścedavaropya khagadhvajam|| 49.338 ||
utsavaṃ tu punaḥ kuryāt dhvajārohaṇapūrvakam|
kumbhaprokṣaṇahīne tu triṃśadbhiḥ kalaśairharim|| 49.339 ||
saṃsnāpya śāntihomaṃ ca prokṣaṇaṃ ca punaścaret|
(52)yāvaddināni deveśo vīthyāṃ tiṣṭhati vai rathe|| 49.340 ||
(52.`yāvaddināni' ityārabhya `navadinotsavam' ityantaṃ gra. pustake nāsti|)
tāvatsaṃkalpayeddevi homādau navadinotsavam|
puṣpayāgaṃ (53)tataḥ kuryāt puṣṭyarthaṃ madhyame dine|| 49.341 ||
(53.gra. purā)
āpyāyanārthī pūrvāhṇe dharmārthī madhyame niśi|
ripukṣayārthī madhyāhne saṃdhyāyāṃ sarvaśāntimat|| 49.342 ||
sadyo vikasitaiḥ puṣpaiḥ pañcavarṇaiḥ sugandhibhiḥ|
tadutsavaṃ prakurvīta na tu paryuṣitādibhiḥ|| 49.343 ||
yadi kurvīta mohena navabhiḥ kalaśairharim|
saṃsnāpya devadevaśaṃ puṣpayāgaṃ punaścaret|| 49.344 ||
puṣpayāgasya rātryāṃ tu avaropya khagadhvajam|
vīthyādivāstuniṣṭhānāṃ baliṃ datvā visarjayet|| 49.345 ||
dhvaje naṣṭe tadānīṃ tu punarāropayed dhvajam|
pakṣīśapūjāṃ homaṃ ca tannāmnā tu sahasrakam|| 49.346 ||
kṛtvā punarvainateyamavaropya yathāvidhi|
balidānādi kṛtvaiva devamantaḥ praveśayet|| 49.347 ||
mahotsavānte snapanamekāśītighaṭairbhavet|
na kuryādyadi mohena tataḥ paradine'pi vā|| 49.348 ||
pūrvoktakalaśaiḥ snānaṃ kuryācchāntiṃ yathāvidhi|
[uparāgotsave snānaviṣṭare yānage'pi vā|| 49.349 ||
havirvinā kṣudrāpūjāṃ kṛtvā śarkarayānvitam|
tilacūrṇaṃ mudgadalaṃ pṛthukaṃ vā nivedayet||] 49.350 ||
mahotsave vartamāne grahaṇādyutsavaṃ (54) caret|
(55)na kuryādyadi mohena taddoṣasya praśāntaye|| 49.351 ||
(54.gra. tyajet|)
(55.gra. ācaredyadi)
dvādaśaiḥ kalaśaiḥ snānaṃ kuryādastrāyutaṃ japam|
[parastācca purastācca grahaṇe somasūryayoḥ|| 49.352 ||
dvināḍikāṃ parityajya nityapūjāṃ samācaret|
mahotsavādyutsaveṣu dvimuhūrtaṃ parityajet|| 49.353 ||]
itthaṃ doṣāstu bahavaḥ saṃbhaveyurmahotsave|
deśakālānurodhena kāryasya gurulāghavam|| 49.354 ||
prāyaścittaṃ prakurvīva homaṃ cotsavavahniṣu|
pañcaparvotsavaṃ nityaṃ kuryācca pratimāsikam|| 49.355 ||
na kuryādyadi mohena taddoṣasya praśānteya|
navabhiḥ kalaśairdevaṃ (56)taddoṣasya praśāntaye|| 49.356 ||
(56.gra. abhiṣicya tadutsavam|)
kṛtvāparedyavi harermahānnaṃ ca nivedayet|
[mahotsavādyutsaveṣu tathā devyutsavādiṣu|| 49.357 ||
pañcaparvādyutsavaṃ tu nācared gurusattamaḥ|
pañcaparvādyutsaveṣu prāpte kāvyadinotsave|| 49.358 ||
tadā kāvyadinaṃ tyaktvā pañcaparvādikaṃ caret|
