Chapter 49

gādhivṛttānte māyāmahattvakathanaṃ nāma sargaḥ |
ekonapañcāśaḥ sargaḥ |
vasiṣṭhaḥ |
atha gādhirgate viṣṇau punarhūnādikāñjanān |
svasammohavicārārthaṃ babhrāmābhramivāmbare || 1 ||
[Analyze grammar]

upalabhya tathaivātmavṛttāntaṃ janatastataḥ |
harimārādhayāmāsa punaradriguhāgataḥ || 2 ||
[Analyze grammar]

ājagāmainamalpena kālenātha janārdanaḥ |
sakṛdārādhanenaiva mādhavo yāti bandhutām || 3 ||
[Analyze grammar]

uvāca gādhiṃ bhagavānmayūramiva vāridaḥ |
kiṃ tvaṃ prārthayase bhūyastapaseti prasādavān || 4 ||
[Analyze grammar]

gādhiḥ |
bhrānto'smi deva ṣaṇmāsān hūnakīrajanāspadam |
tatra vyabhicaratyasmadvṛttānto na kathāsvapi || 5 ||
[Analyze grammar]

māyayā hūnabhūrdṛṣṭā tvayetyukto'smi kiṃ prabho |
mohanāśāya mahatāṃ vaco no mohavṛddhaye || 6 ||
[Analyze grammar]

bhagavān |
kākatālīyayogena cetasi śvapacasthitiḥ |
sarveṣāṃ hūnakīrāṇāṃ tathaiva pratibimbitā || 7 ||
[Analyze grammar]

tenāṅga tava vṛttāntaṃ satyaṃ yatkathayanti te |
pratibhāso hi nāyāti punarapratibhāsatām || 8 ||
[Analyze grammar]

kenacicchvapacenānte grāmasya racitaṃ gṛhaṃ |
tattathā yattvayā dṛṣṭamiṣṭakākhaṇḍatāṃ gatam || 9 ||
[Analyze grammar]

kadācitpratibhaikaiva bahūnāmapi jāyate |
kākatālīyagativadvicitrā hi manogatiḥ || 10 ||
[Analyze grammar]

tathā hi bahavaḥ svapnamekaṃ paśyanti mānavāḥ |
svāpabhramadamaireyamadamantharacittavat || 11 ||
[Analyze grammar]

ekasyāmeva līlāyāṃ vanasthalyāmivaiṇakāḥ || 12 ||
[Analyze grammar]

bahavastulyakālaṃ ca pratibhātena karmaṇā |
janā yatante svaphalapākeneva drumā ṛtau || 13 ||
[Analyze grammar]

pratibandhābhyanujñānāṃ kālo dāteti yā śrutiḥ |
vipra saṅkalpamātro'sau kālo hyātmani tiṣṭhati || 14 ||
[Analyze grammar]

amūrto bhagavān kālo brahmaiva tamajaṃ viduḥ |
na jahāti na cādatte kiñcitkasyacideva saḥ || 15 ||
[Analyze grammar]

laukiko yastvayaṃ kālo varṣakalpayugātmakaḥ |
saṅkalpyate padārthaughaiḥ padārthaughāśca tena te || 16 ||
[Analyze grammar]

samānapratibhāsotthasambhramabhrāntacetasaḥ |
tathā taddṛṣṭavantaste hūnakīrajanoccayāḥ || 17 ||
[Analyze grammar]

svavyāpāraparo bhūtvā dhiyātmānaṃ vicārayan |
sādho gatamanomohamihaivāssva vrajāmyaham || 18 ||
[Analyze grammar]

ityuktvā bhagavānviṣṇurjagāmāntardhimīśvaraḥ |
atiṣṭhatkandare gādhirādhipīvarayā dhiyā || 19 ||
[Analyze grammar]

tataḥ katipayeṣvadrau māseṣvapi gateṣu saḥ |
punarārādhayāmāsa puṇḍarīkakaraṃ dvijaḥ || 20 ||
[Analyze grammar]

dadarśa caikadā nāthamāgataṃ praṇanāma tam |
pūjayāmāsa manasā sotkenovāca ceśvaram || 21 ||
[Analyze grammar]

gādhiḥ |
bhagavan saṃsmaraṃścitrāṃ tāmātmaśvapacasthitim |
imāṃ saṃsāramāyāṃ ca parimuhyāmi cetasā || 22 ||
[Analyze grammar]

taduktvāśu yathāvastu mahāmohanivṛttaye |
etasminneva vimale māṃ niyojaya karmaṇi || 23 ||
[Analyze grammar]

bhagavān |
brahmañjagadidaṃ māyāmahāśambaraḍambaram |
sarvā āścaryakalanāḥ sambhavantīha vistṛte || 24 ||
[Analyze grammar]

