Chapter 46

[English text for this chapter is available]

śeṣa uvāca |
āgataṃ vīkṣya śrīrāmaṃ śatrughnaḥ praṇatārtiham |
bhrātaraṃ sakalādduḥkhānmukto'bhūddvijasattama || 1 ||
[Analyze grammar]

hanūmānvīkṣya vibhrāṃto rāmasya caraṇau mudā |
vavaṃde bhaktarakṣārthamāgataṃ nijagāda ca || 2 ||
[Analyze grammar]

svāmiṃstavaitadyuktaṃ tu svabhaktaparipālanam |
yatsaṃgrāme jitaṃ sarvaṃ pāśabaddhamamocayaḥ || 3 ||
[Analyze grammar]

vayaṃ tvidānīṃ dhanyā vai yaddrakṣyāmo bhavatpade |
jeṣyāmo'rīnkṣaṇādeva tvatkṛpāto raghūdvaha || 4 ||
[Analyze grammar]

śeṣa uvāca |
sthāṇustadāgataṃ rāmaṃ yogināṃ dhyānagocaram |
patitvā pādayorvipra jagāda praṇatābhayam || 5 ||
[Analyze grammar]

ekastvaṃ puruṣaḥ sākṣātprakṛteḥ para īryase |
yaḥ svāṃśakalayā viśvaṃ sṛjasyavasi haṃsi ca || 6 ||
[Analyze grammar]

arūpastvamaśeṣasya jagataḥ kāraṇaṃ param |
eka eva tridhārūpaṃ gṛhṇāsi kuhakānvitaḥ || 7 ||
[Analyze grammar]

sṛṣṭau vidhātṛrūpeṇa pālane svayamāsa ca |
pralaye jagataḥ sākṣādahaṃ śarvākhyatāṃ gataḥ || 8 ||
[Analyze grammar]

tava yatparameśasya hayamedhakratukriyā |
brahmahatyāpanodāya tadviḍaṃbanamadbhutam || 9 ||
[Analyze grammar]

yatpādaśaucamamalaṃ gaṃgākhyaṃ śirasoṃ'tarā |
vahāmi pāpaśāṃtyarthaṃ tasya te pātakaṃ kutaḥ || 10 ||
[Analyze grammar]

mayā bahvapakārāya kṛtaṃ karma tava sphuṭam |
kṣamyatāṃ tatkṛpālo hi bhavato vyavadhāyakam || 11 ||
[Analyze grammar]

kiṃ karomi mayā satyapālanārthamidaṃ kṛtam |
jānanprabhāvaṃ bhavato bhaktarakṣārthamāgataḥ || 12 ||
[Analyze grammar]

asau purā ujjayinyāṃ mahākālaniketane |
snātvā śiprākhya sariti tapastepe mahādbhutam || 13 ||
[Analyze grammar]

tataḥ prasanno jāto'haṃ jagāda bhūmipaṃ prati |
yācasveti mahārāja sa vavre rājyamadbhutam || 14 ||
[Analyze grammar]

mayā proktaṃ devapure tava rājyaṃ bhaviṣyati |
yāvadrāmahayaḥ puryāmāgamiṣyati yājñikaḥ || 15 ||
[Analyze grammar]

tāvatprabhṛtyahaṃ sthāsye tava rakṣārthamudyataḥ |
etaddattavaro rāma kiṃ karomi svasatyataḥ || 16 ||
[Analyze grammar]

ghṛṇito'smyadhunā rājñā saputrapaśubāṃdhavaḥ |
hayaṃ samarpyate pādasevāṃ rājā vidhāsyati || 17 ||
[Analyze grammar]