kṛṣṇotsavādyutsaveṣu vighniteṣu yadi priye|| 49.359 ||
anantarasya māsasya tannakṣatre'thavā tithau|
triṃśadbhiḥ kalaśairdevamabhaṣicya ca śāntimat|| 49.360 ||
kṛtvā mūlasahasrasya japamutsavamācaret|
kṛttikādyutsavaścāpi pratiṣiddho bhavedyadi|| 49.361 ||
kṛṣṇotsavoktarītyā tamutsavaṃ kārayed budhaḥ|
pavitrotsavakālastu hyatikrānto yadā bhavet|| 49.362 ||
aṣṭottaraśatairdevamabhiṣicya ca śāntimat|
tadutsavaṃ prakurvīta mantrajño deśikottamaḥ|| 49.363 ||
pavitraṃ yadi padmākṣi nyūnaṃ vāpyadhikaṃ bhavet|
saṃkhyayā vāpi dīrgheṇa hāstramantrāyutaṃ japet|| 49.364 ||
pratilomādibhiḥ spṛṣṭe bhakṣite mūṣikādibhiḥ|
amantrasaṃskṛte vāpi vyatyāsena ca bhūṣite|| 49.365 ||
evaṃ duṣṭapavitraistu bhūṣite pītavāsasi|
tatparityajya deveśamaṣṭottaraśatairghaṭaiḥ|| 49.366 ||
saṃsnāpya śāntihomaṃ ca kuryācca tadanantaram|
śuddhaṃ pavitramutpādya bhūṣayeddharimavyayam|| 49.367 ||
pavitrāropaṇe pūjā yā saṃkhyā tu dine dine|
catuḥsthānārcane vāpi yā saṃkhyā śāstracoditā|| 49.368 ||
ekāpi saṃkhyā luptā cet pūjā sarvā viniṣphalā|
tasmāt sarvaprayatnena saṃkhyālopaṃ vanā hareḥ|| 49.369 ||
pūjayedyadi lopaḥ syāt punarutsavamācaret|
pāvitrikī tīrthayātrā na kṛtā yadi śobhane|| 49.370 ||
aṣṭottaraśatairdevaṃ kalaśairabhiṣicya ca|
utsavaṃ ca punaḥ kṛtvā tīrthayātrāṃ samācaret|| 49.371 ||
[devasyotsavaśālāyāṃ kṛtaṃ cetpūjaketaraiḥ|
āsaneṣvāsanaṃ caiva śayanaṃ bhojanādikam|| 49.372 ||]
tatsthānaṃ pañcagavyena prokṣya śāntiṃ samācaret|
cāturmāsye tu devasya kurvīta śayanotsavam|| 49.373 ||
catuḥsthānārcanaṃ cāpi kuryāt pratidinaṃ tadā|
tallope vyatyaye vāpi mūlāyutajapaṃ tathā|| 49.374 ||
śāntihomaṃ ca kurvīta taddoṣasya praśāntaye|
prātayaścittādikāryārthaṃ (57)ghaṭasnānaṃ purā rame|| 49.375 ||
(57.sanānādikaṃ rame|)
hareryadi bhavet tatsyāt (58)aṅkurārpaṇapūrvakam|
akṛtvāṅkurakāryāṇi kautukaṃ ca na bandhayet|| 49.376 ||
(58.prasūnāṅkura)
prāyaścittaṃ bhavet tasya hyayutaṃ dvādaśākṣaram|
manuṃ japtvā śāntihomamaṅkurārpaṇapūrvakam|| 49.377 ||
badhvā pratisaraṃ cāpi snāpayeddevamacyutam|
saṃkalpya snapanādīni na kuryādyadi vallabhe|| 49.378 ||
śāntihomaṃ purā katvā japedaṣṭākṣarāyutam|
[kautukāṅkurapūrvaṃ tu snāpayeddharimavyayam|| 49.379 ||]
catuḥsthānavihīne tu nācaredaṅkurārpaṇam|
rakṣāsūtraṃ cāvabhṛthaṃ bimbamātrotsavaṃ caret|| 49.380 ||
mantravatsthāpitān kumbhān spṛśeyuḥ pañcamādayaḥ|
