Chapter 91

[English text for this chapter is available]

nārada uvāca |
ityuktvā bhagavānviṣṇuḥ śapharītulyarūpadhṛk |
sa papātāṃjalau viṃdhye nivāse kaśyapasya ca || 1 ||
[Analyze grammar]

sa taṃ kamaṃḍalau kṣipraṃ kṛpayā kṣiptavānmuniḥ |
tāvatsa na mamau tatra tataḥ kūpe nyaveśayat || 2 ||
[Analyze grammar]

tatrāpi na mamau tāvatkāsāre prākṣipatsatām |
evaṃ sa sāgare kṣiptastatra so'pyanvavarddhata || 3 ||
[Analyze grammar]

tato'vadhītsa taṃ śaṃkhaṃ viṣṇurvai matsyarūpadhṛk |
atha taṃ svakare dhṛtvā badarīvanamāgataḥ || 4 ||
[Analyze grammar]

tatrāhūya ṛṣīnsarvānidamājñāpayadvibhuḥ |
śrīkṛṣṇa uvāca |
jalāṃtare viśīrṇāṃstu yūyaṃ vedānpramārjatha || 5 ||
[Analyze grammar]

ānayadhvaṃ ca tvaritāḥ sarahasyaṃ jalāṃtarāt |
tāvatprayāge tiṣṭhāmi devatāgaṇasaṃyutaḥ || 6 ||
[Analyze grammar]

nārada uvāca |
tatastaiḥ sarvamunibhistapobalasamanvitaiḥ |
uddhāritāḥ ṣaḍaṃgāste vedā yajñasamanvitāḥ || 7 ||
[Analyze grammar]

teṣu yāvanmitaṃ yena labdhaṃ tāvanmitasya hi |
sa sa eva ṛṣirjātastadāprabhṛti pārthiva || 8 ||
[Analyze grammar]

atha sarve'pi saṃgamya prayāgaṃ munayo yayuḥ |
viṣṇave savidhātre te labdhānvedānnyavedayan || 9 ||
[Analyze grammar]

labdhvā vedānsayajñāṃstu brahmāharṣasamanvitaḥ |
ayajaccāśvamedhena devarṣigaṇasaṃvṛtaḥ || 10 ||
[Analyze grammar]

yajñā te devadeveśa siddhapannagaguhyakāḥ |
nipatya daṃḍavadbhūmau vijñaptiṃ tatra cakrire || 11 ||
[Analyze grammar]

devā ūcuḥ |
devadevajagannātha vijñaptiṃ śṛṇu naḥ prabho |
harṣakālo'yamasmākaṃ tasmāttvaṃ varado bhava || 12 ||
[Analyze grammar]

sthāne'sminnṛṣayo vedānnaṣṭānprāpuḥ punaḥ svayam |
yajñabhāgānvayaṃ prāptāstvatprasādādramāpate || 13 ||
[Analyze grammar]

sthānametadapi śreṣṭhaṃ pṛthivyāṃ puṇyavarddhanam |
bhuktimuktipradaṃ cāstu prasādādbhavataḥ sadā || 14 ||
[Analyze grammar]

kālo'pyayaṃ mahāpuṇyo brahmaghnādiviśuddhikṛt |
dattākṣayakaraścāstu varametadvadasva naḥ || 15 ||
[Analyze grammar]

śrīviṣṇuruvāca |
mamāpyetanmataṃ devā yadbhavadbhirudāhṛtam |
tattathāstu labhatvetadbrahmakṣetramiti prathām || 16 ||
[Analyze grammar]

sūryavaṃśodbhavo rājā gaṃgāmatrānayiṣyati |
sā sūryakanyayā cātra kāliṃdyā saṃgamiṣyati || 17 ||
[Analyze grammar]

yūyaṃ ca sarve brahmādyā nivasadhvaṃ mayā saha |
tīrtharāje'ti vikhyātaṃ tīrthametadbhaviṣyati || 18 ||
[Analyze grammar]

dānaṃ tapo vrataṃ homo japapūjādikāḥ kriyāḥ |
anaṃtaphaladāḥ saṃtu matsāṃnidhyapradāḥ sadā || 19 ||
[Analyze grammar]

brahmahatyādi pāpāni bahujanmakṛtānyapi |
darśanādasya tīrthasya vināśaṃ yāṃtu tatkṣaṇāt || 20 ||
[Analyze grammar]

dehatyāgaṃ tathā dhīrāḥ kurvaṃti mama sannidhau |
mattanuṃ praviśaṃtyeva punarjanmani no narāḥ || 21 ||
[Analyze grammar]

pitṝnnirdiśya ye śrāddhaṃ kurvaṃtyatra samāgatāḥ |
teṣāṃ pitṛgaṇāḥ sarve yāṃtu te matsalokatām || 22 ||
[Analyze grammar]

kālo'pyeṣa mahāpuṇyaphalado'stu sadā nṛṇām |
sūryye makarage prātaḥ snāyināṃ pāpanāśanam || 23 ||
[Analyze grammar]

makarastharavau māghe prātaḥ snānaṃ prakurvatām |
darśanādeva pāpāni yāṃti sūryādyathā tamaḥ || 24 ||
[Analyze grammar]

salokatvaṃ sarūpatvaṃ samīpatvaṃ trayaṃ kramāt |
nṛṇāṃ dadāmyahaṃ snānānmāghe makarage ravau || 25 ||
[Analyze grammar]

yūyaṃ munīśvarāḥ sarve śṛṇudhvaṃ varado'smi vaḥ |
badarīvanamadhye'haṃ sadā tiṣṭhāmi sarvagaḥ || 26 ||
[Analyze grammar]

anyatra daśabhirvarṣaistapasāvāpyate phalam |
tadatra divasaikena bhavadbhiḥ prāpyate sadā || 27 ||
[Analyze grammar]

sthānasya darśanaṃ tasya ye kurvaṃti narottamāḥ |
jīvanmuktāstadā teṣu pāpaṃ naivāvatiṣṭhate || 28 ||
[Analyze grammar]

sūta uvāca |
evaṃ devāndevadevastaduktvā tatraivāṃtarddhānamāgātsa vedhāḥ |
devāḥ sarve'pyaṃśakaistatra tasthuścāṃtarddhānaṃ prāpuriṃdrādayaste || 29 ||
[Analyze grammar]

imāṃ ca gāthāṃ śṛṇuyānnarottamo yaḥ śrāvayedvāpi viśuddhacittaḥ |
sa tīrtharājaṃ badarīvanaṃ yatkṛtvā phalaṃ māṃ samavāpnuyācca || 30 ||
[Analyze grammar]

iti śrīpādme mahāpurāṇe uttarakhaṃḍe paṃcapaṃcāśatsahasrasaṃhitāyāṃ kārtikamāhātmye śrīkṛṣṇasatyabhāmāsaṃvāde śaṃkhāsuravadho vedāgame prayāgamāhātmyaṃ nāmaikanavatitamo'dhyāyaḥ || 91 ||
[Analyze grammar]