śeṣa uvāca |
iti vākyaṃ samākarṇya maheśasya raghūttamaḥ |
uvāca dhīrayā vācā kṛpayā pūrṇalocanaḥ || 18 ||
[Analyze grammar]

rāma uvāca |
devānāmayamevāsti dharmo bhaktasya pālanam |
tvayā sādhukṛtaṃ karma yadbhakto rakṣito'dhunā || 19 ||
[Analyze grammar]

mamāsi hṛdaye śarva bhavato hṛdaye tvaham |
āvayoraṃtaraṃ nāsti mūḍhāḥ paśyaṃti durdhiyaḥ || 20 ||
[Analyze grammar]

ye bhedaṃ vidadhatyaddhā āvayorekarūpayoḥ |
kuṃbhīpākeṣu pacyaṃte narāḥ kalpasahasrakam || 21 ||
[Analyze grammar]

ye tvadbhaktāsta evāsanmadbhaktā dharmasaṃyutāḥ |
madbhaktā api bhūyasyā bhaktyā tava natiṃkarāḥ || 22 ||
[Analyze grammar]

śeṣa uvāca |
itthaṃ bhāṣitamākarṇya śarvo vīramaṇiṃ nṛpam |
mūrcchitaṃ jīvayāmāsa karasparśādinā prabhuḥ || 23 ||
[Analyze grammar]

anyānapi sutānasya mūrcchitāñcharapīḍitān |
jīvayāmāsa sa mṛḍaḥ samarthaḥ prabhurīśvaraḥ || 24 ||
[Analyze grammar]

sajjaṃ vidhāya taṃ bhūpaṃ śrīrāmapadayornatim |
kārayāmāsa bhūteśaḥ putrapautraiḥ parīvṛtam || 25 ||
[Analyze grammar]

dhanyo rājā vīramaṇiryo dadarśa raghūttamam |
yogibhiryoganiṣṭhābhirduṣprāpamayutāyutaiḥ || 26 ||
[Analyze grammar]

te natvā raghunāthaṃ taṃ kṛtārthī kṛtavigrahāḥ |
brahmādibhiḥ pūjyatamā abhūvandvijasattama || 27 ||
[Analyze grammar]

śatrughna hanumadbhyāṃ ca puṣkalādibhirudbhaṭaiḥ |
pariṣṭutāya rāmāya dadau rājā hayottamam || 28 ||
[Analyze grammar]

rājyena sahitaṃ sarvaṃ saputrapaśubāṃdhavam |
śarveṇa preritaḥ prādādbhūpo vīramaṇistadā || 29 ||
[Analyze grammar]

tato rāmo nutaḥ sarvairvairibhirnijasevakaiḥ |
śatrughnādibhiratyaṃtamutsukaiśca viśeṣataḥ || 30 ||
[Analyze grammar]

rathe maṇimaye tiṣṭhanbabhūva sa tirohitaḥ |
aṃtarhite rāmabhadre sarve prāpuḥ suvismayam || 31 ||
[Analyze grammar]

mā jānīhi manuṣyaṃ taṃ rāmaṃ lokaikavaṃditam |
jale sthale ca sarvatra vartate saṃsthitaḥ sadā || 32 ||
[Analyze grammar]

tato vīrā alaṃ hṛṣṭā anyonyaṃ parirebhire |
tūryamaṃgalavāditraiḥ sumahānutsavo'bhavat || 33 ||
[Analyze grammar]

tato mukto hayaḥ sarvairvīraiḥ śastrāstrakovidaiḥ |
sarvairanugataḥ prītairvismayena samanvitaiḥ || 34 ||
[Analyze grammar]

śarvaḥ satyapratijñaśca tamanujñāpya sevakam |
śrīrāmaṃ śaraṇaṃ procya yāhi lokaikadurllabham || 35 ||
[Analyze grammar]

svayamaṃtarhitastatra pralayotpattikārakaḥ |
kailāsamagamaccharvaḥ sevakaiḥ pariśobhitaḥ || 36 ||
[Analyze grammar]

bhūpo vīramaṇirdhyāyañchrīrāmacaraṇodajam |
śatrughnena yayau sākaṃ balinā balasaṃyutaḥ || 37 ||
[Analyze grammar]

etadrāmasya caritaṃ ye śṛṇvaṃti narottamāḥ |
teṣāṃ saṃsārajaṃ duḥkhaṃ na bhaviṣyati karhicit || 38 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
hayaprasthānaṃnāma ṣaṭcatvāriṃśattamo'dhyāyaḥ || 46 ||
[Analyze grammar]