bhaveyurvā saṃnikṛṣṭāstān ghaṭān parivarjayet|| 49.381 ||
tatsthānaṃ pañcagavyādyaiḥ śodhayitvā ca mantravat|
punarlakṣaṇasaṃyuktān pramāṇasahitān rame|| 49.382 ||
kalaśānabhisaṃsthāpya teṣu devāṃstu pūjayet|
aṣṭottaraśataṃ vāpi hyaṣṭāviṃśatimeva vā|| 49.383 ||
aṣṭau vāpi japenmantrī teṣāṃ nāmāni padmaje|
[samud‌dhṛtenākrameṇa ghaṭena snāpayedyadi|| 49.384 ||
dviṣaṭ‌kākṣaramantreṇa śatavāraṃ huned guruḥ|
prathamāvaraṇādyantaścaṇḍālādi praveśane|| 49.385 ||
pūjālopādike snānaṃ karmabimbe samācaret|
caṇḍālasūtakodakyāḥ prathamāvaraṇād bahiḥ|| 49.386 ||
praveśe snānabimbasya snapanaṃ vihitaṃ rame|
śrīḥ-
bhagavan kathyatāṃ mahyaṃ sadyaḥ saṃprokṣaṇakramam|| 49.387 ||
śrībhagavān-
(59)sadyaḥ saṃprokṣaṇavidhiṃ śṛṇu tvamanapāyini|
gomayena samālipte maṇḍape dhānyaviṣṭare|| 49.388 ||
(59.`jalasaṃprokṣaṇavidhim' iti pāṭhāntaram iti gra. pustake dṛśyate|)
sthāpayitvā mahākumbhaṃ karakaṃ ca manoharam|
prokṣayet puṇyatoyena tataḥ puṣpāṅkuraṃ caret|| 49.389 ||
nopakumbhārcanaṃ dvārayajanaṃ taddhaṭārcanam|
pūrvoktavartmanā kumbhe paramātmānamarcayet|| 49.390 ||
karake cakrarājaṃ ca prāk kuṇ‍ḍe sthaṇḍile'pi vā|
divyānalaṃ pratiṣṭhāpya tasmin devaṃ samarcayet|| 49.391 ||
mūlanāṣṭottaraśataṃ juhuyāt samidādibhiḥ|
pratyekaṃ śāntihomaṃ ca hutvā pūrṇāhutiṃ caret|| 49.392 ||
vidhivat kautukaṃ badhvā vedaghoṣādibhiḥ saha|
sthāpitaṃ kumbhamādāya prādakṣiṇyena mandiram|| 49.393 ||
nītvā devasya purato dhānyapīṭhe niveśya ca|
pūrvavat prokṣaṇaṃ kṛtvā guḍānnādi nivedayet|| 49.394 ||
tasmāt sarvaprayatnena kṣipraṃ śāntiṃ samācaret|]
ajāvimahiṣājyaiśca paśvantarasamudbhavaiḥ|| 49.395 ||
dadhikṣīraistathā devi māsātītaghṛtairapi|
kṣīrayuktaiśca dadhibhiraśuddhairmadhubhistathā|| 49.396 ||
agālitaiśca salilaistathā paryuṣitairapi|
caṇḍālādispṛṣṭhakūpasalilaiḥ palvalodakaiḥ|| 49.397 ||
durgandhaiḥ śavasaṃspṛṣṭairalpairvā mahadambubhiḥ|
saṃsnāpite tu deveśe punarapyabhiṣecayet|| 49.398 ||
śāntihomaṃ ca kurvīta dvādaśārṇāyutaṃ japet|
[mokṣyamāṇaḥ sadā kuryād dharmārthī dinamadhyame|| 49.399 ||
ripukṣayārthī pūrvāhṇe rājakārye'parāhṇake|
dinānte sarvabhogārthī prāyaścittāya sarvadā|| 49.400 ||]
mahānadījalānāṃ ca tathā setujalasya ca|
sālagrāvābhiṣiktasya payasaḥ puṣkarasya ca|| 49.401 ||
mantravatkalaśasthānāmadivāsaistathārcanaiḥ|
na puryaṣitadoṣo'sti tatra devādhivāsanāt|| 49.402 ||
