Chapter 211

nirvāṇavarṇanaṃ nāma sargaḥ |
ekādaśottaradviśatatamaḥ sargaḥ |
vasiṣṭhaḥ |
jagannāma nabhaḥ svacchaṃ sadbrahma nabhasi sthitam |
nabho nabhasi bhātīdaṃ jagacchabdārtha ityajam || 1 ||
[Analyze grammar]

tvamahaṃ jagadityādiśabdārthairbrahma brahmaṇi |
śāntaṃ samasamābhāsaṃ sthitamasthitameva sat || 2 ||
[Analyze grammar]

samudragirimeghorvīvisphoṭamayamapyajam |
kāṣṭhamaunavadevedaṃ jagadbrahmāvatiṣṭhate || 3 ||
[Analyze grammar]

draṣṭādraṣṭaiva dṛśyasyābhāvātsvātmani saṃsthitaḥ |
kartākartaiva kartavyābhāvataḥ karaṇādṛte || 4 ||
[Analyze grammar]

na jñatvaṃ na ca kartṛtvaṃ na jaḍatvaṃ na bhoktṛtā |
na śūnyatā na cārthatvamiha nāpi nañarthatā || 5 ||
[Analyze grammar]

śilājaṭharavatsatyaṃ ghanamekamajaṃ tatam |
sarvaṃ śāntamanādyantamekaṃ vidhiniṣedhayoḥ || 6 ||
[Analyze grammar]

maraṇaṃ jīvitaṃ satyamasatyamaśubhaṃ śubham |
sarvamekamajaṃ vyoma vīcijālaṃ jalaṃ yathā || 7 ||
[Analyze grammar]

vidbhāga eva dṛśyatvaṃ draṣṭṛtvaṃ caiva gacchati |
etacca kalpanaṃ svapnapurādiṣvanubhūyate || 8 ||
[Analyze grammar]

evamacchaṃ parākāśe svapnapattanavajjagat |
bhāti prathamamevedaṃ brahmaivetthamataḥ sthitam || 9 ||
[Analyze grammar]

tadidaṃ tādṛśaṃ viddhi sarvaṃ sarvātmakaṃ ca yat |
deśāddeśāntaraprāptau vido madhyamanaṅkitam || 10 ||
[Analyze grammar]

cidvyomnaśśāntaśāntasya madhyamevaivamāsthitam |
jagattayeva salilamevormyāditayā yathā || 11 ||
[Analyze grammar]

yadudetyuditaṃ yacca yacca nodeti noditam |
deśāddeśāntaraprāptau vido madhyānna bhedi tat || 12 ||
[Analyze grammar]

ataḥ kilāsya sargasya kāraṇaṃ śaśaśṛṅgavat |
prayatnenāpi cānviṣṭaṃ na kiñcidupalabhyate || 13 ||
[Analyze grammar]

yadakāraṇakaṃ bhāti tadabhātaṃ bhramātmakam |
bhramasyāsatyarūpasya satyatā kathamucyate || 14 ||
[Analyze grammar]

kāraṇena vinā kāryaṃ kila kiṃ nāma vidyate |
yadaputrasya satputradarśanaṃ sa bhramo na sat || 15 ||
[Analyze grammar]

yastvakāraṇako bhāti sa svabhāvo vijṛmbhate |
sarvarūpeṇa saṅkalpagandharvanagarādivat || 16 ||
[Analyze grammar]

deśāddeśāntaraprāptau kṣaṇānmadhyaṃ vido vapuḥ |
svarūpamajahattveva rājate'rthavivartavat || 17 ||
[Analyze grammar]

bodha eva kacatyartharūpeṇa sa ca khādaṇuḥ |
dṛṣṭānto'trānubhūto'ntaḥ svapnasaṅkalpaparvataḥ || 18 ||
[Analyze grammar]

rāmaḥ |
vidyate vaṭabīje'ntaryathā bhāvī mahādrumaḥ |
paramāṇau tathā sargo brahman kasmānna vidyate || 19 ||
[Analyze grammar]

vasiṣṭhaḥ |
yatrāsti bījaṃ tatra syācchākhā vitatarūpiṇī |
janyate kāraṇaiḥ sā ca vitatā sahakāribhiḥ || 20 ||
[Analyze grammar]

samastabhūtapralaye bījamākāri kiṃ bhavet |
sahakāryatha kiṃ tasya jāyate yadvaśājjagat || 21 ||
[Analyze grammar]

yattu brahma paraṃ śāntaṃ kā tatrākārakalpanā |
paramāṇutvayogo'pi nātra kevātra bījatā || 22 ||
[Analyze grammar]

kāraṇasyeti bījasya satyāsatyaikakāriṇaḥ |
asambhavājjagatsattā kathaṃ kena kutaḥ kva vā || 23 ||
[Analyze grammar]

jagadāste parasyāṇorantarityapi nocitam |
sārṣape kaṇake merurāsta ityajñakalpanā || 24 ||
[Analyze grammar]

sati bīje pravartante kāryakāraṇadṛṣṭayaḥ |
nirākārasya kiṃ bījaṃ kva janyajanakakramaḥ || 25 ||
[Analyze grammar]

ato yatparamaṃ tattvaṃ tadevedaṃ jagatsthitam |
neha prajāyate kiñcinna ca kiñcana naśyati || 26 ||
[Analyze grammar]

cidākāśaścidākāśe hṛdi cittvājjagadbhramam |
aśuddhavadivāśuddhe śuddhaśśuddhe prapaśyati || 27 ||
[Analyze grammar]

svameva bhāsate tasya rūpaṃ spanda ivānile |
sargaśabdārthakalanā neha kāścana santi naḥ || 28 ||
[Analyze grammar]

yathā śūnyatvamākāśe dravatvaṃ ca yathā jale |
ananyātmamaye śuddhā sargateyaṃ tathātmani || 29 ||
[Analyze grammar]

bhārūpamidamāśāntaṃ jagadbrahmaiva nastatam |
anādinidhanaṃ satyaṃ nodeti na ca naśyati || 30 ||
[Analyze grammar]

deśāddeśāntaraprāptau kṣaṇānmadhye vido vapuḥ |
yattajjagaditīvedaṃ vyomātmātmanyavasthitam || 31 ||
[Analyze grammar]

yathā spando'nile toye dravatvaṃ vyomni śūnyatā |
tathā jagadidaṃ bhātamananyattvidamātmani || 32 ||
[Analyze grammar]

saṃvinnabho nanu jagannabha ityanaṅkamātmanyavasthitamanastamayodayāṅkam |
tatrāṅgabhūtamakhilaṃ tadananyadeva śūnyaṃ nirastakalano'mbaraśāntamāssva || 33 ||
[Analyze grammar]