hūnakīrapure mohāddṛṣṭavāṃstattathā bhavān |
ityetatsambhavatyeva dṛśyate hi janairbhramaḥ || 25 ||
[Analyze grammar]

hūnāstvamiva kīrāśca dṛṣṭavantastathā bhramam |
mudhaivetyapi satyābhaṃ samakālādisambhavāt || 26 ||
[Analyze grammar]

idaṃ tu śṛṇu vakṣyāmi yathābhūtamanindita |
yenaiti tanutāṃ cintā mārgaśīrṣalateva te || 27 ||
[Analyze grammar]

yo'sau kaṭañjako nāma śvapaco hūnamaṇḍale |
tenaiva sanniveśena sa tathaivābhavatpurā || 28 ||
[Analyze grammar]

tathaiva vikalatratvaṃ prāpya deśāntaraṃ gataḥ |
babhūva kīranṛpatiḥ praviveśānalaṃ tataḥ || 29 ||
[Analyze grammar]

bhavataḥ kevalaṃ citte jalāntarvartinastadā |
pratibhātā tathābhūtā kaṭañjācārasaṃsthitiḥ || 30 ||
[Analyze grammar]

dṛṣṭānubhūtamatyarthaṃ kadācidvismaratyalam |
kadācidapyadṛṣṭaṃ tu cetaḥ paśyati dṛṣṭavat || 31 ||
[Analyze grammar]

yathā svapnamanorājyadhātusaṃsthitiṣu bhramaḥ |
jāgratyapi tathaivāṅga dṛśyate manasā svayam || 32 ||
[Analyze grammar]

bhaviṣyadbhūtakālasthaṃ yathā traikālyadarśinaḥ |
pratibhāmeti te gādhe kaṭañjacaritaṃ tathā || 33 ||
[Analyze grammar]

ayaṃ so'hamidaṃ tanme iti majjati nātmavān |
ayaṃ so'hamidaṃ tanme iti paśyatyanātmavān || 34 ||
[Analyze grammar]

sarvamevāhameveti tattvajño nāvasīdati |
na gṛhṇāti padārtheṣu vibhāgānarthabhāvanām || 35 ||
[Analyze grammar]

tenāsau bhramamoheṣu sukhaduḥkhavilāsiṣu |
na nimajjati magno'pi tumbīpātramivāmbhasi || 36 ||
[Analyze grammar]

tvaṃ tāvadvāsanājālagrastacitto vicetanaḥ |
kiñciccheṣamahāvyādhiriva na svāsthyamāgataḥ || 37 ||
[Analyze grammar]

jñānasyāparipūrṇatvānna śaknoṣi manobhramam |
vinivārayituṃ meghamasamyaṅmantravāniva || 38 ||
[Analyze grammar]

yadeva te manomātre sahasā pratibimbate |
taruroghajaveneva tenaivākramyase kṣaṇāt || 39 ||
[Analyze grammar]

cittanābheḥ kalāsyeha māyācakrasya sarvataḥ |
sthīyate cettadākramya tanna kiñcitprabādhate || 40 ||
[Analyze grammar]

tvamuttiṣṭha gireḥ kuñje daśavarṣāṇyakhinnadhīḥ |
tapaḥ kuru tato jñānamanantābhāvamāpsyasi || 41 ||
[Analyze grammar]

ityuktvā puṇḍarīkākṣastatraivāntaradhīyata |
vātābhravaddīpakavad yamunotpīḍavatkṣaṇāt || 42 ||
[Analyze grammar]

gādhirvivekavaśajaṃ vairāgyaṃ paramāgataḥ |
śaratsamayaparyante vairasyamiva pādapaḥ || 43 ||
[Analyze grammar]

vicitraṃ ceṣṭitaṃ dhāturasamañjasamātatam |
bṛhadbhramabharonmuktamatirmandamagarhayat || 44 ||
[Analyze grammar]

jagāma karuṇārdrātmā niyamāyottamaśriye |
viśrāntyai vṛṣṭamūkātmā payodhara ivācalam || 45 ||
[Analyze grammar]

nirastāśeṣasaṅkalpastapastatra cakāra ha |
daśavarṣāṇi tenāsāvātmajñānamavāpa ha || 46 ||
[Analyze grammar]

aramata tadanu svāṃ prāpya sattāṃ mahātmā vyapagatabhayamoho bhogabhūmāvanicchaḥ |
satatamuditajīvanmuktarūpaḥ praśāntaḥ sakala iva śaśāṅko ghūrṇitāpūrṇacetāḥ || 47 ||
[Analyze grammar]