[āvartamityanāvartaṃ punarāvartameva hi|
prokṣaṇaṃ trividhaṃ proktaṃ tattatkālānusārataḥ|| 49.403 ||
ādau bālagṛhāddevaṃ mūlabere pratiṣṭhite|
tadāvartamiti jñeyaṃ caṇḍālaiḥ pulkasādibhiḥ|| 49.404 ||
spṛśet pūjā vatsarāntaṃ hīnā cet tatra kalpitam|
anāvartabhiti proktaṃ jīrṇoddhārakriyādiṣu|| 49.405 ||
mūlād bāle hariṃ dhyātvā sandhānānantaraṃ vibhum|
punarmūle sthāpanaṃ tu punarāvartamucyate|| 49.406 ||
tattatkālānusāreṇa prokṣaṇaṃ vidhivaccaret|]
kālāntaravaśāt teṣāṃ bimbānāmālayasya ca|| 49.407 ||
vaikalyaṃ yadi jāyeta tatsamādhānamucyate|
pūrvoktānāṃ tu bimbānāṃ mukhyāmukhyavibhedataḥ|| 49.408 ||
aṅgāni dvividhānīha bhavanti kamalekṣaṇe|
cakṣuḥśiraḥkarṇanāsāvāgghanurdantapaṅktayaḥ|| 49.409 ||
hṛdayaṃ ca tathā meḍhrasthānamaṅgulayastathā|
etānyaṅgāni mukhyāni hyamukhyānītarāṇi ca|| 49.410 ||
hiraṇmayāni bimbāni rājatāni ca tatra ca|
tāmrādilohajātāni tathā śailamayāni ca|| 49.411 ||
(60)vāstrāṇi vastramṛccitraprabhavāṇi bhavanti hi|
svayaṃvyakteṣu (61)bimbeṣu siddhārṣeṣu harestanau|| 49.412 ||
(60.gra. vārkṣāṇi)
(61.gra. divyeṣu)
mukhyāṅge vā hyupāṅge vā vaikalyaṃ yadi jāyate|
avaśyameva saṃdhānaṃ vastrādiṣvapi kalpayet|| 49.413 ||
sarvadhātuparityāgaṃ svayaṃvyaktādi nārhati|
svarṇādilohajāteṣu mukhyāṅgamapi bheditam|| 49.414 ||
tattad‌dravyaistu saṃdhāya prokṣaṇaṃ ca samācaret|
śilāmayī vṛkṣajātā hyarcā tu vikalā bhavet|| 49.415 ||
svarṇādipaṭṭakairaṅgaṃ samādadhyāt kathaṃcana|
citramṛnmayavāstrāṇāṃ tattad‌dravyaistu yojayet|| 49.416 ||
svayaṃvyaktādibimbānāṃ pūjayanneva deśikaḥ|
bālālayamakṛtvaiva samādadhyācca śilpibhiḥ|| 49.417 ||
samādhātuṃ na śakyaṃ cet svayaṃvyaktādikeṣvapi|
bālabimbaṃ pratiṣṭhāpya tasminnāvāhya keśavam|| 49.418 ||
tattallohaistadākāraistattallakṣaṇasaṃyutaiḥ|
kurvīta bimbaṃ na tvanyadākāraṃ vāpi lakṣaṇam|| 49.419 ||
turuṣko vāpi caṇḍālaḥ pratilomaja eva vā|
spṛśeyuryadi bimbāni maṇḍapādīni vai rame|| 49.420 ||
bālagehe tu tacchaktimāvāhyārcāṃ tu pūrvavat|
kārayitvā pratiṣṭhāpya pūjayecca yathākramam|| 49.421 ||
corairapahṛtānāṃ vā nadībhiḥ sindhunāpi vā|
arcānāṃ bālabimbaṃ tu na kuryācchāstravittamaḥ|| 49.422 ||
āvāhitaṃ śaktyabhāvāt kārayet pratimāṃ guruḥ|
sarvadoṣavinirmukte kṛtvālayamanuttamam|| 49.423 ||
yathāśāstraṃ pratiṣṭhāpya pūjayet tatra deśikaḥ|
karmādiṣvaṅgabhaṅge tu tacchaktiṃ mūlakautuke|| 49.424 ||
āvāhya prokṣayettattatsamādhāya gurūttamaḥ|
pratimā caiva tatpīṭhaṃ prāsādo garbhamandiram|| 49.425 ||
vigraho devadevasya catuṣṭayamidaṃ samam|
samā bhavetteṣu śāntiḥ samādhiśca samo bhavet|| 49.426 ||
svarṇādilohajaṃ vāpi mānuṣyaṃ dāruśailajam|
mṛnmayaṃ vā vastrajātaṃ citraṃ vāpi varānane|| 49.427 ||
svarṇādilohasaṃbhūtaṃ kathaṃcidyojayedrame|
sarvathā tu samādhātuṃ na śakyaṃ cettato guruḥ|| 49.428 ||
tāni bimbāni saṃcintya nūtanāni ca kalpayet|
parityaktaṃ lohajātaṃ nūtane tu niyojayet|| 49.429 ||
jīrṇaṃ vā nūtanaṃ vāpi māsāntaḥ kalpayedyadi|
ghaṭe śaktiṃ samāvāhya pūjayet deśikottamaḥ|| 49.430 ||
māsātparaṃ vatsaraṃ vā tato vāpyadhikaṃ bhavet|
bālabimbaṃ pratiṣṭhāpya tasmin saṃprārthayeddharim|| 49.431 ||
[nityaṃ naimittikaṃ kāmyaṃ pavitrādyutsavādikam|
bālabimbe prakurvīta na tu karmādiṣu kvacit|| 49.432 ||]
atītaścet prārthanāyāḥ kālaḥ kamalasaṃbhave|
punaḥ saṃprārthayet tasmin bimbe bāle gurūttamaḥ|| 49.433 ||
śilāmayādibimbānāṃ samādhiścenna śakyate|
alpaṃ vāpi bṛhadbimbaṃ mānuṣyaṃ varavarṇini|| 49.434 ||
agādhe salile vāpi bhūmau khātvā vinikṣipet|
harerbimbe kalpyamāne devībhiḥ saha kalpitāḥ|| 49.435 ||
na kṛtāścet purā devyo nirmāṇe garuḍadhvaje|
punaḥ pratiṣṭhākāle tu sṛṣṭvā saṃprokṣayecca tāḥ|| 49.436 ||
prāk‌sthitaṃ tvekaberaṃ vā bahuberamathāpi vā|
jīrṇoddhāre tathaiva syurna tu bhedaṃ samācaret|| 49.437 ||
śayanādivibhedo'pi punaḥ sṛṣṭau tathā bhavet|
svayaṃvyaktādibimbānāṃ pīṭhabhaṅgo bhavedyadi|| 49.438 ||
bhagnaṃ pīṭhaṃ parityajya punaranyaṃ prakalpayet|
yatkiṃcit pīṭhabhaṅge tu bandhayellohapaṭṭakaiḥ|| 49.439 ||
bimbe vajrasya patane dagdhe vā vahninā rame|
na cedbimbasya vaikalyaṃ pratiṣṭhāmeva kārayet|| 49.440 ||
bhinnāṅgaṃ cetsamādhāya pratiṣṭhāmārabheta vai|
itthaṃ yadi bhaved devi svayaṃvyaktādikeṣvapi|| 49.441 ||
aṅgabhaṅgaṃ samādhāya prokṣayitvā tu pūjayet|
mānuṣe vā svayaṃvyakte saṃdhānaṃ vigrahe yadi|| 49.442 ||
saṃdhāya prokṣaṇaṃ kāryaṃ na ca tvanyo vidhirbhavet|
nūtanaṃ cet pratiṣṭhaiva sarvabimbasya kārayet|| 49.443 ||
prāsādamaṇḍapādīnāṃ jīrṇoddhāra ihocyate|
manuṣyanirmite tatra prāsāde tvakadeśataḥ|| 49.444 ||
bhagne kumbhasya patane vimānasthāśca devatāḥ|
mūlabimbasya pīṭhe tu samāvāhya tato guruḥ|| 49.445 ||
mūlārcāṃ pūjayanneva saṃdadhyād garbhamandiram|
kṛte vimānasaṃdhāne savimānaṃ ramāpatim|| 49.446 ||
saṃprokṣayed yathāśāstraṃ nayanonmīlanaṃ vinā|
vimāne sarvato bhagne bālasthānaṃ prakalpayet|| 49.447 ||
tasmin mūlaṃ samāvāhya tatpīṭhe sarvadevatāḥ|
vimānasthāḥ samāvāhya pūjayed deśikottamaḥ|| 49.448 ||
(62)vimānaṃ śāstravatkṛtvā pūrvavadvā tathānyavat|
bimbe bhagne bālagehaṃ kalpayitvā tu pūrvavat|| 49.449 ||
(62.gra. prāsādaṃ)
bimbamātraṃ samādhāya pratiṣṭhāṃ tatra kārayet|
evaṃ maṇḍapasālānāṃ pākasthānasya vai rame|| 49.450 ||
deṃvānanyatra cāvāhya samādhānaṃ praśasyate|
vārkṣaṃ vā mṛnmayaṃ vāpi prāsādaṃ pūrvakalpitam|| 49.451 ||
jīrṇoddhāre tviṣṭakayā śilayā vāpi kārayet|
mānuṣasya vimānāderjīrṇoddhārastvayaṃ kramaḥ|| 49.452 ||
svayaṃvyaktādike dhāmni jīrṇoddhārastvayaṃ kramaḥ|
prāsādasyaikadeśe tu bhagne saṃdhānamācaret|| 49.453 ||
nāvāhayecca tatrasthā devatā mūlakautuke|
vimāne sarvato bhagne mūlabimbasya pīṭhake|| 49.454 ||
samāvāhyārcayanneva prāktanairiṣṭakādibhiḥ|
nūtanaiścāpi saṃdadhyānmelayitvā śilādibhiḥ|| 49.455 ||
pūrvaṃ vimānaṃ yad‌dravyaṃ śilādyanyataraṃ bhavet|
salakṣaṇaṃ vā tadbhinnaṃ tādṛgeva prakalpayet|| 49.456 ||
evaṃ bimbe vimāne ca pākasthāne ca maṇḍape|
gopure vāpi sāle vā tathā jīrṇe tu kalpayet|| 49.457 ||
[devasya prokṣaṇānte ca prāsādasya ca padmaje|
rajanyāmutsavaṃ kuryāt paredyuḥ snapanaṃ tathā|| 49.458 ||]
svayaṃvyaktasya mūlasya saprāsādasya padmaje|
kathaṃcidapi devasya saṃdhānaṃ śakyate na cet|| 49.459 ||
kṛtvā bālagṛhaṃ tasminnāvāhyaiva tu bandhayet|
purātanaṃ vimānaṃ vā bimbaṃ vāpi samīkṛtam|| 49.460 ||
aṣṭottaraśatairdevaṃ kalaśairabhiṣicya ca|
saṃprokṣayedyathāśāstraṃ nūtanaṃ yadi vallabhe|| 49.461 ||
svayaṃvyaktaṃ mānuṣaṃ vā tayoḥ sarvaṃ yathāvidhi|
pratiṣṭhākarma kurvīta tayorbhedastu na kvacit|| 49.462 ||
evaṃ hi sarvadevānāṃ sarvavyūhādirūpiṇām|
[viṣvaksenagaṇeśānāṃ garuḍadvārarakṣiṇām|| 49.463 ||
klṛptānāṃ gopurādyeṣu vibhavavyūharūpiṇām|]
sāṃnidhyātiśayāt teṣāṃ pūjitānāṃ dinaṃ prati|| 49.464 ||
jīrṇoddhāravidhiḥ kāryaḥ prabhāvāhanajanmanām|
[kriyāsaṃdehaviṣaye parasparavirodhataḥ|| 49.465 ||
saṃjñayā vā cīṭikayā diṣṭyā vācā mahātmanām|
svapnena vā nimittena jñātvā devasya (63)pūjanam|| 49.466 ||
(63.`saṃmatam' iti pāṭhabhedaḥ gra. pustake darśitaḥ|)
tataḥ pūjādikaṃ kuryānnāpacāro bhavedyathā|
ācāryo mantrasaṃpūrṇaḥ kriyāpūrṇāstu śilpinaḥ|| 49.467 ||
dātā tu vittasaṃpūrṇo devasāṃnidhyakāraṇam|
ete vyatyāsayuktāścet trikulaṃ naśyati dhruvam|| 49.468 ||
saṃsārārṇavamagnānāṃ karmapāśānupeyuṣām|
hitārthaṃ sarvalokānāṃ tvayā saṃprārthitena yat|| 49.469 ||
śāstraṃ tubhyaṃ mayā proktaṃ taddivyatamamucyate|
jaganmūlaṃ vāsudevaṃ mukhyataḥ pratyapādayat|| 49.470 ||
tacchāstraṃ mūlavedākhyamityapi procyate budhaiḥ|
adhyetṛbhedamāśritya śāstrametat tridhā rame|| 49.471 ||
sāttvataṃ pauṣkaraṃ caiva jayākhyaṃ ca bhaviṣyati|
athaitāḥ saṃhitā divyāḥ vadiṣyanti vipaścitaḥ|| 49.472 ||
tatastu prabhaviṣyanti sāttvikādyāśca saṃhitāḥ|
tasmāt sarvaprayatnena jīrṇoddhārādike rame|| 49.473 ||
na lakṣaṇāntaraṃ kuryānna pramāṇāntaraṃ tathā|
na tu dravyāntaraṃ caiva bhaṭṭācāryāntaraṃ tathā|| 49.474 ||
tantrāntaraṃ na kurvīta na ca kuryāt kriyāntaram|
śāstramantrakriyādīnāṃ mūrtīnāṃ bhavanasya ca|| 49.475 ||
deśikasyābhijātasya yathāpūrvaṃ parigrahaḥ|
tathaiva yāvat kālaṃ syādarcitavyaṃ na cānyathā|| 49.476 ||
viparīte kṛte cātra rājā rāṣṭraṃ vinaśyati|
tataḥ samācaredyatnāt pratiṣṭhāṃ prākprakārataḥ|| 49.477 ||
tasmāt siddhāntasāṃkaryaṃ nārcitavyaṃ kṛtātmabhiḥ|
rāṣṭrakṣobhādinā vāpi gurvalābhādinā rame|| 49.478 ||
pūjāhīne mānuṣe ca rākṣase cāsure tathā|
tadā hyutkṛṣṭaśāstroktamārgeṇaiva supūjayet|| 49.479 ||
tāmasena tu mārgeṇa yatra pūjādi vartate|
tatrāpi rājasenaiva pūjādyaṃ siddhidaṃ bhavet|| 49.480 ||
rājasena tu pūjādi vartate yatra nityaśaḥ|
tatrāpi sāttvikenaiva pūjādi śubhadaṃ sadā|| 49.481 ||
sāttvikena tu pūjādi vartate yatra nityaśaḥ|
tatra divyena pūjādi sarvadā kṣemadaṃ nṛṇām|| 49.482 ||
yatra divyena mārgeṇa pūjādyaṃ vartate vibhoḥ|
tatra divyatamenaiva pūjādyaṃ bhuktimuktidam|| 49.483 ||
tasmāt sarvaprayatnena viparītaṃ tu nācaret|
pūjā divyatamenaiva svayaṃvyaktādike caret|| 49.484 ||]
bimbādīnāṃ ca dhāmāderaṅgabhaṅge hyupasthite|
ācāryastvanutāpārto varṇacakraṃ likhet purā|| 49.485 ||
tatpūjayitvā vidhivadyāvaddevastu pūrvavat|
utpādyate tāvadeva brahmacaryavrataṃ caran|| 49.486 ||
tasmāt svamantramud‌dhṛtya nityaṃ prātaḥ samāhitaḥ|
japaṃ kuryādayutasaṃkhya dvisahasraṃ ca homayet|| 49.487 ||
catuḥsthānārcanaṃ kuryāt brāhmaṇānapi bhojayet|
vedān vā devamekaṃ ca paṭheyurniyamānvitāḥ|| 49.488 ||

|| iti śrīśrīpraśnasaṃhitāyāṃ prāyaścittaprapañcanaṃ nāma (64)aṣṭacatvāriṃśo'dhyāyaḥ ||
(64.`ekonapañcāśo'dhyāya' iti bhāvyam|
       prāyaścittanirūpaṇaṃ nāma pañcaśo'dhyāya iti gra. pustake vartate|)